About Bible Thianghlim | ©

BibleThianghlim – 1 TIMOTHY

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 TIMOTHY

123456

• A ngantu: Paul
• A siartu: Timothy
• Ngan kum: A.D. 64-65

Paul in a missionary khualtlawn a vei khatnak ah Listra khua a pal phahah Timothy a táwng. Timothy-ih nu cu Jew-mi a si ih, a pa cu Grikmi a si. A nu le a pi hi zumtu an si ih, Thukham Hlun thu hmangin a nauhak lai hmuahhmuah Timothy zirhtu an si (1:5; 3:15). Timothy hi a rak zir mi thu ruangah, asilole Paul ih a vei khatnak missionary khual a tlawn ṭum ih a thusim mi a theih ruangah zumtu ih cang mi a si men thei (Apo 14:6, 21). Paul in a missionary khualtlawn a vei hnihnak ah Listra a pál. Cuih cān ah Timothy cu Bawipaih hna ah dungthluntu rinum a rak si zo (Apo 16:1-2). Timothy cu Paul zawngah a feh ih Filipi, Thessalonika, Berea le Korinth kawhhranpawl hrangih hnaṭuannak ah a bawm (Apo 16:1-17:16; 18:5).

Timothy cakuat pakhatnak hi cuih khualtlawnnakpawl hnupi ah Paul ih a ngan mi a si.

Apostolpawlih Cangvaihnak cabu ih thil cang mipawl thlen ṭheh hnuih ngan mi a si. Apostolpawlih Cangvaihnak cabu cu A.D. 60-62 hrawngih Rom khawpi ih Paul thawng a tlak thu in a cem. A netnakah Paul cu Rom-mipawl in an thlahsal (Fil 1:23-27; 2:24; Flm 22). Cumi hnuah Efesa ah Timothy thawn an fehsal. Cuṭhehin Paul cu Masidonia ah a feh ih, Timothy cu Efesa khua ah a tān ta (1Tim 1:3).

Timothy cakuat pakhatnak hi A.D. 64-65 hrawngah, Paul in a kirsal lohli thei lo ding thu a theihawk tikah Timothy hnenih a kuat mi a si (3:14-15; 4:13). Efesa kawhhran kilkhawiih a um rero lai mi a hnaṭuanpi tlangvalpa hnenih Paul in a bulpak thurawnpeknak cakuat a si (Efesa Thuhmaihruai siar aw).

Hi cakuat in thupi pahnih a nei. A pakhatnak ah, Timothy cu a nunnak hmangin zumtupawlih zohṭhim ding a sizia Paul in a tarlang (4:12). A pahnihnak ah, zirhtu diklopawl le zirhnak diklopawl theihthiam ding thu (bung 1 le bung 4) ah, biakkhawmnak ih umdān ding (bung 2) ah, pastor le dikhon pawlih tlinnak thu (bung 3) ah le kawhhran sungih mi phun zakip parah Timothy-ih ṭuanvo le Pathian lamih an ṭuanvo thupawl Paul in a zirh (bung 5-6).

Timothy hnenih Paul cakuat a pakhatnak ah tualsung kawhhran hrangih man nei mi thurawnpeknak a tel. Ziangruangahtile kawhhran cu «thutak ṭhuam le ṭhumawknak» a si ruangah, a tuah mi thil ziangkim ah Pathian thu thlun ding hi tualsung kawhhran hrangah a thupi tuk lawmmam (3:15).

1

Cibaibûknak

1 In Rundamtu Pathian le kan ruahsan mi Bawi Jesu Khrih thupek bangtukih Jesu Khrih-ih apostol Paul in,

2 Zumnak ih ka fa taktak Timothy hnenah,

Pathian kan Pa le Jesu Khrih kan Bawipa hnen ihsin, zangfahnak, zahngainak le hnangamdaihnak um hram seh.

Zirhnak diklo lakih Kilvengaw dingih Fawrhnak

3 Zirhnak danglam zirh lo dingin mi hrekkhat thu na cah hai theinak dingah, Efesa khua ah rak um ringring aw, cucu Masidonia peng ka feh zawngih ka lo ngĕn mi kha a si. 4 Anmah cu phuahcawp thuanthu lam le cem ti nei lo cithlahsâwngawknak lam ngaihsak lo dingin thu cah hai aw. Cumi cun zumnak ih a um mi Pathian lam tuahṭhatawknak suah loin, elawknak a suakter sawn. 5 Cun thupekih tumtah mi cu thinlung thianghlim, sia le ṭha theihnak ṭha le zumnak dik ihsin a suak mi duhdawtnak a si. 6 Mi hrekkhat in cupawl cu an pialsan ih, thu mumallo relnak lamah an her. 7 Ziang an ṭawng ti le ziang thil an nĕmhnget ti thei loin, Dān zirhtu si an duh.

