BibleThianghlim – EZEKIEL

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

EZEKIEL

1 2 3 4 5 6 7 8 9 10
11 12 13 14 15 16 17 18 19 20
21 22 23 24 25 26 27 28 29 30
31 32 33 34 35 36 37 38 39 40
41 42 43 44 45 46 47 48

A ngantu: Ezekiel
A siartu: Judah ram ihsin Babilon ih sáltang Jew-pawl
Thil cang mi ih huap cān: B.C. 592-570

Ezekiel cu profet a si ih, puithiam khal a si (1:3; 2:5). Nebukhadnezzar hnenih Siangpahrang Jehoiakin a pekawk tikah Ezekiel cu sál ih hruai a si (B.C. 597). Sál ih an hruai a kum ngatnak (B.C. 592) ah thuphuan rawngbawl a thăwk, cule B.C. 570 (29:17) tiang thu a phuang.

Jehovah in Ezekiel kha rawngbawl dingih thu a pek tikah, a thusim ngaithla lo ding mipawl hnenah thlah a si thu Pathian in ralrinnak a rak pe. A thucah cohlang vekin an umawter (14:1-3; 20:1-3; 33:30-32), asinan a taktak ah cun annih cu «pawisak nei lo le lungruh» an si (3:7). Sikhalsehla, Jehovah in an hnenih thuphuan peh vivo thotho dingin thu a pe. A ṭawngkampawl an thlenkim tikah, mipi in «Keimah cu Jehovah ka si,» ti an thei ding tiah a ti. «Keimah cu Jehovah ka si,» ti hi Ezekiel sungah vei 60 hnak tam a lang.

Jehovah ropitnak hi hi cabu-ih hmuitin mi bik a si. A hmaisabik thuphuansuah cu Jehovah ropitnak a si (1:4-28). Profet-ih thuken ropi pahnih cu Israel le miphun dangpawl thuṭhennak (bung 1-32) le Israel malsawmnak a si (bung 33-48). Hi thuken pahnih cu ropitnak in khuahlan temple a suahsannak (bung 8-11) le temple thar ih a kirsalnak in a hmuhsak (bung 43:1-12).

Ezekiel cabu sungih phuanglăng mi hminsintlak bik cu «minung fapa» ti hi a si men thei. Jehovah in hi hmin hi vei 93 hmangin Ezekiel a ko. Thukham Hlun hmun dang ah hi hmin lăngnak cu Daniel 7:13; 8:17 ah kan hmu. Ezekiel cu rawngbawl a thawh tir, Jehovah ropitnak a hmuh hmaisakbik ṭum ah «minung fapa» tiih kawh a si (1:28-2:1). «Minung fapa» ti mi ih a hmuhsak mi cu leivut menih sersiam profet le lei le van Sersiamtu ropitdān hleihawkzia a si.

Ezekiel-ih thucah a ropitnak bik cu kum 1000 uknak sungih temple le a sungih rawngbawlnak Pathian in Ezekiel hnenih a phuansuahnak hi a si (bung 40-48). Hi hmun thianghlim thar ih thil pawimawh cu hmun thianghlim thawi pehparaw pauhpauh cu an thianghlim zet (43:12). Cuti asile profet thucah cu a fiang zet: Jehovah-ih ropitnak milai in a ṭawmpi ding asile, thianghlimnak a ṭul a si.

Thuhlawm Ṭhen

I. Ezekiel in Jerusalem a tluk hlanah Judah dokalhin thu a phuang (bung 1-24)
II. Ezekiel in ram dang miphunpawl dokalhin thu a phuang (bung 25-32)
III. Ezekiel in Pathian in a minungpawl tungdingsal dingin thla a cam (bung 33-48)

Ezekiel ih Hmuh Mi Larnak

1 Kum 30-nak thla litnak, ni ngatnak ah hitin a si, Kebar Tiva kiangah, ralkaihpawl lakih ka um laiah, vanpawl a áwngaw ih Pathian larawknakpawl ka hmu. 2 Siangpahrang Jehoiakin sáltannak ih hruai a si kum ngatnak, cuih thla ni nga ni ah, 3 Kaldia-mipawlih ram, Kebar Tiva kiangah, Buzi fapa puithiam Ezekiel hnenah Jehovah kamsuakthu a thleng ih; cu tawkah Jehovah kut cu a parah a um.

4 Cule ka zoh ih, ngai hnik, sak lam ihsin phusîng a ra thleng, khawdur nasazet lak ihsin nimthlakau tle zohzo a um, cule a kimvel hmuahhmuah cu a tle zet, meisa laifang cu thir rawhling vekin a tleu. 5 Cumi sung ihsin thilnung pali băngnak nei mi an ra. An lăngdān cu minung băngnak nei an si. 6 Pakhat in hmai pali le thla pali an nei fingfing. 7 An kepawl cu a dĭng ih, an kephah cu câwpa no ketin vek a si. Dar hnawtfai mi răwng vekin an tle. 8 An taksa sir pali ih thla pali hnuaiah milai kut a um fingfing, cule an pali ih hmai le thla bélte cu hitivek hi a si: 9 pakhat le pakhat an thla a daiaw, an feh tikah an hawikûal lo, hmai lamah dĭngten an feh cio.

10 An hmel pianzia bélte cu, minung hmel vek an si. An pali ih vawrh lam sir cio ah kiosa hmel, an pali ih keh lam sir cio ah câwcang hmel, cule an pali in muvanlai hmel an nei fingfing fawn. 11 An hmel cu cutivek cu an si. An thla cu tlun lamah an pharh; an thla pahnih cio in a dang thilnung an hei dai ih, pahnih in an taksa an hup. 12 Cuih thilnungpawl cu hmai lamah dĭngten an feh cio; thlarau in fehter a duhnak kip ah an feh ih, an feh tikah an hawikûal lo. 13 Cuih thilnungpawlih laiah meihol ling alh vek thil pakhat a um, thilnung pali lakih dung le hmaiih tle zohzo vekin. Meisa cu a êng ih, cuih meisa ihsin nimthlakau a suak. 14 Cule thilnungpawl cu nimthlakau tle bangin dung le hmaiah an tlân zohzo.

15 Thilnung pali pawl cu ka zoh hai ih, ngai hnik, cuih thilnungpawlih kiangah leilung ah lêngke a um, an pali kiang cio ah pakhat fingfing a um. 16 Lêngkepawlih pianzia le tuah an sidān cu birul lung mankhung tle vek a si ih, an pali in an hmel a bangaw thluh. An hmel le tuah an sidān cu lêngke pakhat sungih lengke dang a kawkalhzawngih thun vek a si. 17 An feh tikah, hawikûal loin ^ahăwi zawng hmun li ah an feh. 18 Lêngke kûal tlângpawl cu an sâng ih maktak an si; an pali tlângpawl cu mit in a khat. 19 Thilnungpawl an feh tikah, lêngkepawl khal an zawngah an feh ve; thilnungpawl cu lei ihsin an thawh tikah, lêngkepawl khal an tho. 20 Thlarau feh duhnak kip ah thilnungpawl cu an feh, cule lêngkepawl cu anmai zawngah an tho, ziangahtile thilnungpawlih thlarau cu lêngkepawl ah a um. 21 Thilnungpawl an feh tikah cupawl khal an feh, an din tikah cupawl khal an ding; cule lei ihsin an thawh tikah lêngkepawl khal anmai zawngah an tho ve, ziangahtile thilnungpawlih thlarau cu lêngkepawl ah a um.

1:17^a hăwi zawng hmun li: Nisuah, nitlak, sak le thlang tinak a si.

22 Cule thilnungpawlih lu tlunah tlolakpi vek a um, cucu an lu tlunih pharhaw kristal lung mankhung maksak vek a si. 23 Cuih tlolakpi hnuaiah an thla cu dĭng zetin an pharh, pakhat in pakhat lamah; thilnung kip thla pahnih in an taksa an khuh fingfing. 24 An feh tikah tipi awn vek, ralkap rual thâwm vekih mipi thâwm celcel vek le Ziangkimtithei aw vekin an thla awn ka thei; an din tinten an thla an khup. 25 An lu tlunih tlolakpi tlun ihsin aw pakhat a ra thang, an din tinten an thla an khup.

26 An lu tlunih tlolakpi tlunah a hmel safaira lung vek laltokham bangtuk a um; laltokham bangtuk parah, hmun sâng zetah minung vekih lang pakhat a um. 27 Cule a tâi ihsi a tlun lam hmel cu meisa ih khat thir rawhling vekin ka hmu ih, a tâi ihsi a hnuai lam hmel cu meisa vekin ka hmu. A kimvel hmuahhmuah cu a tle. 28 Ruah sur ni ih khawdur ih vangro pian vekin, a kimvel hmuahhmuah a tle kelkel. Hihi Jehovah ropitnak hmel cu a si. Cumi ka hmuh tikah ka băwkkhup ih, mi pakhat ih ṭawng aw ka thei.

Israel Hélpawl hnenih Ezekiel Thlahnak

1 Cule anih in ka hnenah, «Minung fapa, na ke in ding awla ka lo be ding,» tiah i ti. 2 Cun i biak laiah, ka sungah Thlarau a lut ih ka ke in i dinter; cule i betuih aw cu ka thei. 3 Anih in ka hnenah, «Minung fapa, keimah dokalhih hél, helhmang miphun, Israel tefapawl hnenah ka lo thlah a si; anmah le an pupápawl cu tuihni tiang ka lakah an hél. 4 Ziangahtile annih cu miluhlul le lungruh fāte an si. Anmah hnenah ka lo thlah ih, an hnenah, ‹Bawipa Jehovah in hitin a ti,› na ti pei. 5 Annih cu helhmang sungza an si bangtukin, an ngaithlak ah simaw, an hnawn ah simaw, annih cun an lakah profet pakhat a um ti an thei ding.

6 «Nang, minung fapa, hlingbûr le hrambûar pawl in lo kulhvelin, tlangkaikuangpawl lakih cêng si hman awla, anmah cu ṭih hai hlah awla, an ṭawngkampawl in lo thlaphângter fawn hlah seh; an ṭawngkampawl ṭih hai hlah aw, an hmaika-ah thinphangin um hlah, ziangahtile annih cu helhmang sungza an si. 7 An ngaithlak ah simaw, an hnawn ah simaw, an hnenah ka kamsuakthupawl na sim pei, ziangahtile annih cu helhmang an si. 8 Asinan nang, minung fapa, na hnenih ka sim mi hi ngaithla aw. Cuih helhmang sungza bangin nang cu hél ve hlah; na kâ âng awla, ka lo pek mi ei aw.

9 Cule ka zoh ih, ngai hnik, kut pakhat in i rak dawh; ngai hnik, cuih kut ah cun cazual a um. 10 Cun ka hmaika-ah cumi cu a pharh, khat lam khat lam ah cangan a um, cuih cangan mipawl cu ṭah hla, lusûnnak le hmakhawpihnak pawl an si.

1 Cuihhleiah anih in ka hnenah, «Minung fapa, na tawn mi pauhpauh ei aw, hi cazual hi ei aw, cule va feh awla Israel sungza hnenah thu va sim aw,» tiah i ti. 2 Cutin ka kâ ka âng ih, cuih cazual cu i eiter.

3 Amah thotho in ka hnenah, «Minung fapa, ka lo pek mi cazual hi ei awla, na pum puarter aw,» tiah i ti. Cule cumi cu ka ei, ka kâ sungah khuaitizu vekin a thlum.

4 Cule anih in ka hnenah, «Minung fapa, Israel sungza hnenah feh awla, an hnenah ka kamsuakthupawl sim aw. 5 Ziangahtile nang cu theih băn lo ṭawng le ṭawng har hmang mipawl hnenah thlah na si lo, Israel sungza hnen sawnah a si; 6 theih băn lo ṭawng hmang miphun hnenah le ṭawng har hmang, an ṭawngkampawl na theihthiam lo mi hnenah a si lo. Thungaiten, cupawl hnenah lo thlah hman ningla cu, an lo ngaithla ding. 7 Asinan Israel sungza cun an lo ngaithla lo ding, ziangruangahtile keimah in ngaithla lo ding; ziangahtile Israel sungza hmuahhmuah cu an luhlul ih an lung a ruh. 8 Ngai hnik, an hmai hnakin na hmai cang sawnin le, an cal hnakin na cal cang sawn ko ka lo tuah. 9 Na cal cu ṭeklung hnakih hak sawn lungcang vekin ka tuah; anmah cu helhmang sungza si khal hai sehla, anmah ruangah thlaphângin um hlah awla, an lo zohnak ruangah lungphâng fawn hlah,» tiah i ti.

10 Cuihtlunah anih in ka hnenah, «Minung fapa, na hnenih ka sim mi kamsuakthupawl hmuahhmuah cu na thinlung ah cohlang awla, na hna in ngaithla aw. 11 Cule feh aw, ralkaihpawl hnen, na mipawlih fāte hnenah va thleng awla, an ngaithlak ah simaw, an hnawn ah simaw an hnenah thusim awla, ‹Bawipa Jehovah in hitin a ti,› tiah sim hai aw,» tiah i ti.

12 Cun Thlarau in i cawiso ih, a hmun ihsin Jehovah ropitnak a thawh tikah ka dungah aw thûm humho ka thei: «Amai hmun ihsi suak Jehovah ih ropitnak cu thangṭhatin um seh,» tiin. 13 Cule pakhat le pakhat thilnungpawlih thla khawngaw awn le an kiangih lêngkepawl awn le awn thûm humho khal ka thei. 14 Cutin Thlarau in i cawiso ih i thiarhlo, cule thinṭeu le thinaithawkin ka feh; asinan Jehovah kut cu ka parah a cak zet. 15 Cun Kebar Tiva kiangih cêng, Tel-Abib ih ralkaihpawl hnenah ka feh; cule an tonak hmun ah ka to ih, cu tawkah an lakah khawruahharin ni sarih sung ka to.

Ezekiel cu Ralvengtu a Si

16 Ni sarih a cem tikah Jehovah kamsuakthu ka hnenah a thleng, 17 «Minung fapa, Israel sungza ralvengtu ah ka lo tuah, ka kamsuakthu na ngaithlak tinten ka ralrin peknak hi anmah pe hai aw: 18 misualrál hnenah, ‹Na thi tengteng ding,› tiih ka ti tikah, nang in ralrinnak zianghman pe loin, a nundān sualrál ihsin a nunnak runsuak dingin misualrál cu ralrinnak thu na sim fawn lo ih, cuih misualrál cu a mawhsualnak ih a thih asile, a thisen cu na hnenah ka lo hlâm ding. 19 Sikhalsehla misualrál cu ralrinnak na pe ih, a sualralnak ihsin lamlêt loin a nundān sualrál ihsi khalin a lamlêt cuang lo asile, anih cu a mawhsualnak ah a thi ding; asinan na nunnak cu na runsuak a si.

20 «Cuvek thothoin midingfel pakhat cu a dingfelnak ihsin lamlêtin, mawhsualnak a rak tuah ih, a hmaiih harsatnak ka ret tikah, anih cu a thi ding; ralrinnak na rak pek lo ruangah a sualnak ah a thi ding ih, a rak tuah mi a dingfelnak cu cīn a si lo ding; asinan a thisen cu na hnenah ka lo hlâm ding. 21 Cutisikhalsehla midingfel cu sual tuah lo dingin ralrinnak na pe ih, midingfel in sual a tuah lo asile, anih cu a nung tengteng ding, ziangruangahtile anih cun ralrin peknak kha a cohlang a si; na nunnak na runsuakngah fawn ding,» tiin.

22 Cule Jehovah kut cu cu tawkah ka parah a um ih, anih in ka hnenah, «Tho awla phairawn ah feh aw, cu tawkah ka lo be ding,» tiah i ti.

23 Cun ka tho ih phairawn ah ka fehsuak, cule zoh hnik, Kebar Tiva kiangih ka hmuh mi Jehovah ropitnak vek cu tawkah a ding; cule ka băwkkhup. 24 Cun ka sungah Thlarau a lut ih ka ke in i dingter, cule i bia ih, ka hnenah: «Feh awla na inn sungah kharkhumaw aw. 25 Cule nang, Maw minung fapa, anmah lakih na fehsuak theilonak dingah hridai in an lo ṭem ding ih, an lo hreng ding. 26 Na sangkhâr ah na lei ka bĕtter ding, cutin ṭawng thei loin na um ding ih, anmah kawktu na si thei lo ding, ziangahtile annih cu helhmang sungza an si. 27 Asinan ka lo biak tikah na kâ ka kau ding ih, an hnenah, ‹Bawipa Jehovah in hitin a ti,› tiah na ti ding. A theitu in thei seh; cule a hnáwngtu in hnáwng seh; ziangahtile annih cu helhmang sungza an si.

Jerusalem Kulhkhumnak Lăngternak

1 «Nang, minung fapa, tlakrawh la awla, na hmaiah ret aw, cule cuih parah Jerusalem khawpi lem kher aw. 2 Jerusalem kulhkhŭmnak tuah aw, amah kulhkhŭmnak hruang dâwl aw, cule lei sûngpâwng aw; khawpi dokalhin ṭanhmun khuarnakpawl khal tuah aw, cule a kimvel hmuahhmuah ah sutsiatnak hmanrua ret aw. 3 Cuihhleiah nangmai hrangah thir pheng la awla, nangmah le khawpi karlakah thir hruang vekin tung aw. Cumi lamah na hmai hawi awla, kulhkhŭm dinhmun ah tuah awla, kulhkhŭmaw aw. Cumi cu Israel sungza hrangah hminsinnak a si ding.

4 «Na keh lam nĕnin zau awla, Israel sungza mawhsualnak cu nĕn cih aw, ziangahtile na nĕn ni zât in an mawhsualnak na tuar ding a si. 5 Ziangahtile an mawhsualnak kumpawl zulhin na hrangah a ni zât ka khiah zo, ni 390; cutivekcun Israel sungza mawhsualnak cu na tuar ding a si. 6 Cule cumi na ṭheh hnuah, na vawrh lam nĕnin zau leh aw, cun Judah sungza mawhsualnak cu ni 40 sung na tuar ding a si. Kum khat hrangah ni khat vivo ka lo ruahsak a si. 7 Curuangah Jerusalem kulhkhŭmnak lam na hmai hawih aw, na bân hlít awla, a tlun thu phuangsuak aw. 8 Cule ngai hnik, na kulhkhŭm ni zât na ṭheh hlanlo, na sir khat lam ihsin khat lam her thei lo dingin, hridai in ka lo ṭawn ding.

9 «Nangmai hrangah sangvut, barli sangvut, betê, pe, laifâng le laifâng phun khat pawl tla la awla, bungbel pakhat sungah thun aw, cule cupawl ihsin nangmai hrangah sang tuah aw. Na sirih na ih zât ni 390 sung cumi cu na ei ding a si. 10 Cule na ei mi rawl cu khīngkhaiin a si pei ih, ni khat ah shekel 20 a si pei; cumi cu khiah mi cān ah na ei ding a si. 11 Tidai khal tahin na in pei, kalān khat ṭhen ruk ih ṭhen khat a si ding a si; khiah mi cān ah na ei pei. 12 Cule cumi cu barli sangvut sangper ei vekin na ei ding a si; cule cumi cu an mithmuhah minung êk hmangin na em pei,» tiah i ti.

13 Cun Jehovah in, «Cutivekcun Israel tefapawl in ka hnawhsuahnak hmun, miphunpawl lakah an rawl bawrhbang an ei ding a si,» tiah a ti.

14 Cun kei in, «Ai law, Bawipa Jehovah! Ngai hnik, ka no lai ihsin atu tiang ka bawrhbangawter dah lo; mah te thi siseh, sahrang ih thlek mi siseh ka ei dah lo ih, ka kâ sungah fihnungza sa a lut dah fawn lo,» tiah ka ti.

15 Cun anih in ka hnenah, «Zoh hnik, na sang emnak dingah minung êk aiah câw êk ka lo pe ding,» tiah i ti.

16 Cuihtlunah anih in ka hnenah, «Minung fapa, ngai hnik, Jerusalem ih rawl ngahsuahnak hrampi ka sâtcat ding; sang cu khīngkhaiin, thlaring cingin an ei ding, cule tidai khal tah rori in thinphâng cingin an in ding, 17 ziangruangahtile sang le tidai an tlasam ding; pakhat le pakhat ṭihphangin an zohaw ding ih, an mawhsualnak ruangah an ṭawihrál ding.

Jerusalem Dokalhtu Ralnâm

1 «Cule nang, minung fapa, ralnâm hriam la aw, cumi cu sámziattuih nâmte bangin hmang awla, na lu le na khabe hmul ziat aw. Cule khīngkhai dingin khīngkhainak la awla sam cu ṭhen aw. 2 Khawpi kulhkhŭm zât ni a kim tikah, ṭhen thum ṭhen khat cu khaw laiah na ur pei; cun ṭhen thum ṭhen khat na la pei ih, khawpi kimvel hmuahhmuah ah ralnâm na sât pei, cule ṭhen thum ṭhen khat cu thli lakah na thehdarh pei: an dung ihsin ralnâm ka zûk ding a si. 3 Cupawl lak ihsin málten la awla, na sinfen zimah ṭem aw. 4 Cun cupawl lak ihsin a hrekkhat la leh awla, meisa ah paih aw, cule ur aw. Cutawk ihsin meisa cu Israel sungza hmuahhmuah tlunah a darh vivo ding.

5 «Bawipa Jehovah in hitin a ti: ‹Himi hi Jerusalem a si, miphunpawl lakah ka ret ih, a kimvel hmuahhmuah ah ram an um. 6 Miphunpawl hnakin ka cīn le dānpawl lakah sualralnak tuahin a hél sawn ih, a kimvelih um rampawl hnakin ka sakhaw dānpawl a dokalh sawn; ziangahtile ka cīn le dānpawl an el ih, ka sakhaw dānpawl vekin an nung lo,› tiin. 7 Curuangah Bawipa Jehovah in hitin a ti: ‹Na kimvel hmuahhmuah ih um miphunpawl hnakin na buaithlak sawn, ka sakhaw dānpawl na thlun lo ih, ka cīn le dānpawl na thlun fawn lo, na kimvel hmuahhmuah ih um miphunpawlih cīn le dānpawl rori hman na rak thlun fawn lo,› tiin. 8 Bawipa Jehovah in hitin a ti: ‹Ngai hnik, keimah, keimah rori in ka lo do ih, miphunpawl mithmuhah na parah thuṭhennakpawl ka hlensuak ding. 9 Cule na thil fihnungzapawl hmuahhmuah ruangah ka rak tuah dah lo mi, ka tuah lehsal dah nawn fawn lo ding mi cuvek thil cu nan lakah ka tuah ding. 10 Curuangah nan lakah palepawl in an fapapawl an ei ding ih, fapapawl in an palepawl an ei ve ding; cule nan lakah thuṭhennakpawl ka hlensuak ding ih, nannih a tāngsŭnpawl hmuahhmuah hi thli lakah ka lo thehdarh ding.

11 ‹Curuangah, ka nun rori bangtukin, Bawipa Jehovah in a ti, thungaiin, na thil bawrhhlawh hmuahhmuah le na thil fihnungza hmuahhmuah thawn ka hmun thianghlim na bawrhbanter zo ruangah, kei khal in ka lo sipsan ve ding; ka mit in a lo zangfah lo ding ih, ka lo zuah fawn lo ding. 12 Nan lakih ṭhen thum ṭhen khat cu nathrisia in an thi ding ih, nan lakah mangṭam in an thi ding; cule na kimvelah ṭhen thum ṭhen khat cu ralnâm in an rīl ding. Cule a dang ṭhen thum ṭhen khat cu thli lakah ka ṭhekdarh ding ih, an dung ihsin ralnâm ka zûk ding.

13 ‹Cutivekcun ka thinhengnak cu hman a si ding ih, an parah ka thinsonak ka thingthla ding, cutin ka di a riam ding; cule an parih ka thinsonak ka hman tikah thîknak thawn ka ṭawngsuak a si ti le, kei hi Jehovah ka si ti an thei ding. 14 Cuihtlunah na kimvelih um miphunpawl hmuahhmuah lakah, a lo páltu hmuahhmuah mithmuhah khaw răm le hmuhsuam mi ah ka lo tuah ding.

15 ‹Cuticun thinheng, thinso le thinsosa ih kawknak thawn dān ka lo tat tikah na kimvelih um miphunpawl hnenah nang cu hmuhsuam mi, setet mi, zirhawknak le miṭhihṭhaihnak ah na cang ding. Kei, Jehovah in ka sim a si. 16 Hlohralter ding mi nanmah lo hlorálter dingih ka run thlah mi mangṭamih ṭihnungza thálfung cu nanmah dokalhih ka thlah tikah nan parah mangṭam ka pungter ding ih, nan rawl ngahsuahnak hrampi ka sâtcat ding. 17 Cuticun nan parah mangṭam le sahrang ka thlah ding ih, fāte sūn ko an lo tuah ding. Nathrisia le thisen in a lo hrut ding ih, na parah ralnâm ka run keng ding. Kei, Jehovah in ka sim a si,› tiin,» tiah i ti.

Milem Bia Israel Dāntatnak

1 Jehovah kamsuakthu cu ka hnenah a thleng, 2 «Minung fapa, Israel tlangpawl lamah na hmai hawih awla, anmah dokalhin thuphuang aw, 3 cule, ‹Nannih Israel tlangpawl, Bawipa Jehovah kamsuakthu hi ngaithla uh! Bawipa Jehovah in tlangpawl hnen, tlangmualpawl hnen, tivapawl hnen le phaikuampawl hnenah: «Ngai hnik, kei, keimah rori in nan parah ralnâm ka keng ding ih, nan hmun sângpawl ka siatbăl ding. 4 Cun nan biakṭhengpawl an ṭhing ding, nan rimhmui biakṭhengpawl băl an si ding ih, nan thah mi minungpawl cu nan milempawl hmaiah ka hlăwn ding. 5 Cule Israel tefa ruakpawl cu an milempawl hmaiah ka hlăwn ding ih, nan ruhpawl cu nan biakṭhengpawlih kimvelah an darh reirei ding. 6 Nan cēnnak hmun hmuahhmuah ah khawpipawl cu an răm ding ih, hmun sângpawl cu an ṭhing phiarphiar ding, cuticun nan biakṭhengpawl cu an siat ding ih, an ṭhing ding, nan milempawl an cim ding ih hlohrălter an si ding, nan rimhmui biakṭhengpawl siatbăl an si ding ih, nan hnaṭuanpawl hlohrălter an si ding. 7 Thah mipawl cu nan lakah an rīl teptep ding ih, keimah cu Jehovah ka si ti nan thei ding.

8 «Cuticingin ram kip ih nan ṭekdarh tikah, miphunpawl lakih ralnâm ihsi tlânsuak an um theinak dingah a tāngsŭn ka umter ding. 9 Cun ka hnen ihsi tlânsuak mi an thinlung uiretnak le an milempawl thawi an hlawhhlannak mit in ziang tlukin so ka thinlung in hriam ti cu nan lak ihsi a tlânsuaktupawl cun ralkaih ih hruai an sinak miphunpawl lakah in mángsal ding. An thil ṭhalo tuah mipawl le thil fihnungza an tuah mipawl ruangah anmai mithmuhah an fihaw ding. 10 Cule kei cu Jehovah ka si ti an thei ding, hi thil ṭhalo hi an parah ka thlengter ding ti hi umze nei loih ka sim mi a si lo,» ti sim hai aw.

11 ‹Bawipa Jehovah in hitin a ti: na kut bēngin na ke tur awla, ralnâm, mangṭam le nathrisia ih rīl ding Israel sungza-ih thil ṭhalo fihnungzapawl hmuahhmuah ruangah, Ai maw! 12 Hlapi ih um cu nathrisia in a thi ding ih, nâi ih um cu ralnâm in a thi ding, cule a tāng lai mi le kulhkhŭm mipawl cu mangṭam in an thi ding. Cutivekcun ka thinsonak cu an parah ka thingthla ding. 13 Cun tlangmual sâng kip parah, tlang zim hmuahhmuah parah, thingbŭknîm hnuai kip ah le ela thingrûl hnuai kip ih an milempawl hmuahhmuah hnenih rimhmui thaw an hlănnak hmun ih biakṭhengpawl hmuahhmuah kimvelih an milempawl lakih an mithipawl an um tikah, keimah cu Jehovah ka si ti an thei ding. 14 Cutivekin an parah ka bân ka suah ding ih, ram cu ka rămter ding, a si, ramṭhing ihsin Diblah lamih an cēnnak hmunpawl hmuahhmuah hnakin ka rămter sinsin ding. Cun keimah cu Jehovah ka si ti an thei ding,› » tiin.

Jehovah Thinlingnak Ni

1 Cuihtlunah Jehovah kamsuakthu cu ka hnenah a thleng,

2 «Nang, minung fapa, Bawipa Jehovah in Israel ram hnenah:
‹A netnak! Ram kil li ah a netnak a thleng.
3 Atu ah na parah a netnak a thleng ih,
Na parah ka thinhengnak ka thlah ding;
Na nundān bangtukin thu ka lo ṭhen ding ih,
Na thil fihnungzapawl hmuahhmuah ka lo lehrūl ding.
4 Na thil fihnungzapawl na parih a um sung hmuah cu
Ka mit in a lo zangfah lo ding ih,
Ka lo zuah fawn lo ding;
Cuhnakin na nundān mawh na phur sawn ding,
Cun keimah cu Jehovah ka si ti nan thei ding!› tiin sim aw.

5 «Bawipa Jehovah in hitin a ti:

‹Thil ṭhalo, thil ṭhalo lawnglawng,
Ngai hnik, cucu a ra thleng a si,
6 A netnak a ra thleng;
A netnak a ra thleng;
Na parah a ṭhangharh a si;
Ngai hnik, a ra thleng lai rero!
7 Ram sungih cêngpawl hnenah siatnak a thleng;
A cān a thleng thlang,
A ni a nâi thlang,
Tlang parah lungawiaipuannak si loin buainak.
8 Atu ah na parah thinsonak ka thlebung cing ding ih,
Na parah ka thinhengnak ka hlensuak ding;
Na nundān bangtukin thu ka lo ṭhen ding ih,
Na thil fihnungzapawl hmuahhmuah cu ka lo lehrūl ding.
9 ‹Na thil fihnungzapawl na parih a um sung hmuah cu,
Ka mit in a lo zangfah lo ding ih,
Ka lo zuah fawn lo ding;
Cuhnakin na nundān mawh na phur sawn ding,
Cun keimah cu a lo vawtu Jehovah ka si ti nan thei ding.
10 Ngai hnik, cuih ni cu!
Ngai hnik, a ra thleng;
Siatnak a ra thleng;
Kianghrăwl a cerh,
Hngalnak a mûm.
11 Thahrumsuahnak cu sualralnak kianghrăwl ah a ṭhang;
An mipi khal,
An lennak khal;
Thil hlú ziang khal
Anmah lakah zianghman an tâng lo ding,
12 A cān a thleng thlang,
Cuih ni cu a nâi thlang.
Thil leitu lungawiaipuangin um hlah sehla,
Thil zuartu khal lungsia-in um fawn hlah seh;
Ziangahtile an mi senpi zate parah thinlingnak a um.
13 Ziangahtile an dam laiah thil zuartu cun a zuar mi lamah a kirsal lo ding,
Ziangahtile mipi pumpi thuhla larnak cu
Hlensuah loin a um lo ding;
Mawhsualnak ih nung zohman an nunnak an hum thei lo ding.
14 Tawtawrawt an phaw ih mi kip an ralringter,
Asinan zohman doawknak ah an feh lo;
Ziangahtile an mipi parah ka thinlingnak a um.
15 Leng lamah ralnâm a um ih,
Sung lamah nathrisia le mangṭam.
Zokhal ramlak ih um cu ralnâm in an thi ding;
Cule khawpi sungih um pauhpauh mangṭam le nathrisia in a eirál ding.
16 A nungdampawl an tlânsuah tikah,
Tlang parah phaikuam thuro bangtuk an si ding,
Anmai mawhsualnak cio ruatin
An zaten lungsia-in an um ding.
17 Kut hmuahhmuah an zâwng ṭheh ding ih,
Khuk hmuahhmuah ah zin a luang ding.
18 Buri-hnipuan khal an hruh ding ih;
Tuksumzain a khuh hai ding;
Hmel hmuahhmuah ah ningzahnak a um ding,
An lu zaten a kawlh ṭheh ding.
19 Kăwtthler ah an ngun an hlăwn ding ih,
An sui cu thil thianghlim lo vekah a cang ding;
An sui le an ngun pawl in
Jehovah thinling ni ah cun anmah a runsuak thei lo ding,
Cupawl cun an nunnak a diriamter lo ding ih,
An pum khal a puarter fawn lo ding,
Ziangahtile cupawl cu mawhsualnak ih an bahnak ah a cang.
20 Amai mawinak cu
Hngalnak ah an hmansak;
Cumi hmangin an fihnungza milimpawl le
An bawrhhlawhnak thilpawl an tuah.
Curuangah cupawl cu an hrangah thil thianghlim lo ah ka tuah.
21 Cumi cu ram dang mipawlih kut ah rallâksum ah ka pe ding ih,
Leilung misualrálpawl hnenah ralthillawn ah;
Cule cumi cu an bawrhbangter ding.
22 Anmah ka hawisan ding ih,
Thupi ih ka ruah mi hmun an bawrhbangter ding;
Ziangahtile cuih sungah suamhmangpawl an lut ding ih, an bawrhbangter ding.
23 Cikcin tuah aw,
Ziangahtile ram cu thisen suahawknak sual in a khat ih,
Khawpi cu thahrumsuahnak in a khat.
24 Curuangah miphunpawl lakah a sualrálbik ka rak hruailut ding ih,
An innpawl an neihsak ding;
An hngalpi mi an cahnak cu ka cemter ding ih,
Hmun thianghlimpawl cu bawrhbanter a si ding.
25 Thlaphannak a ra thleng;
Hnangamdaihnak an hawl ding, asinan a um lo ding.
26 Vanduainak parah vanduainak a um ding ih,
Thuthang parah thuthang a um ding.
Cun profet hnen ihsin larnak an hawl ding;
Asinan dān cu puithiam hnen ihsin a hlorál ding ih,
Upapawl hnen ihsin thurawnpeknak.
27 Siangpahrang a lung a zur ding,
Uktu cu beidăwnnak hnipuan a hruk ding ih,
Rammipawlih kut a khūr ding.
An nundān bangtukin an parah ka tuah ding ih,
An phûtdān zulhin thu ka ṭhensak hai ding;
Cun keimah Jehovah ka si ti an thei ding!›

a ti,» tiin.

Temple sungih Fihnungza

1 Kum ruknak, a thla ruknak, a ni ngatnak ah hitin a si, ka inn sungah ka to ih, Judah upapawl ka hmaiih an to laiah, Bawipa Jehovah kut cu cu tawkah ka parah a rung ṭhumaw. 2 Cun ka zoh ih, ngai hnik, milai pianhmang băngpi nei hi a um: a tâi ihsi tăng lam lăngdān cu meisa vek a si ih, a tâi ihsin tlun lam lăngdān cu êng, thir rawhling lăngdān vek a si. 3 Anih in kut vek pakhat in i rak dawh ih, ka sám tawm in i rak kaih; cule Thlarau in lei le van karlakah i cawiso ih, Pathian larawknak in Jerusalem ah sak lam hawi tual sungta luhnak ah i hruai, cu tawkah cun thîktertu thîksiatnak milim a um. 4 Cule ngai hnik, cu tawkah phairawn ih ka hmuh mi larnak vek, Israel Pathian ropitnak a um.

