About Bible Thianghlim | ©

BibleThianghlim – MIKAH

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

MIKAH

1234567

• A ngantu: Mikah
• A siartu: Judah
• A huap sung cān: Kum zabi pariat neta lam

Mikah cu Filisṭia-mipawlih khawpi Gath kiangih um, Judah khua Moresheth ihsin a si. Anih cu Isaiah thawi san khat ih rawngbawl a si ih, anih khal Judah rammipawl hnenah thu a phuang. Mikah cun Jotham a lal lai, sak lam lalram ih Samaria a tluk hlanah (1:1, 6) thuphuan a thăwk, cule Sennakerib in Judah a sîm ih, Jerusalem a kharkhum cān ah thu a phuang (1:1, 8-16).

Hi cabu hi ṭhen thum ih ṭhen theih a si ih, a ṭhen i kip in «ngaithla» ti ṭawngfáng in a thăwk (1-2, 3-5, 6-7). Ṭhen i kip cu dāntatnak thu a si ih (1:1-2:11; 3:1-12; 6:1-7:7), runsuahnak thucah in a thlun (2:12-13; 4:1-5:15; 7:8-20). Mosi thukham an pahbăl ruangah Judah-mipawl in Pathian dāntatnak an tawn ding thu Mikah in a phuang (6:1-5). A hleicein Judah-mipawl cun milem an bia ih (1:6-7; 6:16), mifarah an palbĕt (2:2; 3:1-3). Sikhalsehla, hi dāntatnak thu simsung mi cu ruahsannak thuphuan in a thlun. Abraham thawi thukham ruangah, Pathian in Israel dung a tŭn lo ding (7:20). Zion ih a khawmsal ding mi a tāngsŭnpawl cu a runsuak ding (2:12; 4:6; 5:3).

Ni khat khat ah David cithlah ihsin Siangpahrang pakhat in Zion ihsin a uk leh ding, cule miphun dangpawl hmuahhmuah cu tawkah Pathian be dingih hip an si ding (2:12; 4:1-3, 13). Mikah in cuih Siangpahrang suahnak ding hmun Bethlehem khal a phuang cia (5:2; Mat 2:5-6).

Pathian ropitnak cu Mikah cabu ah a lang. Judah hnenah dāntatnak thim thucah phuang ding si khal sehla, Mikah cun Pathian cu lung a thleng mipawl le amah naihtupawl lamah zangfahnak le zahngainak a nei ti khal a phuang. Mikah ih phuanglăng mi zahngainak nei Pathian ah Khristianpawl cu lungawiaipuangih um ding kan si, ziangahtile amah vek zohman an um lo (7:18).

1

1 Judah siangpahrang Jotham, Ahaz le Hezekiah san laiah Samaria le Jerusalem thuhla ih Moresheth khawmi Mikah in a hmuh mi a hnenih Jehovah kamsuakthu thleng cu hihi a si.

Israel parih Thleng ding mi Dāntatnak

2 Nannih miphunpawl, ngai uh!
Maw leilung le a sungih um mi hmuahhmuah, ngai uh!
Bawipa cu amai temple thianghlim sung ihsin;
Bawipa Jehovah cu nanmah dokalhih a lo theihpitu si seh.
3 Ziangahtile zoh hnik uh, Jehovah cu a umnak hmun ihsin a ra rero lai;
A rung ṭum ding ih,
Leilung hmun sângpawl a pál ding.
4 Amai hnuaiah tlangpawl an zuprál ding ih,
Meisa hmaiih sathau a um vekin le
Suk lamih tipi luangthla bangin,
Phaikuampawl cu an phel ding.
5 Himi hmuahhmuah hi Jakob thilsual tuah ruangah le
Israel sungza sualpawl ruangah a si.
Jakob-ih thilsual tuah mi cu ziang a si?
Samaria a si lo maw?
Cule Judah-ih hmun sângpawl teh ziang a si?
Jerusalem a si lo maw?
6 Curuangah Samaria cu ramlak ah siatnak penkhawm ah,
Sabit phunnak hmun ah ka tuah ding;
A lungtopawl cu phaikuam ah ka sûngbung ding ih,
Samaria lungphumpawl cu langko ka tuah ding.
7 A sercawp milim hmuahhmuah cu vuakdarh ṭheh an si ding ih,
A hlawhhlan man hmuahhmuah cu meisa in urkăng a si ding;
A milempawl hmuahhmuah ṭhing ko ka tuah ding,
Ziangahtile cupawl cu a hlawhhlan man ih a lakkhawm mi an si ih,
Hlawhhlângnuih hlawhman ah hman an si leh ding.

