About Bible Thianghlim | ©

BibleThianghlim – 1 PETER

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 PETER

12345

• A ngantu: Peter
• A siartu: Asia Minor sak lamih zumtupawl
• Ngan kum: A.D. 62-65

Kawhhran cu a ram zawngin le a mipum zawngin a karhzai vivo vekin tiduhdahnak khal a sosang vivo. Zumtupawl cun Rom nunphung an thlun duh lo ruangah Rom uknak sungih zumlotupawl in anmah cu an hua (4:3-4). Cuvek tiduhdahnak in zumtupawl cu Asia Minor sak lamih um mi Ponṭas, Galatia, Kappadosia, Asia le Bithinia (1:1) rampawl ah a dawiṭek hai. Cuih rampawl an thlen hnu khalah Khrih thawn an pehtlaihawknak ruangah (4:14-19) le a dik mi tuah an duhnak ruangah (3:14) an tuar vivo thotho. Hih cakuat a dawngtu hi Jew-mi khal an tel ve ko ding nân, Zentelmi an tambik ding (1:18; 2:10; 4:3-4). Hih zumtupawl in thil ṭha an tuah vivo theinak dingah thapek an ṭul.

Apostol Peter hi zumtupawl hnenah hivek thapeknak cakuat ngan dingah Pathian ih hril mi a si. A rawngbawlnak lam tluanah Peter in tiduhdahnak nasazet a tuar ringring (Apo 4:3; 5:17-42; 8:1; 12:1-19). Curuangah Bawipa in amah a rak zirh mi cawngin anih cun thurawn ṭha a pe. Hi apostol hi a Bawipaih tuarnak rak hmungahtu a si ih, hih zumtupawl thapeknak ah dingfelnak ruangih Jesu-ih tuarnak cu zohṭhim dingah a hmang (2:21-25; 3:18-22).

Hi cakuat hi Peter in a nunnak cem a naih lamih a ngan mi a si. Khristian tiduhdahnak a sosanbik tikcu A.D. 62-65 hrawngih a ngan mi a si men thei.

Apostol in a cabu sungah tuarnak thu a sim leuhleuh (vei 16), asinan Pathian zangfahnak khal a phuanglang thotho. Rundamnak hrang (1:1-2:10), tuarnak hrang (2:11-4:19) le rawngbawlnak hrang (5:1-14) ih Pathian zangfahnak a reluar. A cakuat hi Pathian-ih mangbangza rundamnak thu in a thăwk (1:1-12) ih, an rundamnak ropi zulhin Pathian mi si dingin thupek 34 hrawng hmangin tha a pe hai.

Hi cakuat hi zumtupawl zumnak ah an din theinak ding le an din vivo theinak ding hrangih Pathian zangfahnak dik hi a pawimawh a si ti hmuhsaknak maktak a si (5:12). Himi Pathian zangfahnak thotho hin tuarnak lakah hril mi zumtupawl hnenah nehnak a pe hai.

1

Cibaibûknak

1 Jesu Khrih-ih apostol, Peter in, Ponṭas, Galatia, Kappadosia, Asia le Bithinia pengpawl ih a ṭekvai mi, mikhual vekih a rak um mipawl hnenah ca ka lo kuat a si. 2 Pa Pathian-ih theih cianak bangtukih hril mi nan si ih, Jesu Khrih thisen theh cotu dingah le thulung dingah Thlarau ih tithianghlim nan si.

Nan parah zangfahnak um sehla, nan hnangamdaihnak cu karh seh.

Ruahsannak Nung

3 Pathian le kan Bawipa Jesu Khrih-ih Pa cu thangṭhatin um seh, anih cun mithi lak ihsin Jesu Khrih a thawhsalnak zarah ruahsannak nung nei dingin a nasazet mi a zahngainak in in hring, 4 a ṭawihrál thei lo mi, a bawrhhlawh lo mi le a cuai thei lo mi ro nan co ding mi cu van ah ret cia-in a um. 5 Zumnak ruangih rundamnak, cān neta ah langter dingih timtuah cia mi cu co dingin Pathian huham ih kilven nan si.

