About Bible Thianghlim | ©

BibleThianghlim – HABAKKUK

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

HABAKKUK

123

• A ngantu: Habakkuk
• A siartu: Judah (Pathian minungpawl)
• A huap sung cān: B.C. 606 hrawng

Habakkuk cu Judah thuanthu ih tikcucān harsat cān ah rawng a bawl.

Pathian duhzawngih tundinsal tumtu Josiah lalnak hnuaiah (B.C. 640-609) Judah-mipawl cun ṭhangphawknak fate an tep. Asinan amah cu B.C. 609 ah thah a si. Amah hnuih siangpahrangpawl in mipi cu sual malsak sinsin ah an hruai. Cuvek buainakpawl hleiah, uktu Assiria cu uktu thar Babilon kut ah B.C. 612 ah a tlu ih, Babilon cu leitlun pumpuluk uktu a hung si. Habakkuk in amai san ih lalram le lalram karlakih thil thleng mipawl a ruah tikah, Pathian thuṭhennak theithiam loin thusuhnak a nei.

Bung 1-2 ah Habakkuk-ih thusuhnakpawl, vuivainakpawl le Pathian-ih a sannakpawl a dăwtdăwtin kan hmu.

Habakkuk san ah Judah-mipawl an sual zet laiah a dingfel mi Pathian in zianghman ti lo ih a um menmen hi ziangruangah a si tiin Habakkuk in thu a sut (1:2-4). A hmaisabik Pathian ih sannak cu anih in Judah-mipawlih sualnak cu hmu loin a umsan men lo; Babilon-mipawl kha Judah dantattu ding hmanrua ah a tungding ding ti a si (1:5-11).

Babilon-mipawl cu zahngainak nei lo le an hlawhtlinnak cu rairing mipawlih pathianpawl ruangah a si ti zumtu an si. Curuangah Habakkuk cu a buai sinsin. Pathian in a tumtah mi tisuaktu dingah miphun sualrál sinsin a hmang ding ih, cuih Babilon-mipawl cun an nehnak cu an milem pathianpawl ruangah a si tiah thangṭhatnak an pe ding.

Habakkuk cabu-ih a laimu Bible bung le câng cu 2:2-5 hi a si. Amai cān teah Pathian a cāngvai ding. Babilon-mipawl vek mihngalpawl cu thiamlo coter an si ding ih, dāntat an si ding, asinan midingfel cu rinnak in a nung ding ti hi Habakkuk in a cinkeng tengteng a ṭul. A mipawl in amah an rinsan ding Pathian in a duh.

Harsatnak cān khalah a mipawl in amah ah himnak le ruahsannak an hmuh ding a duh.

Pathian-ih sannak a pahnihnak cu 2:6-20 hi a si. Babilon-mipawl cu an nun sualralnak ruangah Pathian in thiamlo a coter hai (2:6, 9, 12, 15, 19). Pathian in annihpawl cu dān a tat hai ding.

Habakkuk in a theihthiam hnuih a thusim mi cu thangṭhatnak hla a si. Habakkuk cu Pathian thawn an táwngaw ih, khawruahharin a um (3:1-2). Pathian-ih sannak 3:3-15 cu a mipawl parih Izip ram ih an um ihsin Kanaan ram ih an luh (B.C. 1450-1390) tiangih khawruahharza a thil ti mipawl thlirsalnak a si. Cuih tikcucān cu Pathian huham le kilkhawinak phuanlăngnak a si.

A netabik Habakkuk-ih sannak cu 3:16-19 ah kan hmu. Siatnak maksak lakah Pathian ka rinsan thei! Curuangah Pathian cu hngangam ten ka hngak thei, boruak harsa lakah lungawiaipuangin ka um thei ih, Jehovah ah nehnak ka co thei ti hi Habakkuk-ih sannak a si.

