About Bible Thianghlim | ©

BibleThianghlim – EFESA

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

EFESA

  • A ngantu: Paul
  • A siartu: Efesa khua ih zumtupawl
  • Ngan kum: A.D. 60

Paul cu a missionary khualtlawn a vei hnihnak ah Antiok lamih a kir phahah cān rei lo te sung Efesa khua a pál (Apo 18:19-20). Nehhnu ah rawngbawlnak hlawhtling zet neiin kum thum sung a ra umsal (Apo 19). A missionary khualtlawn a vei thumnak cem lamah Jerusalem ih a kir phahah Efesa elder-pawl a táwng hai (Apo 20:17-38). Paul in Rom khawpi ih a hmaisa thawng a tlak laiah, a rak dĭn zo mi kawhhranpawl hnenah ca a kuat. Pakhat cu Efesa kawhhran hnenah a kuat.

Efesa cu Rom uknak hnuaiih um, Asia ramṭhen sungih khawpi thupi a si, Asia Minor ih sumdawnnak hmunpi le năwmcēnnak le milem biaknak hmunpi a si.

Zumlotupawl in pathian tampi an rak bia. An khawzingnu Diana hi an biaknaksakhua ih langsarbik a si. Paul ih sim mi Khrih thu in Diana biaknaksakhua a hnînter. Cumi in dokalhnak nasazet a suakter (Apo 19:23-41).

Hih cakuat hi Paul in milem biaknak hmunpi ah Khrih hrangih nung dingin Efesa khua ih zumtupawl thapeknak hrangah A.D. 60 hrawngih a kuat mi a si. Hi cakuat hi ṭhen hnih ih ṭhen theih a si. Khrih ih um ti mi umzia hi Paul in bung 1-3 ah a simfiang. Bung 4-6 ah zumtu in ziangti vekin Khrih ih kawh kan sinak milih kan nundān ding thu in sim.

Kannih zumtu in Khrih hrangih kan nun tikah, ropitnak cu «Khrih Jesu ruangah san hmuahhmuah ah, kumkhuaih kumkhua tiangin kawhhran ah um seh» (3:21) ti mi cu Pathian in a co ding.

Thuhlawm Ṭhen

  • I. Thuhmaihruai (1:1-2)
  • II. Khrih ih um ti cu ziang a si (1:3-3:21)
  • III. Khrih ih um a sinak milin ziangtin zumtu a nung ding (4:1-6:9)
  • IV. Zumtu in thlarau lam doawknak ah ziangtin a neh (6:10-20)
  • V. Thukharnak (6:21-24)

1

Cibaibûknak

1 Pathian duhzawngih Jesu Khrih-ih apostol a si mi Paul in,

Khrih Jesu ih mirinum, Efesa khua ih mithiangpawl hnenah:

2 Pathian, kan Pa le Bawi Jesu Khrih hnen ihsin zangfahnak le hnangamdaihnak nan hnenah um seh.

Khrih ah Thlarau lam Malsawmnak

3 Kan Bawipa Jesu Khrih-ih Pathian le Pa cu thangṭhatin um seh, anih cun van hmunpawl ah thlarau lam malsawmnak hmuahhmuah thawn Khrih ah mal in sawm. 4 Cutivek thothoin, Pathian in leilung hram a bŭn hlanin duhdawtnak ruangah, amai hmaika-ih thianghlim le sawisel ding um lo kan si theinak dingah, Khrih ah in rak hril zo. 5 Pa Pathian in amai duhdān amai lunghmui zawng bangtukin, Jesu Khrih in amai hnen rori ah fa si dingin in rak ruat. 6 A zangfahnak ropi kan thangṭhat theinak dingah cutivekin a tuah a si. Cuih zangfahnak cu a Duhdawt Mi ah cun a lakin in rak pe.

