About Bible Thianghlim | ©

BibleThianghlim – FILIPI

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

FILIPI

1234

• A ngantu: Paul
• A siartu: Filipi khua ih zumtupawl
• Ngan kum: A.D. 61-62

Apostol Paul, Timothy le mi hrekkhat cu an rak dăwn mi larnak thu lungin Masidonia ah an feh (Apo 16:9-10). A netnakah Paul cu cumi ramṭhen ih hmunpi a si mi Filipi khawpi a thleng (Apo 16:12). Filipi khawmipawl hi Rom-mi sinak neitu mirinum zet an si.

Cuih khawpi ah cun Jew-mi an tam lo ruangah, khawpi kăwtka lengih thlacam dingih tawngkhawmaw mipawl cu Paul in a va pan hai. Hmakhatteah Lydia le a sungkua in thuthangṭha an rak cohlang (Apo 16:14-15). Paul in salnu pakhat khawsia a dawisuaksak tikah, Paul le Silas cu khawpi uktupawl in an vuak ih thawng an thlak (Apo 16:16-26; 1Th 2:2). Sikhalsehla thawng an thlaknak ah Pathian in thlawsuah a pe hai. Thawngtla kiltupa le a sungkua in Khrih an zum (Apo 16:19-40). A thaisun ah Paul le Silas cu thuneitupawl in an suahsal. Cule Thessalonika ah an feh (4:16; Apo 17:1-9). Asinan Luke cu zumtupawl fingkhawi dingin an tan ta (Apo 16:40).

Kum nga hrawng a rei hnuah Paul in a vei thumnak missionary khualtlawn phahah zumtupawl cu vei hnih a vehsal hai (Apo 20:1, 3). Kum nga hnuah Paul cu Rom khawpi ah thawng a tla (1:7, 13, 14, 17; 4:22). Paul thawng a tlak laiah a farah zet mi Filipi khawpi ih zumtupawl in tirhsiang zetin an rak bawm (2 Kor 8:1-5). Cun A.D. 61-62 hrawngah Filipi kawhhran in tirhsiang zetih Paul an băwm ruangah Paul in an hnenih lungawi thu sim dingin Filipi khawipi ih um zumtu Epafrodiṭas cu a hei thlah (4:10-18). Anmah thapek le nun zirh phah khal a duh.

Paul cun Filipi-mipawl hnenah rawngbawlnak a nei thei leh ding ti a zum (1:19, 25; 2:24). An hnenih an feh hlan sung zumtupawlih ni tin nun bawmtu dingah ca a kuat hai. Hi cakuat a hrek hnakih tam cu Paul in amai thuhla a ngan. Khrih, lungthin, lungrualnak, aipuannak thupawl uar zetin a ngan. Bung hnihnak ah Khrih titsa ih a cannak le cawisan a sinak thu ropi kan hmu. Paul in amah le amah Khrih thinlung neitu, Khrih zirtu le Khrih hnen ihsin cahnak cotu a sizia a relaw. Curuangah anih cu ziang vek dinhmun khalah, thawnginn sung tiang hmanah a ai a puang. A casiartupawl cu amah zohṭhimtu si dingah le amah vek a si mi Timothy le Epafrodiṭas zohṭhimtu si dingah a sawm hai.

«Kei hrangah nun hi Khrih a si ih, thih cu hlawknak a si» (1:21) tiih Paul ih a ti mi hi kan duh mi a si ve a ṭul.