6 Atu ah a ṭul a si ahcun, harsatnak phun zakip ruangah cān rei lo te sung cu thinnain um hrih hman uhla, himi ah nasazetin lungawiaipuangin nan um. 7 Meisa ih hniksak cing hmanih a siatrál mi sui hnakin, a man a khungsawn mi nan zumnak hniksaknak cun Khrih a rung lăng tikah, thangṭhatnak, upatnak le sunlawihnak a thlengter ding. 8 Amah cu nan hmu dah lo nân, nan duhdawt. Atu ah amah cu hmu dah lo hman uhla nan zum thotho ih, nan zumnak ih a hmuitin mi nan thlarau rundamnak coin, 9 kâ ih sim thei lo mi lungawiaipuannak thawn nan ai a puang.

10 Cuih rundamnak cu profetpawl in ngunngaih zetin an rak hliakhlai ih, an rak hawl. Nan hnenih a thleng ding mi zangfahnak cu an rak phuang cia. 11 Cuih profetpawl hnenih um, Khrih Thlarau cun Khrih ih a tuar ding mipawl le cumi hnuih sunlawih a si ding thu cu a theihter cia. Profetpawl cun cumi cu ziang a si ti theihsuah tumin le ziang tikah a thleng ding tiin an hawl. 12 Vancungmipawl in bih an hiar zet mi thilpawl van ihsin run thlah mi Thlarau Thianghlim thawngin nan hnenih thuthangṭha phuangtupawl hmangih atu ih nan hnenih an thăn mi thilpawl ah hin anmai hrangah si loin, nanmai hrang sawnah rawng an rak bawl a si ti kha cuih profetpawl hnenah phuanlăng a rak si.

Thianghlim dingih Kawhnak

13 Curuangah hnaṭuan dingin nan lungthin timtuahin harhvâng uh, cule Jesu Khrih a rung lăng tikih nan hnenih a run ken ding mi zangfahnak parah nan ruahsannak zaten ṭhum uh. 14 Nan rak theih lo laiih nan hlanlai câkhiarnak vekih um loin, zawnlung mi fāte vekin um uh. 15 A lo kotu a thianhlim bangin, nannih khal nan nuntukhawsakdān hmuahhmuah ah thianghlim uh. 16 Ziangahtile, «Kei ka thianhlim ruangah nannih khal thianghlim ve uh,» tiih ngan a si.

17 Cule thleidăn nei loin mi tin an tuah mi zulhih thu a ṭhentu, Pa hnenih thla nan cam asile, hi leitlun ih nan um sung hmuah amah ṭihzahten nan cān liamter uh. 18 Nan pupápawl hnen ihsi thurosiah hmangih nan ngah mi ṭhathnemnak nei lo nan nundān lak ihsin thil siat thei mi, sui le ngun ih tlen nan si lo ih, 19 sawisel ding um lo le bawrhhlawh kai lo tuufa no thisen vek a si mi, a sunglawi mi Khrih thisen thawi tlen nan rak si sawn ti nan thei. 20 Thungaiin Pathian in leilung hram a bŭn hlanah cuih Khrih cu a rak ruat cia nân, tuih cān neta lamah nanmai hlawknak ding hrangah a langter a si. 21 Nan zumnak le ruahsannak cu Pathian ih a ṭhumawk theinak dingah, Khrih cu mithi lak ihsin Pathian in a kaitho ih, ropitnak a pe. Amah zarah Pathian zumtu nan si.

22 Thlarau zarah thutak nan thlunnak hmangin nan thinlung cu nan thiangfaiter zo ih, unau duhdawtnak taktak nan nei. Curuangah thinlung thiangten pakhat le pakhat nasazetin duhdaw aw uh. 23 A siat thei mi ci hmangin si loin, kumkhuaih a nung mi le a hmun mi, a siat thei lo mi, Pathian kamsuakthu hmang sawnin hrinsal mi nan si. 24 Ziangruangahtile,

«Titsa hmuahhmuah hi hrampi vek an si ih,
An ropitnak hmuahhmuah khal hrampi par vek men a si.
Hrampi cu an vuai ih, a par cu a ṭil.
25 Sikhalsehla Bawipaih kamsuakthu cu kumkhuain a hmun a si.»

Nan hnenih phuan mi thuthangṭha hi cuih kamsuakthu cu a si.