5 Cun anih in ka hnenah, «Minung fapa, atu ah sak lam hun cuan hnik aw,» tiah i ti. Cutin sak lam cu ka hun cuan, cule ngai hnik, cuih biakṭheng kăwtka ih sak lam, luhnak ah hi thîksiatnak milim cu a um. 6 Cuihhleiah anih in ka hnenah, «Minung fapa, ka hmun thianghlim ihsin hla zetih keimah dawihlo dingah Israel sungza in thil fihnungza nasazet hitawk ih an thil tuah mi hi na hmu maw? Hi hnakih fihnung sawn na hmu lai ding,» tiah i ti.

7 Cule tualrawn sângka ah i hruai; cule ka hun zoh tikah, ngai hnik, phăr ah ăwng ka hmu. 8 Cule anih in, «Minung fapa, phăr cu vit aw,» tiah i ti. Cule phăr cu ka vitpawp ih, ngai hnik, sângka pakhat a rak um. 9 Cule Anih in ka hnenah, «Lut awla hitawk ih fihnungza sualralnak an tuah rero mipawl hi zoh hnik,» tiah i ti. 10 Cuticun ka lut ih ka zoh, ngai hnik, cuih phăr kimvel hmuahhmuah ah cun băwkvâk thilnung phun zakip, fihnungza sahrangpawl le Israel sungza milem hmuahhmuah an kher. 11 Cule an hmaiah Israel sungza upa 70 an rak ding ih, an lakah Shafan fapa Jaazaniah a ding. Mi kip in an kut ah meiling ruhnak an keng fingfing ih, rimhmui khu sah zet a kaiso. 12 Cun anih in ka hnenah, «Minung fapa, Israel sungza upapawl in anmai milem pindan cio ah thim lakah mi kip in ziang an tuah ti na hmu maw? Ziangahtile annih in, ‹Jehovah in in hmu lo, Jehovah in ram a thlauthla zo a si,› an ti,» tiah i ti.

13 Cule anih in ka hnenah, «Hi hnakih thil fihnung sawn an tuah rero mipawl na hmu lai ding,» tiah i ti. 14 Cuticun sak lamih um Jehovah inn kăwtka sângka ah i hruai; cule ngai hnik, cu tawkah ^aTammuz ṭahin nunaupawl an to.

8:14^a Tammuz: Acadia-mipawlih ni pathian a si, amah cawimawinak hrangah kum tin thla khat rei puai an tuah, cuih lawmnak ah cun thil sualrál zet an tuah.

15 Cun anih in ka hnenah, «Maw minung fapa, himi hi na hmu maw? Hi hnakih thil fihnung sawn na hmu lai ding,» tiah i ti. 16 Cule anih cun Jehovah inn tualrawl sungta ah i hruailut, cule ngai hnik, Jehovah temple sângka ah, hulhliap le biakṭheng karlakah mipa 25 hrawng Jehovah temple dungtŭnin, an hmai nisuahnak lam hawiin an um, nisuahnak lamih ni cu an rak bia.

17 Cule anih in ka hnenah, «Maw minung fapa, hihi na hmu maw? Hitawk ih an tuah mi thil fihnungzapawl hi Judah sungza hrangah thil tenau men maw a si? Ziangahtile ram cu thahrumsuahnak in an khatter ih, tlaitluanin in thinhengter; cule ngai hnik, an hnar ah hnahsawl an ret. 18 Curuangah kei khal thinsonak in ka cāngvai ve ding. Ka mit in a zangfah hai lo ding ih, ka zuah hai fawn lo ding; aw ring zetin ka hna ah ṭap khal hai sehla, ka ngaithla hai lo ding,» tiah i ti.

Milem Betupawl Thahnak

1 Aw ring zetin ka hnatheihah a ausuak, «Khawpi sungih um mi thattupawl, mi kip mai kut cio ah mi thahnak hriamhrei kengin run naih uh,» tiah a ti. 2 Cule ngai hnik, sak lam hawi tlunta kăwtka lam ihsin pacang paruk an ra, pakhat cio in mi thahnak hriamhrei an kut in an keng. An lakih mi pakhat cu patzai hnipuan in a thuamaw ih, a khēl ah cangantuih hmanrua bawm a thlaih. An vung lut ih dar biakṭheng kiangah an ding.

3 Cule Israel Pathian ropitnak um ṭheu nak hmun cherub umnak ihsin temple sângka hnuai zawn zial ah a ṭhawnaw. Cule patzai hnipuan thawi thuamaw pa, a khēl ih cangantuih hmanrua bawm thlaihaw pa cu a ko. 4 Cule Jehovah in a hnenah, «Khawpi paltlăng aw, Jerusalem rori cu, cule a sungih tuah mi thil fihnungzapawl hmuahhmuah ruangih thawpi suah ih hrûm ruangro pacangpawlih cal ah hminsinnak ngan aw,» tiah a ti.

5 Mi dangpawl hnenah, ka hnatheihah, «A dung thlunin khawpi hrawhsuakin feh uhla, that uh; nan mit in zangfah hlah uhla, zuah fawn hlah uh. 6 Tar le tlangval, fala le nauhak tete le nunau that verver uh; asinan an parih hminsinnak neitu kiangnaiah feh hlah uh, cule ka hmun thianghlim ihsin thăwk uh,» tiah a ti. Cuticun temple hmaiih um upapawl ihsin an thăwk. 7 Cun anih in an hnenah, «Temple bawrhbangter uhla, tualrawn cu thah mi ruangpawl in khatter uh. Fehsuak uh!» tiah a ti. Cule an fehsuak ih, khawpi sungih mipi cu an that.

8 Cule hitin a si, khawpi sungih mi an thah laiah keimah lawng ka tâng, cule ka băwkkhup ih ka ausuak, «Ai law, Bawipa Jehovah! Jerusalem parih na thinsonak thlebungin Israel a tangsŭn hmuahhmuah na hlorálter hai ding maw?» tiah ka ti.

9 Cun anih in ka hnenah, «Israel sungza le Judah sungza ih mawhsualnak cu a nasatuk lawmmam, ram cu thisen in a khat ih, khawpi cu sualralnak in a khat; ziangahtile annih in, ‹Jehovah in ram a thlauthla ih, Jehovah in a zoh lo,› tiah an ti. 10 Cule kei bélte cun ka mit in a zangfah lo ding ih, ka zuah hai lo ding, an thil ti cu anmai lu parah ka tlakter sawn ding,» tiah i ti.

11 Cule ngai hnik, patzai hnipuan thawi thuamaw, a khēl ih hmanrua bawm thlaihaw pa cun thawng a thănsal ih, «Thu i rak pek vekin ka tuah zo,» tiah a ti.

Jehovah Ropitnak in Temple a Suahsan

1 Cule ka zoh ih, ngai hnik, cherub-pawlih lu tlun tlolakpi ah, safaira lung mankhung a bang mi, laltokham băngnak pianze nei a hung lang. 2 Anih in patzai hnipuan thawi thuamaw pa hnenah, «Cherub hnuaiih lêngkepawl lakah lut awla, cherub-pawl karlakih um meihol ling vâm kha na kut khat in keng awla, khawpi tlunah thehdarh aw,» tiah a ti. Cule ka mithmuhah anih cu a lut.

3 Cu pa a luh laiah, cherub-pawl cu temple thlang lam kapah an ding ih, tualrawn sungta cu mero in a luahkhat. 4 Cule Jehovah ropitnak cu Cherub hnen ihsin a so ih, temple sângka hnuai zawn zial ah a ṭhawnaw; cule inn cu mero in a luahkhat ih, tualrawn cu Jehovah ropitnak tleu in a khat. 5 Cule Ziangkimtithei Pathian a ṭawng tikih aw vekin, cherub-pawl ih thlakhâwng awn cu tualrawn lengta ihsin theih a si.

6 Cun hitin a si, patzai hnipuan thawi thuamaw pa cu, «Lêngkepawl karlak, cherub-pawl lak ihsin meisa la aw,» tiin thu a pek tikah, anih cu a lut ih lêngke kiangah a va ding. 7 Cule cherub pakhat in cherub-pawl lakih um meisa cu cherub-pawl lak ihsin a kut a dawh ih, a hrekkhat a la, cule patzai hnipuan thawi thuamawpaih kut ah a pe, anih in cumi cu a la ih a fehsuak. 8 Cherub-pawl cun an thla hnuaiah milai kut pian an nei.

9 Ka zoh ih, ngai hnik, cherub-pawlih kiangah lêngke pali a um, Cherub pakhat kiangah lêngke pakhat a um; cuih lêngkepawl pianhmang cu birul lung mankhung tle vek a si. 10 An pianhmang cu an pali in an bangaw thluh, lêngke pakhat sungih lêngke dang a kawkalhzawngih thun vek a si. 11 An feh tikah, hawikûal loin ^ahăwi zawng hmun li ah an feh; an feh tikah hawikûal loin, an lu hawinak lamah a dang in an thlun. 12 Cule an taksaruang pumpi, an dung lam, an kutpawl, an thlapawl le lêngkepawl cu a kimvelin mit in a khat, an pali ih lêngkepawl khal. 13 Lêngkepawl kha ka hnatheihah, «Lêngke» tiih kawh an si.

10:11^a hăwi zawng hmun li: Nisuah, nitlak, sak le thlang tinak a si.

14 Mi kip in hmel pali fingfing an nei: a pakhatnak hmel cu cherub hmel a si, a pahnihnak hmel cu milai hmel a si, a pathumnak hmel cu kiosa hmel a si ih, a palitnak hmel cu muvanlai hmel a si. 15 Cule cherub-pawl cu an tho. Hipawl cu Kebar Tiva kapih ka hmuh mi thilnungpawl kha an si. 16 Cherub-pawl an feh tikah lêngkepawl cu an kiangah an feh ve; lei ihsin zamso dingin cherub-pawl an thla an zâp tikah, an sir ihsin cuih lêngkepawl cu an cāng lo. 17 Cherub-pawl an din tikah lêngkepawl khal an zawngah an ding ve ih, an thawh tikah an tho ve, ziangahtile anmah ah thilnungpawlih thlarau a um.

18 Cun Jehovah ropitnak cu temple sângka hnuai zawn zial ihsin a suak ih, cherub-pawlih tlunah a ding. 19 Cule cherub-pawl cu an thla an zâp ih ka mithmuhah lei ihsin an kaiso. An fehsuak tikah lêngkepawl khal an sirah an um, Jehovah inn nisuahnak lam kăwtka sângka ah an dir ih, Israel Pathian ropitnak cu an tlunah a um.

20 Kebar Tiva kap, Israel Pathian hnuaiih hi ka hmuh mi thilnungpawl hi cherub-pawl an si ti ka thei. 21 Pakhat in hmai pali cio an nei ih, pakhat in thla pali cio an nei; cule an thla hnuaiah milai kut vek a um. 22 An hmel umdān lawngte cu, Kebar Tiva kapih ka hmuh mi hmel vek an si. An hmai zawn cio ah dĭngten an feh.

Thurawnpetu Sualrálpawl Dāntatnak

1 Cuihtlunah Thlarau in i cawiso ih, Jehovah inn-ih nisuahnak lam hawi, nisuahnak lam kăwtka ah i hruai: cule ngai hnik, cuih kăwtka luhnak ah cun pacang 25 an rak um, cupawl lakah mipi uktu Azzur fapa Jaazaniah le Benaiah fapa Pelatiah ka hmu hai. 2 Anih in ka hnenah, «Minung fapa, hipawl hi mawhsualnak khawkhângtu le hi khawpi sungih thurawnpek sualrál petu an si, 3 annih in, ‹Inn sak cān a nâi hrih lo, hi khawpi hi bêl a si ih, kannih hi sa kan si,› tiah an ti. 4 Curuangah anmah dokalhin thupuang aw, thuphuang aw, Maw minung fapa!» tiah i ti.

5 Cun Jehovah Thlarau ka parah a rung thleng ih, ka hnenah, «Anih in, ‹Jehovah in hitin a ti: Maw Israel sungza, hihi nan rak ruah ṭheu mi cu a si, ziangahtile nan ruahnak ka thei. 6 Hi khaw sungah mi tampi nan that ih, a kăwtthler cu thah mi ruangpawl in nan khatter. 7 Curuangah Bawipa Jehovah in hitin a ti, nan mi thah mi ruangpawl khaw sungih nan hlăwn mi cu sa an si ih, hi khawpi hi bêl a si: asinan hitawk ihsin ka lo dirsuak hai ding. 8 Ralnâm nan ṭih ih, nan parah ralnâm ka run keng ding, Bawipa Jehovah in a ti. 9 A khaw sung ihsin ka lo dirsuak hai ding ih, ram dang mipawl kut ah ka lo pe ding, cule dān ka lo tat ding. 10 Ralnâm in nan tlu ding. Israel ramri ah dān ka lo tat ding. Cule keimah cu Jehovah ka si ti nan thei ding. 11 Hih khawpi cu nan bel ah a cang lo ding ih, nannih khal cu tawkah sa ah nan cang lo ding, cuhnakin Israel ramri ah dān ka lo tat sawn ding. 12 Cule keimah cu Jehovah ka si ti nan thei ding: ziangahtile ka sakhaw dānpawl nan thlun lo ih, ka thuṭhennakpawl nan tuahsuak fawn lo, cuhnakin nan kimvel hmuahhmuah ih um miphunpawlih nunphung bangtukin nan rak nung sawn,› tiin sim aw,» tiah i ti.

13 Cule thu ka phuan laiah hitin a si, Benaiah fapa Petaliah cu a thi. Cun ka băwkkhup ih aw ring zetin ka au, «Ai law, Bawipa Jehovah! Israel tāngsŭn cem verver ko na tuah ding maw?» tiah ka ti.

Pathian in Israel a Tungdingsal Ding

14 Jehovah kamsuakthu ka hnenah a thlengsal, 15 «Minung fapa, Jerusalem luahtupawl in, ‹Jehovah hnen ihsin hlapi ah feh uh, hi ram cu kan neih dingah pek a si zo,› tiih a ti mipawl cu na unaupawl, na unaupawl rori, na sungkhatpawl le Israel sungza hmuahhmuah hi an si. 16 Curuangah, Bawipa Jehovah in hitin a ti: miphunpawl lak, hlatpi ah anmah cu ka hruaihlo hai ih, ram dangdangah ka ṭekdarhter hai ko nain, an rak fehnak rampawl ah an hrangah málte sung hmun thianghlim ka si thotho ding. 17 Curuangah, Bawipa Jehovah in hitin a ti: miphunpawl lak ihsin ka lo khawm ding, nan ṭekdarhnak rampawl ihsin ka lo fĭnkhawm ding ih, Israel ram cu ka lo pe ding. 18 Cule cu tawkah an feh ding ih, cutawk ih thil bawrhhlawhpawl hmuahhmuah le thil fihnungza hmuahhmuah cu cutawk ihsin an hlăwnhlo ding. 19 Cun thinlung sakhat ka pe hai ding ih, an sungah thlarau thar ka ret ding, cule an titsa ihsin an lungto thinlung cu ka lakhlosak hai ding ih, titsa thinlung ka pe hai ding, 20 cule ka sakhaw dānpawl an nunpi thei ding, ka cīn le dānpawl an thlun thei ding ih, an tuahsuak thei ding; cule annih cu ka mi an si ding ih, kei cu an Pathian ka si ding. 21 Asinan an thinlung an bawrhhlawhnak thilpawl le an fihnungza câknak thluntupawl cu anmai lu parah an thil ti mipawl ka tlakter ding, Bawipa Jehovah in a ti,» tiin.

22 Cun cherub-pawl in an thla an zâp ih, an sirah lêngkepawl an um, cule Israel Pathian ropitnak cu an tlunah a um. 23 Cule khawpi sung ihsin Jehovah ropitnak cu a fehso ih, khawpi nisuahnak lam tlang parah a ding.

24 Cun Thlarau in i cawiso ih, larawknak ah cun Pathian Thlarau in Kaldia ram ih sál ih hruai mipawl hnenah i hruai. Cule larnak ka hmuh mi cun in fehsan. 25 Cule sál ih hruai mipawl hnenah Jehovah in i hmuh mi hmuahhmuah ka sim hai.

Sál ih Hruai Hmuhsaknak

1 Jehovah kamsuakthu cu ka hnenah a thleng, 2 «Minung fapa, helhmang sungza lakah na cêng, annih cun hmuh theinak mit an nei nân an hmu lo ih, theih theinak hna an nei nân, an thei lo; ziangahtile annih cu helhmang sungza an si.

3 «Curuangah minung fapa, dawisuahnak ih feh ding bangin na thuamhnaw timtuah awla, an mithmuhah sun ah dawisuahnak ih feh vekin feh aw. An mithmuhah na umnak hmun ihsin hmun dang dawisuahnak ah feh aw. Helhmang sungza si hman hai sehla, an theithiam na hman maw. 4 Dawisuahnak ih feh ding bangin, an mithmuhah sun ah na thuamhnaw kengsuak aw; cule dawisuahnak ih feh ding bangin sîm lamah an mithmuhah feh aw. 5 An mithmuhah phăr vitpawp awla, cumi ihsin na thuamhnaw thiarsuak aw. 6 An mithmuhah cupawl cu na liang in phur awla, thim zawngah thiarsuak aw; lei hmu thei lo dingin na hmai tuam aw, ziangahtile nangmah cu Israel sungza hrangih hminsinnak si dingin ka lo ruat a si,» tiin.

7 Cule thupek ka si bangtukin ka tuah. Sáltannak ih feh ding bangin sun ah ka thuamhnaw ka lasuak ih, sîm lamah phăr cu ka kut in ka vitpawp. Khawthim zawngah ka thuamhnaw ka thiarsuak ih, an mithmuhah ka liang in ka pu.

8 Cule zing lamah Jehovah kamsuakthu ka hnenah a thleng, 9 «Minung fapa, Israel sungza, helhmang sungza in na hnenah, ‹Ziang na tuah rero?› tiah an lo ti a si lo maw? 10 An hnenah, ‹Bawipa Jehovah in hitin a ti: hi thuphuan cu Jerusalem ih uktu le Israel sungza hmuahhmuah, an lakih umpawl thuhla a si,› tiin. 11 Kei cu nan hrangah hminsinnak ka si. Ka tuah vekin an parah tuah a si ding; annih cu ralkaih ah hruaihlo an si ding. 12 Cule an lakih um uktu in a thuamhnaw cu a liang in thim zawngah a pu ding ih, a fehsuak ding. A thiarsuahnak dingah, phăr an vitpawp ding. A mit in lei hmu thei lo dingin, a hmai a tuam ding. 13 Ka sûr in ka khuh fawn ding ih, ka tháng ah anih cu awh a si ding. Kaldia-mipawlih ram, Babilon ah anih cu ka hruai ding; cu tawkah a thi ko ding nân, cuih ram cu a hmu lo ding. 14 A kimvelih um amah bawmtu le a ralkap rual hmuahhmuah cu thli lakah ka ṭekdarhter hai ding, cule an dung ihsin ka ralnâm ka zûk ding.

15 «Cun miphunpawl lakih ka ṭekdarhter hai ih ram kip ih ka vahdarhter hai tikah, keimah cu Jehovah ka si ti an thei ding. 16 Asinan an fehnak kip miphunpawl lakah an thil fihnungzapawl hmuahhmuah an thăn theinak dingah, mi málte cu ralnâm, mangṭam le nathrisia ihsin ka zuah hai ding. Cun keimah cu Jehovah ka si ti an thei ding,» ti aw.

17 Cuihtlunah Jehovah kamsuakthu ka hnenah a thleng, 18 «Minung fapa, ṭhia rero cingin na sang ei awla, khūr cing le phâng cingin tidai in aw. 19 Cule rammipawl hnenah, ‹Israel ram ih Jerusalem luahtupawl thuhla ah Bawipa Jehovah in hitin a ti: thlarîng cingin an sang an ei ding ih, thlaphâng cingin an tidai an in ding, an ram cu a sungih cêngpawl hmuahhmuah ih thahrumsuahnak ruangah a sungih thilpawl hmuahhmuah cu kawlawngter an si ding. 20 Cun luah mi khawpipawl cu an kawlawng ding ih, ram cu a ṭhing ding; cule keimah cu Jehovah ka si ti nan thei ding,› a ti,» tiin.

21 Cule Jehovah kamsuakthu ka hnenah a thleng, 22 «Minung fapa, Israel ram ah nan neih mi hi thufim hi ziangtinak saw a si? ‹Nikhua a rei ih, larnak kip an hlawhsam,› nan ti mi hi! 23 Curuangah Bawipa Jehovah in hitin a ti: hi thufim hi ka cemter ding ih, Israel ram ah thufim vekin an hmang nawn lo ding. Asinan an hnenah, ‹Ni cu a nâi thlang, larawknak kip thlenkim ding ni cu,› tiah sim hai aw. 24 Ziangahtile Israel sungza lakah larnak diklo le tinzoh ih ānvelthiamnak a um nawn lo ding. 25 Ziangahtile keimah cu Jehovah ka si. Ka ṭawng ih, ka ṭawngsuak mi kamsuakthu cu a thlengkim ding, a khawtlai nawn lo ding; ziangahtile, Maw helhmang sungza, nan nundam laiah thu ka sim ding ih, ka tuahsuak ding, Bawipa Jehovah in a ti,» tiin.

26 Jehovah kamsuakthu ka hnenah a thlengsal, 27 «Minung fapa, ngai hnik, Israel sungza in, ‹Larnak a hmuh mi cu tikcu reipi hnuih thleng ding mi a si ih, cān hlapi hrangah thu a phuang a si,› an lo ti. 28 Curuangah an hnenah, ‹Bawipa Jehovah in hitin a ti: ka kamsuakthu pakhat hman a khawtlai lo ding, i sim mi kamsuakthu cu tuahsuak a si sawn ding, Bawipa Jehovah in a ti,› tiah ti aw,» tiin.

Profet Diklopawl Hmakhawpihnak

1 Cule Jehovah kamsuakthu ka hnenah a thleng, 2 «Minung fapa, Israel profet thuphuangtupawl dokalhin thuphuang awla, anmai lungpuak thuphuangtupawl hnenah, ‹Jehovah kamsuakthu ngaithla uh!› tiin sim aw.

3 «Bawipa Jehovah in hitin a ti: anmai thinlung thlun ih, zianghman hmuh mi nei lo profet â-pawl cu an hmakhua a pit! 4 Maw Israel, na profetpawl cu nelrawn ih khawpi răwp lakih sihál vek an si. 5 Khawkulh siatnakpawl ah nan so lo ih, Jehovah ni ih ral doawknak ih ding dingin Israel sungza kimvelah khawkulh khal nan dâwl lo. 6 Larnak diklo le tinzohnak thuphan an hmu. Jehovah in anmah thlah si loin, ‹Jehovah in hitin a ti!› tiah an ti. Cuticingin an thu thlengkim dingin an beisei. 7 Kei in ka sim riai lo nain, ‹Jehovah in a ti,› tiih nan ti tikah larnak diklo nan hmu ih, tinzohnak thuhphan nan sim a si lo maw?»

8 Curuangah Bawipa Jehovah in hitin a ti: «Zianghmanlo men nan sim ih, thuphan nan hmuh ruangah, ngai hnik uh, ka lo do a si, Jehovah in a ti. 9 Ka kut in larnak diklo hmutu le tinzohnak thuphan reltu profetpawl cu a do ding; ka mipi pungkhawm lakah an tel lo ding ih, Israel sungza hmin ngannak ah telh an si fawn lo ding, Israel ram khalah an lut lo ding. Cun keimah cu Bawipa Jehovah ka si ti nan thei ding.

10 «Ziangruangahtile hnangamdaihnak um lopi in, ‹Hnangamdaihnak!› tiin ka mipawl an bum ruangah a si. Cun mi in kulh a dâwl ih, ngai hnik, an hnihmawi. 11 A hnihmawitu hnenah a cim ding tiah sim aw. Ruahpi vanbăwng a sur ding ih, Maw nannih rial tumpipawl, nan tla ding; cule thlipi a rung hrang ding. 12 Ngai hnik, khawkulh a cim tikah, ‹Na hnihmawi mi cu khuiah so,› tiah an lo ti lo ding maw?»

13 Curuangah Bawipa Jehovah in hitin a ti: «Ka thinsonak ah thlipi ka nuaisiatter ding ih, ka thinhengnak ah ruahpi vanbăwng ka surter ding, cule ka thinsonak ah hlorálter dingin rial nasazet ka tlakter ding. 14 Cutin nan hnihmawi mi khawkulh cu ka cimter ding ih, a lungphum a lăng theinak dingah lei ah ka dirthla ding; cumi a cim tikah nannih cu a sungah nan hlorál ding. Cun keimah cu Jehovah ka si ti nan thei ding.

15 «Cutivekcun khawkulh par le a hnihmawitupawl parah ka thinlingnak cu ka hlĕnsuak ding ih, nan hnenah, ‹Khawkulh a um nawn lo ih, a hnihmawitupawl khal an um nawn lo, 16 Jerusalem thuhla phuangtu Israel profetpawl le hnangamdaihnak um lopiih hnangamdaihnak larnak hmutupawl khal,› tiah Bawipa Jehovah in a ti.

17 «Cuvekin, nang minung fapa, anmai lungpuak phuangtu, na mipawlih fanupawl dokalhin na hmai hawi awla, anmah dokalhin thuphuang aw, 18 cule Bawipa Jehovah in a ti: mi bân hmuahhmuah hrangih dawi bânbun ṭhitu nunaupawl le mi nunnak pelnak hrangih mitûm mite lu khuhnak hrang puan ṭhitu nunaupawl cu an hmakhua a pit. Ka mipawlih nunnak cu pêlin, nanmai nunnak cu nan zuah ding maw? 19 Cule barli sangvut ṭhuam málte ruang le sang phel nawi ruangin ka mipawl lakah ka hmin nan bawrhbangter. Thuphan ngaithlatu ka mipawl hnenih thuphan nan per ruangah thi lo ding mipawl nan that ih, nung lo ding mipawl nan nungter.

20 «Curuangah Bawipa Jehovah in hitin a ti: ngai hnik uh, vâte bangih mi nunnak pelnak ih nan hman mi dawi bânbun cu ka do a si. Cupawl cu nan bân ihsin ka băwtthlek ding ih, vâte bangih nan pel mipawlih nunnak rori cu ka luatter ding. 21 Nan hmaikhuh khal ka băwtthlek ding ih, nan kut ihsin ka mipawl ka runsuak hai ding, cule nan pel dingah annih cu nan kut ah an um nawn lo ding. Cun keimah cu Jehovah ka si ti nan thei ding.

22 «Ka riahsiatter mi si lo, thuphan in midingfel thinlung riah nan siatter ih, misualrál cu a nunnak runsuak dingin a sualralnak lamzin ihsin lamlêt lo dingin misualrálpawlih kut nan cakter ruangah, 23 nannih in larnak diklo nan hmu nawn lo ding ih, tin nan zoh nawn fawn lo ding; cule nan kut ihsin ka mipawl ka runsuak hai ding, cutin keimah cu Jehovah ka si ti nan thei ding,» tiin.

Milem Biaknak Dāntat a Si Ding

1 Israel upa hrekkhat ka hnenah an ra ih ka hmaiah an to. 2 Cule Jehovah kamsuakthu ka hnenah a thleng, 3 «Minung fapa, hi minungpawl in an thinlung sungah an milempawl an tungding ih, mawhsualnak ih anmah bahtertupawl an hmaiah an ret. Keimah in răwn ding ka siangaw ding maw?

4–5 «Curuangah an hnenah sim awla, an hnenah, ‹Bawipa Jehovah in hitin a ti: an milempawl hmuahhmuah hmangin ka hnen ihsi fehpêng zo Israel sungza thinlung ka lakkirsal theinak dingah, Israel sungza mi pakhat in a thinlung ah milempawl tungding in, a hmaiih a mawhsualnak ih bahtertupawl ret ih, profet hnenih ratu cu kei Jehovah in a milem tamzia zulhin ka sâng ding,› ti aw.

6 «Curuangah Israel sungza hnenah cun, ‹Bawipa Jehovah in hitin a ti: nan lung thleng uhla, nan milempawl hnen ihsin ra kir uh, nan thil fihnungzapawl hmuahhmuah hawisan uh. 7 Ziangahtile Israel sungza lakih mi pakhat asilole Israel ram ih cêng ram dang mipawl lakih mi pakhat, ka hnen ihsin thiarfihlimaw in, a thinlung ah a milempawl tungding ih, a hmai rori ah mawhsualnak ih bahnak retin, keimah răwn dingih profet a pantu cu kei Jehovah rori in amah cu ka sâng ding. 8 Cu pa dokalhin ka hmai ka hawi ding ih, amah cu hminsinnak le hnihsuahsainak ah ka tuah ding, cule ka mipawl lak ihsin ka sâtcat ding. Cun keimah cu Jehovah ka si ti nan thei ding.

9 ‹Cule profet cu bumih umin thusim hnik sehla, cuih profet cu kei Jehovah in ka bum a si ding, cule a parah ka kut ka suah ding ih, ka mi Israel hnen ihsin ka hlorálter ding. 10 Cun an mawhsualnak dāntatnak cu an phur ding, profet le amah rawntu dāntatnak cu a bangaw ding; 11 cutin Israel sungza cu ka hnen ihsin an pial nawn lo ding ih, an dānpahbălnak hmuahhmuah hmangin an bawrhbangawter nawn lo ding, ka minung an si sawn ding ih, an Pathian ka si ding, Bawipa Jehovah in a ti,› ti aw,» tiin.

Jerusalem Zuah a Si lo Ding

12 Jehovah kamsuakthu ka hnenah a rung thlengsal: 13 «Minung fapa, rinum loih umnak in ram pakhat cu ka parih a sual tikah, cumi cu dokalhin ka kut ka suah ding; a sang ngahnak hrampi ka sâtcat ding, a parah mangṭam ka thlah ding ih, minung le ramsa ka that ding. 14 Hi mi pathum Noah, Daniel le Job pawl hman cu tawkah cêng hman hai sehla, an dingfelnak cun anmah lawng a runsuak ding, Bawipa Jehovah in a ti.

15 «Sahrangpawl an ram ka fángsuakter hai asile, ram cu an lawnglakter ding ih, an rămter ding, cutin sahrangpawl ruangah zohman in an pâl nawn lo ding. 16 Hite pathum khal cu tawkah cêng hman hai sehla, ka nun rori vekin, Bawipa Jehovah in a ti, an fapapawl an runsuak lo ding ih, an fanupawl khal; anmah lawng runsuah an si ding, cule ram cu a ṭhing ding.

17 «Cule cuih ram ah ralnâm ka thlengter ih, ‹Ralnâm in ram fángsuak seh,› ka ti ih, milai le ramsa ka hlorálter asile, 18 cu tawkah hite pathum cêng hai hmansehla, ka nun rori vekin, Bawipa Jehovah in a ti, an fapapawl siseh, an fanupawl siseh an runsuak lo ding, anmah lawng runsuah an si ding.

19 «Cun cuih ram ah nathrisia ka thlengter ih, minung le ramsa that dingin ram parah kan thinso cu thisen in ka thletbŭng asile, 20 Noah, Daniel le Job pawl rak cêng hman hai sehla, ka nun rori vekin, Bawipa Jehovah in a ti, an fapa siseh, an fanu siseh an runsuak lo ding; an dingfelnak in anmah lawng a runsuak ding.

21 «Ziangahtile Bawipa Jehovah in hitin a ti: Jerusalem parih ka dāntatnak na zet pali ralnâm, mangṭam, sahrang le nathrisia pawl tla minung le ramsa that dingih ka thlah tikah cun ziang tlukin so a nasat ding! 22 Cuticingin, ngai hnik, cu tawkah cun a tāngsŭn hruaisuah ding mipawl cu tān an si ding ih, fapapawl le fanupawl khal; ngai hnik uh, nan hnenah an ra suak ding ih, an nundān le an thil tipawl nan hmu ding. Cun Jerusalem parih thil ṭhalo ka run thlĕn mi, a parih ka run thlĕn mipawl hmuahhmuah thu ah hnĕm nan si ding. 23 Cule an nundān le an thil ti pawl nan hmuh tikah an lo hnem ding; cule a parih ka thil ti mipawl hmuahhmuah cu săn nei loin ka ti lo ti nan thei ding, Bawipa Jehovah in a ti,» tiin.

Ṭhathnemnak Nei Lo Sabit Hri

1 Cule Jehovah kamsuakthu ka hnenah a thleng:

2 «Minung fapa, sabit hri hnge cu thing dang ziang hnakin, tupi thingkungpawl lakih sabit hri hnakin ziang a si cuang? 3 Sabit hri ihta la tahratin thil ziang simaw tuahnak ah hman a si maw? Asilole thilkhainak hrangah a hnge cu zumin mi in an tuah ding maw? 4 Ngai hnik, ur ding menah meisa sungih paih a si ṭheu; cule meisa in a zim veve kāngin a lai khal ût bang sehla, a ṭhahnem cuang ding maw? 5 Ngai hnik, a kăngsiat hlan hmanah, cumi ihsin ziang thil hman tuah theih a si lo. Meisa ih kāngin, a ût tikah cun ziangtluk ṭhahnem lo a si sinsin pei?

6 «Curuangah Bawipa Jehovah in hitin a ti: ‹Tupi thingkungpawl lakih sabit hri cu meisa muahnak hrangih meisa sungih ka paih vekin Jerusalem luahtupawl cu ka pesuak zo. 7 Cule anmah dokalhin ka hmai ka hawi ding. Meisa sung ihsin tlansuak hman hai sehla, meisa in a kangrál hai thotho ding. Cun anmah dokalhih ka hmai ka hawi tikah keimah cu Jehovah ka si ti nan thei ding. 8 Cutivekin rinum loih an um ruangah ram cu ka ṭhingter ding,› Bawipa Jehovah in a ti,» tiin.

Rinumlo Jerusalem

1 Jehovah kamsuakthu ka hnenah a thlengsal, 2 «Minung fapa, Jerusalem hnenah a fihnunzia theihter aw, 3 cule a hnenah, ‹Bawipa Jehovah in hitin a ti: na hramthăwknak le na suahnak cu Kanaan ram ihsin a si; na pa cu Amor-mi a si ih, na nu cu Heth-mi a si. 4 Na suahnak thuhla ah cun, na suah ni ah na laihri tan a si lo, lo tifai dingin tidai ih khawlh na si fawn lo ih, cite ih hnulfai na si lo, cule puan ih tuamhlum khal na si lo. 5 Hipawl ti dingin duhdawt zetin lainatnak thawn zo-ih mit hmanih zoh na si lo; cuhnakin ramlak ah hlăwn na si sawn, ziangahtile na suah ni ihsin nang cu fihnungza na si.

6 ‹Na kiangih ka rat tikah khan, na thisen ah tâlin ka lo hmu, na thisen ih na um laiah na hnenah, «Nung aw!» tiah ka lo ti. A si, na thisen ih na um laiah, «Nung aw!» tiah ka lo ti. 7 Ramlak ih par mûm bangin ka lo karhter, na ṭhang ih, na hung sâng, cule ceimawiawk na cu thlang. Na pawhte a băwm ih, na sám a sau thlang, asinan nang cu hnipuan lo le taklawngin na um.

8 ‹Na kiangih ka rat tikah khan ka lo hmu, ngai hnik, cai cu na si thlang; cule ka puan ka lo zawn ih, na taklawngnak cu ka khuh. A si, na hnenah sia ka săm ih, thukham ka lo tuahpi, cule nang cu ka ta ah na cang, Bawipa Jehovah in a ti.