Israel le Judah Ṭahhnawhnak

8 Curuangah ka ṭap ding ih ka râk ruangro ding,
Kelawng le taklawngin ka feh ding;
Cinghniapawl bangin ka kûi ding ih,
Kalauk vapawl bangin ka râk ding.
9 Ziangahtile a hriamhmapawl cu tidam theih an si lo.
Ziangahtile cumi cu Judah hnenah a thleng zo;
Ka mipawlih kăwtka,
Jerusalem a thleng zo.
10 Cucu Gath ah sim hlah uhla,
Ṭap hrimhrim hlah uh;
^aBeth Afrah leivut ah rīl aw.
11 Nannih Safir luahtupawl taklawng le ningzakin fehhlo uh;
Zaanan luahtupawl an fehsuak lo.
Beth Ezel cu a ṭap;
A dinnak ding hmun nan hnen ihsin lakhlo a si.
12 Ziangahtile Maroth luahtupawl cu ṭhatnak hngakin an ṭawl,
Asinan siatnak cu Jehovah hnen ihsin
Jerusalem kăwtka ah a ra thleng.
13 Nannih Lakish luahtupawl,
Ráng zamṭha cu lêng thluah uh;
Anih cu Zion fanu parih sual tuah thăwktu a si,
Ziangahtile Israel ih thilsual tuah mipawl cu nangmah ah hmuh a si.
14 Curuangah Moresheth Gath hnenah laksawng na pe ding;
Akzib khua ih innpawl cu Israel siangpahrangpawl hrangah bumnak an si ding.
15 Maw Mareshah luahtupawl, nan hnenah ram latu ka hruai ding;
Israel ^bropitnak cu Adullam ah a feh ding.
16 A sunglawi mi na fāte ruangah,
Na sám met awla na lu kawng aw;
Mulukawlh bangin na lukawlh kauter aw,
Ziangahtile na hnen ihsin ralkaih ah an feh ding.

1:10^a Beth Afrah: Leivut inn tinak a si.

1:15^b ropitnak: siangpahrangpawl relnak a si.

2

Thil ṭhalo Tuahtupawl Hmakhawpihnak

1 Mawhsualnak khawkhângtu le
An ihkhun parih thil ṭhalo tuahtupawl cu an hmakhua a pit!
Zing lam khawvan tikah cucu an tuah,
An kut ah tuah theinak an neih ruangah a si.
2 Lórampawl mi an daw ih mi an láwng,
Innpawl khal an daw ih an laksak men.
Mi pakhat cu a inn thawn,
Mi pakhat cu a ro thawn an palbĕt.
3 Curuangah Jehovah in hitin a ti:
Ngai hnik, hi innsang dokalhin vansiatnak khua ka khâng rero,
Cumi ihsin nan hngawng nan phawih thei lo ding;
Hngal zetin nan feh fawn lo ding,
Ziangahtile cucu cān ṭhalo a si ding.
4 Cuih cān ah mi in nanmah dokalhin an lo hnihsan ding ih,
Nasazetin an lo ṭah ding,
«Kannih cu faifilik ih tisiat kan si!
Anih in ka mipawlih covo a thleng ṭheh;
Ka hnen ihsin a lahlo a si hi!
Midungtawlh hnenah kan rampawl a pe,» tiin.
5 Curuangah Jehovah-ih mipungkhawm lakah
Camcawhfung zûknak ih ramri ṭhensaktu na nei lo ding.