1

Cibaibûknak

1 Jesu Khrih-ih ṭemṭawn sál, Paul le Timothy in,

Filipi khua ih um, Khrih Jesu ih mithiangpawl hmuahhmuah le Bishop-pawl le dikhonpawl hnenah:

2 Pathian kan Pa le Bawi Jesu Khrih hnen ihsin zangfahnak le hnangamdaihnak nan hnenah um hram seh.

Lungawi Thu Sim le Thlacam

3 Nanmah ka lo mansuah tinten ka Pathian hnenah lungawi thu ka sim ṭheu. 4 Ka thlacamnak kip ah nan zate hrangah aipuannak thawn ka lo dilsak. 5 Ziangahtile a ni khatnak ihsin tu tiang thuthangṭha phuansuahnak ah nan tel a si. 6 Nan hnenih hnaṭuan ṭha a ṭuan thăwktu cun Jesu Khrih-ih Ni tiang a tifamkim ding, cumi rori cu ka zumhnget a si. 7 Hitivekih nan zate thuhla ka ruah cu ka hrangah a dik a si, ziangruangahtile ka thinlung ah nan um, cikcin ih ṭawn ka sinak ah, thuthangṭha humnak ah le nĕmhngehnak ah nan zaten ka co mi zangfahnak i ṭawmpitu nan si. 8 Ziangahtile Jesu Khirh-ih lainatduhdawtnak in nan zaten ziang tlukin ka lo ngai ti i theihpitu cu Pathian a si.

9 Cule nan duhdawtnak cu theihnak le thuṭhenfelthiamnak hmuahhmuah ah a ṭhan sinsin theinak dingah thla ka cam. 10 Cutin Khrih-ih ni tiang diktak le sawisel ding um lo nan si theinak dingah, thil ṭhabikpawl cu nan thleidang thiam ding ih, 11 Pathian ropitnak le thangṭhatnak ah Jesu Khrih zarah dingfelnak rahpawl thawi khat mi nan si thei ding.

Paul, Cikcin thawn Thuthangṭha a Karhter

12 Asinan u le nau tla, ka hnenih thil cang mipawl hi thuthangṭha karhzaitertu ah an cang sawn riangri ti nan theih ka duh, 13 cutin Khrih ruangih cikcin ih ṭawn ka si ti cu siangpahrang inn ^akiltu hmuahhmuah le a dang Rom khawpi ih umpawl hmuahhmuah in fiang zetin an hmu. 14 Bawipaih unau mi tampi cu cikcin ih ṭawn ka si ruangah an zumhnget phah ih, ṭih loin kamsuakthu phuansuahnak ah an ral a ṭha sinsin.

1:13^a kiltu: Rom siangpahrang inn kiltu ralkap an si men thei. Annih hin ralkap dangpawl hnakin hlawhman alet in an ngah ih covo ṭha dangdang khal an nei.

15 Hihi a dik mi thu a si, mi hrekkhat cun nahsuahnak le eltainak thawn Khrih thu an sim ih, mi hrekkhat cun duhsaknak thawn an sim. 16 A hmaisapawl khi cun cikcin ih ṭawn ka sinak ah zăwnzaihnak bêt ding tumin, lungput diklo zetin, ṭhenṭhekter duhnak lungput thawn Khrih thu an sim. 17 Asinan a netapawl cun, keimah cu thuthangṭha humtu dingah ret mi ka si ti theiin duhdawtnak thawn thu an sim sawn. 18 A pawinak ziang a um? Ziang a va si hmanah, lamzin phunphunin a derin simaw, a taktakin simaw, Khrih cu phuansuahin a um. Cumi ah lungawiaipuangin ka um, a si, lungawiaipuangin ka um vivo ding.

