About Bible Thianghlim | ©

BibleThianghlim – JEREMIAH

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

JEREMIAH

  • A ngantu: Jeremiah
  • A siartu: Judah (Pathian minungpawl)
  • Thil cang miih huap cān: B.C. 626-561

Profet Jeremiah cu Jerusalem ihsi peng málte lawng hla ih um puithiam fapa a si (1:1). Khuahlan Kanaan ram le a kiangkung rampawl doawknak ruangih harsatnak tam zet lakah Jeremiah cu rawng a bawl. Assiria lalram ṭumsuk a thăwk ih, Babilon lalram a kaiso. Kum B.C. 612 ah Babilon ralkap rual in Assiria khawpi Nineveh le Assiria lalram pumpi cu an tisiat. Kum B.C. 603 ah Babilon ralkap rual in Izip an neh. Cuticun Babilon cu leitlun huap uktu thar a hung si.

Judah ram cu milem biaknak le nunau-mipa sualnak ah a pil rero. Kum B.C. 622 ah Judah ram in ṭhangphawknak tawite a tep. Temple sungah Dān Bu an sar. Asinan an sualnak ih an kirsal tikah, Pathian thuṭhennak a thleng. Babilon ralkap rual in Jerusalem cu kum dangdang B.C. 605, 597 le 586 ah ṭum thum an do. Mipi le an thilripawl an thiar ih, kulhpawl an ṭhiatbăl, cule Temple ihsin thil tampi an thiarhlo.

Profet a si vekin, Jeremiah cu mipi sualnak ruangah a ān a hai. An thinlung ah sual a lut thuk zet (13:23; 17:1, 9). Milem biaknak a nasatuk. Baal, Molok le van khawzingnu an bia. A diklo mi pathianpawl hnenah an fāte an thawi ih, nunau-mipa sualnak an tuah (7:31; 19:5; 32:34-35) Mi kip: mivantlang, sakhaw lam hruaitupawl (profetpawl le puithiampawl) le ramkhelpawl in Pathian thukham cīn le dān an thlun lo. Pathian be dingin temple ah an feh, asinan an ni tin nun ah amah cu an thlun lo (bung 7 le 26). An lung an thleng hmaisak a ṭul. Curuangah Jeremiah in Jehovah hnenih kirsal dingin a fawrh hai (3:12, 14; 4:1). Cuti asile an nun ah sung lam nun thlengawknak a um ding. Asinan cucu an êl (5:3).

Jeremiah cu Pathian hrangih thusimtu rinum a si ruangah tiduhdahnak (15:15-18), a nunnak laksak tumnak (11:18-23) le thawngthlaknak (20:2; 38:28) Pathian hrangah a tuar. Bible bung le câng tam zetin a rawngbawlnak ih harsatnak a tawnzia an tarlang (11:18-23; 12:1-6; 15:10-21; 17:14-18; 18:19-23; 20:7-18). Asinan Jeremiah in mipi a duhdawt. Curuangah amah cu «A ṭap mi profet» tiih kawh a si (9:1; 13:17; 14:17). An sualnakpawl ruangah mipi dokalhin thuṭhennak ṭawngkampawl a phuang, asinan ruahsannak ṭawngkampawl khal a hlan thotho (bung 30-30). Pathian-ih thusimtupawl cun sual parih thuṭhennak le thuthangṭha parih ruahsannak thu an phuang tengteng ding a si. Kan lung kan thleng asile, a hnenah in tungdingsal ding.

Thuhlawm Ṭhen

  • I. Pathian in profet dingah Jeremiah a ko (bung 1)
  • II. Judah parah Jeremiah in thuṭhennak a phuang (bung 2-29)
  • III. Jeremiah in thukham thar le a minungpawl tundinsalnak thu a phuang (bung 30-33)
  • IV. Jeremiah in Jerusalem tluk hlan le tluk hnu ih thil cang mi thupipawl le anmah thuhla ih Pathian thucah a ngan (bung 34-45)
  • V. Jeremiah in ram dang miphunpawl parah thuṭhennak thu a phuang (bung 46-51)
  • VI. Jeremiah in Jerusalem tlûknak a phuanglang (bung 52)

1

1 Benjamin ram, Anathoth khua ih puithiampawl lakih Hilkiah fapa Jeremiah ṭawngkampawl cu: 2 Amon fapa Judah siangpahrang Josiah san, a lal a kum hleithumnak ah, a hnenah Jehovah kamsuakthu a thleng. 3 Judah siangpahrang Josiah fapa Jehoiakim san ihsin, Judah siangpahrang Josiah fapa Zedekiah a lal kum hleikhatnak a cem tiang, a thla ngatnak ih Jerusalem ralkaih ih hruaihlo a si tiangin a rung thleng.

Pathian in Jeremiah a Ko

4 Cun Jehovah kamsuakthu cu ka hnenah,

5 «Sūl sungih ka lo sēmter hlanah ka rak lo thei,
Na suah hlanah ka lo serhhrăn zo;
Miphunpawl hnenah profet dingah ka lo ruat zo,»

tiah a ti.

6 Cule kei in,
«A ze, Bawipa Jehovah!
Ngai hnik, ṭawngkam ka thiam lo, ziangahtile mino ka si,»

tiah ka ti.

7 Asinan Jehovah in, ka hnenah,

« ‹Mino ka si,› tiah ti hlah,
Ziangahtile ka lo thlahnak hmuahhmuah ah na feh ding ih,
Thu ka lo pek mi pauhpauh na sim ding.
8 Annih cu ṭih hlah aw,
Ziangahtile nangmah lo runsuak dingin ka lo umpi a si, Jehovah in a ti,»

tiah i ti.

9 Cun Jehovah in a kut a suah ih ka kâ i thâm, cule Jehovah in:

«Ngai hnik, na kâ ah ka kamsuakthupawl ka ret.
10 Zoh hnik, a hram ihsi phăwng dingah le dirthla dingah,
Siatbăl ding le hlăwnthla dingah,
Sak dingah le phun dingah
Nang cu tuihsun ah miphunpawl tlun le lalrampawl tlunah ka lo ret zo,»

tiah i ti.

11 Cuihtlunah Jehovah kamsuakthu cu ka hnenah, «Jeremiah, ziang na hmu,» tiin a rung thleng.

Cule kei in, «Almond hngeṭek ka hmu,» tiah ka ti.

12 Cun Jehovah in ka hnenah, «Na hmu dik e, ziangahtile ka kamsuakthu tuahsuak dingin ka thlir ringring a si,» tiah i ti.

13 Cule a vei hnihnak Jehovah kamsuakthu ka hnenah, «Ziang na hmu?» tiin a thleng.

Cule kei in, «Sak lam ihsin kanmah lam hawi bel so hluahhlo lai ka hmu,» tiah ka ti.

14 Cun Jehovah in ka hnenah,
«Ram luahtu zate parah
Sak lam ihsin thil ṭhalo a suak ding.
15 Ziangahtile ngai hnik, sak lam lalrampawlih sungkua hmuahhmuah ka ko ding, tiah Jehovah in a ti;
Cule an ra ding ih, Jerusalem kăwtsuah ah,
A kimvel kulhpawl hngauhsanin le
Judah khawpi zate ah an laltokham an hung fingfing ding,
16 An sualralnak zate thuhla ah
Anmah dokalhin ka thuṭhennakpawl ka ṭawngsuak ding,
Ziangruangahtile annih in kei in thlauthla, pathian dangpawl hnenah rimhmui an ur ih,
Anmai kut hnaṭuanpawl an bia.
17 «Curuangah na tâi ṭawn awla, tho aw,
Cule thu ka lo pek mi hmuahhmuah an hnenah sim aw.
An hmaiah thinphângin um hlah,
Culole an hmaika-ah ka lo buaiter ding.
18 Ziangahtile ngai hnik, tuihsun ah ram pumpuluk,
Judah siangpahrangpawl,
An hotupawl,
An puithiampawl le,
Ram mipi lakah kulh nei khawpi le thir ṭhuam le
Dar kulh vekin ka lo tuah.
19 Annih in an lo do ding,
Asinan an lo neh lo ding.
Ziangahtile lo run dingin ka lo umpi a si, Jehovah in a ti,»

tiah i ti.

2

Israel Sual Sir dingin Pathian in a Ngen

1 Jehovah kamsuakthu cu ka hnenah a rung thleng ih, 2 «Feh awla Jerusalem hnatheihah au aw, Jehovah in hitin a ti:

‹Ka lo máng ringring,
Na no laiih na ngilneihzia,
Na ham mi na duhdawtzia,
Thlawh lo mi ram, ramṭhing ih ka dung i thlun laiah khan.
3 Israel cu Jehovah hrangah thianghlim le,
A thil pung rah hmaisabik a si.
Amah eiráltu zaten an mawh ding;
Thil ṭhalo an parah a thleng, Jehovah in a ti,›

tiah i ti.

4 Maw nannih Jakob sungza le Israel sungkua hmuahhmuah Jehovah kamsuakthu hi ngaithla uh. 5 Jehovah in hitin a ti:

«Nan pupápawl in ka parah ziang diklonak an hmuh ruangah so,
Ka hnen ihsin hla zetih an feh,
Milempawl an thlun ih,
Milem betu ih an can?
6 ‹Izip ram ihsin in hruaisuaktu,
Ramṭhing, nelrawn, khuarkhuhrum hmun,
Ramcar hmun le thim mepmep,
Zohman ih fehtlănglonak hmun le
Zohman cēnlonak hmun ih in hruaitlăngtu Jehovah kha khuiah so?› tiah an ti lo.
7 Ram ṭha zetah a rah le a ṭhatnak ei dingin ka lo hruai.
Asinan nan ra lut ih, ka ram nan bawrhbangter,
Cule ka ro cu fihnungza ah nan tuah.
8 Puithiampawl in, ‹Jehovah cu khuiah a um?› tiah an ti lo.
Cule dān kengkawhtupawl in in rak thei lo;
Uktupawl khal ka parah an hél,
Profetpawl in Baal hmin in thu an phuang ih,
Hlawknak um lo thilpawl an thlun.
9 «Curuangah nangmah dokalhih mawhpuhnak ka keng hrih ding,» Jehovah in a ti,
«Cule nan fātepawlih fātepawl dokalhin mawhpuhnak ka keng ding.
10 Ziangahtile aKittim tikulh lan uhla zoh uh,
Kedar ah mi thlah uhla ṭhaten ruat uh,
Cule hivek thil a um dah maw ti thei uh.
11 Miphun pakhat in pathian a si lo mi thawn
A pathian a thleng ding maw?
Asinan ka mipawl cun hlawknak um lo mi thawn an ropitnak an thleng.
12 Maw vanpawl, himi ah khawruahharin um uhla,
Nasa zetih ṭihin um uh,
Phawkekein um uh,» Jehovah in a ti.
13 «Ziangahtile ka mipawl in thil ṭhalo pahnih an rak tuah:
Tinung tihna keimah in thlauthla ih,
Tidai tling thei lo a khĭng mi tikhuah cu anmai hrangah an kher.
14 «Israel cu sál maw a si?
Amah cu inn ih hrin mi siahhlawh maw a si?
Ziangahso anih cu hmuitin mi ih a can?
15 Kiosa vanglaipawl in amah an hûkhnawh ih, aw an suah;
A ram ṭhing ko an tuah;
A khawpipawl cu urkăng an si, luahtu um loin.
16 bNof le cTahapanhes mipawl khal in
Na luthlung an kawlhter.
17 Jehovah na Pathian in lamzin ih a lo hruai laiah,
Na tlansan ruangah
Cumi cu nangmah parah na thlenaw a si lo maw?
18 Cule Nile tidai in dingin,
Ziangahso Izip lamzin na zawh?
Cun Zufraṭis tidai in dingin,
Ziangahso Assiria lamzin na zawh?
19 Nangmai sualralnak in nun a lo sim ding ih,
Na dungtawlhnak in a lo kawk ding.
Curuangah keimah ṭihnak nangmah ah a um lo ih, na Pathian Jehovah na tlansan hi,
Thil ṭhalo le thil khâ a si ti thei awla hmufiang aw,» tiin
Ralkap rualpawlih Bawi Jehovah in a ti.
20 «Ziangahtile tuan le mang laiah na hngawngkol ka rak khiak ih, na hrenghri cat ko ka tuah;
Cule nang in, ‹Ka lo rian lo ding,› tiah na ti.
Ziangahtile mual sâng kip le thingbŭknîm hnuai kip ah
Hlawhhlannak tuahin na it.
21 Cuticingin sabit hri ṭha zet vekin ka lo phun, ci ṭhabik hmangin.
Ziangtin saw ka hmai ihsin na pial ih,
Ka hrangah sabit hri danglam phŭn mi ih na can?
22 Ziangahtile cingál ih khawlhawin, sabăwn tampi hmang khal awla,
Na mawhsualnak cu ka hmaika-ah a lang thotho, Bawipa Jehovah in a ti.
23 ‹Kei cu ka bawrhbang lo,
Baalpawlih dung ka thlun lo,› tiah ziangtin na ti thei?
Phaikuam ah na lamzin zoh awla,
Ziang na rak tuah ti thei aw:
Nang cu kalauk zamṭha zet, a hruang pahtlăngtu vek na si,
24 Ramṭhing ih um ṭheu ramlak lāk,
A hur cān ih hnar hnûk;
Pawlawk a hiar tikcucān ah zo in so kham thei?
Amah hawltu hmuahhmuah bāngawter duh hlah hai seh;
A hur thla ah an hmu ding.
25 Kedam hruh loin um hlah awla, na dang carter hlah.
Asinan nang in, ‹Ruahsan ding a um lo.
A um lo! Ziangahtile khawtluang mipawl ka duhdawt ih, an dung ka thlun ding,› tiah na ti.
26 «Rûkru kaih a si tikih a ning a zah vekin,
Israel sungza an ning a zak;
Anmah le an siangpahrangpawl le an bawipawl le an puithiampawl le an profetpawl khal.
27 Thingkung hnenah, ‹Nang cu ka pa na si,› tiin le,
Lungto hnenah, ‹I hringtu na si,› titupawl cu.
Ziangahtile an hmai in hawih loin, an dung in tun.
Asinan an harsat cān ah,
‹Tho awla, in run aw,› tiah an ti ding.
28 Asinan na hrangih na tuah mi na pathianpawl cu khuiah so an si?
An lo run thei asile, na harsat cān ah tho hai seh;
Ziangahtile Maw Judah, na pathianpawl cu na khawpi zât an si.
29 Ziangahso in do?
Nan zaten ka lakah nan hél, Jehovah in a ti.
30 Ṭhathnemnak um lopiin nan fātepawl nun ka sim,
Nunrĕmnak an cohlang lo.
Mi siatsuahhmâng kiosa bangin,
Na ralnâm in na profetpawl a eirál.
31 Maw ṭhangtharpawl, Jehovah kamsuakthu hmufiang uh.
Israel hnenah ramṭhing vek le,
Khawthim ram maw ka si?
Ziangahso ka mipawl in, ‹Kannih cu mizalēn kan si,
Na hnenah kan ra nawn lo ding?› in ti.
32 Fala him in a ceiawknak a hngilh thei maw?
Mo in teh a thuamawknak a hngilh thei maw?
Asinan ka mipawl cun ni siar cawk lo in hngilh.
33 «Duhdawtnak hawl dingin ziangtluk ṭhain so na timlamawk?
Curuangah nunau sualrálpawl in na nundān an lo câwng.
34 Na sinfen khalah mawh nei lo mifarahpawlih nunnak thisen hmuh a si.
Annih cu an lo răwk lai na kaih mi khal an si lo.
Cuticingkhalin,
35 ‹Mawh nei lo ka si ruangah,
A thinhengnak cu ka par ihsin a kir hrimhrim ding,› tiah na ti.
Ngai hnik, ‹Thilsual ka tuah lo,› na ti ruangah
Nangmah dokalhin ka thuhla ka rel ding,
36 Na dinhmun thlĕng dualdo dingin, ziangahso hi tlukih na zuanzam?
Assiria ih an lo ningzahter vekin, Izip khal in na ning an lo zakter ding.
37 A si, na kut in na lu dawmin
Cutawk ihsin na fehsuak ding;
Ziangahtile na rinsan mipawl cu Jehovah in a hnáwng hai ih,
Anmah hmangin na hmuingil lo ding.

2:10a Kittim: Saipras hmin dang a si.

2:16b Nof: Izip ram ih khaw pakhat a si.

2:16c Tahapanhes: Izip ram ih khaw pakhat a si.

3

Rinumlo Israel

1 «Mi pakhat in a nupi a mâk ih,
A hnen ihsin cu nu cu a feh ih,
Mipa dang ta ih a can asile,
Cu pa cun cu nu cu a lakirsal pei maw?
Cuih ram cu a bawrhhlawh tuk lo ding maw?
Asinan nang cun duh mi tam zet thawn hlawhhlannak na rak tuah;
Cucingin ka hnenah na ra kir thotho, tiah Jehovah in a ti.
2 Hmun sâng phūl kawlh lam khi cuan awla, zoh hnik:
Mipa na ihpilonak hmun teh khuitawkah?
Ramṭhing ih Arab-mi bangin,
Anmah hngakin lamzin kapah na to;
Cule hlawhhlannak le na sualralnak in
Ram na bawrhhlawhter a si.
3 Curuangah ruahpi cu kaihtān a si ih,
Ruah neta khal a um lo.
Cule hlawhhlâng vekin na calhngal ih,
Na ning a zak lo.
4 Atu thăwkin, ‹Ka Pa, nangmah cu ka no laiih i hruaitu na si.
5 Anih cu kumkhuain a thin a heng tâtâ ding maw?
A net tiang a nuar ding maw?› tiin ka hnenah na au lo ding maw?
Ngai hnik, cutivekin na ṭawng, asinan thil ṭhalo pawl cu na tithei tawkin na tuah thotho,» tiin.

Sual Sir dingih Kawhnak

6 Cuihtlunah siangpahrang Josiah san ah Jehovah in ka hnenah, «Dungtawlh Israel in ziang a rak tuah ti na hmu maw? Anih cu tlang sâng kip par le a thingbŭknîm hnuai kip ah a so ih, cu tawkah hlawhhlannak a tuah. 7 Cule hi thil hmuahhmuah a tuah hnuah ka hnenah a ra kir ding tiah ka ruat. Asinan a ra kir cuang lo. Cule a farnu hrăwkhrawl Judah in cumi cu a rak hmu. 8 Dungtawlh Israel cu a uiretnak ruangah mâknak ca kĕnin ka suakter. Cucingin a farnu hrăwkhrawl Judah cun a ṭih cuang lo ti ka hmu. Anih cu a fehsuak ih hlawhhlannak a tuah thotho. 9 Cule hitin a si, a ngainep mi a hlawhhlannak in ram a bawrhhlawhter ih, thing le lung ih tuah mi pathianpawl hnenah a uire. 10 Cule hiti tluk si cingin a farnu hrăwkhrawl Judah cu a thinlung zaten ka hnenah a ra kir lo, a tiawter men, Jehovah in a ti,» tiah i ti.

11 Cun Jehovah in ka hnenah, «Dungtawlh Israel cu mihrăwkhrawl Judah hnakin dingfel sawnin a langawter. 12 Feh aw, hi thupawl hi sak lamah phuang awla, sim aw:

‹Dungtawlh Israel ra kir aw, Jehovah in a ti;
Ka thinhengnak na parah ka tlater lo ding.
Ziangahtile kei cu zahngainak nei ka si, Jehovah in a ti;
Ka thinheng kumkhua lo ding.
13 Jehovah na Pathian lakah na rak hél ih,
Thingbŭknîm hnuai kip ah khawtluang mipawl hnenah na siangaw,
Cule ka aw nan ngaithla lo,
Cuih na mawhsualnakpawl cu pawm aw,› Jehovah in a ti.