9 ‹Cun tidai in ka lo khawlh; a si, na thisen ka lo khawlhfaisak verver ih, hriak ka lo culh. 10 Cawihcin puan in ka lo tuam ih, ṭhakhas phaw ih tuah mi kedam ka lo pe; puan nem páte in ka lo tuam ih, pu puan ka lo sin. 11 Ceiawknak in ka lo thuammawi, na kut ah faupawl ka lo bunter ih, na hngawng ah ṭhi. 12 Cule na hnar ah hnarkhaih, na hna ah hnakhaih le na lu ah lallukhum mawi in ka lo cei. 13 Cutivekcun sui le ngun ih thăwm na si ih, na hnipuan cu puan nem páte, pu puan le cawihcin puan an si. Sangvut phŭt ṭha, khuaitizu le hriak cu na rawl a si. Na mawi tuk lawmmam ih, siangpahrang sungkua dinhmun na thleng. 14 Na mawinak ruangah miphunpawl lakah na hmin a thang, ziangahtile ka lo thăwmnak ka mawinak ruangah na mawinak cu a famkim a si, Bawipa Jehovah in a ti.

Jerusalem Hlawhhlannak

15 ‹Asinan na mawinak na rinsan, na hminthan ruangah hlawhhlannak na tuah ih, a lo pantu kip hnenah na hlawhhlannak na thlebung. 16 Na sinfen hrekkhat na la ih, răwng phunkimin na hmun sângpawl na cei ih, an parah hlawhhlannak na tuah. Cuvek thil cu thleng ding a si lo, a um khal um ding a si lo. 17 Ka sui le ka ngun ceiawknak mawi zetzet ka lo pek mi khal na la ih, cupawl thawn hlawhhlannak na tuah theinak dingah, nangmai hrangah mipa limpawl na tuah. 18 Na cawihcin sinfen na la ih, cupawl cu na tuam hai, cule an hmaiah ka hriak le ka rimhmui na hlan. 19 Ka lo pek mi ka rawl: ka lo cawmnak sangvut phŭt, hriak le khuaitizu pawl cu an hmaiah rimhmui thaw ah na hlan, Bawipa Jehovah in a ti.

20 ‹Cuihtlunah i hrinsak mi na fapapawl le na fanupawl na hruai ih, ei dingah milimpawl hnenah rai ah na thawi. Hlawhhlannak na tuah mi hi thil tenau men maw a si? 21 Ka fātepawl na that ih, meisa paltlăngterin an hnenih na hlăn hi. 22 Cule na no laiih hnipuan hruh lo le taklawngih na um le na thisen ih na tāl lai cānpawl kha na fihnunnak le hlawhhlannak na tuahnak hmuahhmuah ah na cîng nawn lo.

23 ‹Cule, «Hmakhawpihnak, na hmakhua a pit!» Bawipa Jehovah in a ti. Na sualralnak hmuahhmuah hleiah, 24 nangmai hrangah ^ainnte na tuah ih, kăwtthler kip ah nangmai hrangah hmun sâng na tuah. 25 Kăwtthler lu i kip ah hmun sâng na tuah ih, na mawinak cu fihnungza ah na canter. A lo pantu kip hnenah na pharhaw ih, na hlawhhlannak na karhter. 26 Na innhnen ^btaksa tûm nei, Izip-mipawl thawn hlawhhlannak na tuah ih, ka thin hengter dingin na hlawhhlannak na karhter.

16:24^a innte: Hihi pathian biaknak innte a si.

16:26^b taksa tûm nei: Mipa zahmawh relnak.

27 ‹Curuangah ngai hnik, nangmah dokalhin ka kut ka suah, na ni tin rawl cu ka málter. Na hurnak zahpitu, nangmah huatu Filisṭia fanupawl ih duh duhih tuah dingah ka lo pesuak zo. 28 Na khawp thei lo ruangah, Assiria-mipawl hnenah hlawhhlannak na tuah; a si, anmah thawn hlawhhlannak na tuah, asinan na di a riam thei hrih cuang lo. 29 Cuihhleiah sumdâwng ram Kaldia thawn na hlawhhlannak na karhter, cucingin na di a riam thei cuang lo.

30 ‹Ningzah thei lo hlawhhlângnuih umdān vekin hi thil hmuahhmuah na tuah tikah, na thinlung cu ziang tlukin so a ṭawnṭai! Bawipa Jehovah in a ti. 31 Kăwtthler lu kip ah na innte na dĭn ih, zin kip ah na hmun sâng na sak. Cucingin hlawhhlâng na băng cuang lo, ziangruangahtile hlawhhlannak man na nautat. 32 Nang cu nupi uire, mai pasal aiih mi dangpi latu na si! 33 Hlawhhlâng hmuahhmuah hnenah mipa in man an pe ṭheu, asinan nang cun hmun i kip ihsin na hlawhhlannak an lo pan theinak dingah, a lo duhtu hmuahhmuah hnenah nawhthuh na pe sawn ṭheu hai ih na hlang hai sawn riangri. 34 Na hlawhhlannak ah zohman ih an lo pan lo hi, nunau dangpawl hnakih na danglamnak a si. Nangmah in a man na pe sawn riangri ih, zohman in man an lo pe lo, curuangah nang cu na danglam hrimhrim.

Jerusalem cu a Duhtupawl in an Năwmpi Ding

35 ‹Curuangah, Maw hlawhhlângnu, Jehovah kamsuakthu hi ngaithla aw, 36 Bawipa Jehovah in hitin a ti: na hurnak cu thletbŭng a si ih, na cai mipawl thawn nan hlawhhlannak ah na taklawngnak hlip a si ih, na fihnunnak milempawl hmuahhmuah ruangah le milempawl hnenih na pek mi na fātepawlih thisen ruangah, 37 ngai hnik, a lo duhtu, năwmtawlnak na tuahpipawl hmuahhmuah, na duh mipawl hmuahhmuah rori le na huat mipawl hmuahhmuah cu ka kokhawm hai ding; cule hmun kip ihsin nangmah dokalhin ka hruaikhawm hai ding ih, na taklawngnak hmuahhmuah an hmuh theinak dingah, an hnenah na taklawngnak ka hlip ding. 38 Cule uire le thisensuahhmang nunaupawl vekin dān ka lo tat ding, thinso le thîkthusiatnak thisen nan parah ka thlengter ding. 39 Nangmah khal an kut ah ka lo pe ding, annih in na inntepawl an tluter ding ih, na hmun sângpwl an siatbăl ding. Na hnipuan an lo hlihsak ding, na ceiawknak mawi zetzet pawl an lo laksak ding ih, hnipuanlo le taklawngin an lo tân ding.

40 ‹Cuihtlunah nangmah dokalhin mipungkhawm an hruai ding, lungto in an lo deng ding ih, an ralnâm in an lo cándip ding. 41 Meisa in na innpawl an ur ding ih, nunau tampi mithmuhah dān an lo tat ding; cule hlawhhlannak tuah thei lo ko ka lo tuah ding ih, a lo duhtupawl khal na hlang hai nawn lo ding. 42 Cutin na parih ka thinsonak cu ka rehter thlang ding ih, ka thîkthusiatnak in a lo suahsan ding. Ka thin a dai ding ih, ka thin a heng nawn lo ding. 43 Na no lai nipawl na cîng nawn lo ih, hi thilpawl hmangih ka thin i hengter ruangah, ngai hnik, na thil ti mipawl cu na lu parah ka tlater ve ding. Cule na thil fihnungzapawl hleiah fihnungza hursualnak na tuah nawn lo ding, Bawipa Jehovah in a ti.

Samaria le Sodom hnakih Sualrálsawn

44 ‹Ngai hnik, thufim reltu pauhpauh in hi thufim hi nangmai thuhla ah an rel ding: «A fanu in a nu a zăwn!» ti hi! 45 A pasal le a fātepawl ningtu na nuih fanu na si, an pasalpawl le fātepawl huatu na unaupawlih unaunu na si. Na nu cu Heth-mi a si ih, na pa cu Amor-mi a si.

46 ‹Cule na unu cu Samaria-mi a si ih, amah le a fanupawl cu na sak lamah an cêng; cule na thlang lamih cêng na naunu cu Sodom le a fanupawl an si. 47 An lamzin zawhin, an thil fihnungzapawl bangtukin na tuah lawng si loin, cān rei lo te sungah na nundān hmuahhmuah ah anmah hnakin na bawrhhlawh sawn, 48 Ka nun rori bangin, Bawipa Jehovah in a ti, na naunu Sodom le a fanulepawl in nangmah le na fanupawl ih tuah vekin an tuah lo. 49 Ngai hnik, himi hi na naunu Sodom-ih mawhsualnak cu a si: amah le a fanu in hngalnak, rawl tlasam loin le ngaihsamnak nasazet an nei, cucingin mifarah le mitlasam khal an bawm lo. 50 Cule an puarthau ih, ka hmaiah thil fihnungza an tuah. Curuangah ka hmuh hai tikah anmah cu ka thiarhlo hai a si.

51 ‹Samaria in na sualnakpawl a hrek hman a tuah ve lo; asinan nang cun anmah hnakin na thil fihnungzapawl cu na karhter ih, na tuah mi thil fihnungza hmuahhmuah ruangah na unau nunaupawl cu midingfel vekin na langter hai. 52 Na laicin nunaupawl aiawhih na hrawlhawk ruangah nangmai ningzahnak khal phur aw. Na rak tuah zo mi na sualpawl cu anmah hnakih fihnung sawn an si ruangah nangmah hnakin an dik sawn a si. Curuangah na ningzak awla, nang khal na ningzahnak phur aw, ziangahtile na unau nunaupawl cu nangmah hnakih dingfel sawn na bangter hai.

53 ‹An vanneihnak ka tungdingsal ding, Sodom le a fanulepawlih vanneihnak le Samaria le a fanulepawlih vanneihnak, cule an lakah na vanneihnak ka tungdingsal ding, 54 cumi cu na mualphonak na phurh theinak dingah le an hnemawknak ding hrangih na thil tuah zo mipawl hmuahhmuah ih na ning a zah theinak dingah a si. 55 Na unau nunaupawl a si mi Sodom le a fanulepawl le Samaria le a fanulepawl cu an dinhmun hmaisa ah an kirsal ding ih, nangmah le na fanulepawl khal nan dinhmun hmaisa ah nan kirsal ve ding. 56 Ziangahtile na sualralzia hmuhsuah a si hlanlo, na unaunu Sodom cu na hngal nipawl ah na kâ ah relsuah a rak si lo. 57 Cucu nangmah lo hmuhsuamtu na kimvelih um Siria fanupawl le a kimvelih um hmuahhmuah hrang, Filisṭia-mipawlih fanupawl hrangah nang cu hmuhsuam mi ah na cang. 58 Na hurnak le na fihnunnak cawhkuan na phur a si, Jehovah in a ti. 59 Ziangahtile Bawipa Jehovah in hitin a ti: thukham pahbălnak ih thukamnak hmuhsuamtu nang, na tuah bangin na parah ka tuah ve ding.

Kumkhaw Thukham

60 ‹Cutisikhalsehla na no lai cān ih nangmah thawi ka thukham ka cîng ding ih, nangmah thawn kumkhaw thukham ka dĭn ding. 61 Cun na unau nunaupawl, na unu le na naunu na cohlan tikah, na nundānpawl na mángsal ding ih na ning a zak ding. Anmah cu fanu vekin nangmah ka lo pe ding, nangmah thawi ka thukham ruangah cun si loin. 62 Nangmah thawn ka thukham ka dĭn ding ih, keimah cu Jehovah ka si ti na thei ding, 63 cutin na rak tuah mipawl hmuahhmuah ka ngaidam tikah, na mángsal ding ih na ning a zak ding, cule na ningzahnak ruangah na kâ na âng nawn lo ding, Bawipa Jehovah in a ti,› ti aw,» tiin.

Muvanlai Pahnih le Sabit Hri

1 Jehovah kamsuakthu ka hnenah a thleng, 2 «Minung Fapa, thupawlh thawh awla, Israel sungza hnenah tahṭhimnak sim aw, 3 cule ‹Bawipa Jehovah in hitin a ti:

Muvanlai tumpi, thla tûm zet le sau zet nei,
Răwng phunphun hmul thawi khat cu
Lebanon ah a ra ih,
Sidar lu zik cu a thiar.
4 A lu zik ih hnge no cu a khiak ih,
Sumtuahnak ram ah a thiar.
Sumdâwngtupawlih khawpi ah cumi cu a ret.
5 Cun cuih ram ih thlaici hrekkhat a la ih,
Lei ṭha ah a tuh;
Tidai tampi kiangah a phun ih,
Partiam thing bangin a phun.
6 Cule cucu a ṭhang ih sabit hri niam ciaici ah a cang;
A hngepawl cu amah lamah an zâm vivo,
Asinan a hram cu a hnuaiah an um.
Cutin sabit hri ah a hung cang ih,
A hung cerhsuak,
Cule hngeṭek a suak.
7 Asinan hmul tampi nei muvanlai tumpi thla hlai zet a dang pakhat a um;
Ngai hnik, tidai a pek theinak dingah
Sabit hri cu amah lamah a hram a thla ih,
A phunnak hmun ihsin amah lamah hngeṭekpawl cu a cerhsuak.
8 Hngeṭekpawl suahin, rahsuah ih sabit hri ṭha a si theinak dingah
Cumi cu tidai tlaksam lonak hmun lei ṭhatnak ah phŭn a si.

9 ‹Cule nang in, «Bawipa Jehovah in hitin a ti:

A hmuingil pei maw?
A vuai ih a hnah cerh tharpawl khal a vuai theinak dingah,
A rah satṭil in,
A hram a phawisuak lo ding maw?
A hram ihsi phawisuak dingin ^ahuham nasazet le mi tampi khal a ṭul lo ding.
10 A si, ngai hnik, phŭn a si ko nân,
A hmuingil pei maw?
Nisuahnak lam thli in a hran tikah, a ṭonak hmun ah a ro in a vuai thluh lo ding maw?» ti aw,› a ti,» tiin.

17:9^a huham: A ṭawng hrampi ah cun, «bân» ti a si.

11 Cuihtlunah ka hnenah Jehovah kamsuakthu a thleng, 12 «Atu ah helhmang sungza hnenah sim hai aw: ‹Hi thilpawlih tican nan thei maw?› tiin. Nang in, ‹Ngai hnik, Babilon siangpahrang cu Jerusalem ah a feh ih, a siangpahrang le a bawipawl a laksak ih, Babilon ih a hnenah a hruai hai. 13–14 Cule lalram cu a duai ih, amah te a din theilonak dingah, a thukham thlun lawngih a din theinak dingah, siangpahrang cithlah cu a lâk, amah thawn thukham a tuah ih, thu a kamter. Ram sungih micakpawl khal a laksak. 15 Asinan amah cu ráng tampi le ralkap tampi rak pe dingih dil dingin Izip ah palaipawl thlahin a parah a hél. A hmuingil pei maw? Khavek thil titu teh a luat pei maw? Asilole thukham pahbăl in a luat thotho pei maw?

16 ‹Ka nun rori bangin, Bawipa Jehovah in a ti, siangpahrang ih amah ruattu siangpahrang cēnnak hmun Babilon ah a thi tengteng ding; a thukam cu anih in a hmuhsuam ih, a thukham khal a pahbăl. 17 Mi tampi that dingin lei an sûngpâwng ih kulhkhŭmnak hruang an tuah tikah, a ralkap cakpawl le mipungkhawm tumpi hmangin Faro in raldonak ah amah cu a bawm thei lo ding. 18 Thukham pahbălin cuih thukam a hmuhsuam, ngai hnik, thu a kam hnuah, hi thil hmuahhmuah a tuah ruangah, a luatsuak thei lo ding,› tiah sim aw.

19 «Curuangah Bawipa Jehovah in hitin a ti: thungaiten a hmuhsuam mi cu ka thukam a si ih a pahbăl mi cu ka thukham a si, ka nun rori bangin, amai lu parah mawhnak ka tlater ding. 20 Ka sûr in ka khuh ding ih, amah cu ka tháng ah awh a si ding. Amah cu Babilon ah ka hruai ding ih, cu tawkah a mawhsualnak, ka parih a tuah mi a mawhsualnak ruangah amah cu thu ka ṭhen ding. 21 A ralkap rual lakih hril mipawl cu ralnâm in an tlu ding ih, a tāngsŭnpawl cu thli lakah thehdarh an si ding; cule kei, Jehovah in ka ṭawngsuak a si ti nan thei ding.

A Netnakah Israel Khaisan a Si

22 «Bawipa Jehovah in hitin a ti: sidar thing lu zik ka la ding ih, ka phun ding. A lu zik ih cerhno cu ka khiak ding ih, tlang sâng turu takah ka phun ding. 23 Hngeṭek suahin, rah rahin, sidar kung ropi zetih a can theinak dingah, Israel tlang sâng ah ka phun ding. Cu tawkah vâte phun zakim an cêng ding, a hngeṭek zârhnemah an cêng ding. 24 Cule ramlak thingkung hmuahhmuah in keimah cu Jehovah ka si ti an thei ding. Thingkung sâng ka hnûkniam ih, thingkung niam ka khaisâng, thingkung hring ka roter ih, thingkung ro ka hringter, keimah cu Jehovah ka si, keimah in ka ṭawngsuak ih, ka tuahsuak a si,» tiin.

Thufim Diklo Hnawnnak

1 Jehovah kamsuakthu ka hnenah a thlengsal, 2 «Israel ram thuhla ih hi thufim,

‹Palepawl in sabit rah thûr an ei ih,
Falepawlih ha a ṭim,›

ti mi nan hman tikah ziang nan ti duhsăn a si? 3 Ka nun rori bangin, Bawipa Jehovah in a ti, Israel ram ah hi thufim hi nan hmang nawn lo ding.

4 Ngai hnik uh, nunnak hmuahhmuah ka ta a si;
Paih nunnak ka ta a si ih, fapaih nunnak khal;
Sual tuahtu cu a thi ding.
5 Asinan midik pakhat rak um in,
Diktak le thildik tuahin,
6 Tlang parih rairingpawlih thawinak ei loin,
Israel sungza-ih milempawl lam zoh loin,
A innhnen nupi bawrhbangter loin,
Nunau dān nei lai naih loin;
7 Zohman palbĕt loin,
Leibatu hnenah a tiamkamnak pekirsal in;
Thahrumsuahin zohman suam loin,
Mirilrawng hnenah a sang pe sawnin,
Taklawngih umpawl hnipuan hruhter sawnin;
8 A pungih mi cawih loin,
A ṭhang zianghman la fawn loin,
Mawhsualnak ihsin a kut sûp sawnin,
Minung le minung karlakah dik zetih thuṭhennak tuahin;
9 Ka sakhaw dānpawl zawhin,
Ka cīn le dānpawl rinumten a thlun asile;
Anih cu midik a si;
Anih cu a nung tengteng ding! Bawipa Jehovah in a ti.
10 Anih cun fapa suamhmang,
Thisen suahhmang,
^aHivek thilpawl lakih ziang simaw tuahtu,
11 (A pa cun hi thilpawl lakih pakhat hman a tuah lo nain)
Tlang parah rairingpawlih thawinak hman ei sawnin,
A innhnen nupi bawrhbangterin;
12 Mifarah le mitlasam palbĕtin,
Mi va suam in,
A tiamkamawknak hlensuak loin,
Milempawl zohin,
Thil fihnungza tuahin;
13 A pungih mi cawihin,
A ṭhang khal la hnik ta sehla,
Anih cu a nung ding maw si?
A nung lo ding!
Hi thil fihnungzapawl hmuahhmuah a rak tuah zo,
Thah tengteng a si ding a si;
A thisen cu a lu parah a tla ding.
14 Ngai hnik, anih khal in fapa hringin
A pa ih rak tuah mi sualpawl hmuahhmuah kha hmuin,
Cupawl cu ruatin, cuvekih tuah ve loin;
15 Tlang parah rairingpawlih thawinak ei loin,
Israel sungza-ih milempawl zoh loin,
A innhnen nupi bawrhbangter fawn loin;
16 Zohman palbĕt loin,
Thukamnak zianghman phût fawn loin,
Mi va suam fawn loin,
Mirilrawngpawl hnenah sang pe sawnin,
Taklawngih umpawl hnipuan hruhterin;
17 Mifarah hnenah diklo zetih thil ti ding kut sûpin,
A pungih cawih loin,
A ṭhang la fawn loin,
Ka thuṭhennakpawl tuahsuak sawnin,
Ka sakhaw dānpawl a thlun asile,
A paih mawhsualnak ruangah a thi lo ding;
A nung tengteng ding!
18 A pa lawngte cun râwng zetin mi a palbĕt,
A unaupa a suam ih,
A mipawl lakah thil ṭhalo a rak tuah ruangah,
Ngai hnik uh, anih cu a mawhsualnak ruangah a thi ding.

18:10^a Hivek thilpawl: Câng 5-9 tiangih a rel mi sualnakpawl a sawhkhih.

Kirsal Awla, Nung Aw

19 «Cucingin nannih in, ‹Ziangah so fapa in a paih mawhsualnak a tuar lo ding?› tiah nan ti. A fapa cun dikte le felten a tuah ih, ka sakhaw dān hmuahhmuah a thlun ih a tuahsuak ṭheh ruangah, anih cu a nung tengteng ding. 20 Sual tuahtu cu a thi ding. Fapa in a paih mawhsualnak a tuar lo ding ih, pa khal in fapaih mawhsualnak a tuar lo ding. Midingfelih dingfelnak cu amai hrangah siar a si ding ih, misualrálih sualralnak cu amai parah a tla ding.

21 «Asinan misualrál cun a tuah mi sualpawl hmuahhmuah ihsin a lamlêt, ka sakhaw dān hmuahhmuah a thlun ih, dikte le felteih a tuah asile, a nung tengteng ding, a thi lo ding. 22 A rak tuah mi dānpahbălnakpawl lakih pakhat hman amah dokalhih cinken a si lo ding; a rak tuah mi dingfelnak ruangah, anih cu a nung ding. 23 Misualrál thihnak ah lunghmuinak ziang tal ka nei maw? Bawipa Jehovah in a ti. A nundān ihsin lamlêt ih a nun hi ka duh sawn lo maw si?

24 «Asinan midingfel pakhat a dingfelnak ihsin a pial ih mawhsualnak a tuah, cule misualpa ih tuah bangtukin thil fihnungzapawl hmuahhmuah a tuah asile, anih cu a nung pei maw? A rak tuah mi dingfelnak hmuahhmuah cu cinken an si lo ding; a rinumlonak ruangih a mawhnak le a rak tuah mi sualpawl ruangah anih cu a thi ding.

25 «Cucingin nannih in, ‹Bawipaih thil tidān hi a dik lo,› nan ti. Maw Israel sungzatla, atu ah ngai hnik uh, ka thil tidān hi a dik lo maw si? A dik lo sawn cu nanmai thil tidān hi a si lo maw? 26 Midingfel pakhat a dingfelnak ihsin a pial, mawhsualnak a tuah ih, cumi ruangah a thi, a rak tuah mi mawhsualnak ruangah anih cu a thi ding a si. 27 Cuihhleiah, misualrál cu a rak tuah mi sualralnak ihsin a pial ih, dikte le felteih thil a ti asile, a nunnak a humhim ding. 28 A ngaihtuahaw ih, a rak tuah mi dānpahbălnak hmuahhmuah ihsin a lamlêtsal ruangah, anih cu a nung tengteng ding, a thi lo ding. 29 Cuticingin Israel sungza in, ‹Bawipaih thil tidān cu a dik lo,› tiah an ti. Maw Israel sungzatla, ka thil tidanpawl hi an dik lo maw si? A dik lo sawn cu nanmai thil tidān hi a si lo maw?

30 «Curuangah Maw Israel sungzatla, mi kip nanmai nundān cio bangtukin thu ka lo ṭhen ding, Bawipa Jehovah in a ti. Nan lung thleng uhla, nan dānpahbălnak hmuahhmuah ihsin ra kir uh, cutin mawhsualnak cu nan siatralnak a si lo ding. 31 Nan rak tuah mi dānpahbălnak hmuahhmuah cu nan hnen ihsin hlăwnhlo uhla, nanmai hrangah thinlung thar le ruahnak thar tuah uh! Maw Israel sungzatla ziangahso nan thih ding? 32 Ziangahtile mi thihnak ah lunghmuinak ka nei lo, Bawipa Jehovah in a ti. Curuangah lamlet uhla, nung uh!»

Ṭah Hla

1 «Cuihhleiah nang bélte cun, Israel mipawimawhpawl hrangah ṭah hla seh aw, 2 cule:

Na nu cu ziang a si? Kiosa pinu!
Kiosapawl lakah a kûal;
Kiosa vanglaipawl lakah a fanopawl a câwm.
3 A fanopawl lakih pakhat a câwmpitling ih,
Kiosa vanglai ah a hung cang;
Sa pel a zir ih,
Minungpawl a eirál.
4 Miphunpawl khal in a thuhla an rak thei;
An khur ah an kaingah ih,
Izip ram ah sio in an dir.
5 Kiosa pinu cun a hngak lak men ti a hmuh tikah a ruahsannak a hlo,
A fano dang pakhat a la ih kiosa vanglai ah a tuah.
6 Kiosapawl lakah a vakkûal ih,
Kiosa vanglai ah a cang;
Mi deh a zir ih, milaipawl a eirál.
7 Anih in a răm mi an hmunrampawl a thei ih,
An khawpipawl a khawlawngter;
A hûk awn in ram le a sungih um hmuahhmuah cu a ṭhingter ṭheh.
8 Cun a kimvelih um miphunpawl in kil i kip in an run do,
An sûr in an khuh ih,
An khur ah an kai.
9 Siau thluahawpi in bawm ah an khum ih,
Babilon siangpahrang hnenah an hruai;
Israel tlang ah a aw theih a si nawn lonak dingah,
Khumnak sungah an ret,
10 Na nu cu ^asabit hmuan ih sabit hri vek,
Tidai tlaksamlonak hmun ih phŭn a si,
Tidai a tlaksam lo ruangah
Rah tam zet a suah ih, hngeṭek tam zet a nei.
11 A hngeṭek khoh zetpawl cu uktupawlih kianghrăwl ah an cang.
A kung in khawdur a dai ih,
Hngeṭek tampi a neih ruang le a san ruangah a langsar.
12 Asinan sabit hri cu thinso in khiak a si,
Lei ah hlăwn a si ih,
Nisuahnak lam thli in a rah ro ko a sēm;
A hngeṭek khoh zetpawl an kiak ih, an ro;
Meisa in a kangrál ṭheh.
13 Cule atu ah anih cu ramṭhing ah phŭn a si,
Ramro le ramcar ah.
14 A hngeṭek ihsin meisa a suak ih,
A rahpawl a kangrál,
Cutin uknak kianghrăwltlak hnge khoh zet a nei nawn lo,»

19:10^a sabit hmuan: Kut ngan Hebru Bible tampi ah cun «thisen» ti a si.

tiin. Himi hi ṭah hla a si ih, ṭah hla ah a cang.

Israel Helnak

1 Kum sarihnak, thla ngatnak, cuih thla ni hratnak ah hitin a si, Jehovah răwn dingin Israel upa hrekkhat an ra ih, ka hmaiah an to. 2 Cun Jehovah kamsuakthu ka hnenah a thleng, 3 «Minung fapa, Israel upapawl cu be hai awla, an hnenah, ‹Bawipa Jehovah in hitin a ti: Keimah thu răwn dingin nan ra maw? Ka nun rori bangin, Bawipa Jehovah in a ti, keimah thu in răwn ding ka lo siang hai lo ding,› tiah sim hai aw. 4 Anmah dāntatnak thu na phuang pei maw, minung fapa, dāntatnak thu na phuang pei maw? Cuti asile an pupápawlih fihnunnakpawl theihter hai aw.

5 «Cule an hnenah, ‹Bawipa Jehovah in hitin a ti: Israel ka hril ni le Jakob sungza tesinfapawl hnenih ka bân pharih thukam ka tuah ni le Izip ram ah an hnenih ka theihawkter ni, «Keimah cu Jehovah nan Pathian ka si,» tiih an hnenah bân pharih thukam ka tuah tikah, 6 Izip ram ihsin an hrangih ka hrilsuah mi, ram hmuahhmuah hnakih ropisawn hnawiti le khuaitizu luannak ram ih hruailut dingin bān pharin cuih ni ah an hnenah thukamnak ka tuah. 7 Cun kei in an hnenah, «Mai mithmuhih thil fihnungzapawl hlăwn cio uhla, Izip milempawl thawn bawrhbangawter hlah uh. Kei cu Jehovah nan Pathian ka si,» tiah ka ti hai. 8 Asinan annih in keimah in dokalh ih, ka thu in lung duh lo. An mithmuhih um thil fihnungzapawl an hlăwn lo ih, Izip milempawl an tlansan fawn lo. Cun kei in, «An parah ka thinsonak ka thlebung ding ih, Izip ram ah anmah dokalhin ka thinhengnak ka hmangsuak ding,» tiah ka ti. 9 Cucu an lakih an va umnak miphunpawl, Izip ram ihsin anmah hruaisuahnak hmangih ka theihawkter zonak miphunpawl mithmuhah ka hmin bawrhbanter a silonak dingah ka hmin ruangah cumi cu ka tuah a si,› tiah ka ti.

10 «Curuangah Izip ram ihsin anmah cu ka suakter hai ih, ramṭhing ah ka hruai hai. 11 Cule ka sakhaw dānpawl anmah ka pe hai ih, ka cīn le dānpawl ka theihter hai, cumi cu mi in a thlun asile, a nung ding. 12 Cuihtlunah keimah cu anmah tithianghlimtu Jehovah ka si ti an theihnak dingah, keimah le anmah karlakih hminsinnak hrangah, ka Sabbath-pawl anmah ka pe. 13 Cuticingin Israel sungza cu ramṭhing ah ka lakah an hél, ka sakhaw dānpawl an nunpi lo; ka cīn le dānpawl an hmuhsuam, cumi cu mi in a thlun asile, a nung ding; cule nasazetin ka Sabbath-pawl an bawrhbangter. Cun anmah cemrálter dingah ka thinsonak cu an parah ramṭhing ah ka thlebung ding tiah ka ti. 14 Anmah ka hruaisuah hmutu miphunpawl mithmuhah ka hmin bawrhbanter a silonak dingah ka hmin ruangah cumi cu ka tuah a si. 15 Cun ram hmuahhmuah hnakih ropisawn hnawiti le khuaitizu luannak, ka pek mi ram ah hruailut hai lo dingin an hnenah ramṭhing ah ka bân pharin thukamnak ka tuah, 16 ziangruangahtile ka cīn le dānpawl an hmuhsuam ih, ka sakhaw dānpawl an nunpi lo ih, ka Sabbath-pawl an bawrhbangter sawn riangri; ziangahtile an thinlung in an milempawl an thlun a si. 17 Cuticingin ka mit in anmah cu siatnak ihsin a zuah hai. Ramṭhing ah cem ko ka tuah hai lo.

18 «Asinan ramṭhing ah an tefapawl hnenah, ‹Nan pupápawlih zirh mi nunpi hlah uh, an cīn le dānpawl thlun hlah uhla, an milempawl hmangin bawrhbangawter fawn hlah uh. 19 Keimah cu Jehovah nan Pathian ka si; ka sakhaw dānpawl nunpi uh, ka cīn le dānpawl thlun uhla cupawl tuahsuak uh; 20 keimah cu Jehovah nan Pathian ka si ti nan theih theinak dingah ka Sabbath-pawl thiangter uh, cule keimah le nanmah karlakah cupawl cu hminsinnak an si ding,› tiah ka ti.

21 «Sikhalsehla cuih tefapawl cu keimah dokalhin an hél; ka sakhaw dānpawl an nunpi lo ih, ka cīn le dānpawl thlun dingin an fimkhur lo, cumi cu mi in a thlun asile, a nung ding; ka Sabbath-pawl an bawrhbangter sawn riangri. Cun kei in ramṭhing ah an parah ka thinsonak ka thlebung ding tiah ka ti. 22 Cutisikhalsehla ka kut ka sūp ih, anmah ka hruaisuah lai hmutu miphunpawl mithmuhah ka hmin bawrhbanter a silonak dingah ka hmin ruangah ka tuah a si. 23 Cuihtlunah miphunpawl lakah ka ṭekdarhter hai ding ih, ram kip ah ka vâkdarhter hai ding tiah bān pharin ramṭhing ah thukamnak ka tuah, 24 ziangruangahtile annih in ka cīn le dānpawl an tuahsuak lo ih, ka sakhaw dānpawl an hnáwng, ka Sabbath-pawl an bawrhbangter ih, an pupápawlih milempawl parah an mit a fu sawn riangri.

25 «Curuangah kei khal in a ṭha lo mi dānpawl le an nunpi thei lo ding mi cīn le dānpawl anmah ka pe; 26 cule anmah cu răm ko ka tuah hai theinak dingah, meisa an paltlăngter mi an fatir hmuahhmuah, an thilpekpawl ruangah anmah cu ka bawrhbangter hai, cule keimah cu Jehovah ka si ti an thei ding.

27 «Curuangah, minung fapa, Israel sungza hnenah, ‹Bawipa Jehovah in hitin a ti: ka hnenih an rinumlonak in nan pupápawl cun cutivekcun in thangsiat a si. 28 Anmah pe dingin bân pharih thukamnak ka tuah mi ram lamih ka rak hruailuh hai hnuah, tlangmual sâng hmuahhmuah le thingbŭk hmuahhmuah an hmu, cu tawkah an thawiawknakpawl an hlan ih, an thilhlănpawl in in thinhengter. Cu tawkah an rimthaw an hlan ih, an Inding Thilhlănpawl an thlebung. 29 Cun kei in an hnenah, «Nan va fehnak hmun sâng cu ziang a si?» tiah ka ti hai. Cutin a hmin cu ^aBamah tiah tuihsun tiangin kawh a si.›

20:29^a Bamah: A ṭawng hrampi ah cun, «hmun sâng» ti a si.

30 «Curuangah Israel sungza hnenah, ‹Bawipa Jehovah in hitin a ti: nan pupápawlih tidān vekin mah le mah bawrhbangawterin, an thil fihnungzapawl thawn hlawhhlannak nan tuah ding maw si? 31 Ziangahtile meisa nan paltlăngter mi nan fapapawl cu thilpek ih nan hlăn tikah, tuihni tiangin nan milem hmuahhmuah thawn nan bawrhbangawter a si. Nannih in thu in răwn lai ding maw, Maw Israel sungzatla? Ka nun rori bangin, nannih ih thu in răwn ka lo siang lo ding, Bawipa Jehovah in a ti,› tiah ka ti. 32 Nannih in, ‹Thing le lung rianin, miphunpawl vekin, ram dangdangih um hnampawl vek kan si ding,› tiin nan thinlung in nan rak ti nân, nan si dah lo ding,» tiin sim aw.

Pathian in Israel a Tungdingsal Ding

33 «Ka nun rori bangin, kut cak zet le bān suahin le thinsonak thlebungin ka lo uk ding, Bawipa Jehovah in a ti. 34 Miphunpawl lak ihsin ka lo hruaisuak hai ding ih, nan ṭekdarhnak rampawl ihsin kut cak zet le bân suahnak le thinsonak thlebungin ka lo fĭnkhawm hai ding. 35 Cule miphunpawlih ramṭhing ah ka lo hruailut hai ding ih, cu tawkah hmaităwnin thu ka ṭhen ding. 36 Izip ram ramṭhing ih nan pupápawl tlunih thu ka ṭhen vekin, nan tlunah thu ka lo ṭhen ding, Bawipa Jehovah in a ti.

37 «Kianghrăwl hnuaiah ka lo fehter ding ih, thukham ṭemṭawnnak ah ka lo hruailut ding; 38 nan lak ihsin mihĕlpawl le keimah dokalhih dānpahbăltupawl ka thianfai ding; an khualtlawnnak ram ihsin ka hruaisuak hai ding, asinan Israel ram ah an lut lo ding. Cun keimah cu Jehovah ka si ti nan thei ding.