Thuphan Per Profetpawl

6 «Ṭawngsuak hlah uh,» tiah an ṭawngsuak.
Hi thil thuhla ah an ṭawngsuak lo ding;
Hmuhsuamnak cu lakhlo a si lo ding.
7 Jakob sungzapawl tla,
Jehovah Thlarau in a zāwi thei lo maw si?
Hipawl hi amai tuah mi an si maw?
Dĭng teih a fehtu parah ka kamsuakthupawl cun thil ṭha a tuah lo maw?
8 Tlaikhawpi hnuah ka mipawl cu doral vekin an rak tho,
Raldonak ihsi ra tlung mipawl bangih
Ralmûang zetih fehtupawlih sinfen na dirhthlaksak hai.
9 Ka mipawl lakih nunaupawl cu
An inn nuam ihsin nan dawisuak cio hai.
An fātepawl hnen ihsin ka ropitnak cu nan lakhlosak kumkhua hai.
10 Tho uhla păwk uh,
Ziangahtile hihi cawlhnak hmun a si lo;
Ziangruangahtile himi cu a bawrhbang ih, siatbălnak namen loin a siatbăl a si.
11 Zianghmanlo le thuphan simtu mi pakhat suak in,
«Sabitzu le zupi thuhla ka phuang ding,» a ti asile,
Cu pa cu hi minungpawl hnenih thuphuangtu a si ding!

Israel Tundinsal a Si

12 Maw Jakob, nan zaten ka lo fĭnkhawm tengteng ding,
Israel tāngsŭn cu ka hruaikhawm tengteng ding;
Hruangkulh sungih tuu bangin,
Rante rual an tlannak ih um bangin
Hmunkhatah ka khawm hai tengteng ding.
Cuih hmun ah mipi awthâwm a um leh ding.
13 An hmaiah bălpawptu a feh ding;
Kăwt an băl ding ih, an fehsuak ding.
An hmaiah an siangpahrang a feh ding,
An lubik ah Jehovah.

3

Uktu Sualrálpawl le Profet Sualrálpawl

1 Cule kei in,

«Nannih Jakob-ih lubânpawl le Israel sungza uktupawl, atu ah ngai hnik uh;
Diknak cu nan theih ding mi a si lo maw?
2 Nannih ṭhatnak hua ih siatnak ngainatupawl;
Ka mipawlih vun hâwktu le
An ruh ihsin an tit hâwktupawl;
3 Ka mipawlih sa eitupawl,
An vun nan lip,
An ruh nan khiak ih,
Bel sungih ret ding mi sa bangin cip ko nan sat,
Ukāng sungih sa bangin.
4 Cun Jehovah hnenah an au ding,
Asinan anih in a ngai hai lo ding;
Cuih cān ah an hnen ihsin a hmai a thup ding,
Ziangruangahtile an thil ti mipawl a ṭha lo.»
5 Ka mipawl hruaipêngtu profetpawlih thuhla Jehovah ih sim mi cu hitin a si:
Ei ding an neih laiah cun, «Hnangamdaihnak,» tiah an au,
Asinan an kâ hrangih ei ding pe lo tu cu an do;
6 «Curuangah zan a thleng ding ih larnak nan nei lo ding,
Khua a thim ding ih simsungnak nan nei lo ding;
Profetpawl parah ni a tla ding ih,
An hrangah sun a thim ding.
7 ^aHmutupawl an ning a zak ding ih,
Simsungthiampawl mualphoter an si ding;
A si, an zaten an kâ an hup ding;
Ziangahtile Pathian hnen ihsin sannak zianghman a um lo.»
8 Asinan kei cu Jakob hnenih a thilsual tuah mi thăn dingah le
Israel hnenih a sual thăn dingah,
Huham, Jehovah Thlarau,
Diknak le cahnak thawn ka khat.
9 Nannih diknak fihtu le a dĭng mi hmuahhmuah merhkâwitu,
Jakob sungza lubânpawl le
Israel sungza uktupawl,
10 Thisen suah phahih Zion dĭntupawl le
Mawhsualnak thawi Jerusalem dĭntupawl,
Atu ah hihi ngai hnik uh:
11 A lubânpawl in nawhthuh eiin thu an ṭhen,
A puithiampawl in paisa hlawhin an zirh,
Cule a profetpawl in paisa hlawhin simsungnak an tuah.
Cuticingin Jehovah an hngauhsan ih,
«Kan lakah Jehovah a um a si lo maw?
Kan parah vanduainak a thleng thei lo ding,» tiah an ti.
12 Curuangah nanmah ruangah Zion cu ló bangin leh a si ding,
Jerusalem cu siatnak penkhawm mi ah a cang ding ih,
Temple tlang cu tupi tlangmualpawl vek a si ding.

