About Bible Thianghlim | ©

BibleThianghlim – ZEFANIAH

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

ZEFANIAH

123

• A ngantu: Zefaniah
• A siartu: Judah (Pathian minungpawl)
• A huap sung cān: B.C. 640–612 Karlak

Zefaniah 1:1 vekin, profet Zefaniah cu Judah ram ih thlarau lam remṭhatnak pipa hruaitu Pathian mi siangpahrang Hezekiah-ih tusin a si (2Sp 18:1-7 zoh aw). Zefaniah-ih rawngbawlnak cu a sungkhat hla, Josiah a lal lai a si (B.C. 640-609). Josiah hlanih Judah ram ih siangpahrang pahnih (Manasseh le Amon) in kum 50 hnak tam an uk ih, annih cu misualrál zet an si (2Sp 21 le 2San 33 zoh aw). Curuangah Zefaniah in Pathian hril mi milai (Judah) sualnak simaw, miphun dangpawl sualnak simaw, sual parih Pathian dāntatnak tam zet a phuang. Pathian in pathian dang biaknak cu a zoh men lo ding ih, amai dān kalhih cangvaihnak khal a zoh men lo ding.

Hi cabu-ih zirhnak tamsawn cu Jehovah Ni ti mi thu ah a khaikhawmaw (1:7, 8, 14, 15, 16, 18; 2:2, 3; 3:8, 11, 16). Jehovah Ni ti hi nazi 24 rei ni khat a si lo ih, a tumtah mipawl a hlensuahnak Jehovah-ih cān hleice a si sawn. Hi hin kap hnih a nei (misualpawl parih dāntatnak le Pathian mipawl parih malsawmnak), cule cān huap pahnih (a nai le a hla) a nei. Lung thleng duh lo pawl hnenah sual ruangah dāntatnak a thleng lohli ding tiin Pathian in hi cabu siar hmaisatupawl hnenah ralrinnak a pe. Josiah a lal laiih ṭhangphawknak tawite khan leng lam thlengawknak lawng a suah, curuangah Pathian in B.C. 605, 597 le 586 ah Judah dān a tat. Sikhalsehla, cumi cu hmai lam cān ih Pathian in misualpawl dān a tat ding le a mipawl thlawsuah a pek ding thlir sungnak a si.

Zefaniah cabu cu ṭhen hnih ih ṭhen theih a si, cumi ih kan hmuh mi cu Jehovah Ni ti hin dāntatnak le malsawmnak a sawhkhih thei ih, a nai le a hla khal a sawhkhih thei (1:2-3:8 le 3:9-20). Ṭhen hmaisa ah, Judah-mipawl in Pathian thupekpawl ih tlukluh an el ruangah, Pathian in dāntatnak an parah a thlengter ding ti Zefaniah in a simfiang hai (1:2-2:3; 3:1-7). Annih cun a diklo mi pathianpawl tla an bia ih, Pathian in pawi a ti taktak lo ti lungput an nei (1:12). Pathian in an kiangkap miphunpawl khal dān a tat ding tiah Zefaniah in a sim (2:4-15; 3:8). Pathian minungpawl an tuahsiatnak, an duhamnak, ralkap cahnak an rinsannak le pathian diklo an biaknak in Pathian dāntatnak a thlengter ding.

Ṭhen hnihnak in (3:9-20) ruahsannak, malsawm le tundinsalnak a reluar. Curuangah 3:9-20 cu ṭhen hmaisa ih dāntatnak linglet a si. An hnenih a um ruangah, Pathian an upat ih, a hnenah an tlulut ih, amah an bia ih an rĕn theinak dingah, Pathian in Jew le Zentel cu a thianfai hai ding (3:15, 17).

1

1 Judah siangpahrang Amon fapa Josiah san lai Hezekiah fapa, Amariah fapa, Gedaliah fapa, Kushi fapa Zefaniah hnenih Jehovah kamsuakthu thleng mi.