14 «Aw, dungtawlh tefapawl tla, ra kirsal uh,» Jehovah in a ti, ziangahtile kei cu nan pasal ka si. Nanmah lakin khawpi pakhat ihsin pakhat le sungkua pakhat ihsin pahnih ka la ding ih, Zion ah ka lo hruai ding. 15 Cule theihnak le theihthiamnak thawi lo câwmtu ding ka thinlung duh zawng tuukhāltupawl tla ka lo pe ding.

16 «Cun hitin a si ding, nan tam ih, ram ih nan karh tikah, cuih san ah, annih in, ‹Jehovah-ih Thukham Kuang,› an ti nawn lo ding, Jehovah in a ti, an lungthin ah a um lo ding ih, an cîng nawn lo ding; an va pan lo ding ih, an tuah nawn fawn lo ding.

17 «Cuih cān ah Jerusalem cu Jehovah Laltokham tiih kawh a si ding ih, cu tawkah miphun hmuahhmuah fĭnkhawm an si ding, Jehovah hmin umnak, Jerusalem ah. A ṭhalo mi an thinlung ih thupek vekin an nung nawn lo ding. 18 Cuih cān ah Judah sungza cu Israel sungza thawn an kăwpaw ding ih, sak lam ram ihsin, nan pupápawl ro ih ka rak pek mi ram ah an ratlāng ding.

19 «Kei in,

‹Ziangtin so fanaupawl lakah lo ret in
Miphun tampi lakah ro ṭha,
Ram nuam ka lo pek thei ding?
Cule, nang in, ka Pa, tiah in ko ding ih,
Ka hnen ihsin na tlânhlo lo ding, tiah ka ruat.
20 Thungaiten nupi in a kăwppi hrăwkhrawl zetih a tlansan bangin,
Maw Israel sungza, ka parah hrăwkhrawl zetin nan tuah, Jehovah in a ti,›

tiah ka ti,» tiah i ti.

21 Hmun sâng phūl kawlh ah aw theih a si,
Israel tefapawlih ṭah le dilnakpawl cu.
Ziangahtile an lamzin an merhkawi;
Jehovah an Pathian an hngilh.
22 «Nannih dungtawlh tefapawl ra kir uh,
Nan dungtawlhnak ka lo damter ding.»
«Zoh hnik, na hnenah kan ra,
Ziangahtile nangmah cu Jehovah kan Pathian na si.
23 Thungaiten atlang le tlangmual pawlih thawmvâng cu a lak men a si;
Thungaiten, Israel rundamnak cu Jehovah kan Pathian ah a si.
24 Asinan hi thil zahthlak hin
Kan pupápawlih ṭuanbăngnak cu kan no lai ihsin a eirál thluh:
An rante rual le an ranpi rual,
An fapapawl le an fanupawl khal.
25 Ningzakin kan zau ih,
Kan mualphonak in in khuh.
Ziangahtile kan no lai ihsin tuihni tiang
Kanmah le kan pupápawl cu
Jehovah kan Pathian parah kan rak sual,
Cule Jehovah kan Pathian aw kan rak ngaithla lo,» tiin.

3:23a tlang le tlangmual pawlih thawmvâng: Tlang le tlangmual pawlih milem an biaknak thawmvâng a si.

4

1 «Na ra kir ding asile, Maw Israel,» Jehovah in a ti,
«Ka hnenah ra kir aw;
Cule ka mithmuh ihsin na thil fihnungzapawl na hlăwn ding asile,
Na hnîn lo ding.
2 Cule thudik in, diknak in le dingfelnak in,
‹Jehovah a nun rori vekin,› tiin sia na săm ding;
Cule miphunpawl cu amah ah thlawsuah an peaw ding ih,
Amah ah tluang an khawng ding,» tiin.

3 Ziangahtile Judah le Jerusalem mipapawl hnenah Jehovah in hitin a ti:

«Nan leh hrih lo mi leilet uhla,
Hlingrûl lakah tuh hlah uh.
4 Nannih Judah mipapawl le Jerusalem luahtupawl tla,
Jehovah hrangah nan serh zim tán uhla,
Nan thinlung vun zim tán uh,
Culole ka thinso cu ni sa bangin a thleng ding ih, a kāng ding,
Cule thil ṭhalo na tuah mipawl ruangah
Cumi cu zohman in an hmit thei lo ding,» tiin.

Sîm dingih Hrinhronak

5 Judah ram ah thăn uhla,
Jerusalem ah phuang uh:
«Ram sungah tuupa ki phaw uh;
‹Fĭnkhawm aw uh,› tiin au uh,
‹Pungkhawm aw uhla,
Kulh nei khawpi sungah lut uhsi,› tiah ti uh.
6 Zion lamah thantar khaisâng uh.
Răwlhimnak hawl uh!
Muangcâng hlah uh!
Ziangahtile sak lam ihsin thil ṭhalo le,
Siatralnak maksak ka run thlĕn ding.
7 A phūl lak ihsin kiosa a hung suak ih,
Miphunpawl siatsuahtu ding a ra lai.
Na ram ṭhingter dingin,
Anih cu a umnak hmun a suahsan zo.
Luahtu um loin na khawpipawl tla an răm ding.
8 Himi ruangah, buri hniphuan hruh uh,
Ṭap uhla, râk ciamco uh.
Ziangahtile kan hnen ihsin
Jehovah-ih tuksumza thinhengnak cu a kirsal lo,» tiah ti uh.
9 «Cule cuih ni ah hitin a si ding, Jehovah in a ti,
Siangpahrang thinlung le
Bawipawl thinlung a hlorál ding;
Puithiampawl an khawruah a har ding ih,
Profetpawl an mang a bang ding,» tiin.
10 Cun kei in, «Ai law, Bawipa Jehovah!
Ralnâm in thinlung a sun ko na cingin
‹Remdaihnak nan nei ding,› tiin,
Hi mipi le Jerusalem cu nasazetin na rak bumngah hai a si,» tiah ka ti.
11 Cu laiah hi minungpawl hnen le Jerusalem hnenah,
«Ramṭhing hmun sâng phūl kawlh ihsin thli sa cu
Ka minungpawlih fanupawl lamah
Theh ding le thianfai ding si loin a hrang,
12 Cumi hrangah a cak zet mi thli cu ka thupek in a thleng ding;
Atu ah an parih dāntatnak khal ka thăn ding,» tiih sim a si ding.
13 Ngai hnik, amah cu mero bangin a kaiso ding ih,
A ránglêngpawl cu phusîng vekin.
A rángpawl cu muvanlaipawl hnakin an rangsawn.
Kan hmakhua a pit a si, ziangahtile kannih cu răwk kan si.
14 Maw Jerusalem, rundam na si theinak dingah,
Sualralnak lakin na thinlung khawlh aw.
Ziang tik tiang so na sungah ruahnak ṭhalo a um ding?
15 Ziangahtile Dân ihsin aw pakhat in a thăn ih,
Efraim Tlang ihsin siatnak a phuang.
16 Miphunpawl hnenah sim uh,
Ngai hnik uh, Jerusalem dokalhin phuang uh,
«Ram hlapi ihsin kulhkhŭmtu an ra thleng ih,
Judah khawpipawl dokalhin an aw an suah.
17 Lókiltupawl bangin a kimvel hmuahhmuah in an kulh,
Ziangruangahtile anih cu keimah dokalhin a hél, Jehovah in a ti.
18 Na nundān le na thil tidān in
Hi thilpawl hi na parah a thlengter.
Himi hi na sualralnak a si,
Ziangruangahtile cumi cu a khâ,
Ziangruangahtile cumi cun na thinlung a sun a si,»

tiin.

A Siat Mi Miphun ruangih Riahsiatnak

19 Maw ka nunnak, ka nunnak!
Ka thinlung rori a nâ!
Ka sungah ka thinlung in thawmvâng a tuah;
Daiten ka um men thei lo,
Ziangruangahtile na hna in na thei a si, Maw ka nunnak,
Tuupa ki phawt thâwm,
Ral do authâwm cu.
20 Siatnak parah siatnak a thleng,
Ziangahtile ram pumpi cu tisiat a si.
Rinlopiin ka puanthlampawl tisiat an si ih,
Hmakhatteah ka puanzarpawl khal.
21 Ziang tik tiang so thantar ka hmuh ding ih,
Tuupa ki phawt awn ka theih ding?
22 «Ziangahtile ka mipawl cu an â a si,
Keimah in thei lo.
Annih cu fāte â an si ih,
Theihthiamnak an nei lo.
Thil ṭhalo tuah ding cun an fim,
Asinan thil ṭha tuah dingin theihnak an nei lo,» tiin.
23 Leilung ka zoh, ngai hnik, pianhmang nei lo le lawnglak a si;
Cule vanpawl in tleu an nei lo.
24 Tlangpawl ka zoh ih, ngai hnik, an hnîn;
Cule tlangmual hmuahhmuah an sâwi dualdo.
25 Ka zoh ih, ngai hnik, milai pakhat hman an um lo,
Cule van zuang vâte hmuahhmuah an zamhlo ṭheh.
26 Ka zoh ih, ngai hnik, ram ṭha cu ramṭhing ah a cang,
Cule Jehovah hmaika-ah,
A thinhengnak nasazet hmaika-ah
A khawpi hmuahhmuah an siat thluh.
27 Ziangahtile Jehovah in hitin a ti,
«Ram pumpi a răm ṭheh ding;
Asinan ka siatsuah thluh lo ding.
28 Cumi cu leilung in a sūn ding ih,
Tlun lam vanpawl an thim ding;
Ziangruangahtile ka ṭawngsuak zo a si.
Ka tumtah zo ih, ka lung ka thleng lo ding,
A hnen ihsin ka kir fawn lo ding.
29 Rángtothiampawl le thálsaithiampawl thâwm ruangah,
Khawpi pumpi cu an tlânse ding.
Phūl lakah an lut ding ih, lungpipawl parah an kai ding.
Khawpi kip cu tān ta an si ding ih,
A sungah mi an cêng lo ding.
30 «Maw nang răm mi,
Ziang na tuah ding?
Senlar in thuamaw khal awla,
Sui ceiawknak in ceiaw khal awla,
Na mitpawl hnăwihkau khal awla,
Na mawiawter lak men;
Na duh mipawl in an lo hmuhsuam ding;
Na nunnak an hawl ding.
31 «Ziangahtile nunau fahrinnat tuar authâwm vek ka thei,
Fatir hringtunuih ānhai aw vek.
Zion fanu ikik aw cu;
‹Atu ah ka hmakhua a pit!
Ziangahtile laithatpawl ruangah ka nun a cau,› tiin
A kut a phar a si,»

tiin.

5

Pathian Minungpawlih Bawrhhlawhnak Tawpkhâwk

1 «Jerusalem kăwtthler ah sak le thlang ah tlân uh,
Atu ah zoh uhla thei uh;
Cule a mualpawl ah hawl uh,
Mi pakhat tal dik zetih thil ti,
Thutak hawl an um asile,
Jerusalem cu ka ngaidam ding.
2 ‹Jehovah a nun rori vekin,› an ti ko nain,
Thungaiten, diklo zetin sia an săm thotho.»
3 Maw Jehovah, na mit cu thutak parah a fu lo maw si?
Anmah na vua,
Asinan an thin a nâ lo;
Anmah na eirál ṭheh,
Asinan nunrĕmnak cohlan ding an êl thotho.
An hmai cu lungpi hnakih hakin an rak tuah;
Lamlêt ding an duh lo.
4 Curuangah kei in, ‹Hipawl hi mifarah an si.
Mi-â an si;
Ziangahtile Jehovah-ih lamzin an thei lo,
An Pathian cīn le dān khal.
5 Miropipawl hnenah ka feh ding ih, anmah ka va be ding,
Ziangahtile annih in Jehovah-ih lamzin le,
An Pathian cīn le dān an thei,» tiah ka ti.
Asinan cupawl cun ṭum khat ah hngawngkol an kiakter ih,
Ṭāwnnak hri an catter.
6 Curuangah kiosa in tupi sung ihsin a that hai ding,
Nelrawn cinghnia in a thlek hai ding;
Tlavâng in an khawpipawl a bawh ding.
Cutawk ihsi leng suak pauhpauh cu thlek nêknêk an si ding,
Ziangruangahtile an dānpahbălnak a tam ih,
An dungtawlhnak a nasa.
7 «Himi ruangah ziangtin so ka lo ngaithiam ding?
Na tefapawl in in thlauthla,
Cule pathian a si lo mipawl sālin sia an săm,
Puar ko ka cawm hai hnuah,
An uire ih,
Hlawhhlâng innpawl ah an khat nauhno.
8 Zing lamih puar ko cawm mi rángcang hur vek an si;
Mi kip mai innhnen nupi ît-in an hrûm.
9 Hi thilpawl ruangah dāntat hai loin ka um ding maw? Jehovah in a ti.
Hivek miphun parah phuba la loin ka um ding maw?
10 «A tlar ih phŭn mi sabit tlangrănpawl parah kai uhla siatsuah uh,
Asinan cem thluh ko cun tuah hlah uh.
A hngepawl hleŭhfai uh,
Ziangahtile cupawl cu Jehovah ta an si lo.
11 Ziangahtile Israel sungza le Judah sungza cu
Ka parah hrăwkhrawl zetin thil an ti, Jehovah in a ti.
12 Jehovah thuhla ah thuphan an per ih,
‹Zianghman a tuah lo ding.
Kan parah thil ṭhalo a thleng lo ding ih,
Ralnâm le mangṭam khal kan hmu fawn lo ding.
13 Cule profetpawl cu thli ah an cang,
Ziangahtile anmah ah kamsuakthu a um lo.
An parah cutivekih tuah a si ding,› an ti a si,» tiin.

14 Curuangah ralkap rualpawlih Pathian Jehovah in hitin a ti:

«Hih thu nan sim ruangah,
Ngai hnik uh, ka kamsuakthupawl cu na kâ sungah meisa ah ka tuah ding ih,
Hih mipi hi thing ah,
Cule cumi cun a kāngral hai ding.
15 Ngai hnik, Maw Israel sungza, lam hlapi ihsin miphun pakhat na hnenah ka run hruai ding, Jehovah in a ti.
Cucu miphun cak,
Khuahlan miphun,
An ṭawng na theih lo mi miphun,
An ṭawng mi na theihthiam thei lo mi cu.
16 An thálfung bawm cu thlān áwngaw vek a si;
An zaten micak hlir an si.
17 Cule na thlairawl khâwm mi le na rawl an eicem ding ih,
Na fapapawl le na fanupawl an eirál ding,
Na rante rual le na ranpi rual an eicem ding;
Na sabitpawl le na theipipawl khal an eicem ding;
Na rinsan mi, na khawpikulh neipawl,
Ralnâm in an siatsuah ding,» tiin.

18 «Cutisikhalsehla cuih cān ah, Jehovah in a ti, cemthla ko ka lo tisiat lo ding. 19 Cule hitin a si ding, ‹Ziangah so hi thilpawl hi Jehovah kan Pathian in kan parah a tuah?› nan ti tikah cun, ‹In tansan ih, nan ram ah ram dang pathianpawl nan rĕn vekin, nan ram a si lo mi ah, khawtluang mi nan rian ve ding,› tiah nan sâng hai ding a si,» tiin.

20 Hihi Jakob sungza ah thăn awla,
Judah ram ah phuang aw,
21 «Atu ah hihi ngaithla uh, Maw mi-âpawl,
Theihthiamnak nei lo,
Mit nei ko naih, hmu lo le,
Hna nei naih thei lo pawl:
22 In ṭih lo maw? Jehovah in a ti.
Ka hmaika-ah nan khūr lo ding maw?
Catuan thusuah hmangin,
Tifinriat lan thei lo dingah,
Ramri dingih vunnel rettu ka si.
Cule a tisuar cu let luihlo hmansehla,
A pahtlăng thei cuang lo ih,
Awn humho khal sehla a lan thei lo.
23 Asinan hi minungpawl hin luhlul le helhmang thinlung an nei;
An hél ih, an fehhlo.
24 An thinlung in,
‹Atu cun a tikcu teih ruah hmaisa le neta in petu,
Jehovah kan Pathian ṭih thlang uhsi.
Anih cun rawl khâwm cān in ruatsak,› tiah an ti lo.
25 Nan mawhsualnakpawl in hi thilpawl a pialhloter ih,
Nan sualnakpawl in thil ṭha a khâm.
26 Ziangahtile ka minungpawl lakah misualrál hmuh an si;
Vâte thangkamtu bangin băwkin mi an bawh;
Thang an kăm;
Minung an awk.
27 Bawm sungih vâte a khah vekin,
An innpawl cu bumawknak in a khat.
Curuangah annih cu miropi le milian ah an cang.
28 An thau ih an ngil denden;
A si, misualrálpawl ih thil ti an hleih;
Neh dingin thuhla an relsak lo,
Pa nei lo pawlih thuhla cu;
29 Hi thilpawl ruangah dān ka tat hai lo ding maw? Jehovah in a ti.
Hivek miphun parah phuba ka la lo ding maw?» tiin.
30 Hih ram ah khawruahharza le tuksumza thilsual tuah a si:
31 Profetpawl in diklo zetin thu an phuang ih,
Puithiampawl in anmai thuneihnak in an uk;
Cule ka minungpawl in cumi cu ṭha an ti.
Asinan a netnakah ziang nan tuah ding?

6

Sak lam ihsin Sîmtu a Ra Ding

1 Maw nanih Benjamin tefapawl,
Jerusalem ihsin tlânsuak dingah fĭnkhawm aw uh!
Tekoa ah tuupa ki phaw uhla,
Beth Hakkerem ah hminsinnak thlai uh!
Ziangahtile sak lam ihsin thil ṭhalo a suak ding,
Siatnak maksak tak cu.
2 Duhnungza le nunau nonal,
Zion fanu cu ka sâtcat ding.
3 A hnenah tuukhāltupawl cu rante rual thawn an ra ding.
A kimvel zaten puanthlam an zar ding.
Mi kip mai hmunram cio ah an tlanglêng ding.
4 «Amah do dingin timtuah aw uh,
Tho uhla, sun laiah so uhsi.
Kan hmakhua a pit a si, ziangahtile sun ni a liamhlo,
Ziangahtile khua a thim zikte thlang.
5 Tho aw, zan laiah feh uh sila,
A siangpahrang innpawl siatbăl uhsi,» tiin.

6 Ziangahtile ralkap rualpawlih Jehovah in hitin a ti:

«Thing hau uhla,
Jerusalem kulhkhŭmnak tuah uh.
Hi khawpi cu dāntat ding a si.
A sungah palbĕtawknak a khat.
7 Tihna in a tithiang a khawhsuak bangin,
Anih in a sualralnak a khawhsuak ve.
Thahrumsuahnak le mirămnak cu amah ah theih a si.
Ka hmaika-ah thinnatnak le hriamhmapawl a umpeh vivo.
8 Maw Jerusalem, fimkhur aw,
Culole ka lo suahsan pang ding;
Culole luah lo mi ram ah lo cangterin,
Ka lo ṭhingter pang ding,» tiin.