8 Sikhalsehla mi in a sidān vekih a hman asile, Dān cu a ṭha ti kan thei. 9 Hi khal hi kan thei: Dān cu midingfelpawl hrangih tuah mi a si lo ih, dān nei lo pawl le thulung lo pawl hrang, Pathian ngaihsak lo pawl le misualpawl hrang, mithianghlim lo pawl le Pathian zah lo tupawl hrang, pale thattupawl le nule thattupawl hrang, mi thattupawl hrang, 10 nunau-mipa sualnak tuahtupawl hrang, tawkahurpawl hrang, minung rûkhmangpawl hrang, thuphan perpawl hrang, thuphan thu ih sesămpawl hrang le zirhawknak ziktluak dodaltu thil pauhpauh hrangah a si. 11 Cuih zirhawknak ziktluak cu thangṭhattlak Pathian thuthangṭha ropi milin a si ih, cucu Pathian in i ap a si.

Paul parih Pathian Zahngainak

12 Cule i caktertu Khrih Jesu, kan Bawipa hnenah lungawi thu ka sim, anih cun mirinum ih i siar ruangah, rawngbawl dingin i ruat a si. 13 Hi hlanah kei cu mi thangsiattu, mi tiduhdahtu le mi tinatu rak si hman ningla, zum loin thei loih ti ka si ruangah, zahngainak ka co. 14 Cule kan Bawipaih zangfahnak cu Khrih Jesu ih a um mi zumnak le duhdawtnak thawn nasazetin a rak luangliam.

15 Khrih Jesu cu misualpawl run dingin leitlun ah a ra, an lakah misualbik ka si ti cu rintlak mi ṭawngkam a si ih, a pumhlum ih pawm thluh ding a si. 16 Cutisikhalsehla, himi ruangah a si zahngainak ka rak co, cutin kumkhaw nunnak an conak dingah tuih hnuih amah zumtu dingpawlih zohṭhim ding mi si dingin, Jesu Khrih cun a thinsaunak hmuahhmuah cu keimah ah a langter hmaisa a si. 17 Cule kumkhaw Siangpahrang, thi thei lo, hmuh theih lo, Pathian fim umsŭn hnenah cawimawinak le ropitnak cu a kumkhuaih kumkhua um seh. Amen.

Doawknak Ṭha Do Aw

18 Ka fapa Timothy, na thuhla an rak phuan cia mi bangin raldonak ṭha na do theinak dingah, hi thucah hi na hnenah ka lo ap. 19 Zumnak le sia le ṭha theihnak ṭha cu kaihngetin do aw. Mi hrekkhat cun cucu an hlăwnhlo ih, an zumnak cu a siat mi lăwng vekah a cang. 20 An lakah Haimenias le Alexander an tel; Pathian thangsiat lo an zir theinak dingah, annih cu Setan kut ah ka hlan hai a si.

2

Thlacamdān Zirhnak

1 Curuangah a hmaisabikah, dilnak siseh, thlacamnak siseh, mi dang hrang thlacamnak siseh, lungawi thu simnak siseh mi hmuahhmuah hrangah tuah uh tiah ka lo fawrh a si. 2 Pathian ngaihsaknak hmuahhmuah le thil zahum hmuahhmuah tuahin, daite le remawtei kan nunkhawm theinak dingah, siangpahrangpawl le thuneitupawl hmuahhmuah hrang khalah thlacam uh. 3 Ziangahtile himi cu in Rundamtu Pathian mithmuhah a ṭha ih cohlantlak a si. 4 Pathian cun mi hmuahhmuah rundam ih an um ding le thutak an theih ding a duh. 5 Ziangahtile Pathian pakhat a um ih, Pathian le minung karlakah remnak Palai pakhat, Minung Khrih Jesu a um. 6 Anih cu mi hmuahhmuah tlennak hrangah amah le amah a peaw, cucu a tikcucān teah theihter a si. 7 Cuih thu theihter dingah kei cu thusimtu ah le apostol ah le zumnak ah le thutak ah Zentelpawl zirhtu ah ruat ka si. Khrih ah thutak ka sim, thuphan ka per lo.