1

1 Profet Habakkuk ih dăwn mi thuphuan.

Habakkuk-ih Thusuhnak

2 Maw Jehovah, ziang tik tiang so ka au ding ih,
I ngaithla lo ih na um ding?
Na hnenah, «Thahrumsuahnak!» tiih ka au hmanah,
Nang in i run lo ding.
3 Ziangah mawhsualnak i hmuh ih,
Buainak hmu ko i tuah?
Ziangahtile sualralnak le thahrumsuahnak ka hmaiah an um;
Ĕltaiawknak le tawhawknak a suak.
4 Curuangah dān cu a zéng ih,
Diknak khal nunpi a si dah lo.
Ziangahtile misualrál in midingfel a kharkhum;
Curuangah thuṭhennak cu merhkawi a si.

Jehovah-ih Sannak

5 «Miphunpawl lakah zoh uhla, thlir hnik uh;
Khawruahhar zetin um uh!
Ziangahtile an lo sim khalih nan zum lo ding mi nan dam laiah thil ka ti ding.
6 Ziangahtile zoh hnik uh, anmai cēnnak hmun a si lo mi co dingah,
Leilung pumpi hrutsuak thluhtu,
Misualrál le mirămhmang miphun Kaldia-mipawl ka tungding a si.
7 Anmah cu ṭihnungza le tuksumza an si;
An thuṭhennak le an thuneihnak cu anmah ihsin a suak.
8 An rángpawl tla tlavangpawl hnakin an rangsawn ih,
Zanthim ih cinghnia rual hnakin ṭih an nung sawn.
An rángtothiampawl an săwt ṭhupṭho ih,
An rángtothiampawl ram hlapi ihsin an ra;
Muvanlai in sa ei dingih a ṭum zurzo bangin an zam.
9 An zaten thahrumsuah dingin an ra;
An hmai in hmai lam an hawih cio.
Vunnel bangin, ralkaihpawl an fĭnkhawm.
10 Siangpahrangpawl an hmuhsuam ih,
Hruaitupawl an nautat.
Ralhruang kip in an hnihsan,
Ziangahtile la dingin lei an sûngkhawm.
11 Cun thli bangin an nuai ding ih, an feh vivo ding,
Sihmansehla an cahnak kha an pathian ih ringtupawl cu
Mawhsualnak nei ih puh an si ding.»

Habakkuk-ih Thusuhnak Pahnihnak

12 Maw Jehovah ka Pathian,
Ka Mi Thianghlim, nang cu catuan ihsin na si lo maw si?
Kan thi lo ding.
Maw Jehovah, annih cu thuṭhennak hmanrua hrangah na ruat hai zo;
Maw Lungpi, annih cu dāntatnak hmanrua dingah na hminsin hai zo.
13 Thil ṭhalo zoh menmen ding cun na mit cu a thiangfai tuk,
Sualralnak na zoh menmen thei lo.
Ziangahso hrăwkhrawl zetih thil titupawl na zoh men ih,
Misualrál in amah hnakih midingfel a dawlh tikah na lei na sūp men?
14 Ziangahso minungpawl cu tifinriat sungih nga vekih na rak tuah,
An tlunih uktu nei lo thilnung băwkvâkpawl bangin?
15 An zaten sio in an awk ṭheh,
An sûr in an hnûk ih,
An lenkhâng sungah an hnûkkhawm.
Curuangah annih cu an ai a puang ih, an lung a awi.
16 Curuangah an sûr hnenah rai an thawi ih,
An lenkhâng hnenah meiur thilhlăn an ur;
Cupawl ruangah an kaih mi cu a tam ngaingai,
An rawl khal a tam zet.
17 Curuangah an sûr kawlawngter in zangfahnak nei hlĕng loin
Miphunpawl an that vivo pei maw?

2

1 Ka ralvennak ah ka ding ding ih,
Leisunpâwng parah ka um ding,
Cule ka hnenah ziang a sim ding ti le
Nunrĕm ka si tikah ziang ka sâng ding ti ka zoh ding.