7 A zangfahnak a luanliam bangtukin amah ah a thisen zarah sualpawl ngaidamnak, tlennak kan nei. 8 Cuih zangfahnak cu fimnak hmuahhmuah le theihthiamnak hmuahhmuah thawn Pa Pathian in khatliamin in vur a si. 9 A lunghmui zawng zulhih amah ih a thil ti tum, a duhnak thuthup cu kan hnenah in theihter zo. 10 Cumi cu famkimnak cānbikhiah ṭhen a thlen tikah, Khrih ah cun thil ziangkim, van ih thil um mipawl le leitlun ih thil um mipawl hmunkhatih a hruaikhawm theinak dingah a si. 11 Amai tumtahnak in a rak remruat cia ruangah Khrih ah roconak khal kan rak ngah a si, anih cu thil ziangkim amai duhdān vekih tuahsuaktu a si. 12 Cutin Khrih parih ruahsannak a rak nei hmaisatu kannihpawl hi mi in a ropitzia an thangṭhatnak kan rak si ding.

13 Nannih khal in thutak kamsuakthu nan rundamnak thuthangṭha hna ih nan rak theih tikah, Khrih cu nan zum. Amah nan zum hnuah Pathian in tiamkam mi Thlarau Thianghlim in tacik a lo khĕn. 14 Pathian in a lei ih, a neih mipawl a tlen lai hlanlo, Thlarau Thianghlim hi kan co ding mi ro amahkhānnak a si, cucun Pathian ropitzia thangṭhat ko in tuah.

Lungawi Thu Sim le Thlacam

15 Curuangah kei khal in, Bawi Jesu nan zumnak le mithiangpawl hmuahhmuah nan duhdawtzia ka thei. 16 Cumi ruangah ka thlacamnak ah ka lo máng ih, nan hrangih lungawi thu sim ka bang lo. 17 Kan Bawipa Jesu Khrih-ih Pathian, ropitnak Pa cun amah thei dingah, Thlarau fimnak le phuanlăngnak lo pe hram seh. 18 A lo kawhnak ruahsannak le a ro khatliam ropitzia cu ziang a si ti mithiangpawl lakih nan theih theinak dingah, nan theihthiamnak mit cu vanter si hram seh. 19 Cule a huham nasazetih hna a ṭuan bangin kannih zumtupawl lamih a huham ropi zet cu nan theih theinak ding hrang khalah thla ka cam. 20 Cuih huham hmangin Pathian cun Khrih ah a ṭuan ih anih cu mithi lak ihsin a kaitho, cule van hmunpawl ah a vawrh lamah a toter. 21 Anih cu Pathian in uktu hmuahhmuah le thuneitu hmuahhmuah siseh, huham hmuahhmuah le lalnak hmuahhmuah le tuih san lawng si loin, a ra thleng lai ding mi san khalih hmin sak mi hmuahhmuah ih hmin tlun sângpi ah a toter.

22 Cule Pathian in thil ziangkim cu Khrih-ih ke thuaiah a ret ih, kawhhran hrangah thil ziangkim tlunih lu si dingah Pathian in a ruat. 23 Cuih kawhhran cu a taksaruangpum a si ih, ziangkimih ziangkim tlamtlingtertu amai famkimnak cu a si.

2

Thihnak ihsin Nunnak Ah

1 Cule nannih mawhsualnakpawl le sualpawl ih thi zo mi kha a lo nungter zo. 2 Cupawl ah cun kha laiah khan, nannih cu hi khawvel dān vekin, boruak ih thuneihnak lal, atu ih thulunglo fātepawl lakih hna a ṭuan rero tu thlarau duhzawngin nan rak nung. 3 Cupawl lakah kannih khal kan zaten a liam cia mi cān ah kan tisa câkhiarnak tuahin, tisa le lungthin câkhiarnak tuahin kan rak um dah ve. Cule mi dangpawl vek thotho in kan suahkeh in thinlingnak fāte kan rak si.

4 Asinan zahngainak tam zet neitu Pathian in a duhdawtnak maksak thawi in rak duhdawt ruangah, 5 mawhsualnakpawl ih thi kan rak si lai hmanah, Khrih zawngah nuntlangter kan si, zangfahnak ih rundam nan si. 6 Cule Khrih Jesu ah in kaithotlang ih, van hmunpawl ah khin in totlangter. 7 Cutin a thleng lai ding mi sanpawl ah Khrih Jesu thawngin kanmah lamih a ngilneihnak in a zangfahnak lĕn natsatzia a lăngter theinak dingah a si. 8 Ziangahtile zangfahnak in zumnak thawngih rundam nan si, cucu nanmah ihsi suak a si lo, Pathian thilpek a si. 9 Ṭuannak ruangah a si lo, cuti a si lo ahcun, mi an tluangkhâwng pang ding. 10 Ziangahtile kannih cu amai kutsuak, hna ṭhapawl ṭuan dingih Khrih Jesu ih sersiam mi kan si, cuih hna ṭhapawl cu kan tuah dingah Pathian in a hlankhanin a rak timtuah cia.

