About Bible Thianghlim | ©

BibleThianghlim – 2 THESSALONIKA

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 THESSALONIKA

123

• A ngantu: Paul
• A siartu: Thessalonika khua ih zumtupawl
• Ngan kum: A.D. 51

Thessalonika khua ih zumtupawl cu thuthangṭha huham ruangah tiduhdahnak le harsatnak karlak khalah (1:3 le 1Th 1:6; 2:14; 3:3-4, 7 zohtlang aw) zumnak le duhdawtnak ah an ṭhang vivo (1:4 le 1Th 1:6, 8; 3:6-7; 4:9-10 zohtlang aw). Sikhalsehla kawhhran sungih buainak thar dangdang ruangah a pahnihnak cakuat ngan a ṭul. Hih cakuat hi A.D. 51, a cakuat hmaisa a kuat hnu, thla málte hnu A.D. 51 ih a kuat mi a bang. Khaih cān ah Paul cu Korinth khua ah a um.

Anmah hnenih a um laiih a rak zirh mi (2:15; 3:6) le Thessalonika cakuat pakhatnak a ngan mi parah ṭhumawin hih cakuat hi Paul in a ngan mi a si (1 Thessalonika Thuhmaihruai siar aw). Zumtupawl cu Bawipaih ratsal cān tiang dinghnget thei dingah thapek le zirhbêt an ṭul. Bung khatnak ah zumtupawl kha tiduhdahnak le harsatnak tuar thei dingin tha a pe. Bawipa a rasal ding ih an ralpawl lak ihsin anmah a runsuak ding.

Bung hnihnak ah Bawipaih ratsalnak thu thawn pehparin zirhnak diklo thu ah ralrinnak a pe hai. Thutak ihsin tluksiatnak rapthlak, Khrih dodaltu lăngnak ding le sual dawnkhamtu lakhlo a sinak ding pawl an thlen hrih lo ruangah Bawipa a rasal hrih lo a si tiin a simfiang. Bung thumnak cun kawhhran sungih zumtupawlih thulunlonak thubuai thuhla a sim. Hi thu hi 1Th 4:11-12 sung khalah málte a rak sim zo nân, Paul ih thapeknak an rak ngaihthah a si ding. Zumtu hrekkhat cu Khrih ra cing ding vekih an ruah ruangah hnaṭuan an rak bansan tiah Bible zirhtu tampi cun an ruat.

Pathian duhdawtnak ah le Khrih-ih tuarfainak ah kan thinlung kha Bawipa in in hruai (3:5) ti mi thei dingin Paul in a duh ih, cumi tumtahnak neiin tiduhdah mi le buaiter mi san i kip ih zumtupawl hnenah tha a pe.

1

Cibaibûknak

1 Paul, Silas le Timothy in Pathian kan Pa le Bawi Jesu Khrih ih um, Thessalonika kawhhran mipawl hnenah:

2 Pathian kan Pa le Bawi Jesu Khrih hnen ihsin zangfahnak le hnangamdaihnak cu nan hnenah um seh.

Lungawi Thu Simnak

3 U le nau tla, nan zumnak cu nasazetin a ṭhang vivo ih, nan zaten pakhat le pakhat nan duhdawtawktăwnnak cu a luanliam ruangah nanmai thuhla ah ti ding mawi a si vekin, Pathian hnenih lungawi thu sim ding hrimhrim kan si. 4 Cuticun tiduhdahnakpawl le harsatnakpawl nan tuarnak hmuahhmuah ih nan tuarfainak le nan zumnak ruangah, Pathian kawhhranpawl hnenah kan rak tluangkhâwng ṭheu a si.