Jehovah-ih Sannak

2 Cun Jehovah in ka hnenah a sâng ih,

«Tlân phahih siar thei dingin,
Larnak ih na hmuh mi cu ngan awla,
Lungphengpawl parah fiangfaiten ngan aw.
3 Ziangahtile larnak cu cān khiah cia hrangah a si hrih;
Asinan a cemnetnak cu a nâi deuhdeuh, a tlawlh lo ding.
Muang deuh khal sehla, cucu hngak ṭenṭo aw;
Ziangruangahtile a thleng tengteng ding,
A tlai lo ding.
4 Zoh hnik mipuarthaupa khi,
A thinlung a dik lo;
Asinan mifel cu zumnak in a nung ding.

Misualrál Hmakhawpihnak

5 «A si, sabitzu in a bum,
Amah cu mipuarthaupa a si,
Cule a um menmen thei lo.
A câkhiarnak cu Sheol vekin a kauter ih,
Anih cu khawh ti nei lo thihnak vek a si,
Miphunpawl hmuahhmuah cu amai hnenah a khawm ih,
Amai hrangah minungpawl hmuahhmuah cu a pengkhawm.
6 Hipawl hmuahhmuah in,
‹Mah ta si lo mi karhter vivo tu le
Tiamkamawknak tampi thawi mai hrangih khawlkhawmtu hnenah
A hmakhua a pit a si.
Ziang tik tiang so?› tiin nautat le hmuhsuamin an hnihsan lo ding maw?
7 Na sum cawinakpawl cu hmakhatteah an tho lohli lo ding maw?
A lo palbĕttu an ṭhangharh lo ding maw?
Cule an hrangah ralthillâk ah na cang ding.
8 Miphun tampi na rak răm ruangah,
A tāngsŭnpawl in an lo răm ve ding,
Ziangruangahtile minungpawlih thisen le
Ram le khawpi le
A sungih cêngpawlih thahrumsuahnak ruangah.
9 Tlun sang ih a bu a sak theinak ding le,
Vansiatnak huham ihsi runsuah a si theinak dingah
A inn saknak dingih diklo ih sum ngahtu cu a hmakhua a pit a si!
10 Miphun tampi thahnak in le
Na nunnak dokalhih sual tuahnak in,
Na inn ah ningzakza thurawnpek na pe.
11 Ziangahtile khawkulh ihsin lungto a ausuak ding ih,
Khānsuk thingphelpawl ihsin an rak sawn ding.
12 Thisen suahnakih khawpi dĭntu le
Mawhsualnak ih khaw dĭntu cu a hmakhua a pit a si!
13 Ngai hnik, minung hnaṭuan cu meisa hrangah a si ih,
Miphunpawl zianghmanlo ih anmah le anmah an cauhawkternak cu ralkap rualpawlih Jehovah hnen ihsin a si lo maw?
14 Ziangahtile tipi in tifinriat a khuh bangin,
Leilung cu Jehovah ropitzia theihnak in a khat ding.
15 Mai innhnen in ding zu petu cu a hmakhua a pit a si,
A taklawngnak na hmuh theinak dingah
Na tûr na thle ih,
Zu na riter!
16 Nang cu sunlawihnak hnakin ningzahnak in na khat.
Nangmah khal na in ih,
Na serh zim khal na langter!
Jehovah kut vawrh lamih no cu nangmah dokalhin na hnenah a ra ding ih,
Na sunlawinak parah ningzahnak nasazet a thleng ding.
17 Ziangahtile Lebanon parih na thahrumsuahnak in a lo khuhsal ding,
Ramsa na siatsuah ih an lo ṭihnak in a lo khuhsal ding,
Minungpawlih thisen,
Ram, khawpi le
A sungih cêngpawlih thahrumsuahnak ruangah.
18 «A tuahtu in a tuah mi milim, thuphan per zirhtu burcawp milim in ṭhathnemnak a nei maw?
A tuahtu in a kutsuak a rinsan ih,
Ṭawng thei lo milempawl a tuah.
19 Zanthing hnenah, ‹Ṭhangharh aw!› titu le ṭawng thei lo lungto hnenah,
‹Tho aw! A lo zirh ding!› titu cu a hmakhua a pit a si.
Ngai hnik, cumi cu sui le ngun ih khût a si,
Sikhalsehla a sungah thaw a um lo.
20 Asinan Jehovah cu a temple thianghlim ah a um.
Leilung tlun mi hmuahhmuah a hmaiah daiten um hai seh,» tiin.