Khrih ah Pumkhat

11 Curuangah nannih hlanih suahkeh ihsi Zentel si cia, taksa ah kut ih serh zim tan an ti mipawl in serh zim tan lo tiih an lo kawh mi nan si ti kha cîng ringring uh. 12 Cu laiah nannih cu Khrih nei loin, Israel khua le ti ihsin khawtluang mi siin, tiamkam thukhampawl ah mikhual siin, ruahsannak nei lo le leitlun ah Pathian nei loin nan rak um. 13 Asinan atu ah cun Khrih Jesu ah hla zetih a rak um dah mi nannih cu Khrih thisen in nâite ah a lo umter.

14 Ziangahtile amah cu kan remawknak, pahnih pakhat ih tuahtu, a laiih in ṭhentu phăr ṭhiattu a si. 15 Anih cun ralawknak, Dān thupekpawl zirhawknak hmangih an peksâwngsin mi hman a taksa in a ṭhiathlo, cutin amah ah mi pahnih cu minung thar pakhat ah tuahin remawknak a tuah. 16 Ralawknak cu amah ah a thah zo ruangah, pahnih cu khraws ruangin Pathian ah taksaruangpum pakhat ah a remawter thei ding. 17 Cule anih cu a ra ih hla zetih um nanmahpawl hnenah le nâi teih a um mipawl hnenah remawknak thuthangṭha a sim. 18 Ziangahtile amah thawngin Thlarau pakhat hmangin Pa hnenih luh theinak kan nei veve.

19 Curuangah mikhual le ram dang mi nan si nawn lo ih, mithiangpawl thawi ram khat mi le Pathian sungkua sungtel nan si sawn a si. 20 Ṭohram a si mi apostolpawl le profetpawl parih sak mi nan si ih, Jesu Khrih amah rori cu a kilih lung pawimawhbik ah a cang. 21 Amah ah cun sak mi inn pumpi cu rem zetih buntlang thluh a si ih, Bawipa ah temple thianghlim si dingin a ṭhang vivo. 22 Nannih khal amah ah Thlarau in Pathian cēnnak hmun dingah sakkhawm mi nan si.

3

Paul cu Zentelpawl hnenih Thusimtu a Si

1 Himi ruangah keimah, Paul hi nannih Zentelpawl hrangah Khrih Jesu ih thawngtla ka si.

2 Pathian zangfahnak kilkhawi hna cu nan hlawknak ding hrangah pek ka si kha nan rak thei zo. 3 Hi hlanah tawiteih ka rak ngan zo vek khan, thuthup cu phuansuahnak in ka hnenah i theihter zo. 4 Cumi nan siar tikah, Khrih thuthup ka theihzia nan theithiam ding. 5 Cumi cu atu ih amai apostol thianghlimpawl le profetpawl hnenih Thlarau in a phuanlăng vekin, san dangdangpawl ah minung fapapawl hnenah theihter a rak si lo. 6 Cumi cu thuthangṭha ruangah Khrih Jesu ah Zentelpawl ro copitu an si ding le taksaruangpum bangrep le a thutiam copitu an sinak ding hi a si. 7 A huham hnaṭuan hmual nei zetin ka hnenih pek a si mi Pathian zangfahnak thilpek vekin, cuih thuthangṭha rawngbawltu ah ka cang.

8 Mithiang hmuahhmuah lakih a tebik hnakih tesawn keimah hnenah hawlsuah băn rual lo Khrih-ih lennak cu Zentelpawl hnenih ka phuan theinak dingah, hi zangfahnak hi ka hnenih pek a si. 9 Cule Jesu Khrih hmangih thil ziangkim sersiamtu Pathian hnenih leilung sēmtir ihsin thuhih a um mi ṭawmawknak thuthup cu mi hmuahhmuah hmuter dingin, cuih zangfahnak cu in pe. 10 Van hmunpawl ih uktupawl le thuneitupawl hnenah atu ah kawhhran hmangin Pathian fimnak tinkim theihter a si theinak ding khalah a si fawn. 11 Cumi cu Pa Pathian in Khrih Jesu kan Bawipa ah a rak hlensuah mi a kumkhaw thil tum vek khan a si. 12 Amah ah ralṭhatnak le ngăm zetih luh theinak cu amah zumnak ruangin kan nei. 13 Curuangah nan hrangih ka harsatnakpawl ah nan beidawng lo dingin ka lo ngen, cuih harsat tuarnak cu nan sunlawinak a si.

