About Bible Thianghlim | ©

BibleThianghlim – GALATIA

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

GALATIA

  • A ngantu: Paul
  • A siartu: Galatia thlang lamih um zumtupawl
  • Ngan kum: A.D. 49

Hih cakuat hi «Galatia peng ih kawhhranpawl,» hnenih Apostol Paul ih kuat mi a si (1:1-2). Paul in a missionary khualtlawn hmaisabikah hi ram thlang lamih khawpipawl ah kawhhran a rak dĭn (Apo 13:14-14:23). A vei hnihnak (Apo 16:6) le a vei thumnak (Apo 18:23) missionary khual a tlawn tikah, cuih peng cu a pálsal.

Hih cakuat a ngan cān hi a vei hnihnak le vei thumnak missionary khual a tlawnsal hlanih a kuat mi a si ding. Cumi cu Galatia bung 1-2 siar tikah a langfiang. Hih cakuat hi Paul in A.D. 49 hrawngih a kuat mi si ding a bangbik. Cucu Paul in a vei khatnak missionary khual a tlawn hnuah, Galatia thlang lamih um kawhhranpawl hnenih a ngan mi a si ding tinak a si (Apo 14:27-28).

Apostolpawlih Cangvaihnak cabu bung 13-14 kan siar hmaisa asile, Galatia cakuat hi theihthiam a áwl cuang. Jew-mi mi hrekkhat le Zentel mi tampi cu Paul ih thusim mi ruangah Bawipa lamah an hawikir. Asinan Jew-mi mi hrekkhat cun amah an do. Donak nasazet karlakah mi tampi cu Khristian ah an cang. Paul le a hnaṭuanpipawl in kawhhran an dĭn ih, elder-pawl an nĕmhnget. Paul in Galatia a fehsan tikah, Jew-pawl in zumtu tharpawl kha an hruaipêng. Cuih an zuamnak cu an hlawhtling zet a bang.

Cutikah Paul in an hnenih a rak phuan mi thuthangṭha humhimin a zamrang thei bikin ca a kuat hai. Paul in thiamconak le thianhlimnak cu Dān thil ti ruangah si loin, Khrih zumnak ruang lawngin a sizia zumtupawl a zirh. Galatia bung hmaisa pahnih cu Paul in amai thuhla a relnak a si. A laiih bung pahnih cu thurin thu a si ih, a netabik bung pahnih cu thurin hmansuahnak lam thu a si.

Paul in ralṭha zetin, «thuthangṭha thutak» a sim (2:5, 14), «Khrih in in zalenter zo ruangah cuih zalĕnnak ah cun dinghnget» dingin zumtupawl hnenah thu a pe (5:1).

Thuhlawm Ṭhen

  • I. Thuhmaihruai (1:1-9)
  • II. Paul in thuthangṭha diktak humnak ah amai nun le a rawngbawlnak thu a theihter (1:10-2:21)
  • III. Paul in thuthangṭha diktak humnak ah a ṭul mi thurin a zirh (bung 3-4)
  • IV. Paul in thuthangṭha diktak humnak ah a zirh mi thu a nunpi (5:1-6:10)
  • V. Thukharnak (6:11-18)

1

Cibaibûknak

1 Minungpawl ih thlah le mi pakhat khat hmangih thlah si lo, mithi lak ihsin Jesu kaithotu Pa Pathian le Jesu Khrih-ih thlah mi Apostol Paul le 2 ka hnenih a um mi unaupawl hmuahhmuah thawn,

Galatia peng ih a um mi kawhhranpawl hnenah:

3 Pa Pathian le kan Bawipa Jesu Khrih hnen ihsin zangfahnak le hnangamdaihnak cu nan hnenah um hram seh. 4 Anih cu Pa le kan Pathian duhnak bangtukin, tuih san san sia sung ihsin in runsuak theinak dingah, kan sualpawl hrangah Jesu Khrih cu a peaw. 5 Pathian kan Pa hnenah ropitnak cu kumkhuain kumkhua tiang um ko seh. Amen.

