About Bible Thianghlim | ©

BibleThianghlim – HEBRU

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

HEBRU

12345678910
111213

• A ngantu: Theih a si lo
• A siartu: Jew zumtupawl
• Ngan kum: A.D. 67-69

Pathian in Thukham Hlun ah Pathian biakdān ding a rak dĭnsuak ih, cumi ih rinum ding khal a phût. Asinan himi biakdān hin Khrih a rak sawhkhih. Jesu Khrih a rat ih a thawiawknak hmangin Thukham Thar a dĭnsuah tikah, Thukham Hlun biakdanpawl cu Thukham Thar biakdanpawl in a thleng. Hih cakuat a dawngtupawl in thusimtupawl ih thuthangṭha an rak sim laiah himi thutakpawl hi an rak ngaithla. Asinan Juda biaknaksakhua ih kir an tumsal a bang. A nasazet mi tiduhdahnak an tuar ruangah Khrih dungthluntu sinak thu ah rinhlelhnak an nei thlang tla a si men thei (10:32-34; 12:4). Cuticun Thukham Hlun-ih ropitnak an thlirsal lala. Hih cakuat cangantu in Khrih parah le Khristian biaknaksakhua ih ropitnak parah an mit fúhnget dingih anmah sawmnak thazangpeknak ṭawngkampawl a ngan (13:22).

Hi cakuat ngantu hi theih a si lo. Sikhalsehla amah hi mit rori in Jesu-ih rawngbawlnak hmutu a si lo ih (2:3-4), zumtupawl hruaitu khal a si lo (13:17). Amah hi cathiam le Thukham Hlun le Judah biaknaksakhua thu khal theifiangtu a si. Temple ih Pathian biaknak hi atu ih cang rero lai mi vekin a rel ruangah hi cakuat hi temple tisiat (A.D. 70) a si hlanih ngan mi a si ding (7:8; 9:5-7, 9, 13; 13:10). Cun A.D. 67-69 hrawngih ngan mi a si ding, ziangruangahtile himi tikcu ah zumtupawl parih hremnak a nasazet.

Cangantu in Khristian biaknaksakhua cu Juda biaknaksakhua hnakin a cungnunsawnzia a simfiang. Khristian thurinpawlih cungnunzia relin, a cakuat a thăwk. Khrih cu Thukham Hlun profetpawl (1:1-4), vancungmipawl (1:5-2:18) le Mosi (3:1-6) hnakin a ṭhasawn. Cawlhnak ṭhasawn in pe (3:7-4:13). Amah cu biakbûk ṭhasawn ih (8:1-5) rawngbawltu puithiam ṭhasawn a si (4:14-7:25). Anih cun thutiamkam ṭhasawn a nei mi thukham ṭhasawn (8:6-13), Pathian biakdān ṭhasawn (9:1-28) le amah le amah hmangih thawinak ṭhasawn (10:1-18) a rak dĭnsuak. Cangantu in himi cakuat ah thulunlonak le zumlonak dokalhin ralrin peknak hngetkhoh zet a ngan (2:1-4; 3:12; 4:1; 5:11-14; 6:4-6). Cule Khristian biaknaksakhua hi a cungnun hleice ruangah zumtupawl in cumi cu ziangtin nunpi ding a si ti khal hi cakuat ngantu hin a buaipi (10:19-13:25). Himi cakuat ah hin ralrin peknak hngetkhoh zet a tel (10:26-31; 12:15-17).

Hi cakuatih thucah hi a fiang zet. Khrih in kan hnenah rundamnak famkim a rak thlĕn ruangah, zumnak in amah lawng zoh camcin ding kan si (12:2).

1

Fapa cu Vancungmi hnakin a Cungnungsawn

1 A liam cia mi cān ah a phunphun le lamzin dangdangin profetpawl hmangih pupápawl hnenih thu rak simtu Pathian in, 2 hih cān neta ah hin a Fapa hmangin kan hnenah thu in rak sim. Amah cu thil hmuahhmuah ro cotu ah Pathian in a ruat ih, amah hmang thotho in leilungpawl hi Pathian cun a rak tuah. 3 Amah cu Pathian ropitnakih tleu le a sinak mizia lăngsuahnak diktak a si. Thil ziangkim hi a thiltitheinak kamsuakthu in a khaidinghnget thluh. Amah rori in kan sualpawl a thianfai hnuah, tlun sâng Cungnungbik kut vawrh lamah a to. 4 A cungnung mi hmin cu anih in ro ih a congah ruangah vancungmipawl hnakin a cungnungsawn a si.

5 Ziangahtile,

«Nang cu ka Fapa na si,
Tuihsun ah ka lo hring a si,»

tiin le,

«A hrangah Pa ka si ding ih,
Amah cu ka hrangah Fapa a si ding,»

tiin vancungmi zo hnenah so a sim dah? 6 Cun hrin hmaisabik mi cu leitlun ih a hruailuh tikah khan,

«Pathian vancungmi hmuahhmuah in amah cu be hai seh,»

tiah a ti. 7 Cule vancungmipawl thu ah,

«Anih in a vancungmipawl cu thli ah le a rawngbawltupawl kha meisa alh ah a tuah hai,»

tiah a ti. 8 Sihmansehla Fapa thuhla ah cun,

«Maw Pathian, na laltokham cu kumkhuaih kumkhua tiang a si,
Dingfelnak kianghrăwl cu na lalram kianghrăwl a si.
9 Dingfelnak na rak ngaina ih, dān neih lo cu na hua. Curuangah
Pathian, na Pathian cun na hawipipawl hleihin lungawinak hriak a lo thih a si,»

tiah a ti. 10 Cule,

«Nang, Bawipa in a tir in leilung ṭohram na rak bŭn ih,
Vanpawl khi nangmai kutsuak an si.
11 Cupawl cu an hlorál leh ding, asinan nang cu na hmun ringring;
Cupawl hmuahhmuah cu sinfen bangin an hlun thluh leh ding.
12 Puan bangin cupawl cu na zual ding, cule an danglam ding.
Asinan nang cu nangmah kêl na si,
Cule na kumpawl in cem ti an nei lo ding,»

tiah a ti.

13 Sihmansehla vancungmi zo hnenah so,

«Na ralpawl na keretnak ih ka tuah hlanlo, ka vawrh lamah to aw,»

tiin a sim dah?

14 Annihpawl hmuahhmuah cu rundamnak ro ih cotu dingpawl hrangih rawngbawl dingih thlah mi rawngbawltu thlarau an si lo maw si?

2

Fimkhur dingih Ralrin Peknak

1 Curuangah kan tawlhhlolonak dingah hna ih kan theih mi thilpawl kha nasa sinsinin kan ngaihsak ding a si. 2 Ziangahtile vancungmipawl hmangih kamsuakthu sim mi hman a hngeh ih dānpahbălnak le thulunlonak tinkim in a dik mi lehrulhnak an co a si ahcun, 3 hi tlukih rundamnak ropi hi kan thlauthlak a si ahcun, ziangtin so kan luat thei ding? Cuih rundamnak thu cu a hmaisabikah Bawipa in a phuang ih a theitupawl in kan hnenah an rak nĕmhnget. 4 Pathian khal in hminsinnakpawl le mangbangzapawl in siseh, thilmak a phunphun le amai duhdān vekih Thlarau Thianghlim thilpekpawl thawn anmah cu a theihpi hai.

Thihnak ihsin Ropitnak Ah

5 Ziangahtile kan phuan mi, a ra thleng ding mi leilung cu vancungmipawlih thu hnuaiah a ap lo. 6 Asinan mi pakhat in hmun pakhat ah,

«Minung hi ziangso maw a si ih na ngaihsak, asilole minung fapa hi na kilkhawi ṭheu?
7 Anih cu vancungmipawl hnakih málte niamdeuhin na rak tuah;
Amah cu ropitnak le upatnak na khumter ih,
Na kut ih tuah mipawl tlunah na ret.
8 A thuthu ih um dingin thil hmuahhmuah cu a ke hnuaiah na ret ṭheh,»

tiin a phuang.