39 «Nanmah hrang lawngte ah cun, Maw Israel sungzatla, Bawipa Jehovah in hitin a ti: ka thu nan lun lo dingah cun, feh uhla atu ihsin tuih hnu khalah mi kip in mai milem cio va rian uh; nan thilpekpawl le nan milempawl hmangin ka hmin thianghlim cu nan bawrhbangter nawn lo ding a si. 40 Ziangahtile ka tlang thianghlim, Israel tlang sâng parah cun, Bawipa Jehovah in a ti, cu tawkah Israel sungza hmuahhmuah, ram sungih um hmuahhmuah in keimah in rian ding; cu tawkah anmah ka cohlang hai ding ih, nan thawhhlawmpawl le nan thilpek ṭhabik bik pawl cu nan thil thianghlimpawl hmuahhmuah thawn cu tawkah ka lo phût ding. 41 Minungpawl lak ihsin ka lo hruaisuah tikah le nan vahdarhnak rampawl ihsin ka lo fĭnkhawm hai tikah, rimthaw ah ka lo cohlang hai ding; cule miphunpawl mithmuhah nanmah lakah ka thianhlimnak ka tarlang ding. 42 Cun nan pupápawl hnenah bân pharih ka tiamkăm mi ram, Israel ram ih ka lo hruailuh hai tikah keimah cu Jehovah ka si ti nan thei ding. 43 Cule cu tawkah nan nundānpawl le bawrhbang zetih nan umnak nan thil ti mipawl nan mángsal ding; cule nan rak tuah mi thil ṭhalo hmuahhmuah ruangah nanmai mithmuh rori ah nanmah le nanmah nan fihaw ding. 44 Cun nan nundān sualrál zulhin si loin, nan thil ti bawrhhlawhpawl zulhin si fawn loin, ka hmin ruangih nanmah ka lo pehtlaih tikah, keimah cu Jehovah ka si ti nan thei ding, Maw Israel sungza, Bawipa Jehovah in a ti,» tiin.

Tupi sungih Meisa

45 Cuihtlunah Jehovah kamsuakthu ka hnenah a thleng, 46 «Minung fapa, thlang lam hawi aw; thlang lam dokalhin thusim awla, Negev tupi ram dokalhin thuphuang aw, 47 cule Negev tupi hnenah, ‹Jehovah kamsuakthu ngaithla aw, Bawipa Jehovah in hitin a ti: ngai hnik, nangmah ah meisa ka muah ding ih, nangmah ah thing hring hmuahhmuah le thing ro hmuahhmuah a kangrál ṭheh ding; meialh hliau cu a mit lo ding ih, thlang lam ihsin sak lam tiang leilung vangdâp zaten a kāng ṭheh ding. 48 Titsa hmuahhmuah in kei Jehovah in mei ka muah ti an hmu ding; hmih theih a si lo ding,› tiah sim aw,» tiin.

49 Cun kei in, «Ai law, Bawipa Jehovah! ‹Tahṭhimnak thupawl a sim lo maw si,› in ti,» tiah ka ti.

Pathian Ralnâm, Babilon

1 Jehovah kamsuakthu ka hnenah a thleng, 2 «Minung fapa, Jerusalem lam hawi aw, hmun thianghlimpawl dokalhin thusim awla, Israel ram dokalhin thuphuang aw; 3 cule Israel ram hnenah, ‹Jehovah in hitin a ti: ngai hnik, ka lo do a si, ka ralnâm cu a kawm sung ihta ka zûk ding ih, na hnen ihsin midingfel le misualrál ka that ding. 4 Na hnen ihsin midingfel le misualrál ka thah ding ruangah, thlang lam ihsin sak lam tiang titsa hmuahhmuah dokalhin ka ralnâm cu a kawm ihsin a suak ding, 5 cutin kei Jehovah in ka ralnâm cu a kawm ihsin ka zûk ti titsa hmuahhmuah in an thei ding; thunsal a si nawn lo ding,› tiah sim aw.

6 «Curuangah nang minung fapa, thinlung kûaiin hrûm rero awla, lungsia zetin an mithmuhah hrûm rero aw. 7 Cule hitin a si ding, ‹Ziangah na hrûm rero?› an lo ti tikah, ‹Thuthang thleng mi ruangah a si. Thinlung kip in a tirál ding ih, kut hmuahhmuah an zâwng thluh ding, lungthin hmuahhmuah a cau ding ih, khuk hmuahhmuah ah zin a luang ding. Ngai hnik, cumi cu a ra ih, a thleng famkim ding, Bawipa Jehovah in a ti,› tiah na sâng pei,» tiin.

8 Jehovah kamsuakthu ka hnenah a thlengsal, 9 «Minung fapa, thuphuang awla, ‹Jehovah in hitin a ti:

Ralnâm, tâthriam le hnawhtleu ralnâm!
10 Mi thahnak dingih tâthriam,
Nimthlakkau bangih tle dingih hnawhtleu!
Ka fapaih kianghrăwl ah kan hlim ding maw?
Hlim hlah e,
Ralnâm in thingkung hmuahhmuah a hmuhsuam.
11 Cule ralnâm cu hnawhtleu dingih pek a si,
Hman a si theinak dingah;
Mi thattuih kut ih pek dingah
Himi ralnâm cu tâthriam a si ih, hnawhtleu a si,› tiah sim aw.
12 Ṭap awla râk aw, minung fapa;
Ziangahtile cumi cu ka mipawl dokalhin a um ding,
Israel mipawimawhpawl hmuahhmuah a dokalh.
Ka mipawl thawn anmah cu ralnâm kut ih peksuah an si;
Curuangah ^ana cawn bēng aw.
13 Hniksaknak a ra ding,
Cule ralnâm in a hmuhsuam mi kianghrăwl a um nawn lo tikah ziang a cang pei? Bawipa Jehovah in a ti.
14 Curuangah nang minung fapa, thuphuang awla,
Na kut bēng aw.
Mi thahnak ralnâm, ralnâm cu vei hnih, a si, vei thum ra thleng seh!
Anmah kulhtu nasazetih thahnak ralnâm a si.
15 An thinlung a tirál ih, mi tampi an bah,
Ralnâm cu mi that dingin an kăwtkapawl hmuahhmuah lamah ka tĭn.
A ze! Tle thei ko tuah a si;
Mi thahnak dingah zûksuah a si:
16 Vawrh lamah văi aw!
Keh lamah văi aw,
Na hmai hawihnak lamlam ah.
17 Kei khal in ka kut ka bēng ding ih,
Ka thinsonak ka rehter ding;
Kei Jehovah in ka ti a si,» tiin.

21:12^a na cawn bēng aw: Riahsiatnak langternak a si.

18 Jehovah kamsuakthu ka hnenah a thlengsal: 19 «Nang minung fapa, Babilon siangpahrang-ih ralnâm ra thleng dingin lamzin pahnih rak ruat aw, cuih lamzin pahnih cu ram pakhat ihsin a suak ding a si: hminsinnak tuah awla, cumi cu khawpi luhnak lamzin thawhnak ah tar aw. 20 Ammon-mipawlih khua, Rabbah ah ralnâm thleng dingin lamzin pakhat rak ruat aw, Judah ram ih kulh mi Jerusalem khalah. 21 Ziangahtile Babilon siangpahrang cu tinzoh dingin lamzin ṭêk ah a ding, lamzin pahnih tawnawknak ah; a thálfungpawl a thing, milimpawl a ráwn, sathin a zoh. 22 Tinzohnak ah a kut vawrh lamah Jerusalem a cuang: ralpawl ruat dingin, thahawknak ih kâ ângter dingin, aukionak aw suah dingin, kulh kăwtkapawl sutsiatnak ding ruat dingin, lei sûngpâwng tuah dingin le hruangkulh tuah dingin. 23 Cule cumi cu anmah thawi sesăm thukamnak tuahtupawl mithmuhah tinzohnak diklo vek a si ding, asinan hruaihlo an si theinak dingah an mawhsualnak a theihtersal ding.

24 «Curuangah Bawipa Jehovah in hitin a ti: nan mawhsualnak cīn ringring dingih nan tuah ruangah, cumi ah nan dānpahbălnakpawl cu an lang, cutin nan thil tipawl hmuahhmuah ah nan sualpawl an lang, ziangruangahtile nannih in nan mansal ruangah kut ih kaih nan si ding.

25 «Cule nang, mibawrhbang, Israel uktu sualrál, na ni a thleng zo, dāntat na sinak netabik cān cu, 26 Bawipa Jehovah in hitin a ti:

Lupâwng hlihsak uhla, lalukhum lakhlosak uh;
Zianghman kēlawh an um nawn lo ding.
Dinhmun niam khaisâng uhla, dinhmun sâng niamter uh.
27 Siatbăl ko, siatbăl ko,
Siatbăl ko ka tuah ding!
A cotu ding diktak a thlen hlanlo,
Cumi cu a um nawn lo ding,
Cule amah ka pe ding.

Ammon-mipawl Dokalhtu Ralnâm

28 «Cule nang minung fapa, thuphuang awla, ‹Ammon-mipawl thuhla le deusawn an sinak thuhla ah, Bawipa Jehovah in hitin a ti,› tiah sim aw, cule:

Ralnâm, ralnâm cu zûk a si,
Mi thahnak dingah, mi eiralnak dingah, nimthlakau vek si dingah tletter a si.
29 Nan thuhla ah larawknak diklo hmuin
Nan thuhla ah tinzohnak thuphan tuah hmansehla,
Dāntat an sinak cān netabik, anmai hrangih ni rung thleng,
Thah ding misualpawlih hngawng ah,
Cumi cu a tla hrimhrim ding.
30 A kawm sungah thunsal aw.
Sersiam na sinak hmun,
Na suahkehnak ram ah,
Thu ka lo ṭhen ding.
31 Na parah ka aithawknak ka thlebung ding;
Ka thinlingnak meisa in ka lo sēm ding ih,
Mi siatsuah thiam, minunrâwngpawl kut ah ka lo pe ding.
32 Nang cu meisa muahnak na si ding,
Na ram ah na thisen cu suah a si ding.
Cinken na si nawn lo ding,
Ziangahtile kei Jehovah in ka sim zo,»

tiin.

Jerusalem Sualnak

1 Cuihhleiah Jehovah kamsuakthu ka hnenah a thleng, 2 «Atu ah, nang minung fapa, thisensuahhmang khawpi hnenah dāntatnak thu na phuang pei maw, dāntatnak thu na phuang pei maw? A si, a fihnunnak hmuahhmuah cu amah theihter aw! 3 Cun, ‹Bawipa Jehovah in hitin a ti: amai cān thleng dingin khawpi in a sungah thisen a suah; cule amah le mah bawrhbangawter dingin a sungah milempawl a tuah. 4 Thisen na suahnak in mimawh ah na cang ih, na tuah mi milempawl in na bawrhbangawter. Cutin na ni nâi ko na tuah ih, na tikcu cemnetnak a thleng thlang; curuangah miphunpawl lakah nautat mi le ram hmuahhmuah ih hnihsan mi ah ka lo tuah. 5 Nang, hminsia le buainak ih khat, na kiangnâi le hlapi ih umpawl in an lo hmuhsuam ding.

6 ‹Ngai hnik, Israel hotu hmuahhmuah in nangmah ah thisen suah dingin an thiltitheinak an hmang cio. 7 Nangmah ah nu le pa an zah lo, na sungah ram dang mi an palbĕt, nangmah ah pa nei lo le nuhmei an tuahsia. 8 Ka thil thianghlimpawl na nautat ih, ka Sabbath-pawl na bawrhbangter. 9 Nangmah ah thisen suah dingih mihēkhmang an um, nangmah ah tlangpawl ah rairingpawlih ^ainnte ah an ei, na sungah fihnungza hursualnak an tuah. 10 Nangmah ah an palepawlih taklawngnak an hlîp, nangmah ah nunau dān nei thianglo lai an sualpi. 11 Mi in a innhnen nupi thawn thil fihnungza an tuah; mi dang pakhat in hursual tuahin a mo cu hursualtuahnak in a bawrhbangter; cule mi dang pakhat in nangmah ah a unaunu, a paih fanu a sualpi. 12 Nangmah ah thisen suah dingah nawhthuh an la; sum ṭhang le a fa ṭhang na la; na innhnen ihta diklo zetin sum na la, cule keimah in hngilh, Bawipa Jehovah in a ti.

22:9^a innte: pathian innte a si.

13 ‹Curuangah, ngai hnik, diklo zetih sum na ngahnak le na sungih thisen suahnak ah ka za ka lo bĕnghnawh ding. 14 Ka lo beih tikcu ah na thinlung in a tuar thei pei maw, na kut teh a cak pei maw? Kei Jehovah in ka ṭawngsuak ih, ka tuahsuak ding. 15 Miphunpawl lakah ka lo ṭhekdarh ding, ram i kip ah ka lo vâkdarhter ding ih, na hnen ihsin na thianlonak ka hlorálter ding. 16 Miphunpawl mithmuhah na bawrhbangawter ding; cun keimah cu Jehovah ka si ti na thei ding,› tiah ti aw,» tiin.

Rawhtitnak Meisa sungih Israel

17 Jehovah kamsuakthu ka hnenah a thleng, 18 «Minung fapa, Israel sungza cu ka parah thir-êk ah an cang; rawhtitnak meisa sungih dar, rangva, thir le sûan men an si; ngun êk ah an cang. 19 Curuangah Bawipa Jehovah in hitin a ti: nan zaten thir-êk ih nan can ruangah, ngai hnik, Jerusalem ah ka lo fĭnkhawm hai ding. 20 Ngun, dar, thir, sûan le rangva pawl rawhtitnak meisa sungah an retkhawm, tirálter dingin meisa an sēm vekin, ka thinhengnak le ka thinsonak ah ka lo fĭnkhawm hai ding ih, cu tawkah ka lo thun ding, cule ka lo tirálter ding. 21 Ka lo fĭnkhawm ding ih, ka thinlingnak meisa ka sēm ding, cule a sungah na tirál ding. 22 Rawhtitnak meisa sungih ngun a tiral vekin, a sungah na tirál ve ding; cule kei Jehovah in na parah ka thinsonak ka thlebung ti nan thei ding,» tiin.

Israel Hotu Sualrálpawl

23 Cule Jehovah kamsuakthu cu ka hnenah a thleng, 24 «Minung fapa, a hnenah: ‹Nang cu tifai lo mi ram na si ih, aithawh ni ih ruahti co lo na si fawn,› tiah sim aw. 25 Kiosa cun hûk phahin a sa deh mi a thlek vekin a sungah a profetpawlih phiarthupnak a um; mi nunnak an eirál, hlawnthil le thil mankhungpawl an la; a sungah mi tampi nuhmei cang ko an tuah. 26 A puithiampawl in ka dān an pahbăl ih, ka thil thianghlimpawl an bawrhbangter; thil thianghlim le thil thianghlim lo an thleidang lo ih, a thiang le thianglo khal an zirh lo; cule ka Sabbath-pawl an mithmuhah an ngaihsak lo, cutin kei cu an lakah bawrhbanter ka si. 27 Diklo zetih hlawknak ngah dingin thisen suah le mi nunnak laknak ruangah a sungih hotupawl cu sa băwtthlekhmang cinghniapawl vek an si. 28 Jehovah in thu a sim lo lai khalah, ‹Bawipa Jehovah in hitin a ti,› tiin larnak diklo hmuin le tinzohnak thuphan tuahin a profetpawl in anmai thil tipawl cu mipi hrangah an hnihmawi. 29 Ram mipi in palbĕtnak, mi va suamnak le mifarah le mitlasam tuahsiatnak an hmang ih, ram dang mi diklo zetin an palbĕt. 30 Cule ram ka tisiatlonak dingah an lakah khawkulh tuahtu ding le ram aiawhin ka hmaiih khawkulh siatnak hmun ih dingtu ding mi ka hawl; asinan zohman ka hmu lo. 31 Curuangah an parah ka aithawknak cu ka thlebung; ka thinlingnak meisa in ka cimitter hai; cule an lu parah an thil tipawl ka tlakter, Bawipa Jehovah in a ti,» tiin.

Hlawhhlâng Unaupawl

1 Jehovah kamsuakthu ka hnenah a thlengsal:

2 «Minung fapa, nu pakhat ih fanu
Nunau pahnih an um.
3 An pahnih in Izip ah hlawhhlannak an tuah,
An no laiah hlawhhlannak an tuah;
An pawhte an thamsak,
An pawhte himte cu an hmehsak.
4 A upa sawnih hmin cu ^aOholah a si ih a nau cu ^bOholibah a si;
Ka ta an si ih,
Fapapawl le fanupawl tla an hring.
An hmin cu hitin a si:
Oholah cu Samaria a si ih,
Oholibah cu Jerusalem a si.

23:4^a Oholah: Hebru ṭawng ih a sullam cu «a puanthlam» tinak a si ih, Samaria in amai biakbûk asilole pathian biaknak hmun a dĭn tinak a sawhkhih.

23:4^b Oholibah: Hebru ṭawng ih a sullam cu «amah ih ka puanthlam,» tinak a si ih, Jerusalem ah Jehovah in amai biakbûk, Pathian biaknak hmun a dĭn ti a sawhkhih.

Hlawhhlâng Upa Sawn, Samaria

5 «Ka ta a si laiah, Oholah cun hlawhhlannak a tuah;
Amah duhtu, a ramhnen Assiria-mipawl a hahio hai,
6 Cupawl cu hnipuan mepian an hruh,
Ralbawipawl le uktupawl,
Tlangval ît-um hlir,
Ráng parih to rángtothiampawl an si.
7 Hitivekin anih cun anmah thawn hlawhhlannak a tuah,
An zaten Assiria mipa ṭhabik bik an si;
An zaten ihpi dingih a hahio mipawl an si,
An milempawl in a bawrhbangawter.
8 Izip a um lai ihsin a hursualnak a bâng lo,
Ziangahtile a no laiah mipapawl in an ihpi,
An pawhte himte an hmehsak ih,
A parah an hursualnak an thlebung.
9 Curuangah ihpi a câk mi,
A duh mipawl kut,
Assiria-mipawl kut ah,
Amah cu ka pek lawlaw.
10 A taklawngnak an hlîp,
A fapapawl le a fanupawl an lahlo ih,
Ralnâm in amah cu an that;
Nunaupawl lakah hnihsuak ah a cang,
Ziangahtile amah cu dān an tat a si.

Unaunu Nautasawn, Jerusalem

11 A naunu Oholibah in cumi a hmu ko na cingin, anih cu a unu hnakin a câkhiarnak a nasasin ih,
A hlawhhlannak ah cun a unauih hlawhhlannak hnakin a bawrhhlawh sawn.
12 Anih in Assiria-mi,
Ralbawipawl le uktupawl
Mawi zetih thuamaw
Ráng parih to rángtothiampawl,
Tlangval ît-um hlir cu
A câk hai.
13 Cun amah cu a bawrhbang a si ti ka hmu;
An pahnih in zin bangrep an zawh.
14 Anih in a hlawhhlannak a pungter;
Phăr parih mipa zuk a hmu,
Kaldia-mipawlih milimpawl sen nawnih ṭelh mi a si,
15 An tâi ah taikhap an khap ih,
An lu ah lupâwng mawi zet an pâwng,
An zaten ralbawi bangtuk le,
Kaldia ram, an suahkehnak ram Babilon-mipawl vek cu.
16 A mit in cupawl a hmuh veten
Ihpi a hiar ih,
Cupawl hnenah Kaldia ram ah thuphurtupawl a thlah.
17 Cule Babilon-mipawl cu duhdawtawknak ihkhun ah an ra ih,
An hurnak in cu nu cu an bawrhbangter;
Cule cu nu cu annih in an bawrhbangter ih, a thinlung in anmah cu a fih hai.
18 A hlawhhlannak a langter ih a taklawngnak a hlîp.
A unu ka fih vekin anih cu ka fih a si.
19 Cucingin anih cun
A no lai cān ih Izip ram ih hlawhhlannak a tuah lai cān a mángsal ih,
A hlawhhlannak a nasater sinsin.
20 Ziangahtile anih cun a caithup mipawl a hahio,
^aA taksa cu lākpapawl ta tia a si ih,
A cihnâng suak mi cu rángpawlih cihnâng suak vek a si.
21 Cutivekcun
Na no lai pawhte,
Izip-mipawl in na pawhte an hmeh lai,
Na no laiih na hursualtuahnak cu na ngai.

23:20^a A taksa: Mipa zahmawh a si.

Jerusalem Dāntatnak

22 «Curuangah Maw Oholibah, Bawipa Jehovah in hitin a ti:

Ngai hnik, nangmah do dingin na duhdawt mipawl ka căwktho hai ding,
Na fihmipawl cu,
Kil i kip in nangmah do dingin ka run hruai hai ding:
23 Babilon-mipawl,
Kaldia-mipawl hmuahhmuah,
Pekod-mipawl, Shoa-mipawl, Koa-mipawl le
An hnenih um Assiria-mi hmuahhmuah thawn,
Tlangval ît-um hlir,
Thuneitupawl le uktupawl,
Ralbawipawl le mihminthangpawl,
Ráng parih to rángtothiampawl.
24 Cule nangmah do dingin
Ránglêngpawl le ralthuampawl le raldonak rángpawl thawn,
Mipungkhawm tumpi thawn an ra ding.
Ralphaw pi, ralphaw le lukhum thawn
Nangmah lo do dingin na kimvelah an tlaraw ding,
An parah dāntatnak ka ret ding ih,
An nunphung bangtukin dān an lo tat ding.
25 Nangmah dokalhin ka lo thîk ding ih,
Thinsosa in an lo bei ding;
Na hnar le na hna an sattán ding ih,
Na mi tāngsŭnpawl cu ralnâm in an rīl ding;
Na fapapawl le na fanupawl an la ding ih,
Na mi tāngsŭnpawl cu meisa in a kangrál hai ding.
26 Na hnipuan khal an lo hlîtsak ding ih,
Na ceimawiawknak mawi zetzet khal an lahlo ding.
27 Cutivekcun Izip ram ihsi na hun ken mi
Na fihnungza hursualtuahnak le na hlawhhlannak cu ka cemter ding,
Cutin annih cu na thlir nawn lo ding ih,
Izip cu na mángsal nawn lo ding.

28 «Ziangahtile Bawipa Jehovah in hitin a ti: ngai hnik, na huat mipawl kut ah, na fihmipawl kut ah ka lo pe ding. 29 Hua zetin an lo ti ding, bāng zetih na ṭuansuah mipawl hmuahhmuah an lahlo thluh ding ih, taklawng le hnihpuan hruh loin an lo tân ta ding. Na câkhiarnak le na hursualnak ih hlawhhlannak taklawng cu an hlip ding. 30 Miphunpawl thawn na hlawhhlan ruangah le an milempawl thawn na bawrhbangawkter ruangah hi thilpawl hi na parah ka tuah ding. 31 Na unuih zin na zawh; curuangah a ^ano cu na kut ah ka ret ding.

23:31^a no: Dāntatnak hmuhsaknak a si.

32 «Bawipa Jehovah in hitin a ti:

Na unuih no tûm le sâng cu na in ding,
Hmuhsuam le hnihsan na si ding;
Cuih no ahcun thil tampi a tlem.
33 Rîtnak le riahsiatnak in na khat ding,
Tuksumza le rămnak no,
Na unu Samaria-ih no.
34 Na in ding ih na thlebung ṭheh ding,
A keknawi na ṭhialdip ding ih,
Na ṭāng ih hnipuan na thlek ding;
Ziangahtile ka ṭawngsuak a si, Bawipa Jehovah in a ti.

35 «Curuangah Bawipa Jehovah in hitin a ti: ‹I hngilh ih na dung lamih i hnawn ruangah, nang khal in na hursualtuahnak le na hlawhhlannak rah na tuar ding,› a ti,» tiin.

36 Culo khal Jehovah in ka hnenah, «Minung fapa, Oholah le Oholibah tlunah dāntatnak thu na phuang pei maw? Cuti a si ahcun an hnenah an thil fihnungzapawl cu phuang aw. 37 Ziangahtile an uire ih, an kut ah thisen a kai. An milempawl thawn an uire ih, in hrinsak mi an fapapawl tiangin kangrál dingin meisa an paltlăngter. 38 Cuihtlunah hi khal hi ka parah an tuah: cuih ni thotho ah ka hmun thianghlim an bawrhbangter ih, ka Sabbath-pawl an bawrhhlawhter. 39 Ziangahtile an milempawl hnenih an fāte an thah hnuah, cuih ni lala ah ka hmun thianghlim bawrhhlawhter dingin cu tawkah an lut; cule ngai hnik, cutivekcun ka inn sungah an rak tuah a si.

40 «Cuihhleiah hlapi ihsin ra dingin mi nan cah, an hnenah palai nan thlah ih, ngai hnik, an ra thleng. Cule an hrangah na khawlhaw, na mit na hnihmawi ih, ceimawiawknak in na thuamaw. 41 Ihkhun ropi ah na to, cumi hmaiah cabuai timtuah a si, a parah ka rimhmui le ka hriak na ret. 42 Cule amai kimvelah mipi nuamtawl thâwm theih a si ih, zuri le mizaranpawl cu ramṭhing ihsin hruai an si, cupawl cun nunaupawl ngel ah fau an bunter ih, an lu ah lallukhum mawi zetzet an khumter. 43 Cun uiret ruangih hnang zo nu thuhla ah kei in, ‹Atu ah amah rori cu annih in uiretnak ah an hmang lai ding maw?› tiah ka ti. 44 Cutisikhalsehla mipapawl in nunau hlawhhlâng an ihpi bangin amah cu an ihpi; cutivekcun nunau hur Oholah le Oholibah cu an ihpi. 45 Asinan midingfel mipapawl in uire dāntatnak le thisensuahhmang nunau dāntatnak hmangin annih cu dān a tat ding. Ziangruangahtile anmah cu nunau uire an si ih, an kut ah thisen a kai.

46 «Ziangahtile Bawipa Jehovah in hitin a ti: anmah dokalh dingah mi burpi hun hruai uhla, ṭihnungza ah le ralkaih ah pesuak aw. 47 Mi burpi in lungto in an deng hai ding ih, an ralnâm in an satthat ding; an fapapawl le an fanupawl an that ding ih, meisa in an innpawl an ur ding. 48 Cutivekcun ram sung ihsin hursualtuahnak cu ka cemter ding, cutin nunau hmuahhmuah cu nanmai nan rak tuah zo bangtukih hursual lo dingih zirh an si ding. 49 Nan hursualnak ruangah phuba an lo la ding ih, nan milem biaknak sual man cawhkuan nan tuar ding. Cutin kei cu Bawipa Jehovah ka si ti nan thei ding,» tiin.

Hmuhsaknak Suanbel

1 Kum kuatnak, thla hratnak, cuih thla ni hratnak ah, Jehovah kamsuakthu ka hnenah a thlengsal, 2 «Minung fapa, tuihni rori, ni hmin hi ngan aw, hi ni rori ah hin Babilon siangpahrang in Jerusalem a kulhkhŭm. 3 Cule helhmang sungza hnenah tahṭhimnak thu sim awla, an hnenah, ‹Bawipa Jehovah in hitin a ti:

Bel toh uh, toh ringring uhla,
A sungah tidai khal thun uh.
4 A sungah sasem tete thlakkhawm uh,
Sasem ṭhaṭha thlak uh,
A cāwn le a liang.
Saruh ṭhaṭha thawn khatter uh.
5 Rante rual lakih a ṭhabik hril uh.
Bel hnuaiah saruhpawl retkhawm uh,
Bel cu so hluahhloter uhla,
Saruhpawl cu suang uh.

6 ‹Curuangah Bawipa Jehovah in hitin a ti:

Dar êk umnak bêl,
Dar êk thianfai lo bêl,
Thisen suahhmang khawpi cu a hmakhua a pit!
Hril hleice nei loin
Sem khat hnu sem khat thursuak uh.
7 Ziangahtile a thisen cu amah lakah a um;
Cumi cu lungpi parah a ret;
Leivut ih khuh dingin
Lei ah a thlebung lo.
8 Phubalaknak dingih thinsonak a suah theinak ding le,
Khuh a silonak dingah,
A thisen cu lungpi parah ka ret.

9 ‹Curuangah Bawipa Jehovah in hitin a ti:

Thisen suahhmang khawpi cu a hmakhua a pit!
Kei khal in tihthing nasazetin ka pengkhawm ding.
10 Thing pengkhawm uhla,
Meisa muah uh,
Sa cu ṭhaten suang uh,
Rimthaw thlak uhla,
A ruhpawl cu kāng seh.
11 Cun meiling parah beldan cu kawlawngter uh,
Cule a hung sa ding ih, a dar cu a ling ding,
A thianlonak cu a tirál ding ih,
A dar êk cu a hlorál ding.
12 A hnaṭuannak ah a cau ih,
A dar êk nasazet cu a hnen ihsin a kăwk thei lo.
A dar êk cu meisa sungih paih si seh!
13 Na thianlonak ah hursualnak a um.
Lo thianfai ka tum cing khalih na fai lo ruangah,
Na parih ka thinsonak ka hmansuah hlanlo,
Na bawrhhlawhnak cu thianfai a si nawn lo ding.
14 Kei Jehovah in cumi cu ka sim a si,
A rung thleng ding, ka tuahsuak ding;
Ka sūpaw lo ding ih,
Ka zuah lo ding,
Ka lung ka thleng fawn lo ding;
Na nundān zulhin le
Na thil ti zulhin
Thu an lo ṭhen ding, Bawipa Jehovah in a ti,›

tiah ti aw,» tiin.

Profet Nupi a Thi

15 Jehovah kamsuakthu ka hnenah a thlengsal, 16 «Minung fapa, ngai hnik, na mit tlăinak cu vei khat kutthlaknak in ka lahlo ding; asinan mithi sūn hlah, ṭap hlah awla, na mitthli khal luangter fawn hlah. 17 Thâwm loin hrûm rero aw, mithi sūn hlah; na lu ah na lupâwng ṭawn awla, na ke ah na kedam bŭn aw; na hmur hmul hup hlah awla, milai sang ei hlah,» tiin.

18 Cutin zing lamah mipi hnenah ka ṭawng ih, sîm lamah ka nupi a thi; cule a thaizing ah thupek ka si vekin ka tuah.

19 Cule mipipawl in ka hnenah, «Hi thil na tuah mi hi kan hrangah ziang tican a si ti in sim lo ding maw?» tiah in ti.

20 Cun kei in an hnenah, «Jehovah kamsuakthu ka hnenah a thleng, 21 ‹Israel sungza hnenah sim aw: Bawipa Jehovah in hitin a ti, ngai hnik, ka hmun thianghlim, nan tluangkhawnpi mi nan cahnak, nan mit tlăinak bik, nan nun dirĕmnak cu ka bawrhbangter ding; cule nan tān ta mi nan fapapawl le nan fanupawl cu ralnâm in an rīl ding. 22 Ka tuah vekin nan tuah ve ding, nan hmur hmul nan hup lo ding ih, milai sang nan ei fawn lo ding. 23 Nan lu ah lupâwng pâwng uhla, nan ke ah kedam bŭn uh; mithi sūn hlah uhla, ṭap fawn hlah uh, nan mawhsualnakpawl ah nan ziamrál ding ih, pakhat le pakhat nan ṭahaw ding. 24 Cutivekcun Ezekiel cu nan hrangah hminsinnak a si ding a si; thil a tidān hmuahhmuah bangtukin nan tuah ve pei; cule himi a ra thlen tikah, keimah cu Bawipa Jehovah ka si ti nan thei ding.

25 ‹Cule nang, minung fapa, an hnen ihsin an ralhruang, an aipuannak, an ropitnak, an mit tlăinak, an nun dirĕmnak, an fapapawl le an fanupawl ka lakhlohsak ni ah, 26 cumi ni ah a tlânsuaktu pakhat na hnenih thu lo sim dingin a ra ding. 27 Cuih ni ah a tlânsuaktupa hnenah na ṭawng thei thlang ding; na ṭawng ding ih, ṭawng thei lo na si nawn lo ding. Cutivekcun an hrangah hminsinnak na si ding ih, keimah cu Jehovah ka si ti an thei ding,› tiin,» tiah ka sâng hai.

Ammon Dokalhih Thuphuansuah

1 Jehovah kamsuakthu ka hnenah a thleng, 2 «Minung fapa, Ammon-mipawl dokalhin na hmai hawi awla, anmah dokalhin thuphuang aw. 3 Ammon-mipawl hnenah, ‹Bawipa Jehovah kamsuakthu ngaithla uh! Bawipa Jehovah in hitin a ti: ka hmun thianghlim bawrhbanter a si lai, Israel ram rămter a si laiah le sáltannak ih Judah sungza hruai an si laiih, «A ze!» nan ti ruangah, 4 ngai hnik, nisuahnak lam minungpawl hnenah an co ta dingah nangmah hi ka lo pe ding ih, nan lakah riahbûk an sak ding ih, nanmah lakah an cēnnak hmunpawl an tuah ding; nan thing rah an ei ding ih, nan hnawiti an in ding. 5 Cule Rabbah khawpi cu kalauk tlannak ah ka tuah ding ih, Ammon-mipawl cu rante rual cawlhnak hrangah. Cun keimah cu Jehovah ka si ti nan thei ding.

6 ‹Ziangahtile Bawipa Jehovah in hitin a ti: na za na beng, na ke na tur ih, Israel ram dokalhin na thinlung zaten hnihsanin lungawiaipuangih na um ruangah, 7 ngai hnik, nangmah dokalhin ka kut ka phar ding ih, miphunpawl hnenah ralkaih ah ka lo pesuak ding; miphunpawl hnen ihsin ka lo sâtcat ding ih, rampawl ihsin ka lo hlorálter ding; ka lo tisiat ding ih, keimah cu Jehovah ka si ti na thei ding,› tiah sim aw.

Moab Dokalhih Thuphuansuah

8 «Bawipa Jehovah in hitin a ti: Moab le Seir in, ‹Ngai hnik! Judah sungza cu miphunpawl hmuahhmuah vek an si,› tiih an ti ruangah, 9 ngai hnik, khawpipawl lak ihsin Moab ramri, a ramri ih um khawpipawl lak ihsin ram ropitnak, Beth Jeshimoth, Baal Meon le Kirjathaim pawl cu ka duaiter hai ding ih, 10 nisuahnak lam mipawl hnenah, Ammon-mipawl thawn an neih dingah ka pe cih ding, cutin Ammon-mipawl cu miphunpawl lakah cīn an si nawn lo ding. 11 Cutivek khan Moab cu dān ka tat ding, cule keimah cu Jehovah ka si ti an thei ding.

Edom Dokalhih Thuphuansuah

12 «Bawipa Jehovah in hitin a ti: Edom in Judah sungza tlunah phuba lain nasazetin a mawh, amai hrangih phuba an lâk ruangah, 13 Bawipa Jehovah in hitin a ti, Edom parah ka kut ka suah ding, minung le rannung a hnen ihsin ka that ding ih, Teman ihsin Dedan tiang ka ṭhingter ding, ralnâm in an rīl ding. 14 Ka mi Israel kut hmangin Edom phuba ka la ding, Edom parah ka thinhengnak bangtukin le ka thinsonak bangtukin an tuah ding ih, ka phuba lâknak an thei ding, Bawipa Jehovah in a ti.

Filisṭia Dokalhih Thuphuansuah

15 «Bawipa Jehovah in hitin a ti: Filisṭia-mipawl in phuba lain, kumkhaw ralawknak in, mi tihloral duhnak thinlung sia pu-in phuba an lak ruangah, 16 Bawipa Jehovah in hitin a ti, Filisṭia parah ka kut ka suah ding ih, Kereth-mipawl ka that ding, cule tipi kapih mitangsŭnpawl cu ka hlorálter hai ding. 17 Thinheng zetih kawknak thawn an parah nasazetin phuba ka la ding; cule an parih ka phuba lâknak ka thlenter tikah, keimah cu Jehovah ka si ti an thei ding,» tiin.