Thuthangṭha dang a Um Lo

6 Khrih zangfahnak hmangin a lo kotu hnen ihsin khati tluk rangih thuthangṭha danglamih nan rak ṭhawnhlo mai cu ka mang a bang. 7 Cumi cu thuthangṭha ngaingai a si lo. Nanmah lo buaiter ih, Khrih thuthangṭha lingletter duhtu mi hrekkhat an um a si sawn. 8 Asinan kanmah hman in siseh, van ihsi a ra mi vancungmi khal in siseh nan hnenih kan rak phuan zo mi kalhih thuthangṭha dang nan hnenih an phuan asile, a phuangtu cu camsiatin um seh. 9 Hi hlanih kan rak lo sim zo vekin, atu ah ka lo simsal, mi pakhat khat in nan rak cohlan cia zo mi kalhih thuthangṭha dang nan hnenih a phuan a si ahcun, cupa cu camsiatin um seh.

10 Ziangahtile atu ah minung ih pawm ding maw, Pathian ih pawm ding so ka hawl? Asilole minung lunghmuiter maw ka tum? Ziangahtile minung ka lunghmuiter men a si ahcun, kei cu Khrih-ih ṭemṭawn sál ka si lo ding.

Pathian in Paul a Ko

11 Asinan u le nau tla, ka rak phuan mi thuthangṭha hi minung ih tuahcawp mi thu a si lo ti ka lo theihter. 12 Ziangahtile cumi cu minung hnen ihsi ka ngah mi a si lo ih, mi ih in zirh mi khal a si lo, Jesu Khrih phuanlăngawknak ihsin ka ngah mi a si sawn.

13 Ziangahtile Jew-pawlih biaknak ah hi hlanih ka umdānpawl, Pathian kawhhran nasazetin ka tiduhdah ih siatsuah ka tum ciamco thu kha nan hna in nan rak thei. 14 Jew-pawlih biaknak lamah cun ka miphunpawl lakah ka khukṭhirual mi tampi ka hleih, kan pupápawlih dān le dūn pawl parah nasazetin ṭhahnem ka rak ngai.

15 Sikhalsehla amai lunghmui zawng vekin ka nuih pum sungih ka um lai ihsin Pathian cun i serhhran ih, a zangfahnak in i ko. 16 Zentelpawl hnenah Jesu Khrih thuthangṭha ka phuan theinak dingah, a Fapa ka hnenih phuanlăng cu a lunghmui zawng a si, kha laiah khan titsa le thisen ka răwn lohli lo. 17 Ka hlanih apostol a si mipawl răwn dingah Jerusalem khalah ka so lo; Arabia Ram ah ka feh lohli sawn ih, Damaskas khua ah ka kirsal.

18 Cun kum thum hnuah Peter táwng dingin Jerusalem ah ka hung so ih, a hnenah ni hleinga ka câm. 19 Asinan Bawipaih naupa James siarlo, apostol dang zohman ka hmu lo. 20 Ngai hnik uh, nan hnenih ka ngan mi thilpawl hi Pathian hmaiah thuphan ka sim lo. 21 Cuihhnu ah, Siria ram le Silisia ram ah ka feh. 22 Cule Khrih ih a um mi, Judia peng kawhhranpawl cun pumpak takin in rak thei lo. 23 Asinan, «Hlanih in rak tiduhdahtupa khan atu ah hlanih siatsuah a rak tum rero mi zumnak thu a phuang,» ti lawng an hna in an rak thei. 24 Cule keimah ruangah Pathian an thangṭhat.