Jehovah Ni Rapthlak

2 «Leilung hmai ihsin
Ziangkim ka hlorálter thluh ding,» Jehovah in a ti.
3 «Minung le ramsa ka hlorálter thluh ding;
Van zuang vâtepawl,
Tifinriat ngapawl le,
Bahnak lungpawl cu misualrálpawl zawngah ka hlorálter thluh ding.
Leilung hmai ihsin minung ka that ding,» tiah Jehovah in a phuang.
4 «Judah dokalhin le Jerusalem luahtupawl hmuahhmuah dokalhin ka kut ka hawi ding.
Baal umsŭnpawl hi hmun ihsin ka ṭhiatbăl ding,
Milem bia puithiampawlih hmin cu puithiampawl zawngah.
5 Inn tlun ihsi van ih thilmak rual betupawl;
Milkom hmin sâlih sesăm si ih,
Jehovah betupawl le amah hmin ih sesămtupawl;
6 Jehovah hnen ihsi kirpawl le,
Jehovah hawl lo le amah răwn lo tupawl khal.»
7 Bawipa Jehovah hmaiah daiten um uh;
Ziangahtile Jehovah ni cu a nâi thlang a si,
Ziangahtile Jehovah in raithawinak a timlam zo;
A mikhualpawl a rak sawm hai zo.
8 «Cule Jehovah-ih raithawi ni ah hitin a si ding,
Bawipawl le siangpahrang fātepawl dān ka tat ding ih,
Ram dang hnipuan hruhtupawl hmuahhmuah thawn.
9 Cuih ni thotho ah an pulepawlih innpawl thahrumsuahnak le bumnak thawi khattertu,
Sângka hnuai zawn zial tlunih khirtupawl hmuahhmuah cu dān ka tat hai ding.
10 «Cule cuih ni ah,» Jehovah in a ti.
«Nga Kăwtka ihsin ṭah aw a thang ding,
Veng Thar ihsin ṭahrâk aw le
Tlangmualpawl ihsin kekkuai aw a um ding.
11 Nannih Maktesh luahtupawl râk rero uh!
Ziangahtile sumdâwng zaten thah an si;
Paisa kaitu hmuahhmuah khal thah ṭheh an si.
12 Cule cuih cān ah hitin a si ding,
Jerusalem cu meitopawl thawn ka hawlsuak ding ih,
Hnangamih um huahhi men,
An thinlung sungteih,
‹Jehovah in thil ṭha siseh,
Thil ṭhalo khal siseh a tuah lo ding,› titupawl dān ka tat hai ding.
13 Curuangah an thilripawl cu ralthillâk ah an cang ding ih,
An innpawl a ṭhing ding;
Innpawl tla an sak ding, asinan an luah lo ding.
Sabit hmuanpawl an tuah ding, asinan sabitzu an inngah lo ding.»
14 Jehovah ni rapthlak cu a nâi a si;
Cumi cu a nâi ih, a hmanhmawh zet.
Jehovah ni thawmvâng cu a nasatuk;
Miralṭhapawl nasazetin an ausuak ding.
15 Cuih ni cu thinling ni,
Harsat le vansanglam ni,
Siat le ṭhin ni,
Khawthim le lungsiat ni,
Khawdur le thim mepmep ni,
16 Tawtawrawt phawt ni,
Kulhhnget nei khawpipawl dokalh le
Dawlsâng dokalhih au ni a si.
17 «Minungpawl parah vansannak ka thlĕn ding ih,
Mitcawpawl bangin an feh ding,
Ziangahtile Jehovah dokalhin thilsual an rak tuah a si;
An thisen cu leivut bangin sungbŭng a si ding ih,
An titsa cu êk bangin hlăwn a si ding.»
18 Jehovah thinling ni ah
An sui le an ngun in anmah a runsuak thei lo ding;
Asinan leilung tlun pumpi cu a thîksiatnak meisa in a kangrál thluh ding,
Ziangahtile leilung tlunih cêngtupawl hmuahhmuah cu rang zetin a hlorálter verver ding.

2

Sual Sir dingih Kawhnak

1 Fĭnkhawm aw uh, a si,
Maw duhum lo miphun,
Fĭnkhawm aw uh,
2 Thusuah mi thlahsuak a si hlan le,
Fānghi bangin ni a liam hlan,
Jehovah thinheng ṭihnungza nan parih a thlen hlan,
Jehovah thinheng ni nan parih a thlen hlanah!
3 Nannih amai diknak kaihngettu,
Leilung tlunih mităngdawrpawl hmuahhmuah,
Jehovah hawl uh.
Dingfelnak hawl uh, tăngdawrnak hawl uh.
Jehovah thinheng ni ah thuh nan si na hman maw!