2

A Nung Mi Lungto le Hril Mi Miphun

1 Curuangah mi dang parih lungput siava hmuahhmuah, bumawknak hmuahhmuah, tiawkternak, iksiknak le mi dang relsiatnak hmuahhmuah cu bansanin, 2 nausen suakpek vekin, zianghman rawi lo hnawiti thiang, Pathian kamsuakthu hâl uh, cumi hmangin nan ṭhanglian thei ding. 3 Bawipa cu zangfahnak ih khat a si ti nan teh zo asile cumi cu hâl uh.

4 Milaipawlih hnawn mi, Pathian bélte ih hril le a man a khung zet mi hnenah cun a nung mi lungto hnenih thleng vekin nan thleng. 5 Jesu Khrih zarah Pathian cohlantlak thlarau lam raithawinakpawl hlan dingin, nanmah rori khal a nung mi lungtopawl bangin thlarau lam inn, puithiam thianghlim si dingin sak rero nan si.

6 Curuangah Cathianghlim sung khalah,

«Ngai hnik uh, Zion ah
Ka hril mi, a mankhung zet mi, a kilih lungto pawimawhbik cu ka ret,
Amah zumtu cu ningzahter a si hrimhrim lo ding,»

ti mi a um.

7 Curuangah nannih zumtu hrangah anih cu a sunglawi a si; asinan a zumlotupawl hrangah cun,

«Inn saktupawl ih an hnawn mi lungto kha,
A kilih lungto pawimawhbik ah a cang,»

8 Cule,

«Amah cu bahnak lung le tlûknak lungpi a si.»

Thu an lun lo ruangah kamsuakthu ah an tlu ih, cumi ding hrangih ruat mi khal an rak si.

9 Sikhalsehla thim sung ihsin amai tleu mak zet sungih a lo kotuih tlinzia nan phuansuah theinak dingah, nannih cu hril mi miphun, siangpahrang hrin puithiam, miphun thianghlim le amai mihleice nan si. 10 Hlanah cun Pathian-ih minung nan rak si lo, asinan atu ah cun Pathian-ih minung nan si; hlanah cun zahngainak nan rak co lo nân, atu ah cun zahngainak nan co zo.

11 Ka duhdawt mitla, mikhual le khualtlawng lai nan si ruangah, thlarau a do ṭheu tu tisa câkhiarnakpawl ihsin thiarfihlimaw dingin ka lo ngen hai a si. 12 Zentelpawl lakih nan nundān cu mawi zetin si seh. Thil ṭhalo tuahhmang vekih an lo rel tikah, thil ṭha nan tuah mi hmangin thuṭhen dingih Pathian a rat ni ah amah cu an thangṭhat leh ding.

Uktu hnenih Tlukluh

13 Curuangah milai tuah mi cīn le dān kip ah Bawipa ruangah tlulut uh, siangpahrang dān cu thuneitu sângbik a si khalle tlulut uh. 14 Thil ṭhalo tuahtupawl cawhkuan pek ding le thil ṭha tuahtupawl lawm dingin siangpahrang ih a thlah mi ram uktupawl hnen khalah tlulut uh. 15 Ziangahtile thil ṭha nan tuah tikah mi-âpawl in thei loih thu diklo an ṭawng mi dai ko nan tuah thei ding, cucu nan tuah dingah Pathian duh mi a si. 16 Mizalenpawl vekin um uh, asinan nan zalĕnnak cu sual khuhnak ah hmang loin, Pathian siahhlawh vekin um sawn uh. 17 Mi hmuahhmuah upat uh. Unaupawl duhdawt uh. Pathian ṭihzah uh. Siangpahrang cu upat uh.

18 Sálpawl, ṭihzah zetnak thawn nan bawipawl hnenah tlulut uh. Miṭha le mizaidam hnen lawngah si loin, mihrohrangpawl hnen khalah tlulut uh. 19 Ziangahtile mi pakhat in Pathian a theih ruangah a tuar lo ding mi tuarin thinnatnak a tuar ṭenṭo asile, cucu Pathian lăwmtlak a si. 20 Nan tisualnak ruangah kutthlak nan tawn tikah, tuar ṭenṭo hman uhla ziang lăwmnak so a um? Asinan thil ṭha nan tuah ih, cumi ruangih nan tuar tikah, nan tuar ṭenṭo asile cucu Pathian lăwmtlak a si. 21 Ziangahtile Khrih khal in kan hrangih a tuar ruangah cuvek ti dingih kawh nan si. A kenehpawl nan thlun theinak dingah zohṭhim ding in tăn ta:

22 «Anih cun sual a tuah lo ih,
A kâ khalah hrăwkhrawlnak hmuh a si lo.»