3:7^a Hmutupawl: Profet tinak a si.

4

Zion ih Jehovah Uknak

1 Ni neta ah cun hitin a si ding,
Jehovah inn umnak tlang cu tlangpawl lakih sângbik ah dĭn a si ding ih,
Tlangmualpawl tlunah cawisan a si ding;
Cule miphunpawl cu cumi ah an feh hluarhlo ding.
2 Miphun tampi an ra ding ih,
«Ra uhla, Jehovah tlang ah so uhsi,
Jakob Pathian inn ah;
Anih in a lamzinpawl in zirh ding ih,
A zinpawl kan zawh ding,» tiah an ti ding.
Ziangahtile Zion ihsin dān a suak ding ih,
Jerusalem ihsin Jehovah kamsuakthu.
3 Anih cun miphunpawl lakah thu a ṭhen ding ih,
Hlapi ih um miphun cakpawl hrangah thutluknak a tuah ding;
An ralnâmpawl cu leilehnak ah an ser ding ih,
An feipipawl tla leicawhnak thirzúm ah an ser ding;
Miphun pakhat in miphun pakhat dokalhin ralnâm a hawi lo ding ih,
Ral dodān khal an zir nawn hrimhrim lo ding.
4 Cuhnakin mi kip mai sabit hri hnuai le theipi kung hnuaiah an to ding ih,
Zohman in annih cu lungphâng ko an tuah lo ding;
Ziangahtile ralkap rualpawlih Jehovah kâ ihsin phuansuah a si zo.
5 Ziangahtile mi hmuahhmuah cu anmai pathian hmin in an feh cio,
Asinan kannih cu Jehovah kan Pathian hmin in a kumkhuaih kumkhua tiang kan feh ding.

Hmai lam Cān ih Zion-ih Nehnak

6 «Cuih ni ah,» Jehovah in,
«Kebáipawl ka khawm ding,
Thlauthlak mipawl le
Ka zăwnzaihter mipawl ka khawm ding.
7 Kebáipawl cu a tāngsŭn ah ka tuah hai ding ih,
Thlauthlak mipawl cu miphun cak ah ka tuah hai ding.
Atu thăwkin, kumkhua tiang
Jehovah in anmah cu Zion Tlang ihsin a uk hai ding,» tiah a ti.
8 Cule nang, Maw rante rualpawlih dawlsâng,
Zion fanuih hauhruang,
Na hnenah cucu a thleng ding,
Hlanlai ih uknak tiang a thleng ding;
Jerusalem fanuih lalram cu.
9 Ziangah atu ah ring zetih na au?
Nan lakah siangpahrang a um lo maw?
Na thurawnpetu a hlorál maw si?
Ziangahtile nunau fahrinnat tuar lai bangin tuarnak in a rak lo kai.
10 Maw Zion fanu,
Nunau fahrinnat tuar bangin tuarin sâwltâl rero aw.
Ziangahtile atu ah nang cu khaw sungin na suak ding ih,
Hramlak ah na cêng ding,
Cule Babilon ah na feh ding.
Cu tawkah runsuah na si ding;
Cuih hmun ah Jehovah in na ralpawl kut ihsin a lo tlen ding.
11 Atu khalah miphun tampi cu nangmah dokalhin an pungkhawm,
«Amah cu bawrhbanter si seh,
Cule kan mit in dirĕmin Zion zoh seh,» tiah an ti.
12 Asinan annih cun Jehovah ruahnak an thei lo ih,
A thurawnpek mi an theithiam fawn lo;
Ziangahtile anih cun hruihhmun ih fângtel an khawm bangin, a khawm hai zo.
13 Maw Zion fanu, tho awla cīl aw;
Ziangahtile na ki cu thir ah ka tuah ding ih,
Na ketinpawl cu dar ah ka tuah ding;
Miphun tampi na vawdarh ding;
Ralthillawn ih an ngah mi cu Jehovah hnenah na serhhran ding ih,
An lennak cu leilung pumpuluk Bawipa hnenah.