Kawhhran sungah Nunau le Mipa

8 Curuangah hmun tin ah mipapawl cu an kut thianghlim thlirin, thinlingnak le rinhlelhnak um loih thla an cam ding ka duh.

9 Cutivek thothoin, nunaupawl khal in a mawi tawk mi hnipuan le lungput ṭha thawn thuam aw hai sehla, sámphiar simaw, sui simaw, keplung simaw, a mankhung mi hnipuan thawn simaw thuam aw loin, 10 nunaupawl cu hnaṭuan ṭha thawn thuam aw sawn hai sehla ka duh. Cucu Pathian ngaihsak tiaw nunaupawl ih ti ding mawi a si.

11 Nunau cun tlukluhnak hmuahhmuah thawn daiten umin, zir seh. 12 Cule nunau ih thuzirh ding simaw, mipa tlunih thu a neih ding simaw cu ka siang lo, daiten um sawn seh. 13 Ziangahtile Adam cu sersiam hmaisa a si ih, cuihhnu ah Evi cu sersiam a si. 14 Cule Adam cu bumin a um lo, nunau sawn cu bumin a um ih, dānpahbăltu ah a cang. 15 Sikhalsehla zumnak le duhdawtnak le a mawi tawkten thianhlimnak ih an umpeh vivo asile, nau hrin ah rundam a si ding.

3

Kawhhran Hotuih Tlinnak

1 Mi pakhat in ^aBishop si a duh ah cun, hnaṭuan ṭha a duh a si ti mi hi, rinsantlak mi ṭawngkam a si. 2 Bishop cu sawihnăwm kâi lo, nupi pakhat nei, sūpaw thei, fimkhurthiam, nuncan ṭha, khual ṭha, mi zirh thei, 3 sabitzu ri lo, mitawhhmang lo, paisa duham lo, mizaidam, mithuelhmang lo, sumpai ngaina lo a si ding a si. 4 Mai innsang ṭha zetih ukthiam, zahum zetih fāte thu hnuaiih ret thei a si ding a si. 5 Ziangahtile mi pakhat in amai innsang ziangtiih uk ding ti a theih lo ah cun, ziangtin saw Pathian kawhhran cu a kilkhawi thei ding? 6 Zumtu thar si hlah seh, culoasile puarthaunak thawn a hngal ding ih, Diabol bangin thiamlo coternak ah a tlu pang ding. 7 Cuihtlunah a leng lam mipawlih simṭhat mi a si ding a si, culole mawhthluknak ah le Diabol-ih tháng ah a tlu pang ding.

3:1^a Bishop: Kawhhran hohatu kawhnak hmin a si. Thusim lam le thuzirh lam si loin, ukawknak lam-kaihhruaiawknak lam hohatu a sawhkhih.

Dikhon Tlinnak

8 Cuvek thothoin, dikhonpawl khal mizahum, leiphir nei lo, sabitzu phâm lo le paisa duham lo, 9 sia le ṭha theihnak thiang ih zumnak thuthup kaihngettu an si ding a si. 10 Cupawl khal cu hniksak hmaisak si ta sawn hai sehla, sawihnăwm kâi lo dikhon dinhmun in rawngbawl hai seh.

11 Cutivek thothoin, an nupipawl khal mizahum, mi relsiathmang lo, sūpaw thei, thil ziangkimih rinsantlak an si ding a si.

12 Dikhonpawl cu nupi pakhat nei, anmai innsang le an fāte ṭhatei uk theitu si hai seh. 13 Ziangahtile ṭha zetih rian zotu dikhonpawl cun anmai hrangah dinhmun ṭha le Khrih Jesu ih um zumnak lamah ralṭhatnak nasazet an nei.

Pathian Ngaihsaknak Thuthup

14 A rei hlanah na hnenih rat beiseiin, hi thilpawl hi na hnenah ka ngan a si. 15 Sikhalsehla ka cām rei pangah Pathian innsang ah nangmah rori in ziangtiih um ding ti na theih theinak dingah ka ngan. Pathian innsang cu thutak ṭhuam le ṭhumawknak Pathian nung kawhhran hi a si.

