About Bible Thianghlim | ©

BibleThianghlim – JAMES

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

JAMES

  • A ngantu: James
  • A siartu: Jew zumtupawl
  • Ngan kum: A.D. 45-48

Thuthangṭha cu Jerusalem ih Jew-pawl lakah hmakhatteah a rak hlawhtling. Pentekos ni ah Jew-mi 3000 hrawng kawhhran ah bêt an si ti Apo 2 in a tarlang. Zum lo tu Jew hotupawl in dungthluntupawl an tiduhdah rero nân, cuih khawpi ah kawhhran a karh vivo thotho. Stefen an thah hnuin Jerusalem kawhhran ih zumtupawl hmuahhmuah in an zumnak ruangah tuar an thăwk. Cuih tiduhdahnak in Judia peng pumpi le Samaria peng pumpi ah a ṭekdarhter hai (Apo 8:1). Hitivek dinhmun lakah James in hmun kip ih a vakdarh mi Jew-mi zumtupawl thapeknak ah hi cakuat hi Jerusalem ihsin a rak ngan. Hi cakuat hi A. D. 45-48 hrawngih a ngan mi a si men thei.

James hi Jesu Khrih-ih nau le Judas-ih suahpi unau a si. Bawipa Jesu in leitlun ih rawng a bawl laiah James le a unaupawl in amah an rak zum lo (Joh 7:3-8). Asinan a hnen rori ih Bawipa a rung lăng ruangah, neta lamah cun James khal zumtu ah a cang (1Ko 15:7). Jesu van a kai hnuah James khal zumtu dangpawl thawn Thlarau Thianghlim rung thlen ding a rak hngak ve (Apo 1:14). Netabikah cun amah hi Jesusalem kawhhran hruaitupawl lakih pakhat ah a rung cang (Apo 12:17; Apo 15; Gal 1:19; 2:9).

Jew zumtu in Jew zumtupawl hnenih thu a zirh mi a si ruangah James in a cakuat ah Jew-pawlih thu le hla diktak a ngan hi mangbang ding a um lo.

A cangan mi hi Thukham Hlun le Jesu Tlang parih Thusim mi parih a ṭhumawkzia a lang (Mat 5-7). A zirhdan khal Jesu ih zirhdān thawn bangawknak an nei. A tahṭhimnak hman mi ah leitlun tahṭhimnakpawl: thli ih hrăn mi lăwng, a vuai rero mi hrampi, a ziam rero mi pangpar, kilkhawi theih lo meisa le thil dangpawl tla a hmang. Ni tin nun ah a takih hman ding mi fimnak thupawl a telh ruangah a cabu hi Thufim cabu thaw khal in bangawknak a nei. Khristian pakhat ih zumnak cu ni tin nun ih lang ding mi a si. James in harsatnak le tukfawrhnak thu (bung 1), unau duhdawtnak (bung 2), thil ti ṭha (bung 2), lei ukdān (bung 3), khawvel mi sinak (bung 4), lennak (bung 5) le kawhhran nun málte a zirh (bung 5).

«Thil ti tel lo zumnak» cu a thi a si (2:20). Zumtu pakhat in piantharnak a neih hnu cun a zumnak cu a thil tiṭha in a langter ṭheu.

Thuhlawm Ṭhen

  • I. Thuhmaihruai (1:1)
  • II. Zumtu cun tuarnak le sualfawrhnak a tuar thei ding a si (1:2-18)
  • III. Zumtu cun Pathian Kamsuakthu ngaithla le thlun ding a si (1:19-27)
  • IV. Zumtu cun thleidan um loin zumnak a hmang ding a si (2:1-13)
  • V. Zumtu cun a zumnak kha tuahnak in a langter ding a si (2:14-26)
  • VI. Zumtu cun a ṭawng a sūp ding a si (3:1-12)
  • VII. Zumtu cun a nun in fimnak a langter ding a si (3:13-18)
  • VIII. Zumtu cun a nun ihsin khawvelnak a hlăwnhlo ding a si (4:1-10)
  • IX. Zumtu cun a zumtupi thu a ṭhen ding a si lo (4:11-12)
  • X. Zumtu cun a nun hrangih a khawkhan mi Pathian hnenah a ap ding a si (4:13-17)
  • XI. Milian zumtu cun lennak a rinsan ding a si lo (5:1-6)
  • XI. Zumtu cun Bawipa ratsalnak hrangah a thin a sau ding a si (5:7-11)
  • XII. Zumtu cun bulpak felfainak a nei ding a si (5:12)
  • XIII. Zumtu cun mi dang hrangah thla a cam ding a si (5:13-18).
  • XIV. Zumtu cun zumtu dang kha thutak ah a hruaikirsal ding a si (5:19-20)