Cutiih ziang hmuahhmuah a ke hnuaiih a ret ruangah a hnuaiih ret lo i a tān mi zianghman a um lo. Asinan atu ah cun thil ziangkim a hnuaiah retin a um ti kan hmu hrih lo. 9 Asinan thihnak tuar ruangih ropitnak le upatnak khumter mi, Pathian zangfahnak ruangin mi kip hrangah thihnak a teh theinak dingah vancungmipawl hnakih niamter sawn mi Jesu cu kan hmu a si.

10 Ziangahtile fa tampi ropitnak ih hruailuh an sinak ah hin ziangkim a hrangih um le thil ziangkim amah ruangih um Pathian hrangah cun harsatnakpawl ruangih an rundamnak hrampi famkimter hi a awm hrimhrim a si. 11 Ziangahtile tithianghlimtu le tithianghlim mipawl cu an zaten mi pakhat ihta an si, curuangah annih cun unaupawl tiih kawh ding a zahpi lo,

12 «Ka unaupawl hnenah na hmin ka thăn ding,
Mipungkhawm lakah nangmah thangṭhatnak hla ka sak ding,»

tiah a ti. 13 Cule,

«Amah ah ka zumnak ka ṭhum ding,»

tiah a tisal. Cun,

«Ngai hnik uh, keimah le Pathian ih i pek mi nauhakpawl hi,»

tiin a simsal lala.

14 Nauhakpawl cu titsa le thisen cotu an si ruangah, thihnak thawngin thihnak parih thuneitu Diabol cu a siatbăl theinak dingah, milai sinak a co ve. 15 An nunsung hmuahhmuah thih ṭihnak sál ih tāngpawl a runsuak theinak dingah a si. 16 Ziangahtile a taktak ah cun a băwm ṭheu mipawl hi vancungmipawl an si lo ih, Abraham cithlah an si sawn. 17 Curuangah milai sualpawl hrangih tlăwnlungawithawinak tuah dingin, Pathian lam thilpawl ah zahngainak le Puithiam Lubik rinum a si theinak dingah thil ziangkim ah a unaupawl vekih tuah a ṭul a si. 18 Amah rori in sualfawrhnak a tuar zo ruangah, sualfawrhnak tuartupawl cu a bawm thei hai a si.

3

Mosi hnakin Jesu a Cungnungsawn

1 Curuangah van lam kawhnak a cotu a thianghlim mi unaupawl, kan phuan mi, Apostol le Puithiam Lubik Khrih Jesu hi ruat hnik uh. 2 Mosi cu Pathian sungkua hmuahhmuah parih a rinum bangin, anih cu amah ruattu parah a rinum a si. 3 Ziangahtile inn saktu cun a sak mi inn hnakin upat a hlawh sawn bangin, anih cu Mosi hnakin upatnak cotlak sawnah ruah a si. 4 Ziangahtile inn pauhpauh cu mi pakhat khat ih sak mi an si, asinan thil ziangkim a saktu cu Pathian a si. 5 Cule Mosi cu lehhnu ih an run rel leh ding mi thilpawl theihpitu a si theinak dingah, Pathian innsang hmuahhmuah parah siahhlawh rinum taktak a si. 6 Sihmansehla Fapa dinhmun in Khrih cu Pathian sungkua parah a rinum a si, rinhngehnak le ruahsannak ih lungawiaipuannak cu a net tiang kan kaihhnget a si ahcun, kanmah hi Pathian sungkua cu kan si.

Zumtupawl hrangih Cawlhnak

7 Curuangah Thlarau Thianghlim in,

«Tuihsun ah a aw nan theih asile,
8 Ramṭhing ih hniksak ni ih hel lai vek khan,
Nan thinlung hakter hlah uh.
9 Nan pupápawl in in hniksak, in hliakhlai ih,
Ka tuah mi thilpawl kum 40 sung an hmu.
10 Curuangah cuih san minungpawl parah ka thin a heng ih,
Kei in, ‹An thinlung a fehpêng ringring, ka duhdān khal an thei lo,› tiah ka ti.
11 Cutivekcun ka thinlingin,
‹Ka cawlhnak ah an lut lo ding,› tiah sia ka săm,»

tiih a ti vek khan a si.

12 U le nau tla, a nung mi Pathian tlansan dingin nan lakih zohman a thinlung sungah zumlonak le thinlung sual a umlonak dingah fimkhur uh. 13 Sikhalsehla, «Tuihsun,» tiih sal a si laiah hin pakhat le pakhat ni tin fawrhawtăwn uh, culole nan lakih mi zo simaw sual bumnak ruangah a thinlung hakter a si pang ding. 14 Ziangahtile a thăwk ih kan neih mi zumhngehnak kha a net tiang kan kaihnget asile, Khrih ṭawmpitu kan si. 15 Cule,

«Tuihsun ah a aw nan theih asile,
Hel lai vek khan nan thinlung hakter hlah uh,»

tiih sim mi vek kha a si.

16 Ziangahtile hna ih an theih hnu khalih a thinhengter thotho tupawl kha zo an si? A taktakin cupawl cu Izip ram ihsin Mosi ih a hruaisuah mipawl kha an si lo maw? 17 Cun kum 40 sung zo parah so a thin a heng? Thilsual tuahtupawl, an ruang khal ramṭhing ih rīlpawl parah khan a si lo maw? 18 Cule a zum lo tupawl hnen siarlo ah, zo hnenah so a cawlhnak ih lut lo dingih sia a săm? 19 Cule an zumlonak ruangah an lut thei lo ti kan hmu a si.

4

Cawlhhahdam Tiamkamnak

1 Amai cawlhnak ih luh ding thutiamkam a um hrih lai ruangah, cuih cawlhnak ah nan lakih mi pakhat khat a thleng lo pang ding ti phâng uhsi. 2 Ziangahtile kan hnenih phuan a si vekin thuthangṭha cu an hnenah phuan a si. Asinan cuih kamsuakthu a ngaithlatupawl in an theih mi thu cu zumnak thawi an rawi lo ruangah an hlawkpi lo.

3 «Ka thin a ling ih,
‹Ka cawlhnak ah an lut lo ding,› tiih sia ka săm vekin,»

tiih a ti vek khan a si. Sihmansehla leilung lungphum phum a si thăwk ihsin hna cu ṭuan ṭheh a si zo ruangah kannih a rak zum zotupawl hi cuih cawlhnak ah cun kan lut lai rero a si. 4 Ziangahtile hmun pakhat ah ni sarih ni thu hi, «Cule ni sarih ni ah cun Pathian cu a hnaṭuannak hmuahhmuah ihsin a cawl,» tiih sim a si. 5 Cule cuih hmun lala ah,

«Ka cawlhnak ah an lut lo ding,»

a ti leh fawn.

6 Mi hrekkhat hrangah luh ding mi cawlhnak a um lai hrih ruangah le an hnenih thu an rak sim hmaisak mipawl kha thulunlonak ruangah cuih cawlhnak ah an rak luh lo ruangah, 7 cān reipi hnuah David hmangih ṭawngin, «Tuihsun,» tiin ni pakhat a ruatsal:

«Tuihsun ah a aw nan theih asile,
Nan thinlung hakter hlah uh,»

tiih sim zo a si bangin.

8 Ziangahtile Joshua in annihpawl kha cawlhnak rak pe hai zo si sehla cu, cumi hnuah ni dang thu a sim nawn lo ding. 9 Curuangah Pathian mipawl hrangah cawlhnak a um lai hrih a si. 10 Ziangahtile Pathian cawlhnak ah lut ih, cawl zotu cu Pathian tidān bangin a hnapawl ihsin a cawl ve. 11 Curuangah cuih thulunlonak zohṭhim ih zohman kan tluklonak dingah, cawlhnak ih lut dingin hlawptlo uhsi.