Ṭaiar Dokalhih Thuphuansuah

1 A kum hleikhatnak, cuih thla ni khatnak ah, Jehovah kamsuakthu ka hnenah hitin a thleng, 2 «Minung fapa, Ṭaiar in Jerusalem dokalhin, ‹A ze, miphunpawlih kăwtka a siatbăl, ka lamah a áwngaw, anih cu kawlawngter a si ruangah kei cu ka lian thlang ding,› a ti ruangah, 3 Bawipa Jehovah in hitin a ti: ngai hnik, Maw Ṭaiar ka lo do a si, tifinriat tisuar a thawh luailo vekin nangmah do dingin miphun tampi ka thoter ding. 4 Cule annih in Ṭaiar khawkulhpawl an siatbăl ding ih, a dawlsângpawl an cimter ding; kei khal in a hnen ihsin thilsenawi ka ziatfai ding ih, lungpi kawlh vekah ka tuah ding. 5 Amah cu tifinriat laiih sûr pharhnak hmun a si ding, ziangahtile ka sim zo a si, Bawipa Jehovah in a ti, amah cu miphunpawlih rallâksum ah a cang ding. 6 Cule ramlak ih um a fanupawl cu ralnâm ih thah an si ding, cule keimah cu Jehovah ka si ti an thei ding.

7 «Ziangahtile Bawipa Jehovah in hitin a ti: ngai hnik, rángpawl le ránglêngpawl le ráng par tothiampawl le mipungkhawm le mipi tam zet thawn Babilon siangpahrang Nebukhadnezzar, siangpahrangpawlih siangpahrang cu sak lam ihsin Ṭaiar dokalhin ka run thlah ding. 8 Na fanupawl cu ramlak ah ralnâm in a that hai ding; cule nangmah dokalhin kulhkhŭmnak hruang a tuah ding, nangmah dokalhin lei a sûngpâwng ding ih, nangmah dokalhin phawpi a khai ding. 9 Na khawkulh lamah sutsiatnak a hawiter ding ih, ralnâm in na dawlsângpawl a siatter ding. 10 A ráng an tam tuk ruangah an khûtter mi leivut in a lo tuam ding; khawpikulh siatnak hmun ih mi an luh vekih na kăwtka ih a luh tikah, rángtothiampawl, lêngkepawl le ránglêngpawl thawmvâng ah na khawkulh cu a khūr ding. 11 A rángpawlih ke in na kăwtthler hmuahhmuah a cīl ding; na minungpawl cu ralnâm in a that ding ih, na ṭhuam khoh zetzet pawl lei ah an tlu ding. 12 Na lennakpawl cu rallâksum ah an tuah ding ih, na sumdawnnak thilripawl an suam ding, cule khawkulh an tisiat ding ih, na inn nuam zetzet pawl an tisiat ding; na lungtopawl, na thing le na thilsenawi cu tipi sungah an hlăwn ding. 13 Na hla awnpawl ka cemter ding ih, na ṭingṭang awn theih a si nawn lo ding. 14 Lungpi kawlh vekah ka lo tuah ding; nang cu sûr pharhnak hmun ah na cang ding ih, dĭnṭhatsal na si dah nawn lo ding, ziangahtile kei Jehovah in ka ṭawngsuak zo, Bawipa Jehovah in a ti.

15 «Bawipa Jehovah in Ṭaiar hnenah hitin a ti: na sungih thahawknak a um tikah, hriamhma pupawl an hrum tikah, na tlûk thawmvâng ah tipi kap tluanpawl an khur lo ding maw? 16 Cun tipi uktupawl hmuahhmuah cu an laltokham ihsin an ṭum ding ih, an kâwrfualpawl an hlít ding ih, an cawihcin sinfenpawl an phawih ding; khurhnak in an thuam aw ding; lei ah an to ding, an khūr rero ding ih, mak an lo ti ding. 17 Cule na hrangah ṭah hla an săm ding ih na hnenah:

‹Ziangtin so maw na siatral,
Tipi ihsi hlorál nang, Maw khawpi hminthang!
Hlanlai ih tipi ih rak cak,
Amah le a luahtupawl,
A luahtu hmuahhmuah ṭihtertu,
18 Na tlûk ni ah tipi kap tlangtluanpawl an khūr;
A si, tipi kap tlangtluanpawl cu na hloh ni ah an buai,›

tiah an ti ding.

19 «Ziangahtile Bawipa Jehovah in hitin a ti: khawpi răm, luah lo mi khawpipawl vekih ka lo tuah tikah, tipi nasazet na tlunah ka thlenter ih a lo khuh tikah, 20 zohman ih an lo luahlonak dingah, hlanlai mi, khur thûk sungih thlak mipawl hnenah ka lo hruaithla ding, cule hlanlai ihsi kawlawng zo lei hnuai lamah, khur ih sukthlapawl hnenah ka lo cêngter ding; cule a nungdam mipawl ram ah ropitnak ka dĭn ding. 21 Rapthlak takin ka lo cemter ding ih, na um nawn lo ding; lo hawl hman hai sehla hmuh na si dah nawn lo ding, Bawipa Jehovah in a ti,» tiin.

Ṭaiar hrangih Ṭah Hla

1 Jehovah kamsuakthu ka hnenah a thlengsal, 2 «Atu ah, minung fapa, Ṭaiar hrangah ṭah hla seh awla, 3 Ṭaiar hnenah ‹Maw nang tipi luhnak ih um, tipi kap tluanih um ram tampi ih sumtuah ṭheu miphunpawl, Bawipa Jehovah in hitin a ti:

«Mawi lamih ka famkim,» titu, Maw Ṭaiar!
4 Na ramripawl cun tipi lai a sawh;
A lo dĭntupawl in na mawinak an famkimter.
5 Na thingpheng hmuahhmuah cu Senir far thing in an tuah;
Na hrangah lăwng puanzar băn tuah dingin Lebanon sidar an la.
6 Na lăwng hlaunak dingah Bashan ram ih elon thing an hmang;
Saipras tipi kap tluan ihsi an lâk mi
Ashur thing hmangin lăwng zial an tuah ih,
Vuiho in an cei.
7 Izip ihsi cawihcin puan nem páte cu na lăwng puanzar ah na pharh;
Cumi cu na thantar a si,
Na tukvirh cu Elishah tipi kap tluan ihsi lak mi
Mepian le sendup puan ih zarh a si.
8 Sidon le Arvad luahtupawl cu na lăwng hlautu an si;
Maw Ṭaiar, na milai thilthiampawl cu na lăwng mâwngtu an si.
9 Gebal upapawl le a mifimpawl cu
Na lăwng tuahtu an si;
Tipi lăwngpawl hmuahhmuah le
A mâwngtupawl cu na hnenah an um,
Na hnenih sumtuah dingin.
10 Persia-mi, Lud-mi le Libia-mi pawl cu
Na ral dotu ralkap rual an si;
Na khawkulh ah ralphaw le lukhum an bâng;
Mawi zetih lo thuamtu an si.
11 Na ralkap rual le Arvad pacangpawl cu na khawkulh kimvelah an um ih,
Gammad pacangpawl cu na dawlsângpawl ah;
Na khawkulh kimvelah an ralphawpawl an bâng;
Na mawinak an famkimter.

12 ‹Na thil neih phun zakip ruangah Tarshish cu na sumdawnnak a si. Na thilri man ah ngun, thir, rangva le sûan pawl an lo pe. 13 Javan, Tubal le Meshek cu a lo dawrtu an si. Na thilri man ah milai nunnak le dar bungbelpawl an lo pe. 14 Togarmah sungza in ráng, raldonak ráng le lākrang thawn na thil an lo thleng. 15 Dedan-mipawl cu a lo dawrtu an si; tikulh tampi cu na sumdawnnak an si. Thilri man ah vuiho le eboni thing an lo pe. 16 Thilri na neih tam ruangah Siria cu a lo dawrtu a si. Emerald lunghlu, puan sendup, cawihcin puan, puan nem páte, koral, rubi lung mankhungpawl cu na thilri ah an lo pe. 17 Judah le Israel ram cu a lo dawrtu an si. Na thilri man ah minnith fâng, millet, khuaitizu, hriak le thing hnâi an lo pe. 18 Na thilri a tam hnenhnen ruangah na thilri phun zakim le Helbon sabitzu le sahmul var pawl ruangah Damaskas cu a lo dawrtu a si. 19 Vedan le Javan khal in Uzal ram ihsin na thilri man an lo pe. Ser cia thir, kassia thing le kane kung cu na sumdawnnak an si. 20 Ráng tophah puan cu Dedan in a lo lei. 21 Arabia le Kedar mipawimawhpawl cu a lo dawrtu an si. Tuufa nopawl, tuucangpawl le mepawl tla an lo lei. Annih cu cu mipawl a lo dawrtu an si. 22 Raama le Sheba sumtuahpawl cu na thilri dawrtu an si. Na thilri man ah rimhmui ṭhabik bikpawl, lung mankhung phun zakim le sui in an lo dawr. 23 Haran, Kanneh, Eden le Seba le Asshur sumtuahpawl le Kilmad cu a lo dawrtu an si. 24 Hipawl hi hnipuan ṭhaṭha thawi a lo dawrtu an si, hnipuan mepianpawl, cawihcin sinfenpawl, thil phunkim rawi mi hnipuanpawl, hrihrualpawl tla na thil zuar mipawl lakih tel an si.

25 Tarshish lăwngpawl cu na sumtuahnak thil phurtu an si.
Nang cu tipi ah na khat ih nasazetin na ropi.
26 Na lăwng mâwngtupawl in tipi nasazetzetah an lo fehpi,
Asinan nisuahnak lam thli in tifinriat ah a lo nuaisiat.
27 Na lennakpawl, na thilripawl le na sumtuahnak thilpawl,
Na lăwng hnaṭuantupawl le na lăwng mâwngtupawl,
Lăwng rĕmtupawl le na thil dawrtupawl,
Nangmah ih um na ral do pacangpawl le,
Na sungih um mipungkhawm hmuahhmuah cu,
Na siat ni ah tipi ah an pil ding.
28 Na lăwng mâwngtupawlih authâwm ah ran tlannak ram lawnglak a khūr ding.
29 Lăwng hlaunak kaitupawl hmuahhmuah,
Lăwng hnaṭuantupawl,
Tipi parih lăwng mâwngtu hmuahhmuah
An lăwngpawl ihsin an ṭum ding ih lei parah an ding ding.
30 Nanmah ruangah an aw theih dingin an tuah ding;
Nasazetin an ṭap ding ih, an lu ah leivut an phulh ding,
Vutcâm lakah an lāwng rero ding.
31 Nangmah ruangah an lu an ziatkawng ding ih,
Buri-hnipuan an hruh ding,
Cule thinna zet le nasazetih râkin an lo ṭah ding.
32 An râknak ah ṭah hla săm in,
An lo ṭah ding,
Tipi laiih siatter mi Ṭaiar khawpi vek zo so um?
33 Tipi parih na dawr thil a fehsuak tikah,
Mi tam zet na tlăiter;
A tawrih tawr na thilri le na dawr thilpawl in,
Leilung siangpahrangpawl na lianter.
34 Asinan ti thuk zetah tipi in a lo tisiat.
Na sumdawnnak thilpawl le na mipungkhawm hmuahhmuah cu na zawngah an pil ding.
35 Tikulhpawl luahtu zate nangmah ah an khawruah a har ding;
An siangpahrangpawl nasazetin an thla a phâng ding ih,
An hmel a danglam ṭheh ding.
36 Miphunpawl lakih sumtuahpawl in an lo heheu ding;
Tuksumza ah na cang ih, na um kumkhua nawn lo ding,›

ti aw,» tiin.

Ṭaiar Siangpahrang Dokalhih Thuphuansuah

1 Jehovah kamsuakthu ka hnenah a thlengsal, 2 «Minung fapa, Ṭaiar hotu hnenah Bawipa Jehovah in hitin a ti tiah sim aw:

Na thinlung a khaisângaw,
‹Keimah cu pathian ka si, tipi ih pathianpawlih tokham ah ka to,› tiah na ti,
Na thinlung cu Pathian thinlung vekin ruataw khal awla,
Nang cu milai na si, Pathian na si lo.
3 Ngai hnik, Daniel hnakin na fimsawn!
Na hnen ihsin thuh thei mi thuthup a um lo!
4 Na fimnak le na theihthiamnak in
Nangmai hrangah lennakpawl na ngah ih;
Sui le ngun cu na hlawnthil retnak ah na khâwl.
5 Na fim tuknak le na sumdawnnak in na lennak na karhter ih,
Na lennak ruangah na thinlung a khaisâng aw.

6 Curuangah Bawipa Jehovah in hitin a ti:

Na thinlung cu pathian thinlung vekih na ruahawk ruangah,
7 Ngai hnik, miphunpawl lakih ṭihnungzabik,
Na parah ram dang mipawl ka run hruai ding,
Cule annih in na fimnak rah mawi dokalhin an ralnâm an zûk ding ih,
Na ropitnak an bawrhbangter ding.
8 Khur sungah an lo hlăwn ding ih,
Tipi ih thah mi mithi bangin na thi ding.
9 Nang cu pathian si loin, milai na si ruangah,
A lo thattuih kut, a lo thattu hmaiah,
‹Keimah cu pathian ka si,› tiah na ti lai pei maw?
10 Khawtluang mipawlih kut ah
Serh zim tan lo mipawlih thih bangin na thi ding;
Ziangahtile ka ṭawngsuak a si, Bawipa Jehovah in a ti,» tiin.

Ṭaiar Siangpahrang hrang Ṭah Hla

11 Cuihtlunah Jehovah kamsuakthu ka hnenah a thleng, 12 «Minung fapa, Ṭaiar siangpahrang cu ṭah hla seh awla a hnenah, ‹Bawipa Jehovah in hitin a ti:

Nang cu ṭha famkim,
Fimnak ih khat, mawinak ih famkim na si.
13 Pathian hmuan Eden ah na um;
Lung mankhung phunkim
Sardion, topaz le daimon,
Birul, oniks, jasper,
Safaira, turquoise le emerald pawl thawn na thuamaw.
Na umnak kimvel le na dinnak cu
Sui ih ceimawi an si,
Cupawl cu sersiam na si ni ih timtuah an si.
14 Nang cu kiltu cherub hriak thih na rak si,
Cu tawkah ka rak lo ret;
Nang cu Pathian tlang thianghlim parah na rak um;
Lungto vâm lakah na rak lengkûal.
15 Semsuah na si ni ihsin na nundān ah na famkim,
Mawhsualnak nangmah ih hmuh a si ni tiang.
16 Na sumdawnnak a tam deuhdeuh ih,
Thahrumsuahnak in a lo luahkhat,
Cule thilsual na tuah,
Curuangah thil bawrhhlawh vekin ka lo hlăwn, Pathian tlang ihsin;
Cule lungto vâm lak ihsin.
Ka rak lo siatsuah, Maw nang kiltu cherub.
17 Na mawinak ruangah na thinlung a uangaw;
Na ropitnak ruangah na fimnak na bawrhhlawhter;
Lei ah ka lo hlăwn,
Zohnuam ah siangpahrangpawl hmaiah ka lo ret.
18 Na mawhsualnak tam tuk le
Na sumdawnnak mawhsualnak in
Na hmun thianghlimpawl na bawrhbangter;
Curuangah na sungin meisa ka suakter,
Cumi in a lo kangrál ih,
A lo hmutu hmuahhmuah mithmuhah,
Leilung ah vutcâm ah ka lo cangter.
19 Miphunpawl lakih a lo theitu hmuahhmuah nangmah ah an khawruah a har;
Tuksumza ah na cang ih,
Na um nawn lo kumkhua ding,› ti aw,» tiin.

Sidon Dokalhih Thuphuansuah

20 Jehovah kamsuakthu ka hnenah a thlengsal, 21 «Minung fapa, Sidon lam hawih awla, amah dokalhin thuphuang aw, 22 cule a hnenah, ‹Bawipa Jehovah in hitin a ti:

Ngai hnik, Maw Sidon, ka lo do a si;
Na lakah sunlawih ka si ding.
A parah dān ka tat ih, a sungih tithianghlim ka si tikah,
Keimah cu Jehovah ka si ti an thei ding.
23 Ziangahtile a parah nathrisia ka thlĕn ding ih,
A kăwtthler ah thisen;
Kil i kip ah amah dokalhin ralnâm in,
A sungah hriamhma baihpawl an tlu ding;
Cun keimah cu Jehovah ka si ti an thei ding.

24 ‹Cule Israel sungza hrangah, an kimvel hmuahhmuah ih anmah hmuhsuamtupawl lakah suntu hling le na zetih suntu hling a um nawn lo ding. Cun keimah cu Bawipa Jehovah ka si ti an thei ding.

Ralmûang zetih Israel Hruaikhawmnak

25 ‹Bawipa Jehovah in hitin a ti: miphunpawl lakih an ṭekdarhnak ihsin Israel sungza ka fĭnkhawm ih, keimah cu miphunpawl mithmuhah anmai lakih ka thianhlim tikah, ka siahhlawh Jakob hnenih ka pek mi anmai ram ah an cêng ding. 26 Cule cu tawkah ralmuangin khua an sa ding, innpawl an sak ding ih, sabit hmuanpawl an tuah ding; a si, an kimvelih um anmah hmuhsuamtupawl dān ka tat tikah, hnangam zetin khua an sa ding. Cule keimah cu Jehovah an Pathian ka si ti an thei ding,› ti aw,» tiin.

Izip Dokalhih Thuphuansuah

1 Kum hratnak, thla hratnak, cuih thla ni hleihnihnak ah, Jehovah kamsuakthu ka hnenah a thleng, 2 «Minung fapa, Izip siangpahrang Faro lamah na hmai hawi awla, amah dokalhin le Izip hmuahhmuah dokalhin thuphuang aw. 3 A hnenah, ‹Bawipa Jehovah in hitin a ti:

Ngai hnik, ka lo do a si,
Maw Izip siangpahrang Faro,
A tivapipawl ih băwk, Maw sahring tumpi,
«Ka Nile hi ka ta a si, ka hrangih ka sersiam mi a si,» titu,
Ka lo do a si.
4 Asinan na khabe ruh ah sio ka thluah ding ih,
Na phawhir parah na tivapawlih nga ka bĕtter ding.
Na tivapawl sung ihsin ka lo lasuak ding ih,
Na phawhirpawl parah na tivapawl sungih nga hmuahhmuah an bĕt ding.
5 Ramṭhing ah kan lo tân ta ding,
Nangmah le na tivapawlih nga hmuahhmuah;
Ramlak ah na tlu ding;
Fĭnkhawm le sar na si lo ding.
Ramsa le van zuang vâte rawl ah
Nangmah cu ka lo pesuak a si.
6 Cun Izip luahtu hmuahhmuah in
Keimah cu Jehovah ka si ti an thei ding,
Ziangruangahtile annih cu Israel sungza hrangah câlte ko tluk fang an rak si.
7 An kut ih an lo kaih tikah,
An liang zaten na khiak ih, na bauh;
Nangmah an lo hngauhsan tikah;
Na khiak ih, an êl zaten na khurter,› tiah sim aw.

8 «Curuangah Bawipa Jehovah in hitin a ti: ngai hnik, na parah ralnâm ka thlĕn ding ih, na hnen ihsin milai le ramsa ka sâtcat ding. 9 Cule Izip ram cu a ṭhing ding ih, a răm ding; cun keimah cu Jehovah ka si ti an thei ding, ziangruangahtile anih in, ‹Nile cu ka ta a si ih, ka sersiam mi a si,› tiah a ti. 10 Ngai hnik, curuangah ka lo do ih, na tivapawl khal ka do, cule Izip ram cu ṭhing rupri le răm ko ka tuah ding, Migdol ihsin Sene tiang, cuisin Kush ramri tiang. 11 Minung ke in a pál lo ding ih, ramsa ke khal in a pál lo ding, cule cumi cu kum 40 sung luah loin a um ding. 12 Izip ram cu a ṭhing mi rampawl lakah ka ṭhingter ding ih, a răm mi khawpipawl lakah a khawpipawl cu kum 40 sung an răm ding; cule miphunpawl lakah Izip-mipawl ka ṭekdarhter hai ding ih, ram i kip ah ka vâkdarhter hai ding.

13 «Ziangahtile Bawipa Jehovah in hitin a ti: kum 40 a kim tikah, Izip-mipawl cu an ṭekdarhnak miphunpawl lak ihsin ka fĭnkhawm hai ding. 14 Izip vanneihnak ka tungdingsal ding ih, Pathros ram, an suahkehnak ram ah ka kirsalter hai ding ih, cu tawkah annih cu lalram tenau an si ding. 15 Cumi cu lalrampawl lakah tenaubik a si ding; miphunpawl tlunah a khaisângaw dah nawn lo ding, lalrampawl an uksal nawn lonak dingah, anmah cu ka tenauter hai ding. 16 Israel sungza ih rinsan mi a si nawn lo ding, cuhnakin anmah thlun dingih an lamlêt tikah, an mawhsualnak theihter an si sawn ding. Cun keimah cu Bawipa Jehovah ka si ti an thei ding,» tiin.

Babilon in Izip a Răm Ding

17 Cule hitin a si, kum 27-nak, a thla khatnak, cuih thla ni khatnak ah, Jehovah kamsuakthu ka hnenah a thleng, 18 «Minung fapa, Babilon siangpahrang Nebukhadnezzar in nasazetih Ṭaiar năwr dingin a ralkap rual cu a fial; lu pauhpauh cu kawlh ko a tuah ih, liang pauhpauh cu niam ko a tuah; asinan Ṭaiar hnen ihsin amah in siseh, a ralkap rual in siseh, a parih an tuah mi an hnaṭuannak ihsin hlawknak an hmu lo. 19 Curuangah Bawipa Jehovah in hitin a ti: ngai hnik, Izip ram cu Babilon siangpahrang Nebukhadnezzar kut ah ka pe ding ih, anih in a lennak a lakhlosak ding, a ralthillawnpawl a thiarhlo ding ih, a rallakpawl a laksak ding; cule cumi cu a ralkap rual hrangih hlawhman a si ding. 20 A ṭuanbăngnak ruangah Izip ram cu amah ka pe, ziangruangahtile annih in ka hrangah hna an ṭuan a si, Bawipa Jehovah in a ti.

21 «Cuih ni ah Israel sungza hrangah ki ka khoter ding ih, an lakah na kâ ka lo angter ding. Cule keimah cu Jehovah ka si ti an thei ding,» tiin.

Izip hrang Ṭah Hla

1 Jehovah kamsuakthu ka hnenah a thlengsal, 2 «Minung fapa, thuphuang awla, ‹Bawipa Jehovah in hitin a ti:

Râk uh, cuih ni ruangah, Hai ha!
3 Ziangahtile cuih ni cu a nâi thlang a si,
Jehovah-ih ni rori cu a nâi;
Khawdur um ni, miphunpawl hlohral cān a si ding.
4 Izip parah ralnâm a thleng ding ih,
Kush ram ah ānhainak a um ding,
Izip ram ih thah mipawl an rilh tikah,
A lennak an lakhlohsak ding ih,
A lungphumpawl an cim.

5 «Kush, Libia, Lud, Arabia zate, Libia le ram ṭangrual ih tel ram minungpawl cu anmahpawl thawn ralnâm in an tlu ding.

6 ‹Jehovah in hitin a ti:

Izip bawmtupawl an tlu ding ih,
A hngalpi mi a thiltitheinak a cem ding.
Migdol ihsin Sene tiang,
A sungih umpawl ralnâm in an tlu ding, Bawipa Jehovah in a ti.
7 A ṭhing mi rampawl lakah annih cu an ṭhing ding ih,
A răm mi khawpipawl lakah a khawpipawl cu an tel ding.
8 Izip parih meisa ka ret tikah le
Amah bawmtupawl hmuahhmuah ka siatsuah tikah,
Annih in keimah cu Jehovah ka si ti an thei ding.
9 Cuih ni ah ralring loih um Kush-mipawl thlaphâng ko tuah dingin
Palaipawl cu ka hnen ihsin lăwngpawl ah an feh ding ih,
Izip hlohral ni vekin an parah ānhainak nasazet a thleng ding;
Ziangahtile ngai hnik, a thleng rero lai.

10 ‹Bawipa Jehovah in hitin a ti:

Babilon siangpahrang Nebukhadnezzar kut hmangin Izip mi burpipawl cem ko ka tuah fawn ding.
11 Ram tisiat dingin
Amah le a hnenih um a mipi, miphunpawl lakih ṭihnungbik cu run hruai an si ding;
Izip dokalhin an ralnâmpawl an zûk ding ih,
Ram cu thah mipawl in an khatter ding.
12 Nile ka roter ding ih,
Misualrálpawlih kut ah ram cu ka zuar ding;
Khawtluang mipawl kut hmangin,
Ram le a sungih um hmuahhmuah cu ka kawlawngter ding,
Kei, Jehovah in ka ṭawngsuak a si.

13 ‹Bawipa Jehovah in hitin a ti:

Milempawl khal ka siatbăl ding ih,
Nof ihsin milimpawl cem ko ka tuah ding;
Izip ram ah uktupawl an um nawn lo ding;
Izip ram ah ṭihnak ka ret ding.
14 Pathros ṭhing ko ka tuah ding ih,
Zoan ah meisa ka ret ding,
Cule No khawpi dān ka tat ding.
15 Ka thinsonak cu Izip cahnak Sin khawpi parah ka thlebung ding;
Cule No khawpi mi burpipawl ka that ding.
16 Cule Izip ram ah meisa ka ret ding;
Sin khua cun nasazetin nat a tuar ding,
No khawpikulh cu vihpawp a si ding ih,
Nof cu ni tin ānhaiin a um ding.
17 Aven le Pi Beseth tlangvalpawl cu ralnâm in an tlu ding ih,
Hih khawpipawl cu ralkaih ah an feh ding.
18 Izip hngawngkol ka khiahsak tikah,
Tehafnehas khalah ni a thim ding.
Cule amah ah a hngalpi mi a cahnak a cem ding;
Amah cu khawdur in a tuam ding ih,
A fanupawl cu ralkaih ah an feh ding.
19 Cutivekin Izip cu dān ka tat ding,
Cule keimah cu Jehovah ka si ti an thei ding,› tiah ti aw,» tiin.

Faro Dokalhih Thuphuansuah

20 Cule hitin a si, kum hleikhatnak, thla hmaisabik, cuih thla ni sarihnak ah, Jehovah kamsuakthu ka hnenah a thleng, 21 «Minung fapa, Izip siangpahrang Faro-ih bân ka khiak zo; ngai hnik, dam dingin an tuam lo ih, ralnâm fekteih kai thei dingin an ṭem fawn lo. 22 Curuangah Bawipa Jehovah in hitin a ti: ngai hnik, Izip siangpahrang Faro cu ka dokalh ih, a bân ka khiak ding, a caksawn lam le a kiak cia pakhat sawn khal ka khiak ding; cule a kut ihsin ralnâm tla ko ka tuah ding. 23 Miphunpawl lakah Izip-mipawl ka ṭekdarhter hai ding ih, ram kip ah ka ṭhekdarh hai ding. 24 Babilon siangpahrang-ih bân ka cakter ding ih, a kut ah ka ralnâm ka ret ding; asinan Faro-ih bân cu ka khiak ding, cule Babilon siangpahrang hmaiah thi zikih hriamhma tuar bangin a hrûm rero ding. 25 Cutivekcun Babilon siangpahrang-ih bân ka cakter ding, asinan Faro-ih bân cu a zâwng ding; Babilon siangpahrang kut ih ka ralnâm ka ret tik le Izip ram parih cumi a văi tikah, keimah cu Jehovah ka si ti an thei ding. 26 Miphunpawl lakah Izip-mipawl ka ṭekdarhter hai ding ih, ram kip ah ka ṭhekdarh hai ding. Cule keimah cu Jehovah ka si ti an thei ding,» tiin.

Thingkung Tumpi vekin Izip cu Hauthluk a Si

1 Cule hitin a si, kum hleikhatnak, thla thumnak, cuih thla ni khatnak ah Jehovah kamsuakthu ka hnenah a thleng, 2 «Minung fapa, Izip siangpahrang Faro hnen le a mi burpipawl hnenah:

‹Na ropitnak ah zo in so a lo bang?
3 Ngai hnik, Assiria cu Lebanon ram ih sidar,
Hngeṭek mawi zetzet nei, tupi hliapin, sângpi ah a khuiso,
A zim in khawdur a dai.
4 Tidai in a ṭhangter;
Lei hnuai tidai in a sângter,
Phun a sinak kimvelah a tivapawl an luang ih,
Ramlak thingkungpawl hmuahhmuah hnenah a tivatepawl a luangter.
5 Curuangah a san lam cu ramlak thingkungpawl hnakin a lăwr;
A hngeṭeksâwm an karh ih,
A kung ih tidai a tam ruangah a hngeṭekpawl an sau zetzet.
6 A hngeṭeksâwm parah van zuang vâtepawl in bu an sâm,
A hngeṭekpawl hnuaiah ramsapawl in fa an hring;
Cule a zârhnemah miphun ropi hmuahhmuah an cêng.
7 Cutivekcun a hngeṭekpawl an sau ruangah ropitnak ah a mawi,
Ziangruangahtile a hram in tidai tampi a zûk ban.
8 Pathian hmuan ih sidarpawl thawn khaikhin rual a si lo;
A hngeṭeksâwm cu far thingpawl thawi khaikhin rual a si lo,
Cule armon thing khal in a hngeṭekpawl an tluk lo;
Pathian hmuan ih ziang thingkung hman in mawi lamah a tluktu an um lo.
9 Hngeṭek tampi thawn mawi zet ko ka tuah,
Cule Pathian hmuan, Eden ih thingkung hmuahhmuah in an iksik,› tiin sim aw.

10 «Curuangah Bawipa Jehovah in hitin a ti: a sâng ih, a zik cun khawdur a dai, cule a thinlung cu a sannak ih a khaisanawk ruangah a hngal, 11 curuangah anih cu miphunpawlih micakpaih kut ah ka pe ding, cule anih in a bei ding; a sualralnak zulhin anih cu ka hnawhsuak a si. 12 Cule khawtluang mipawl, miphunpawl lakih ṭihnungbik in anih cu a hauthlu ih a tán; a hngeṭekpawl cu tlang par le phaikuam hmuahhmuah ah an tlu; a hngeṭeksâwm cu ram sungih tiva hmuahhmuah kapah khiahin an um; cule leilung miphun hmuahhmuah cu a zârhnem hnuai ihsin an suak ih, amah cu an tān. 13 A siatnak parah van zuang vâte hmuahhmuah an cêng ding ih, ramsa hmuahhmuah cu a hngeṭekpawl ah an cêng ding. 14 Hipawl hi tiva kiangih thingkung pakhat hman in an sannak ruangah khaisângaw nawn loin, an zik in khawdur dai nawn loin le tidai cawmṭhat thingkungpawl khal cumi cān ih an san nawn lonak dingah a si.

Ziangahtile minung tefapawl lakah
Anmah thawi khur sungih suktupawl thawn,
An zaten thihnak hrangah, leilung khur hrangah ruat an si.

15 «Bawipa Jehovah in hitin a ti: Sheol ih a feh ni ah, ṭah hla ka sehter. Amah ruangah ti thuknak ka khuh. A tivapawl ka kaitāng ih tipi nasazet cu cawlhter a si. Lebanon cu amah ka sūnter ih, ramlak thingkungpawl cu amah ruangah an cau. 16 Amah cu khur sungih sukthlatupawl thawn Sheol ih ka suhthlakter tikah, a tlûk thâwm ah miphunpawl khur ko ka tuah hai, cule Eden ih thingkung hmuahhmuah, Lebanon thing ṭha hril le ṭhabik bik pawl, tidai ngah hmuahhmuah cu lei hnuaiah hnĕm an si. 17 Miphunpawl lakah a zârhnemah cêngin, amai bân ih rak ṭang zo, amah thawn ralnâm ih thah mipawl hnenah, anih khal Sheol ah a suk.

18 «Eden thingkung lakah ropitnak le nasatnak ah nangmah tluk zo so um? Cutisikhalsehla Eden thingkungpawl thawn lei hnuaiih hlăwn na si ding; ralnâm ih thah, serh zim tan lo pawl lakah na it ding. Cumi cu Faro le a mi burpipawl zate an si, Bawipa Jehovah in a ti,» tiin.

Faro le Izip hrang Ṭah Hla

1 Cule hitin a si, kum hleihnihnak, thla hleihnihnak, cuih thla ni khatnak ah Jehovah kamsuakthu ka hnenah a thleng, 2 «Minung fapa, Izip siangpahrang Faro hrangah ṭah hla seh awla, a hnenah:

‹Nangmah cu miphunpawl lakih kiosa vanglai vek na si ih,
Tipi sungih sahring tumpi na bang,
Na hnar in na tivapawl na phūlter,
Na ke in tipi na nâwiter ih,
An tivapawl na bawrhhlawhter.

3 ‹Bawipa Jehovah in hitin a ti:

Curuangah nangmah le mipungkhawm tumpi parah ka sûr ka pharh ding ih,
Ka sûr in an lo dirsuak ding.
4 Cun lei ah ka lo tân ding;
Hramlak ah ka lo hlăwnsuak ding ih,
Na parah van zuang vâte hmuahhmuah ka umter hai ding.
Cule nangmah hmangin leilung pumpuluk ramsa ka tlăiter hai ding.
5 Tlang parah na sa ka ret ding ih,
Na ruak nâwi cambâng in phaikuam a khatter ding.
6 Ram cu na thisen suak mi in ka tawih ding,
Tlangpawl khal;
Cule tivakuang cu nangmah ihsi suak mi in a khat ding.
7 Na tleu ka cemter tikah,
Vanpawl ka khuh ding ih, arsipawl na thimter ding;
Khawdur in ni ka tuam ding ih,
Thlapi in a tleu a suah lo ding.
8 Van ih a tle mi tleu hmuahhmuah na parah ka thimter thluh ding ih,
Na ram ah khawthim ka thlĕn ding,
Bawipa Jehovah in a ti,› ti aw.

9 «Na theih dah lo mi rampawl ah, miphunpawl lakih siatralnak ka thlĕn tikah, miphun tampi thinlung ka buaiter fawn ding. 10 A si, miphun tampi nangmah ah khawruahhar ko ka tuah hai ding ih, an hmaiih ralnâm ka văi tikah an siangpahrangpawl cun nasazetin an lo ṭih ding; cule mi kip anmai nunnak cio hrangah, na rilh ni ah cun an ṭhia rero ding.

11 «Ziangahtile Bawipa Jehovah in hitin a ti: Babilon siangpahrang-ih ralnâm na parah a thleng ding. 12 Micak ral dopawlih ralnâm in na mi burpipawl ka tluter hai ding, an zaten miphunpawl lakih ṭihnungbik an si.

Izip hngalnak an răm ding ih,
A mi burpipawl cu tisiat an si ding.
13 Tidai tampi kiangih ramsa hmuahhmuah khal ka that fawn ding;
Minung ke in a nawiter nawn lo ding ih,
Rannung tîn khal in an nawiter nawn fawn lo ding.
14 Cun an tidai ka fimter ding ih,
An tivapawl cu hriak bangin ka luangter ding, Bawipa Jehovah in a ti.
15 Izip ram cu răm ko tuahin,
Ram khattertupawl tisiat ih,
A sungih um hmuahhmuah ka vuakthluk hai tikah,
Annih in keimah cu Jehovah ka si ti an thei ding.
16 Himi hi amah an ṭahnak ding ṭah hla a si;
Miphunpawlih fanupawl in amah cu an ṭah ding;
Izip le a mi burpipawl an ṭah ding,
Bawipa Jehovah in a ti,» tiin.