1

1 Pathian le Bawi Jesu Khrih-ih ṭemṭawn sál a si mi, James in, hmun dangdangih a ṭekdarh mi, Israel hnám hleihnih pawl kha cibai ka lo bûk.

Hniksaknak le Zumnak

2 Ka u le nau tla, hniksaknak a phunphun nan tawn tikah aipuannak hlirah ruat uh. 3 Ziangahtile nan zumnak hniksaknak cun tuarfainak a suah ti nan thei. 4 Asinan nan pitlin ih, nan famkim thluh theinak dingah tuarfainak cun ṭuan famkim sehla, cuticun zianghman nan tlasam lo ding. 5 Nan lakah zokhal in fimnak a tlaksăm asile, mi hmuahhmuah hnenih siang zet le mi mawhthluk loih pe ṭheu tu Pathian hnenah dil seh, cule anih cu pek a si ding. 6 Asinan ringhlel loin, zumnak in dil seh, ziangahtile a ringhleltu cu thli in tifinriat suar suk le so ih a hrăn mi vek a si. 7 Curuangah cuvek mi cun Bawipa hnen ihsin thil zianghman ka ngah ding tiah ruat hlah seh. 8 Thinlung phir a neitu cu a nun lamzin tluan hmuahhmuah ah a hnget lo.

9 Dinhmun niam unaupa cu cawisan a si tikah tluangkhâwng seh. 10 Asinan milianpa cu a dinhmun niamter a si tikah, lungawi seh, ziangahtile hrampi par bangin amah cu a ziamrál ding a si. 11 Ziangahtile ni a suak ih a săt tikah ni cun hrampi cu a vuaiter ih a par an ṭil, cule a mawinak a hlorálter. Cuvekin milian cu a lamzin tluanah a ziamrál ding.

12 Hniksaknak a tuar ṭenṭotu cu mithlawsuak a si. A tuar ṭenṭo ruangah nunnak lallukhum a co ding, cuih lallukhum cu Bawipa in amah duhdawtupawl hnenih pe dingih a tiamkam mi a si.

13 Mi pakhat khat in sualfawrhnak a tawn tikah, «Pathian in sual i fawrh,» ti hlah seh; ziangahtile Pathian cu thil ṭhalo thawi sualfawrh theih a si lo ih, mi zohman sual a fawrh fawn lo. 14 Cuhnakin mi kip sualfawrhnak cu hitin a si sawn: anmai câkhiarnak in a hruaihlo hai ih, cutin ziang in simaw a hip hai. 15 Cun câkhiarnak in fa a vun hnuah, sual a hring; cuih sual cu a pitlin tikah, thihnak a hring.

16 Ka duhdawt mi u le nau tla, bumin um hlah uh. 17 A ṭha mi thilpek hmuahhmuah le thilpek famkim hmuahhmuah cu tlun lam ihsin an si ih, tleupawlih Pa hnen ihsi ra an si. Amah ah thlengdanglamawknak hrimhrim le thlengdanglamawknak thlâm khal a um lo. 18 A sersiam mipawl lakih rah hmaisabik vek kan si theinak dingah, Pathian in amai duhzawngin thutak kamsuakthu in in hring a si.

Thu Theihnak le Tuahnak

19 Curuangah ka duhdawt mi u le nau tla, mi kip in ngaithla dingah zamrang mi si uhla, ṭawng dingah le thinling dingah cun khulfûng mi si uh. 20 Ziangahtile minung thinlingnak in Pathian dingfelnak a hringsuak lo. 21 Curuangah bawrhhlawhnak hmuahhmuah le sualralnak a khatliam mi cu hlăwn uhla, nan thlarau a lo rundam theitu phŭn mi kamsuakthu cu nunnemnak thawn cohlang uh.