12 Ziangahtile Pathian kamsuakthu cu a nung ih huham a nei, ralnâm kap hnih hriam hnak khal in a hriam sawn. Nunnak le thlarau, ruh pehzăwmawknakpawl le thlik hman ṭhenphel ko a sun thei, khawruah mipawl le thinlungih tumtah mipawl a thei thei. 13 Cule Pathian mithmuhah a sersiam mi zianghman lang lo a um lo, cuhnakin kan thuhla kan thlĕnnak ding paih mithmuhah cun, thil ziangkim hi taklawng le áwngaw cia-in a um thluh sawn a si.

Jesu cu a Ropi Mi Puithiam Lubik a Si

14 Curuangah vanpawl ih fehtlăng zo, Puithiam Lubik ropi, Pathian Fapa Jesu kan neih ruangah, kan zumnak phuansuah mi hi kaihnget uhsi. 15 Ziangahtile kan cahlonakpawl in tuarpi thei lo tu Puithiam Lubik nei kan si lo ih, kanmah vekin phun zakip ih sualfawrhnak rak táwng zo na cingih sual tuah lo nei kan si sawn. 16 Curuangah zahngainak kan co theinak dingah le kan ṭul cān ih in bawm dingin, zangfahnak kan hmuh theinak dingah zangfahnak laltokham cu ralṭha zetin naih uhsi.

5

1 Ziangahtile puithiam lubik pauhpauh cu minung lak ihsin hril mi an si ih, thilpekpawl le sualpawl hrangih thawiawknakpawl a hlăn theinak dingah Pathian lam thil ah minung hrangah ruat an si. 2 Anih khal cu cahlonak in a tuam ve ruangah theih mi nei lo le zinpêng zawhtupawl parah zawnruahnak a nei thei. 3 Cuvek mi a si ruangah mipi sualpawl hrangih thawinak a hlăn vek thothoin amai sualnakpawl hrang khalah an hlăn a ṭul a si.

4 Cule Aaron vekih Pathian kawhnak cotu siarlo, zohman in hi upat conak cu anmai hrangah an la dah lo. 5 Cuvekin Khrih khal Puithiam Lubik si dingin amah le amah a cawimawiaw lo. Sihmansehla Pathian in a hnenah,

«Nang cu ka Fapa na si,
Tuihsun ah ka lo hring a si,»

tiah a sim sawn. 6 Cule hmun dang ah,

«Nangmah cu Melkizedek-ih sidān vekin,
Kumkhuain puithiam na si,»

ti khal in a sim.

7 Anih cun taksa ih a um laiah, thihnak ihsin amah rundam theitu hnenah nasazetih ṭapin le mitthli thawn thlacamnakpawl le dilnakpawl a hlăn tikah, Pathian a ṭih ruangah a thlacamnak cu ngaihthlaksak a si. 8 Anih cu Fapa si ko hmansehla, a tuar mi thilpawl ihsin thulunnak a zir thotho. 9 Cule Pathian in famkim ko a tuah hnuah cun, a thu a ngaitupawl hmuahhmuah hrangah sankhuk rundamnak hrampi ah a cang. 10 «Melkizedek-ih sidān bangin,» anih cu Pathian ih kawh mi Puithiam Lubik a si.

Tluhlo lo dingih Ralrin Peknak

11 Melkizedek thu ah hin rel ding tampi kan nei ih, thu ngaithlak nan duh lo ruangah simfiang ding a harsa zet. 12 Ziangahtile a tikcu ruat ah cun zirhtu si thei zo ding hman nan si nân, Pathian thu hramthăwkpawl zirhtu ding nan ṭul sawn riangri ih, rawl hak si loin, hnawiti ṭul lai mi nan rak si. 13 Ziangahtile hnawiti ih a nungtu pauhpauh cu, nausen a si lai ruangah, dingfelnak kamsuakthu cu a theifiang thei lo. 14 Asinan rawl hak cu pitlingpawl hrangah a si. Cupawl cun a sia le a ṭha thleidang thiam dingin an theih theinak an hman ṭheu ruangah an theih theinakpawl cu an rak săwizăwi zo.

6

1 Curuangah Khrih thurin hramthăwkpawl cu tân tain, thil ti thipawl ihsin lungthlengnak, Pathian parih zumnak, 2 khawlhfaiawknakpawl zirhawknak, kut suan thu, mithi thawhsalnak le sankhuk thuṭhennak zirhawknak ṭohram cu bunsal nawn loin, pitlin lam pan uhsi. 3 Pathian in in sian asile, cucu kan ti vivo ding.

4 Ziangahtile vei khat tleunak rak pek zo mi, van lam thilpek tep zotu, Thlarau Thianghlim ṭawmpi zotu, 5 Pathian kamsuakthu ṭha le a thleng lai ding mi san ih thiltitheinakpawl a tep zotupawl cu, 6 an tlûk asile, lungthlengnak ih titharsal ding cu an hrangah a cang thei lo mi a si. Ziangahtile Pathian Fapa cu an khengbĕt tharsal ih ningzakzain an tuah a si.

7 Ziangahtile leilung, a parih tla ṭheu mi ruahti a intu le a ṭuantupawl hrangih a ṭhahnem mi thlai rahsuah ṭheu tu cun Pathian hnen ihsin malsawm a dawng a si. 8 Asinan hlingbûr le hrambûar suahtu cu hnawn a si ih camsiat tuar a nâi a si, a netnakah urkăng a si ding.

9 Asinan duhdawt mitla, cutin kan lo sim nân, nannih cu thil ṭhasawn, a si, rundamnak thawn thlurhaw mi thilpawl nan tuah kan beisei. 10 Ziangahtile amai hmin ih mithiangpawl rawng nan bawlsak rero lai bangin, nan bawlsak zonak ah duhdawtnak hnaṭuan le nan hnaṭuan mipawl hngilh dingin, Pathian cu mifello a si lo. 11 Cule rinhlelhnak um lo beiseinak famkim ah nan zaten a net tiang taimaknak bangrep nan suah fingfing kan duh. 12 Cutin mizê si loin, rinnak le thinsaunak ruangin thutiampawl congahtupawl cawngtu nan si sawn ding kan duh.

Pathian Thutiamkam cu a Hnget

13 Ziangahtile Pathian in Abraham hnenih thu a tiam laiah, amah hnakih ropisawn hmin sâl ih sesămnak ding a neih lo ruangah, amah le amah sālawin, 14 «Mal ka lo sawm tengteng ding ih, ka lo karhzaiter tengteng ding,» tiah a ti. 15 Cuticun thinsau takih a tuar hnuah, thutiamkam cu a congah.

16 Ziangahtile milaipawl cun thungaiten anmah hnakih ropisawn hmin sâlin sia an săm ṭheu, cule an sesămnak cun an elawknak thu tinkim a cemter ih an thurel mi a nĕmhnget ṭheu. 17 Cutivekcun Pathian in a thil tum a danglam thei lozia cu a thutiam ro cotupawl hnenah nasa sinsinih lăngter a duh ruangah, cucu sesămnak in a nĕmhnget. 18 Danglam thei lo cuih thil pahnih ah cun, Pathian cu thuphan per thei a si lo ruangah kannih himnak hmu zotupawl hin thapeknak nasazet neiin, kan hmaiih ret mi ruahsannak cu kan kaihhnget theinak dingah himi hi Pathian in a tuah a si.

19 Cuih ruahsannak cu nunnak thirkâwnpi vekin kan nei ih, cumi cu hnget le rintlak a si ih puanzar sungah a lut. 20 Melkizedek-ih sidān bangtukin kumkhaw Puithiam Lubik, hmaihruaitu, Jesu cu kan hrangah cu tawkah cun a lut a si.