Nun hi Khrih a Si

19 Ziangahtile thla in camsaknak le Jesu Khrih Thlarau băwmnak thawngin himi cu runsuah ka sinak ah a cang ding ti ka thei. 20 Ka beiseinak nasazet le ka ruahsannak bangtukin ziang thu hmanah ka ning a zak lo ding. Asinan ralṭhatnak hmuahhmuah thawn ka rak um kēl vek ten, nunnak in simaw, thihnak in simaw, atu khalah Khrih cu ka taksaruangpum ah cawimawiin a um ding. 21 Ziangahtile kei ka hrangah nun cu Khrih a si ih, thih cu hlawknak a si. 22 Sikhalsehla taksa ih ka nun vivo asile, cumi cu ka ṭuanbăngnak rah suahtertu ding a si; cuticingcun ziang ka hril sawn ding ti ka thei lo. 23 Ziangahtile kei cu thil pahnih karlakah rekbĕtin ka um, fehsuak ih Khrih thawi um duhnak ka nei; cumi cu a ṭhasawn mi a si. 24 Sikhalsehla taksa ih ka um hi nanmai hrangah a ṭul sawn. 25 Cule cumi zumhngehnak cu neiin, nan ṭhansonak dingah le zumnak ruangih nan aipuannak dingah, nan zate hnenah tāngin ka umpeh hrih ding ti ka thei. 26 Cuticun nan hnenih ka ratsalnak ruangah ka hrangih nan aipuannak cu Khrih ah a tam sinsin ding.

27 Ziang a va si khalle, nan nuntuzia cu Jesu Khrih thuthangṭha thawn mil aw phawt seh, cutin nan hnenah rain ka lo hmuh ah simaw, nan hnenih ka um lo khalah simaw, thlarau hmunkhatah dinghngetin, thuthangṭha zumnak hrangah lungthin hmunkhatten nan ṭangtlang ti nan thuhla ka thei thei ding a si. 28 Cule nanmah a lo dotupawl kha ṭih hrimhrim hlah uh, cumi cu an hrangah siatralnak lăngfiangternak a si ih, nannih hrangah cun Pathian hnen ihsi a ra mi nan rundamnak lăngfiangternak a si sawn. 29 Ziangahtile Khrih zum lawng si loin, amai ruangih tuar ding hi Khrih zarah nan hrangih sian a si. 30 Doawknak keimah ih nan rak hmuh mi, atu khalah keimah ah a um ti hna ih nan theih mi, cumi rori cu nan nei ve.

2

Khrih-ih Tăngdawrnak Cawn Ding

1 Curuangah Khrih ah thapeknak siseh, duhdawt thlangămnak siseh, Thlarau pawlkawmnak siseh, lainatduhdawtnak le zahngainak siseh a um asile, 2 ruahnak bangrepih umin, duhdawtnak bangrep neiin, lungrualih lungthin pakhat neiin, ka aipuannak famkimter uh. 3 Mai ṭānghmasial ruangah siseh, thulolak pawrhawknak ruangah siseh zianghman tuah hlah uh, cuhnakin lungthin tăngdawrnak thawn mi tin in mi dang kha mah hnakih ṭhasawn ah ruat cio sawn hai seh. 4 Mi tin in mai bul thil lawng ngaihsak loin, mi dang ta khal ngaihsak hai seh.

5 Hi lungthin Khrih Jesu khalih um mi hi nanmah ah um seh. 6 Anih cu Pathian mizia nei si cingin, Pathian tlukih um cu kaihhnget ding thil ah a ruat lo, 7 cuhnakin amah le amah kawlawngawter sawnin, ṭemṭawn sál pianzia lain, minung vekin a rung suak. 8 Cule minung pianzia kengin amah le amah hnuai a dawr ih, thi tiang rori thulungin a um, khraws thihnak tiangin. 9 Curuangah Pathian khal in anih cu nasazetin a khaisâng ih, hmin hmuahhmuah lakih hmin cungnungbik a pe. 10 Cumi ruangah mi tin van ih um siseh, leitlun ih um siseh, lei hnuaiih um siseh, Jesu hmaiah an khuk an bil thluh ding. 11 Cutin Pa Pathian cu thangṭhatih a um theinak dingah, lei hmuahhmuah in Jesu Khrih cu Bawi a si tiah an phuang ding.

Arsipawl vekih Tleu

12 Curuangah ka duhdawt mitla, thu nan rak lun ṭheu vek khan, ka um lai lawngah si loin, atu ka um nawn lo hnu khalah nasa sinin, ṭih le khūr phahin nan rundamnak cu ṭuansuak uh. 13 Ziangahtile a lunghmui zawng tuah duh ding le tuah dingih nan sungih a ṭuantu cu Pathian a si.