9 Ralkap rualpawlih Jehovah in hitin a ti:

«A tāngsŭn Israel-mipawl cu sabit bangin, lawhfai thluh an si ding;
Sabit lo tu bangin, na kut cu a hngeṭekpawl parah suahsal aw,» tiin.
10 An hna ih an theih dingah zo hnenah so ka sim ding ih,
Ralrinnak ka pek ding?
Ngai hnik, an hna cu serh zim tan lo a si ih,
An ngaithla thei lo.
Ngai hnik, Jehovah kamsuakthu cu an hrangah thil hmuhsuamumza a si;
Cumi ah năwmawknak an nei lo.
11 Curuangah Jehovah-ih thinsonak in ka khat.
Sūpawknak ruangah ka cau.
«Khawlak nauhakpawl le,
Hmunkhatih tlangval pungkhawmpawl parah ka burh ding;
Ziangahtile pasal cu nupi zawngah lâk a si ding,
Kum upapawl le tarkûnpawl khal.
12 Cule an innpawl cu mi dang hnenah pek an si ding,
Lópawl le nupipawl thawn;
Ziangahtile cuih ram luahtu parah
Ka kut ka suah ding,» Jehovah in a ti.
13 «Ziangahtile anmah lakih a tenaubik ihsin a tumbik tiang miduhham an si;
Cule mi kip, profet ihsin puithiam tiang diklo zetin an nung.
14 Ka mipawlih hriamhma khal ngaihsâm zetin an tuamhlawm,
Remdaihnak a um lo laiah
‹Remdaihnak, remdaihnak,› tiin.
15 Thil fihnungza an tuah laiah an ning a zak maw?
Lamlam! An ning a zak hrimhrim lo;
An mithmai khal a sia lo.
Curuangah a tlu mipawl lakah an tlu ding;
Anmah dān ka tat hai tikah,
Dirhthlak an si ding,» Jehovah in a ti.

16 Jehovah in hitin a ti,

«Lamzinpawl ah ding uhla, zoh uh,
Lamzin ṭha umnak hlanlai zinpawl kha sut uh,
Cule cumi cu zawh uh;
Cun nan nunnak hrangah cawlhhahdamnak nan hmu ding.
Asinan annih in, ‹Cumi cu kan zawh lo ding,› tiah an ti.
17 Cuihtlunah, ‹Tuupa ki phawt awn ngai uh!› tiin anmah kiltu dingpawl ka ruat.
Asinan annih in, ‹Kan ngai lo ding,› an ti.
18 Curuangah Maw nannih miphunpawl, ngai uhla,
Maw mipi-umkhawm, an lakah ziang a um ti thei uh.
19 Maw leilung, ngai aw!
Zoh hnik, hi minungpawl parah,
An khawruahnak rah thil ṭhalo ka thlĕn ding,
Ziangruangahtile annih in ka kamsuakthupawl an ngaithla lo ih,
Ka dān an hnáwng sawn riangri.
20 Ziang hrangah so Sheba ihsin frankinsense siseh,
Ram hlapi ihsin kane ṭha siseh ka hnenih a thlen?
Nan Meiur Thilhlănpawl cu cohlan an si lo ih,
Nan raithawinakpawl khal in ka lung in hmuiter lo.

21 «Curuangah Jehovah in hitin a ti:

‹Ngai hnik, hi minungpawl hmaiah khamtu ka ret ding ih,
A parah palepawl le fapapawl an bahtlâng ding.
Innhnen le a rualpi an hlorál ding,› tiin,»

tiah a ti.

22 Jehovah in hitin a ti:

«Ngai hnik, sak lam ram ihsin minung an rung suk ih,
Leilung dĕng ihsin miphun ropi tundīn a si ding.
23 Annih in thál le fei an keng ding;
Nunrâwng le zahngainak nei lo an si;
An aw cu tipi awn humho vek a si;
Cule annih cun ráng an to,
Nangmah do dingin mipa rual zaraw bangin, Maw Zion fanu,» tiin.
24 Cuih thuthang cu kan rak thei;
Kan kut an zăwi:
Ānhainak in in kai,
Nunau fahrinnat tuar vek natnak in.
25 Ló ah feh hlah uhla,
Lamzin khalah feh hlah uh.
Ralpawlih ralnâm ruangah,
Kil kip ah ṭihnak a um.
26 Maw ka minungpawlih fanu,
Buri-hnipuan hruh awla,
Vutcâm lakah lāwng rero aw!
Fapa neihsŭn lusûn bangin, sūn uh, nasazetin ṭap uh;
Ziangahtile rinlopin kan parah suamtu a thleng thutthi ding.
27 «An umdān na theih theinak dingah le na hniksak thei hainak dingah,
Ka minungpawl lakah nangmah cu dawlsâng le kulhhnget ah ka lo ret.
28 An zaten lungruh mihél, mi relsiathmang vakkûal vek an si.
Annih cu dar le thir an si,
An zaten mibawrhhlawh an si.
29 Sodawngpawl in nasazetin an zâp,
Meisa in sûan zŭp ko a tuah;
Erfaituih erfainak cu ṭhathnemnak a um lo,
Ziangahtile misualrálpawl cu hlăwnhloh an si lo.
30 Annih cu hnawn mi ngun tiah kawh an si,
Ziangruangahtile Jehovah in anmah a hnáwng a si,» tiin.

7

Ram Sungih Thil Ṭha Lo

1 Jehovah hnen ihsin Jeremiah hnenih thleng kamsuakthu cu, 2 «Jehovah inn kăwtka ah ding awla, cu tawkah hi kamsuakthu hi phuang aw, cule hitin ti aw, ‹Jehovah be dingih hi kăwtkapawl ih a luttu, nannih Judah-mi hmuahhmuah tla, Jehovah kamsuakthu hi ngai uh!› tiah,» tiin. 3 Ralkap rualpawlih Jehovah, Israel Pathian in hitin a ti: «Nan nundānpawl le na thil tipawl tuahṭha uh, cule hi hmun ah ka lo cêngter ding. 4 ‹Hipawl hi Jehovah Temple, Jehovah Temple, Jehovah Temple an si,› ti mi himi thuphan ṭawngkampawl hi rinsan hlah uh.

5 «Ziangahtile nan nundānpawl le nan thil tipawl ṭha zetin nan rĕmṭhat ih, dikten mi pakhat le a innhnen karlakih thu nan ṭhen ih, 6 mikhual, pa nei lo le nuhmei nan palbĕt loih, hi hmun ah mawh nei lo thisen suah loin, nan siatsuahawknak dingah pathian dangpawl nan biak lo asile, 7 nan pupápawl hnenah kumkhua hrangih ka pek hai mi ram, hi hmun ah ka lo cêngter ding.

8 «Ngai hnik uh, ṭhathnemnak nei lo thuphan ṭawngkampawl nan rinsan. 9 Fifir-in, laithatin, uire-in, diklo zetih sesămin, Baal hnenah rimhmui ur-in, nan theih dah lo mi pathian dangpawl rak thlunin le, 10 ka hmin pu hi inn ah rain, ka hmaiah dingin, hi thil fihnungzapawl hmuahhmuah tuahsal leh thotho zik siin, ‹Runsuah kan si,› nan ti ding maw? 11 Ka hmin pu hi inn cu nan mithmuhah suamhmangpawl pûk ah a cang zo maw si? Ngai hnik uh, cumi cu keimah rori hman in ka rak hmu a si, Jehovah in a ti.

12 «Asinan ka hmin ka cēnternak hmaisa, Shiloh ah atu ah feh uhla, ka mi Israel sualralnak ruangah cuih parah ziang ka tuah ti zoh uh. 13 Cule atu ah, hi thil hmuahhmuah hi nan tuah, nan hnenah thu ka sim leuhleuh, asinan nan ngaithla lo, ka lo ko nân, in rak sâng lo, Jehovah in a ti. 14 Curuangah hih inn, ka hmin pu, nanmah le nan pupápawl hnenih ka pek mi nan rinsan mi hih hmun parah, Shiloh parih ka tuah bangin ka tuah ding. 15 Cule nan unau hmuahhmuah, Efraim cithlah pumpi ka hlăwn bangin, ka mithmuh ihsin ka lo hlăwn ding.

16 «Curuangah nang cun hi miphun hrangah thlacam hlah, an hrang khalah au hlah awla, ka hnenah an hrangah thlacam fawn hlah, ka hnenah dilsak hai fawn hlah; ziangahtile ka ngaithla lo ding. 17 Judah khawpipawl ah le Jerusalem kăwtthler ah ziang an tuah ti na hmu lo maw si? 18 Falepawl in thing an khawm, palepawl in mei an muah ih, van siangpahrang bawinu hrangih sangper tuah dingin nunaupawl in sang an nâwng; cule thinheng ko in căwkthawh theinak dingah pathian dangpawl hnenah Inding Thilhlănpawl an thle. 19 Thinheng dingin in căwktho maw? Jehovah in a ti. Anmai ningzahnak dingah an tuah a si men lo maw?

20 «Curuangah Bawipa Jehovah in hitin a ti: ‹Ngai hnik, ka thinhengnak le ka thinsonak cu minung par, ramsa par, ramlak thingkungpawl par le lei rah par, hih hmun ah burh a si ding. Cule a kāng ding ih, hmih a si lo ding,› tiin.»

21 Ralkap rualpawlih Jehovah, Israel Pathian in hitin a ti: «Nan raithawi mipawl parah nan Meiur Thilhlănpawl bêt uhla, sa ei uh. 22 Ziangahtile Izip ram ihsin nan pupápawl ka hruaisuah hai laiah khan Meiur Thilhlănpawl le thawiawknakpawl thawn pehparin an hnenah thu ka sim lo ih, thu ka pe hai fawn lo. 23 Himi hi thu ka pek hai mi cu a si sawn, ‹Ka aw ngai uhla, nan Pathian ka si ding, cule nanmah cu ka mi nan si ding. Cun nan lam a tluan theinak dingah thu ka lo pek mi lamzin hmuahhmuah thlun uh,› ti hi. 24 Cuticingin an thlun lo ih, an hna an tháwng lo, cuhnakin anmai thinlung ṭhalo thurawnpeknak le suangtuahnak an thlun sawn ih, hmai lam pan loin dung lamah an sîp. 25 Nan pupápawl in Izip ram an suahsan ni thăwkin tuihni tiang, ka siahhlawh profetpawl hmuahhmuah cu ni tin nan hnenah ka rak thlah leuhleuh. 26 Cucingin ka thu an thlun lo ih, an hna khal an tháwng lo, an ring an khăwngter sawn riangri. An pupápawl hnakin an sualsawn.

27 «Curuangah hi thu hmuahhmuah hi an hnenah na sim pei, asinan an lo ngai lo ding. Nang in anmah na ko hai ding, asinan an lo sawn lo ding. 28 Asinan nang in an hnenah, ‹Himi hi Jehovah an Pathian aw ngaithla lo le nunrĕmnak cohlang duh lo miphun an si. Thutak a hlorál ih an hmur ihsin sahthlak a si. 29 Na sám met awla, hlăwn aw, cule hmun sâng phūl kawlh ah ṭah hla seh aw; ziangahtile a thinlingtertu san minungpawl cu Jehovah in a hnáwng ih, a thlauthla,› tiah na ti pei.

Thahawknak Phaikuam

30 «Ziangahtile Judah tefapawl in ka mithmuhah thil ṭhalo an tuah, Jehovah in a ti. Ka hmin pu mi inn bawrhhlawhter dingin, cu tawkah an thil fihnungzapawl an ret. 31 Cule thu ka rak pek lo mi le ka thinlung ih um lo mi, an fapapawl le fanupawl meisa ih ur dingin, Hinnom Fapa Phaikuam ah aTofeth hmun sângpawl an sak.

7:31a Tofeth: Isa 30:33 simfiangnak zoh aw.

32 «Curuangah ngai hnik uh, ni cu a rung thleng ding, Jehovah in a ti, cumi cu Tofeth tiih kawh a si nawn lo ding ih, Hinnom Fapa Phaikuam ti khalih kawh a si lo ding, Thahawknak Phaikuam an ti sawn ding; ziangahtile hmun um nawn lo tiangin Tofeth ah an phum ding. 33 Hi mipi ruakpawl cu van ih vâtepawl le leilung ramsapawlih rawl an si ding. Cule zohman in cuih vâtepawl cu an thlarîngter lo ding. 34 Cun Judah khawpipawl ihsin le Jerusalem kăwtthler ihsin hlimnak aw le lungawinak aw, mo neitu aw le mo aw ka cemter ding. Ziangahtile ram cu a ṭhing ding.

8

1 «Cuih cān ah, Jehovah in a ti, Judah siangpahrangpawlih ruh, an bawipawlih ruh, puithiampawlih ruh, profetpawlih ruh le Jerualem luahtupawlih ruh cu thlān ihsin an phawrhsuak ding. 2 Cupawl cu an duhdawt mi, an rak rĕn mi, a dung an rak thlun mi, an rak hawl rero mi le an rak biak mi: ni, thlapi le van ih thilmak rual hmuahhmuah hmaiah an phosuak ding. Fĭnkhawm an si lo ding ih, urkăng khal an si lo ding; leilung vangdâp parah êk bangin an um ding. 3 Cun himi sungkua sualrál tāngsŭn hmuahhmuah, ka dawisuak hainak hmunpawl hmuahhmuah ih ra tāng tâtupawl cun nun hnakin thih an hril sawn ding, ralkap rualpawlih Jehovah in a ti.

Zirhnak Sual Ṭihnunzia

4 «Cuihtlunah an hnenah hitin na sim pei, Jehovah in hitin a ti:

‹Minung cu an tluk tikah an thosal lo maw?
Mi a pialhlo tikah a kirsal lo maw?
5 Ziangahso hih Jerusalem minungpawl hi kumkhuaih dung an tawlh?
Bumnak an kaihnget ih, kir an êl.
6 Ka ngaithla ih ka hna in ka thei,
Asinan thudik an sim lo.
«Ziang so ka rak ti?» tiin
Zohman anmai sualralnak an siraw lo.
Doawknak lamih ráng tlân bangin
Mi kip mai zin cio ah an pial.
7 A si, van vaca in a tikcu a thei;
Cule thuro, ngathur hngawngsau vâte le peleng tla in
An tlun tikcu an hminsin;
Asinan ka minungpawl cun Jehovah cīn le dān an thei lo.
8 ‹Ziangtin so, «Kan fim ih
Jehovah Dān cu kan hnenah a um, tiah nan ti thei?»
Zoh hnik uh, cangantuih thuphan per cafung in thuphan ah a hruai.
9 Mifimpawl an ning a zak,
Annih cu an thin a nau ih lakhloh an si.
Ngai hnik uh, annih in Jehovah kamsuakthu an hnáwng,
Ziang vek fimnak si maw an neih?
10 Curuangah an nupipawl cu mi dangpawl hnenah ka pe ding ih,
An lópawl tla cu a neitu tharpawl hnenah ka pe ding;
Ziangahtile mi kip a tenaubik ihsin a tumbik tiang mi thil an daw,
Profet ihsin puithiam tiang
Mi kip diklo zetin an nung.
11 Ziangahtile annih in ka minungpawlih fanu hriamhma cu ngaihsam zetin an tuamhlawm,
Remdaihnak a um lo laiah,
«Remdaihnak, remdaihnak,» tiin.
12 Thil fihnungza an tuah tikah an ning a zak maw?
Lamlam! An ning a zak hrimhrim lo ih,
Mithmai siat khal an thiam lo.
Curuangah annih cu a tlupawl lakah an tlu ding;
Dāntat an si tikah
Hlăwnthlak an si ding, Jehovah in a ti.
13 Anmah cu ka riarálter hai hrimhrim ding, Jehovah in a ti.
Sabit hri parah sabit rah a um lo ding,
Theipi kung parah theipi rah a um fawn lo ding ih,
An hnah a vuai ding;
Cule anmah ka pek hai mi thilpawl anmah hnen ihsin an hlorál ding,› » tiin.
14 Ziangahso kan to ringring lai hrih?
Pungkhawm aw uh,
Cule kulh nei khawpipawl ah lut uh sila,
Cu tawkah va hlorál uhsi.
Ziangahtile Jehovah kan Pathian in daiten in umter ih,
In dingah tikhâ in rak pe.
Ziangruangahtile Jehovah parah thilsual kan tuah.
15 Remdaihnak kan hngak, asinan thil ṭha a suak lo;
Cule harhdamnak kan hngak,
Asinan, ngai hnik uh, buainak men a si!
16 «Dân ihsin a rángpawlih hnar phît awn theih a si.
A ráng aithâwm ah ram pumpi a khūr;
Ziangahtile an ra ih ram le a sungih um hmuahhmuah an siatsuah thluh,
Khawpi le a sungih cêng hmuahhmuah cu.
17 Ziangahtile ngai hnik uh, nan lakah rulpawl ka thlah ding,
Cam theih lo mi rulngânpawl,
Cule an lo cuk ding,» Jehovah in a ti.

Mipi hrangah Profet a Ṭap

18 Ka riahsiatnak cu tidam rual a si lo;
Ka thinlung a cau.
19 Ngai hnik! Ram hlapi ihsi ka minungpawlih fanu auaw cu:
«Zion ah Jehovah a um lo maw si?
A sungah a siangpahrang a um lo maw si?»
«Ziangah so an khercawp milimpawl le
Ram dang milempawl thawi thinheng dingih in cawkthawh?»
20 «Thlairawl khâwm cān a liam,
Ṭhal cān a cem,
Rundam kan si fawn si lo!»
21 Ka minungpawlih fanu hriamhma ruangah hriam ka si.
Ka sûn a si;
Khawruahharnak in in cîm.
22 Gilead ah thing hnâi a um lo maw si?
Cu tawkah sibawi an um lo maw si?
Ziangahso ka minungpawlih fanu hrangah harhdamnak a um lo?

9

1 Ka lu hi tidai si in,
Ka mit hi mitthli tihna si sehla maw,
Ka minungpawlih fanu thah an sinak ruangah
Sun le zan ka ṭap ding nân!
2 Ramṭhing ah khualtlawngpawl hrangah riahnak hmun nei ningla maw;
Ka minungpawl tân tain, ka fehsan hai ding!
Ziangahtile an zaten uire,
Mihrăwkhrawl tawngkhawmaw hleice an si.
3 «Cule thuphan hrangah an lei cu thál bangin an nâwp.
Thutak si lo, thuphan in ram a cîm.
Ziangahtile pakhat hnu pakhat thil ṭhalo an suah ih,
Keimah in thei lo,» Jehovah in a ti.
4 Mi kip mai innhnen cio parah fimkhur uhla,
Unau zokhal rinsan hlah uh;
Ziangahtile unau kip in mi an luahlan nêknêk ding ih,
Innhnen kip in mizuarthlaihmangpawl zawngah an feh ding.
5 Mi kip mai innhnen cio an bum ding ih,
Thutak an sim lo ding;
Thuphan sim dingin an lei an zirh;
Sual tuahnak ah an cau.
6 Na cēnnak hmun cu mi bumhmangpawl lakah a si;
Mi bumnak hmangin keimah in thei duh lo, Jehovah in a ti.

7 Curuangah ralkap rualpawlih Jehovah in hitin a ti:

«Ngai hnik, ka er hai ding ih ka hniksak hai ding;
Ziangahtile ka minungpawlih fanu parah ziangtin ka tuah ding?
8 An lei cu mi that thei thálfung vek a si;
Bumnak a ṭawngsuak;
A innhnen parah a kâ in awkam ṭha a ṭawng,
Asinan a thinlung ah cun a bawh.
9 Hi thilpawl ruangah anmah cu dāntat loin ka um ding maw?» Jehovah in a ti.
«Hivek miphun parah phuba la loin ka um ding maw?
10 Tlangpawl hrangah ka ṭap ding ih, ka ṭap ruangro ding,
Cule ramṭhing cēnnak hmunpawl hrangah ṭah hla ka seh ding,
Cupawl cu an kangrál ṭheh ruangah,
Zohman in an paltlăng thei lo ih,
Rannung aithâwm khal an thei thei lo.
Van zuang vâtepawl le ramsapawl an tlân;
An fehhlo.
11 Jerusalem cu thil sia penkhawm ah, sihál pûk ah ka tuah ding.
Judah khawpipawl ka ṭhingter ding, luahtu um loin,»

tiin.

12 Himi thei thei mifimpa cu zo a si? Cule cumi thăn dingih Jehovah kâ dawngtu cu zo a si? Ziangahso ram cu zohman ih paltlăng theih lo dingin a siatrál ih, ramṭhing bangih a kăng?