7

Puithiam Melkizedek

1 Ziangahtile hi Melkizedek cu Salem siangpahrang, Cungnungbik Pathian-ih puithiam a si, siangpahrangpawl a thahnak ihsi ra tlungkir Abraham cu a rak hmuak ih mal a sawm. 2 Cu pa hnenah Abraham in a rallâksum hmuahhmuah ih ṭhen hra ṭhen khat a pe. A hmaisa ah a hmin sullam cu «dingfelnak siangpahrang,» a si ih, cuihhnu ah Salem siangpahrang ti khal a si, a sullam cu «daihnak siangpahrang,» tinak a si. 3 Anih cu pa nei lo, nu nei lo, cithlahsâwng nei lo a si ih, um thăwk ni khal a nei lo ih, nun cemnetnak khal a nei fawn lo, Pathian Fapa bangtukih tuah mi a si sawn ih puithiam a si ringring.

4 Cun anih hi ziangtluk miropi a si ti ruat hnik uh, purêng Abraham hman in a ralthillawnpawlih ṭhen hra ṭhen khat cu a hnenah a pe. 5 Cule puithiam sinak a cotu Levi fapapawl cun mipi hnen ihsin ṭhen hra ṭhen khat co theinak cu Dān bangtukin thupek an nei taktak. An unaupawl cu Abraham ihsin suak mi si khal hai sehla, ṭhen hra ṭhen khat cu an unaupawl lak ihsin a si an co. 6 Sihmansehla Levi hrin ihsin cithlahsâwng zăwi a si lo mi pa in Abraham-ih ṭhen hra ṭhen khat a co ih, thutiamkampawl neitu cu mal a sawm a si. 7 A tesawn cu a tumsawn in malsawm a pe ti hi el ding zianghman a um lo. 8 Hi tawkah a thi thei mi minungpawl in ṭhen hra ṭhen khat an co, asinan cu tawkah cun a nung ringring tiih phuan mi pa in ṭhen hra ṭhen khat a co. 9 Ṭhen hra ṭhen khat cotu Levi khal in Abraham hmangin ṭhen hra ṭhen khat a rak pe ve zo ti theih a si. 10 Ziangahtile Melkizedek in a rak hmuah laiah anih cu a paih ṭhalbe ah a rak um zo.

Jesu cu Puithiam Melkizedek vek a Si

11 Curuangah famkimnak cu Levi-ih puithiam sinak ihsin co theih si sehla cu (cumi hnuaiah mipi in Dān an ngah ruangah), Aaron-ih sidān vekih kawh si lo, Melkizedek-ih sidān vek puithiam dang rung um ding cu a ṭul bêtnak ziang a um? 12 Ziangahtile puithiam sinak cu a thlengaw ih, Dān khal thleng a ṭul ve. 13 Ziangahtile a thu an sim mi pa hi hnám dang mi a si, cuih hnám lak ihta zohman in biakṭheng ah rawng an bawl dah lo. 14 Ziangahtile kan Bawipa cu Judah hnám ihsin suak mi a si ti cu a fiang, cuih hrin thuhla ah Mosi in puithiam sinak thuhla ziang thu hman a rel lo. 15 Cule Melkizedek sinak băngpi puithiam dang a rung um zo a si ahcun, kan sim zo mi thu hi a fiang sinsin. 16 Amah cu milai cithlahsâwngawknak ih a phût mi bangtuk si loin, tisiat theih lo nunnak thiltitheinak zulhin a ra sawn tinak a si. 17 Ziangahtile,

«Nangmah cu Melkizedek-ih sidān vekin,
Kumkhuain puithiam na si,»

tiin a phuang.

18 Ziangahtile thupek um hmaisa cu a cah lo le a ṭhathnem lo ruangah hnawnin a um. 19 Ziangahtile Dān in zianghman a tifamkim lo, asinan ruahsannak ṭhasawn a thlengter ih, cumi ihsin Pathian kan naih thei a si.

20 Cule anih cu sesămnak um loin puithiam ih tuah a si lo. 21 Ziangahtile Levi-mipawl cu sesămnak um loin puithiam ih tuah an rak si, asinan Jesu cu sesămin puithiam ih tuah a si. A hnenah Pathian in,

« ‹Nangmah cu Melkizedek-ih sidān vekin
Kumkhuain puithiam na si,›
Bawipa in sia a săm zo ih,
A lung a thleng lo ding,»

tiah a ti.

22 Cuticun nasa sinsinin, Jesu cu thukham ṭhasawn hrangah âmkhām ah a rung cang.

23 Cun thihnak ruangih an pehzăwm vivo thei ṭheu lo ruangah, puithiam tampi an rak um zo. 24 Asinan anih cu a nun ringring ruangah, thleng theih lo mi puithiam sinak a nei. 25 Curuangah an hrangih dilsak dingin a nun ringring ruangah, amai zarih Pathian hnenih ratupawl cu a net tiangin a rundam thei a si.

26 Ziangahtile cuvek Puithiam Lubik, thianghlim, pawitawk lo, bawrhhlawh kai lo, misualpawl lakih fihlim le vanpawl hnakih sângsawn cu kan hrangah a tling tawk a si. 27 Anih cu, cuih puithiam lubikpawl vekin ni tin, amai sualpawl hrangah thawiawknak pek hmaisak ta hnu lawngih mipi sualnak hrangih thawiawknak a pek a ṭul lo, himi ruangah amah le amah a hlănawk ah khan sankhuk daihin vei khat ah a ṭhehnak a si. 28 Ziangahtile Dān cun cahlonak nei milai cu puithiam lubik ah a tuah, asinan Dān hnuih rak um sesămnak ṭawngkam cun kumkhuaih tifamkim mi Fapa cu puithiam lubik ah a ruat a si.

8

Jesu hi Thukham Thar Puithiam Lubik a Si

1 Cun kan sim miih tum mi bik cu hihi a si: vanpawl ah khin Cungnungbik laltokham vawrh lamih a totu, cuvek Puithiam Lubik kan nei a si. 2 Anih cu minung ih sak mi si lo, Bawipa ih sak mi hmun thianghlim le biakbûk diktak rawngbawltu a si.

3 Ziangahtile puithiam lubik pauhpauh cu thilpekpawl le thawiawknakpawl hlan dingih ruat an si. Curuangah hi Puithiam Lubik khal hin ziang simaw hlăn ding a neih ve a ṭul. 4 Ziangahtile Dān bangtukih thilpekpawl hlantu puithiampawl an um ruangah, amah hi leitlun ih um rak si sehla puithiam a si lo ding. 5 Cupawl cun van lam thilpawlih lem le thlam rawng an bawl, curuangah Mosi in biakbûk a sak zik laiah khan,

«Tlang parih a pianhmang hmuh na si vekin thil ziangkim tuah aw,»

tiin Pathian in a hnenah thu a pe.

6 Asinan atu ah cun amah cu thutiamkam ṭhasawnpawl parih dĭn mi thukham ṭhasawn remnak Palai khal a si bangin rawngbawlnak ṭhasawn a co zo a si.

7 Ziangahtile cuih thukham hmaisa cu sawisel ding rak um lo ta sehla cu, a pahnihnak hrangah cān remcâng hawl a ṭul lo ding. 8 Anmah ah mawhsualnak a hmuh ruangah anih in, «Ngai hnik, Israel sungza le Judah sungza thawi thukham thar ka tuah ding cān a thleng zik thlang, Bawipa in a ti. 9 Izip ram ihsin kut in ka hruaisuah hai laiih an pupápawl thawi ka tuah mi thukham vek a si lo ding. Ziangruangahtile annih cu ka thukham ah an um lo a si; cun annihpawl cu ka ngaihsak hai lo, tiah Bawipa in a ti. 10 Ziangahtile cumi hnuih Israel sungza thawi ka tuah ding mi thukham cu hihi a si, Bawipa in a ti: ka dānpawl cu an ruahnak ah ka ret ding ih an thinlung ah ka ngan ding, cule kei cu an Pathian ka si ding ih, annih cu ka minung an si ding. 11 Mi kip in, ‹Bawipa cu thei aw,› tiin an innhnen le an unau an zirh lo ding, ziangahtile a tebik ihsin a tumbik tiangin an zaten keimah in thei ding. 12 Ziangahtile an mawhsualnak parah zah ka ngai ding ih, an sualpawl le dān loih an nunnakpawl cu ka cîng nawn lo ding,» tiin a sim.