2

Apostolpawl in Paul an Cohlang

1 Cun kum hleili a rei hnuah, Barnabas thawn Jerusalem ah ka hung fehsal, Tita khal ka hnenah ka hruai. 2 Cule ka hnenih Pathian thuphuansuah mi ruangah ka hung feh ih, Zentelpawl hnenih ka phuan mi thuthangṭha cu anmah ka simfiang hai. Asinan a lak menih ka tlanlonak dingah le ka tlan zonak kha a lak men a silonak dingah, hruaitu ih an ruah mipawl cu a dangten ka simfiang hai. 3 Ka hnenih um Tita cu Grikmi asinan, serh zim tan tengteng dingin an fial lo. 4 Cule cumi cu a thuptei an hruailuh mi unau dēupawl ruangah a si, sál ih in hruai theinak dingah, annihpawl cu Khrih Jesu ih zalĕnnak kan neih mi kha thlingthla dingin athupten an lut. 5 Thuthangṭha thutak nan hnenih a umpeh vivo theinak dingah, cān málte sung hman cuih unau dēupawl hnenah kan rak peaw lo.

6 Asinan hruaitu ih ruah mipawl cu ziang vek mi an si khalle ka hrangah a thupi lo. Pathian cun leng lam lăngdān menin mi a pawm lo, ziangahtile hruaitu ih ruah mipawl cun ka phuan mi thu ah bêt mi zianghman an nei lo. 7 Cuhnakin serh zim tan mipawl hrangah thuthangṭha cu Peter hnenih ap a si vekin, serh zim tan lo mipawl hrangah thuthangṭha cu ka hnenah ap a si ti kha an hmu sawn riangri. 8 Ziangahtile serh zim tan mipawl hnenih apostol si dingih Peter hnenih a ṭuantu khan Zentelpawl hrangah apostol si dingin keimah ah a ṭuan a si. 9 Sutpiṭhuampawl ih an ruah mi James, Kefas le John tepawl in ka hnenih pek mi zangfahnak hi an theihfiang tikah, kannihpawl hi Zentelpawl hnenih feh dingin le annih cu serh zim tan mipawl hnenih feh dingin, keimah le Barnabas hnenah pawlkawmnak vawrh lam kut in rak pe. 10 Annih in mifarahpawl kan hngilh lo ding lawng an duh, cumi rori cu keimah khal ka tuah hiar zet mi a si.

Paul in Peter a Dokalh

11 Peter cu Anṭiok khua a thlen tikah, mawhthluk dingih a um ruangah hmaităwnin amah cu ka dokalh. 12 Ziangahtile James hnen ihsin mi hrekkhat an ra thlen hlanah cun, anih cu Zentelpawl thawn rawl an rak eitlang. Asinan cupawl an ra thlen tikah, serh zim tan mipawl a ṭih hai ruangah dung a sīp ih, a thiarfihlimaw. 13 Cule a dang Jew-pawl khal ṭhaawterin a hnenah an tel ve. An ṭhatawkternak cun Barnabas tiangin a hruaipêng.

14 Sikhalsehla annih cu thuthangṭha thutak bangtukin dĭng zetin an feh lo ti ka hmuh tikah, an zate hmaika-ah Peter hnenah, «Nangmah cu Jew-mi si siin, Jew-pawl nundān vekih nung loin, Zentelpawl vekih na nun asile, ziangahso Zentelpawl cu Jew-pawl vekih nunter hramhram na tum? 15 Kannih cu suahkeh ihsin Jew-mi kan si ih, Zentel misualpawl kan si lo. 16 Minung cu Dān thlunnak ruangin thiam a co lo ih, Jesu Khrih zumnak ruang sawnin a si ti theiin, Dān thlunnak ruangin si loin, Khrih zumnak ruangin thiam kan co theinak dingah kannih khal in Khrih Jesu cu kan rak zum a si; ziangahtile Dān thlunnak ruangin zohman thiam an co lo ding.