22 Mah le mah bumawin, kamsuakthu ngaithlatu men lawng si loin, a tuahtu si sawn uh. 23 Ziangahtile mi zokhal tuahtu si loih kamsuakthu a ngai mentu cu thlalang ih a suahkeh hmel zohawtu vek a si. 24 Ziangahtile amah le amah a zohaw ih, a fehsal, cule hmakhatteah ziang vek mi a si ti a hngilh. 25 Asinan zalĕnnak dān famkim cu zohin, cumi ih umpeh vivo in, a thu ngai mi hngilhsal mentu si loin a tuahtu a si ahcun, cu pa cu a thil tuah mi ah mithlawsuak a si ding.

26 Nan lakah mi pakhat in biaknaksakhua lamih zuamaw zetah a ruataw nân, a lei kilṭha loin, amai thinlung a bum sawn asile, cu paih biaknaksakhua cu zianghmanlo men a si. 27 Pathian le Pa hmaika-ih biaknaksakhua thiang le bawrhhlawh lo cu, nu le pa nei lo le nuhmeipawl an buai cān ih veh le khawvel mi sinak lak ihsin sawisel ding um loih mah le mah kilkhawiawk hi a si.

2

Mi Thleidăn Neih

1 Ka u le nau tla, ropitnak Lal, kan Bawipa Jesu Khrih nan zumnak ah, mi thleidăn nei hlah uh. 2 Ziangahtile nan punkhawmnak ah mi pakhat sui zunghruk hrukin, hnipuan ṭha zet thawn rung lut sehla, cule mifarah hnipuan se ṭiapṭi thawn rung lut ve sehla, 3 hnipuan ṭha hruktu cu nan upat ih, a hnenah, «Nang hitawk ih hmun ṭha ah hin to aw,» nan ti ih, cuih mifarah hnenah, «Nang cu khi tawkah khin ding aw,» tiin simaw, «Ka keretnak ah to aw,» tiin simaw nan ti a si ahcun, 4 nanmah le nanmah lakah thleidănawknak neiin, khawruahnak ṭhalo hmangih thuṭhentu ah nan cang lo ding maw?

5 Ka duhdawt mi u le nau tla, ngai hnik uh, Pathian in hi leitlun ih mifarahpawl hi zumnak ih milian ah le amah duhdawtupawl hnenih a tiamkam mi Pathian uknak ro cotu ah a hril a si lo maw? 6 Asinan nannih in mifarahpawl nan hmuhsuam. Milianpawl cun an lo palbĕt ih, thuṭhennak ah an lo dir ṭheu a si lo maw? 7 Kawh nan sinak hmin zahum cu an thangsiat a si lo maw?

8 Cathianghlim bangtukin, «Nangmah le nangmah na duhdawtawk vekin, na innhnen na duhdaw pei,» a ti mi siangpahrang dān nan thlun famkim asile, nan tiṭha a si. 9 Asinan mi thleidăn nan neih ah cun, sual nan tuah ih Dān cun dānpahbăltu ah a lo phuang a si. 10 Ziangahtile zokhal Dān thlun thluhin pakhat te a pahbăltu cu a zate parih mawhsualnak neiah a cang. 11 Ziangahtile, «Uire hlah,» titu cun, «Laithat hlah,» ti khal a ti thotho. Atu ah na uire lo khal asile, mi na thah a si ahcun, nang cu Dān pahbăltu ah na cang.

12 Curuangah zalĕnnak dān ih thuṭhen ding mi vekin ṭawng uhla, tuah uh. 13 Ziangahtile zahngainak langter dah lo tu parah zahngainak tel loin thuṭhensak a si ding. Zahngainak in thuṭhennak cu a neh.

Zumnak le Tuahnak

14 Ka u le nau tla, mi pakhat in zumnak ka nei ti khal sehla thil ti a neih lo ah cun, ziang a ṭhahnem? Cuvek zumnak cun amah a rundam thei ding maw? 15 Unaupa asilole unaunu cu taklawngih umin, a ni tin ei ding rawl nei loin um sehla, 16 nan lakih pakhat in an hnenah, «Hnangamten feh uhla, hlum le puarin um uh,» ti sehla, an taksaruangpum ṭul mi thilpawl a pek si lo ah cun, ziang a ṭhahnem? 17 Cuvek thothoin zumnak khal thil ti tel loih amah lawng a um ah cun a thi a si.