23 Mi in an zăwkzet tikah, a rak zăwkzet ve lo, a tuar lai khalah a rak hro ve lo, dik zetih thuṭhentu hnenah amah le amah a peaw sawn. 24 Cutin sualpawl lamih a thi zo mi kannih in, dingfelnak lamih kan nun theinak dingah anih cun amai taksaruangpum rori in thing parah kan sualpawl cu a phur. An vuaknak hriamhma in a lo tidam zo. 25 Ziangahtile nannih cu tuu bangin zinpêng nan rak zawh, asinan atu ah cun nan nunnak Kilvengtu le Tuukhāltu hnenah nan rak kirsal zo.

3

Nupi le Pasal Thu

1 Cutivekin nannih nupipawl, pasal hrekkhat pawl in Pathian kamsuakthu lung lo khal hai sehla, annih cu thusimnak si loin, nupilepawlih nundān in neh an si theinak dingah, nanmai pasal hnenah tlulut cio uh. 2 Ṭihzah zet teih nan nundān thianghlim an hmuh tikah, neh an si ding. 3 Nan ceiawknak cu leng lam ceiawkdan, sámphiar simaw, sui thawi thuamawk simaw, hnipuan ṭha hruh simaw si loin, 4 hnipuan siat thei lo zaidamnak le thinlung tăngdawrnak in sung lam minung cu thuam sawn uh, cucu Pathian mithmuhah a hlú zet mi a si. 5 Ziangahtile cuvekin hlanlai ih nunau thianghlim, Pathian rinsantupawl khal in anmai pasal hnen cio ah tlulutin an rak ceiaw. 6 Sarah in Abraham-ih thu a ngai ih, amah cu bawipa tiah a ko, nannih khal thil ṭha nan tuah ih, ziang vek ṭihnungza hman nan ṭih lo asile, Sarah-ih fāte nan si ding.

7 Cuvek thothoin, nannih pasalpawl khal, nan thlacamnakpawl khamih a umlonak dingah, theihthiamnak thawn nan nupipawl thawn cêngtlang uhla, bel kûai áwlsawn le zangfahnak nunnak ro lo copitu an si bangin upat uh.

Thil Ṭha Tuah ruangih Tuar

8 Netabikah, nan zaten lungthin hmunkhatin um uh, pakhat le pakhat lainat aw uhla, unau vekin duhdaw aw uh. Thinlung nem nei uhla, nelum zetin um uh. 9 Thil ṭhalo cu thil ṭhalo in lehrūl hlah uhla, hmuhsuamnak cu hmuhsuamnak in lehrūl fawn hlah uh, cuhnakin mal rak sawm sawn uh. Ziangahtile malsawmnak ro co dingin Pathian in a lo ko a si ti nan thei. 10 Ziangahtile,

«Nun a duhtu le
Ni ṭha hmuh a duhtu cun,
Thil ṭhalo ihsin a lei kilveng sehla,
A hmur in hrawkhrawlnak ṭawng lo dingin kilveng seh.
11 Thil ṭhalo tlansanin thil ṭha tuah seh.
Remnak hawlin, dawi seh.
12 Ziangahtile Bawipaih mit cu midingfel parah a fu ih,
A hna cu an thlacamnakpawl lamah a tháwng.
Asinan Bawipaih mithmai cun thil ṭhalo tuahtupawl a dokalh.»

13 Cule thil ṭha tuahtupawl cawngtu nan si ahcun, zo in so a lo tina ding? 14 Asinan dingfelnak ruangah tuar ding nan si le, mithlawsuak nan si.

«An lo hronak cu ṭih hlah uhla, a buai khal buai hlah uh.»

15 Cuhnakin Bawipa Pathian cu nan thinlung in ṭihzah sawn uh, cule nan sungih a um mi ruahsannak nan neihnak săn a lo suttu pauhpauh hnenah nunnemnak le upatnak thawn sâng dingin rak tiar ringring uh. 16 Thil ṭhalo tuahtu si vekih an lo relsiat laiah, sia le ṭha theihnak thiang neiin sâng uh, cuticun Khrih ih nan umdān ṭha zăwkzettupawl cu ningzakin an um ding. 17 Ziangahtile Pathian remti zawng a si ahcun, thil sia tuah ruangih tuar hnakin thil ṭha tuah ruangih tuar cu a ṭhasawn.