17 «Khrih ruangih thiam coter mi si dingih kan hawl laiah kanmah rori khal misual ih hmuh kan si ah cun, Khrih cu sual karhtertu a si maw? Si lamlam hlah! 18 Ziangahtile ka rak siatbăl mi thilpawl ka saksal asile, keimah le keimah dānpahbăltu ah ka tuahaw a si. 19 Ziangahtile Pathian hrangih ka nun theinak dingah, Dān hmangin Dān lamah ka thi a si. 20 Kei cu Khrih zawngah khĕnbetin ka um, a nungtu cu kei ka si nawn lo, keimah ah Khrih a nung sawn a si; cule atu taksa ih ka nun hi in duhdaw ih ka hrangih peawtu Pathian Fapa zumnak ih nung ka si. 21 Pathian zangfahnak ka hnáwng lo, ziangahtile dingfelnak cu Dān ihsin a rat asile, Khrih cu a lakih thi a si ding,» tiah ka ti.

3

Zumnak Maw, Dān Thlun

1 Maw Galatia mi-âpawl! Nan hnenah fiang zetin an khĕnbet mi Jesu Khrih thu kan rak lo sim zo, thutak nan lunlonak dingah zo in so lo dawi â? 2 Himi lawng hi nan hnen ihsin zir ka duh: Thlarau cu Dān thlunnak in maw, hna in thuthangṭha nan rak thei ih, nan zumnak ruangin so nan co? 3 Hi tluk lawmmamin maw nan rak at? Thlarau in nan rak thăwk ih, atu ah tisa in nan netter ding maw? 4 Thil khati zât zozai kha teh a lak menin maw nan rak tuar, zianghmanlo men maw a si thluh ding? 5 Curuangah nan hnenih Thlarau a lo petu le nan lakih thilmakpawl a tuahtu in cumi cu Dān thlunnak ruangah maw, hna ih nan rak theih mi nan zumnak ruangah so a tuah?

6 Cumi cu, «Abraham cun Pathian a zum ih, cumi cu a hrangah dingfelnak ih siarsak a si,» ti vek khan a si. 7 Curuangah zumnak parah ṭhumawih a nung mipawl lawng Abraham tefa an si. 8 Cule Cathianghlim in Zentelpawl cu Pathian in zumnak parah ṭhumawin thiam a coter ding ti rak hmu cia-in, «Nangmah ah miphun hmuahhmuah thlawsuah an si ding,» tiah Abraham hnenah thuthangṭha a rak sim cia. 9 Cuti a si ruangah zumnak ih a nungtupawl cu zumnak nei Abraham thawn thlawsuah an si.

Dān in Camsiatnak a Keng

10 Ziangahtile Dān thlunnak parih a ṭhumawtu hmuahhmuah cu camsiatnak hnuaiah an um; ziangahtile, «Dān cazual sungih ngan mi thil hmuahhmuah a tuah ringring lo tu pauhpauh cu camsiat an si,» tiih ngan a si. 11 Asinan Pathian mithmuhah zohman Dān ihsin thiam an co lo ti cu a fiang. «Ziangahtile mifel cu zumnak in a nung ding,» ti a si. 12 Dān cu zumnak parah a ṭhumaw lo, asinan, «Cuih thilpawl a thluntu cu cupawl in a nung ding,» ti a si.

13 Khrih cu kan hrangah camsiat mi ah cangin, Dān ih camsiatnak ihsin in rak tlen zo, ziangahtile, «Thing parih thlai mi pauhpauh cu camsiat mi an si,» tiih ngan a si. 14 Abraham-ih thlawsuah cu Khrih Jesu thawngin Zentelpawl hnenah a thleng ih, zumnak thawngin tiamkam Thlarau kan co theinak dingah, Khrih cun in rak tlen a si.

Dān le Thutiamkam

15 U le nau tla, milai ṭawngdān vekin ka ṭawng ding: milai thukham si hman sehla, nĕmhngeh a si hnuah cun, zohman in an phelh dah lo, asilole a bêt khal an bêt dah lo. 16 Cun Pathian in Abraham hnen le a Cithlah hnenah thutiamkampawl a tuah. «Na cithlahpawl hnenah,» tiin mi tampi hnenih sim vekin a sim lo, tesinfa pakhat hnenih sim vekin, «Na Cithlah hnenah,» tiin a sim sawn, cucu Khrih a si. 17 Cule hihi ka sim a si, Pathian in Khrih ah a rak nĕmhngeh zo mi thukham cu kum 430 hnuih rak um mi Dān in a thaihlo thei lo ih, thutiamkam khal zianghmanlo ih cang ko a tuah lo. 18 Ziangahtile roconak cu Dān parih ṭhumaw a si ahcun, thutiamkam parih ṭhumaw a si nawn lo; asinan Pathian in Abraham hnenah roconak cu thutiamkam parah ṭhumawin a pe.