13 Cule Jehovah in, «An hmaiih ka ret mi ka dān an thlauthla, ka aw an ngaithla lo ih, cumi ihsin an feh fawn lo, 14 cuhnakin anmai thinlung suangtuahnak an thlun ih, an pupápawl in anmah an rak zirh mi Baal an rak thlun sawn ruangah, 15 ralkap rualpawlih Jehovah, Israel Pathian in hitin a ti: Ngai hnik, hi minungpawl rori hi hnîtkhâ ka eiter hai ding ih, tûr rawi mi tidai ka inter hai ding. 16 Anmah le an pupápawl ih an rak theih lo mi, miphunpawl lakah ka ṭhekdarh hai ding. Cule anmah ka riarálter thluh hai hlan sung cu ralnâm ka dawiter ding,» tiin.

Thuṭhennak ah Mipi an Ṭap

17 Ralkap rualpawlih Jehovah in hitin a ti:

«Ruat awla, lusûn nunaupawl ra dingin ko aw;
Cule ṭahthiam nunaupawl ra dingin mi thlah aw.
18 Kan mit cu mitthli tlain le,
Kan mit vun ihsin ti pûtsuak dingin,
Annih cu manhlap hai sehla,
Kan hrangah ṭap ruangro hai seh.
19 Ziangahtile Zion ihsin ṭah ruangro aw theih a si:
‹Ziangtin so tisiat kan si!
Nasazetin kan ning a zak,
Ziangruangahtile ram kan thlauthla,
Ziangruangahtile kan cēnnakpawl kha siatbăl an si,› tiin,»

tiah a ti.

20 Cutisikhalsehla, Maw nannih nunaupawl, Jehovah kamsuakthu hi ngaithla uh,
Cule a kamsuakthu cu nan hna in cohlang seh;
Nan fanupawl kha ṭah ruangro dān zirh uhla,
Mi kip in mai innhnen hnenah ṭah hla.
21 Ziangahtile leng lamah nauhakpawl that dingin le,
Tlangvalpawl kăwtthler ih that dingin
Thihnak cu kan tukvirh ihsin a ra ih,
Kan siangpahrang innpawl ah a lut.
22 «Jehovah in hitin a ti: ‹Milai ruakpawl hman êk bangin ló ah an rīl ding,
Fâng attu dungih tān ta mi fângtel bangin,
Cule zohman in an lakhawm lo ding,› tiah a ti,» ti aw.
23 Jehovah in hitin a ti:
«Mifim in a fimnak tluangkhawnpi hlah seh,
Micak in a cahnak tluangkhawnpi hlah sehla,
Milian khal in a lennak tluangkhawnpi fawn hlah seh;
24 Cuhnakin tluang a khawngtu cun himi hi tluangkhawnpi sawn seh,
Kei Jehovah hi, lainatduhdawtnak, diknak le dingfelnak leilung ih hmangsuaktu ka si ti a theithiamnak le a theihnak ah.
Ziangahtile cupawl ah lungsinak ka nei a si,»

Jehovah in a ti.

25 «Ngai hnik uh, nipawl tla an ra thleng, Jehovah in a ti, vun zim lawng serh zim tantupawl cu dān ka tat hai ding: 26 Izip, Judah, Edom, Ammon-mipawl, Moab le ramṭhing ih cêng beksám metpawl cu. Ziangahtile hi miphunpawl hmuahmuah cu serh zim tan lo an si ih, Israel sungza hmuahhmuah cu thinlung serh zim tan lo an si,» tiin.

10

Milempawl le Pathian Nung

1 Maw nannih Israel sungzatla, Jehovah in nan hnenih a sim mi kamsuakthu hi ngaithla uh.

2 Jehovah in hitin a ti:

«Miphunpawlih nundān zir hlah uh;
Van hminsinnakpawl ah thlaphângin um hlah uh,
Ziangahtile miphunpawl cu cumi ah an thla a phâng.
3 Ziangahtile miphunpawlih nunphung cu zianghmanlo men a si;
Ziangahtile mi pakhat in tupi ihsin thing a hau,
Zungthiampa in hmanrua thawn thil a salh.
4 Cumi cu sui le ngun in an ceimawi;
Hnîn lo dingin sobul le tlawngkhen in an khenghnget.
5 Annih cu fanghma hmuan ih tarh mi rîtṭih milim vek an si,
An ṭawng thei lo;
Thiar an ṭul,
Ziangruangahtile anmah ten an feh thei lo!
Cupawl cu ṭih hlah uh,
Ziangahtile ṭhil ṭhalo an tuah thei lo ih,
Thil ṭha khal an tuah thei fawn lo,» tiin.
6 Maw Jehovah, nangmah vek zohman an um lo,
Nang cu na ropi ih, cahnak ah na hmin a thang,
7 Maw miphunpawlih Siangpahrang, nangmah ṭihzah lo zo so um ding?
Ziangahtile cumi cu na phu a si.
Ziangahtile miphunpawlih mifimpawl zate lakah le,
An lalrampawl zate lakah,
Nangmah vek zohman an um lo.
8 Asinan annih cu mimâwl le mi-â an si;
Zanthing milem cu santlailo zirhawknak a si.
9 Ser mi ngun cu Tarshis ihsin rak phurh a si ih,
Sui cu Ufaz ihsin,
Zungthiam ih ṭuan mi le
Sui ertuih kutsuak cu.
Mepian le sendup cu an hnipuan a si;
Cupawl hmuahhmuah cu kutthiam nei ih kutsuak an si.
10 Asinan Jehovah cu Pathian dik a si;
Anih cu Pathian nung le kumkhaw Siangpahrang a si.
A thinlingnak ah leilung a hnîn ih,
A aithawknak cu miphunpawl in an tuar thei lo.

11 An hnenah hitin sim uh: «aLeilung le vanpawl tuahtu si lo pathianpawl cu leilung ihsin le hih vanpawl hnuai ihsin an hlorál ding,» tiin.

10:11:a Hi Bible câng Jer 10:11 hi: Jeremiah cazual pumpi ah hi cângte lawng hi Aramik ṭawng ih ngan mi a si.

12 A huham in leilung a tuah,
A fimnak in leitlun a dĭn ih,
A remtheihnak in vanpawl a pharh.
13 A aw a suah tikah,
Vanpawl ah tidai a awn humho.
Cule anih in leilung dĕng ihsin mero a kaisoter.
Ruahpi lakah nimthla a kauter,
A thliretkhawmnak ihsin thli a suakter.
14 Mi kip hi ruahnak nei lo le theihnak tlasam an si;
Sui ertu pauhpauh cu anmai tuah mi milim in an ning a zakter cio;
Ziangahtile a bur mi milim cu bumawknak men a si ih,
Anmah ah thaw a um lo.
15 Anmah cu santlailo, hnihsan men dingih tuah mi an si;
Dāntat an si tikah an hlorál ding.
16 Jakob covo cu cupawl vek a si lo;
Ziangahtile amah cu thil hmuahhmuah tuahtu a si ih,
Israel cu ro ih a co mi hnám a si,
A hmin cu ralkap rualpawlih Jehovah a si.

Judah cu Dawisuah an Si Ding

17 Maw kulhkhŭm sungih umpawl, lei ihsin nan puanpawl lakhawm uh! 18 Ziangahtile Jehovah in hitin a ti:

«Ngai hnik uh, kaih an si theinak dingah tuih cān ah ram luahtupawl cu saihlum vekin ka saisuak hai ding ih,
An van ka sângter ding,» tiin.
19 Tuahmawh ka sinak ruangah ka hmakhua a pit!
Ka hriamhma a besia tuk.
Cule kei in, «Thungaingaiin himi hi damlonak pakhat a si ih,
Ka tuar hrimhrim ding,» tiah ka ti.
20 Ka puanthlam cu tisiat a si ih,
Ka hripawl zaten an cat ṭheh;
Ka fātepawl in in tlansan ih,
An um nawn lo.
Ka puanthlam zartu ding le
Ka puanzarpawl pharhtu ding zohman an um nawn lo.
21 Ziangahtile tuukhāltupawl cu ruahnak nei lo ah an cang ih,
Jehovah an hawl lo;
Curuangah an hmuingil lo ding ih,
An rante rual hmuahhmuah an ṭekdarh thluh ding.
22 Ngai hnik, thuthan thâwm a rak thleng,
Sak lam ram ihsin buainak ropi zet cu,
Judah khawpipawl ṭhang ko, sihál pûk ih tuah dingin.
23 Maw Jehovah, minung in amai cemnetnak hrangah thu a nei lo,
A parih thil thleng ding mi ah thuneihnak a nei lo ti ka thei.
24 Maw Jehovah, nun i rĕm aw, asinan diknak in si seh,
Na thinhengnak in si hlah seh, culole zianghmanlo ah i cangter pang ding.
25 Nangmah thei lo tu miphunpawl parah le,
Na hmin ko lo tu sungkuapawl parah na thinaithawknak thlebung aw;
Ziangahtile annih in Jakob an eirál thluh,
An eicem ih, an eirál thluh,
Cule a cēnnak hmun cu an ṭhingter.

11

Israel le Judah in Thukham an Pahbăl

1 Jehovah hnen ihsin Jeremiah hnenih thleng mi kamsuakthu cu, 2 «Himi thukham thupawl hi ngaithla uhla, Judah-mipawl le Jerusalem luahtupawl hnenah sim uh; 3–4 cule an hnenah, Israel-ih Pathian Jehovah in hitin a ti, Ka aw ngaithla uhla, thu ka lo pek mi hmuahhmuah bangtukin tuah uh; cutin nannih cu ka minung nan si ding ih, kei cu nan Pathian ka si ding, tiih Izip ram, thir rawhtitnak meipi ihsin nan pupápawl ka hruaisuah hai ni ih ka thupek hih thukham thupawl a thlun lo tu cu camsiatin um seh. 5 Cule nan pupápawl hnenih hnawi le khuaitizu luannak ram, tuihni ih nan co mi ram pe dingin sesămin thukamnak ka tuah cia mi ka kimter ding,» tiin.

Cule kei in, «Amen, Maw Jehovah,» tiah ka sâng.

6 Cun Jehovah in ka hnenah, «Judah khawpipawl ah le Jerusalem kăwtthler ah hih kamsuakthupawl hmuahhmuah hi phuang aw, ‹Hi thukham thupawl hi ngaithla uhla tuahsuak uh. 7 Ziangahtile Izip ram ihsin nan pupápawl ka hruaisuah hai ni ihsin tuihni tiang, ka aw ngaithla uh, tiin ralrinnak ka pe leuhleuh hai. 8 Cucingin thupek an thlun lo ih an hna khal an tháwng lo, mi kip in anmai thinlung ṭhalo an thlun. Curuangah tuahsuak dingih thu ka pek hai mi, an rak tuahsuak lo mi hih thukhamih camsiatnak thupawl hmuahhmuah hi an parah ka thlengter ding,› tiin,» tiah i ti.

9 Cule Jehovah in ka hnenah, «Judah-mipawl le Jerusalem luahtupawl lakah phiarawknak hmuh a si. 10 Ka kamsuakthupawl hnáwngtu, an pupápawlih mawhsualnak lamah an kirsal ih, pathian dangpawl tla rianin an rak feh; Israel sungza le Judah sungza in an pupápawl thawi ka rak tuah mi ka thukham an pahbăl.»

11 Curuangah Jehovah in hitin a ti: «Ngai hnik uh, an parah vanduainak, an pumpelh thei lo ding mi cu ka run thlĕn tengteng ding ih, ka hnenih an au khalle, anmah ka ngaithla hai lo ding. 12 Cun Judah khawpipawl le Jerusalem luahtupawl cu an feh ding ih, rimhmui an hlăn mi pathianpawl hnenah an au ciamco ding, asinan an buai cān ah cupawl cun an run hrimhrim hai lo ding. 13 Ziangahtile Maw Judah, nan pathianpawl cu nan khawpi zât an si; cule Jerusalem kăwtthler zât in cuih aningzakza thil hrangah biakṭhengpawl nan dĭn, Baal hnenih rimhmui urnak ding biakṭhengpawl cu.

11:13:a ningzakza thil: Baal a relnak a si.

14 «Curuangah hih minungpawl hrangah thlacam hlah, an hrangah dilsak hlah awla, ngensak fawn hlah; ziangahtile an buai ruangih ka hnen lamih an ausuah cān ah ka ngaithla hai lo ding.

15 «Sualralnak tampi tuahin
Ka inn ah ka duh mi in ziangso covo a neih?
Thil ṭhalo na tuahnak ah, lungawiaipuangih na um theinak dingah
Serhhran mi sa in na siatnak cu a lahlo thei ding maw?
16 Jehovah cun na hmin ah,
Olif Thing Hring, Duhnungza Rah Ṭha tiah a lo ti.
Thâwm nasazetin a parah meisa a muah ih,
A hngepawl cu an kiak.

17 «Ziangahtile ka thinhengter dingin Baal hnenih rimhmui an hlăn mi Israel sungza le Judah sungza ih thil ṭhalo ruangah, nangmah lo phuntu ralkap rualpawlih Jehovah in na parah thil ṭhalo a phuang a si,» tiah i ti.

Jeremiah Hro a Si

18 Cule Jehovah in cumi theihnak i rak pe ih, cumi cu ka thei: ziangahtile nang in an thil ti mipawl i hmuh. 19 Asinan kei cu ran thattu hnenih hruai mi tuufa no nunnem vek ka si; cule «Thingkung cu a rah thawn siatsuah uhsi, cule a hmin cinken a si nawn lonak dingah, a nungdam mipawlih ram ihsin amah cu sâtcat uhsi,» tiin keimah dokalhin khua an khâng ti ka rak thei lo.

20 Asinan dingfel zetih thuṭhentu,
Lungthin le thinlung hniksaktu
Maw ralkap rualpawlih Jehovah,
An parih na phulei samnak i hmuter aw,
Ziangahtile na hnenah ka thiamthu ka phuanglang zo.

21 «Curuangah na nunnak hawl ih, ‹Jehovah hmin in thuphuang hlah uh, culole kan kut in nan thi pang ding,› titu Anathoth-mipawlih thuhla ah Jehovah in hitin thu a sim, 22 curuangah ralkap rualpawlih Jehovah in hitin a ti: ‹Ngai hnik, dān ka tat hai ding. Tlangvalpawl cu ralnâm in an thi ding, an fapapawl le an fanupawl cu mangṭam in an thi ding. 23 Cule anmah lakah a tāng an um nawn lo ding, ziangahtile Anathoth-mipawl parah thil ṭhalo ka thlengter ding, anmah dāntatnak kum rori cu,› tiin,» a ti.

12

Jeremiah ih Thusuhnak

1 Maw Jehovah, na hnenih thu ka thlĕn tikah, nang cu na dingfel;
Cucingin na thuṭhennak thuhla ah nangmah lo be hnik ning:
Ziangahso misualrálpawlih lamzin a hmuingil?
Ziangahso hrăwkhrawl zetih thil titupawl hahdam zetih an um?
2 Anmah cu na phun hai, hram an thla;
An ṭhang ih, rah an suah.
An kâ in an lo naih,
Asinan an lungthin in an lo hlat.
3 Asinan nang, Jehovah cun i thei a si;
Nang in i hmu ih,
Nangmah lamih ka thinlung put na hniksak.
Ran thattu hrangih tuu bangin dirsuak hai awla,
Ran thah ni hrangah rethrăn hai aw.
4 Ram cun ziang tik tiang so a sūn ding ih,
Ramlak hmuahhmuah ih thilṭo an vuai ding?
Cutawk ih cêngpawlih sualralnak ruangah
Ramsapawl le vâtepawl tiang an riarál thluh,
Ziangruangahtile annih cun, «Anih in kan parih thil cang mi a hmu lo ding,» tiah an ti.

Jehovah in Jeremiah a Sawn

5 «Ke ih fehpawl thawn tlân nan zuamaw ih, an lo cauter asile,
Ziangtin so ráng thawn nan zuamawk thei ding?
Cule remdaihnak ram hmanih,
Na tluk a si ahcun, Jordan phūl lakah ziangtin na ti ding?
6 Ziangahtile na unaupawl, na paih sungza rori hman in,
Hrăwkhrawl zetin an lo ti;
A si, na dungah ring zetin an ko-aw.
Ṭawngkam ṭha in lo be khal hai sehla,
Anmah cu zum hai hlah aw.
7 «Ka inn ka thlauthla, ka ro cu ka tân ta;
Ka nunnak ih a duh zet mi cu a ralpawl kut ah ka rak pe.
8 Ka ro cu ka hrangah tupi lakih kiosa vek a si;
Anih in i hûkhnawh;
Curuangah amah cu ka hua.
9 Ka ro cu ka hrangah mulukawlh ṭial vek a si;
Mulukawlhpawl cu a kimvel hmuahhmuah ah amah dokalhin an um.
Ra uh, ramsa hmuahhmuah fĭnkhawm uhla,
Eiral dingah rak hruai uh!
10 «Tuukhāltu tampi in ka sabit hmuan an siatsuah,
Ke in ka covo an cîl;
Ka covo ṭha zet cu ramṭhing kawlh ah an cangter.
11 Cumi cu kawlhter a si;
Kawlhter a si, anih cu ka hnenah a ṭap;
Ram pumpi cu kawlh ko tuah a si,
Ziangruangahtile zohman in an ngaisak lo.
12 Ramṭhing hmun sâng phūl kawlh hmuahhmuah ah,
Mi rămtu an ra thleng,
Ram khat lam dĕng ihsin khat lam dĕng tiang
Jehovah ralnâm in a eirál hai ding.
Zo hrang hmanah hnangamdaihnak a um lo.
13 Sangvut an cing, asinan hling an at;
Anmah le mah an bāngawter, asinan hlawknak a um lo.
Jehovah thinhengnak nasazet ruangah
Nan rawlkhawm mi cu nan zahpi ding,» tiin.

14 Ka mi Israel hnenah ro dingih ka pek mi a tawkthamtu, ka innhnen ṭhalo pawl hmuahhmuah thuhla ah cun Jehovah in hitin a ti, «Ngai hnik uh, an ram ihsin ka phawisuak hai ding ih, an lak ihsin Judah sungza ka phawisuak ding. 15 Cun hitin a si ding, anmah ka phawisuah hai hnuah, ka kirsal ding ih, an parah lainatnak ka nei ding, cule mi kip mai ro ih co mi ah le mi kip anmai ram cio ah anmah cu ka hruaikir hai ding. 16 Cule hitin a si ding, Baal hmin sâlin ka minungpawl sesăm an zirh vekin, ‹Jehovah a nun rori vekin,› tiin ka hmin sâlih siasăm dingin ka minungpawlih nundān taima zetih an zir asile, annih cu ka minungpawl lakah an hnget ding. 17 Asinan annih in an ngaithlak lo asile, cuih miphun cu ka phawisuak verver ding ih, ka siatsuah ding, Jehovah in a ti,» tiin.

13

Patzai Fêmte Taikhap

1 Jehovah in ka hnenah hitin a ti: «Feh awla patzai fêmte ih tah mi taikhap pakhat lei aw, cule na tâi ah khap awla, tidai sungah ret hlah,» tiin. 2 Cule Jehovah kamsuakthu vekin taikhap cu ka lei ih, ka tâi ah ka hreng.

3 Jehovah kamsuakthu cu ka hnenah a vei hnihnak a ra thleng, 4 «Na lei mi taikhap cu la awla, na tâi ah hreng aw, cule tho awla, Zufraṭis ah feh aw, cun cumi cu cutawk ih lungpi kâk lakah thup aw,» tiin. 5 Cun Jehovah ih thu i pek vekin ka feh ih, Zufraṭis tiva kapah cumi cu ka thup.