14 Thil ziangkim hi phunzainak le elawknak um loin, tuah uh. 15 Cuticun thinlung kawi le mikhêrmeipawl lakah sawihnăwm kâi lo le thianghlim, kawk ding um lo Pathian fāte nan si ding ih, leitlun tleu vekin an lakah nan êng ding. 16 Nunnak kamsuakthu cu kaihnget uh, cuticun a lakih tlân le a lakih ṭuan ka si lo ding ih, Khrih-ih ni ah tluang ka khawng thei ding.

17 A si, kei cu nan zumnak raithawinak le rawngbawlnak parih Inding Thilhlăn vek ka si khalle ka lung a awi, nan zaten ka lo aipuanpi fawn. 18 Cuih thu thotho ruangah nannih khal lungawi uhla, lungawiaipuangin i umpi ve uh.

Timothy le Epafrodiṭas

19 Asinan nan umtudān ka theih tikih thazang ka ngah theinak dingah, a rei hlanah nan hnenih Timothy thlah thei dingin Bawi Jesu ah ruahsannak ka nei. 20 Ziangahtile hivek ruahnak nei, nan umdān thungaithlakih lo ngaihsaktu ding dang zohman ka nei lo. 21 Ziangahtile mi hmuahhmuah in Khrih Jesu-ih thilpawl hawl loin, anmai thil lawng an hawl. 22 Asinan Timothy hi cu fa in a paih rawng a bawl vekin, thuthangṭha hnaṭuannak ah rawng i bawlpitu a si ti amah in a langter zo ti nan thei. 23 Curuangah ziangtivek ka si ding ti ka theih leveten amah hi rak thlah lohli ka beisei. 24 Asinan nan hnenah keimah rori khal ka ra cing ding ti Bawipa ah ka zum a si.

25 Ka unaupa, Epafrodiṭas, ka hnaṭuanpi le ka ralkap ṭuanpi, nan palai le ka ṭulnak ih rawng i bawlsaktu cu nan hnenah thlah a ṭul tiah ka ruat. 26 Ziangahtile anih cun nan zaten a lo ngai zet ih, a nâ ti nan theih ruangah a van khal a sâng zet. 27 Ziangahtile thi zikin a na taktak, asinan Pathian cun a parah zahngainak a nei, amah lawng si loin, thinharnak parih thinharsinnak ka neihlonak dingah ka par khalah zah a ngai a si. 28 Curuangah amah nan hmuhsal tikih nan ai a puan theinak dingah le ka ninghannak a demdeuh theinak dingah, hlawptlo zetin amah cu ka rak thlah lohli. 29 Curuangah lungawinak nasazet thawn Bawipa ah amah cu rak cohlang uhla, hivek mi hi upat uh. 30 Ziangruangahtile keimah in săwmdawlnak sambau mi cu silhkhat dingah, a nunnak ui loin, Khrih-ih hna ruangah a thi zikte a si.

3

Milai Thil Ti ih Ṭhumaw Lo

1 A netnakah, u le nau tla, Bawipa ah lungawiaipuangin um uh. Nan hnenih thu kêl ngan nawlhsal ding hi ka hrangah thil buaithlak a si lo, cucu nan hrangah himnak ding a si sawn.

2 Uicopawl kha va ralring uh, ṭhatlonak tuahtupawl kha ralring uhla, mai taksa siatsuahawtupawl kha va ralring uh. 3–4 Ziangahtile kei khal tisa ah rinsan ding nei khal ningla, kannih Thlarau ih Pathian a betu, Khrih Jesu ih lungawiaipuangtu le tisa rinsan lo tupawl hi serh zim tan mi diktak kan si sawn. Mi pakhat khat in tisa ah rinsan ding nei ih a ruahawk asile, kei cun ka nei tam sinsin: 5 ni riatnak ih serh zim tan, Israel-mi, Benjamin hnám, Hebru-mi diktak, Dān thu lamah Farasi, 6 ṭhahnemngainak lamah kawhhran tiduhdahtu, Dān thu ih dingfelnak lamah sawihnăwm kâi lo ka si.