Dānih Tumtah

19 Asile Dān cu ziang hrangih pek a si? Dānpahbălnak ruangah thutiamkam a tuahnakpa, cithlah a rung lăng hlan sung Dān cu bêt a si, vancungmipawl hmangin remnak palai kut in Dān cu dĭn a si. 20 Remnak palai cun khat lampawl lawng ai a awh lo, cuhnakin Pathian sawn cu pakhat a si.

21 Cuti asile Dān cun Pathian thutiamkampawl a dodal maw si? Dodal lamlam hlah! Ziangahtile nunnak mi pe theitu Dān pek zo rak si ta sehla, thungaiten dingfelnak cu Dān parih ṭhumaw a si ding. 22 Asinan Jesu Khrih zumnak ruangih thutiamkam cu a zumtupawl hnenih pek a si theinak dingah, Cathianghlim in mi hmuahhmuah cu sual hnuaiah a rak kharkhum thluh.

23 Sikhalsehla zumnak a ra thlen hlan cu a ra lang leh ding mi zumnak hrangah Dān cun in kharkhum ih, in rak kil a si. 24 Curuangah Khrih hnenih hruai thlen kan si theinak dingah le zumnak ruangih thiam kan co theinak dingah, Dān cu in kilkhawitu le in zirhtu a si. 25 Asinan zumnak a ra thlen hnuah cun, kannih cu kilkhawitu le zirhtu hnuaiah kan um nawn lo.

Pathian Fāte

26 Ziangahtile nan zaten Khrih Jesu zumnak thawngin Pathian fāte nan si. 27 Ziangahtile Khrih sungih baptisma a co zotu nan zaten Khrih in nan rak thuamaw zo a si. 28 Nan zaten Khrih Jesu ah pumkhat nan si ruangah, Jew-mi ti le Grikmi ti a um lo, sál ti le miluat ti khal a um lo ih, mipa ti le nunau ti khal a um lo. 29 Cule nannih cu Khrih-ih ta nan si le, Abraham-ih cithlah nan si ih, thutiamkam bangtukin ro cotu nan si.

4

1 Atu ah hihi ka sim a si, ro cotu cu ziangkim parah hotu si hman sehla, nauhak a si sung hmuahhmuah cu sál thawn danglamnak zianghman a um lo. 2 Sikhalsehla a pa ih bikhiah cān a thlen hlan sung cu kilkhawitupawl le zohkhentupawl ih kut hnuaiah a um. 3 Cutivek thothoin kannih hnen khalah a si, nauhak kan si laiah cun, leitlun thuhramthawh zirhawknak hnuaiah sál kan rak si. 4 Sikhalsehla a tikcucān a kim tikah, Pathian in a Fapa a run thlah ih, nunau sungin Dān hnuaiah a suak. 5 Cutin Dān hnuaiih umpawl tlen dingah le fa sinak kan co theinak dingah a si.

6 Cule fa nan si ruangah Pathian in a Fapaih Thlarau cu nan thinlung sungah a run thlah, cuih Thlarau cun, «Abba, ka Pa!» tiah a au. 7 Curuangah nang cu sál na si nawn lo ih, fa na si sawn a si. Fa na si ahcun, Khrih zarah Pathian ro cotu na si.