13 «Thukham thar,» tiih a tinak in thukham hmaisa cu a hlunter zo a si. Cun atu ih a hlun rero mi le a ziam rero mi cu a cemrál cing ding.

9

Lei Biakbûk ih Pathian Biaknak

1 Cun thungaiten, thukham hmaisa hman in Pathian rawngbawlnak cīn le dānpawl le leitlun ah hmun thianghlim a nei ve. 2 Ziangahtile biakbûk cu an sak ih, tăwntirbik ah menorah meito, cabuai le Sangserh a um. Cucu, «Hmun Thianghlim,» tiih kawh a si. 3 Cule puanzar pahnihnak sung lamah Hmun Thianghlimbik an ti mi pindan a um. 4 Cu tawkah cun sui ih tuah mi meiling kheng, suiti khût mi thukham kuang a um, cumi sungah manna an retnak sui bel, a cerh mi Aaron-ih kianghrăwl le thukham lungphengpawl an um. 5 Cule cuih thukham kuang parah Tlăwnlungawithawinak Hmun khuhin cherub ropipawl an um. Hih thilpawl hi atu ah a cipciarin kan rel thei hrih lo ding.

6 Cuih thilpawl cu cutivekih timtuah a si tikah, puithiampawl cu Pathian rawngbawlin biakbûk tăwntir ah cun an lut ṭheu. 7 Asinan a sangtu ah puithiam lubik amah lawng thisen kengin kum tin vei khat a lut ṭheu. Cu tawkah amai hrangah le mipi in thei loih an tuah mi sualpawl hrangah thisen a hlan ṭheu. 8 Biakbûk hmaisasawn a din sung cu Thlarau Thianghlim cun Hmun Thianghlimbik ih luhnak lamzin cu lăngter a si hrih lo ti a theihter. 9 Cuih thil cu tuih cān hrangah hmuhsaknak a si, cu tawkah an hlăn ṭheu mi thilpekpawl le thawiawknakpawl khan a betu ih sia le ṭha theihnak a famkimter thei lo ti a hmuhsak. 10 Cupawl cu rawl le in ding, khawlhfaiawkdān phunphun le tuahṭhatsalnak cān a thlen hlanih taksaruangpum hrangih an parih phût mi cīn le dānpawl an si.

Khrih Thisen

11 Sikhalsehla Khrih cu thil ṭha ra thleng dingpawlih Puithiam Lubik siin a ra ih, kut ih sak lo biakbûk, sersiam mipawl lakih tel lo, ropisawn le famkimsawn ah cun, 12 kan hrangah sankhuk tlennak a ngah hnuah, me thisen le câwno thisen si lo, amai thisen rori sawn thawn Hmun Thianghlim Bik ah sankhuk daihin vei khat a lut. 13 Ziangahtile câwpa le me thisen le câwla vutcâm, serh le sang dānih mibawrhhlawh parih theh mi hman in thianghlim ko taksa a faiter a si ahcun, 14 sankhuk Thlarau thawngih amah le amah bawrhhlawh kai loih Pathian hnenih hlanawtu, Khrih thisen cun a nung mi Pathian rian dingah nan sia le ṭha theihnak cu thil ti thi lak ihsin ziang tlukin a lo faiter sinsin pei?

15 Cule thukham hmaisa hnuaiih dānpahbăltupawl thihnak hmangin a tlen hai zo ruangah, kawh mipawl cun sankhuk ro thutiam an co theinak dingah anih cu thukham thar remnak Palai a si.

16 Ziangahtile rocahnak ca a umnak ah rocahnak ca tuahtu a thih a ṭul hrimhrim. 17 Ziangahtile thukham cu mi an thih hnu lawngah hmual a nei, a tuahtu a damsung cu hmual a nei lo. 18 Curuangah thukham hmaisa hman kha thisen tel loih dĭn a si lo. 19 Ziangahtile mi hmuahhmuah hnenah Mosi in Dān thu zulhih a thupek tinkim a sim laiah khan, câwnote thisen le me thisen cu tidai thawn, sahmul puan senlar thawn, hissop fung thawn a la ih, cazual le mipi hmuahhmuah a theh hai a si.

20 «Himi hi Pathian in nan hnenih thu a lo pek mi thukham thisen a si,»

tiah a ti.

21 Cuvek thothoin biakbûk le rawngbawlnak ih hman mi thilri hmuahhmuah cu thisen in a theh. 22 Cule Dān thu zulhin thil ziangkim deuhthaw hi thisen ih faiter an si ih, thisen suak loin ngaidamnak a um lo.

23 Curuangah vanpawl ih thil um pianhmang kengpawl hman cuih thilpawl hmangih thenfai a ṭul a si ahcun, van thil taktakpawl sinsin cu hipawl hnakih ṭhasawn thawiawknak in thenfai an ṭul a si. 24 Ziangahtile Khrih cu kut ih sak mi hmun thianghlimpawl, a taktak băngpi a si mi ah lut loin, kan aiawhin Pathian hmaika-ih ding dingin van rori ah a lut sawn a si. 25 Mai thisen si lo kengin kum tin Hmun Thianghlim Bik ih lut ṭheu tu puithiam lubik vekin, Khrih cu amah le amah hlanaw leuhleuh dingin a lut ve lo. 26 Cutin si lo sehla, leilung umtir ihsin a tuar leuhleuh zo ding. Asinan atu san cem zawngah amah rori a thawiawknak in sual hloter dingah vei khat a rung lang. 27 Minung hrangah vei khat thi dingih ruat a si, cuihhnu ah thuṭhennak a um ding. 28 Cuvek thothoin, Khrih cu mi tampi ih sualpawl phur dingah vei khat hlăn a si. Hlawptlo zetih amah a rak hngaktupawl hnenah rundamnak ih hruailut dingin sual phur dingah si loin, a vei hnihnak a ra lang leh ding.

10

Khrih Hlănawknak cu Vei Khat a Si

1 Ziangahtile Dān cu a ra thleng lai ding mi, thil ṭhapawlih thlâm lawng a si ih, cuih thil ṭhapawl băngpi taktak cu a si lo. Curuangah kum tintei thawiawknak kêl an hlăn ṭheu mipawl cun a hlantupawl cu ziang tik hmanah famkim ko a tuah thei dah lo. 2 Cutin rak si lo sehla, a betupawl cu vei khat ah thenfai an si ding ih, sual theihawknak an neih nawn lo ding ruangah thilhlăn cu an rak bansan zo lo ding maw? 3 Asinan cuih thawiawknakpawl cun kum tinte sualpawl a theithartersal ṭheu. 4 Ziangahtile câwpapawlih thisen le mepawlih thisen in sualpawl a lahlo thei lo.

5 Curuangah leitlun ih Jesu a rat tikah khan,

«Thawinak le thilhlăn na duh lo ih,
Ka hrangah taksaruangpum i timtuahsak sawn a si.
6 Meiur Thilhlănpawl le sual hrang thawinakpawl ah
Lunghmuinak na nei lo.
7 Cun kei in, ‹Cazual sungih ka thuhla ngan a si bangin,
Ngai hnik, Maw Pathian, na duh mi tuah dingah ka ra,› ka ti,»

tiah a sim.