5 Cumi cun Pathian uknak hrangih mi sitlak dingih ruat nan si ti Pathian thuṭhennak dingfel hminsinnak a langfiangter. Nannih khal cumi hrangih tuar nan si. 6 Nanmah a lo buaitertupawl harsatnak thawi lehrulh hi Pathian hrangah a dingfel mi thil a si. 7 Cule nannih buainak a tawngtupawl, Bawi Jesu, a cak mi a vancungmipawl thawi a rung lăng tikah, kanmai zawngah a lo cawlhahdamter ding. 8 Pathian thei lo pawl le kan Bawipa Jesu Khrih-ih thuthangṭha a lung lo tupawl parih phuba la dingin, meialh thawn a ra ding. 9 Annih cu Bawipaih umpinak ihsin le a cahnak ropi zet ihsin ṭhenin kumkhaw siatralnak ah cawhkuan pek an si ding. 10 Cucu a mithiangpawl ih sunlawih a si theinak ding le a zumtu hmuahhmuah lakah upat a si theinak dingih amah a rat tikah, cuih Ni ah a si ding, ziangruangahtile nan hnenih thu kan lo theihter mi cu nan zum.

11 Curuangah a lo kotu kan Pathian in cuih kawhnak milih a lo ruahnak ding le ṭhatnak hrangah a ṭha mi tumtahnak kip in le huham thawi zumnak hnaṭuan kip in a lo tlamtlinternak dingah, nan hrangah thla kan cam ringring. 12 Cutin kan Pathian le kan Bawipa Jesu Khrih-ih zangfahnak zulhin, kan Bawipa Jesu Khrih hmin cu nanmah ah sunlawih a si thei ding ih, nannih khal amah ah sunlawih nan si thei ding.

2

Dān Nei Lo Pa

1 U le nau tla, kan Bawipa Jesu a ratsalnak le a hnenih kan tawnkhawmawknak ding thuhla ah, 2 Khrih ni ra thleng zo vekin, kanmai cakuat vek phun cakuat in simaw, thlarau in simaw, thusimnak in simaw, zamrang zetin nan lungthin lo hnînter hlah sehla, lo buaiter fawn hlah seh tiah kan lo ngen a si. 3 Zohman in ziangti lam hmanin lo bum hlah hai seh, ziangahtile tluksănnak a ra thlen hmaisat ih, misualrálpa, siatralnak fapa, a lăng lai hlanlo, cuih Ni cu a thleng lo ding. 4 Anih cu Pathian tiih kawh mi hmuahhmuah le an biak mi hmuahhmuah cu doin, an tlunah a khaisângaw ding. Cutin Pathian vekin Pathian temple hmun thianghlim sungah toin amah rori cu Pathian ka si tiah a tiaw ding.

5 Nan hnenih ka um laiah khan hih thilpawl hi ka lo sim ṭheu ti nan cîng nawn lo maw si? 6 Cule amai cān teih a ra lăng theinak dingah, atu ah ziang in a kham hrih ti nan thei. 7 Ziangahtile dān neihlonak thuthup cun atu khalah hna a ṭuan rero zo; atu ih a khamtu hi lakhloh a si hlan sung lawng a kham hrih ding. 8 Cuihhnu ah dān nei lo pa cu a ra lang ding, cule Bawipa in anih cu a kâ ih thaw in a hlorálter ding ih, a ratnak tleu in a ṭhiatbăl ding. 9 Dān nei lo paih ratnak cu Setan hnaṭuannak vekin, humham hmuahhmuah, hminsinnak hmuahhmuah le thuphan mangbangza hmuahhmuah thawn a si ding. 10 Cun rundam ih an um theinak ding duhdawtnak thutak cu an rak cohlan lo ruangah, a hlorál cuahco mipawl hnenah a dingfel lo mi bumnak tinkim thawn a ṭuan ding. 11 Cule himi ruangah thuphan zum dingin, Pathian in an hnenah theihthiam theilonak nasazet a thlah ding. 12 Cumi cu thutak zum loih dingfellonak ih a nuamaw sawntu hmuahhmuah thiamlo an co thluh theinak dingah a si.