14 Himi ruangah kan Bawipa Jesu Khrih-ih Pa hnenah ka khuk ka bil ṭheu. 15 Van le leitlun ih sungkua hmuahhmuah cu amai hmin sak mi an si. 16 A Thlarau hmangih a thiltitheinak ih nan sung lam minung cahternak cu a ropitnak lendān zulhih lo pe dingin thla ka cam. 17 Cule zumnak in Khrih cu nan thinlung sungih a cēn theinak ding hrang khalah thla ka cam; nannih cu duhdawtnak ih hram bŭn mi le phunhngeh mi nan si, 18 cutin mithiangpawl hmuahhmuah thawn theih băn rual lo Khrih duhdawtnak kauhzia, sauzia, thûkzia le sanzia cu ziang a si ti nan theithiam thei ding. 19 Cuih theih băn rual lo Khrih-ih duhdawtnak thei dingin, Pathian famkimnak hmuahhmuah thawi khahter nan si ding.

20 Kanmah ih hnaṭuan ṭheu a huham zulhin, kan dil le kan ruah mi hmuahhmuah hnakih nasasawnih titheitu hnenah, 21 ropitnak cu a hnenah Khrih Jesu ruangah san hmuahhmuah ah, kumkhuaih kumkhua tiangin kawhhran ah um seh. Amen.

4

Khrih Taksa ih Pumkhatnak

1 Curuangah kei, Bawipaih thawngtla hin, kawh nan sinak milih nung dingah ka lo ngen a si. 2 Phahniamawknak le zaidamnak hmuahhmuah thawn, thinsaunak thawn, duhdawtnak in pakhat le pakhat zāwi aw uh. 3 Remnak ih ṭemkhawmin Thlarau ih pumkhatnak kaihhngeh ding nasazetin zuam uh. 4 Kawh nan sinak ah ruahsannak pakhat ih kawh nan si bangin, taksaruangpum pakhat le Thlarau pakhat, 5 Bawi pakhat, zumnak pakhat le baptisma pakhat a um ih, 6 ziangkim tlunih um, ziangkim fángsuaktu le nan zate sungih um, mi hmuahhmuah ih Pa le Pathian pakhat lawng a um.

Thlarau Thilpekpawl

7 Sikhalsehla Khrih-ih thilpek tahdān bangtukin zangfahnak cu kanmah bulpak hnen cio ah pek a si. 8 Curuangah anih in,

«Tlunsang ih a kaisoh ah khan
Sáltāngpawl cu sál ah a hruai ih
Thilpekpawl minung hnenah a pe,»

tiah a ti.

9 «A kaiso,» ti hi ziang a tinak a si? Lei hmun hnuai lam khalah a vung suk hmaisa tinak a si. 10 Thil hmuahhmuah a famkimter theinak dingah, a sukthlatu kha vanpawl hmuahhmuah tlun khalih kaisotu thotho kha a si.

11 Cule anih in mi hrekkhat cu apostol sinak, mi hrekkhat cu profet sinak, mi hrekkhat cu evangelist sinak, mi hrekkhat cu pastor le zirhtu sinak a pe. 12 Rawngbawlhna ṭuansuahnak hrangih mithiangpawl pitlinternak dingah le Khrih taksaruangpum tuahṭhatnak dingah a si. 13 Cumi cu kan zaten zumnak le Pathian Fapa theihnak ah kan lung a rual ih, Khrih-ih famkimnak ruangam tahnak ah mipitling kan si tiang hrangah a si.