8 A hmaisa ah, «Thawinak le thilhlăn ah le meiur thilhlănpawl le sual hrang thilhlănpawl cu na duh lo ih, cupawl ah lunghmuinak na nei fawn lo,» tiah a sim, cupawl cu Dān vekih hlăn mi an si. 9 Cun anih in, «Ngai hnik, Maw Pathian, na duh mi tuah dingah ka ra,» tiah a ti. A pahnihnak thukham a dĭn theinak dingah a hmaisa thukham cu a lahlo. 10 Cuih Pathian duhnak a tuahnak hmangin Jesu Khrih taksa kumkhaw daihih vei khat hlănnak thawngin tithianghlim kan si.

11 Cule puithiam kip in ni tin rawngbawlin le sualpawl lahlo thei dah lo mi thawiawknak kêl hlan leuhleuh in an ding ṭheu. 12 Asinan anih cu sualpawl hrangih thawinak pakhat kumkhaw daihin a hlăn hnuah, Pathian kut vawrh lamah a to. 13 Cuih si thăwkin a ralpawl cu a keretnak vekih tuah thluh an si hlanlo a hngak. 14 Ziangahtile thianhlimter rero a si mipawl cu thilhlăn pakhat hmangin kumkhua a famkimter hai a si.

15 Cumi cu Thlarau Thianghlim khal in in theihter. A hmaisabikah Thlarau Thianghlim cun, 16 «Himi hi, cumi hnuih anmah thawi ka tuah ding mi thukham cu a si, Bawipa in a ti, an thinlung ah ka Dānpawl ka ret ding, cule cupawl cu an ruahnak ah ka ngan ding,» tiah a ti. 17 Cuihtlunah a simbêt ih, «An sualpawl le dān loih an nundānpawl cu ka cîng nawn lo ding,» tiah a ti. 18 Atu ah hibangpawl ngaithiamnak hmun ah sual hrangih thilhlăn a um nawn lo.

Beidawng lo dingih Kawhnak

19 Curuangah u le nau tla, Jesu-ih thisen zarah hmun Thianghlimbik ih lut dingah ralṭhatnak kan nei, 20 a taksa a si mi puanzar hmangih nundān thar le nundān nung in dĭnsak mi hmangin le, 21 Pathian sungkua tlunah Puithiam Lubik kan neih ruangah, 22 kan thinlung ih sia le ṭha theihnak ṭhalo cu theh mi siin, kan taksa khal tidai thiang ih khawlh a si zo ruangah zumnak hnget famkim neiin le thinlung dik pu-in Pathian naih uhsi. 23 Thutiamtu cu a rinum ruangah, kan phuan mi kan zumnak hi hnîn dualdo loin kaihnget uhsi. 24 Cule duhdawtnak lamah le hnaṭuan ṭha ṭuannak lamah pakhat le pakhat căwkthoaw dingin ngaihtuah uhsi. 25 Mi hrekkhat tidān vekin, kan khawmawknak bansan loin, pakhat le pakhat thazang peawtăwn sawn uhsi. Ni cu a nai deuhdeuh ti nan theih bangin thazang peaw sinsin uh.

26 Ziangahtile thutak theihnak kan co hnuah, kan sual hrim vivo asile, sualpawl hrangah thawinak a um nawn lo ih, 27 thuṭhennak ṭihnung zet rung thleng ding mi le dodaltupawl kangráltu ding aithawknak meisa lawng beisei ding a tâng sawn a si. 28 Mosi Dān a hnáwngtupawl cu theihpitu pahnih simaw, pathum simaw an um asile, zahngainak tel loin an thi ṭheu. 29 Pathian Fapa a ke hnuaiih a palbĕttu, amah tithianhlimnak thukham thisen thil thianghlim loih a ruattu le zangfahnak Thlarau a zuamtaitu cu ziang vek cawhkuanpeknak nasasin tuartlak ah so nan ruah? 30 Ziangahtile,

«Phubalâk cu keimai ta a si, keimah in ka lehrūl ding,» ti le,
«Bawipa in a mipawl thu a ṭhen ding,»

ti lehtu Bawipa cu kan thei.

31 A nung mi Pathian kut ih tlak cu thil ṭihnung a si.

32 Sihmansehla tuih hlan, êng nan rak co hnuih buainak nasazet nan tuar lai kha cîng ringring uh. 33 A cān ah cun mawhthluknakpawl le harsatnakpawl tuarin, miih zohnuam menah an lo tuah ih, cān dang leh ah cun, cutiih an tuah mipawl tuarpitu nan si. 34 Ziangahtile ṭemṭawn ih ka um tikah ka parah lainatnak nan nei, cule van ah a ṭhadeuh mi le rei a daih mi thil nan nei ti nan theih ruangah nan thilri an lo lawnsak lai khalah aipuang zetin nan um.

35 Curuangah lawmman nasazet a nei mi, nan zumhngehnak cu hlăwnhlo hlah uh. 36 Ziangahtile Pathian duh zawng nan tuah hnuah, a lo tiamkăm mi nan co theinak dingah tuarfainak nan ṭul a si.

37 Thutiam cu,

«Rei lo te hnuah a ra ding mipa cu a ra ding, a rei nawn lo ding.
38 Cule mifel cu zumnak in a nung ding,
Asinan a dungtawlh asile,
A parah ka thinlung in lunghmuinak a nei lo ding,»

ti hi a si.

39 Sihmansehla kannih cu hlorál dingih dungtawlh mipawl lakih mi kan si lo ih, nunnak humhim dingih zumtupawl lakih mi kan si sawn a si.

11

Zumnak In

1 Zumnak cu ruahsan mi thilpawl a um rori a si ti theihnak, hmuh lo mi thilpawl theihfĕngnak a si. 2 Cuvek zumnak an neih ruangah khuahlan upapawl khan fak an rak hlawh.

3 Tlolakpi hi Pathian kamsuakthu ih sersiam an si ih, cuticun hmuh mi thilpawl hi hmuh thei mi thilpawl ihsi sersiam mi an si lo ti zumnak in kan thei.

4 Zumnak in Abel cun Kain hnakin thawinak ṭhasawn Pathian hnenah a hlan ih, cumi ruangah midingfel a si ti theihpinak a ngah ih, a thilpekpawl cu Pathian in a theihpi. Cule cumi ruangah Abel cu a thi zo ko nân, thu a sim rero lai thotho a si.

5 Zumnak ruangah Enok cu thihnak hmu lo dingin lakhlo a si, «Pathian in a lakhlo ruangah hmuh a si nawn lo.» Lakhlo a si hlanah, anih cu Pathian lunghmuitertu a si ti theihpinak a nei. 6 Cule zumnak tel loin Pathian lunghmuiter theih a si lo, ziangahtile a hnenih a ratu cun amah cu a um rori a si ti le anih cu taima zetih amah hawltupawl lawmman petu a si ti a zum tengteng ding a si.

7 Zumnak in Noah cun a hmuh hrih lo mi thilpawl thu ah ralrinnak pek a si hnuah, Pathian ṭihzahnak thawn a sungkuapawl rundamnak dingah lăwng a timtuah. Cuih a zumnak cun leitlun mipawl cu thiamlo a coter ih, zumnak zulhih dingfelnak ro cotu ah a cang.

8 Zumnak in Abraham cu ro a co ding mi ram ih feh dingin kawh a si tikah, thu a lung. Khuiah a feh ding ti hman thei loin a păwksuak. 9 Zumnak in Abraham cu ram tiam ah khan mi ram ah mikhual in a um. Amah thawi thutiam bangrep co ve mi Isak le Jakob tla thawn thlam ah an cêng. 10 Pathian ih sak le tuah mi lungphum nei khawpi a hngah ruangah a si.