17 Kum hleihnihnak, cuih thla ni hleingatnak ah hitin a si, Jehovah kamsuakthu ka hnenah a thleng:

18 «Minung fapa, Izip mi burpipawl hrangah râk awla,
Leilung thuknak ah hlăwn hai aw,
Amah le ram hminthangpawlih fanupawl cu,
Khur sungih vung sukpawl thawn:
19 Mawinak ah zo so na hleih?
Suk aw, serh zim tan lo pawl zawngah zau aw.
20 Râlnam ih thah mipawl lakah an tlu ding;
Ralnâm cu zûk a si ih,
Amah le a mi burpipawl cu dirhsuah an si.
21 Ral do mipawl lakih micakpawl cun amah le amah bawmtupawl thuhla ah Sheol ihsin an ṭawngsuak ding:
‹An rung suk ih, ralnâm ih thah mi
Serh zim tan lo pawl hnenah an zau,› tiin.
22 Cu tawkah Assiria le a mipungkhawm hmuahhmuah an um,
A thlānpawl cu a kimvel hmuahhmuah ah an um,
An zaten thah an si, ralnâm ih tlu an si.
23 A thlānpawl cu khur sungih a dĕngkawrnak bik ah an um ih,
A thlān kimvel hmuahhmuah ah a mipungkhawmpawl cu an um,
An zaten thah an si, ralnâm ih tlu,
A nungdam mipawl ram ih thil ṭihnung thlentu an si.
24 A thlān kimvel hmuahhmuah ah,
Elam le a mi burpipawl cu an um,
An zaten thah an si, ralnâm ih tlu,
Leilung hnuaiih serh zim tan lo ih suk,
A nungdam mipawl ram ih thil ṭihnung thlentu an si;
Khur sungih suktupawl thawn an ningzahnak an phur.
25 A mi burpipawl thawn
Thah mipawl lakah a ihkhun an retsak,
Cumi kimvel hmuahhmuah ah a thlānpawl an um,
Serh zim tan lo an si ih, ralnâm ih thah mi an si;
A nungdam mipawl ram ih thil ṭihnung thlentu an si ko nân,
Khur sungih sukpawl thawn an ningzahnak an phur thotho;
Amah cu thah mipawl lakih ret a si.
26 A nungdam mipawl ram ih thil ṭihnung thlentu an si ko nân
Meshek, Tubal le an burpipawl cu cu tawkah an um,
An thlānpawl cu an kimvelah an um,
An zaten serh zim tan lo an si ih, ralnâm ih thah an si.
27 Micak serh zim tan lo tlupawl,
An raldonak hriamhreipawl thawi Sheol ih suk,
An ralnâmpawl an lu tăngih ret mipawl hnenah an zau lo ding,
Asinan an mawhsualnakpawl cu an ruhpawl parah a um ding,
Micakpawlih ṭhihṭhaihnak cu a nungdam mipawlih ram ah rak um ṭheu khal sehla.
28 Serh zim tan lo pawl lakah na kekkuai ding,
Cule ralnâm ih thah mipawl hnenah na zau ding.
29 Edom cu a siangpahrang le a mipawimawhpawl hmuahhmuah khal cu tawkah an um,
Cak khal hai sehla, ralnâm ih thah mipawl kiangah hlŭm an si;
Khur sungih suk, serh zim tan lo pawl zawngah an zau ding.
30 Sidon-mipawl hmuahhmuah thawn
Sak lam mipawimawhpawl hmuahhmuah cu, cu tawkah an um.
Cahnak ruangah ṭhihṭhaih khal hai sehla, ningzakin thah mipawl thawn an sukthla,
Serh zim tan lo ralnâm ih thah mipawl hnenah an zau,
Cule khur sungih suk mipawl zawngah an ningzahnak an phur.
31 Faro, amah rori le a ralkap rual hmuahhmuah in an hmu hai ding ih,
Ralnâm ih thah a mi burpipawl hmuahhmuah hrangah a hna a ngam ding,
Bawipa Jehovah in a ti.
32 Ziangahtile a nungdam mipawl ram ah ka thil ṭhihnungza ka rak tuah;
Cule serh zim tan lo, ralnâm ih thah mipawl hnenah anih cu ret a si ding,
Faro le a mipi hmuahhmuah cu, Bawipa Jehovah in a ti,» tiin.

Ralvengtu le a Thucah

1 Jehovah kamsuakthu ka hnenah an thlengsal, 2 «Minung fapa, na mipawlih tefapawl hnenah sim aw, cule an hnenah: ‹Ram sungih ralnâm ka thlenter tikah ram mipi in an ram ihsin mi pakhat hrilin, an ralvengtu dingah ret hai sehla, 3 anih in ram parih ralnâm ra hmuin, tawtawrawt a phaw ih, mipi ralrinnak a pek tikah, 4 mi pakhat in tuupa ki phawt awn thei cingin, ralrinnak la loin ralnâm ra thleng in a nunnak a lâk asile, amai thisen cu a lu parah a um ding a si. 5 Tuupa ki phawt awn a thei ko na cingin, a ralrin lo ruangah a thisen cu amai parah a um ding a si. Asinan ralrinnak rak la ta sehla cu a nunnak a runsuak ding. 6 Asinan ralvengtu in ralnâm rat lai hmu ko nâin, tuupa ki phaw loin, mipi cu ralrinnak a pek lo asile, ralnâm ra thleng in an lak ihta mi pakhat khat nunnak a lâk a si ahcun, a nunnak cu a mawhsualnak ruangih lakhloh a si hmanah, a thisen cu ralvengtuih kut ah ka hlâm ding,› tiah sim aw.

7 «Nang, minung fapa, Israel sungza hrangah ralvengtu dingah ka lo ret; curuangah ka kâ ihsin thu na thei ding ih, anmah cu ralrinnak i peksak aw. 8 Misualrál hnenah, ‹Maw misualrál, na thi hrimhrim ding,› tiah ka ti ih, a nundān ihsin kir dingin ralrinnak na pek lo asile, misualrál cu a mawhsualnak ah a thi ding; asinan a thisen cu na kut ah ka lo hlâm ding. 9 Cutisikhalsehla misualrál cu a nundān ihsin lamlêt dingin ralrinnak na pe ih, anih cu a nundān ihsin a lamlêt cuang lo asile, a mawhsualnak ah a thi ding; asinan na nunnak cu na runsuak a si.

10 «Curuangah nang minung fapa, Israel sungza hnenah, ‹Nannih in, «Kan dānpahbălnakpawl le kan sualpawl kan parah a um ih, cupawl ih kan riaral asile, ziangtin so kan nun thei ding?» nan ti,› tiah sim aw. 11 An hnenah, ‹Ka nun rori vekin, Bawipa Jehovah in a ti, misualrál thihnak ah lunghmuinak ka nei lo, cuhnakin misualrál in a nundān ihsin lamlêt ih a nun hi ka lunghmui zawng a si sawn. Lamlêt uh, nan nundān ṭhalo pawl ihsin lamlêt uh! Maw Israel sungza, ziangahso maw nan thih ding?› ti aw.

Pathian Thuṭhennak Dikzia

12 «Curuangah nang, Maw minung fapa, na mipawlih tefapawl hnenah, ‹A dānpahbăl ni ah midingfel dingfelnak in amah cu a runsuak lo ding; misualrál sualralnak thu ah cun, a sualralnak ihsin a lamlêt tikah a sualralnak in a tluter lo ding ih, midingfel khal a sual ni ah a dingfelnak ruangah a nung thei fawn lo ding,› tiah sim aw. 13 Midingfel hnenah na nung tengteng ding tiah ka sim na cingin, amai dingfelnak rinsanin mawhsualnak a tuah asile, thildik a rak tuah mipawl lakih pakhat hman cinken a si lo ding; mawhsualnak a tuah mipawl ruangah a thi sawn ding. 14 Cuihtlunah misualrál hnenah, ‹Na thi tengteng ding,› tiah ka ti ih, anih cu a sualnak ihsin a lamlêt ih dik le fel zetih thil a tuah ih, 15 misual cun thukamawknak cu a hlensuaksal ih, a thil rûk mi a pesal ih, mawhsualnak tuah riai loin nunnak sakhaw dānpawl tla a thlun asile, a nung tengteng ding, a thi lo ding. 16 A rak tuah mi a sualpawl lakih pakhat hman amah dokalhin cinken a si lo ding; dik le fel zetin thil a rak tuah ih, a nung tengteng ding.

17 «Cucingin na mipawlih tefapawl in, ‹Bawipaih thil tidān hi a dik lo,› tiah an ti. A diklo mi cu anmai thil tidān hi a si sawn! 18 Midingfel cu a dingfelnak ihsin a lamlêt ih mawhsualnak a tuah tikah, cumi ruangah cun a thi ding. 19 Asinan misualrál cu a sualralnak ihsin a lamlêt ih, dik le fel zetih thil a ti asile, cumi ruangah a nung ding. 20 Cuticingin nannih in, ‹Bawipaih thil tidān hi a dik lo,› tiah nan ti. Maw Israel sungza, nan zaten nanmai nundān bangtukin thu ka lo ṭhen ding,» tiin.

Jerusalem Duainak

21 Sál ih hruai kan si a kum hleihnihnak, thla hratnak, cuih thla ni ngatnak ah, Jerusalem ihsi tlânsuak mi pakhat ka hnenah a ra ih, «Khawpi cu lâk a si zo!» tiah a ti.

22 Cu pa a ra thlen hlan a mizan sim lamah Jehovah kut cu ka parah a um. Cule ka hnenah zing ih a ra thlen tikah Jehovah in ka kâ i rak ângter zo; cutin ka kâ cu ka âng thei zo ih, ṭawng thei lo ka si nawn lo.

Judah Siatnak Săn

23 Cun Jehovah kamsuakthu ka hnenah a thleng: 24 «Minung fapa, Israel ram ih hmunram luahtupawl in, ‹Abraham cu mi pakhat lawng a si nain, ram a luah. Kannih mi tampi hnenah kan ro dingah ram cu pek a si,› tiah an ti.

25 «Curuangah an hnenah, ‹Bawipa Jehovah in hitin a ti: thisen telin sa nan ei, nan milempawl lam nan zoh ih thisen nan suah. Cutiin teh ram cu nan co ding maw si? 26 Nan ralnâm nan rinsan, thil fihnungzapawl nan tuah ih, mai innhnen nupi cio nan bawrhbangter. Cutiin teh ram cu nan co ding maw si?› tiah sim aw.

27 «An hnenah, ‹Bawipa Jehovah in hitin a ti: ka nun rori vekin, khaw răm ih umpawl cu ralnâm in an thi tengteng ding ih, ramlak ih umpawl cu eirál dingah ramsapawl hnenah ka pe ding, cule ralhruang sungih umpawl le pûk sungih umpawl cu nathrisia in an thi ding. 28 Ziangahtile ram cu nasazetih răm le ṭhing ko ka tuah ding, a hngalpi mi a cahnak a cem ding ih, Israel tlangpawl tla zohman ih păl lo dingin a ṭhing ding. 29 Cun an tuah mi an thil fihnungza hmuahhmuah ruangah ram cu răm le ṭhing ko ka tuah tikah, annih in keimah cu Jehovah ka si ti an thei ding,› tiin sim aw.

Hna in Thei Si, Tuah Si Lo

30 «Nang minung fapa, na mipawlih tefapawl in khawkulh kiang le inn sângkapawl ah na thuhla an rel; cule pakhat le pakhat an simaw, mi kip in an unau cio hnenah, ‹Ra aw, Jehovah hnen ihsi ra thleng kamsuakthu hi ngai hram hnik,› tiah an ti. 31 Cutin na hnenah a bur bur in an ra ih, ka mi an sinak vekin na hmaiah an to, cule na kamsuakthupawl an ngaithla, asinan an tuahsuak lo; ziangahtile an kâ in duhdawtnak an langter, asinan an thinlung cun anmai hlawknak ding lawng an dawi. 32 Ngai hnik, nang cu an hrangah duhnungza hla, mawi zetih sak mi le awnmawi tum vek na si: na ṭawngkampawl cu an ngaithla, asinan an thlun lo. 33 Cule himi a thlen tikah, ngai hnik, a thleng cing ding, an lakah profet a um ti an thei ding,» tiin.

Tuukhāl Sualpawl

1 Jehovah kamsuakthu ka hnenah a thleng, 2 «Minung fapa, Israel tuukhālpawl dokalhin thuphuang aw, thuphuang awla an hnenah, ‹Bawipa Jehovah in tuukhālpawl hnenah hitin a ti: mah le mah câwmaw Israel tuukhālpawl an hmakhua a pit! Tuukhāl cun rante rual a câwm ding a si lo maw? 3 An thau nan ei ih sahmul in nan thuamaw; a thauthau nan that, asinan rante rual cu nan câwm lo. 4 A ṭawnṭaipawl nan cakter lo ih, a dam lo pawl nan tidam lo, hriamhma pupawl nan tuamsak fawn lo, a ṭekdarh mipawl khal nan hruaikir lo, a hlo mi khal nan hawl cuang lo; cuhnakin khoh zet le râwng zetin nan uk sawn riangri. 5 Cule khāltu an neih lo ruangah an ṭekdarh ih, an ṭekdarhnak hmun ah cun ramsa hmuahhmuah rawl ah an cang. 6 Ka rante rual cu tlang kip hrawhin le tlangmual kip ah an vakvai; a si, ka rante rual cu leilung vangdâp pumpi ah an ṭekdarh ih, zohman in an hawl lo ih, an zawihnit lo.

7 ‹Curuangah nannih tuukhālpawl, Jehovah kamsuakthu hi ngaithla uh, 8 ka nun rori vekin, Bawipa Jehovah in a ti, thungaiten tuukhāl an um lo, cule tuukhālpawl in ka rante rual an hawl lo ih, tuukhālpawl in ka rante rual câwm loin, anmah an cawmawk sawn ruangah ka rante rual cu deh mi sa ah an cang ih, ka rante rual cu ramsa hmuahhmuah rawl ah an cang. 9 Curuangah Maw nannih tuukhālpawl, Jehovah kamsuakthu hi ngaithla uh! 10 Bawipa Jehovah in hitin a ti: ngai hnik, tuukhālpawl ka do a si, an kut ah ka rante rual ka hlâm ding; ka rante rual an cawmnak ka cemter ding ih, tuukhālpawl in anmah le mah an cawmaw nawn lo ding; ziangahtile an kâ ihsin ka rante rual ka runsuak hai ding, an hrangah rawl an si nawn lo ding,› ti aw.

Tuukhāl Diktak Pathian

11 «Ziangahtile Bawipa Jehovah in hitin a ti: ngai hnik, keimah rori in ka rante rual ka zawihnit ding ih ka hawlsuak ding. 12 Tuukhāl in a rante rual vâkdarhpawl lakih a rante rual a hawl vekin, ka rante rual ka hawlsuak ding ih, khawdur ni le thim hnuaiih an vahdarhnak hmun hmuahhmuah ihsin ka runsuak hai ding. 13 Cule miphunpawl lak ihsin ka hruaisuak hai ding ih, ram i kip ihsin ka fĭnkhawm hai ding, cule anmai ram ah ka hruai hai ding; Israel tlang ah, tivatepawlih kappawl ah le umhmun an khuarnak kip ah ka câwm hai ding. 14 Tlimno ṭha umnak hmun ah ka tlangter hai ding ih, an tlannak hmun cu Israel tlang sângpawl parah a si ding. Cu tawkah tlannak hmun ṭha zetah an kûal ding ih, Israel tlangpawl parih tlimno ṭhatnak hmun ah an tlang ding. 15 Ka rante rual ka câwm ding ih, ka băwkter hai ding, Bawipa Jehovah in a ti. 16 A hlo mi ka hawl ding ih, a ṭekdarh mipawl ka hruaikir ding, hriamhma pupawl ka tuam hai ding ih, dam lo pawl ka cakter hai ding; asinan a thau le cak cu ka hlorálter ding ih, diknak in ka khāl hai ding.

17 «Cule nang, Maw ka rante rual, Bawipa Jehovah in hitin a ti: ngai hnik, ran le ran karlak le tuucangpawl le mecangpawl karlak thu ka ṭhen ding. 18 Tlimno ṭhaṭha ah tlang in, a dang a tāng lai mi tlimno nan palsiat hi thil tenau a si maw si? Tidai thiang nan in hnuah a dang a tāng lai mi nan ke ih nan nawiter khal hi? 19 Cule ka rante rual bélte cun nan ke ih nan rak păl mi ei in, nawi ko nan ke ih nan păl mi an in ding a si hi!

20 «Curuangah Bawipa Jehovah in hitin a ti: ngai hnik, keimah rori in rante thau le ṭawl lakah thu ka ṭhen ding. 21 A cak lo hmuahhmuah cu nan sir le nan liang in nan năwr ih, nan ki in nan khît ih, nan vâkdarhter ṭheh, 22 curuangah ka rante rual ka runhim ding ih, deh an si nawn lo ding; cule ran le ran karlakah thu ka ṭhen ding. 23 An tlunah tuukhāl pakhat ka ret ding, ka siahhlawh David cu, cule anih in a câwm hai ding. Amah cu anmah khāltu a si ding ih, a câwm hai ding. 24 Cule kei, Jehovah cu an Pathian ka si ding ih, ka siahhlawh David cu anmah lakah uktu a si ding; kei, Jehovah in ka ṭawngsuak a si.

25 «Anmah thawn remnak thukham ka tuah ding ih, sahrangpawl cu ram ihsin ka cemter ding; cule annih cu ramṭhing ah ralmuangin an cêng ding ih, thingrûl lakah an itthat ding. 26 Anmah le ka mualpâwng kimvel hmunram hmuahhmuah cu mal ka sawm ding ih, a tikcucān teah ruah ka surter ding, malsawm ruah a sur ding. 27 Cun ló ih thingthei kungpawl in an rah an suah ding; leilung in rah a suah ding ih, an ram ah ralmûang zetin an um ding, cule an hngawngkol ka khiahsak hai ih, sál ih tuahtupawl kut ihsin ka runsuah hai tikah, annih in keimah cu Jehovah ka si ti an thei ding. 28 Cule annih cu miphunpawl ih deh mi an si nawn lo ding, a ram sahrangpawl ih eiral mi men khal an si nawn lo ding; ralmuangin an cêng ding ih, zohman in lungphâng ko an tuah lo ding. 29 Hmuan hminthang ka tuahsak hai ding ih, annih cu ram ah rilrâwngin an riarál nawn lo ding ih, miphunpawl ih ningzahternak khal an tuar nawn lo ding. 30 Cuticun annih in keimah cu Jehovah an Pathian, anmah umpitu ka si ti le anmah Israel sungza cu ka mi an si ti an thei ding, Bawipa Jehovah in a ti.

31 «Nannih cu ka rante rual, ka tlimno lakih rante rual nan si; nannih cu minung nan si ih, kei cu nan Pathian ka si, Bawipa Jehovah in a ti,» tiin.

Seir Tlang Dāntatnak

1 Cuihtlunah Jehovah kamsuakthu ka hnenah a thleng, 2 «Minung fapa, Seir Tlang lam hawi awla amah dokalhin thuphuang aw, 3 cule a hnenah, ‹Bawipa Jehovah in hitin a ti:

Ngai hnik, Maw Seir Tlang, ka lo do a si;
Na parah ka kut ka phar ding ih,
Răm le ṭhing ko ka lo tuah ding;
4 Na khawpipawl măng ko ka tuah ding ih,
Nangmah khal na kawlawng ding.
Cule nang in keimah cu Jehovah ka si ti i thei ding.

5 ‹Anmah dāntatnak netabik a thlen tikah, an vansiat ni ah Israel tefapawl cu ralnâm thiltitheinak in thisen na suah hai ih na huat kumkhua hai ruangah, 6 ka nun rori vekin, Bawipa Jehovah in a ti, thisen suahnak ding ka lo pe ding ih, thisen suahnak in a lo dawi ding; thisen suahnak na huat lo ruangah, thisen suahnak in a lo dawi ding. 7 Cutivekcun Seir Tlang cu răm le ṭhing ko ka tuah ding ih, cutawk ihsi a lut le a suak tupawl cu ka that hai ding. 8 Cule a tlangpawl cu thah mipawl in ka khatter ding; na mualpâwngpawl le na phaikuampawl le na tivatepawl cu ralnâm ih thah mi hlir a khat ding. 9 Kumkhuain ṭhing ta ko ka lo tuah ding ih, na khawpipawl luahtu an um lo ding; cun nannih in keimah cu Jehovah ka si ti nan thei ding.

10 ‹Jehovah umnak hmun thuhla ah nang in, «Hih ^amiphun pahnih le himi ram pahnih hi ka ta an si ding ih, ka nei ding,» tiah na ti ruangah, 11 ka nun rori vekin, Bawipa Jehovah in a ti, na thinhengnak zulhin le anmah na huatnak ruangih na lăngter mi na iksiknak zulhin ka tuah ding; cule thu ka lo ṭhen tikah anmah lakah keimah le keimah ka theiawter ding. 12 Cun keimah cu Jehovah ka si ti na thei ding. Israel tlangpawl dokalhih na thangsiatnak hmuahhmuah ka thei, «Annih cu an ṭhing; kan eiral dingah annih cu kan hnenih pek an si,» tiah na ti. 13 Cutivekcun na kâ in keimah dokalhin na tluangkhâwng ih, keimah dokalhin thu tampi na ṭawng ti ka thei ṭheh a si.

35:10^a miphun pahnih le himi ram pahnih: Israel le Judah relnak a si.

14 ‹Bawipa Jehovah in hitin a ti: leilung pumpuluk lungawiaipuangih a um tikah, răm ko ka lo tuah ding. 15 Israel sungza ih co mi ro a răm ruangih lungawiaipuangih na um vekin, na par khalah ka tuah ve ding; nang cu na răm ding, Maw Seir Tlang, a sungih um hmuahhmuah thawn, Edom hmuahhmuah khal! Cun annih in keimah cu Jehovah ka si ti an thei ding,› tiah ti aw,» tiin.

Israel parih Malsawmnak

1 «Nang minung fapa, Israel tlangpawl hnenah thuphuang awla, ‹Maw Israel tlangpawl, Jehovah kamsuakthu hi ngai hnik uh! 2 Bawipa Jehovah in hitin a ti: na ralpawl in nangmah dokalhin, «A ze! Khuahlan hmun sâng kan ta ah a cang,» tiah an ti ruangah, 3 thuphuang uhla sim uh, Bawipa Jehovah in hitin a ti: răm ko an lo tuah ih, kil i kip ihsin an lo sutdip, cutin miphunpawlih ta dingah nan cang, cule mi ih relsiat le mi ih simsiat ih nan can ruang rori ah, 4 Maw Israel Tlangpawl, Bawipa Jehovah kamsuakthu hi ngaithla uh! Bawipa Jehovah in tlangpawl, mualpâwngpawl, tivapawl, phaikuampawl, hmun ṭhing repreppawl le tansan mi khawpipawl, a kimvel hmuahhmuah ih miphunpawl lakih a tāngsŭn, răm mi le hnihsan ih cang hnenah, hitin a ti: 5 curuangah Bawipa Jehovah in hitin a ti: «Miphunpawl lakih a tāngsŭn le a ran tlannak hmunpawl ruangah anmai ta si thei dingih thinlung zate aipuangin le mi hmuhsuamnak lungthin thawi anmai ram si dingin le an sadeh si dingih rak latu Edom hmuahhmuah hnenah thîkthusiatnak nasazet thawn ka ṭawng taktak a si,» tiin.

6 ‹Curuangah Israel ram thuhla ah thuphuang awla, tlangpawl, mualpâwngpawl, tivapawl le phaikuampawl hnenah, «Bawipa Jehovah in hitin a ti: miphunpawlih ningzahternak nan tuar ruangah thîksia le thinso in ka ṭawng a si. 7 Curuangah Bawipa Jehovah in hitin a ti: na kimvelih miphunpawl cun anmai ningzahnak an tuar tengteng ding a si tiin bān pharin thukamnak ka tuah. 8 Asinan nannih, Israel tlangpawl, ka mi Israel hrangah nan hngeṭek nan suah pei ih rah nan suah pei, ziangahtile annih cu an ra thleng cing ding. 9 Ziangahtile zoh hnik, kei cu nan lamah ka ṭang a si, nan hnenah ka kir ding ih, nannih cu cawhlet nan si ding, cule nan parah an tuh ding. 10 Nan parah minung ka karhzaiter ding, Israel sungza hmuahhmuah, an zaten; cule khawpipawl luah an si ding ih, a siat mipawl dĭnṭhatsal an si ding. 11 Nan parah minung le ramsa ka karhter ding; cule an pungzai ding ih fano an hring ding; hlanlai bangin ram luahin ka lo umter ding ih, tuih hlan hnakih ṭhain ka lo tuah ding. Cun nannih in keimah cu Jehovah ka si ti nan thei ding. 12 A si, nan parah mi ka fehter hai ding, ka minung Israel rori cu; cule an ta nan si ding, nanmah cu an co mi ro nan si ding; an fāte lu na sūnter nawn lo ding.

13 ‹Bawipa Jehovah in hitin a ti: nang in milai na eirál ih, na miphun cu tefa nei lo ko na tuah, tiih an lo ti ruangah, 14 milai na eirál nawn lo ding ih, na miphun khal tefa nei lo ko na tuah nawn lo ding, Bawipa Jehovah in a ti. 15 Miphunpawlih hmuhsuamnak na hna in ka lo theiter nawn lo ding ih, minungpawlih nautatnak na tuar nawn fawn lo ding, na miphun na bahter nawn fawn lo ding, Bawipa Jehovah in a ti,› ti aw,» tiin.

Israel Tharthawhsalnak

16 Cuihtlunah Jehovah kamsuakthu ka hnenah a thleng, 17 «Minung fapa, Israel sungza anmai ram ih an cēn laiah, anmai nundān le thil tidān in ram an bawrhbangter; ka hmaiih an nundān cu nunau thianlo laiih an bawrhhlawhnak vek a si. 18 Curuangah ram sungih an suah mi thisen ruangah le ram an bawrhbanternak milempawl ruangah an parah ka thinsonak ka thlebung. 19 Cule anmah cu miphunpawl lakah ka ṭekdarhter hai ih, ram i kip ah an vâkdarh; an nundān le an thil tidān zulhin anmah cu thu ka ṭhen hai. 20 An va fehnak miphunpawl hnen an thlen tikah ka hmin thianghlim an bawrhhlawhter ih, mi in, ‹Hipawl hi Jehovah mi si cingin, a ram ihsin an suak,› tiah an ti. 21 Asinan Israel sungza in an va fehnak miphunpawl lakih an bawrhhlawhter mi ka hmin thianghlim cu ka ngaihsak a si.

22 «Curuangah Israel sungza hnenah, ‹Bawipa Jehovah in hitin a ti: Maw Israel sungzatla, nanmah ruangah si loin, nan va fehnak miphunpawl lakih nan bawrhhlawhter mi ka hmin thianghlim ka ngaihsak ruang sawnah hihi ka tuah a si. 23 Cule ka hmin ropi, an lakih nan bawrhhlawhter mi, miphunpawl lakih bawrhhlawh ih um mi cu ka tithianghlim ding; cule an mithmuhah nanmah lakih ka thianhlimnak ka lăngter tikah miphunpawl in keimah cu Jehovah ka si ti an thei ding, Bawipa Jehovah in a ti. 24 Miphunpawl lak ihsin ka lo lasuak ding ih, ram kip ihta ka lo fĭnkhawm ding, cule nanmai ram ah ka lo hruai ding. 25 Cun nan parah tidai fimte ka lo theh ding ih, nan fai ding; nan thianlonak hmuahhmuah le nan milempawl lak ihsin ka lo thianfai ding. 26 Thinlung thar ka lo pe ding ih, nan sungah lungthin thar ka ret ding; nan titsa ihsin lungto thinlung cu ka lahlo ding ih, titsa thinlung ka lo pe ding. 27 Cule nan sungah ka thlarau ka ret ding ih, ka sakhaw dānpawl ka lo thlunter ding, cule ka cīn le dānpawl nan thlun ding ih nan tuah ding. 28 Cun nan pupápawl ka pek mi ram ah nan cêng ding; nannih cu ka mi nan si ding ih, kei cu nan Pathian ka si ding. 29 Nan thianlonak hmuahhmuah ihsin ka lo runsuak ding. Thlairawl ka ko ding ih ka karhzaiter ding, cule nan parah mangṭam ka tlungter lo ding. 30 Cule miphunpawl lakah mangṭam ruangih mualphonak nan tuar nawn lonak dingah, thingkung rahpawl ka karhzaiter ding ih, ló suak ka tamter ding. 31 Cun nan nundān ṭhalo pawl le nan thil tiṭha lo pawl nan máng ding ih, nan mawhsualnakpawl le nan thil fihnungzapawl ruangah, nanmai mithmuhah nanmah le nanmah nan fihaw ding. 32 Himi hi nanmah ruangih ka tuah mi a si lo ti thei uh. Nanmai nundānpawl ruangah ningzak uhla, mualphoin um uh, Maw Israel sungzatla, Bawipa Jehovah in a ti.

33 ‹Bawipa Jehovah in hitin a ti: nan mawhsualnakpawl ihsi ka lo thianfai ni ah, khawpipawl ah mi ka cêngter fawn ding ih, a siat mipawl cu dĭnṭhatsal an si ding. 34 A páltu hmuahhmuah mithmuhih khaw răm a si ding can aiah, ram lawnglak cu leh a si ding. 35 Cule annih in, «A răm mi hi ram cu Eden hmuan vekah a cang; a răm mi le a ṭhing mi, a siat mi khawpipawl cu atu ah cun kulh le luah an si thlang,» tiah an ti ding. 36 Cun nan kimvel hmuahhmuah ih a tāng mi miphunpawl in kei Jehovah in hmun siatpawl cu ka dinṭhasal ih a lawnglak mipawl ah thil ka phun ti an thei ding. Kei Jehovah in ka ṭawngsuak a si, cucu ka tuah ding.

37 ‹Bawipa Jehovah in hitin a ti: Israel sungza minung cu rante rual vekih karhter dingin ka hnenih in dil ding hi ka siang ding. 38 Raithawinak ding serhhran mi rante rual vek le khiah mi puai nipawl ih Jerusalem ih rante rual vekin, khawpi siatpawl cu mipi runpi in an khat ding. Cule annih in keimah cu Jehovah ka si ti an thei ding,› ti aw,» tiin.

Ruh Ropawl an Nung

1 Jehovah kut cu ka parah a um ih, Jehovah Thlarau cun i hruaisuak ih, phaikuam laiah i ret; cule cuih phaikuam cu ruh hlir in a khat. 2 An kimvelin i hruai vivo, cule ngai hnik, phaikuam ah cun tam ngaingai an um, cule ngai hnik, cupawl cu an ro zet. 3 Cule anih in ka hnenah, «Minung fapa, hi ruhkolpawl hi an nung thei pei maw?» tiah i ti.

Cule kei in, «Maw Bawipa Jehovah, nangmah in na thei,» tiah ka sawn.

4 Amah thotho in ka hnenah, «Hih ruhropawl hnenah thuphuang awla, an hnenah, ‹Maw ruh ropawl, Jehovah kamsuakthu hi ngai hnik uh! 5 Hi ruhkolpawl hnenah Bawipa Jehovah in hitin a ti: ngai hnik uh, nan sungah thaw ka lutter ding ih nan nung ding. 6 Nan parah thahri ka umter ding ih nan parah titsa ka umter ding, vun thawn ka lo tuam ding ih nan sungah thaw ka ret ding, cule nan nung ding. Cun nannih in keimah cu Jehovah ka si ti in thei ding,› ti aw,» tiah i ti.

7 Thupek ka si vekin thu ka phuang; cule thu ka phuan tikah thawmvâng a um, ngai hnik, an khawngaw ruihro; ruhkolpawl cu hmunkhatah an finaw ih ruh le ruh an pehaw. 8 Ka zoh ih, ngai hnik, anmah ah thahri le titsa an hung um ih, vun in a tuam thluh hai; asinan anmah ah thaw a um lo.

9 Cun anih in ka hnenah, «Thli hnenah thuphuang aw, thuphuang aw, minung fapa, cule thli hnenah, ‹Bawipa Jehovah in hitin a ti: Maw thaw, lei kil li ihsin ra awla an nun theinak dingah, hi thah mipawl parah hin thaw aw,› ti aw,» tiah i ti. 10 Cutin amah ih thu i pek vekin thu ka phuang ih, an sungah thaw a lut, cule an hung nung ih, an ke in an ding, cule ralkap tam zet an rak si.

11 Cun anih in ka hnenah, «Minung fapa, hih ruhkolpawl hi Israel sungza zate an si, ngai hnik, annih cun, ‹Kan ruhpawl an ro, kan ruahsannak a hlo ih, kanmah rori khal thah kan si!› tiah an ti. 12 Curuangah thuphuang awla an hnenah, ‹Bawipa Jehovah in hitin a ti: ngai hnik, Maw ka minungpawl, nan thlānpawl ka áwng ding ih, nan thlānpawl ihsin ka lo suakter ding, cule Israel ram ah ka lo hruai hai ding. 13 Cun Maw ka minungpawl nan thlānpawl ka ăwn ih, nan thlānpawl ihsin ka lo hruaisuah hai tikah nannih in keimah cu Jehovah ka si ti nan thei ding. 14 Nan sungah ka thaw ka ret ding ih, nan nung ding, cule nanmai ram ah ka lo ret ding. Cule nannih in keimah cu Jehovah ka si ti nan thei ding, cumi cu ka ṭawngsuak ih, ka tuah ding, Jehovah in a ti,› ti aw,» tiah i ti.

Lalram Pakhat, Siangpahrang Pakhat

15 Jehovah kamsuakthu ka hnenah a thlengsal, 16 «Nang minung fapa, nangmai hrangah funghreu pakhat la awla a parah, ‹Judah hrang le amah kăwptu Israel tefapawl hrangah,› tiin ngan aw. Cun a dang funghreu lasal awla, a parah, ‹Efraim funghreu, Joseph hrangah le amah kăwptu Israel sungza hmuahhmuah hrangah,› tiin ngan aw. 17 Cule nangmai hrangah funghreu pakhat ih cang dingin kăwm hai aw, cule na kut ah pakhat ah an cang ding.

18 «Cule na mipawlih tefapawl in na hnenah, ‹Himi hi ziang na tican a si, in sim lo ding maw?› an lo ti asile, 19 an hnenah, ‹Bawipa Jehovah in hitin a ti: ngai hnik uh, Efraim kut ih um, Joseph funghreu le amah kăwptu Israel hnámpawl cu ka la hai ding ih, cupawl cu Judah funghreu a si mi, cumi funghreu thawn ka peh ding, cule funghreu pakhat ah ka tuah hai ding ih, ka kut ah pakhat ah an cang ding,› tiah ti hai aw. 20 Cule na ngannak funghreu cu an mithmuhah na kut ah a um ding.

21 «Cun an hnenah, ‹Bawipa Jehovah in hitin a ti: ngai hnik uh, an vahdarhnak miphunpawl lak ihsin Israel tefapawl cu ka la hai ding ih, hmun tin ihsin ka khawm hai ding, cule anmai ram ah ka hruai hai ding; 22 cule cuih ram, Israel tlang parah miphun pakhat ah ka tuah hai ding ih, an zate tlunah siangpahrang pakhat in siangpahrang a ṭuan ding; miphun pahnih an si nawn lo ding ih, lalram pahnih khalah an ṭhenawsal nawn lo ding. 23 An milempawl thawn siseh, an thil fihnungzapawl thawn siseh, an dānpahbălnak ziang thaw khal in an bawrhbangawter nawn lo ding; cuhnakin an sualnak, an cēnnak hmunpawl ihsin ka runsuak hai sawn ding ih, ka thianfai hai ding. Cule annih cu ka mi an si ding ih, kei cu an Pathian ka si ding,› ti hai aw.