Paul in Galatia-mipawl a Vei

8 Cutisikhalsehla thungaiten, Pathian nan rak theih lo laiah khan suahkeh ihsi pathian a si lo mipawlih sál ah nan rak um. 9 Asinan atu ah cun Pathian nan rak thei, asilole Pathian mi theih nan si ahcun, ziangtin saw a ṭawnṭai mi le ṭhathnemnak nei lo thuhramthawh zirhawknak ah hawikirin an sál ih cān nan duhsal? 10 Nipawl, thlapawl, tikcucānpawl le kumpawl tla nan ul. 11 Nan hrangih nasazetih ka ṭuan mi hi a lak men a si pang ding ti ka lo phansak.

12 U le nau tla, kei khal nanmah vek ka si ruangah, nannih khal keimah vek si dingin ka lo ngen a si. Nannih in ka hnenah thil ṭhalo zianghman nan rak tuah lo. 13 Nan hnenih thuthangṭha ka phuan hmaisabik ṭum ah khan ka taksa a ṭawnṭaihzia nan thei. 14 Cule ka titsa ah hniksaknak um cing khal in nannih in in nautat lo ih, a hnawn khal in hnáwng lo. Pathian vancungmi vekin le Khrih Jesu vek rori in in rak cohlang sawn. 15 Cuti asile, nan rak neih mi thlawsuah cu ziang a si? Ziangah cutin ka ti tile, thil cang thei si sehla nan mit rori hman phawrhsuak tahratin in rak pe zo ding ti ka lo theihpi. 16 Thutak ka lo sim ruangah nan ral ah maw ka can?

17 Mi dang, nan hrangih ṭhahnemngaitupawl hin a ṭha zawngin ṭhahnem an ngai lo; a si, an hrangih ṭhahnem nan ngai theinak dingah kan hnen ihsin lo ṭhen an duh. 18 Asinan nan hnenih ka um lai lawngah si loin, ziang tik lai khalih thil ṭha hrangih ṭhahnemngai ringring hi a ṭha. 19 Ka fahniangletla, Khrih bang ko thăwmngah thluh nan si hlanlo fahrinnat tuar vekin ka lo vei hai a si. 20 Atu ah nan hnenah umin ka aw danglamter ka duh; ziangahtile nanmah lo rinhlelhnak ka nei.

Hakar le Sarah

21 Nannih Dān hnuaiih um a duhtupawl, in sim hnik uh, Dān thu nan ngaithla a si lo maw? 22 Ziangahtile Abraham in fapa pahnih a nei: pakhat cu sálnu hnen ihsin a si ih, a dang pakhat cu miluatnu hnen ihsin a si, tiih ngan a si. 23 Sálnu cun milai dān in fapa a hring ih, miluatnu cun thutiamkam thawngin fapa a hring.

24 Cuih thilpawl cu khaikhinnak thu a si. Ziangahtile cuih nunau pahnih cun thukham pahnih ai an awh: nunau pakhat sawn cun Sinai Tlang ai a awh. Sál si ding mi fa a hring ih, cu nu cu Hakar a si. 25 Ziangahtile hih Hakar cun Arabia ram ih Sinai Tlang ai a awh. Tuihni ih Jerusalem thawn an bangaw ih, a sungih um a falepawl thawn sál ah an tâng. 26 Asinan tlun lam Jerusalem cu sál a si lo ih, cumi cu kan zateih nu a si.

27 Ziangahtile,

«Nang micing, fa hring dah lo,
Lungawiaipuangin um aw!
Nang fahrinnat tuar dah lo,
Puaksuakin au aw!
Ziangahtile pasal nei nunau hnakin
Thlauthlak mi nunau in fa a nei tamsawn,»

tiih ngan a si.

28 U le nau tla, Isak vekin, kannih cu thutiamkam fāte kan si. 29 Asinan milai dān ih hrin mi fapa in Thlarau dān ih hrin mi fapa cu a tiduhdah, atu khalah hin cutivekcun a si thotho. 30 Sikhalsehla Cathianghlim sungah ziangtin a um? «Sálnu le a fapa hi dawisuak aw, ziangahtile sálnuih fapa cu a luat mi nuih fapa ro copitu ding a si lo,» tiin a um.