Miphunpawl Dāntatnak

4 Ziangahtile Gaza cu thlauthlak a si ding ih,
Ashkelon cu a ṭhing reprep ding;
Sun laifangah Ashdod an dawisuak ding ih,
Ekron cu a hram ihsin phăwng a si ding.
5 Tifinriat kap tluanih um,
Kereth miphun, nan hmakhua a pit a si!
Filisṭia-mipawlih ram, Maw Kanaan:
Jehovah kamsuakthu in a lo dokalh,
Luahtu nei lo dingin
Ka lo siatbăl ding.
6 Tifinriat kap tluan cu ran tlannak a si ding,
Rante rual khāltupawl hrangah beunak le rante rual hrangah hruangkulh a um ding.
7 Cuih tifinriat kap tluan cu Judah sungza a tāngsŭn hrangah a si ding;
Cu tawkah ei le in an hmu ding;
Ashkelon innpawl ah zan ah an zau ding.
Ziangahtile Jehovah an Pathian in a ngaihsak hai ding ih,
Ralkaihpawl a hruaikirsal ding.
8 «Moab-ih mi hmuhsuamnak le
Ammon-mipawlih mi nautatnak ka hna in ka rak thei,
Ka mipawl an rak hmuhsuam ih,
An ramripawl dokalhin hngal zetin an hro.
9 Curuangah ka nun rori vekin,» Israel Pathian, ralkap rualpawlih Jehovah in a ti.
«Moab cu Sodom vek a si tengteng ding ih,
Ammon-mipawl cu Gomorrah vek an si ding,
Hling keuhnak hmun le cikhur ah a cang ding ih,
Kumkhua a ṭhing ta ding.
A tang hrih mi ka mipawl in anmah cu an sîm ding ih,
An rampawl cu a tāngsŭn ka mipawl in an luah ding.»
10 Himi hi an hngal man ih an co ding mi a si,
Ziangruangahtile mi an rak hmuhsuam ih,
Ralkap rualpawlih Jehovah-ih mipawl cu hngal zetin an rak hro.
11 Jehovah cu an hrangah ṭihnungza a si ding,
Ziangahtile anih cun leilung tlunih pathian hmuahhmuah cu zianghmanlo ah a cangter thluh ding,
Mi kip anmai umnak hmun cio in,
Tifinriat kap tluan miphunpawl hmuahhmuah in amah an be ding.
12 «Nannih Kush-mipawl khal,
Ka ralnâm ih thah nan si ding.»
13 Cule sak lam dokalhin a kut a suah ding,
Assiria a tisiat ding ih,
Nineveh ṭhing ko a tuah ding,
Ramṭhing ro bangin.
14 A sungah ranpi rual an kûal ding,
Ramsa phun zakip in.
^aKa-at va le kippod vâte cu ṭhuam lupawl ah an riak ding;
Tukvirhpawl ah an aw a thang ding;
Sângka hnuai zawn zial a siat ding;
Ziangahtile sidar thing ih tuah mipawl a hâwkdarh ding.
15 Himi cu ralmûang zetih um khawpi lungawiaipuang a si,
A thinlung in, «Keimah ka si, keimah siarlo a dang zohman an um lo,» tiah a ti.
Ziangtin anih cu ṭhing reprepih a căn,
Ramsapawl kūalnak hmun menah!
Amah lăntu pauhpauh in an heheu ding ih,
An kuttum an hmuh ding.

2:14^a Ka-at va: Pui 11:18 simfiangnak zoh aw.