18 Ziangahtile Pathian hnenih in hruai theinak dingah, Khrih khal in sualpawl hrangah vei khat mi hmuahhmuah hrangah a tuar. Midingfel cun midingfel lo hrangah a tuar ih, taksa ah cun thah a si ko nân, Thlarau in a nungter a si. 19 Thawnginn sungih thlaraupawl hnen khalah cuih Thlarau hmangin a feh ih thu a phuang. 20 Cuih thlaraupawl cu hlanlai Noah san, lăwng timlam a si lai, Pathian in thinsaunak thawi a hngah hai lai ih, thungailopawl kha an si. Cuih lăwng ah cun mi málte, mi pariat nunnak lawng ti hmangin rundam an si. 21 Cumi in a hmuhsak mi baptisma cun Jesu Khrih thawhsalnak ruangah tuih cān ah rundam in kan um. Cuih baptisma cu taksa bawrhhlawh hlăwnhlohnak men si loin, sia le ṭha theihnak thiang neiin, Pathian lamih tiamkamnak hi a si sawn. 22 Vancungmipawl, thuneihnakpawl le huhampawl cu Jesu in amai thuthu ih um dingin a tuah hnuah, van ah a feh ih, Pathian kut vawrh lamah a um.

4

Pathian hrangih Nun

1 Khrih cun a taksa in kan hrangih a tuar ruangah, nannih khal cuvek lungthin thawn thuam aw uh, ziangahtile taksa ih a rak tuar zotu cun sual a bansan zo a si. 2 Cuticun a tāng lai mi a taksa nunnak cān cu milai câkhiarnak lamah nung nawn loin, Pathian duh zawng lamah a nung sawn thlang ding. 3 Ziangahtile hi hlanih kan nunpi mi, Zentelpawlih duhzawng: fihnungza hursualtuahnak, câkhiarnak, zurîtnak, zu hmun năwmcēnnak, zu intlangnak, fihnungza milem nan biaknak pawl kha a liam zo. 4 Cumi ah anmah thawn năwmcēnnak ih nan um nawn lo ruangah danglam an ti ih, an lo thangsiat a si. 5 Minung le mithi pawl thuṭhensak dingih a tiartu hnenah an thuhla anmah rori in an thlĕn ding. 6 Cumi ruangah, milai dān in taksa ah thuṭhen sikhal hai sehla, Pathian duhzawngin thlarau ih an nun theinak dingah atu ih a thi zo mipawl hnen khalah thuthangṭha cu sim a rak si.

7 Sikhalsehla thil hmuahhmuah cemnetnak cu a nâi zo; curuangah ralring uhla, thla nan cam theinak dingah thunun aw uh. 8 Cule thil dang hmuahhmuah hnakin pakhat le pakhat duhdawtawk hi uar uh, ziangahtile «Duhdawtnak in sual tampi a khuh a si.» 9 Phunzai loin pakhat le pakhat ṭha zetin mikhual awtăwn uh. 10 Mi tin in thilpek nan co fingfing bangtukin, Pathian zangfahnak lamzin phunphun kilkhawitu ṭha vekin pakhat le pakhat rawngbawlsak aw uh. 11 Jesu Khrih zarah Pathian cu thil ziangkim ah thangṭhatih a um theinak dingah mi pakhat khat in thu a sim asile, Pathian kamsuakthu a sinak vek rori in sim sehla, mi pakhat khat in rawng a bawl asile, Pathian in ti theinak a pek vekin bawl seh. Ropitnak le huham cu kumkhuain kumkhua tiang amai ta a si. Amen.