18 Asinan mi pakhat in, «Nang in zumnak na nei ih, kei in thil ti ka nei. Na zumnak cu na thil ti tel loin i hmuh awla, kei in ka zumnak cu thil ti in ka lo hmuh ding,» tiah a ti khal a si men ding. 19 Pathian pakhat a um ti na zum. Na tiṭha e. Khawsiapawl hman in an zum ih, an khūr rero!

20 Sikhalsehla Maw nang mi-â! Thil ti tel lo zumnak cu a thi a si ti theih na duh maw? 21 Kan pa Abraham in a fapa Isak, biakṭheng parih a hlăn laiah khan thil ti ruangin thiam a co a si lo maw? 22 A zumnak cu a thil tipawl thawn an ṭuantlang ih, thil tipawl ruangah zumnak cu famkimter a si ti na thei! 23 Cule Cathianghlim in, «Abraham in Pathian a zum ih, cumi cu a hrangah dingfelnak ah a siarsak,» a ti mi thu cu a tlamtling. Cun anih cu, Pathian rual tiih kawh a si. 24 Minung hi thil ti in thiam coter a sizia nan thei, zumnak lawngin a si lo.

25 Cuvek thothoin, hlawhhlâng Rahab khal kha thil ti parah ṭhumawin thiam a co a si lo maw? Palaipawl a rak cohlan hnuah, anmah cu zin dangin a rak thlah hai. 26 Ziangahtile thlarau tel lo taksaruangpum cu thi a si vekin, thil ti tel lo zumnak cu thi a si.

3

Khuahkhirh Theih Lo Lei

1 Ka u le ka nau tla, zirhtupawl in thuṭhennak nasasawn kan táwng ding ti theiin, nanmah lakih mi tampi kha zirhtu va si hlah uh. 2 Ziangahtile kan zaten thil tampi ah kan tlu ṭheu. Zokhal a ṭawngkam ih sual a tuah lo asile, anih cu mipitling a si ih, a taksaruangpum khal a thunun thei a si.

3 Ngai hnik uh, kan thu an lun theinak dingah, ráng kâ ah ráng kâkharh kan bŭn ih, cumi hmang cun an taksaruangpi cu kan herter ṭheu. 4 Lăwngpawl khal khi zoh hnik uh, an tûm zet ih, a nasazet mi thli in a fehter, lăwngpawl cu lăwng mâwngtu in a duhnak lamlam ah lăwng hlaunak fate zetin a herter. 5 Cuvek thothoin lei khal hi taksa pêng fate zet a si ih, nasazetzetin a tluangkhâwng ṭheu. Ngai hnik, meisa fatakte in ziangtluk thil tum a kāngter thei! 6 Cule lei hi meisa a si ih, siar cawk lo dingfellonak tuahtu a si. Cutivekcun kan taksa pêng lakah a cāngvai ih, kan taksaruangpi pumhlum in a bawrhhlawhter. Lei cun kan nun lam tluan a kāngter ṭheu; cuih mei cu hell ihsi ra mi a si.

7 Ziangahtile ramsa phun kip le vâte phun zakip, băwkvâk phun zakip le tifinriat sungih thilnung phun zakip pawl cu milai in ngawingam ko an tuah ih, ngam ko an rak tuah. 8 Sihmansehla lei cu zohman in an ngawingamter thei lo. Lei cu khuahkhirh theih lo thil ṭhalo, thihnak tûr thawi khat mi a si.

9 Cumi thawn kan Pathian le Pa cu kan thangṭhat ih, cumi thawn Pathian băngnak neiih tuah mi, milai kan camsiat. 10 Cuih kâ thotho ihsin thangṭhatnak le camsiatnak a suak. Ka u le ka nau tla, hih thilpawl hi cutivekih si ding a si lo. 11 Cirhtihna pakhat ihsin ti thlum le ti khâ a suaktlang maw? 12 Ka u le ka nau tla, theipi kung in olif rah a rah thei maw, asilole sabit hri in teh theipi rah a rah thei maw? Cutivekin ziang cirhti ihsi hmanin ti-ál le tithiang a suakkăwp thei lo.