5

1 Maw nang ralkap burpipawlih fanu,
Ralkap burpipi ah tuah aw uh;
Kanmah dokalhin anih in in kulhkhŭm zo.
Annih in Israel thuṭhentu cu kianghrăwl in a biang ah an vaw ding.

A Ra ding Mi Messiah

2 Asinan nang, Bethlehem Efrathah,
Judah ram hrin tampi lakah fate zet hman awla,
Israel Uktu ding Pa cu na sung ihsin ka hrangah a ra ding.
Amai thăwknak cu hlanlaipi ihsin,
Catuan ihsin a si.
3 Curuangah anih in fahrinnat tuar lai nunau in fa a hrin tiangin,
Anmah a thlauthla hai ding;
Cun amai unau umsŭnpawl cu
Israel tefapawl hnenah an kir ding.
4 Cule anih cu a ding ding ih
Jehovah cahnak in,
Jehovah a Pathian hmin cungnunnak in a rante rualpawl a câwm ding.
Cule annih cu thlangamten an um ding,
Ziangahtile cuih cān ah anih cu leilung dĕng tiang a ropi ding.

Israel Doral Dāntatnak

5 Cule anih cu an hnangamdaihnak a si ding.
Assiria-mi kan ram sungih a rat tikah le
Kan hauhruangpawl a păl tikah,
Amah dokalhin tuukhāltu pasarih le hruaitu mi pariat kan thoter ding.
6 Annih in Assiria ram, Nimrod ram luhnakpawl ah ralnâm thawn an uk ding ih,
Kan ram sungih Assiria-mi a rat tikah le
Kan ramri sung a pal tikah
Anih in in run ding.
7 Cun Jakob a tāngsŭn mipawl cu
Miphun tampi lakah Jehovah hnen ihsi daifimtla vek,
Milai hngak lo,
Minung fapapawl hrang khalih khawtlai lo,
Hrampi parih ruahti vek an si ding.
8 Cule Jakob tāngsŭnpawl cu
Miphunpawl lakah an um ding,
Minung tampi lakah,
Tupi sahrangpawl lakih kiosa bangin le
A feh phahih palbĕtin le băwtthlekin,
Zohman in a hnen ihsin an run thei lo mi,
Rante rual lakih kiosa vanglai bangin an um ding.
9 Na ralpawl dokalhin na kut na hawi ding ih,
Na doralpawl hmuahhmuah cu thah an si ding.
10 Cule cuih ni ah hitin a si ding, Jehovah in a ti, nan lak ihsin nan rángpawl ka that ding,
Nan ránglêngpawl ka tisiat ding.
11 Nan ram sungih khawpipawl ka tisiat ding ih,
Nan hauhruangpawl hmuahhmuah ka ṭhiatbăl ding.
12 Na kut ihsin dawithiampawl ka that ding ih,
Aizohthiam na nei lo ding.
13 Khercawp na milimpawl ka tisiat ding ih,
Nan lakih um na ṭhuamserhpawl ka tisiat ding;
Na kutsuak mi na be nawn lo ding;
14 Nan lak ihsin Asherah-pawl ka phawng ding ih,
Na khawpipawl ka tisiat ding.
15 Cule ka thu ngaithla lo miphunpawl parah
Thinheng le thinso in phuba ka la ding.