14 Cuticun minungpawlih bumawknak le fimhrăwkhrawlnak in minungpawl bum tahratih, hruaipen tumtupawlih zirhnak thli hrang kip in khat lam le khat lamih a hranpet rero mi nauhak kan si nawn lo ding. 15 Cuhnakin duhdawtnak in thutak cu phuangin, lu a si mi Khrih ah thil ziangkim ah kan ṭhanglian thei sawn ding. 16 Amah Khrih hnen ihsin taksaruangpum zaten rem zetih pehzăwmawin an kaikhawmawtlang. Taksaruangpum pêng kip in anmai hna fingfing ṭha zetin an ṭuan, cutin hlikhlăwk kip in taksaruangpi cu a kaikhawmtlang ṭheh. Curuangah taksaruangpi cu duhdawtnak ah amah ten a ṭhang ih, a tuahṭhaaw.

Tleu Fāte vekih Nun

17 Curuangah himi hi ka sim ih Bawipa ah ka theihter a si, lungthin mumallo pu, Zentel dangpawl nundān vekin nung nawn hlah uh. 18 Cupawl cu an thinlung mit a câwt ruangah le anmah ih um theihlonak ruangah an theihthiamnak cu a thim ih, Pathian nunnak ihsin ṭhenhranin an um. 19 Cupawl cun zianghman pawisak nei loin, anmai duhdān dān in an nung ih, thil bawrhhlawh tinkim duham zetih tuah dingin anmah te fihnungza hursualtuahnak ah an peaw.

20 Asinan Khrih thu zirh nan sidān cu cutivek a si lo. 21 Jesu ah thutak a um vekin hna in a thu nan rak thei ih amah ih zirh zo mi nan si taktak ahcun, 22 bum câknak zulhih a se thluh mi nan hlanlai umdān minung hlun cu hlîtthla uh. 23 Cule nan khawruahnak thlarau tharter uh. 24 Dingfelnak le thianhlimnak diktakih Pathian in amah vekih a sersiam mi minung thar cu hruk uh.

Thlarau Thianghlim Thinnater Hlah Uh

25 Curuangah thuphan sim bansanin, «Mi kip in anmai innhnen thawn thudik rel hai seh,» ziangahtile kannih cu pakhat le pakhat taksa pêngtăwnaw kan si.

26 «Nan thinheng uhla, sual tuah hlah uh:» nan thinlingnak cu ni in tlakpi hlah seh. 27 Diabol hmun kian fawn hlah uh. 28 Rûkrûkhmang cun ru nawn hlah seh, cuhnakin mitlasam hnenih pek ding a neih theinak dingah a kut in thil ṭha tuahin hna ṭuan sawn seh.

29 Zohman in nan kâ ihsin ṭawng sia suakter hlah uh, a theitupawl hnenih zangfahnak pe theitu ding, tuahṭhatawknak dingih ṭul mi suak sawn seh. 30 Cule Pathian Thlarau Thianghlim thinnater hlah uh, tlennak ni hrangah nannih cu cuih Pathian Thlarau Thianghlim-ih tacik khĕn nan si. 31 Siatkhâtnak, thinlingnak, thinhengnak, aukionak, mi relsiatnak hmuahhmuah cu nan hnen ihsin hlăwnhlo uh, lungput siava hmuahhmuah thawn. 32 Cule pakhat le pakhat parah ngilneiin lainatnak neităwn uh. Khrih ruangah Pathian in a lo ngaidam bangin, pakhat le pakhat ngaidam awtăwn uh.

5

Duhdawtnak ih Feh

1 Curuangah duhdawt zet mi fale vekin, Pathian tidān cawngtu si uh. 2 Cule Khrih khal in in rak duhdaw ih rimhmui si dingah Pathian hnenah amah le amah thilhlăn ah le thawiawknak ih a pekawk vekin, duhdawtnak ah um uh.

3 Asinan nunau-mipa sualnak le bawrhhlawhnak hmuahhmuah, asilole duhhamnakpawl cu nan lakah um hrimhrim hlah seh, cupawl cu mithiangpawl ih ti dingah a mawi lo. 4 Ti ding mawi lo mi thil bawrhhlawhpawl, thu atthlak relnakpawl le capoh thu relnakpawl cu um hlah seh, cuhnakin lungawi thu sim sawn uh. 5 Ziangahtile nunau-mipa sualnak tuahtu siseh, mibawrhhlawh siseh, belem betu a si mi miduhham siseh, hipawl in Khrih le Pathian uknak ram ah ro zianghman an nei lo ti nan thei. 6 Zohman in zianghmanlo ṭawngkam menmenin lo bum hlah hai seh, ziangahtile hi thilpawl ruangah Pathian thinlingnak cu thulung lo fātepawl parah a thleng ṭheu. 7 Curuangah an hnenih teltu va si hlah uh.