Hnget zetih Dīn

13 Asinan Bawipaih duhdawt mi u le nau tla, Thlarau tithianhlimnak le thutak zumnak ruangin rundam si dingah a tir ihsin Pathian in a lo hril zo ruangah, nan hrangah Pathian hnenih lungawi thu sim ringring ding kan si. 14 Cumi hrangah kan Bawipa Jesu Khrih-ih ropitnak co ve dingah, Pathian cun kan thuthangṭha hmangin a lo ko hai a si. 15 Curuangah u le nau tla, dinghnget uhla, ṭawngkam in simaw, kan cakuat in simaw kan lo zirh mi thurosiahpawl kha kaihnget uh.

16 Cun kan Bawipa Jesu Khrih rori le Pathian kan Pa, in duhdawtu le zangfahnak ruangih kumkhaw thlangamnak le ruahsannak ṭha in petu cun, 17 nan thinlung lo thlangăm sehla, ṭawngkam ṭha le hnaṭuan ṭha tinkim ah lo hngetter hram seh.

3

Thlacam dingih Ngĕnnak

1 A netabikah, u le nau tla, Bawipaih kamsuakthu nan rak sunlawih vek khan, cak zetih karhzai le sunlawih a si theinak dingah, thla in camsak uh, 2 cuticun mithinlungkawi le misualrálpawl hnen ihsin runhim kan si thei ding. Ziangahtile mi hmuahhmuah in zumnak an nei thluh lo.

3 Asinan Bawipa cu a rinum a si, anih cun a lo hngetter ding ih, miṭha lopa hnen ihsin a lo kilhim ding. 4 Cule nan thuhla ah thu kan lo pek mi thilpawl kha nan nunpi ih nan nunpi vivo ding ti Bawipa ah zumhngehnak kan nei. 5 Cule Pathian duhdawtnak ah le Khrih-ih tuarfainak ah nan thinlung kha Bawipa in lo hruai hram seh.

Thapeknak Netabik

6 Cun u le nau tla, kan hnen ihsi nan dăwn mi thurosiah vekih a nung lo le mawi loih a nungtu unau pauhpauh hnen ihsin thiarfihlim aw dingin kan Bawipa Jesu Khrih hmin in thu kan lo pe a si. 7 Ziangahtile nanmah rori in ziangvekin kan nun cawng ding nan mawi ti nan thei, ziangahtile kannih cu nan lakah mawi loin kan nung dah lo. 8 Zo-ih rawl hman a lakin kan ei dah lo, nan lakah zohman sumpai thu ah kan lo phurritterlonak dingah, a sun a zan bāng zet le cau zetin hna kan ṭuan sawn a si. 9 Thuneihnak kan neih lo ruangah si loin, in cawn ding mi, nan zohṭhim dingah kanmah te kan tuahawk mi a si sawn. 10 Ziangahtile nan hnenih kan um lai khalah khan, «Mi pakhat khat in hnaṭuan a paih lo a si ahcun, ei khal ei hlah seh,» ti khal in thu kan lo pe.

11 Ziangahtile mi ṭhenkhat cu nan lakah mawi loin an um ti hna in kan thei. Annih cun hna ṭuan loin, mi dang thuhla ah an va hrawlhaw rero sawn men. 12 Cuvek mipawl cu daiten hna ṭuan dingin le anmai rawl ei dingin kan Bawipa Jesu Khrih hmin in thu kan pe ih kan fawrh a si. 13 Asinan u le nau tla, nannih cun thil ṭha tuah ning hlah uh.

14 Cule mi pakhat in hih cakuat sungih kan ṭawngkam a thlun lo asile, cu pa cu hminsin uhla, a ning a zah theinak dingah kawm hlah uh. 15 Asinan ral vek cun ruat hlah uhla, unau vekin nun zirh sawn uh.

Cibaibûknak Netabik

16 Atu ah daihnak Bawipa rori cun a phunphunin hnangamdaihnak lo pe camcin sehla, Bawipa cu nan zate hnenah um hram seh.

17 Cibaibûknak hi keimah Paul in ka kut rori ih ka ngan mi a si, hitivekih ka ngan hi ka cakuat kip ih hminsinnak a si.

18 Kan Bawipa Jesu Khrih-ih zangfahnak cu nan zate hnenah um hram seh. Amen.