7 Sikhalsehla hlawknak dingih ka rak ruah mi cuih thilpawl cu, Khrih ruangah sunnak ah ka ruat thlang. 8 A si, ka Bawipa Khrih Jesu theihnak cungcuang ruangah thil hmuahhmuah hi sunnak ah ka ruat ve. Amah ruangah thil hmuahhmuah sunnak ka tuar ih, Khrih ka neihngah theinak dingah cupawl cu hnawmhne menah ka ruat. 9 Cule Pathian in Khrih ah i hmuh theinak dingah, Dān parih ṭhumaw mi keimai dingfelnak cu nei loin, Khrih zumnak ruangih dingfelnak, zumnak ruangih Pathian hnen ihta dingfelnak cu ka nei sawn. 10 Cuticun a thihnak băngnak neiih tuah mi siin, Khrih le a thawhsalnak huham le a tuarnakpawl ṭawmpinak cu ka theih theinak dingah a si. 11 Cutin ziangmawtitiih, mithi thawhsalnak ih telngah thei ding ka duh.

Hmuitin Mi lam Pan

12 Ka congah zo ih ka famkim zo ka tinak a si lo, cuhnakin Khrih Jesu ih i kaihnak săn cu kaingah thei rori dingin ka dawi sawn a si. 13 U le nau tla, ka kaingah zo tiah keimah le keimah ka ruataw lo; cuhnakin hi thil pakhat hi ka tuah sawn a si: dung lamih thil umpawl hngilhin, hmai lamih thil umpawl cu ka dawi, 14 Khrih Jesu ah tlun lamih Pathian kawhnak nehmanlaksawng hrangah hmuitin mi lam panin ka năwr.

15 Curuangah u le nau tla, a pitling mi hmuahhmuah in cutivek lungthin nei uhsi. Cule ziang thil khalah lungthin danglam nei nan si le, Pathian in nan hnenah ka lo sim mi kha a lo theifiangter ding. 16 Ziang a va si khalle, kan thlen cintawk tiangah dān bangrepin feh uhsi la, thil bangrep kha ruat uhsi.

17 U le nau tla, keimah i cawngtu si uhla, zohṭhim ding kanmah in neih vekin, cutivekih nungtupawl cu zohṭhim uh. 18 Ziangahtile mi tampi cu Khrih-ih khraws doral an si. An thuhla cu atu le atu ka rak lo sim, atu khalah ṭap phahin ka lo sim a si. 19 Cupawlih cemnak cu siatralnak a si, an pathian cu an pumpi a si ih, ningzakza thil an tuah mi ah an tluangkhâwng. Leilung thilpawl parih lungthin rettu an si. 20 Ziangahtile kannih cun vancungrammi sinak kan nei, cuih hmun ihsi a ra ding mi rundamtu, Bawi Jesu Khrih cu hlawptlo zetin kan hngak a si. 21 Khrih cun a santlailo zet mi kan taksaruangpum hi a ropi mi amai taksaruangpum vekih a can theinak dingah a thleng ding. Cumi tuahnak ah thil ziangkim a thu hnuaiih ret theinak huham a hmang ding.

4

1 Curuangah ka duhdawt mi le ka ngai mi u le nau pawl, ka aipuannak le ka lallukhum, ka duhdawt mitla, cutivekcun Bawipa ah dinghnget uh.

2 Bawipa ah lungthin bangrep pu dingin Zudias ka ngen ih, Sinṭike khal ka ngen. 3 Cule ka kawn phurhpi diktak, nang khal, khaih nunaupawl kha bawm dingin ka lo ngen a si. Annih cun Klemen le a dang ka hnaṭuanpi Nunnak Cazual sungih an hmin ngan mipawl thawn thuthangṭha ah in ṭuanpi a si.