6 Ni tampi a rei hnuah, Jehovah in ka hnenah, «Tho aw, Zufraṭis ah feh awla thup dingih thu ka lo pek mi taikhap cu cutawk ihsin va la aw,» tiah i ti. 7 Cun Zufraṭis ah ka va feh ih ka lai, ka thuhnak hmun ihsin taikhap cu ka la. Cule ngai hnik, taikhap cu a rak siat, ziang hrang hmanah a ṭhahnem lo.

8 Jehovah kamsuakthu cu ka hnenah a thleng, 9 «Jehovah in hitin a ti: ‹Hiti hin Judah hngalnak le Jerusalem hngalnak nasazet cu ka tisiat ding. 10 Ka kamsuakthu ngaithla duh loih, anmai thinlung suangtuahnak ih feh ih, pathian dangpawl rian ding le be dingih thluntu hih misualrálpawl hi ziang hrang hmanih ṭhahnem lo hih taikhap vek hi an si ding. 11 Ziangahtile taikhap cu mi tâi ih a kăwp bangin, Israel sungza pumpi le Judah sungza pumpi cu ka mi, ka hminthannak, ka thangṭhatnak le ka ropitnak hrangah keimah ih kăwp dingin ka tuah; asinan annih in an rak ngaithla lo,› Jehovah in a ti.

Sabitzu Thâwl Hminsinnak

12 «Curuangah hi thu hi nang in, ‹Israel-ih Pathian Jehovah in hitin a ti: «Thâwl kip cu sabitzu khahter a si pei,» tiin,› anmah na sim pei. Cule annih in na hnenah, ‹Thâwl pauhpauh cu sabitzu khahter a si pei ti hi theifiang lo maw kan si?› tiah an lo ti ding. 13 Cun an hnenah hitin na sim pei, Jehovah in hitin a ti: ‹Ngai hnik uh, hi ram luahtu hmuahhmuah, David laltokham parih to siangpahrangpawl le puithiampawl le profetpawl tiangin le Jerusalem luahtu hmuahhmuah cu zurîtnak in ka khatter hai ding. 14 Cule anmah cu pakhat parah pakhat, palepawl le fapapawl tiangin ka dengkhawm hai ding, Jehovah in a ti, ka zangfah hai lo ding, ka zuah hai fawn lo ding ih, an parah zahngainak ka nei lo ding, cuhnakin ka siatsuah hai sawn ding a si,› tiin,» tiah i ti.

Hngalnak in Dawisuahnak a Thlen

15 Ngai uhla nan hna tŭn hnik uh,
Puarthau hlah uh,
Ziangahtile Jehovah in a ṭawngsuak zo.
16 Khua a thimter hlan le,
Tlang parih khawthim zawngih nan ke nan sit hlanah,
Jehovah nan Pathian hnenah sunlawihnak pe uh.
Tleu nan hawl laiah
Anih in tleu cu thim sah mepmep ah a cangter ih,
Thim zetah a tuah.
17 Asinan nan ngaithla lo ding asile,
Nan hngalnak ruangah hmun thup ah ka ṭap ding;
Nasazetin ka mit a ṭap ding ih
Mitthli a luang ding,
Ziangruangahtile Jehovah rante rual cu ralkaih ih hruai an si.
18 Siangpahrang le siangpahrangnuih hnenah,
«Phahniamaw aw;
To aw,
Ziangahtile nan uknak a cim ding, nan ropitnak lallukhum cu,» tiah ti uh.
19 Negev khawpipawl kharpit an si thlang ding ih,
Zohman in an áwng lo ding:
Judah cu ralkaih ih hruaihloh a si ding, an zaten.
20 Cuan awla, sak lam ihsi rung khi zoh aw.
An lo pek mi na rante rual, na tuu mawi tete teh khuiah so an si?
21 Dān a lo tat tikah ziang na sim ding?
Ziangahtile anmah cu na tlunih
Ralbawi si dingah le lubân si dingah na rak zirh hai zo.
Nunau fahrinnat bangin tuarnatnak in a lo kaibĕt lo ding maw?
22 Cule na thinlung in,
«Ziangah so hivek ka parih a thlen?» na ti asile,
Na mawhsualnak a nasat tuk ruangah
Na hni sunghruh cu hlip a si ih, na kedil a lang.
23 Ethiopia-mi in a vun a thleng thei in, tlavâng in a ṭial a thleng thei maw?
Cuti asile nannih thil ṭhalo tuah ṭheu tu khal in, thil ṭha nan tuah thei pei cu!
24 «Curuangah ramṭhing thli in cangpâwl a hrănhloh vekin,
Anmah cu ka ṭekdarhter hai ding.
25 Himi cu na covo,
Na hrangih ka tah cia mi na covo cu a si, Jehovah in a ti,
Ziangruangahtile nang in i hngilh ih,
Thuphan na rinsan.
26 Curuangah kei khal in na hni sunghruh cu na hmaiah ka hlîp so ding,
Cutin na ningzahnak a lang ding.
27 Hramlak tlangmualpawl ah
Na uiretnak,
Na hur authâwm,
Na hlawhhlannak ih fihnungza hursualnak na tuah mi
Fihnungzapawl cu ka rak hmu.
Maw Jerusalem, na hmakhua a pit a si!
Thianfai loin na um hrih ding maw?» tiin.

14

Ralnâm, Mangṭam le Nathrisia

1 Khawkhen thuhla ih Jeremiah hnenih thleng Jehovah kamsuakthu cu.

2 «Judah cun a sūn ih,
A kăwtkapawl tla an ngui;
Ram cu an sūn ih,
Jerusalem aunak cu a kaiso.
3 An mizahumpawl in tidai hawl dingin an fanau tete an thlahsuak;
Tikhur lamah an feh ih, tidai an hmu lo.
An thâwl kawlawngin an kirpi;
An ning a zak ih, an bei a dawng,
Cule an lu an khuh.
4 Ram ah ruah a um lo ruangah
Lei a khĭng,
Lei lettupawl an ning a zak;
An lu an khuh.
5 A si, zuknêng pinu khal in hramlak ah fa a hring,
Asinan hrampi um lo ruangah a tlansan.
6 Cule hmun sâng phūl kawlh ah ramlak lākpawl an ding;
Sihál bangin an thaw a hlām;
Hrampi a um lo ruangah an mit a māl.
7 Maw Jehovah, kan mawhsualnakpawl cu kanmah dokalhin thutheihpitu si khal hai sehla,
Na hmin zarah ziang simaw tal tuah hram aw!
Ziangahtile kan dungtawlhnak a tam,
Na parah thilsual kan tuah a si.
8 Maw Israel ih Ruahsan Mi, harsat cān ih Runtu,
Ziangahso hi ram ah hin mikhual bangtukih na um,
Zan khat riak ih khualtlawngpa bangih na um?
9 Ziangahsokhawruahharpa vek le
Micak mah te runaw thei lo bangih na um?
Cucingin Maw Jehovah, nang cu kan lakah na um ih,
Na hmin putu kan si;
In tansan hlah aw!» tiin.

10 Hi minungpawl hnenah Jehovah in hitin a ti,

«Vahvaih an duh ih, an ke an sûp lo.
Curuangah Jehovah in anmah cu a cohlang hai lo;
Atu ah anih in an mawhsualnak a cingkeng ding ih,
An sualpawl dān a tat ding,» tiin.

11 Cun Jehovah in ka hnenah, «Hi minungpawlih ṭhatnak ding hrangah thlacam hlah. 12 Rawl an ulh tikah an auaw ka ngai lo ding ih, Meiur Thilhlăn le Thlairawl Thilhlăn an hlăn tikah ka cohlang lo ding. Cuhnakin anmah cu ralnâm, mangṭam le nathrisia in ka that hai sawn ding,» tiah i ti.

Thuphan Per Profetpawl Hnawnnak

13 Cun kei in, «Aa, Bawipa Jehovah! Ngai hnik, profetpawl in an hnenah, ‹Ralnâm nan hmu lo ding, mangṭam khal nan tuar lo ding, cuhnakin hi hmun ah ralmuannak taktak ka lo pe sawn ding,› an ti,» tiah ka ti.

14 Cule Jehovah in ka hnenah, «Profetpawl in ka hmin in thuphan an phuang. Anmahpawl hi ka thlah hai lo, thu ka pe hai lo ih, an hnenah thu ka sim fawn lo. Nan hnenah larnak diklo, simsungthiamnak, ṭhathnemnak nei lo thil le anmai thinlung bumnak men an phuang. 15 Curuangah ka hminih thuphuangtu profetpawlih thuhla ah Jehovah in hitin a ti: ka thlah hai mi an si lo, asinan annih cun, ‹Hi ram ah mangṭam le ralnâm a thleng lo ding,› tiah an ti. Cuih profetpawl cu ralnâm le mangṭam in an hlorál ding. 16 Cule an thuphuan rak dawngsáwngtu minungpawl khal mangṭam le ralnâm ruangah Jerusalem kăwtthler ah hlăwn an si ding; zohman phumtu an nei lo ding ih, an nupipawl, an fapapawl, an fanupawl tiang phumtu an nei lo ding. Ziangahtile an sualralnak cu anmah parah ka burh ding.

17 «Curuangah hi thu hi an hnenah na sim pei:

‹A sun a zanin ka mit ihsin mitthli luang sehla,
Cawl hlah seh;
Ziangahtile ka mipawlih fanu fala him cun hriam a tuar,
A nasazet mi kutthlaknak cu.
18 Ramlak ih ka feh asile,
Zoh hnik, ralnâm ih thah mipawl!
Khaw sungih ka luh asile,
Zoh hnik, mangṭam ruangih napawl!
A si, profet le puithiam pawl cu an vâkvai, an theihlonak ram ah,› tiin,» tiah i ti.

Mipi in Zahngainak an Dil

19 Judah cu na hnáwng pumhlum maw si?
Na nunnak in Zion teh a fih maw?
Kan hrangah tidamnak um lo ko ziangahso in rak vuak?
Hnangamdaihnak kan beisei, asinan ṭhatnak a um lo;
Cule dam cān kan beisei, asinan zoh hnik harsatnak!
20 Maw Jehovah, kan sualralzia le,
Kan pupápawlih mawhsualnak kan pawm a si,
Ziangahtile na parah kan sual.
21 Na hmin zarah in fih hlah aw;
Na ropitnak laltokham hminseter hlah.
Kan hnenih na thukham siatbăl hlah awla, cîng ringring aw.
22 Miphunpawlih milem lakah pakhat tal in ruah surter thei an um maw?
Asilole vanpawl in teh ruahpi an pe thei maw?
Nangmah cu Jehovah kan Pathian na si lo maw?
Curuangah nangmah kan lo hngak ding,
Ziangahtile nang in hi thil hmuahhmuah hi na tuah a si.

15

Jehovah a lamlêt lo Ding

1 Jehovah in ka hnenah, «Mosi le Samuel hman ka hmaiah ding khal hai sehla, hi minungpawl lamah ka lungthin a hawi lo ding. Ka mithhmuh ihsin anmah cu thlahsuak uhla, fehsuak hai seh. 2 Cule hitin a si ding, ‹Khuiah so kan feh ding?› tiin na hnenih an ti asile, nang in, ‹Jehovah in hitin a ti:

«Thihnak hrang a si mipawl cu thihnak ah;
Ralnâm hrang a si mipawl cu ralnâm ah;
Cule mangṭam hrang a si mipawl cu mangṭam ah;
Ralkaihpawl cu ralkaih ah,» tiin,› tiah na sim hai pei.

3 «Cule thil phun li ka ruatsak hai ding, Jehovah in a ti: that dingah ralnâm, thlek dingah uicopawl, eirál le siatsuah dingah van zuang vâtepawl le leilung ramsapawl. 4 Judah siangpahrang Hezekiah fapa Manasseh in Jerusalem ih a rak tuah mi thil ruangah, leilung lalrampawl hmuahhmuah ah miṭhihṭhaihnak ah anmah cu ka tuah hai ding.

5 «Maw Jerusalem, zo in so a lo zangfah ding?
Asilole zo in so a lo riahsiatpi ding?
Asilole na dam maw lo ti dingin zo so ra pial ding?
6 Nang in i thlauthla a si, Jehovah in a ti,
Dung na rak tawlh a si,
Curuangah na parah ka kut ka thlak ding ih, ka lo siatsuah ding;
Na hrangih lamlet khal ka khawp tuk thlang.
7 Cule ram kăwtkapawl ah, zāpnak ṭangṭa in anmah ka zâp hai ding;
Fāte lusūn ko ka tuah hai ding ih,
An nundān ihsin an rak kir lo ruangah
Ka mipawl ka hlorálter hai ding,
8 Tifinriat vunnel hnakih tam in ka hnenah an nuhmeipawl an karh ding;
Anmah par le tlangvalpawlih nu parah
Sun laiah rămtu ka thlĕn ding;
An parah ānhainak le tuksumza ka thlengter thutthi ding.
9 «Fa pasarih hringtunu a tha a cem;
A thaw netabik a suah.
Sun a si laiah a ni a tla:
Anih cu ningzak le mualphoin a um.
Cule anmah lakih a tāngsŭn cu an ralpawl hmaika-ah ralnâm hrangah ka pe hai ding,» tiah Jehovah in a ti.

Jeremiah Phunzainak

10 Maw ka nu, leilung pumpuluk ah
Miĕltaitupa le mitotupa ih in rak hrin hi
Ka hmakhua a pit a si!
A pungṭhangin mi ka cawih dah lo ih,
A pungṭhangin mi in in cawih dah fawn lo.
An zaten in camsiat.
11 Jehovah in,
«Nan ṭhatnak dingah ka lo zalenter tengteng ding;
Dodāl cān le zăwnzaih cān ah,
Na ralpawl ih zangfah lo dil dingin ka tuah tengteng ding.
12 Zo tal in thir a khiak thei maw?
Sak lam thir le dar cu?
13 Na sualpawl hmuahhmuah ruangah,
Na neihnunnak le na hlawnthilpawl cu,
Na ram sung hmuahhmuah ah man loin rallâksum ah ka pe ding.
14 Cule na theih lo mi ram ah,
Na ralpawl in lo hruailut dingin ka tuah ding;
Ziangahtile ka thinhengnak cu a alh.
Cumi cun nangmah a lo kāng ding,» tiah a ti.
15 Maw Jehovah nangmah in na thei a si;
I máng awla, i vehvai aw,
I tiduhdahtupawl kha phulei i samsak aw.
Na mizāwitheinak in i lahlo hram hlah.
Nangmah ruangah kawk ka tuar ti thei aw.
16 Na kamsuakthupawl cu hmuhsuah an si ih ka ei;
Cule na kamsuakthu cu ka hrangah aipuannak le ka thinlung lungawiaipuannak a si;
Ziangahtile keimah cu na hmin putu ka si,
Maw ralkap rualpawlih Pathian Jehovah.
17 Mihmuhsuamtupawlih punkhawmnak ah ka to lo ih,
Lungawiaipuangin ka um fawn lo;
Ka parih kut na thlak ruangah keimah lawngin ka to,
Ziangahtile nang in aithawknak in i khatter.
18 Ziangahso ka tuarnat a reh thei lo ih,
Ka hma a dam thei lo, tidam ding a el?
Ka parah nang cu tivate rinsantlak lo vek na si ngaingai ding maw?

19 Curuangah Jehovah in hitin a ti,

«Na ra kir asile, kêl ka lo awhtersal ding;
Ka hmaika-ah na ding leh ding;
Cun thulolak men lak ihsin thil hlú na laksuah asile,
Nang cu ka kâ na si ding.
Annih cu na hnenah kir hai seh,
Asinan nang cu an hnenah na kir lo pei.
20 Cule hi miphun hrangah dar kulhhnget ah ka lo tuah ding;
Cule nangmah an lo do ding,
Asinan an lo neh lo ding;
Ziangahtile lo hum dingin le lo runsuak dingin
Ka lo umpi a si, tiah Jehovah in a ti.
21 Misualrálpawl kut ihsin ka lo runsuak ding ih,
Mirapthlakpawlih kaihbĕtnak ihsin ka lo tlen ding,»

tiin.

16

Mangṭam, Ralnâm le Thihnak

1 Jehovah kamsuakthu ka hnenah a thleng ih, 2 «Nupi na nei lo pei, hi hmun ah fapapawl le fanupawl na nei lo pei. 3 Ziangahtile hi hmun ih suak fapapawl le fanupawl thuhla le hi ram ih anmah hringtu an nuih thuhla le anmah thlahtu an paih thuhla ah Jehovah in hitin a ti: 4 nathri rapthlak in an thi ding, ṭah an si lo ding ih, phum an si fawn lo ding, cuhnakin leilung vangdâp parah êk vek an si sawn ding. Ralnâm le mangṭam in an thi ding ih, an ruak cu van zuang vâtepawl le leilung ramsapawl rawl ah an cang ding.

5 «Ziangahtile Jehovah in hitin a ti: lusûn inn ah va lut hlah la, ṭahnak khalah feh hlah, riahsiatpi hai fawn hlah; ziangahtile hih minungpawl hnen ihsin ka hnangamdaihnak ka lahlo a si, Jehovah in a ti, ka lainatduhdawtnak le ka zahngainak khal. 6 Miropi le mitenau cu bangrepin hi ram ah an thi ding. Phum an si lo ding ih, mi in an ṭah hai lo ding, anmah le mah an hriatpemaw fawn lo ding ih, an sám khal an metkawlh lo ding. 7 Mithi ruangih hnĕmnak ah mi in lusūnpawl hrangah sang an phel lo ding; an paih ruang le an nuih ruangih thlakungzawnnak ah in ding no mi in an pe fawn lo ding. 8 Cuihtlunah puai inn ah anmai hnenah toih ei le in dingin na lut lo pei. 9 Ziangahtile ralkap rualpawlih Jehovah, Israel Pathian in hitin a ti: ngai hnik uh, hlim aw siseh, lungawi aw siseh, mo aw siseh, mo neitu aw siseh, nan mithmuh le nan san ah hi hmun ah hin ka rehter ding.

10 «Cule hitin a si ding, hi minungpawl hnenih hih kamsuakthupawl na hmuh hai tikah, ‹Ziangah so Jehovah in himi siatnak rapthlak hmuahhmuah hi kan parih a phuan? Kan mawhsualnak ziang a si? Jehovah kan Pathian dokalhin kan rak tuah mi kan sualnak cu ziang a si?› an ti asile, 11 an hnenah, ‹Nan pupápawl ih in rak thlauthlak ruangah a si, Jehovah in a ti; a dang pathianpawlih dung an rak thlun, an rian ih an rak bia, cule kei in thlauthla ih ka dān an thlun lo. 12 Cule nan pupápawl hnakin nan sualsawn, ziangahtile ngai hnik uh, keimah ngaithla loin mai thinlung ṭhalo suangtuahnak cio nan thlun. 13 Curuangah hi ram ihsin nanmah le nan pupápawl khalih nan theih lo mi ram ah ka lo hlăwnsuak ding; cule cu tawkah a sun a zanin ram dang pathianpawl tla nan rian ding, cuih hmun ah duhsaknak ka lo hmuh lo ding,› tiin na sim pei.

Pathian in Israel a Tungdingsal Ding

14 «Curuangah ngai hnik uh, ‹Israel tefapawl Izip ram ihsin hruaisuaktu Jehovah a nun rori vekin,› an ti nawn lo ding cān a ra thleng thlang, Jehovah in a ti, 15 cuhnakin, ‹Sak lam ram le a rak dawisuah hainak ram hmuahhmuah ihsin Israel tefa hruaisuaktu Jehovah a nun rori vekin,› tiah an ti sawn ding. Ziangahtile an pupápawl ka rak pek mi anmai ram ah ka hruaikir hai ding.