Tleu ih Feh

8 Ziangahtile a hlanah nannih cu thim nan rak si dah, asinan atu ah cun Bawipa ah tleu nan si. Tleu fāte vekin nung uh. 9 Ziangahtile Thlarau rah cu ṭhatnak hmuahhmuah, dingfelnak hmuahhmuah le thutak hmuahhmuah pawl ah a um a si. 10 Bawipaih cohlantlak cu ziang a si ti theihfiang zuam uh. 11 Cule rah nei lo mi thim thil ti a tuahtupawl thawn pawlkawm aw hlah uh, cuhnakin an diklozia theifiangter sawn uh. 12 Ziangahtile annih ih a thuptei an tuah mi thilpawl cu rel men ding hman ningzakza a si. 13 Asinan thil ziangkim tleu ih a theihfiangter mipawl cu an langfiang a si, ziangahtile thil ziangkhal langfiang ko a tuahtu cu tleu a si. 14 Curuangah,

«Nang itthat ṭhang aw,
Mithi lak ihsin tho aw,
Cule Khrih in tleu a lo pe ding,»

tiah a ti.

Fimnak ih Feh

15 Curuangah mi-âpawl vekin nung loin, mifimpawl vekin fimkhurten nung uh. 16 Nitla an ṭhat lo ruangah, a ṭha thei bikin nan cān hmang uh.

17 Curuangah â hlah uh, Bawipaih duh zawng ziang a si ti theithiam sawn uh. 18 Cule sabitzu ri hlah uh, ziangahtile cumi cun pawisaklonak ah mi a hruai; Thlarau in khat sawn uh. 19 Sam hlapawl, thangṭhatnak hlapawl le thlarau lam hlapawl in be awtăwn uhla, Bawipa hnenah hla sak le nan thinlung sungten hla sehin um uh. 20 Thil ziangkim ruangah Pa a si mi Pathian hnenah kan Bawipa Jesu Khrih hmin in lungawi thu sim ringring uh. 21 Pathian nan ṭihzah ruangah pakhat le pakhat tlulut awtăwn uh.

Nupipawl le Pasalpawl

22 Nupipawl, Bawipa hnenih nan tlukluh vekin, nanmai pasal hnenah tlulut uh. 23 Ziangahtile Khrih cu kawhhran lu a si bangin, pasal khal nupi-ih lu a si ih, Khrih cu taksaruangpum Rundamtu a si. 24 Curuangah kawhhran cu Khrih hnenih a tlukluh vekin, nupipawl cu ziangkim ah anmai pasal hnenah tlulut hai seh.

25 Pasalpawl, Khrih khal in kawhhran a rak duhdaw ih, cumi hrangih amah rori a pekawk bangin, nan nupi duhdaw uh. 26 Cutin kawhhran cu ti thawi khawlh vekin kamsuakthu hmangin Khrih cun a thianghlimterin a faiter a si. 27 Cutin kawhhran ropi cu bāl kai lo, sawngkâwr lo le cuvek thil zianghman pu loin amai hnenih a hlăn theinak dingah, kawhhran cu thianghlim le sawisel ding um lo a si theinak dingah a khawlhfai a si. 28 Cuvekin mipapawl in an nupi cu anmai taksaruangpum vek rori ih duhdaw ding an si. A nupi a duhdawtu cu amah le amah a duhdawaw a si. 29 Ziangahtile zohman in amai taksa a hua dah lo, cuhnakin Bawipa in kawhhran a câwm ih a duat bangin a taksa cu a câwm ih a duat sawn a si. 30 Ziangahtile kannih cu Khrih-ih taksaruangpum, a titsa le a ruh pawlih pêng kan si. 31 «Ziangahtile himi thu ruangah mipa in a nu le a pa a fehsan ding ih, a nupi a kăwp ding. Cule pahnih cu taksa pumkhat ah an cang ding,» tiih ngan a si.

32 Hihi thuthup ropi a si, Khrih le kawhhran thuhla ka sim sawn a si. 33 Ziangkhal va si sehla, nanmah lakah mi pakhat khat in amah le amah a duhdawtawk bangin a nupi duhdaw seh, cule nupi khal in a pasal upat seh.