31 Curuangah u le nau tla, kannih cu sálnuih fāte kan si lo ih, a luat mi nuih fāte kan si sawn a si.

5

Khrih ah Zalĕnnak

1 Khrih in in zalenter zo ruangah cuih zalĕnnak ah cun dinghnget uhla, sáltannak hngawngkol ah va tāngsal nawn hlah uh.

2 Ngai hnik uh, kei, Paul in nan hnenah ka lo sim, serh zim nan tan asile, Khrih cu nan hrangah zianghman a ṭhahnem lo ding. 3 Cule serh zim a tantu mi kip hnenah Dān thu hmuahhmuah thlun dingih bâktu a si ti ka theihtersal. 4 Dān in thiam a lo coter asile, Khrih cu nan hrangah ṭhathnemnak nei lo ah a cang; zangfahnak cu nan rak tluksăn a si. 5 Ziangahtile kan ruahsan mi zumnak parih ṭhumaw mi dingfelnak cu, Thlarau zarah hngakhlap zetin kan hngak a si. 6 Ziangahtile Khrih Jesu ah serh zim tan siseh, tan lo siseh, zianghman a ṭhahnem lo, duhdawtnak hmangih zumnak hnaṭuan mi cun ṭhathnemnak a nei sawn.

Duhdawtnak in Dān a Kimter

7 Ṭha zetin nan tlân. Thutak thu lung lo dingin zo in so a lo kham? 8 Hitivek ruahnak cu a lo kotu hnen ihsin a ra lo. 9 Thilnu málte in sang hlawm pumpuluk a thoter. 10 Lungthin dang nan nei lo ding tiah Bawipa ah zumhngehnak ka nei. Asinan buainak a lo petu cu zo a va si khalle a parih thuṭhennak cu a tuar ding.

11 Cule u le nau tla, kei in serh zim tan thu phuang ningla, ziangahso tiduhdahnak cu ka tuar lai hrih? Cucu phuang ningla, khraws ih mi a tlukbahternak cu a reh ding. 12 Buainak a lo petupawl cu anmah le anmah sâtcataw hai sehla ka duh!

13 Ziangahtile u le nau tla, nannih cu zalen dingih kawh mi nan si; nan zalĕnnak cu tisa hrangah remcānnak ah hmang loin, duhdawtnak in pakhat le pakhat rianawtăwn sawn uh. 14 Ziangahtile, «Nangmah le nangmah na duhdawtawk vekin na innhnen na duhdaw pei,» ti mi ṭawngkam pakhat ah Dān hmuahhmuah a famkim ṭheh.

15 Asinan pakhat le pakhat nan keuaw ih nan eiawk asile, pakhat le pakhat nan hlohralawkterlonak dingah ralring uh!

Thlarau ih Feh

16 Hihi ka sim a si: Thlarau ah feh uh, cule tisa câkhiarnak cu nan tuahsuak hrimhrim lo ding. 17 Ziangah cutin ka ti tile tisa duhnak cun Thlarau duhnak a dokalh ih, Thlarau duhnak in tisa duhnak a dokalh; annih cu pakhat le pakhat an dokalhaw. Curuangah nannih cun nan tuah duh mi thilpawl nan tuah lo. 18 Asinan Thlarau ih hruai mi nan si ahcun, Dān hnuaiah nan um lo.

19 Cule tisa thil tipawl cu hipawl ah hin a langfiang a si, cupawl tla cu: uiretnak, nunau-mipa sualnak, bawrhhlawhnak, fihnungza hursualtuahnak, 20 milem biaknak, dawithiamnak, mi huatnak, tawhawknak, thîkthusiatnak, thinlingnak, ṭānghmasialnak, lungruallonak, zirhsualnak, 21 iksiknak, laithahnak, zurîtnak, zu hmun năwmcēnnak le cuvek thilpawl an si. Cuvek thilpawl a tuahtu cun Pathian uknak cu ro ah an co lo ding ti hi hlanih ka rak lo sim vekin ka lo sim cia a si.