16 «Ngai hnik uh, ngakaitu mi tampi ka cah ding, Jehovah in a ti, cule anmah an kai ding, cuihhnu ah ramtawi mi tampi ka cah leh ding ih, tlang kip le tlangmual kip ah le lungpi kâkpawl ah anmah an pêl ding. 17 Ziangahtile ka mit cu an lamzin hmuahhmuah parah a fu; ka hmaika ihsin thuh an si lo ih, an mawhsualnak cu ka mithmuh ihsin thuh an si lo. 18 Cule an mawhsualnak le an sualnak cu alet in ka lehrūl hmaisa ding, ziangruangahtile annih in ka ram an bawrhbangter; ro ih ka co mi cu an thil ningsinza ruakpawl le fihnungza an milempawl an khatter,» tiin.

19 Maw Jehovah, ka thazang le ka kulhhnget,
Harsat cān ih ka răwlhimnak,
Leilung dĕng ihsin na hnenah miphunpawl an ra ding ih,
«Kan pupápawl in thuphan, thulolak men le ṭhathnemnak um lo thilpawl hleilo co mi an nei lo,» tiah an ti ding.
20 Mi in amai hrangah pathianpawl tla a tuah thei maw?
Asinan cupawl cu pathian an si lo.
21 «Curuangah ngai hnik, ka theihter hai ding,
Tuih ṭum ah ka thiltitheinak le ka cahnak ka theihter hai ding;
Cule annih in ka hmin cu Jehovah a si ti an thei ding.»

17

Judah Sualnak le Dāntatnak

1 «Judah sualnak cu thir cafung le,
Daimon zimzum ih ngan a si, cucu an thinlung tlap par le,
Nan biakṭheng kipawl parih kher a si.
2 Tlangmual sang parih thingbŭknîm kiangih
An biakṭhengpawl le an Asherah-pawl cu an fātepawl in an cîng ringring.
3 Hramlak ih um Maw ka tlang,
Na ramri sungih hmun sângpawl ih na sualnak ruangah
Na neihnunnak, na hlawnthil hmuahhmuah cu
Rallâksum ah ka pe ding.
4 Cule nang, nangmah rori hman in
Ka lo pek mi na ro cu na hloh ding;
Cule na theih lo mi ram ah
Na ralpawl ka lo rianter ding;
Ziangahtile a kāng kumkhua ding mi ka thinhengnak ah meisa nan muah a si,»

tiin.

5 Jehovah in hitin a ti:

«Milai rinsan ih
Minung cahnak ih ṭhumaw,
A thinlung in Jehovah a tlansantu cu camsiatin um seh.
6 Ziangahtile anih cu nelrawn ih thingbŭk vek a si ding ih,
Thil ṭha suak a hmu lo ding,
Cuhnakin ramṭhing ih hmunro,
Luah lo mi cite leiram a luah sawn ding.
7 «Jehovah a rinsan ih,
Jehovah parih ṭhumawtupa cu mithlawsuak a si.
8 Ziangahtile anih cu ti kapih phŭn mi,
Tiva kapih hramthla,
Khawsa thlen khal ṭih lo;
A hnah hring riangri sawn,
Khawkhen kum khal pawisa lo,
Rah ṭhulh dah lo thingkung vek a si.
9 Thinlung cu thil hmuahhmuah hnakih bumhmang le,
Se tawpkhâwk a si;
Zo in so thei thei ding?
10 Kei, Jehovah in mi kip anmai lamzin cio bangtuk le,
Anmai thil ti rah cio bangtukih pe dingin,
Thinlung ka dap ih,
Lungthin ka hniksak a si.
11 Diklo zetih lennak ngahtu cu,
Varung in amai tit lo mi a awpkeu vek a si;
A vanglai ah cumi cun a tlansân ding ih,
A cemnetnakah amah cu mi-â ah a cang ding.
12 A tir ihsi khaisan mi laltokham ropi cu,
Kan hmun thianghlim umnak a si.
13 Israel-ih ruahsan mi, Maw Jehovah,
Nangmah a thlauthlatu hmuahhmuah an ning a zak ding.
Ka hnen ihsi tlânsuaktu cu
Leilung ah ngan an si ding,
Ziangruangahtile cirhti nung
Jehovah an rak thlauthla.»

Jeremiah in Runsuahnak hrangah Thla a Cam

14 «Maw Jehovah i tidam awla, ka dam ding,
I run awla, run ka si ding,
Ziangahtile nangmah cu ka thangṭhat mi na si!
15 Ngai hnik, ‹Jehovah kamsuakthu cu khuiah so?
Atu ah thlengter aw,› tiah in ti.
16 Kei bélte cu, nangmah lo thluntu tuukhālsinak ihsin manhlap zetin ka tlânhlo lo ih,
Hmakhawpihnak ni cu ka ngai fawn lo;
Ka kâ ihsin ziang a suak ti na thei;
Cumi cu na hmaiah a um a si.
17 Ka parah tuksumza si hlah aw;
Nang cu ni ṭhalo ni ah ka ruahsannak na si.
18 I tiduhdahtupawl cu ningzakin um hai seh,
Kei lawngte cu ningzakin i umter hlah;
Annih cu thlaphângin um hai sehla,
Kei tu cu thinphâng lo ten i ret thung aw.
An parah vansannak ni thlengter awla,
Siatnak a thuahin siatter hai aw!» tiin.

Sabbath Ni Ul Aw

19 Jehovah in ka hnenah hitin a ti: «Feh awla, Judah siangpahrangpawl luhnak le suahnak, mipi kăwtka ah le Jerusalem kăwtka hmuahhmuah ah va feh awla, va ding aw; 20 cule an hnenah sim aw, ‹Nannih Judah siangpahrangpawl le Judah-mi hmuahhmuah le hi kăwtkapawl ih lut, Jerusalem luahtupawl hmuahhmuah tla Jehovah kamsuakthu hi ngai uh. 21 Jehovah in hitin a ti, «Nanmah hrangah fimkhur uh, Sabbath ni ah ziang phur hman phur hlah uhla, Jerusalem kăwtkapawl ihsin luhpi fawn hlah uh; 22 nan innpawl ihsin Sabbath ni ah phur suahpi hlah uhla, ziang hna hman ṭuan hlah uh, nan pupápawl thu ka pek hai vekin, Sabbath ni cu thiangter uh. 23 Cuticingin an thlun lo ih an hna khal an tháwng lo, ngaithla lo dingin le nuncan rĕmnak cohlang lo dingin an ring an khăwngter sawn riangri.

24 «Cule hitin a si ding, Jehovah in a ti, ṭha zetin in rak ngaithla ih, Sabbath ni ah hi khawpi kăwtkapawl ihsin phur phurlut loin, Sabbath ni thiangterin, cuih ni ah ziang hna hman nan ṭuan lo asile, 25 hi khawpi kăwtkapawl ah siangpahrangpawl le mizahumpawl, David laltokham parih totu dingpawl cu lêngpawl le rángpawl parah toin an lut ding, anmah le an mizahumpawl, Judah pacangpawl le Jerusalem luahtupawl thawn; cule hi khawpi cu a hmun kumkhua ding. 26 Cule Judah khawpipawl le Jerusalem kiangkap hmunpawl ihsin, Benjamin ram ihsin le hmun niam ihsin, tlang ram ihsin le Negev ihsin an ra ding ih, Meiur Thilhlănpawl le thawiawknakpawl, Thlairawl Thilhlănpawl le rimhmui, thangṭhatnak raithawinakpawl cu Jehovah inn ah an run keng ding.

27 «Asinan Sabbath ni thianghlimter dingin Sabbath ni ah Jerusalem kăwtkapawl ihsi thil phurhluh lo ding ti vek thu, in ngaithla lo asile, cuih kăwtkapawl ah meisa ka muah ding ih, Jerusalem siangpahrang innpawl cu cumi cun a kangrál hai ding ih, hmih theih a si lo ding,» tiah i ti.

18

Beltuahtu le Bellei

1 Jehovah hnen ihsin Jeremiah hnenih thu rung thleng mi cu, 2 «Tho awla, beltuahtuih inn ah suk aw, cule cu tawkah ka kamsuakthupawl ka lo ngaithlater ding,» tiin a sim. 3 Cun beltuahtuih inn ah ka suk ih, ngai hnik, anih cun lêngke ah thil a rak tuah rero. 4 Cule bellei ihsi a tuah mi bungbel cu beltuahtuih kut ah a siat; cutin cumi cu bungbel dangah a tuahsal, beltuahtuih ṭha a tidandanin a tuah.

5 Cun Jehovah kamsuakthu cu ka hnenah a thleng, 6 «Maw Israel sungzatla, hi beltuahtu vek hin ka lo tuah thei lo maw si? tiin Jehovah in a ti. Zoh hnik uh, bellei cu beltuahtu kut ih a um bangin, ka kut ah nannih khal nan um ve, Maw Israel sungzatla!

7 «Phawisuah ding, dirhthlak ding le siatbăl dingin miphun le lalram thuhla ka sim tinten, 8 a thuhla ka rak sim mi cuih miphun cu a ṭhatlonak ihsin a kirsal asile, a parih siatnak thlĕn dingih ka ruah mi cu ka lamlêt ding. 9 Cule sak ding le phun dingin miphun le lalram thuhla ka sim tinten, 10 ka aw ngaithla loin, ka mithmuhah thil ṭhalo a tuah asile, a hrangih thil ṭha tuah ka tum mi cu ka lamlêt ding.

11 «Curuangah atu ah, Judah-mipawl hnen le Jerusalem luahtupawl hnenah, ‹Jehovah in hitin a ti: ngai hnik uh, siatnak ka ruahman ih, nanmah lo phiarnak ding khua ka khâng. Atu ah mi kip in mai umdān ṭhalo ihsin kirsal cio uhla, nan lamzinpawl le nan thil tipawl tuahṭha uh,› tiin sim aw,» tiah i ti.

Pathian Ralrin Peknak Hnăwn a Si

12 Cule annih in, «Cucu ruahsan ding um lo a si! Kanmai khawkhandān vekin kan nung ding ih mi kip in mai thinlung ṭhalo luhlulnak zulhin kan tuah cio ding,» tiah an ti.

13 Curuangah Jehovah in hitin a ti:

«Atu ah miphunpawl lakah sut uh,
Zo in so hivek thil a hna in a rak thei?
Israel fala him ih tuksumza thil a rak tuah.
14 Lebanon vur in a lungpikhāmpawl a suahsan thei ding maw?
Ram dang ihsi rialtidai ra luang cu lakhloh a theih ding maw?
15 Ziangruangahtile ka minungpawl in keimah in rak hngilh,
Santlailo milempawl hnenah rimhmui an rak ur.
Cupawl cun khuahlan zinpawl ihsin
An lamzinpawl ah an bahter,
Zinpi si loin zinte an rak zawh;
16 An ram kawlh ko an tuah, sisio tlaitluan dingah;
Cumi a paltlăngtu pauhpauh khawruahharin
An lu an thing ding.
17 Nisuahnak lam thli ih a darhter bangin, doral hmaiah ka darhter hai ding;
An vanduai ni ah hmai hawih loin, dung ka tŭn hai ding,» tiin.

Jeremiah Tiduhdah a Si

18 Cun annih in, «Ra uhla, Jeremiah dokalhin phiarsawm uhsi; ziangahtile puithiam hnen ihsin dān a hlorál lo ding ih, mifim hnen ihsin thurawnpeknak le profet hnen ihsin kamsuakthu khal. Ra uh, kan lei in amah cu do uh sila, a thusim zianghman ngaihsak hlah uhsi,» tiah an ti.

19 Maw Jehovah, i ngaihsak awla,
I dotupawlih aw hi ngaithla aw!
20 Thil ṭha cu thil ṭhalo ih rulh ding a si maw?
Ziangahtile annih in ka hrangah khur an lai.
An hrangah thil ṭha sim dingin le,
An hnen ihsin na thinlingnak lahlo dingin,
Na hmaika-ih ka din kha cîng aw.
21 Curuangah an fātepawl cu mangṭam ah ap awla,
Ralnâm cahnak ah ap hai aw;
An nupipawl nuhmei ah cang hai sehla,
Fa nei lo ah cang hai seh.
An pacangpawl sahthat si hai sehla,
An tlangvalpawl khal doawknak ah ralnâm in thah si hai seh.
22 An parih ralkap burpi na thlenter thutthi tikah,
An innpawl ihsin auaw theih si seh;
Ziangahtile keimah kai dingin khur an lai ih,
Ka ke awk dingin tháng an kamthup.
23 Cutisikhalsehla, Maw Jehovah, keimah that dingih an khawkhannak hmuahhmuah cu na thei ṭheh.
An mawhsualnak ngaidam hlah awla,
Na mithmuh ihsin an sual khal thaihlo fawn hlah,
Cuhnakin na hmaiah hlăwn si sawn hai seh.
Na thinheng ni ah an parah thlengter aw.

19

Bel Kuai Hminsinnak

1 Jehovah in hitin a ti: «Feh awla, beltuahtuih leithâwl pakhat va lei aw, cule mipi lak ihsin upa hrekkhat le puithiam upa hrekkhat hruai aw. 2 Cule Hlamphei Kăwtka luhnak kiangih Hinnom Fapa Phaikuam ah feh aw; cule cu tawkah ka lo sim leh ding mi thupawl cu phuang aw, 3 cule, ‹Maw Judah siangpahrangpawl le Jerusalem luahtupawl, Jehovah kamsuakthu hi ngai uh. Ralkap rualpawlih Jehovah, Israel Pathian in hitin a ti: «Ngai hnik uh, hi hmun ah thil ṭhalo ka thlengter ding, zokhal hna ih cumi a theitu cu a hna a khīng ding.

4 «Keimah in thlauthla ih hi hmun hi an bawrhbangter, cule anmah le an pupápawl le Judah siangpahrangpawl khalih an theih dah lo mi pathian dangpawl hnen, hi hmun ah rimhmui an rak ur ih, mawh nei lo thisen thawn hi hmun cu an rak khahter ruangah a si. 5 Cule thu ka pek hai lo mi, ka rel lo mi le ka lungthin khalih a um dah lo mi thil, meiur thilhlăn hrangah an fapapawl meisa ih ur dingah Baal hmun sângpawl an rak dĭn. 6 Curuangah ngai hnik uh, hi hmun cu Tofeth tiin le Hinnom Fapa Phaikuam tiih ko nawn loin, Thahawknak Phaikuam an ti ni a ra thleng leh ding, Jehovah in a ti. 7 Cule hi hmun ah Judah le Jerusalem ih thurawnpek cu zianghmanlo ah ka cangter ding ih, an ralpawl hmaika-ah le an nunnak hawltuih kut in ralnâm hmangin ka tluter hai ding; an ruak cu van zuang vâtepawl le leilung ramsapawlih rawl dingah ka pe ding. 8 Hi khua cu ṭhing reprep le sisio dingah ka tuah ding; a siattawn mi hmuahhmuah ruangah amah paltlăngtu pauhpauh in mak an ti ding ih an sisio ding. 9 Cule an fapapawl le fanupawl ih sa ka eiter hai ding ih, an doralpawl le an nunnak hawltupawl ih zăwnzaihter dingin an kulhkhŭm ih ānhai ko an tuah tikah pakhat le pakhat an sa an eiaw ding,» a ti,› tiin ti aw.

10 «Cun a lo thluntupawlih mithmuhah thâwl cu na khuai pei ih, 11 an hnenah, ‹Ralkap rualpawlih Jehovah in hitin a ti: hitivekhin hi minungpawl le hi khawpi hi ka khuai ding, tuahṭhat lehsal theih lo ko beltuahtuih bungbel a kuai vekin; anmah cu hmun um nawn lo tiangin aTofeth ah an phumaw ding. 12 Cutivekcun hi hmun parah le a luahtupawl parah ka tuah ding, Jehovah in a ti, cule hi khawpi cu Tofeth vekin ka tuah ding. 13 Van ih thilmak rual hmuahhmuah hnenih rimhmui an urnak inn zate tlunah, pathian dangpawl hnenah Inding Thilhlănpawl an thletbŭng ruangah, Jerusalem innpawl le Judah siangpahrang innpawl cu Tofeth hmun vekin a bawrhbang ding,› tiah an ti pei,» tiah i ti.

19:11a Tofeth: Isa 30:33 simfiangnak zoh aw.

14 Cun Jeremiah cu Jehovah in thuphuang dingih a rak thlahnak hmun Tofeth ihsin a suak, cule Bawipaih inn tualrawn ah a ding ih mipi zate hnenah, 15 «Ralkap rualpawlih Jehovah, Israel Pathian in hitin a ti: ‹Ngai hnik uh, amah dokalhih ka rak phuan mi thil ṭhalo hmuahhmuah kha hi khawpi par le a khawṭekpawl zate parah ka thlengter ding, ziangruangahtile ka kamsuakthupawl ngaithla lo dingin an ring an khăwngter a si,› a ti,» tiin.

20

Pashhur in Jeremiah a Tiduhdah

1 Immer fapa, Jehovah inn uktu lubik puithiam Pashhur in Jeremiah in hi thilpawl a phuang ti a hna in a rak thei. 2 Cun Pashhur in profet Jeremiah cu a vuak ih, Jehovah inn kiangih um, Benjamin kăwtka tlunta kăwl ah a ret.

3 Cule a thaisun ah, Pashhur in Jeremiah cu kăwl ihsin a suah. Jeremiah in a hnenah, «Jehovah in na hmin Pashhur tiah a ko nawn lo, aMagor-Missabib tiah a ko sawn a si. 4 Ziangahtile Jehovah in hitin a ti: ‹Ngai hnik, na hrang le na rualpi hmuahhmuah hrangah tuksumza ah ka lo tuah ding; cule annih cu an doralpawlih ralnâm in an tlu ding ih, cumi cu na mit in a hmu ding. Cun Judah-mi hmuahhmuah cu Babilon siangpahrang kut ah ka pe ding, cule anih in Babilon ah ralkaih ah a hruai hai ding ih, ralnâm in a that hai ding. 5 Cuihtlunah hi khawpi neihnunnak zate, a ṭuansuah mi zate le a thil mankhung zate cu ka pesuak ding; Judah siangpahrangpawlih hlawnthil hmuahhmuah cu an doralpawl kut ah ka pe thluh ding, annih in an răm ding ih, an lahlo ding, cule Babilon ah an hruai ding. 6 Cule nangmah, Pashhur le na inn ih cêng hmuahhmuah cu ralkaih ah nan feh ding. Nang cu Babilon ah na feh ding ih, cu tawkah na thi ding, cule nangmah le an hnenih thuphan na phuannak na rualpi hmuahhmuah thawn, cu tawkah phum nan si ding,› a ti,» tiah a ti.

20:3a Magor-Missabib: Kil kip ah ṭihnak a um tinak a si (câng 10; 6:25).