Fimnak Phun Hnih

13 Nan lakah zo so mifim le theihnak neitu? Anih cun a thil tuah mipawl cu umtlandān ṭhain, fimnakih nunnemnak thawn langter seh. 14 Sihmansehla nan thinlung sungah iksiknak nasazet le ṭhenṭhekter duhnak thinlung nan neih asile, tluangkhâwng hlah uh, thutak dodalin thuphan per hlah uh. 15 Hi fimnak cu tlun lam ihsin a rung lo ih, leitlun, milai le khawsia hnen ihsin a si sawn. 16 Curuangah iksiknak le ṭhenṭhek duhnak thinlung a umnak hmun ah, buainak le thil ṭhalo phun zakip a um ṭheu.

17 Sihmansehla tlun lam ihsin a si mi fimnak cu a hmaisabikin a thianghlim, cule remnak a duh, a zaidam, mi dang hnenah a tlulut, zahngainak le rah ṭha in a khat, mi thleidăn a nei lo ih, nun deu a nei lo. 18 Cun dingfelnak rah cu remnak a tuahtupawl in remnak in an tuh a si.

4

Khawvel thawi Pawlkawmawknak

1 Nan lakih doawknakpawl le tawhawknakpawl hi khui ihsin an ra? A doaw mi nan taksa pêng lakih câkhiarnak ihsi ra suak mi an si lo maw? 2 Câkhiarnak nan nei nân, nan câkhiar mi cu nan nei lo. Lai nan that ih neih nan duh, asinan nan ngah thei lo. Nan toaw ih nan doaw. Cucingin nan nei cuang lo, ziangruangahtile nan dil lo a si. 3 Nan dil ih nan ngah lo, nan năwmcēnnak hrangih hmang dingih diklo zetih nan dil ruangah a si.

4 Nannih uire mipapawl le uire nunaupawl! Khawvel thawi rualpitawknak cu Pathian thawi ralawknak a si ti nan thei lo maw si? Curuangah zokhal khawvelih rualpi si a duhtu cu Pathian doral a si. 5 Cathianghlim in, «Kan sungih cêng Thlarau cun thîk khawp tiangin in duh a si,» a ti mi hi a lak menih sim ah maw nan ruat?

6 Sihmansehla Pathian cun zangfahnak tamsin a pe. Curuangah anih in,

«Pathian in mipuarthaupawl a dokalh,
Asinan mităngdawrpawl hnenah zangfahnak a pe,»

tiah a ti.

7 Curuangah Pathian hnenah tlulut uh. Diabol cu do uh, cule a lo tlansan ding. 8 Pathian naih uhla, anih khal in a lo naih ve ding. Nannih misualpawl, nan kut khawlhfai uh. Cule nannih thinlung phir neipawl, nan thinlung thianfai uh. 9 Lungkuaiin um uh, ninghanglungsia-in um uhla, ṭap uh! Nan hnihnak cu ninghanlungsiatnak ah cang sehla, nan aipuannak cu riahsiatnak ah cang seh. 10 Bawipaih mithmuhah hnuaidawr uh, cule anih in a lo khaisâng ding.

11 U le nau tla, pakhat le pakhat relse aw hlah uh. A unau a relsia ih a unau thu a ṭhentu cun Dān a relsia ih Dān cu thu a ṭhen a si. Dān thu na ṭhen asile, nang cu Dān thluntu si loin, Dān thuṭhentu na si sawn. 12 Dān petu pakhat a um, amah cu mi run theitu le mi siatsuah theitu a si. Mi dang thu va ṭhen dingin, nang cu zo so na si?

Thaisun hrangah Tluangkhâwng Hlah

13 Atu ah nannih, «Tuihsun ah, asilole thaisun ah cumi khami khawpi ah kan feh ding ih, cu tawkah cun kum khat kan um ding, cule kan lei ding ih kan zuar ding, cule kan hlawk ding,» a titupawl, ngai hnik uh, 14 thaisun ah ziang a cang ding ti nan thei lo. Ziangahtile nan nunnak cu ziang a si? Nan nunnak cu cān málte sung a lang ih a hlorálsal mi mero vek a si. 15 Cuhnakin, «Bawipa in rem a ti asile, kan nungdam ding ih, cumi khami kan tuah ding,» ti sawn ding nan si. 16 Asinan atu ah nannih cu duhaw zetin nan tluangkhâwng. Cuvek tluangkhawnnak hmuahhmuah cu thil ṭhalo a si. 17 Curuangah thil ṭha tuah ding thei na cingih a tuah lo ah cun, cucu a hrangah sual a si.