3

Jerusalem Sualralzia

1 Khawpi helhmang le bawrhhlawh,
Mipalbĕthmang khawpi,
Na hmakhua a pit!
2 Anih cun zawih thu hman a ngai lo,
Nunrĕmnak khal a cohlang lo;
Jehovah a rak rinsan lo,
A Pathian a rak naih fawn lo.
3 A sungih bawipawl cu kiosa hûk rero vek an si;
A thuṭhentupawl cu zing lam hrangih hlah mi nei lo,
Zan lam cinghnia vek an si.
4 A profetpawl cu fimkhur lo, mirinum lo an si;
A puithiampawl in hmun thianghlim an bawrhhlawhter,
Dān an pahbăl.
5 An lakih um Jehovah cu a dingfel ih,
Dingfellonak a tuah lo ding.
Zing tin a diknak a langter;
A tlawlh dah lo,
Asinan midik lo cun ningzah a nei lo.
6 «Miphunpawl ka rak that,
An kulhhngetpawl cu tisiat an si;
An kăwtthler ṭhing ko ka tuah,
Mivak sukso an um lo.
An khawpipawl tisiat an si;
Zohman an um lo, luahtu a um lo.
7 Kei in, ‹Thungaiten nang in kei i ṭihzah ding,
Nun zirhnak na cohlang ding,
Culawngah amai thuhla ih ka rak ruah mi hmuahhmuah vekin,
A cēnnak hmun cu tisiat loin a rak um ding,› tiah ka ti.
Asinan an thil ti ah sual tuah an hiar deuhdeuh.

Mirinum Umsŭn

8 «Curuangah keimah in hngak uh,» Jehovah in a ti, «Răm dingih ka thawh ni tiang,
Miphunpawl fĭnkhawm,
Lalrampawl punkhawmawkter,
An parih ka aithawhnak,
Ka thinhengnak ṭihnungza hmuahhmuah burh hi ka thuruahcat mi cu a si.
Leilung pumpi cu ka thîkthusiatnak meisa in a kangrál thluh ding
9 Ziangahtile cuih cān ah an zaten Jehovah hmin an kawh theinak dingah,
Thinlung hmunkhatih amah rian thei dingah
Miphunpawl cu hmur thianghlim ka pe hai ding.
10 Kush tivapipawl ralkhat ih keimah i betupawl in,
Ka mivakdarhpawl in,
Ka thilhlăn an run keng ding.
11 Cuih ni ah keimah lakih na helnak hnaṭuan ruangah na ning a zak lo ding;
Ziangahtile na sung ihsin mihngal le khaisângawpawl ka lahlo ding ih,
Nang cu ka tlang thianghlim ah na puarthau dah nawn lo ding.
12 Na sungah minunnem le
Mităngdawrpawl ka tân ding ih,
Annih in Jehovah hmin an rinsan ding.
13 Israel tāngsŭnpawl cun dingfellonak an tuah lo ding ih,
Thuphan an rel lo ding,
An kâ sungah bumnak lei hmuh a si lo ding;
Ziangahtile zohman ih thlaphanter loin
An ei ding ih an cawlhahdam ding,» tiin.

Pathian Rinumnak ih Aipuannak

14 Maw Zion fanu, hla sak aw!
Maw Israel, au aw!
Maw Jerusalem fanu,
Na thinlung zaten lungawi awla lungawiaipuangin um aw!
15 Jehovah in nangmah dāntatnakpawl cu a lahlo zo,
Na doral a hlăwnhlo zo.
Israel Siangpahrang, Jehovah cu nan lakah a um;
Siatnak na hmu nawn lo ding.
16 Cuih ni ah Jerusalem hnenah,
«Ṭih hlah;
Zion, na kutpawl cak loin um hlah seh.
17 Jehovah na Pathian cu nan lakah a um,
Runtu ding Micak Pa cu;
Anih cu nan parah lungawinak thawn lungawiaipuangin a um ding,
A duhdawtnak ruangah lo kawk lo ten a um ding,
Anih cu hla saknak thawn nan parah lungawiaipuangin a um ding,» ti ih sim a si ding.
18 «Ruah cia mi puaipawl hrangih riahsia mipawl cu ka hruaikhawm hai ding,
Annih cu na hnen ihsin ka hruaihlo,
Annih cu ngunkhuai ah le zahpium ah an cang.
19 Zoh hnik, cuih cān ah nangmah lo dekcăwktu hmuahhmuah cu dān ka tat ding;
Kebái ka run ding ih,
Dawisuah mipawl ka khawm ding;
Leilung tlun hmun kip ih an ningzahnak cu
Thangṭhatnak le hminthannak ah ka thlengsak hai ding.
20 Cuih cān ah, ka lo fĭnkhawm tikah,
Ka lo hruailut hai ding;
Ziangahtile leilung miphunpawl hmuahhmuah lakah
Na mithmuhih na vanneihnak ka tundinsal tikah,
Hminthannak le thangṭhatnak ka lo pe ding,» tiah Jehovah in a ti.