A Langsar lo Mi Jeremiah-ih Rawngbawlnak

7 Maw Jehovah, nang in i rak bum ih, bumin ka um;
Nang cu kei hnakin na cak ih, i rak neh.
Kei cu sunnihlawh nautatin ka um;
Mi kip in in hmuhsuam.
8 Ziangahtile ka ṭawng tikah, ka ausuak;
«Thahrumsuahnak le rămawknak,» tiah ka au.
Jehovah kamsuakthu ruangah
Kei cu sunnihlawh hmuhsuam le nautat ka hlawh.
9 Cun kei in, «Amah ka phuanglang lo ding ih,
A hmin khal in thu ka sim nawn lo ding,» tiah ka ruat.
Asinan a kamsuakthu cu ka thinlung ah
Ka ruh sungih meikāng khumaw vek a si;
Ka sūpawknak ah ka cau ih,
Ka tuar thei lo lawlaw.
10 Ziangahtile thuhla simawk thektho ka thei:
«Kil kip ah ṭihnak a um!
Zuarthlai uh, kan zuarthlai ding,» an ti.
Ka rualpi ṭhapawl in ka bah ding bawhin,
«Anih cu bum a si ding ih, kan neh ding,
Cule a parah phulei kan sam ding,» an ti.
11 Asinan Jehovah cu micak, Mi maksak vekin ka hnenah a um.
Curuangah i tiduhdahtupawl cu an bah ding ih, in neh lo ding.
Annih cu nasazetin an ning a zak ding, ziangahtile annih cu an hmuingil lo ding.
An kumkhaw mualphonak cu hngilh a si dah lo ding.
12 Asinan, Maw ralkap rualpawlih Jehovah,
Nang, midingfel hniksaktu le
Lungthin le thinlung hmutu,
An parih na phulei samnak in hmuter aw;
Ziangahtile na hmaika-ah ka thuhla ka thlĕn.
13 Jehovah hnenah hla sak uhla, Jehovah thangṭhat uh!
Ziangahtile anih cun thil ṭhalo tuahtupawlih kut ihsin
Mifarahpawlih nunnak a runsuak.
14 Ka suah ni cu camsiat si seh!
Ka nuih i hrin ni cu thlawsuahin um hlah seh;
15 Ka pa hnenih «Fapa na hring,» tiih thuthang kengtupa,
Amah lungawitertu cu camsiatin um seh.
16 Cule cu pa cu Jehovah in lainat lo ih a hlăwn mi khawpi vek si seh:
Cu pa cun zing lamah ṭah le
Sun ah rāknak thei seh,
17 Anih in sūl sungih i thah lo ruangah,
Cuti rak si ta sehla ka nu cu ka thlān a rak si ding ih,
A sūl cun i pai ringring ding.
18 Ṭuanbăngnak le riahsiatnak hmu ding le,
Ningzahnak thawi ka damsung cān hmang dingin,
Ziangahso maw ka nuih sūl sung ihsi ka rak suah le?

21

Nebukhadnezzar Kut ah Jerusalem a Tlu Ding

1–2 «Zangfahten Jehovah in suhsak aw, ziangahtile Babilon siangpahrang Nebukhadnezzar in in ra do a si. Cutiih in suhsak asile, kan hnen ihsin amah cu a fehhlo theinak dingah Jehovah in a mangbangza hnaṭuan hmuahhmuah bangtukin in tisak ve na hman maw!» tiih sim dingin Siangpahrang Zedekiah in Jeremiah hnenah Melkiah fapa Pashhur le Maaseiah fapa puithiam Zefaniah a thlah hai laiah Jehovah hnen ihsin a hnenih kamsuakthu thleng cu hihi a si.

3 Jeremiah in an hnenah, «Zedekiah hnenah hitin nan sim pei: 4 Israel-ih Pathian Jehovah in hitin a ti, ‹Ngai hnik, kulh leng ihsi lo kulhkhŭmtu Babilon siangpahrang le Kaldia-mipawl nan donak ding nan kut ih um hriamhreipawl cu ka khîr ding ih, hih khawpi laifangah ka retkhawmter hai ding. 5 Keimah rori in thinheng le thinso le thinling zetin kut suahin, ka bân cak thawn ka lo do ding. 6 Hi khawpi luahtu minung le rannung parah kut ka thlak ding, cule tuksumza nathrisia in an thi ding. 7 Cule cuihhnu ah, Jehovah in a ti, Judah siangpahrang Zedekiah, a siahhlawhpawl le nathrisia lak, ralnâm lak le mangṭam lak ihsi nungdam hi khawpi sungih a minungpawl cu Babilon siangpahrang Nebekhadnezzar kut, an ralpawl kut le an nunnak hawltupawlih kut ah ka pe hai ding; cule anih in ralnâm hriam in a sat hai ding; a zuah hai lo ding, a zangfah hai lo ding ih, an parah zahngainak a nei lo ding,› a ti.

8 «Cule hi minungpawl hnenah hitin na sim pei, ‹Jehovah in hitin a ti: ngai hnik uh, nan hmaiah thihnak lamzin le nunnak lamzin ka ret. 9 Hi khawpi sungih a tāngtu cu ralnâm, mangṭam le nathrisia in a thi ding; asinan a tlânsuak ih a lo kulhkhŭmtu Kaldia-mipawl bēntu cu a nung ding, cule a nunnak cu a hrangah rallâkthil vek a si ding. 10 Ziangahtile ṭhatnak ding hrangah si loin, thil ṭhalo hrangah hi khawpi dokalhin ka hmai ka hawih zo, Jehovah in a ti. Cumi cu Babilon siangpahrang kut ah pek a si ding ih, anih in meisa in a rak ur ding,› a ti.

David Sungza hnenih Thucah

11 «Cule Judah siangpahrang sungza hnenah, ‹Jehovah kamsuakthu hi ngaithla uh, 12 Maw David sungzatla! Jehovah in hitin a ti:

Zing ah dik zetin thuṭhen uh;
Cule mipalbĕttupawl kut ihsin
Răm mipawl cu runsuak uh,
Culole thil ṭhalo na tuahnak ruangah
Ka thinso cu meisa vekin a fehsuak ding ih,
Zohman ih hmih thei loin a kāng ding.
13 «Kanmah do dingah zo so suk ding?
Asilole kan cēnnak ah zo so ra lut ding?» tiih titu,
Maw phaikuam luahtu le
Phairawn lungpi, ngai hnik, nangmah ka lo do a si, Jehovah in a ti.
14 Asinan nan thil ti rah bangtukin dān ka lo tat hai ding, Jehovah in a ti;
A kimvelih thil hmuahhmuah a kangrál ṭheh theinak dingah
A tupi ah meisa ka muah ding a si,› tiah ti aw,» tiin.

22

1 Jehovah in hitin a ti, «Judah siangpahrang inn ah suk awla, cu tawkah hi thu hi sim aw: 2 Maw Judah siangpahrang, David laltokham ih to, nangmah le na siahhlawhpawl le hi kăwtkapawl ih lut na minungpawl, Jehovah kamsuakthu hi ngai uh! 3 Jehovah in hitin a ti: diknak le dingfelnak cu nunpi uhla, mipalbĕttupawlih kut ihsin răm mipawl cu runsuak uh. Mikhualpawl, pa nei lo pawl le nuhmeipawl parah diklonak le thahrumsuahnak tuah hlah uh, hi hmun ah mawh nei lo thisen suah fawn hlah uh. 4 Ziangahtile hi thil hi nan tuah ngaingai asile, David laltokham parih to siangpahrangpawl cu rángpawl le ránglêngpawl parah toin a siahhlawhpawl le a minungpawl thawn himi inn kăwtkapawl ihsin an lut ding. 5 Asinan hi kamsuakthupawl nan ngaithla lo asile, hi inn hi a ṭhing ding, keimah le keimah sālawin sia ka săm a si, Jehovah in a ti.

6 Ziangahtile Judah siangpahrang sungza hnenah Jehovah in hitin a ti:

«Nangmah cu ka hrangah Gilead le
Lebanon tlang zim na si;
Cucingin ramṭhing le
Luahtu nei lo khawpipawl ah ka lo tuah hrimhrim ding.
7 Ziangahtile nangmah siattu dingpawl ka timtuah hai ding,
Mi kip anmai hriamhrei cio thawn;
Na sidar ṭhabik bikpawl an hauthlu ding ih,
Meisa sungah an paih ding.

8 «Cule miphun tampi in hi khawpi hi an paltlăng ding ih, mi kip in anmai innhnen par cio ah, ‹Ziangah so hi khawpi ropi parah Jehovah in hitin a rak tuah?› an ti ding. 9 Cun annih in, ‹Jehovah an Pathian thukham an thlauthla ih, pathian dangpawl an bia ih an rak rian ruangah a si,› tiah an ti ding,» tiin.

10 Mithi ṭah hlah uhla, amah sûn fawn hlah uh;
Cuhnakin a fehhlo mi hrangah nasazetin ṭap sawn uh,
Ziangahtile anih cu a kirsal nawn lo ding ih,
A suahkehnak ram khal a hmu nawn lo ding.

Josiah Fapapawl hnenih Thucah

11 Ziangahtile Judah siangpahrang Josiah fapa, a pa Josiah airawlih uktu, hi hmun ihsi hruaihloh mi aShallum thuhla ah Jehovah in hitin a ti, «Amah cu a kirsal nawn lo ding, 12 cuhnakin ralkaih ih an hruainak hmun ah a va thi sawn ding, hi ram hi a hmu nawn lo ding,» tiin.

22:11a Shallum: Himi hmin sullam cu «pekkirsal kim mi» tinak a si. 2Sp 23:31 ih amah kawhnak hmin cu Jehoahaz a si.

13 «Dingfellonak ih a inn saktu le
Diklonak ih a pindan tluntapawl saktu,
Hlawhman pe lo ih mai innhnen sawr ih,
A ṭuan man zianghman pe lo tu cu a hmakhua a pit a si,
14 ‹Inn tumpi ka hrangah ka sak ding, pindan tlunta kaupipi nei in,
Tukvirhpawl tla ka tuah ding,
Sidar thing in ka tuam fawn ding,
Cule răwng sen ka hnih ding,› titupaih hmakhua cu.
15 Sidar thing ih mi na hleih ruangah siangpahrang maw na si?
Na pa kha ei le in ah a lungkim tawk ih,
Diknak le dingfelnak a rak tuah a si lo maw?
Cucu a hrangah a ṭha a si.
16 Mifarah le mitlasam thu a ṭhensak,
Cucu a ṭha a si.
Cucu in theihdān ding a si lo maw? Jehovah in a ti.
17 Asinan duhhamnak hrang,
Mawh nei lo thisen suahnak hrang,
Palbĕtnak le thahrumsuahnak hrang lawngah na mit le na thinlung cu na ret,» tiin.

18 Curuangah Judah siangpahrang, Josiah fapa Jehoiakim thuhla ah Jehovah in hitin a ti,

«Annih in, ‹Ai maw, ka unaupa!› asilole ‹Ai maw, ka unaunu!› tiin
Amah cu an ṭah lo ding.
‹Ai maw, hotupa!› asilole ‹Ai maw, a ropitnak!› tiin
Amah cu an ṭah lo ding.
19 Amah cu lāk phum men bangin phum a si ding,
Jerusalem kăwtkapawl lengah dirsuakin an hlăwn ding,» tiin.
20 «Lebanon ah so awla ausuak aw,
Cule Bashan ah na aw suah aw;
Abarim ihsin au aw,
Ziangahtile na miduhpawl an hlorál.
21 Na hmuingil tikah na hnenah thu ka sim,
Asinan nang in, ‹Ka ngaithla lo ding,› na ti.
Ka aw na ngaithla lo,
Na no lai ihsin hihi na nundān a si,
22 Na tuukhāltupawl hmuahhmuah cu thli in a hranhlo hai ding,
Cule na miduhpawl cu ralkaih ah an feh ding:
Na sualralnak hmuahhmuah ruangah
Ningzak le mualphoin na um ding.
23 Nang, Lebanon luahtu,
Sidar thingpawl lakah na bu na sâm,
Nunau fahrinnat vekin,
Na parih natnak a thlen tikah cun ziang tluk zangfahumza so maw na si ding?» tiin.

Koniah hnenih Thucah

24 «Ka nun rori vekin, Jehovah in a ti, Judah siangpahrang Jehoiakim fapa aKoniah cu ka vawrh lam kut nĕmnak zunghruk si hman sehla, cutawk ihsin ka lo phawisuak thotho ding; 25 cule nan nunnak hawltupawlih kut ah, an mithmai na ṭih mipawlih kut ah, Babilon siangpahrang Nebukhadnezzar kut ah le Kaldia-mipawlih kut rori ah ka lo pe ding. 26 Cule nangmah le a lo hringtu na nu cu nan suahsemlonak hmun ram dang ah ka lo hlăwn ding ih, cu tawkah nan thi ding. 27 Asinan kir an duh duahdo mi ram ah an ra kir lo ding.»

22:24a Koniah: Jehoiakin asilole Jekoniah ti khalih kawh a si (1San 3:16).

28 Hi pa Koniah hi an hmuhsuam mi bel kûai,
Zohman ih an duh lo mi a si lo maw?
Ziangahso amah le a tesinfapawl hlăwnsuak ih,
An theih lo mi ram ih an hlăwnsuak?
29 Maw leilung, leilung, leilung,
Jehovah kamsuakthu ngaithla aw!
30 Jehovah in hitin a ti:
«Hi pa hi fa nei lo,
A damsung hmuingil lo ding mi ah ngan uh,
Ziangahtile a tesinfa pakhat hman hmuingil ih,
David laltokham parih to le,
Judah ram uktu ding an um nawn lo ding,» tiin.

23

Dingfelnak Hnge

1 «Ka ran tlannak hmun ih tuu rûnrual hloráltertu le ṭekdarhtertu tuukhāltupawl cu an hmakhua a pit a si! Jehovah in a ti. 2 Curuangah Israel-ih Pathian Jehovah cun ka minungpawl khāltu tuukhālpawl parah hitin a ti: ka rante rual nan ṭekdarhter, nan dawihlo ih, nan rak vehvai lo. Ngai hnik uh, thil ṭhalo nan tuah mi ruangah nanmah dokalhin ka ra ding, tiah Jehovah in a ti. 3 Asinan ka rak dawisuak hainak ram hmuahhmuah ihta a tāngsŭn ka rante rual cu ka khawm ding ih, an hruang sungah ka hruaikirsal hai ding, cule ci tampi an thlah ding ih, an karh ding. 4 Anmah khāltu dingah an tlunah tuukhāltupawl ka tungding ding, cule an ṭih nawn lo ding, an thla khal a phâng lo ding ih, an tlasam fawn lo ding, Jehovah in a ti.

5 «Ngai hnik, David hnenih dingfelnak Hnge ka tundīn ding cān cu a rung thleng a si, Jehovah in a ti;
Siangpahrang in a uk ding ih a hmuingil ding,
Cule diknak le dingfelnak in leilung ah thu a ṭhen ding.
6 Amai san ah Judah cu runhim a si ding ih,
Israel cu ralmuangin a khawsa ding;
Cule JEHOVAH KAN DINGFELNAK ti cu amah kawhnak hmin a si ding.

7 «Curuangah ngai hnik, ‹Israel tefapawl Izip ram ihsi hruaisuaktu Jehovah a nun rori vekin,› tiih an ti nawn lo ding cān a thleng ding, Jehovah in a ti. 8 Cuhnakin, ‹Sak lam ram ihta le ka dawisuak hainak ram hmuahhmuah ihta Israel sungza tesinfa hruaisuak ih hruaikir lehtu Jehovah a nun rori vekin,› an ti sawn ding. Cule anmai ram ah an cêng ding,» tiin.

Profet Diklopawlih Ruahsannak Hnawn a Si

9 Profetpawl thuhla ah:

Ka sungih ka thinlung a kûai,
Ka ruh zaten an hnîn ṭheh.
Jehovah ruangah le
A kamsuakthu thianghlim ruangah
Kei cu zuripa vek le
Sabitzu ih ciahneh mi pa vek ka si.
10 Ziangahtile ram cu uirepawl an khat;
Camsiatnak ruangah ram cun a sûn.
Ramṭhing ih hmun duhumpawl cu an ro.
An nundān a ṭha lo ih,
An cahnak a dik lo.
11 «Ziangahtile profet le puithiam cu an bawrhhlawh;
A si, ka inn ah an sualralnak ka hmusuak, Jehovah in a ti.
12 Curuangah an lamzin cu an hrangah,
Khawthim lakih a nâl mi lamzinpawl vek a si ding,
Cuih parah dawisuah an si ding ih,
An tlu ding;
Ziangahtile an parah thil ṭhalo ka thlengter ding,
Anmah dāntatnak kum cu, Jehovah in a ti.
13 Cule Samaria profetpawl lakah atnak ka hmu:
Baal sālin thu an phuang ih,
Ka mi Israel thilsual an tuahter.
14 Jerusalem profetpawl lak khalah thil rapthlak ka hmu:
An uire ih thuphan in an nung;
Thil ṭhalo tuahtupawlih kut khal an cakter,
Cutin zohman an sualralnak ihsin an kirsal nawn lo.
An zaten ka hrangah Sodom vek le,
A luahtupawl cu Gomorrah vek an si.»

15 Curuangah ralkap rualpawlih Jehovah in profet thuhla ah hitin a sim:

«Ngai uh, hnîtkhâ in ka câwm hai ding,
Cule tûr rawi mi tidai ka inter hai ding;
Ziangahtile Jerusalem profetpawl hnen ihsin
Ram hmuahhmuah ah bawrhbannak a darhsuak.»

16 Ralkap rualpawlih Jehovah in hitin a ti:

«Nan hnenih thuphuangtu profetpawlih kamsuakthu ngaithla hlah uh.
Thulolak ah an lo tuah;
Jehovah kâ ihsin suak a si lo mi,
Anmai thinlung suangtuahnak men an rel.
17 I hmuhsuamtupawl hnenah, ‹Remdaihnak nan nei ding, Jehovah in a ti,› tiah catbang loin an ti;
Cule annih in, ‹Nan parah thil ṭhalo zianghman a thleng lo ding,› tiah mai thinlung lungruhnak zulhih nungtu pauhpauh hnenah an ti,» tiin.
18 Ziangahtile Jehovah-ih thurawnpeknak hmun ah zo so rak ding,
A kamsuakthu theithiam le hna ih thei zo so um?
19 Ngai hnik, Jehovah phusîng cu thinso in a thăwksuak, phusîng maktak cu!
Misualrálpawlih lu parah nasazetin a herhaw ding.
20 A thinlung khawruah mi a tuahsuak ih a hlĕnsuak hlanlo,
Jehovah thinhengnak cu a lamlêt lo ding.
Ni neta ah cumi cu famkim zetin nan theithiam lai ding.
21 «Hih profetpawl hi ka thlah hai lo, asinan an tlân thotho.
An hnenah thu ka sim lo, asinan thu an phuang thotho.
22 Asinan ka thurawnpeknak hmun ah rak têl hai sehla cu,
Ka minungpawl hnenah ka kamsuakthu an phuang ding ih,
An nundān ṭhalo le
An thil tiṭha lo ihsin an lamlêt zo ding nân!
23 Kei cu hla zetih um Pathian si loin,
Naite ih um Pathian maw ka si? Jehovah in a ti.
24 Ka hmuh lo dingin
Zo tal hmun thup ah a relh thei pei maw? Jehovah in a ti;
Lei le van ah hin ka khat a si lo maw? Jehovah in a ti.

25 « ‹Mang ka măn, mang ka măn,› tiin ka hmin ih thuphan simtu profetpawlih thusim mi cu ka rak thei! 26 Thuphuangtu profetpawlih thinlung ah ziang tik tiang so thuphan a um ding? A si, annih cun anmai thinlung ih bumnak thu an phuang. 27 An pupápawl in Baal ruangih ka hmin an hngilh bangin, annih cun an innhnenpawl hnenah an mang thu simawktăwnnak in ka minungpawl ka hmin hngilhter an tum.

28 «Mang neitu profet cun a mang sim seh;
Cule ka kamsuakthu neitu cun rinum zetin ka kamsuakthu rel seh.
Cangpâwl le sangvut in ziang bangawknak so an neih? Jehovah in a ti.
29 Ka kamsuakthu cu meisa vek le
Lungto khuaidipnak sobul vek a si lo maw? Jehovah in a ti.

30 «Curuangah ngai hnik uh, ka kamsuakthu firawtăwntu profetpawl cu ka do a si, Jehovah in a ti. 31 Ngai hnik uh, an lei hmangih ‹Anih in a ti,› titu profetpawl ka do a si, Jehovah in a ti. 32 Ngai hnik uh, mang thuphan phuang le sim, an thuphan le an uarawknak hmangih ka minungpawl fehpêngtertu profetpawl ka do a si, Jehovah in a ti. Annih cu ka thlah hai lo ih, thu ka pe hai fawn lo. Curuangah annih in hi minungpawl cu ṭhathnemnak an pe hrimhrim lo ding, Jehovah in a ti.