5

Milian Ralrin Peknak

1 Nannih milianpawl, atu ah ngai hnik uh, nan parih a thleng ding mi harsatnak nasazetpawl ruangah ṭap uhla aihram uh. 2 Nan lennakpawl cu an ṭawih ih nan sinfenpawl cu sunhrûl in a ei. 3 Nan sui le ngun pawl cu a tlâpsiat thluh zo ih, cupawlih tlâp cu nanmah lo dokalhih theihpitu a si ding ih, nan titsa cu meisa kāng bangin a ei ding. Ni neta cān hrangah hlawnthil nan rak khawlkhawm a si. 4 Ngai hnik uh, bumnak ruangah nan ló ih nan hlawhfa, fâng attupawl kha an hlawh nan pe lo. An hlawhmanpawl cu an ausuak, cule fâng attupawl ih aunak cu Ralkap rualpawlih Bawi-ih hna a thleng. 5 Leitlun ah nunnuam zetin nan nung ih nuam nan cēn, nan thinlung cu ran thah ni vekin nan rak cawmthau. 6 Midik kha thiamlo nan coter ih nan that, anih in a lo dokalh lo.

Tuarfainak

7 Curuangah u le nau tla, Bawipa a rat tiangin thinsauin um uh. Ngai hnik uh, ló ṭuantu cun thlai in ruah hmaisa le ruah neta a ngah lai hlanlo thinsau zetin a hngak ih, a hlú zet mi leilung rah cu a hngak a si. 8 Nannih khal thinsauten um uh. Bawipaih rat ding a nai ruangah nan thinlung hngetter uh.

9 U le nau tla, pakhat le pakhat phun aw hlah uh, Pathian in thiamlo a lo coter pang ding. Ngai hnik uh, Thuṭhentu cu sângka ah a ding a si! 10 Ka u le nau tla, Bawipaih hmin ih thu a simtu profetpawl cu harsat tuardān ah le tuarfaidān ah zohṭhim dingah la uh. 11 Ngai hnik uh, a tuartupawl cu mithlawsuak ah kan ruat. Job-ih tuarfainak cu hna in nan rak thei zo ih, Bawipa in a netnakah a hrangah ziang a tuahsak ti khal nan hmu zo. Bawipa cun lainatnak tam zet le zahngainak tam zet a nei.

12 Asinan ka u le nau tla, a pawimawhbik cu hihi a si: van sālin simaw, lei sālin simaw, a dang ziang sal khal in simaw, siasam hlah uh. «A si,» nan ti mi cu, «A si,» si sehla, «A si lo,» nan ti mi cu, «A si lo,» si seh. Culole thuṭhennak nan táwng pang ding.

Zumnak ih Thlacam

13 Nan lakah harsatnak tuar nan um maw? Thlacam seh. Lungawi an um maw? Sam hla sak seh. 14 Nan lakah mina an um maw? Elder-pawl ko sehla, Bawipaih hmin in amah cu hriak hnihin a hrangah thlacamter seh. 15 Cule zumnak ih thlacamnak cun mina a tidam ding ih, Bawipa in amah cu a kaitho ding. Cule tuah mi sualpawl a neih asile, cupawl cu ngaidam an si ding. 16 Nan dam theinak dingah pakhat le pakhat nan mawhsualnakpawl phuangawtăwn uhla, pakhat le pakhat thlacamsak aw uh. Midingfel ih ṭhahnemngai zet le hmualnei zetih thlacamnak cun thil tampi a tuahsuak a si.

17 Elijah cu kanmah vek mizia nei milai pakhat a rak si. Ruah sur lo dingin nasazetin thla a cam ih, kum thum le thla ruk sung leitlun ah ruah a sur lo. 18 Cun thla a camsal ih van in ruah a pe, cule leilung in rah a suah.

19 U le nau tla, nan lakih mi pakhat khat thutak ihsin a pial ih pakhat in cu pa cu a kirtersal asile, 20 misual a lamzin pialnak ihsin a kirtertu cun thihnak ihsin cu paih nunnak cu a runsuak ding ih, sual tampi a khuh fawn ding ti thei seh.