4 Bawipa ah lungawiaipuangin um ringring uh, ka simsal ding, lungawiaipuangin um uh! 5 Nan zaidamzia cu mi hmuahhmuah in thei hai seh. Bawipa cu a nâi a si. 6 Ziang thu hmanah dawnhar hlah uh, ziangkim ah thlacamnak le dilnak in, lungawi thu simnak thawn nan dilnakpawl cu Pathian hnenah theihter sawn uh. 7 Cule milai ih theihthiam băn lo mi Pathian-ih hnangamdaihnak cun nan thinlung le nan lungthin cu Khrih Jesu ah a lo kilsak ding.

8 A netnakah u le nau tla, a dik mi thil pauhpauh, zahtlak mi thil pauhpauh, a dingfel mi thil pauhpauh, a thianghlim mi thil pauhpauh, a duhnung mi thil pauhpauh, a thangmawi mi thil pauhpauh, tlinnak ziang tal simaw, thangṭhattlak ziang tal simaw a um a si ahcun, cupawl cu ngunngaih zetin ruat uh. 9 Cuih thilpawl, keimah ih nan zir mi le nan cohlan mi, hna ih nan theih mi le nan hmuh mipawl kha tuah uh, cule hnangamdaihnak Pathian in a lo umpi ding.

10 Sikhalsehla in ngaihsaknak cu cān reipi hnu, atu ah nan run tharthawhsal ruangah Bawipa ah nasazetin ka ai a puang a si; cumi cu nan rak ngaihsak zet nân, tikcucān remcâng nan rak hmu lo men a si. 11 Ka tlaksăm ruangah hih thu sim ka si lo, ziangahtile kei cu ziang vek dinhmun ih ka um khalah, lungkim tawkdān ka zirngah zo. 12 Tlasam zetih umdān ka thiam ih, lian zetih umdān khal ka thiam. Hmun tin ah le thil ziangkim ah tlâi le rilrâwngih umdān, lian zetih umdān le tlasamih umdān ka zirngah zo. 13 Cahnak i petu Khrih thawngin thil ziangkim ka tuah thei.

14 Cutisihmansehla, ka vansannak in tuarpi ve hi cu nan tiṭha a si. 15 Cule nan hnenih thuthangṭha ka thlenter thăwk lai, Masidonia ihsin ka fehsuak laiah khan, nanmah siarlo pek le dăwn thu ah kawhhran pakhat hman in in hlawm lo ti cu nanmah Filipimi khal in nan thei. 16 Ziangahtile Thessalonika khua khalah nannih in ka ṭul mi hrangah vei khat lawng si loin, vei hnih lai in rak kuat. 17 Thilpek ka hawl ruangah a si lo, nanmah lamah rah tampi a um theinak ding ka hawl sawn a si. 18 Sikhalsehla ziangkim ka nei ih, tampi ka nei, Epafrodiṭas hnenih thil nan rak kuat mipawl ka rak ngah ih ka daihaw ngah a si. Cupawl cu thil rimthaw, Pathian cohlantlak le lungawi zawng raithawinak a si. 19 Cule ka Pathian cun ropitnak ih a lendān zulhin nan ṭul mi hmuahhmuah cu Khrih Jesu zarah a lo pe ding.

20 Atu ah kan Pathian le kan Pa hnenah ropitnak cu kumkhuain kumkhua tiang um seh. Amen. 21 Khrih Jesu ih mithiang hmuahhmuah kha cibai in bûksak uh. Ka hnenih a um mi unaupawl in cibai an lo bûk. 22 Mithiangpawl hmuahhmuah in cibai an lo bûk, a hleicein Kaisar sungkuapawl in.

23 Kan Bawipa Jesu Khrih-ih zangfahnak cu nan zate hnenah um hram seh. Amen.