6

Nu le Pa le Fāte

1 Falepawl, Bawipa ah nan nu le nan paih thulung uh, ziangahtile cucu thildik a si. 2 «Na nu le na pa upat aw,» cumi cu thutiamkamnak thawi thupek hmaisabik a si. 3 «Cumi cu na ṭhatnak ding le leitlun ih na dam reinak ding hrangah a si.»

4 Cule nannih palepawl, nan fātepawl thinling dingin tuah hlah uh, cuhnakin Bawipaih nun zirhnak le nunsimnak ah anmah cu kaihruai sawn uh.

Sálpawl le an Bawipawl

5 Sálpawl, Khrih-ih thu nan lun bangin, ṭih le khūrin le thinlung takin, minung dān ih nan bawipawl hnenah thulung mi si uh. 6 An lo zoh lai lawngah an lunghmuiter tum loin, Khrih-ih ṭemṭawn sál nan si vekin nan thinlung ihsin Pathian duh zawng tuah sawn uh. 7 Duhsaknak ṭha thawn minung hnenah si loin, Bawipa hnenih hnaṭuan vekin ṭuan uh. 8 Sál siseh, miluat siseh zokhal thil ṭha a tuahtu cun Bawipa hnen ihsin cumi vek cu a ngahsal ding ti nan thei.

9 Cule nannih bawipawl, cutivek thothoin an parah tuah uh. Nannih ih Bawi khal van ah a um ti le anih in mi thleidăn a nei lo ti theiin annih cu hro hlah uh.

Pathian Ralthuam

10 A netabikah ka u le ka nau tla, Bawipa ah le a cahnak ih thiltitheinak ah cak zetin um uh. 11 Diabol-ih phiarthupnakpawl cu doin nan din theinak dingah, Pathian ralthuam hruk uh. 12 Ziangahtile kan buan mi hi titsa le thisen an si lo, uktupawl, thuneitupawl, hi khawvel thim tlunih uktupawl le van hmunpawl ih thlarau sualrálpawl an si sawn. 13 Curuangah ni ṭhalo ni ih nan khamawk theinak dingah le ziangkim nan tuah hnu khalih nan din theinak dingah, Pathian ralthuam cu la uh. 14 Curuangah dinghnget uh, nan tâi cu thutak in khap uhla, dingfelnak awmphaw hruk uh. 15 Cule remnak thuthangṭha timlamnak cu nan ke ah bŭn uh. 16 Cupawl hmuahhmuah tlunah, zumnak ralphaw la uhla, cumi cun misualrálpa ih kah mi thálfung alh hmuahhmuah nan mitter thei ding. 17 Cule rundamnak thir lukhum le Thlarau ralnâm a si mi Pathian kamsuakthu la uh. 18 Thlacamnak tinkim le dilnak tinkim in ziang tik lai khalah Thlarau ah thlacam uh. Cun mithiangpawl hmuahhmuah hrangah taimaknak hmuahhmuah le dilnak hmuahhmuah thawn ngaihven uh. 19 Cule ka kâ ka ān tikah, phuan ding mi thu ka hnenah pek a si ih, cutin ralṭha zetin thuthangṭha thuthup ka theihter theinak ding hrang khalah in dilsak uh. 20 Kei cu thuthangṭha ruangah cikcin ih ṭawn mi aiawh palai ka si. Ka sim ding vekih ralṭha zetih ka sim theinak dingah thla in camsak uh.

Cibaibûknak Neta

21 Asinan nannih khal in ziangtin ka um ti ka thuhla nan theih theinak dingah, Bawipa ah duhdawt zet mi unau le rawngbawltu rinum Ṭaikikas in thil ziangkim a lo theihter ding. 22 Himi hrangah kan thuhla nan theih theinak dingah le nan thinlung a lo thlangăm theinak dingah, amah hi nan hnenah ka rak thlah a si.

23 Pa Pathian le Bawi Jesu Khrih hnen ihsin hnangamdaihnak le zumnak thawi duhdawtnak cu unaupawl hnenah um hram seh. 24 Kan Bawipa Jesu Khrih catbang loih duhdaw taktaktu hmuahhmuah hnenah zangfahnak um hram seh. Amen.