16 Cule el ding um loin Pathian ngaihsaknak thuthup cu a ropi a si:

Pathian cu taksa ah a rung cang,
Thlarau in a dingfel ti a langter,
Vancungmipawl in an hmu,
Zentelpawl hnenah phuan a si,
Leitlun mipawl in an zum ih,
Ropitnak sungah laksohin a um.

4

Zumnak Tlansannak

1 Cān neta lamah cun mi hrekkhat in zumnak an tlansan ding ih, bumnak thlaraupawl le khawsiapawlih zirhnak an ngaihven sawn ding ti atu ah Thlarau cun fiang zetin a sim a si. 2 Cuvek mipawl cu depde zetih thuphan per, an sia le ṭha theihnak cu thirling ih dehpit mi vek a si. 3 Nupi-pasal neih an kham ih, a zumtu le thutak a theitupawl in lungawi thu simnak thawi an cohlan ding mi Pathian sersiam mi sapawl ei lo dingin an kham. 4 Ziangahtile Pathian sersiam mi tinkim hi an ṭha thluh ih, lungawi thu simnak thawi kan cohlan a si ahcun, hnawn ding zianghman a um lo. 5 Ziangahtile cumi cu Pathian kamsuakthu le thlacamnak in thianhlimter a si.

Khrih Rawngbawltu Ṭha

6 Zumnak kamsuakthupawl ah cawm mi siin le zirhnak ṭha fimkhur zetih na thlun zo mipawl kha unaupawl na simfiang hai asile, Jesu Khrih-ih rawngbawltu ṭha na si ding. 7 Asinan Pathian zahlonak le nutarpawlih thuanthu phuahcawp kha hrial awla, Pathian ngaihsaknak lamah săwizăwi aw sawn aw. 8 Ziangahtile taksa săwizăwiawknak cun hlawknak málte a nei, asinan Pathian ngaihsaknak cun thutiamkam atu ih nunnak hrangah le a ra thleng lai ding mi nunnak hrangah a neih ruangah ziangkim ah a hlawk a si.

9 Hihi rinsantlak le cohlan thluhtlak ṭawngkam a si. 10 Ziangahtile mi hmuahhmuah Rundamtu, a hleicein a zumtupawl Rundamtu Pathian nung kan ruahsan ruangah, nasazetin kan ṭuan ih mawhthluknak kan tuar a si. 11 Hi thilpawl hi thu pe hai awla, zirh hai aw.

Na Rawngbawlnak ah Fimkhur Aw

12 Mino na sinak hi zohman in lo nautat hlah hai seh, cuhnakin ṭawngkam ah siseh, umtlandān ah siseh, duhdawtnak ah siseh, thlarau ah siseh, zumnak ah siseh, thianhlimnak ah siseh, zumtupawlih zohṭhim ding si sawn aw. 13 Ka ra thlen lai hlanlo, casiar siseh, mi thazangpek siseh, mi va zirh siseh nasazetin tuah aw. 14 Nangmah ih um mi thilpek, elder-pawl na parih kut an suan laiih simsungnak hmangih pek mi kha thlahthlam hlah.

15 Mi hmuahhmuah hnenih na ṭhansonak a lăng theinak dingah, hih thupawl hi ngunngaih zetin ngaihtuah awla, cupawl ah cun na pumhlum in um aw. 16 Nangmah hrangah le na thuzirh mi hrangah fimkhur awla, cupawl ah cun um ringring aw. Ziangahtile cutiih na tuah a si ahcun, nangmah le na thu ngaithlatupawl na humhim ding a si.

5

Zumtu lakih Umdān Ding

1 Kum upadeuh cu na zetin kawk hlah awla, pa vekin thape sawn aw, minodeuhpawl cu unau vekin thape hai aw. 2 Nunau kum upadeuhpawl cu nu vekin, minodeuhpawl cu thianhlimnak hmuahhmuah thawn farnu vekin thape hai aw.

Nuhmei Diktak Upat Aw

3 Nuhmei a si ngaingai mi nuhmei cu upat aw. 4 Asinan nuhmei, zo vek khal in fātepawl siseh, tupawl siseh a neih ah cun, cupawl cun a hmaisabikah an inn lamah Pathian ngaihsakdān le an nu le pa rulhsaldān zir hai seh. Ziangahtile cucu Pathian hmaiah a ṭha ih, pawmtlak a si. 5 Nuhmei a si taktak mi, mah lawngih um cun Pathian a rinsan ih a sun a zanin dilnak le thlacamnak a nei ringring. 6 Asinan nuamtawl ih a nungtu nuhmei cu a nun lai khalah a thi a si. 7 Cule zumtupawl cu sawihnăwm kâi lo an si theinak dingah, hi thilpawl hi nunpi dingin thu pe hai aw. 8 Asinan zokhal amai mi le sa, a hleicein amai sungkua rori hman a ngaihsak lo a si ahcun, zumnak a phatsan ih, zumlotu hnakin a ṭha lo sawn a si.