24 «Ka siahhlawh David cu an tlunah siangpahrang a si ding ih, an zaten tuukhāl pakhat an nei ding; ka cīn le dān khal an nunpi ding ih, ka sakhaw dānpawl khal an thlun ding, cule an tuahsuak ding. 25 Cun nan pupápawl an rak cēnnak hmun, ka siahhlawh Jakob ka pek mi ram ah an cêng ding, anmah le an fātepawl le an tesin-faparpawl thawn kumkhuain an cêng ding, cule ka siahhlawh David cu anmah uktu a si kumkhua ding. 26 Cuihtlunah anmah thawn remnak thukham ka tuah ding ih, cumi cu anmah thawi kumkhaw thukham a si ding; ka dĭnhnget hai ding ih, ka karhzaiter hai ding, cule an laiah ka hmun thianghlim ka ret kumkhua ding. 27 An hnenah ka Biakbûk khal a um ding; a si, an Pathian ka si ding ih, annih cu ka mi an si ding. 28 An laiih ka hmun thianghlim a um tikah, kei Jehovah in Israel ka tithianghlim a si ti miphunpawl khal in an thei ding,» tiin.

Gog Dokalhih Thuphuansuah

1 Jehovah kamsuakthu ka hnenah a thleng, 2 «Minung fapa, Magog ram ih Gog lam, Meshek le Tubal uktu lubik lam hawi awla, amah dokalhin thuphuang aw, 3 cule, Bawipa Jehovah in hitin a ti: ngai hnik, Meshek le Tubal uktu lubik, Maw Gog, ka lo do a si. 4 Dung ka lo hawikirter ding ih, na khabe ah sio ka thluah ding, cule ralthuam famkimih thuamaw na ralkap rual hmuahhmuah, na rángpawl, na rángtothiampawl, ralphaw te le ralphaw pi thawi um mipungkhawm tûm zet le ralnâm kengtu hmuahhmuah thawn ka lo hruaisuak ding. 5 An zawngah Persia, Kush le Libia an tel ding, an zaten ralphaw le lukhum thawn an si ding; 6 Gomer le a ralkap rual zate, sak lam dĕngih um Togarmah sungza le a ralkap rual zate le na hnenih um mi tampi khal.

7 «Timlamaw awla, tiar aw, nangmah le na hnenih pungkhawmaw na mi burpi hmuahhmuah thawn; anmah kiltu na si pei. 8 Ni tampi hnuah kawh na si ding. Kum neta lamah cun ralnâm lakih runsuah, miphun tampi lak ihsi hruaikhawm mipawl umnak ram, Israel tlangpawl, reipi kawlh ih um mi ah na ra lut ding; a mipawl cu miphunpawl lak ihsin hruaisuak an si ih, an zaten atu ah cun ralmûang zetin an cêng. 9 Na hung so ding ih thlipi vekin na ra ding, cule nangmah le na hnenih ralkap rual hmuahhmuah le na hnenih miphun tampi cu mero in ram a tuam vek hi na si ding.

10 «Bawipa Jehovah in hitin a ti: cuih ni ah hitin a si ding, na lungthin sungah ruahnak a suak ding ih, khawkhannak ṭha lo na tuah ding; 11 cule nang in, ‹Kulh lo mi khuapawlih ram ka sîm ding; ralmûang zet le hnangam zetih cêng mipawl dokalhin ka feh ding, an zaten kulh nei loin an cêng ih, kăwtka le a kalhnak hrawlh khal an nei lo. 12 Rallâksum la ding le rallâkthil la dingin, a lawnglak zo mi hmun luahsaltupawl le miphunpawl lak ihsi hruaikhawm zo, sumhnám le bungrua nei ih, leitlun laifangih cêngpawl parah kut suah dingin ka feh ding,› tiah na ti ding. 13 Sheba, Dedan, Tarshis sumtuahpawl le an kiosa vanglai hmuahhmuah in na hnenah, ‹Rallâksum la dingin na ra maw si? Ralthillăwn la dingin, sui le ngun thiarhlo dingin, sumhnám le thilri lahlo dingin, rallâksum nasazetih la dingin na mipungkhawm na hruai maw si?› an lo ti ding.

14 «Curuangah minung fapa, thuphuang awla, Gog hnenah, Bawipa Jehovah in hitin a ti: cuih ni, ka mi Israel himdamteih an um ding cān cu na thei lo maw? 15 Na umnak hmun sak lam dĕng ihsin na ra ding, nangmah le na hnenih um minung tam zet, an zateih ráng parih to, mipungkhawm tûm zet, ralkap rual cak zetpawl cu. 16 Mero in ram a tuam bangin ka mi Israel do dingin na hung so ding. Hitin a si ding, ni neta lamah cun ka ram do dingin ka lo hruai ding, cule miphunpawl cun in thei ding, Maw Gog, an mithmuhah nangmah hmangih ka thianhlimnak ka lăngter tikah cun. 17 Bawipa Jehovah in hitin a ti: anmah dokalhin ka lo hruai ding tiih kum tampi sung, hlanlai ih thu rak phuangtu ka siahhlawh Israel profetpawl hmangih, hi hlanih ka rak sim mipawl lakih pakhat na si maw si?

18 «Cule cuih ni ah hitin a si ding, Israel ram do dingih Gog a rat tikah, ka thinsonak cu a tho ding, Bawipa Jehovah in a ti. 19 Ziangahtile cuih ni ah cun Israel ram ah nasazetin ling a hnîn tengteng ding tiin ka thîkthusiat ruangah le ka thinlingsosat ruangah ka phuang a si, 20 cule tipi sung ngapawl, van zuang vâtepawl, ramsapawl, lei parih băwkvâk thilnungpawl hmuahhmuah le leilung vangdâp parih um milai hmuahhmuah cu ka hmaika-ah an thir rero ding. Tlangpawl niamter an si ding, khāmpawl an cim ding ih, khawkulh hmuahhmuah lei ah an cim ding. 21 Cule ka tlang hmuahhmuah parah Gog do dingin ralnâm ka ko ding, ralnâm thawn mi kip in anmai unau an do ding, Bawipa Jehovah in a ti. 22 Amah cu nathrisia le thisen suahnak in dān ka tat ding; amah le a ralkap rual le a hnenih mi tampi parah ruah nasazet, rial tumpi pi, meisa le kāt ka surter ding. 23 Cutivekcun ka hliraw ding ih, ka thianhlimnak ka langter ding, cule keimah cu miphun tampi mithmuhah theih ka si ding. Cule annih in keimah cu Jehovah ka si ti an thei ding,» tiin.

Gog-ih Ralkap Rual Cemralnak

1 «Nang minung fapa, Gog dokalhin thuphuang awla, ‹Bawipa Jehovah in hitin a ti: ngai hnik, Meshek le Tubal uktu lubik, Maw Gog, ka lo do a si; 2 dung lam ka lo hawiter ding ih, ka lo hruai vivo ding, cule sak lam dĕng ihsin ka lo hruaisuak ding ih, Israel tlangpawl dokalhin ka lo thlengter ding. 3 Cun na keh lam kut ih thál ka vawthla ding ih, na vawrh lam kut ihsin thálfungpawl ka tlater ding. 4 Nangmah le na ralkap rual hmuahhmuah le na hnenih miphunpawl thawn Israel tlangpawl parah na tlu ding; sa dehhmang vâte phun zakip hnen le ramlak ramsapawl hnenah an rawl ah ka lo pesuak ding. 5 Ramlak ah na tlu ding; ziangahtile ka phuangsuak zo a si, Bawipa Jehovah in a ti. 6 Cule Magog le tipi kap rampawl ih ralmûang zetih umpawl parah meisa ka thlah ding. Cule annih in keimah cu Jehovah ka si ti an thei ding.

7 ‹Ka mi Israel lakah ka hmin thianghlim ka theihter ding ih, ka hmin ka bawrhhlawhter hai nawn lo ding. Cun miphunpawl in keimah Jehovah cu, Israel ram ih Mi Thianghlim ka si ti an thei ding. 8 Ngai hnik, a ra thleng cing ding, hlensuah a si tengteng ding, Bawipa Jehovah in a ti. Hih ni hi a si, ka rak sim zo mi kha.

9 ‹Cun Israel khawpipawl ih cêngpawl cu an suak ding ih, hriamhreipawl cu mei ah an muah ding ih, an urkang ding, ralphaw pi le ralphaw te, thál le thálfung, feite le feipi pawl cu an tik ding; kum sarih sung an tik ding. 10 Ramlak ah thing an hlâm lo ding ih, tupi sungah an hau fawn lo ding, ziangruangahtile hriamhreipawl cu tihthing ah an hmang, cule anmah rămtupawl an răm ding ih, anmah suamtupawl an suam ve ding, Bawipa Jehovah in a ti.

Gog Phumnak

11 ‹Cuih ni ah hitin a si ding, Israel ram ah phumawknak hmun cu Gog ka pe ding, tipi nisuahnak lamih khualtlawng vahveinak phaikhuam cu; cule cumi cun khualtlawngpawl a kham thluh ding, ziangruangahtile cu tawkah Gog le a mi burpipawl hmuahhmuah an phum ding. Curuangah cuih hmun cu Gog Mi Burpipawl Phaikuam tiah an ko ding. 12 Ram thianfai dingin Israel sungza in cupawl cu thla sarih sung an phum ding. 13 A si, ram mipi hmuahhmuah in an phum ding ih, sunlawih ka si ni ah cumi cu an hminṭhatnak a si ding, Bawipa Jehovah in a ti. 14 Ram thianfai dingin, ram ih phum lo mi ruakpawl phum dingin, ram pumpi va hawl tlaitluan dingin mipapawl ka rethran ding. Thla sarih sung an hawl ding. 15 Ram fángsuaktupawl in an fang ih, minung ruhkolpawl an hmuh tikah, Gog Mi Burpipawl Phaikuam ah phumtupawl in an phum hlan sung ruhkolpawl kiangah hminsinnak an tuah ding. 16 Cuih khawpi hmin khal Mi Burpipawl ti a si ding. Cutivekcun ram cu an thianfai ding,› ti aw.

Nehnak Puai

17 «Nang minung fapa, Bawipa Jehovah in hitin a ti, ‹Vate phun zakim le ramsa tinkim hnenah thusim aw:

Pungkhawm uhla, ra uh;
Israel tlangpawl parih thawiawknak rapthlak,
Nan hrangih ka timtuah mi
Raithawinak sa ah cun kil i kip ihsin
Fĭnkhawm aw uh;
Sa nan ei ding ih thisen nan in ding.
18 Micak sa nan ei ding ih,
Bashan ram ih cawmthau
Tuucangpawl le tuufa nopawl,
Mepa le câwcang a si mi leilung uktupawl hmuahhmuah ih thisen nan in ding.
19 Nan hrangih ka timtuah mi
Ka raithawinak hmun ah
Nan hnet hlanlo sathau nan ei ding ih,
Nan rît hlanlo thisen nan in ding.
20 Rángpawl le a totupawl,
Micakpawl le ral do mipawl hmuahhmuah cu ei in
Ka cabuai ah nan hne ding, Bawipa Jehovah in a ti,› tiin.

Israel cu a Ram ah Hruaikir a Si

21 «Miphunpawl lakah ka ropitnak ka langter ding; miphun hmuahhmuah in ka tuah mi ka dāntatnak le an parih ka thlâk mi ka kut an hmu ding. 22 Cuih ni thăwkin Israel sungza in keimah hi Jehovah an Pathian ka si ti an thei ding. 23 Israel sungza cu an mawhsualnak ruangah ralkaih ah an feh ti miphunpawl in an thei ding, ka hnenih an rinum lo ruangah an hnen ihsin ka hmai ka thup. Anmah cu an ralpawl kut ah ka pe hai ih, an zaten ralnâm in an tlu. 24 An thianlonak zulhin le an dānpahbălnak zulhin an parah ka tuah ih an hnen ihsin ka hmai ka thup.

25 «Curuangah Bawipa Jehovah in hitin a ti: atu ah Jakob ih vanneihnak ka tungdingsal ih, Israel sungza pumpi parah zahngainak ka nei ding ih, ka hmin thianghlim hrangah ka thîkthu a sia ding. 26 Zohman ih thlaphânter loin, anmai ram ih ralmuangih an cēn tikah, ka parih thilsual an tuah mi an mawhsualnak hmuahhmuah le an ningzahnak cu an hngilh ding. 27 Miphunpawl lak ihsi hruaisuaksal in, an ralpawlih ram ihsin fĭnkhawm in, anmah ah miphun tampi mithmuhih ka thianhlimnak ka langter tikah, 28 miphunpawl lakih ralkaihnak ih ka fehter hai lehsal ih, anmai ram rori ih ka hruaikhawm lehdān ah annih in keimah cu Jehovah an Pathian ka si ti an thei ding; cule ralkaih ih tâng an um nawn lo ding. 29 Cule Israel sungza parih ka Thlarau ka burh tikah cun, an hnen ihsin ka hmai ka thup nawn lo ding, Bawipa Jehovah in a ti,» tiin.

Khawpi Thar, Temple Thar

1 Kan sáltannak kum 25-nak, cuih kum kum tir, cuih thla a ni hratnak, khawpi lâk a si hnu a kum hleilitnak, cuih ni cekci ah ka parah Jehovah kut a um ih, ^acu tawkah cun i hei hruai. 2 Pathian larnakpawl hmangin anih cun Israel ram ah i rak hruai ih, tlang sâng zet parah i ret, cumi kiang a thlang lamah khawpi pianhmang vek nei khawpi a um. 3 Cule anih in cu tawkah cun i hruai ih, a hmel lăngdān ah dar vekih lang, a kut ih patzai hri le tahfung keng mipa pakhat a rak um, anih cu kăwtka ah a ding.

40:1^a cu tawkah: Israel ram tinak a si.

4 Cule cu pa cun ka hnenah, «Minung fapa, ka lo hmuh ding mi hmuahhmuah khi na mit in zoh awla, na hna in thei aw, cule na thinlung pe aw, ziangahtile hipawl ka lo hmuh theinak dingah, hitawk ih hruai na si. Na hmuh mi thil hmuahhmuah hi Israel sungza hnenah than aw,» tiah i ti. 5 Cule ngai hnik, temple leng lam kimvelin hruang a um ih, cu paih kut ah cun dawng ruk sau tahfung a um (dawng khat hi dawng khat le sum khat a si), cule hruang pianhmang cu a tah ih, a sah lamah tahfung khat a si ih, a san lam khal tlûk khat thotho a si.

Nisuahnak lam Temple Kăwtka

6 Cun nisuahnak lam hawi kăwtka lamah a feh ih, a kailawn in a kaiso, cule kăwtka hnuai zawn zial cu a tah ih tahfung khat a kau, a dang kăwtka hnuai zawn zial khal tahfung khat thotho a si. 7 Pindan fatepawl cu tahfung khat sau, tahfung khat kau an si fingfing. Pindan fatepawlih an karlakpawl cu dawng nga sah an si. Cule sungta inn suknak hulhliap kiangih kăwtka hnuai zawn zial cu tahfung khat a si. 8 Sung lam hawi kăwtka hulhliap khal a tah ih, tahfung khat a si. 9 Cun kăwtka hulhliap cu a tah tikah dawng riat a kau, a sirih ṭhuampawl cu a tah ih dawng hnih sah an si. Cuih kăwtka hulhliap cu sung lam a hawi. 10 Nisuahnak lam ihsin kăwtka khat lam khat lamah pindan fate pathum veve an um, an pathum in tia-aw hlir an si. A sirih ṭhuampawl khal hi lam le khat lam an tia-aw ṭheh.

11 Kăwtka luhnak cu a tah tikah dawng hra a si, kăwtka sau lam khal a tah ih dawng hleithum a ti. 12 Pindan fatepawl hmaiah khat lam khat lam ih dawng khat veve kau hmun lawng a um, khat lam khat lam ih pindan fatepawl cu a sau lam le a kauh lam dawng ruk cio an si. 13 Cun pindan fate tlun khuh zim cu a dang tlun khuh zim tiang kăwtka cu a tah ih, sângka le sângka hmai hawihawin dawng 25 a kau. 14 A sir ṭhuampawl a tah ih dawng 60 an sâng, tualrawn lam hawi hulhliap tiang a thleng. 15 Kăwtka tăwntir ihsin sungta kăwtka hulhliap tăwntir tiang dawng 50 a si. 16 Kăwtka cun a kimvelah tukvirhpawl a nei, a sirih pindan fatepawl le an ṭhuampawl lamah khan tukvirhpawl cu an bideuh vingvo, cutivekcun hulhliap khal in a kimvelah tukvirhpawl a nei ih, ṭhuampawl cu ṭhulhfau kung ih ceimawi an si.

Lengta Tualrawn

17 Cun lengta tualrawn ah i hruai ih, zoh hnik, tualrawn pumpi kimvelah pindanpawl an um ih, lung an phah; pindan 30 cun lungphah lam an hawi. 18 Lungphah cu kăwtka kapah a um ih, kăwtka can ih kau a si, himi cu lungphah hnuaita a si. 19 Cun kăwtka hnuaita zim ihsin sungta tualrawn zim tiang a kauh lam a tah ih, nisuahnak lam le sak lamah dawng 100 veve a ti.

Sak lam Kăwtka

20 Lengta tualrawn ih sak lam hawi kăwtka sau lam le kauh lam a tah fawn. 21 Kăwtka pindan fatepawl cu khat lam khat lamah pathum veve an um, a sirih ṭhuampawl le a hulhliappawl cu kăwtka hmaisa tia thotho an si, a sau lamah dawng 50, a kauh lamah dawng 25 an si. 22 A tukvirhpawl le a hulhliappawl le a ṭhulhfau kungpawl khal nisuahnak lam hawi kăwtka ta vek kha an si. Cutawk ih feh ding cun karbak pasarih palso a ṭul ih, cupawl hmaiah hulhliap a um. 23 Sungta tualrawn kăwtka cu nisuahnak lam kăwtka vek thothoin sak lam kăwtka zawnah a um. Kăwtka le kăwtka karlak a tah ih dawng 100 a si.

Thlang lam Kăwtka

24 Cuihhnu ah thlang lamah i hruai ih, ngai hnik, thlang lam hawi kăwtka pakhat a rak um. Cule a sirih ṭhuampawl le a hulhliappawl cu a tah ih, a dangpawl thawn an tia-aw ṭheh. 25 Kăwtka le a hulhliap cun a kimvelah a dang vek thothoin tukvirh a nei; a sau lam cu dawng 50 a si ih, a kauh lam cu dawng 25 a si. 26 Cu tawkah karbak pasarih nei kailawn a um so, a hulhliap cu an hmaiah a um ih a ṭhuam khat lam khat lamin ṭhulhfau kung in an cei. 27 Sungta tualrawn thlang lamah kăwtka pakhat a um, cule kăwtka pakhat ihsin thlang lam kăwtka tiang a tah vivo ih, dawng 100 a si.

Tual Sungta Kăwtka

28 Cun thlang lam kăwtka zawhin sungta tualrawn ah i hruai, thlang lam kăwtka cu a tah ih, a dang tapawl thawn an tia-aw. 29 Cule a sirih pindan fatepawl, a sirih ṭhuampawl le a hulhliappawl cu a dangpawl thawn an tia-aw ṭheh. Kăwtka le a hulhliap in a kimvelah tukvirh an nei, cumi cu dawng 50 a sau ih dawng 25 a kau. 30 A kimvelin hulhliappawl an um ih dawng 25 sau le dawng 5 kau an si. 31 Kăwtka hulhliap cun lengta tualrawn lam a hawi, a sirih ṭhuampawl cu ṭhulhfau kung in an cei, a kaisohnak cu karbak pariat a si.

32 Cun anih in nisuahnak lamih sungta tualrawn ah i hruai, kăwtka cu a tah ih a dangpawl thawn an tia-aw. 33 Kăwtka pindan fatepawl le a sirih ṭhuampawl le a hulhliappawl cu a dangpawl thawn an tia-aw. Kăwtka le a hulhliap cun an kimvelah tukvirh an nei, cumi cu dawng 50 a sau ih dawng 25 a kau. 34 A hulhliap cun lengta tualrawn lam a hawih ih, khat lam khat lamih a sirih ṭhuampawl cu ṭhulhfau kung in an cei, a kaisohnak cu karbak pariat a si.

35 Cun sak lam kăwtka ah i hruai ih, cumi cu a tah ih a dangpawl thawn an tia-aw. 36 Kăwtka sirih pindan fatepawl, a sirih ṭhuampawl le a hulhliap cu a dangpawl thawn an tia-aw. A kimvelah tukvirhpawl a nei, a sau lam dawng 50 a si ih, a kauh lam dawng 25 a si. 37 A hulhliap in lengta tualrawn lam a hawi, khat lam khat lamih a sirih ṭhuampawl cu ṭhulhfau kung in an cei, a kaisohnak cu karbak pariat a si.

Raithawinak Timlamnak Hmun

38 Cule kăwtka ih hulhliap luhnak ṭhuampawl kiangah pindan pakhat a um, cutawk hmun ah Meiur Thilhlăn dingpawl an khawlh ṭheu. 39 Cule kăwtka hulhliap khat lam khat lam kapah cabuai pahnih veve an um. Cutawk cu Meiur Thilhlăn, Sual Thilhlăn le Mawh Thilhlăn pawl thahnak ding hmun a si. 40 Leng lamah, sak lam kăwtka kaisohnak lamah cabuai pahnih an um, hulhliap khat lam khalah cabuai pahnih an um. 41 Khat lamah cabuai pali an um ih, a dang khat lamah cabuai pali an um, cutin an raithawinakpawl cu cuih cabuai pariat pawl parah an that ṭheu. 42 Meiur Thilhlăn hrang lungto ser ih tuah mi cabuai pali, an sau lam dawng khat le a hrek, an kauh lam dawng khat le a hrek, an san lam dawng khat an um, cupawl parah Meiur Thilhlăn le raithawinak ding thahnak hmanruapawl an ret. 43 A sung lamah cun sum khat can thirkutpawl, a kimvel hmuahhmuah ah an thlai ih, cabuaipawl parah thilhlăn sa a um.

Hlasatupawl le Puithiampawl hrang Pindan

44 Sungta kăwtka lengah sungta tualrawn ih hla saktupawl hrangah pindan a um, pakhat cu sak lam kăwtka kiangah a um ih, thlang lam a hawi, a dang pakhat cu thlang lam kăwtka kiangah a um ih sak lam a hawi. 45 Cun anih in ka hnenah, «Thlang lam hawi pindan cu temple ih ṭuanvo neitu puithiampawl hrangah a si. 46 Sak lam hawi pindan cu biakṭheng ṭuanvo neitu puithiampawl hrangah a si; cupawl cu a rawngbawl dingih Jehovah naihtu, Levi fapapawl lakih Zadok fapapawl an si,» tiah i ti.

Sungta Tualrawn le Temple

47 Cule anih in tualrawn cu a tah, sir li canrep thluh a si ih, dawng 100 kau a si, cule biakṭheng cu temple hmaiah a um. 48 Cule anih in temple hulhliap ah i hruai ih, hulhliap sirih ṭhuampawl a tah, khat lam khat lam dawng nga veve an si. Cule kăwtka kauh lam cu dawng hleili a si ih, kăwtka sir phăr cu khat lam khat lam dawng thum veve a si. 49 Hulhliap cu a sau lam dawng kul a si ih, a kauh lam dawng hleikhat a si. Kaisohnak cu karbak pahra a si, a sirih ṭhuampawl kiangah ṭhuam pakhat veve an um.

Hmun Thianghlim Kauh Lam

1 Cuihhnu ah hmun thianghlim ah i hruai ih, a sirih ṭhuampawl a tah, khat lam khat lamah dawng ruk an sah, cumi cu biakbûk kauh lam rual ah an um. 2 Sângka cu dawng hra kau a si ih, sângka sirih phăr cu khat lam khat lam in dawng nga veve an si. Cule biakbûk cu a tah ih, dawng 40 sau, dawng 20 kau a si.

3 Cun anih cu a sungah a lut ih, luhnak sirih ṭhuampawl cu a tah, dawng hnih an si; cule sângka cu dawng ruk a sâng ih, a sirih phăr kauh lam dawng sarih veve an si. 4 Anih cun hmun thianghlim leng lam tiang a tah ih, dawng 20 sau, dawng 20 kau a si, cule anih in ka hnenah, «Hihi Hmun Thianghlim Bik a si,» tiah i ti.

Phăr parih Pindanpawl

5 Cuihhnu ah temple phăr a tah ih, dawng ruk a sah; temple kimvel sir tin ih pindanpawl cu dawng li ciar an sah. 6 A sirih pindanpawl cu sâwng thum an si, sâwng khat tlunah sâwng khat vivo in, sâwng khat ah pindan 30 ciar an um, a sirih pindanpawl an kaihhngetawk theinak dingah temple phăr kimvelah kaihhngetawknak a um, asinan temple phăr parah cun an bunaw lo. 7 Sâwng khat hnu sâwng khat a kaisoh tikah, inn sâwng khat hnu sâwng khat a kimvelin a kauso vivo. Ziangruangahtile temple phăr sungih anmah dotu ṭhuambilpawl cu karbak vekin a kauso vivo. Curuangah temple cu a san deuhdeuh asile a kau deuhdeuh. A hnuaitabik ihsin a laita paltlăngin a tluntabik ah an feh ṭheu. 8 Ṭhumawknak sâng khal temple kimvelah ka hmu, a sirih pindanpawl lungphum cu tahfung tlûk khat, dawng ruk a si. 9 A sirih pindanpawlih leng lam phăr sahdān cu dawng nga an si ih, temple sirih pindanpawl le, 10 a dang pindanpawlih karlakah dawng kul kau temple kimvelah hmun lawng a um. 11 A sir pindanpawlih sângkapawl cu hmun lawng lamah ăwn an si ih, pakhat in sak lam a hawi ih, a dang pakhat in thlang lam a hawi, cule a sir tluanin hmun lawng cu dawng nga kau a si.

Nitlaknak lam Inn

12 Inn-ih nitlaknak lam zimih um tualrawn hrante hawihtu inn cu dawng 70 a kau, a phăr kimvelin dawng nga sah hlir a si ih, dawng 90 a sau.

13 Temple cu a tah ih dawng 100 a sau, cule inn tualrawn hrante le a phăr siar telin dawng 100 kau a si. 14 Tualrawn hrante telin, temple nisuahnak lam hmai lam cu dawng 100 a si fawn.

15 Temple dung lamih um mi tualrawn hrante leng lam ihta inn a tah ih, khat lam khat lam ih ^akhawcăwnnak varanda veve thawn dawng 100 sau a si, temple sung lam le tualrawn hulhliap telin, 16 sângka hnuai zawn zialpawl, tukvirh fatepawl le a sâwng thum kimvelih sângka hnuai zawn zial raldenih khawcăwnnak varandapawl cu zial ihsin tukvirhpawl tiangin thingpheng ih ceimawi an si, cule tukvirhpawl cu ceimawi an si. 17 Sângka tlun, inn sung lam le leng lam tiangin, phăr kimvel cu a sung a leng in tah ṭheh a si.

41:15^a khawcăwnnak varanda: Temple kulh sungih puithiampawl inn tlunih hmun lawng.

18 Cule cherub-pawl le ṭhulhfau kungpawl cu cu tawkah kher an si, cutin cherub le cherub karlakah ṭhulhfau kung a um, cherub cun hmai pahnih an nei cio. 19 Cutin minung hmaiin ṭhulhfau kung khat lam a hawih ih, kiosa vanglai hmaiin ṭhulhfau kung khat lam a hawih, cutivekcun temple kimvel hmuahhmuah cu kher a si. 20 Zial ihsin sângka tlun tiangin temple phăr cu cherub le ṭhulhfau kung kher a si.

21 Temple sângka biangpawl cu kil li canrepaw hlir an si ih hmun thianghlim hmai khal cuvek thotho a si. 22 Biakṭheng cu thing ih tuah a si, dawng thum sâng, dawng hnih sau a si. A kil, a tawphah, a sir cu thing ih tuah an si, cule anih in ka hnenah, «Himi hi Jehovah hmaika-ih um cabuai a si,» tiah i ti.

23 Hmun thianghlim sungta le lengta in sângka pahnih an nei veve. 24 Sângkapawl cun hnah hnih an nei, thleh theih hnah hnih an nei veve ih, sângka pakhat in hnah hnih, a dang sângka pakhat in hnah hnih an nei veve. 25 Cherub-pawl le ṭhulhfau kungpawl cu phăr parih kher an si bangkhan temple sângkapawl par khalah kher an si. Hulhliap leng lam hmai lamah thingpheng ih tuah mi daihnem a um. 26 Hulhliap phăr khat lam khat lam cu tukvirh tepawl le ṭhulhfau in an ceimawi ih, temple pindanpawl le daihnempawl cu cutivekih tuah an si.

Puithiampawl hrang Pindan

1 Cun sak lam zin in lengta tualrawn ah i hruaisuak ih, hmun lâwnglak ralden, sak lam inn hmai zawn pindanpawl lamah i hruai. 2 Sângka sak lam hawi inn sau lam cu dawng 100 a si ih, a kauh lam cu dawng 50 a si. 3 Sungta tualrawn ihta dawng 20 lam hawiin le lengta tualrawn ih lungphah hawiin sâwng thum khawcăwnnak varanda thawi bangaw khawcăwnnak varanda a um. 4 Pindanpawl hmai lamih an sung lamah dawng hra kau, dawng 100 sau fehnak lamzin a um, cule an sângkapawl in sak lam an hawi. 5 Pindan tluntapawl cu an bi sawn, ziangruangahtile inn sâwng hnuaitabik le a laita hnakin khawcăwnnak varanda in hmun a luah tam cuang. 6 Ziangahtile cupawl cu sâwng thum an si ih, tualrawn ṭhuam vek ṭhuam an nei ve lo, curuangah sâwng tluntabik cu tangtabik le a laita hnakin a zial cu a bi cuang. 7 Pindanpawl hmaiah cuih pindanpawl zawnah lengta tualrawn lam panin dawng 50 sau hruang a um. 8 Lengta tualrawn zawnih pindanpawlih sau lam cu dawng 50 an si ih, temple zawnih pindanpawl cu dawng 100 a si. 9 Cule lengta tualrawn ihsin ra luh tikah pindanpawlih hnuaiah nisuahnak lamah luhnak a um.

10 Luh sianlonak hmun zawn le a innpi zawn thlang lam tualrawn hruang sahnak lamah pindanpawl an um fawn. 11 Cutawk khalah an hmaiah fehnak zin a um ih, sak lam pindanpawl thawn an bangaw, an sau le an kauh khal a dang vek thotho an si, an suahnak, an sakdān le an luhnak hmuahhmuah ah 12 thlang lam hawi pindanpawl thawn an bangaw. Nisuahnak lam ihsi ra luh tikah hruang zawnih um lamzin lu ah luhnak a um.

13 Cun anih in ka hnenah, «Luh sianlonak hmun raldenih sak lam pindanpawl le thlang lam pindanpawl cu Jehovah pantu puithiampawl in thilhlăn thianghlimpawl an einak ding pindan thianghlimpawl an si. Cu tawkah Thlairawl Thilhlăn, Sual Thilhlăn le Mawh Thilhlăn ti mi thilhlăn thianghlimpawl an ret ding a si, ziangahtile cuih hmun cu a thianghlim a si. 14 Cutawk ih puithiampawl an luh tikah, cutawk ih rawng an bawlnak an sinfen thawn pindan thianghlim suahsanin lengta tualrawn ah an feh ding a si lo, an rawngbawlnak sinfenpawl cu an tân ta ding a si, ziangahtile cupawl cu an thianghlim a si. Sinfen dang an hruk pei, cutin mipi an naih thei ding,» tiah i ti.

Temple Leng lam Kauhzia

15 Cule temple sung lam a tah ṭheh thlang ih, nisuahnak lam hawi kăwtka lamah i hruai, cun a kimvelin a tah ṭheh. 16 Tahfung in nisuahnak lam a tah ih, a kimvel hmuahhmuah cu tahfung ih tahin dawng 500 a si. 17 Sak lam a tah ih, tahfung ih tahin dawng 500 a si. 18 Thlang lam a tah ih, tahfung ih tahin dawng 500 a si. 19 Nitlaknak lamah a her ih, tahfung ih tahin dawng 500 a si. 20 A sir li in a tah, hmun thianghlim le hmun thianghlim lo ṭhen theinak dingah a kimvelin dawng 500 sau, dawng 500 kau hruang a um.

Jehovah Cēnnak Hmun, Temple

1 Cuihhnu ah kăwtka ah i hruai, nisuahnak lam hawih kăwtka ah. 2 Cule ngai hnik, nisuahnak lam ihsin Pathian ropitnak cu a ra. A aw cu tidai tampi thâwm vek a si ih, leilung cu a ropitnak in a êng. 3 Larnak ka hmuh mi cu khawpi tisiat dingih a rat laiih ka rak hmuh mi larnak thawn le Keber Tivapi kiangih ka hmuh mi larnak vek thotho a si; cule leisin bihin ka băwk. 4 Cule Jehovah ropitnak cu nisuahnak lam hawi kăwtka lamzin ihsin temple sungah a lut. 5 Thlarau in i cawiso ih, sungta deuh tualrawn ah i ret; cule ngai hnik, Jehovah ropitnak in temple a luahkhat.

6 Cun mi pakhat kha ka kiangih a din laiah, temple sung ihsin zo in simaw i biain ka thei. 7 Cule anih in ka hnenah, «Minung fapa, himi hi ka laltokham umnak hmun le ka kephah retnak hmun, Israel tefapawl lakih kumkhua ka cēnnak ding hmun a si hi. Israel sungza in ka hmin thianghlim cu anmah in siseh, an siangpahrangpawl in siseh, an hlawhhlannak le an hmun sângpawl ih an siangpahrang ruakpawl khal in siseh an bawrhbangter nawn lo ding. 8 An sângka hnuai zawn zial cu ka sângka hnuai zawn zial kiangah an ret ih, an sângka biang cu ka sângka biang kiangah, anmah le keimah karlakah phăr lawng umterin an thil ti fihnungzapawl cun ka hmin thianghlim cu an bawrhbangter; curuangah ka thinhengnak in cemrál ko ka tuah hai. 9 Atu ah an hlawhhlannak le an siangpahrangpawlih ruak cu ka hnen ihsin hla zetah ret hai seh, cule an lakah ka cêng kumkhua ding.

10 «Nang minung fapa, an mawhsualnakpawl an zahpinak dingah Israel sungza hnenah temple hi simfiang hai aw; cule annih in a ruahmandān cu tah hnik hai seh. 11 An rak tuah mi hmuahhmuah an zahpi asile, temple ruangzĭngdān le remkhawmdan, a suahnakpawl le a luhnakpawl, a riruangpawl le a cīn le dānpawl hmuahmuah, a ruangam hmuahhmuah le a dānpawl hmuahhmuah an hnenah theihter aw. A ruangzĭng cia mi pumpi le a cīn le dān hmuahhmuah an thlun ih an nunpi theinak dingah, cumi cu an mithmuhah ngan aw. 12 Himi hi temple dān cu a si: tlang zim kiangkap pumpi cu hmun thianghlimbik a si. Ngai hnik, hihi temple dān a si.