11 Zumnak in Sarah khal in thutiamtu cu a rinum a si tiih a ruah ruangah favun theinak cahnak a ngah ih, favun thei nawn lo dingin a kum a luan hnuah fa a hring. 12 Curuangah amah cu mithi vek sihmansehla, mi pakhat ihsin, van arsi zat ih tam le siar cawk lo tifinriat kapih vunnel zat ih tam an suak.

13 Cupawl hmuahhmuah cu thutiampawl congah loin zumnak ih an nun hnuah an thi, asinan thutiampawl cu hlaral ihsin an hmu ih, zumhngehnak an nei ih an rak hmuak. Leitlun ih an nun laiah mikhual le khualtlawng mi an si ti khal an phuang. 14 Ziangahtile cuvek thu a simtupawl cun anmai ram ding an hawl a si ti fiangten an thăn. 15 Cule an suahsan mi ram cu seherh taktak hai sehla, kirsalnak cān remcâng an rak hmu tengteng ding. 16 Asinan annih cun ram ṭhasawn an duh, cucu van ih um mi a si. Curuangah Pathian cun an Pathian tiih kawh ding a ning a zak lo, ziangahtile an hrangah khawpi a rak timtuahsak cia a si.

17 Zumnak in Abraham cun, hniksak a si tikah khan Isak a hlan. Thutiampawl cotu cun a fapa neihsŭn a hlan a si. 18 Isak thuhla ah Pathian in, «Isak ah na cithlah tiih kawh a si ding,» tiah a ti.

19 Mithi lak ihsi hmanin Isak cu Pathian in a kaitho thei a si tiin Abraham cun a ruat. A fapa cu hmuhsaknak ah thihnak ihsin a hmu lehsal.

20 Zumnak in Isak cun thil ra thleng ding mi thu ah Jakob le Esau mal a sawm.

21 Zumnak in Jakob in a thih zawngah, Joseph-ih fapa pahnih cu mal a sawm veve ih, a kianghrăwl zim vawk phahin Pathian a bia.

22 Zumnak in Joseph cun a thih zawngah, Israel-mipawl an suah ding thu a phuang ih, a ruh thuhla ah thupek a pe.

23 Zumnak in Mosi nu le pa cun Mosi a suah tikah khan naute hmel ṭha a si ti an hmuh ruangah, siangpahrang thupek khal ṭih loin thla thum sung an thup.

24 Zumnak in Mosi cun a pitlin tikah Faro fanuih fapa tiih kawh ding cu a êl. 25 Rei lo te sung sual năwmnak cēn ih um hnakin, Pathian mipawl thawi zăwnzaih tuar a hril sawn. 26 Lawmman pek ding mi a thlir ruangah, Khrih ruangih mawhthluknak cu Izip ram ih hlawnthilpawl hnakin, lennak ropisawn ah a ruat. 27 Zumnak in siangpahrang thinlingnak ṭih loin, Izip ram a tlansan; ziangahtile hmuh theih lo pa a hmuh ruangah a tuar ṭenṭo a si. 28 Zumnak in fatir siatsuahtu in anmah a dai hai lonak dingah, Lantanak le thisen theh kha a hmang.

29 Zumnak in Tipi Sen cu leiro parih feh vekin an fehtlăng, cuvekin Izip-mipawl in ti ve an tum ih, an pilhlo ṭheh.

30 Zumnak in Jeriko kulh kha ni sarih sung an hēl hnuah a cim.

31 Zumnak in hlawhhlâng Rahab cu thlingthlatupawl kha ṭhatei a rak cohlan hai ruangah thulung lo pawl zawngah a hlorál ve lo.

32 Cule ziang ka simbêt hrih ding? Gideon thu, Barak thu, Samson thu, Jefthah thu, cuihtlunah David thu le Samuel le profetpawlih thu sim ningla cān in i daih lo ding. 33 Annihpawl cun zumnak in rampawl an la, diktakin thu an ṭhen, thutiampawl an co, kiosa kâ an cīpter, 34 meisa thiltitheinak an mitter ih, ralnâm hriam ihsin an luat, cahlonak ihsin cahter an si, raldonak ah miralṭha an si ih, ram dang ralkappawl an ṭekvaiter. 35 Nunaupawl in an mithipawl cu nungih kaihthawhsal siin an ngah. Cule mi dangpawl cu a ṭhasawn mi thawhsalnak an ngah theinak dingah runsuahnak êlin, sawisak an tuar. 36 Cule a dangpawl khal in hmuhsuamnak le vuaknak harsatnak an tuar. A si, cuihtlunah ṭemṭawnnak le thawngtlak khal an tuar. 37 Lungto ih den an si ih, ahphelin an um. Sualfawrh an si ih, ralnâm ih thah an si. Tuu vun le me vun sĭnin an vâkvai ih, rethei zet le zăwnzaihter le tuahsiatin an um. 38 Annihpawl hrangah leitlun hi umnaktlak a si lo. Thlaler le tlang lakah an vâkvai ih, lungpûk le leikua sungah an um.

39 Cupawl hmuahhmuah cun zumnak ruangah fak an hlawh nân, thutiam mi cu an co lo. 40 Kanmah tel loin annih cu famkimter an silonak dingah, Pathian in kan hrangah thil ṭhasawn in pe a si.

12

Pathian in a Fāte Nun a Sim

1 Curuangah kannih khal hi tluk nasa theihpitupawl mero in in kulh ruangah, thilrit tinkim le áwltei in awktu sual cu hlitthlain, kan hmaiih um mi tlan zuamawknak ah cun tuarfainak thawn tlân uhsi. 2 Kan zumnak hrampi le famkimtertu Jesu lam cu zohin tlân vivo uhsi, anih cun a hmaiih um mi aipuannak ruangah ningzahnak cu ziang hmanah siarloin, khraws cu a tuar, cule Pathian laltokham vawrh lamah a to. 3 Ziangahtile cau le thanau ih nan thinlung a umlonak dingah misualpawl hnen ihsin cu tluk dokalhnak a tuartu, amah cu ruat uh.

4 Sual dokalhin thisen suak tiang nan ṭang hrih lo. 5 Cule fale hnenih sim vekih nan hnenih sim mi thazangpeknak thu cu nan rak hngilh zo. Anih in,

«Ka fapa, Bawipaih nunsimnak kha nautat hlah awla,
A lo kawk tikah na thanau fawn hlah;
6 Ziangahtile Bawipa in a duhdawt mi cu nun a sim ṭheu ih, a cohlan mi fa kip in a vaw ṭheu,»

tiah a ti a si.

7 Nunsimnak nan tuar asile, Pathian in fale vekin a lo ruat tinak a si; ziangahtile pa ih nunsim lo mi fa an um dah kêl maw? 8 Fale hmuahhmuah ih an tuar mi nunsimnak nan tuar lo a si ahcun, fangai si loin, fasâwn nan si tinak a si. 9 Cuihtlunah nunsimtu taksa dān ah pa kan nei cio ih, cupawl cu kan ṭihzah, thlaraupawlih Pa hnenah nasa sinsinih tlulutin, kan nung lo ding maw? 10 Ziangahtile annih cun ni málte sung cu anmai ṭha tidān in nun in sim ngai, asinan anih cun kan hlawknak dingah le a thianhlimnak ṭawmpitu kan si theinak dingah nun in sim sawn a si. 11 Cun ziang vek nunsimnak khal hi tuar laiah cun aipuanumin an lang lo ih, riahsiatumzain an lang sawn ṭheu; Cuti si hmansehla nehhnu ah cumi ih săwizăwi mipawl cun hnangamumza dingfelnak rah an suah ṭheu.

12 Curuangah a khám mi kut le a cak lo mi khuk cu cakter uh. 13 Cule nan ke hrangah zintepawl dĭngter uh, cuticun kebái mi cu tuahmawhih um loin tidamin a um ding a si.