6

Pathian in Israel a Ngen

1 Atu ah Jehovah sim mi ngai aw:

«Tho aw, na thuhla cu tlangpawl hmaiah ngen awla,
Mualpâwngpawl in na aw thei hai seh.
2 Maw nannih tlangpawl le
Nannih leilung hramhngetpawl,
Jehovah phunzainak hi ngai hnik uh;
Ziangahtile Jehovah in a mipawl dokalhin phunzainak a nei ih,
Israel a dokalh ding.
3 «Maw ka mipawl, nan parah ziang ka rak tuah?
Ziangtin cau ko ka lo tuah?
Keimah dokalhin theihter hnik uh.
4 Ziangahtile Izip ram ihsin ka rak lo hruai,
Sáltannak ram ihsin ka lo tlen;
Cule nan hmaiah Mosi, Aaron le Miriam tla ka thlah.
5 Maw ka mipawl, Jehovah dingfelnak nan theih theinak dingah,
Atu ah Moab siangpahrang Balak in ziang thurawnpek a pe ti le
Beor fapa Balaam in a hnenah ziang a sânglet ti le
Shittim ihsin Gilgal tiang ziang thil a cang ti kha cîng ringring uh.»
6 «Jehovah hmaiah ziang thawn ka feh ding ih, hmun sâng ih um Pathian hmaiah ka kûn ding?
Meiur Thilhlăn, câwpa no kum khat kim thawn,
A hmaiah ka feh ding maw?
7 Jehovah cu tuucang thawng tampi le
Hriak tiva thawngza tampi ah a lung a hmui pei maw?
Ka thilsual tuah mi hrangah ka fatir,
Ka sualnak hrangah ka taksa rah ka pe pei maw?»
8 Maw minung, anih cun thil ṭha a lo hmuh zo;
Cule Jehovah in nan hnenih a lo ngĕn mi cu
Dik zetih thil ti,
Zahngainak duh le
Na Pathian thawi tăngdawr teih fehtlang tipawl a si lo maw?

Israel Diklonak Dāntatnak

9 Jehovah aw cu khawpi ah a au,
Fimnak in na hmin a hmu ding:
«Kianghrăwl ngaihthla uh!
Cucu zo in a ruat cia?
10 Misualrálpawl inn ah sualralnak hlawnthil le
Fihnungza a si mi tahnak tawite a um hrih lai maw?
11 Cuailung sualrál le tahnak diklo dip thawn milai cu mithiang tiah ka siar ding maw?
12 Ziangahtile a milianpawl cu nunrawnnak ih khat an si,
Amah luahtupawl cun thuphan an per ih,
An kâ sungih an lei cu mibumhmang a si.
13 Curuangah kei khal in dān lo tatnak in ka lo nater ding,
Na sualpawl ruangah ṭhing ko ka lo tuah ding.
14 Nan ei ding nân, nan puar lo ding;
Nan lakah rilrawnnak a um ding.
Na thiarhlo ding, asinan run an si lo ding;
Cule na runhim mi cu ralnâm ka pe ding.
15 Na tuh ding, asinan na at lo ding;
Olif na cīl ding, asinan a hriak na thihawngah lo ding;
Cule sabitzu thlum na tuah ding, asinan sabitzu na inngah lo ding.
16 Ziangahtile Omri-ih sakhaw dānpawl na thlun;
Ahab sungkua ih tuah mi zaten na tuah ve ih,
An thurawnpek mi na zawh,
Curuangah ṭhing riapri ko ka lo tuahnak ding ih,
Na sungih umtupawl cu dirĕm an si ding.
Curuangah ka mipawlih hmuhsuamnak cu nang in na phur ding,» tiin.