9 Kum 60 kim hrih lo mi nuhmei cu nuhmei lakah siartelh ding an si lo. Mi pakhat ih nupi rak si dah, 10 hna ṭha ṭuan ruangih simṭhat mi, fāte rak cawm pitling, mikhualpawl rak thlengterin, mithiangpawl ke rak khawlhsakin, mizawnzaipawl rak bawmin, hna ṭha pauhpauh taima zetih a ṭuan ah cun, nuhmei ah siartel aw.

11 Asinan nuhmei nodeuhpawl cu telh hai hlah, ziangahtile an tisa câkhiarnak a ṭhan tikah, Khrih thawn a hlatawter hai ih, pasal neih an duh lehsal ṭheu. 12 An zumnak hmaisasawn an hlăwn ruangah thuṭhen an si. 13 Cun zangzel an zir ih, inn khat hnu inn khat an vâktawi vivo. Cule zangzel lawng si loin mi an rel ih, mi dang thuhla ah rak hrawlhaw vein, an rel lo ding mi thilpawl an rel ṭheu. 14 Curuangah kum nodeuhpawl cun pasal nei hai sehla, fāte neiin innsungsang lam kilkhawi hai seh, mawhthluknak ding remcâng zianghman ralpa hmuter lo hai sehla ka duh. 15 Ziangahtile mi hrekkhat Setan lamih an hawikir zo ruangah a si.

16 Zumtu mipa asilole nunau in nuhmei umpi a neih asile, anmah in câwmdawl hai sehla, kawhhran in nuhmei a si taktak mi an cawmdawl theinak dingah kawhhran buaipiter hlah hai seh.

Elder-pawl Upat Aw

17 Ṭhateih mi kaihruai theitu elder-pawl, a hleicein kamsuakthu le zirhnak lamih nasazetih a ṭuantupawl cu aletih sunlawihtlak ih ruah si hai seh. 18 Ziangahtile Cathianghlim in, «Câwcang in thlairawl a cīl laiah a hmur na ṭem lo pei,» tiah a ti ih, «Hnaṭuantu cu a hlawhman ngahtlak a si,» tiah a ti fawn.

19 Elder an hēknak cu theihpitu pahnih simaw, pathum simaw hnen ihsi lo cun rak pawm hlah. 20 Elder thilsual tuahtupawl cu elder dangpawl khal in an ṭih theinak dingah, mi zapi hmaiah kawk aw.

21 Pathian le Bawi Jesu Khrih le hril mi vancungmipawl hmaika-ah khoh zetin thu ka lo cah a si, mi pakhat duh sawnin, thleidannak thawn zianghman tuah loin, hi thilpawl hi thlun aw.

22 Zo par hmanah áwlten na kut suang hlah awla, mi dangpawlih sualpawl khalah va tel hlah; thianghlimten nangmah le nangmah kilaw aw.

23 Tidai lawnglawng in loin, na pum ruangah le na dam lo ṭheu ruangah sabitzu málten hmang aw.

24 Mi hrekkhat ih sualpawl cu an langsar ih, an thuhla cu thuṭhennak hmun ah anmai hlanah a thleng, asinan mi hrekkhat cu nehhnu lawngah an ra lang. 25 Cutivek thothoin, mi hrekkhat ih hnaṭuan ṭha cu an langsar ih, a langsar lo mi hnaṭuan ṭha khal thuh theih an si cuang lo.

6

Nan Bawipawl Upat Uh

1 Pathian hmin le a zirhnak thangsiat a silonak dingah, sál hngawngkol bâttu hmuahhmuah in an bawipawl cu upatnak hmuahhmuah cotlak an si ti thei hai seh. 2 Cule sál, zumtu bawi neitupawl cun an bawipawl cu unau an si ruangah nautat hlah hai seh, cuhnakin hlawknak cotupawl cu zumtu le duhdawt mi an si ruangah nasa sinsinin an bawipawl cu rian sawn hai seh. Hih thilpawl hi zirh awla, fawrh aw.