Biakṭheng

13 «Hihi dawng ih tahin biakṭheng tûm lam a si: dawng khat cu dawng khat le sum khat a si; a tawphah cu dawng khat sâng le dawng khat kau a si, a tlang kimvel hmuahhmuah cu khâp khat vivo in a kûal ding a si. Himi hi biakṭheng san lam a si: 14 lei ih a tawphah ihsin a hnuaita biang cu dawng hnih a si ih, a sah lam dawng khat a si; a hnuaita biang ihsin tlunta biang tiang dawng li a si ih, dawng khat sah a si. 15 Biakṭheng thŭk cu dawng li a sâng ih, biakṭheng thŭk zawn ihsin ki pali a suak. 16 Biakṭheng thŭk cu dawng hleihnih a sau ih, dawng hleihnih a kau, a biang pali cu an canaw ṭheh; 17 a biang pali cu an canaw ṭheh, a biang cu dawng hleili a sau ih, dawng hleili a kau; a sah lam cu dawng hrek a si; a tawphah cu a kimvelin dawng khat a si; a karbakpawl cun nisuahnak lam an hawi,» tiah i ti.

Biakṭheng Hlănnak

18 Cule anih in ka hnenah, «Minung fapa, Bawipa Jehovah in hitin a ti: a parih Meiur Thilhlănpawl thawinak ding le a parih thisen theh dingih biakṭheng an tuah tikih biakṭheng cīn le dān ding cu hitivekhin a si: 19 Levi-mi, puithiam Zadok cithlah, rawng i bawlsak dingih i run naihtu hnenah, Sual Thilhlăn hrangah câwpa tûai na pe pei, Bawipa Jehovah in a ti. 20 Cutawk ih thisen hrekkhat la awla, biakṭheng ki pali le kil li ih um a biang ah le a tlang kimvel parah tât aw. Cutivekcun biakṭheng cu na thianfai pei ih, biakṭheng hrangah sualkhuhthawinak na tuah pei. 21 Sual Thilhlăn hrangah câwpa tûai na la pei ih, hmun thianghlim leng, temple ih hmun ruat ah na ur pei.

22 Ni hnihnak ah Sual Thilhlăn ah sawisel ding um lo mecang pakhat na hlan pei; cule biakṭheng cu câwpa thawi an thenfai vekin an thianfai pei. 23 Biakṭheng na thianfai tikah, sawisel ding um lo câwpa tûai pakhat le sawisel ding um lo rante rual lak ihsin tuucang pakhat na hlan pei. 24 Cupawl cu Jehovah hmaika-ah na hlan pei ih, puithiampawl in cupawl parah cite an phulh pei, cule Jehovah hnenah cupawl cu Meiur Thilhlăn ah an hlan ding a si. 25 Ni sarih sung cu ni tin Sual Thilhlăn ah mecang pakhat na timtuah pei; sawisel ding um lo câwpa tûai pakhat le rante rual lakih tuucang pakhat khal an timtuah fawn pei. 26 Ni sarih sung cu biakṭheng hrangah sualkhuhthawinak an tuah pei ih, an thianfai ding a si, cule biakṭheng cu an serhhran pei. 27 Cuih nipawl a cem tikah, hitin a si ding, ni riatnak le cumi cuihhnu ah, puithiampawl in biakṭheng parah nan Meiur Thilhlănpawl le nan Remnak Thilhlănpawl an hlan pei; cule ka lo cohlang hai ding, Bawipa Jehovah in a ti,» tiah i ti.

Nisuahnak lam Kăwtka le Uktu

1 Cun anih in nisuahnak lam hawi hmun thianghlim lengta deuh kăwtka ah i hruaikir, asinan cucu a kharaw. 2 Cule Jehovah in ka hnenah, «Hi kăwtka cu khar a si ding; ăwn a si lo ding ih, cumi ihsin zohman an lut lo ding, ziangruangahtile Israel-ih Pathian Jehovah cu cuih kăwtka ihsin a rak lut; curuangah khar a si pei. 3 Uktu lawngte cu Jehovah hmaika-ih rawl ei dingin cu tawkah cun a to ding; hulhliap kăwtka zin ihsin a lut pei ih, cuih zin thotho in a suak pei,» tiah i ti.

Temple sungih Luh Sian Mipawl

4 Anih cun temple hmaiah sak lam kăwtka zin ihsin i rak hruai; ka hun zoh ih, ngai hnik, Jehovah ropitnak in Jehovah inn cu a luahkhat; cule leisin bihin ka băwkkhup. 5 Cule Jehovah in ka hnenah, «Minung fapa, ṭhaten hminsin awla na mit in zoh aw, cule Jehovah inn cīn le dān thuhla na hnenih ka lo sim mi hmuahhmuah le a dān hmuahhmuah kha ngaithla aw. Inn sungih luhnak ding le hmun thianghlim ihsi suahnak dingpawl hmuahhmuah kha ṭhaten hminsin hai aw. 6 Helhmang Israel sungza hnenah sim aw, Bawipa Jehovah in hitin a ti: Maw Israel sungza, nan thil fihnungzapawl hmuahhmuah hi tawk thlang seh. 7 Ka hmun thianghlim sungah ram dang mi, thinlung serh tan lo mi, titsa serh tan lo mipawl nan run hruai, bawrhbangter dingah ka hmun thianghlim ih rung lut ih, ka rawl a si mi thau le thisen nan hlan tikah khan, ka inn rori cu nan bawrhbangter a si. Cule nan thil fihnungzapawl hmuahhmuah hleiah, annih in ka thukham an pahbăl. 8 Cule nannih in ka thil thianghlim ṭuanvo nan thlun lo, cuhnakin ka hmun thianghlim ṭuanvo latu dingah nanmai hrangah mi dang nan ruat. 9 Bawipa Jehovah in hitin a ti: Israel tefapawl lakih um ram dang mi, thinlung serh tan lo le titsa serh zim tan lo ram dang mi zohman ka hmun thianghlim ah an lut lo pei.

Puithiampawl hrang Dān

10 «An milempawl thlunih Israel-mipawl ka hnen ihsin hla zetih an rak fehpenhlo laiih ka hnen ihsi hla zetih rak fehpênghlotu Levi-mipawl in anmai mawhsualnak an tuar ding. 11 Annih cu inn kăwtkakiltu le inn rawngbawltu dinhmun in ka hmun thianghlim ah rawngbawltu an si ding a si; mipi hrangah Meiur Thilhlăn le thawiawknak ran an that pei, cule anmah rawngbawlsak dingin mipi hmaiah an ding pei. 12 An milempawl hmaiah rawng an bawlsak hai ih, mawhsualnak ah Israel sungza an rak tlukter ruangah anmai mawhsualnak cu anmah in an tuar ding tiin anmah dokalhin bān pharin thukamnak ka rak tuah a si, Bawipa Jehovah in a ti. 13 Cule puithiam dinhmun ih rawngbawl dingin in ra naih lo ding ih, ka thil thianghlim zianghman an naih lo ding, thil thianghlimbik khal; asinan an rak tuah mi an thil fihnungzapawl le an ningzahnak cu an tuar ding a si. 14 Cutisikhalsehla an hna hmuahhmuah le a sungih tuah ding mipawl hmuahhmuah tuah dingin, temple kilkhawi ṭuanvo ka pe hai ding.

15 «Asinan Israel tefapawl ka hnen ihsin an fehpenhlo laiah ka hmun thianghlim kilkhawitu Levi cithlah puithiampawl, Zadok fapapawl cun ka rawngbawl dingin in run naih ding; cule thau le thisen in hlan dingin ka hmaiah an ding ding a si, Bawipa Jehovah in a ti. 16 Ka hmun thianghlim ah an lut pei ih, ka rawngbawl dingin ka cabuai an ra naih ding ih, ṭuanvo ka pek mi an hlensuak ding a si. 17 Cule hitin a si ding, sungta tualrawn kăwtkapawl an luh tinten, patzai tah mi sinfen an hruh pei; sungta tualrawn kăwtkapawl sung le inn sungih rawng an bawl laiah sahmul hnipuan an hruh lo pei. 18 An lu ah patzai lupâwng an ngerh pei ih, an tâi ah patzai puante an kaih pei. Thlan suakter thei mi hnipuan zianghman an hruh lo pei. 19 Mipi hnen, tualrawn lengta ih an suah tikah rawng an bawlnak sinfenpawl cu an hlít pei ih, pindan thianghlim sungah an tân pei, cule an sinfen thianghlimpawl thawn mipi an tithianghlimlonak dingah, sinfen dang an hruh ding a si.

20 «An lu an ziatkawlh lo pei, an sám a sau fawn lo pei, a mawi tawkten an met ding a si. 21 Tualrawn sungta deuh ih an luh tikah puithiam in sabitzu an in lo pei. 22 Nupi ah nuhmei le mâk mi nunau an ṭhi lo pei, Israel sungza tesinfa fala him asilole puithiam thihsăn nuhmei an ṭhi sawn ding a si. 23 Cule ka mipawl cu thil thianghlim le thianghlim lo danglamzia an zirh pei ih, thil thiang le thianglo an thleidangter ding a si. 24 Thubuai a um tikah puithiam cu thuṭhentu dinhmun in an ding pei ih, ka cīn le dānpawl bangtukin thu an ṭhen pei. Ka ruat mi puaipawl hmuahhmuah ah ka dānpawl le ka sakhaw dānpawl an thlun pei ih, ka Sabbath-pawl an thianghlimter ding a si. 25 Mah le mah bawrhbangawter dingin mithi ruang an naih lo pei. Asinan pa simaw, nu simaw, fapa simaw, fanu simaw, unau mipa simaw, pasal nei lo unau nunau simaw hrang lawngah an bawrhbangawter thei. 26 A thianfaiawk hnuah, a hrangah ni sarih an siarsak ding a si. 27 Cule hmun thianghlim ih rawngbawl dingin hmun thianghlim ih a feh ni ah, sungta tualrawn ah a sual thilhlăn a hlan tengteng pei, Bawipa Jehovah in a ti.

28 «Cule hitin a si ding, an ro thuhla ah, keimah cu an co mi ro ka si. Israel ram ah covo zianghman nan pe hai lo pei, ziangahtile keimah hi an covo ka si. 29 Thlairawl siseh, sual thilhlăn siseh, mawh thilhlăn siseh an ei pei; Israel ram ih hlăn mi thil pauhpauh cu anmai ta a si pei. 30 Thlaithar hmaisabik lakih a ṭhabik pauhpauh le thawhhlawm nan pek mi hmuahhmuah cu puithiampawl ta an si pei; na inn sungih malsawmnak a um lan ta theinak dingah, nan sangvut thar hmaisabik cu puithiam hnenah nan pe pei. 31 Mah te thi le ramsa ih thlek mi vâte le ramsa zianghman puithiampawl cun an ei lo pei.

Ramṭhen Thianghlim

1 «Cuihtlunah camcawhfungzuhnak hmangin ro hrangih ram nan zemawk tikah, ramṭhen thianghlim pakhat, ramṭhen pakhat cu Jehovah hrangah nan serhhran pei; a sau lam cu dawng 25000 a si pei ih, a kauh lam cu dawng 10000 a si pei. Cuih ramri kulh sung hmuahhmuah cu a thianghlim ding a si. 2 Cumi ah hmun thianghlim hrangah leiram sir li canaw ṭheh mi, dawng 500 hrawng sau, dawng 500 hrawng kau le a kimvelah hmun lawng dawng 50 zuah a si pei. 3 Himi ramṭhen ihsin dawng 25000 sau le dawng 10000 kau tah aw; cu tawkah hmun thianghlim a um pei, Hmun Thianghlim Bik cu. 4 Cumi cu ram sungih hmun thianghlim, puithiampawlih ta, hmun thianghlim rawngbawltu, Jehovah rian dingih va naihtu, puithiampawlih ta a si pei; cuih hmun cu inn thianghlim hrangih hmun thianghlim a si pei. 5 Hmun dang a sau lam dawng 25000 le a kauh lam dawng 10000 khal temple rawngbawltu, puithiampawl ta thotho a si pei; annih in pindan 20 an nei pei.

Uktu Covo

6 «Ramṭhen thianghlim serhhran zo mi kiangah khawpi dingah a kauh lam dawng 5000, a sau lam dawng 25000 nan ruat pei; cumi cu Israel sungza pumpi ta a si pei.

7 «Uktu covo cu serhhran zo mi ramṭhen thianghlim khat lam le khat lam sir veve le khawpi dingih ruat mi hmun khat lam le khat lam sir veve ah a si pei; uktu covo cun nitlaknak lam le nisuahnak lamah ramṭhen thianghlim le khawpi hmun cu a va ri ding a si. Nitlaknak lam ihsin nisuahnak lam hawiin uktu covo cun zem cia mi ram thlurhin a um ding a si. 8 Cucu Israel ram ih amai covo ding a si: cule ka uktupawl cun ka mipawl an palbĕt nawn lo ding, cuhnakin Israel sungza cu a tāng lai mi ram khal an hnám izirin an pe sawn ding a si.

Uktu hrang Dān

9 «Bawipa Jehovah in hitin a ti: Maw Israel uktupawl, a tawk thlang! Thahrumsuahnak le mi va răm kha bāng thlang uh, diknak le dingfelnak nunpi uhla, ka mipawl hnawhsuah cu bang thlang uh, Bawipa Jehovah in a ti.

10 «Khīngkhainak dik, efa dik le bath dik nan nei pei. 11 Efa le bath hi a tlukaw ciah ding a si, bath pakhat cu homer khat ṭhen hra ṭhen khat a si ih, efah khat cu homer ṭhen hra ṭhen khat a si; thil tahnak tlangpi cu homer ah a ṭhumaw pei. 12 Shekel 20 le shekel 25 le shekel 15 kăwm cu ^amina pakhat a si pei.

45:12^a mina: Rih lam tahnak simfiangnak zoh aw.

13 «Himi hi nan hlăn ding mi thawhhlawm a si: sangvut homer khat sungin efa ṭhen ruk ih ṭhen khat le barli sangvut homer khat ah efah ṭhen ruk ih ṭhen khat nan pe pei. 14 Bath hmangih tah mi hriak thuhla ih cīn le dān cu, hriak kor khat ihsin bath ṭhen hra ih ṭhen khat a si pei (kor khat cu homer khat asilole bath hra a si, ziangahtile bath hra cu homer khat a si). 15 Cule Israel tidai tlaksam lonak ran tlannak ihta rante rual lakih 200 ah tuufa no pakhat vivo pek a si pei. Cupawl cu Thlairawl Thilhlănpawl, Meiur Thilhlănpawl le Remnak Thilhlănpawl hrangah anmah hrangih sualkhuhthawinak tuahnak dingah an si pei, Bawipa Jehovah in a ti. 16 Ram mipi hmuahhmuah in Israel uktu hrangih hi thilpek pek cu an mawhphurh a si. 17 Cun hitin a si pei, puaipawl, Thla Tharpawl, Sabbath-pawl le Israel sungza ih ruat mi puaipawl hmuahhmuah ah, Meiur Thilhlănpawl, Thlairawl Thilhlănpawl le Inding Thilhlănpawl cu uktuih mawhphurh a si pei. Anih in Sual Thilhlăn, Thlairawl Thilhlăn, Meiur Thilhlăn le Remnak Thilhlăn pawl cu Israel sungza hrangah sualkhuhthawinak tuah dingah a thawh ding a si.

Puaipawl

18 «Bawipa Jehovah in hitin a ti: thla khatnak, cuih thla ni hmaisabikah sawisel ding um lo câwpa tûai pakhat na hruai pei ih hmun thianghlim cu na thianfai pei. 19 Puithiam in Sual Thilhlăn thisen ziangmaw zât a la pei ih, temple sângka biangpawl ah, biakṭheng biang tlang li ah le sungta deuh tualrawn kăwtkabiangpawl ah a tât pei. 20 Cule cutivekin cuih thla ni sarihnak ah tum lo pi le thei lo piih sual tuahtu mi kip hrangah nan tuah ding a si. Cutivekcun temple hrangah sualkhuhthawinak nan tuah ding a si.

21 «Thla khatnak, cuih thla ni hleilitnak ah ni sarih sung Lanta puai nan hmang pei; thilnu telh lo sang nan ei pei. 22 Cuih ni ah uktu in amai hrang le ram mipi zate hrangah câwpa pakhat Sual Thilhlăn ah a thawh pei. 23 Ni sarih sung puai ah sawisel ding um lo câwpa pasarih le tuucang pasarih ni tin ni sarih sung Jehovah hnenah Meiur Thilhlăn hrangah a thawh pei, Sual Thilhlăn hrangah ni tin mecang pakhat khal. 24 Cule Thlairawl Thilhlăn hrangah câwpa pakhat ciar hrangah efa khat le tuucang pakhat ciar hrangah efa khat le efa khat ciar hrangah hriak kalān khat a thawh ding a si.

25 «Cuvekin thla sarihnak, cuih thla ni hleingatnak ih puai ah, Sual Thilhlăn, Meiur Thilhlăn, Thlairawl Thilhlăn le Hriak Thilhlăn hrangah ni sarih sung a tuah pei.

Pathian Biakdan

1 «Bawipa Jehovah in hitin a ti: nisuahnak lam hawi tualrawn sungta kăwtka cu hnaṭuan ni, ni ruk sung khar a si pei; asinan Sabbath ah cun ăwn a si pei ih, Thla Thar ni ah ăwn a si fawn pei. 2 Uktu cu leng lamin kăwtka hulhliap lamzin ihsin a lut pei ih, kăwtka kapih ṭhuam kiangah a ding pei. Puithiampawl in a Meiur Thilhlăn le a Remnak Thilhlănpawl an timlamsak pei. Kăwtka hnuai zawn zial ah Pathian a be ding a si. Cun a fehsuak ding, asinan kăwtka cu sîm lam a thlen hlanlo khar a si lo pei. 3 Ram mipi cun Sabbath-pawl le Thla Tharpawl ah cuih kăwtka luhnak ah Jehovah hmaika-ah Pathian an be pei. 4 Sabbath ni ah uktu in Jehovah hnenih Meiur Thilhlăn a hlăn ding mi cu sawisel ding um lo tuufa no paruk le sawisel ding um lo tuucang pakhat a si pei; 5 cule tuucang pakhat hrangah Thlairawl Thilhlăn efa khat a si pei ih, tuufa nopawl hrang Thlairawl Thilhlăn cu ^aa pek thei zâtzât le efah khat ah hriak kalān khat vivo a si pei. 6 Thla Thar ni ah hitin a si ding, sawisel ding um lo câwpa tûai pakhat, tuufa no paruk le tuucang pakhat a hlan pei, cupawl cu sawisel ding um lo an si ding a si. 7 Thlairawl Thilhlăn a timtuah pei ih, câwpa tûai pakhat hrangah efah khat, tuucang pakhat hrangah efa khat, tuufa nopawl hrangah a pek thei zâtzât le efah khat vivo ah hriak kalān khat a si ding a si. 8 Uktu a luh tikah, kăwtka hulhliap lamzin in a lut pei ih, cuih zin thotho in a suak pei.

46:5^a a pek thei zâtzât: A ṭawng hrampi ah cun, «a kut ih thilpek» ti a si.

9 «Asinan ram mipi cu Jehovah hmaika-ah ruat mi puaipawl ih an rat tikah, Pathian be dingih sak lam kăwtka lamzin ihsi a luttu zokhal thlang lam kăwtka zin in a suak pei ih, thlang lam kăwtka ihsi a luttu zokhal sak lam kăwtka zin in a suak pei. A rung luhnak kăwtka zin in a suak lo pei, dung kir loin dĭngten a suak sawn pei. 10 Cun uktu cu an lakah a um pei. An luh tikah anih khal a lut pei, cule an suah tikah anih khal a suak ve pei.

11 «Puaipawl le ruat mi puaipawl ah Thlairawl Thilhlăn cu câwpa tûai pakhat hrangah efah khat, tuucang pakhat hrangah efah khat, tuufa no pakhat hrangah a pek thei zâtzât le efa khat ah hriak kalān khat a si ding a si. 12 Uktu in Jehovah hnenih mai palungsuak Meiur Thilhlăn asilole mai palungsuak Remnak Thilhlăn a hlăn tikah, nisuahnak lam hawi kăwtka cu ăwnsak a si pei; cule Sabbath ni ih a hlăn vekin a Meiur Thilhlăn le a Remnak Thilhlăn cu a hlan pei. Cun a fehsuak pei ih, a fehsuah hnuah kăwtka cu khar a si pei.

13 «Ni tin Jehovah hnenih Meiur Thilhlăn hrangah, sawisel ding um lo tuufa no kum khat kim mi na hmang pei; cumi cu zing tin na timlam pei. 14 Cule cumi thawn efa ṭhen ruk ṭhen ih ṭhen khat le sangvut phŭt hnawnternak ding hriak kalān khat ṭhen thum ṭhen ih ṭhen khat zing tin thlairawl thilhlăn hrangah na timlam pei. Hih thlairawl thilhlăn cu Jehovah hnenih hlăn ringring ding mi cīn le dān a si. 15 Cutivekcun hlăn ringring mi Meiur Thilhlăn vekin, tuufa no, Thlairawl Thilhlăn le hriak cu zing tin timlam ding a si.

Inn le Ló Dān

16 «Bawipa Jehovah in hitin a ti: uktu in a fapapawl hnenah a ro lak ihsin thilpek a pek fingfing asile, cumi cu a fapapawlih ta cio a si ding a si; cumi cu ro ih an co mi an ta a si. 17 Asinan a siahhlawhpawl lakih pakhat khat hnenih a ro lak ihsin thilpek a pek asile, cumi cu zalĕnnak kum a thlen hlanlo a siahhlawh ta a si pei, cuihhnu ah cumi cu uktu hnenah a kirsal ding a si, a ro cu a fapapawlih ta a si ding a si; anmai ta a si ding. 18 An inn le ló ihsi dawisuakin, uktu in mipi ro zianghman a lawng ding a si lo; ka mipi pakhat hman anmai inn le ló ihsi an ṭekdarhlonak dingah, a fapapawl cu amai thil neih mi sung ihsin ro a pe ding a si,» tiah i ti.

Thilhlănpawl Timtuahdān

19 Cule kăwtka sirih luhnak ihsin sak lam hawi, puithiampawlih pindan thianghlimpawl sungah i hruailut, cule ngai hnik, nitlaknak dĕng lamah hmun pakhat a um. 20 Cule anih in ka hnenah, «Himi hi puithiampawl in mawh thilhlăn le sual thilhlăn an suannak ding hmun le thlairawl thilhlăn an kănnak ding hmun a si, culole cupawl cu tualrawn lengta ah an kengsuak ding ih, mipi an thianghlimter pang ding,» tiah i ti.

21 Cun anih in tualrawn lengta ah i hruaisuak ih, kil li ih tualrawn ah i fehpi; cule ngai hnik, cuih kil tin ah tualrawn dang a um vivo. 22 Kil li ih tualrawn ah cun tualrawn phăr nei a sau lam dawng 40 le a kauh lam dawng 30 a um; kil li ih tualrawnpawl cu an tia-aw thluh. 23 Cuih hmun li sung lamah a kimvelin a tlarin lung an rĕm ih, cuih tlar hnuaiah a kimvelin suannak ding thŭk a um. 24 Cule anih in ka hnenah, «Himi hi sa suannak hmun, temple rawngbawltupawl in mipi raithawinak sa an suannak ding hmun a si,» tiah i ti.

Temple ihsin Tiva a Luangsuak

1 Cuihhnu ah anih in temple sângka ah i hruaikirsal; cule ngai hnik, temple sângka hnuai zawn zial ihsin nisuahnak lamah tidai a irhsuak, ziangahtile temple cu nisuahnak lam hawi a si, cule tidai cu biakṭheng thlang lam, temple vawrh lam hnuaiin a luang. 2 Anih in sak lam kăwtka zin ihsin i hruaisuak ih, nisuahnak lam hawi kăwtka lengta deuh tiang lengah i hruaikûal; cule ngai hnik, vawrh lamah tidai a luangsuak.

3 Cule cuih pacang pa cu a kut ah tahnak hri kengin nisuahnak lamah a fehsuak ih, dawng 1000 a tah, cule tidai tánin i hruai, tidai cu ka kedil a thleng. 4 Dawng 1000 a tahsal lala ih, tidai tánin i hruai vivo, tidai cu ka khuk tiang a si. Dawng 1000 a tahsal lala ih, tidai tánin i fehpi; tidai cu ka tâi tiang a si. 5 Dawng 1000 a tahsal ih, ka tan thei lo mi tivapi a si; ziangahtile tidai cu a lian luihlo ih, a leuhih leuh ding mi, tankai theih lo tivapi a si. 6 Cule anih in ka hnenah, «Minung fapa, himi hi na hmu a si lo maw?» tiah i ti. Cun anih cun i hruai ih tivapi kapah i hruaikirsal.

7 Ka va kir tikah, ngai hnik, tiva kap tluanah cun khat lam le khat lamah thingkung tam ngaingai an um. 8 Cun anih cun ka hnenah, «Hi tidai cu nisuahnak lam ram panin a luang ih, Arabah phai ah a luangthla ih tifinriat sungah a lut. Tifinriat a thlen tikah, tifinriat tidai cu tidai ṭha ah a cang. 9 Cule hitin a si ding, a vâkleng mi thilnung hmuahhmuah cu tiva a luannak i kip ah an nung ding. Cu tawkah a tawri tawr nga an um ding, ziangruangahtile hi tidai cu cu tawkah a luanglut; ziangahtile tidai cu tidai ṭha ah a cang ih, tiva a luannak i kip ah thil ziangkim an nung ding. 10 Cule hitin a si ding, cuih tiva kap, En Gedi ihsin En Eglaim tiang ngakaitupawl an ding ding; cuih hmun cu sûr vawrhnak a si ding. An nga kaih mipawl cu Tifinriat Tumpi sungih nga vek, nga phunphun an si ding, a tawrin a tawr ding. 11 Asinan a cirhduppawl le dûmpawl cu an thiangfai cuang lo ding; cite dingah an si ding. 12 Tiva kap tluanah cun khat lam le khat lamah ei ṭha thingkung phun zakip an kho ding; an hnah a vuai dah lo ding ih, an rah khal a reh dah fawn lo ding; an tidai cu hmun thianghlim ihsin a luansuah ruangah thla tin an rah ding. An rah cu ei dingah a si ding ih, an hnah cu damnak dingah a si ding,» tiah i ti.

Ramripawl

13 Bawipa Jehovah in hitin a ti, «Hihi Israel hnám hleihnih lakih ro dingih ram an zemawkdān ding cu a si: Joseph in covo pahnih a nei pei. 14 Bangrep cio in nan co ding a si, ziangahtile nan pupápawl hnenah cumi cu pe hai dingin hi ram hi nan ro dingah nan hnenah a tlu ding tiin bān pharin thukamnak ka rak tuah zo.

15 «Hihi ramri a si pei: sak lamah, Tifinriat Tumpi ihsin Hethlon zin hrutin Zedah, 16 cule Damaskas ramri le Hamath ramri karlakih um Hamath, Berothah, Sibraim tiang, Hauran ramri parih um Hazar Hattikon tiang a si pei. 17 Cutivekcun ramri cu Tifinriat ihsin Hazar Enan tiang, Damaskas ramri tiang a si pei; cule sak lamah cun Hamath ramri a thleng. Himi hi sak lam ramri a si pei.

18 «Nisuahnak lamah, Hauran le Damaskas karlakah ramri a um pei ih, Gilead le Israel ram karlakih Jordan tiva thlunin a feh pei; cule nisuahnak lam tifinriat thlunin na tahsuak pei. Himi hi nisuahnak lam ramri a si pei.

19 «Thlang lamah, ramri cu Tamar ihsin Kadesh kiangih Meribah tidai hmun tiang a feh pei ih, ^ativa tluan ihsin Tifinriat Tumpi tiang a si pei. Hihi thlang lamah cun thlang lam ramri a si pei.

47:19^a tiva: Izip tiva a si men thei.

20 «Nitlaknak lamah, Lebo Hamath zawn tiang Tifinriat Tumpi in a ri pei. Hihi nitlaknak lam ramri a si pei.

21 «Cutivekcun hi ram hi Israel hnámpawl a hnám a hnám zirin nan lakah nan zem aw pei. 22 Cule hitin a si ding, nanmai hrangah le nan lakih cêng tefa nei ram dang mipawl hrangih ro dingah camcawhfung zûkin ram cu nan zem aw pei. Israel tefapawl lakah annih cu rammi vekin nan ruat ding a si; Israel hnámpawl lakah nan zawngah ro an nei ve pei. 23 Cule hitin a si pei, ziang hnám lak khalih ram dang mi a cēn asile, cu tawkah cun a ro ding nan pe ding a si, Bawipa Jehovah in a ti.

Ram Zemawknak

1 «Hipawl hi hnám hminpawl an si: sak lam dĕng ihsin thăwkin, Hethlon ihsin Lebo Hamath lamzin hrutin, Damaskas sak lam ramri ih Hazar Enan tiang, nisuahnak lam ihsin nitlaknak lam tiang cu Dân hrang, covo pakhat. 2 Dân thawn ri-awin nisuahnak lam ihsin nitlaknak lam tiang cu Asher hrang, covo pakhat. 3 Asher thawn ri-awin nisuahnak lam ihsin nitlaknak lam tiang cu Nafthali hrang, covo pakhat. 4 Naftali thawn ri-awin nisuahnak lam ihsin nitlaknak lam tiang cu Manasseh hrang, covo pakhat. 5 Manasseh thawn ri-awin nisuahnak lam ihsin nitlaknak lam tiang cu Efraim hrang, covo pakhat. 6 Efraim thawn ri-awin nisuahnak lam ihsin nitlaknak lam tiang cu Reuben hrang, covo pakhat. 7 Reuben thawn ri-awin nisuahnak lam ihsin nitlaknak lam tiang cu Judah hrang, covo pakhat.

8 «Judah thawn ri-awin nisuahnak lam ihsin nitlaknak lam tiang cu nan serhhran mi ramṭhen a si pei, cucu dawng 25000 kau le a sau lam cu nisuahnak lam ihsin nitlaknak lam tiang covo dang vek thotho a si ih, a laiah hmun thianghlim a um ding a si. 9 Jehovah hrangih nan serhhran mi ramṭhen cu a sau lamah dawng 25000 le a kauh lamah dawng 10000 a si pei. 10 Himi ah hin puithiampawl hrangah ramṭhen thianghlim zuah a si pei: sak lamah dawng 25000 sau, nitlaknak lamah dawng 10000 kau le nisuahnak lamah dawng 10000 kau, thlang lamah dawng 25000 sau a si ding a si. A laiah Jehovah hmun thianghlim a um ding a si. 11 Cumi cu ṭuanvo ka pek mi hlensuaktu, Zadok fapa serhhran mi puithiampawl hrangah a si pei. Cupawl cu Israel tefapawl an fehpen laiih Levi-mipawl vekih fehpêng ve lo an si. 12 Hi serhhran mi ramṭhen cu an hrangah thil thianghlimbik a si ding a si, Levi-mipawl thawn ri-awin. 13 Puithiam covo thawn ri-awin Levi-mipawl in covo an nei pei, a sau lam dawng 25000 le a kauh lam dawng 10000 a si pei; a pumpi sau lam cu dawng 25000 le a kauh lam cu dawng 10000 a si pei. 14 Cule cumi cu an zuar lo pei ih, ziang thaw hmanin an thleng fawn lo pei; hi hril mi ram hi mi dang hnenah an pe fawn lo pei, ziangahtile cumi cu Jehovah hrangah a thianghlim a si.

15 «Dawng 5000 kau le dawng 25000 sau ram hlei cu khawpi hrangah thil dangdang hrangih hman ding a si pei: cēnnak hmun ding le ran tlannak ram lawnglak hrangah a si pei, khawpi cu a laiah a um ding a si. 16 A tahdān ding cu hitin a si pei: sak lamah dawng 4500, thlang lamah dawng 4500; nisuahnak lamah dawng 4500, nitlaknak lamah dawng 4500 a si pei. 17 A khawpi cun ran tlannak ram lawnglak a nei pei ih, sak lamah dawng 250, thlang lamah dawng 250, nisuahnak lamah dawng 250, nitlaknak lamah dawng 250 a si pei. 18 Ramṭhen thianghlim thawn ri-awin a sau lam hlei mi cu: sak lamah dawng 10000, thlang lamah dawng 10000 a si pei. Cumi cu ramṭhen thianghlim thawn an ri-aw a si; cutawk ihsi thil suak mipawl cu khawpi hnaṭuantupawlih rawl an si pei. 19 Israel hnámpawl hmuahhmuah ihsin khawpi ih hnaṭuantupawl in lei an let ding a si. 20 Ramṭhen thianghlim pumpi cu a sau lamah dawng 25000, a kauh lamah dawng 25000 a si pei. Ramṭhen thianghlim, sir li canaw cu khawpi neih thilpawl thawn nan serhhran ding a si.

21 «Ramṭhen thianghlim le khawpi covo sir veve ih ram hlei cu uktu ta a si pei, ramṭhen thianghlim dawng 25000 ihsin nisuahnak lamah nisuahnak lam ramri tiang, cule khaih dawng 25000 ihsin nitlaknak lamah nitlaknak lam ramri tiang; covo zem zo mipawlih sir cu uktu hrangah a si pei. Ramṭhen thianghlim le temple hmun thianghlim cu a laiah a um pei. 22 Cuihtlunah Levi-mipawl covo le khawpi hmun cu uktu covo karlakah a um pei, cule uktu covo cu Judah covo le Benjamin covo thawn a ri-aw pei.

23 «A tāng lai mi hnámpawl hrangah cun, nisuahnak lam ihsin nitlaknak tiang cu Benjamin hrang, covo pakhat. 24 Benjamin thawn ri-awin nisuahnak lam ihsin nitlaknak lam tiang cu Simeon hrang, covo pakhat. 25 Simeon thawn ri-awin nisuahnak lam ihsin nitlaknak lam tiang cu Issakar hrang, covo pakhat. 26 Issakar thawn ri-awin nisuahnak lam ihsin nitlaknak lam tiang cu Zebulun hrang, covo pakhat. 27 Zubulun thawn ri-awin nisuahnak lam ihsin nitlaknak lam tiang Gad hrang, covo pakhat. 28 Gad-ih thlang lam ramri cu Tamar ihsin Kades kiangih Meribah tidai tiang, cutawk ihsin tivate tiang, cutawk ihsin Tifinriat Tumpi tiang a si pei. 29 Hihi Israel hnámpawl lakah an ro dingih camcawhfungzuhnak hmangih ram nan zemawk ding mi cu a si, cule hipawl hi an co mipawl cu an si, Bawipa Jehovah in a ti.

Khawpi Kăwtkapawl le an Hmin

30 «Hipawl hi khawpi suahnakpawl cu an si: dawng 4500 sau sak lamah kăwtka pathum 31 (khawpi kăwtkapawl cu Israel hnámpawlih hmin pek an si), sak lamih kăwtka pathum pawl cu Reuben kăwtka, Judah kăwtka le Levi kăwtka an si. 32 Dawng 4500 sau nisuahnak lamah kăwtka pathum a um: Joseph kăwtka, Benjamin kăwtka le Dân kăwtka. 33 Dawng 4500 sau nitlaknak lamah kăwtka pathum a um: Simeon kăwtka, Issakar kăwtka le Zebulun kăwtka. 34 Dawng 4500 sau nitlaknak lamah kăwtka pathum a um: Gad kăwtka, Asher kăwtka le Naftali kăwtka. 35 Khawpi kimvel cu dawng 18000 a si pei ih, cuih ni thăwkin khawpi hmin cu: CU TAWKAH JEHOVAH A UM, ti a si thlang ding,» tiin.