7

Israel-ih Sualpawl ruangih Riahsiatnak

1 Ka hmakhua a pit a si!
Ziangahtile kei cu ṭhâl thing rahpawl khawmtu vek le
Sabit rah hrelhpawl lo tu vek ka si;
Sabit rah bawr ei ding a um lo,
Ka thinlung ih a hiar duahdo mi theipi rah hmin hmaisabik a um lo.
2 Mirinum cu leilung ihsin a hlorál ih,
Minung lakah midĭng pakhat hman an um lo.
An zaten thisen suah ding hngakin an băwk;
Mi kip in anmai unau lala sûr in an pêl.
3 Thil ṭhalo thuhla lawngte ah cun an kut pahnih in an tuah.
Bawi in nawhthuh a dil,
Thuṭhentu khal in,
Miropi in a thinlungih duhhiarzawng a aupi;
Cule khua an khângkhawm.
4 An lakih miṭhabik cu hling kung vek a si,
Midĭngbik cu hawihling hnakin an hriam deuh;
Na ralvengtupawlih ni, na dāntatnak ni cu a ra thleng;
Cule an buai cān a si ding.
5 Na innhnen rinsan hlah;
Na rinsannak cu na hawipi parah ret hlah;
Na ṭāng sungih a zautunu hnen ihsin
Na kamsuak thu kilveng aw.
6 Ziangahtile fapa in pa a upat lo,
Fanu cu a nu dokalhin a ding,
Mo in a ni a dokalh;
Mi pakhat ih ralpawl cu amai sungkua an si.
7 Asinan kei lawngte cun Jehovah ka thlir ding;
Ka runsuahnak ka Pathian ka hngak ding;
Ka Pathian in i ngaithla ding.

Israel Sualphuannak le Thlangamnak

8 Maw ka doral, ka tlunah lungawiaipuangin um hlah;
Tlu khal ningla, ka thosal ding;
Thim lakah to hman ningla,
Jehovah cu ka hrangah tleu a si ding.
9 Amah dokalhih thilsual ka rak tuah ruangah,
Anih in ka thuhla a ngĕn hlan le ka hrangih diknak a tuahsuak hlan sung cu
Jehovah thinhengnak ka tuar ko ding.
Amah in tleu ah i hruai ding ih,
Amai dingfelnak ka hmu ding.
10 Cule ka doral a si mi amahnu in a hmu ding ih,
«Jehovah na Pathian cu khuiah so a um?» tiih i titunu cu ningzahnak in a khuh ding.
Ka mit in cu nu cu a hmu ding;
Amah cu kăwtthler ih leibêk păl bangin păl a si ding.
11 Cumi cu na khawkulhpawl dĭn ding ni a si ding,
Cuih ni ah cun ramri cu kauhter a si ding.
12 Cuih ni ah mipi cu Assiria le Izip khawpipawl ihsin,
Izip ihsin Tivapi tiang,
Tifinriat ihsin tifinriat tiang,
Tlang pakhat ihsin tlang pakhat ah, na hnenah an ra ding.
13 A sungih cêngtupawl ruangah le
An thil ti mipawlih rah ruangah ram cu a ṭhing ding.

Pathian in Israel a Ngaidam Ding

14 Karmel tlang laifang,
Thingrûl lakih mah lawng um,
Ro ih na co mi na rante rual,
Na kianghrăwl thawn na mipawl khāl aw;
Khuahlan lai bangin,
Bashan le Gilead ah rawl pe hai aw.
15 Izip ram ihsi na suah ni bangin,
Anmah cu mangbangzapawl ka hmuh ding.
16 Cumi cu miphunpawl cun an hmu ding ih an thiltitheinak hmuahhmuah an zahpi ding;
An kut in an kâ an hup ding;
An hna a set ding.
17 Rul bangin leivut an liak ding;
Leilung ih băwkvâkpawl bangin.
Jehovah kan Pathian hnenah an hauhruang ihsin ṭih le khūrin an ra ding ih,
Nangmah an lo ṭih ding.
18 Mawhsualnak ngaidam ih,
A co mi ro a tāngsŭnpawlih thilsual tuah mi lan tatu, nangmah vek Pathian cu zo a si?
A thinhengnak a kaitâng kumkhua lo,
Ziangahtile lainatduhdawtnak ah a lung a awi.
19 Anih cun kan parah lainatnak a neisal ding ih,
Kan mawhsualnakpawl a cīl ding.
Kan sualpawl hmuahhmuah cu tifinriat thûk zetah na hlăwn ding.
20 Hlanlaipi ih kan pupápawl hnenih sia na rak săm mi,
Jakob hnenah rinumnak le,
Abraham hnenah lainatduhdawtnak na pe ding.