Zirhtu Diklo le Lungkim Tawknak Dik

3 Mi pakhat khat in zirhnak phun dang a zirh ih, kamsuakthu hriselpawl, kan Bawipa Jesu Khrih kamsuakthu le Pathian ngaihsaknak lam zirhawknak vekin a pawm lo a si ahcun, 4 anih cu mipuarthau a si, zianghman theih mi a nei lo ih, thuelawknak le ṭawngkam sullam thu ih elawk hiarnak hrisel lo a nei sawn. Cumi ihsin iksiknak, tawhawknak, mi dang relsiatnak, rinhlelhawknak ṭha lo pawl an suak. 5 Cutivekih mielhmangpawl cu lungthin bawrhhlawh le thutak pai lo, Pathian ngaihsak hi sumpai hlawknak lamzin a si tiih ruattupawl an si. Cupawl hnen ihsin nangmah le nangmah thiarfihlimaw aw.

6 Cun lungkim tawknak thawi Pathian ngaihsaknak cu hlawknak ropi a si. 7 Ziangahtile hi leitlun ah zianghman kan kenglut lo ih, zianghman kan kengsuak thei fawn lo ding. 8 Cule rawl le hnipuan kan neih mi thawn lungkim tawk uhsi. 9 Asinan len a duhtu cun sualfawrhnak ah, tháng ah le thil atthlak tampi câkhiarnak le mi siatsuah thei câkhiarnak cak zet tampi ah an tlu; cumi cun siatralnak le hlohralnak ah mi a hlăwnpil. 10 Ziangahtile paisa ngainat cu ṭhatlonak hmuahhmuah ih hrampi a si, mi hrekkhat cun sumpai mi an daw ih, zumnak ihsin an fehpêng, cule riahsiatnak tampi thawn anmah le anmah an suntlăngaw.

Zumnak Doawknak Ṭha

11 Asinan nang, Maw Pathian mi, cuih thilpawl cu tlansan awla, dingfelnak, Pathian ngaihsaknak, zumnak, duhdawtnak, tuar theinak, zaidamnak pawl cu dawi aw. 12 Zumnak doawknak ṭha cu do aw, kumkhaw nunnak cu pâwk ringring aw, cumi hrangah kawh khal na si. Theihpitu tampi hmaika-ah phuansuahnak ṭha na phuang zo. 13 Pathian, thil ziangkim tinungtu mithmuhah le Khrih Jesu, Ponṭias Pilat hmaika-ih phuansuahnak ṭha theihtertuih hmaika-ah thu ka lo cah. 14 Kan Bawipa Jesu Khrih a rung lăng hlanlo thianghlim le sawihnăwm kâi loin, hi thupek hi kil aw. 15 Cucu Pathian in amai cān teah thangṭhat mi le ^aHukim umsŭn, siangpahrangpawl lakih Siangpahrang le bawipawl lakih Bawi cun Khrih cu a langter leh ding. 16 Amah lawngin thih theilonak a nei ih, zohman ih naih theih lo tleu ah a cêng. Amah cu zohman in an hmu lo ih, a hmuh khal an hmu thei lo, a hnenah cawimawinak le kumkhaw uknak um seh. Amen.

6:15^a Hukim: Huham nei kim tinak a si.

Milianpawl hnenih Thucah

17 Tuih san milianpawl kha ngaisangaw lo ding le a hnget lo mi lennakpawl rinsan loin, thil hmuahhmuah năwmpi dingih tam zetih mi petu a nung mi Pathian rinsan sawn dingin thu pe hai aw. 18 Thil ṭha ti dingin, thil ṭha tinak lamih lian dingin le tirhsiang zet le mi dang hrangah ui lo dingin thu pe hai aw. 19 Cutin anmai hrangah a ra thleng lai ding mi cān hrangah ṭohram ṭha an khawlkhawm thei ding ih, kumkhaw nunnak an pāwk thei ding.

Zumnak Hum Aw

20 Maw Timothy! Na hnenih ap mi thil cu kilṭha awla, Pathian zahlonak le sullam nei lo phunnawinakpawl le mi in diklo zetih theihnak an ti mi dokalhnak cu hrial aw. 21 Mi hrekkhat in cuih theihnak cu ka nei an ti ih zumnak an ṭhelh. Zangfahnak na hnenah um seh. Amen.