Pathian Tlansan lo dingih Ralrin Peknak

14 Thianhlimnak le mi hmuahhmuah thawi remawknak cu dawi uh, thianhlimnak loin zohman in Bawipa an hmu lo ding. 15 Fimkhur zetin zohthla ringring uh, culole Pathian zangfahnak co bān loin nan um pang ding. A khâ mi hrâm a cerhsuak mi in a lo buaiter pang ding ih, cumi cun mi tampi a bawrhhlawhter pang ding. 16 Nunau-mipa sualnak tuahtu simaw, rawl vei khat ei menih a fatir sinak covo a zuartu Esau bangih Pathian zah lo tu simaw nan um pang ding. 17 Ziangahtile a lehhnu ah malsawmnak ro co duhin, mitthli tlain nasazetin dil hmansehla, lungthlengnak cān remcâng a hmuh lo ruangah anih cu hnawn a si ti nan thei.

18 Ziangahtile nannih cu tham theih mi le meisa ih kăng mi, a dum le a thim umnak, thlipi hrannak tlang le, 19 tawtawrawt awn le kamsuakthupawlih aw umnak tlang, cuih aw a theitupawl in an hnenih kamsuakthu sim nawn lo dingih an dilnak hmun thleng nan si lo.

20 Ziangahtile, «Ramsa hman in cuih tlang cu a dai asile, lungto ih denthat simaw, thálfung ih saithat simaw a si ding,» tiih thupek cu an tuar thei lo.

21 Cule an thil hmuh mi cu ṭih a nung zet ih, Mosi in, «Ka ṭih tuk ih ka khūr a si,» tiah a ti a si.

22 Asinan nannih cu Zion Tlang, a nung mi Pathian khawpi, van Jerusalem le vancungmi siar cawk lo hnen, 23 van ih hmin khum a si mi fatir kawhhran le pungkhawmpawl hnenah siseh, mi hmuahhmuah Thuṭhentu Pathian hnenah siseh, famkimter a si mi midikpawlih thlarau hnenah siseh, 24 thukham thar remnak Palai Jesu hnenah le Abel thisen hnakih thu ṭhasawn simtu ih thisen theh mi hnenah nan thleng zo.

25 Nan hnenih thusimtu kha hnáwng lo dingin fimkhur uh. Ziangahtile leitlun ih anmah thusimtu rak hnáwngtupawl cu thuṭhennak in an luat lo a si ahcun, van ihsin thu run simtu kan hawisan ah cun kan luat lo sinsin ding. 26 Cu laiah a aw in leilung a hnînter. Asinan atu ah cun,

«Leilung lawng si loin,
Van khal vei khat ka hnînter leh ding,»

tiah a rak tiamkam.

27 Cun hi thu, «Vei khat,» ka hnînter leh ding ti mi ṭawngkam in, hnin theih lo mi thilpawl an hmun ringring theinak dingah, a hnîn thei mi, sersiam mi thilpawl ṭhawnhlo an sinak ding a sawh duh a si.

28 Curuangah hnin theih lo mi ram kan co ding ruangah, zangfahnak nei uhsi, cumi ihsin upatnak le Pathian ṭihzahnak thawn cohlantlakin Pathian rawng kan bawl thei ding. 29 Ziangahtile kan Pathian cu kăngralhmang meisa a si.

13

Thapeknak Netabik

1 Unau duhdawtawknak cu peh vivo uh. 2 Mikhual zohṭhat thlahthlam hlah uh, ziangahtile cuvek tuahin mi hrekkhat in thei loin vancungmipawl an rak mikhual a si. 3 Ṭemṭawn mipawl cu an hnenih ṭemṭawn si ve mi vekin cîng ringring uhla, tuahsiat a tuartupawl cu nanmah khal taksaruangpum ih um nan si ve bangin cîng ringring hai uh.

4 Ziangkim ah ṭhitumnak hi sunlawih si sehla, ihkhun cu bawrhhlawhter si hlah seh; cun nunau-mipa sualnak a tuahtupawl le uirepawl cu Pathian in thu a ṭhen hai ding. 5 Nan umtlandān cu duhhamnak tel lo mi si seh; nan thil neih mipawl ah diriam tawk uh. Ziangahtile amah in, «Ka lo tân ta dah lo ding ih, ka lo thlauthla dah fawn lo ding,» tiah a ti. 6 Curuangah,

«Bawipa cu i bawmtu a si,
Ka ṭih lo ding.
Minung in ka parah ziangso a tuah thei ding?»

tiah ralṭha zetin kan ti thei.

7 Pathian kamsuakthu nan hnenih a lo simtu, nan hotupawl kha cîng ringring uh, an nuncan rahsuah ruatin an zumnak cu cawng uh. 8 Jesu Khrih cu mizan, tuihsun le a kumkhuain a kêl ringring a si.

9 Zirhawknak phunphun le danglam in hruaihloawter hlah uh. Ziangahtile zangfahnak ih thinlung hngehter cu thil ṭha a si; rawl in hngetter hlah uh, rawl cun a luahkhah mipawl hrangah hlawknak a pe lo. 10 Biakṭheng kan nei, cumi ah cun biakbûk rawngbawltupawl cun ei theinak an nei lo.

11 Ziangahtile an thisen, puithiam lubik in sual hrangah hmun thianghlimbik sungih a luhpi mi rannungpawlih ruang cu riahhmun lengah ur a si. 12 Curuangah Jesu khal in, amai thisen rori in mipi a thianfaiter theinak dingah kulh kăwtka leng lamah a tuar ve. 13 Curuangah a mualphonak cu phurin, riahhmun lengah a hnenah feh uhsi. 14 Ziangahtile hi tawkah a hmun ding mi khawpi kan nei lo ih, a ra um lai ding mi khawpi cu kan hawl sawn a si.

15 Curuangah Khrih zarah Pathian hnenah thangṭhatnak thawinak cu catbang loin hlan uhsi, cuih thawinak cu a hmin thangṭhatnak kan hmur rah hi a si. 16 Cutivek thawinak parah Pathian a lung a hmui ruangah thil ṭha tuah le hlawmawk cu hngilh hlah uh.

17 Nanmah a lo hruaitupawlih thulung uhla, an hnenah tlulut uh, ziangahtile annih cun an hnaṭuandān Pathian hnenih rel ṭheh leh ding an si bangin nan thlarau an kilkhawi a si. Thinnatnak thawn si loin, aipuannak thawn lo kilkhawi hai seh, ziangahtile an thin a nat asile nan hrangah hlawknak a um lo.

18 Kan hrangah thlacam uh, ziangahtile thil ziangkimah dik zetih nun duhin sia le ṭha theihnak ṭha kan nei ti kan theifiang. 19 Asinan nan hnenih ka rat cing theinak dingah, cumi cu tuah dingin ka lo ngen hleice a si.

Thlawsuahpeknak le Cibaibûknak

20 Cun hnangamdaihnak Pathian, Tuukhāltu ropi a si mi, kan Bawipa Jesu, kumkhaw thukham thisen zarah mithi lak ihsi a kaithosaltu khan, 21 a duh zawng nan tuah theinak dingah, thil ṭha ṭuannak tinkim ah lo famkimter hram seh. Cule Jesu Khrih zarah, anih cu nanmah ah ṭuan hram seh, cucu a lungawi zawng zet a si. Cuih Jesu Khrih hnenah ropitnak cu kumkhuain kumkhua tiang um seh. Amen.

22 Cule u le nau tla, ṭawngkam málten ca ka lo kuat ruangah hi thazangpeknak ṭawngkam hi ngaithla hram dingin ka lo ngen hai a si. 23 Kan unaupa Timothy kha an suah zo ti rak thei uh, amah a rat cing mai asile, a zawngah ka ra lo hmu hai ding.

24 Nan hruaitupawl hmuahhmuah le mithiangpawl hmuahhmuah kha cibai in rak bûksak uh. Italy ih umpawl in cibai an lo bûk.

25 Nan zate hnenah zangfahnak um hram seh. Amen.