22 Asinan Thlarau rah cu duhdawtnak, aipuannak, hnangamdaihnak, thinsaunak, nunnemnak, ṭhatnak, rinumnak, 23 zaidamnak, sūpawk theinak pawl an si. Cuvek thilpawl dokalhtu dān a um lo. 24 Khrih-ih ta a si mipawl cun tisa cu a duhhiarnak le a câkhiarnak thawn an khengbĕt zo. 25 Thlarau ih kan nun asile, Thlarau thotho ah feh uhsi. 26 Mi dang hnakih ṭhasawn ah ruat aw hlah uhsi la, pakhat le pakhat thinṭeuawter loin, pakhat le pakhat iksik aw hlah uhsi.

6

Mi hmuahhmuah hrangih Thil ṭha Tuah

1 U le nau tla, mawhsualnak in mi pakhat a kaih asile, nannih thlarau mipawl in cu pa cu zaidamnak thinlung thawn tungding uh, fimkhur aw, culole sualfawrhnak na táwng ve pang ding. 2 Pakhat le pakhat phurrit sâwngawtăwn uhla, cutizawngin Khrih dān cu nan kimter a si. 3 Ziangahtile mi pakhat in zianghman si si loin, mithupi ih a ruahawk asile, amah le amah a bumaw a si. 4 Asinan mi kip in anmai hnaṭuan mi cio cekfel hai seh, cule mi dang parah si loin amai par lawngah aipuannak an nei ding. 5 Ziangahtile mi kip in mai phur ciar an phur ding a si.

6 Kamsuakthu zirhnak a dawngtu cun, a zirhtu hnenah thil ṭha a neih mi hmuahhmuah hlawm ve seh.

7 Bumin um hlah uh, Pathian cu hmuhsuam men ding a si lo; ziangahtile mi in a tuh mi pauhpauh cu, a ah khal a at ding. 8 Ziangahtile amai tisa lamih a tuhtu cun cuih tisa ihsin siatralnak a at ding, asinan Thlarau lamih a tuhtu cun Thlarau hnen ihsin kumkhaw nunnak a at ding. 9 Cule thil ṭha tuah dingah thanau hlah uhsi, ziangahtile kan bansan lo asile, a tikcucān teah kan at leh ding. 10 Curuangah cān remcâng kan neihdān ihzirin, mi hmuahhmuah hnenah thil ṭha tuah uhsi, a hleicein zumnak ih kan sungkuapawl hnenah tuah uhsi.

Serh Zim Tan Si Lo, Pathian Sersiam Thar

11 Ka kut rori in nan hnenah cafáng tumpi pi ih ca ka ngan mi hi zoh uh!

12 Milai hmuh ih ṭha si a duhtu hmuahhmuah in, serh zim tan dingin an lo fial. Khrih-ih khraws ruangah tiduhdahnak an tuarlonak ding hrang lawngah cumi cu an tuah a si. 13 Ziangahtile serh zim tannak a cotupawl hman in Dān thu cu an thlun cuang lo, asinan nan taksa ih tluang an khawnnak dingah serh zim nan tan ding an duh. 14 Sikhalsehla kan Bawipa Jesu Khrih-ih khraws siarlo tluangkhawnpi dah lo hram ningla ka duh, amah zarah khawvel hi ka hrangah khĕnbet a si zo ih, kei khal khawvel hrangah khĕnbet ka si zo. 15 Ziangahtile Khrih Jesu ah cun serh zim tan siseh, tan lo siseh, zianghman a ṭhahnem lo, sersiamtharnak sawn hi a thupi mi cu a si.

16 Cule cuih dān vekih a nungtu hmuahhmuah hnenah le Pathian-ih Israel parah hnangamdaihnak le zahngainak um hram seh.

17 Atu thăwkin zohman in i tibuai nawn hlah hai seh, ziangahtile ka taksaruangpum ah Bawi Jesu-ih hmaphe ka pu a si.

18 U le nau tla, kan Bawipa Jesu Khrih-ih zangfahnak cu nan thlarau ah um hram seh. Amen.