Khristian Si ruangih Tuarnak

12 Duhdawt mitla, nanmah hniksaknak dingih meisa vek tuarnak ra thleng mi hi, thil danglam zet nan parih ra thleng vekin lâu hlah uh. 13 Cuhnakin a ropitnak a rung lăng tikah aipuannak maksak thawi nan lungawi sinsin theinak dingah, Khrih-ih tuarnakpawl tuarpitu nan si ruangah lungawiaipuangin um sawn uh. 14 Ropitnak Thlarau le Pathian Thlarau cu nanmah ih a um ruangah, Khrih hmin ruangih mawhthluk nan tuar asile, mithlawsuak nan si. Annih lamah Khrih cu thangsiat a si ih, nannih lamah cun sunlawih a si. 15 Asinan nan lakih mi zohman laithat a si ruangah simaw, fifir a si ruangah simaw, thil ṭhalo tuahtu a si ruangah simaw, mi dang thu ih hrawlhawk hmangtu a si ruangah simaw tuar hlah seh. 16 Cuticingin mi pakhat khat in Khristian a si ruangah a tuar asile, a ningzak hlah seh, cuhnakin hi thu ruangah Pathian thangṭhat sawn seh. 17 Ziangahtile thuṭhennak cu Pathian sungkua ihsin thawh a cu zo. Kanmah ihsin a thawh hmaisak asile, Pathian thuthangṭha lung lo tupawlih cemnetnak cu ziang vek a si pei? 18 Cule,

«Midingfel hman in rundamnak harsa zetin a co a si ahcun,
Pathian ngaihsak lo le misual parah cun ziang vek tak thleng pei maw?»

19 Curuangah Pathian duhdān vekih a tuartupawl cun, thil ṭha tuah vivo in an nunnak cu Sersiamtu rinum hnenah ap hai seh.

5

Pathian Tuu Rual Cawm

1 Nan lakih elder-pawl kha Khrih-ih tuarnakpawl theihpitu le a rung lang leh ding mi ropitnak co vetu ding pa kei, nan elder-pi hin tha ka pe a si. 2 Nan lakih Pathian tuu rualpawl kha kawhhran hotu nan si bangin câwm uh. Ti ding a si ruang men lawngih ti si loin, duhnak hrimhrim sawnin, a diklo mi hlawknak duh menah si loin thatho zetin rian sawn uh. 3 Nan kilkhawi dingah Pathian in nan hnenih a lo pek mi parah lal awter loin, tuu rualpawl ih zohṭhim ding mi si sawn uh. 4 Cule Tuukhāltu Lubik a rung lăng tikah, a ziamrál thei lo mi ropitnak lallukhum nan ngah ding.

5 Cuvek thothoin, nannih minopawl, kum upadeuhpawl hnenah tlulut uh. A si, nan zaten pakhat le pakhat hnenah tlulut awtăwn uhla, tăngdawrnak thawn thuam aw uh. Ziangahtile,

«Pathian in mipuarthaupawl a dokalh ih,
Mităngdawrpawl hnenah zangfahnak a pe.»

6 Curuangah a tikcu teih a lo khaisan theinak dingah, Pathian kut cak hnuaiah tăngdawr uh. 7 Anih in a lo ngaihsak ruangah amai parah nan mangbangnak hmuahhmuah ṭhum uh.

8 Nan doralpa Diabol cu a hûk rero mi kiosa bangin a deh ding hawlih a tawihvah rero ruangah, harhvâng uhla, ralring uh. 9 Leitlun hmun dangih a um mi nan unaupawl hnenah cutivek tuarnakpawl cu a thleng ve ti theiin, amah cu do uhla, zumnak ah dinghnget uh.

10 Sikhalsehla zangfahnak hmuahhmuah ih Pathian, a sankhuk ropitnak co dingih Khrih Jesu ih a lo kotu khan rei lo te sung nan tuar hnuah a lo tuahṭha famkim ding ih, a lo tungding ding. A lo cakter ding ih, a lo hngetter ding. 11 A hnenah ropitnak le huham cu kumkhuain kumkhua tiang um seh. Amen.

Cibaibûknak Netabik

12 Nan dinhngehnak Pathian zangfahnak a dik a si ti theihter ding le tha lo pe dingin nan hnenah tawiten ca ka lo kuat. Cucu kan unaupa mirinum a si ti ka theihfiang mi Silas-ih băwmnak in tawiten ka run ngan a si.

13 Nanmah thawi bangrepih hril mi, Babilon khua ih um nu in cibai a lo bûk. Cuvek thothoin ka fapa Mark khal in cibai a lo bûk hai. 14 Duhdawtawten hnămawknak in pakhat le pakhat cibaibûk aw uh.

Nannih Khrih Jesu ih umpawl hmuahhmuah hnenah hnangamdaihnak um hram seh. Amen.