3

Habakkuk Thlacam Hla

1 Profet Habakkuk thlacamnak, ^aShigionoth zulhin.

3:1^a Shigionoth: Phur zet le rang zetih sak ding mi asilole hla sakdān ding simfiangnak a si men thei.

2 Maw Jehovah, na thuhla ka rak thei ih ka lung a phâng;
Maw Jehovah, kan san sungah na hna tharthawhsal aw!
Kan san sungah cucu theihter aw;
Thinlingnak ah zahngainak mang aw.
3 Teman ihsin Pathian a ra,
Paran Tlang ihsin Mi Thianghlim. Selah
A ropitnak in vanpawl a khuh ih,
Leilung cu amah thangṭhatnak in a khat.
4 A tletzia cu tleu vek a si,
A kut ihsin tle a suak ih,
Cu tawkah a huham thuh a si.
5 A hmaiah nathrisia a feh ih,
Khawsiknat in a ke a thlun.
6 A ding ih leilung a tah;
A zoh ih miphunpawl a hnînter hai;
Cule kumkhaw tlangpawl cu an ṭekdarh,
Khuahlan tlangmual um ringring mipawl an kûn.
A lamzinpawl cu kumkhaw hmun mi an si.
7 Kushan puanthlampawl in zăwnzaihnak a tuar ka hmu;
Midian ram ih puanzar an rak hnîn.
8 Maw Jehovah, tivapawl parah lunghmui loin na um maw si?
Na thinhengnak in tivapawl a dokalh maw si?
Na thinlingnak in tifinriat a dokalh maw si?
Himi ruangah maw na rángpawl parih na to,
Na runsuahnak ránglêngpawl parah?
9 Na thál cu thu na pe;
Na thálfungpawl parah sesămin thukamnakpawl na tuah. Selah
Nang in leilung cu tivapawl in na ṭhen.
10 Tlangpawl in nang an lo hmu ih an khūr;
Tilian cu a luang rero.
Ti thûk in a aw a suah ih,
A kutpawl tla sâng ah a khai.
11 Ni le thlapi anmai umnak ah an ding;
Annih cu na thálfungpawlih tleu ah, na feipi tle zerzer ah an fehhlo.
12 Aithawk in leilung hrawhin na feh;
Thinhengin miphunpawl na rak cīl hai.
13 Na mipawl runsuahnak hrangah na fehsuak,
Na Hriak Thih Mi-ih runsuahnak hrangah.
A cāwnpi ihsin a hngawng tiang lawngfangkheh in na tuah ih,
Misualrál inn ih lubân cu na vuak. Selah
14 Amai thálfungpawl in a ralkappawlih lupawl na suntlăng.
Annih cu keimah in ṭekdarhter dingin phusîng vekin an ra suak;
A thupteih mifarahpawl eirál ding vekin lungawiaipuangin an um.
15 Na rángpawl thawn tifinriat na paltlăng,
Tipi sawp luihlo lakah.
16 Ka theih tikah ka thin a khūr,
A aw ah ka hmur an tur dukdo,
Ṭawihnak cu ka ruhpawl ah an lut,
Cule ka umnak hmun ah ka khūr.
Cutisikhalsehla, in run sîmtu miphunpawl parih harsatnak thlen ding ni cu daiten ka rak hngak ding.
17 Theipi kung cerh loin,
Sabit hri ah rah um lo khal seh;
Olif khal in rahsuah loin,
Ló in thlairawl suah lo khal seh;
Hruangkulh sung ihsin rante rual thah thluh si khal seh,
Ran inn ah ranpi rual um lo khal seh,
18 Jehovah ah lungawiaipuangin ka um thotho ding,
Ka runsuahnak ka Pathian ah ka aipuang ding.
19 Jehovah Pathian cu ka cahnak a si;
Ka ke cu zuknêng ke bangin a tuah ding ih,
Ka tlangmual sângpawl ah i fehter ding.

Hla hruaitu hrangah. Hri nei tum mi thawn.