33 «Cule hi minungpawl in siseh, profet in siseh, puithiam in siseh, an lo sut ih, ‹Jehovah thucah cu ziang a si?› an lo ti asile, ‹Ziang thucah so?› tiah na ti hai pei. ‹Nanmah khal ka lo tansan ding,› tiah Jehovah in a ti. 34 Cule, ‹Jehovah thucah,› tiih titu cu profet a si ah maw, puithiam a si ah maw, mi menmen an si ah maw, cu pa le a sungkua cu dān ka tat ding a si. 35 Mi kip mai innhnen le mi kip mai unau cio hnenah, ‹Jehovah cun ziangtin a sâng?› ih, ‹Jehovah in ziangso a sim?› tiah nan ti pei. 36 Cule Jehovah thucah cu nan mang nawn lo ding. Ziangahtile mi kip ih kamsuak cu thucah ah a cang ding, ziangahtile a nung mi Pathian, ralkap rualpawlih Jehovah, kan Pathian kamsuakthupawl cu nan rak merhkawi a si. 37 Profet hnenah nang in, ‹Jehovah in ziangtin a lo sang?› ih, ‹Jehovah in ziangso a sim?› tiah na ti pei. 38 Asinan, ‹Jehovah thucah cu!› tiah nan ti asile, Jehovah in hitin a ti, ‹Jehovah thucah cu!› ti hlah uh, tiin ka lo thlah ih, asinan ‹Jehovah thucah cu!› tiih nan ti thotho ruangah; 39 ngai hnik uh, keimah rori in ka lo hngilh ding ih, nanmah le nan pupápawl hnenih ka rak pek mi khawpi khal ka hmaika ihsin ka hlăwn ding. 40 Cule nan parah kumkhaw hminsiatnak le hngilh lo ding mi catbanglo ningzahnak ka thlĕn ding,» tiin.

24

Theipi Rah Ṭha le Sia

1 Babilon siangpahrang Nebukhadnezzar in Jehoiakim fapa Judah siangpahrang Jekoniah le Judah bawipawl, zungthiampawl le soserthiampawl thawn, Jerusalem ihsin Babilon ah ralkaih ih a hruaihloh hai hnuah, Jehovah in i hmuh ih, ngai hnik, theipi rah kho hnih Jehovah temple hmaiah a hungaw. 2 Kho khat ah cun theipi rah ṭha zet, theipi hmin hmaisabik vek khi a um; cule a kho dangah cun ei theih lo ding mi theipi rah sia zet a um, an rak sia ngaingai. 3 Cun Jehovah in ka hnenah, «Jeremiah, ziangso na hmuh?» tiah i ti.

Cule kei in, «Theipi rah, theipi rah ṭha, a ṭha zet mi le ei theih lo ding mi a sia, a sia zet mi, a sia ngaingai mi,» tiah ka ti.

4 Cule Jehovah kamsuakthu cu ka hnenah a rung thleng leh ih, 5 «Israel Pathian Jehovah in hitin a ti, ‹Hi hmun ihsin an ṭhatnak ding hrangih Kaldia ram ih ka rak thlah mi, Judah ram ihsin ralkaih ih hruaihloh mipawl cu hi theipi rah ṭhapawl vekin ka pawm hai ding. 6 Ziangahtile an ṭhatnak dingah an parah ka mit ka futter ding ih, hi ram ah ka hruaikir hai ding; ka tungding hai ding ih, ka dirthla hai lo ding, cule ka phun hai ding ih, ka phawi hai fawn lo ding. 7 Cun keimah cu Jehovah ka si ti thei dingin thinlung ka pe hai ding, cule annih cu ka mi an si ding ih, an Pathian ka si ding, ziangahtile an thinlung zaten ka hnenah an ra kir ding.

8 ‹Cule ei theih lo ding mi theipi rah sia vekin, thungaiten Judah siangpahrang Zedekiah le a bawipawl, Jerusalem ih tāngsŭn hi ram ih cambâng le Izip ram ih cêngpawl cu ka dungtun hai ding, tiah Jehovah in a ti. 9 Ka dawisuah hainak ding hmun hmuahhmuah, leilung lalram zate ah hmuhsuam ding, puahcăwk ding, ĕlhsen dingah le camsiat dingah ṭhihṭhaihnak ah le siatnak ah ka tuah hai ding. 10 Cule anmah le an pupápawl hnenih ka pek mi ram ihta an cemral tiangin an lakah ralnâm, mangṭam le nathrisia ka thlah ding,› a ti,» tiin.

25

Kum 70 Sung Sáltannak

1 Josiah fapa Judah siangpahrang Jehoiakim a lal a kum litnak, Babilon siangpahrang Nebukhadnezzar a lal a kum khatnak ah Judah-mipawl hmuahhmuah thuhla ih Jeremiah hnenih thu rung thleng mi, 2 profet Jeremiah in Judah-mi hmuahhmuah le Jerusalem luahtupawl hmuahhmuah hnenih a sim mi cu, 3 «A liam cia mi kum 23, Judah siangpahrang Amon fapa Josiah a lal a kum hleithumnak ihsin tuihni tiangin Jehovah kamsuakthu ka hnenah a rung thleng, cule nan hnenah ka sim leuhleuh nân, nan rak ngaithla lo. 4 Cule Jehovah in nan hnenah a siahhlawh profetpawl hmuahhmuah a thlah ih, a thlah leuhleuh hai, asinan nan rak ngaithla lo ih, thei dingin nan hna khal nan tháwng lo. 5 Annih in, ‹Mi kip in nan nundān ṭha lo le nan thil tiṭha lo ihsin atu ah ra kir cio uhla, nanmah le nan pupápawl hnenah Jehovah in kumkhaw hrangih a pek mi ram ah cêng uh. 6 Cun pathian dangpawl rian ding le be dingin an dung thlun hlah uhla, nan kut thil ti mipawl in ka thinheng dingin in căwktho hlah uh; cule ka lo tuahmawh hai lo ding,› tiah an ti. 7 Cuticingin nannih in in rak ngaithla lo, nan kut thil tipawl thawn nanmai hriamhma dingah ka thinheng ko in rak căwktho, Jehovah in a ti.

8 «Curuangah ralkap rualpawlih Jehovah in hitin a ti: Ka kamsuakthupawl nan rak ngaithlak lo ruangah, 9 ngai hnik uh, mi ka cah ding ih, sak lam sungkua hmuahhmuah ka la thluh ding, Jehovah in a ti, cule ka siahhlawh Babilon siangpahrang Nebukhadnezzar khal ka cah ding ih, anmah cu hi ram le a luahtupawl le a kimvelih miphunpawl hmuahhmuah do dingin ka run hruai ding, cule a siatralter hai verver ding ih, khawruahhar ih sisio men dingah le ṭhing lan ta dingah ka tuah hai ding. 10 Cuihtlunah hlim aw le lungawi aw, mo neitu aw le mo aw, riallung awn le meito tleu cu an hnen ihsin ka la ding. 11 Cule hi ram pumpuluk cu a ṭhing ding ih tuksumza a si ding, cule hi miphunpawl in kum 70 sung Babilon siangpahrang an rian ding.

12 «Cun hitin a si ding, kum 70 a kim tikah, Babilon siangpahrang le cuih Kaldia ram cu an mawhsualnak ruangah dān ka tat ding ih, kumkhua in ka ṭhingter ding, Jehovah in a ti. 13 Cule cuih ram parah cun anmah dokalhih ka phuan mi ka kamsuakthupawl hmuahhmuah, miphunpawl hmuahhmuah dokalhih Jeremiah ih a rak phuan mi, himi cazual sungih ngankhum mi hmuahhmuah cu ka thlengter ding. 14 Ziangahtile miphun tampi le siangpahrang ropipawl cu anmah in an rian ve ding; cule an thil ti bangtukin le anmai kut thil ti bangtukin ka lehrūl hai ding,» tiah a ti.

Pathian Thinlingnak No

15 Israel-ih Pathian Jehovah in ka hnenah hitin a ti: «Hi ka thinsonak sabitzu no hi ka kut ihsin la awla, an hnenih ka lo thlahnak miphunpawl hmuahhmuah cu inter hai aw. 16 Cule an in ding ih an hawr ding, cule an â ding, an lakih ka thlah ding mi ralnâm ruangah,» tiin.

17 Cun Jehovah kut ihta no cu ka lâk ih, i kuatnak miphun hmuahhmuah cu ka inter: 18 tuihsun ih a si bang hin, ṭhing ko tuah dingah, tuksumza ah, sisio dingah le camsiat dingah, Jerusalem le Judah khawpipawl, a siangpahrangpawl le a bawipawl, 19 Izip siangpahrang Faro le a siahhlawhpawl, a minungpawl hmuahhmuah, 20 mipi căwkcawrawi, Uz ram ih siangpahrang hmuahhmuah, Filisṭia-mipawl ram (Ashkelon, Gaza, Ekron le a tāngsŭn Ashdod-mi) siangpahrang hmuahhmuah; 21 Edom, Moab le Ammon tefapawl; 22 Ṭaiar siangpahrang hmuahhmuah, Sidon siangpahrang hmuahhmuah le tifinriat ralkhat ih um tipi kap tluan siangpahrang hmuahhmuah; 23 Dedan, Tema, Buz le beksám metpawl; 24 Arabia siangpahrang hmuahhmuah le thlaler ih khawsa mipi căwkcawrawipawlih siangpahrang hmuahhmuah; 25 Zimri siangpahrang hmuahhmuah, Elam siangpahrang hmuahhmuah le Media siangpahrang hmuahhmuah; 26 a hla le a nai ih um sak lam siangpahrang hmuahhmuah a sang sangin; cule leilung vangdâp ih um lalram hmuahhmuah cu. Cupawl hnuah aSheshak siangpahrang in a in ve ding.

25:26a Sheshak: Babilon hmin thup a si (Jer 51:41 khal).

27 «Curuangah an hnenah, ‹Ralkap rualpawlih Jehovah, Israel Pathian in: «In uh, ri uhla luak uh! Nan lakih ka thlah ding mi ralnâm ruangah tlu uhla tho nawn hlah uh,» a ti,› ti aw.

28 «Cule hitin a si ding, na kut ihta in dingah no an lâk duh lo asile, an hnenah, ‹Ralkap rualpawlih Jehovah in hitin a ti: «Nan in hrimhrim pei! 29 Ziangahtile, ngai hnik, ka hmin pu hi khawpi parah siatnak thlĕn ka thăwk ih, dāntat loin nan um pei maw? Dāntat lo nan si lo ding, ziangahtile leilung luahtu hmuahhmuah hrangah ralnâm ka ko ding,» ralkap rualpawlih Jehovah in a ti,› tiah ti aw.

30 «Curuangah hi kamsuakthu hmuahhmuah hi an hnenah phuang awla, an hnenah sim aw:

‹Tlun sâng ihsin Jehovah a hrûm ding ih,
A umnak hmun thianghlim ihsin a aw a suah ding;
A ran tlannak dokalhin nasazetin a hrûm ding.
Sabit pálsawrtu vekin,
Leilung luahtu hmuahhmuah dokalhin a au ding.
31 Leilung dĕng tiang thawmvâng a thang ding,
Ziangahtile Jehovah in miphunpawl thawn buainak a nei.
Milai hmuahhmuah thu a ṭhensak ding.
Misualrálpawl bélte cu ralnâm ah a pe ding,› Jehovah in a ti.»

32 Ralkap rualpawlih Jehovah in hitin a ti:

«Ngai hnik uh, miphun pakhat ihsin miphun pakhat hnenah
Siatnak a fehsuak ding ih,
Leilung dĕng ihsin phusîng cak zet a tho ding.

33 «Cule cuih ni ah Jehovah ih thah mipawl cu leilung khat lam dĕng ihsin khat lam dĕng tiang a si ding. Cuihpawl cu an ṭah lo ding ih, fĭnkhawm an si fawn lo ding, phum khal an si lo ding; lei parah êk vek an si ding.

34 «Nannih tuukhālpawl, râk uhla ṭap uh!
Leivut lakah lāwng rero uh,
Nannih tuu run hruaitupawl!
Ziangahtile thah nan si ding cān le nan vâkdarh ni a thleng thlang;
Bungbel hlú tlak bangin nan tla ding.
35 Cule tuukhāltupawl in tlanhlohnak lamzin an nei lo ding ih,
Tuu rual hruaitupawl khal in tlansuahnak an nei lo ding.
36 Tuukhāltupawlih auaw le,
Tuu rual hruaitupawlih râk rero aw cu!
Ziangahtile Jehovah in an ran tlannak a răm ih,
37 A nasazet mi Jehovah thinhengnak ruangah,
Hnangamteih ran tlannak hmunpawl cu siatbăl a si.
38 Kiosa bangin a umnak a suahsan;
Ziangahtile tuksumza palbĕttu ruangah le
Ṭihnungza a thinhengnak ruangah an ram cu a kawlh ṭheh,» tiin.

26

Temple sungih Jeremiah Thuphuansuah

1 Judah siangpahrang Josiah fapa Jehoiakim a lal thăwk pekte ah Jehovah hnen ihsin hi kamsuakthu hi a rung thleng, 2 «Jehovah in hitin a ti: ‹Jehovah inn tualrawn ah ding awla, amah be dingih Jehovah inn ih ra, Judah khawpi hmuahhmuah hnenah, an hnenih sim ding ka pek mi thu hmuahhmuah cu sim aw. Kam khat hman sūp hlah! 3 An thil tiṭhat lo ruangih an parah thlĕn dingih ka tumtah mi siatnak thuhla ah ka lamlêt theinak dingah mi kip in ngaithlain an nundān ṭhalo ihsin an pial na hman maw!› 4–5 Cule nang in an hnenah, Jehovah in hitin a ti, ‹Nan hmaika-ih ka ret mi ka dān thlun dingin nan ngaithla lo ih, ngaithlak dingih nan hnenih ka run thlah leuhleuh mi ka siahhlawh profetpawlih thupawl khal nan ngaithlak lo asile, 6 hi inn cu Shiloh vekin ka tuah ding ih, hi khawpi cu leilung miphunpawl hmuahhmuah hnenah camsiat ah ka tuah ding,› tiah na sim pei,» tiin.

7 Cun Puithiampawl le profetpawl le mipi hmuahhmuah in Jehovah inn sungih hi thu Jeremiah ih a sim mi cu hna in an rak thei. 8 Cule hitin a si, mipi hmuahhmuah hnenah sim dingih Jehovah ih thu a rak pek mi hmuahhmuah a sim ṭheh tikah, puithiampawl, profetpawl le mipi hmuahhmuah in amah cu an kai ih, «Na thi tengteng ding a si! 9 ‹Hi hmun cu Shiloh vek a si ding ih, luahtu nei loin hi khawpi cu a ṭhing ding,› tiin ziangahso Jehovah hmin ih na phuan,» tiah an ti. Cule mipi hmuahhmuah cun Jehovah inn ah Jeremiah an kulh vialvial.

10 Judah bawipawl in hi thilpawl hi hna in an theih tikah, siangpahrang inn ihsin Jehovah inn ah an so ih Jehovah inn kăwtka thar luhnak ah an to. 11 Cule puithiampawl le profetpawl cun bawipawl le mipi hmuahhmuah hnenah an ṭawng ih, «Hi pa hi thitlak a si! Ziangahtile hna ih nan rak theih vekin, hi khawpi dokalhin thu a rak phuang a si,» tiah an ti.

12 Cun Jeremiah in bawipawl le mipi hmuahhmuah hnenah, «Nan rak theih mi thu hmuahhmuah bangtukin, hi inn dokalhin le hi khawpi dokalhih thuphuang dingin Jehovah in i rak thlah a si. 13 Curuangah atu ah nan umdān le nan thil ti rĕmṭha uhla, Jehovah nan Pathian aw ngaithla uh; cule nanmah dokalhih a rak phuan mi thil ṭhalo thuhla ah Jehovah a lamlêt ding a si. 14 Kei tu cu, ngai hnik uh, nan kut ah ka um ko; dik le ṭha nan tidandanin in tuah ko uh. 15 Asinan in thah asile, nanmah par, hi khawpi par le a luahtupawl parah mawh nei lo thisen cu nan thlĕn tengteng ding a si ti thei uh; ziangahtile nan hnatheihih hi thupawl sim dingah Jehovah in nan hnenah i rak thlah taktak a si,» tiin a sim hai.

16 Cun bawipawl le mipi zaten puithiampawl le profetpawl hnenah, «Hi pa hi thitlak a si lo. Ziangahtile kan hnenah Jehovah kan Pathian hmin in thu a sim a si,» tiah an ti.

17 Cun cuih ram upa hrekkhat cu an tho ih, mipi pungkhawm zate hnenah, 18 «Judah siangpahrang Hezekiah san ah Moreseth-mi Mikah in thu a rak phuang ih, Judah mipi hmuahhmuah hnenah, ‹Ralkap rualpawlih Jehovah in hitin a ti:

Zion cu ló bangin leh a si ding,
Jerusalem cu hnawmpen ah a cang ding ih,
Temple tlang cu
Tupi hmun sâng vekah a cang ding,›

tiin thu a sim.

19 «Judah siangpahrang Hezekiah le Judah-mi hmuahhmuah in amah cu an rak that maw? Anih in Jehovah ṭihzahin Jehovah duhsaknak a hawl ih, an parih siatnak nasazet thleng dingih a rak phuan mi thuhla ah Jehovah a lamlêt a si lo maw? Asinan kanmah parah thil ṭhalo nasazet kan tuah zik a si hi!» tiah an ti.

20 Cule mi pakhat Jehovah hmin ih thuphuangtu, hi khawpi dokalh le hi ram dokalhin Jeremiah kamsuakthu bangtukih thuphuangtu Kirjath Jearim-mi Shemaiah fapa Urijah a rak um dah. 21 Cule siangpahrang Jehoiakim le a micak hmuahhmuah le a bawipawl hmuahhmuah in a thusim mi an theih tikah, amah cu siangpahrang in that dingin a hawl; asinan cumi cu Urijah in a theih tikah, a ṭih ih a tlânhlo, cule Izip ah a feh. 22 Cun siangpahrang Jehoiakim in Akbor fapa Elnathan cu mi dang mi hrekkhat thawn Izip ram ah a thlah. 23 Cule Izip ihsin Urijah an run tlunpi ih, siangpahrang Jehoiakim hnenah an hruai; anih cun ralnâm in amah cu a that ih, a ruak cu mivantlangpawlih thlān ah a hlăwn.

24 Sikhalsehla Jeremiah cu mipi kut ah that dingih an peklonak dingah, Shafan fapa Ahikam in amah cu a ṭanpi.

27

Hminsinnak Hngawngkol

1 Judah siangpahrang Josiah fapa aZedekiah a lal thăwkpekah, Jehovah hnen ihsin Jeremiah hnenah hitin thu a thleng, 2 Jehovah in hitin a ti: «Nangmai hrangah hngawngkol le a hri tuah awla, na hngawng ah bât aw, 3 cule Judah siangpahrang Zedekiah hnenih Jerusalem ih hung so thuphurtupawl hmangin Edom siangpahrang, Moab siangpahrang, Ammon-mipawlih siangpahrang, Ṭaiar siangpahrang le Sidon siangpahrang pawl hnenah thu cah aw. 4 Cule an bawipawl hnenih sim dingin thu pe hai awla, ‹Ralkap rualpawlih Jehovah, Israel Pathian in hitin a ti; nan bawipawl hnenah hitin nan sim pei: 5 «Ka huham maksak le ka bān suahin leilung, minung le lei parih um ramsa ka tuah ih, cumi cu ka duh mi hnenah ka pe. 6 Cule atu ah hi ram hmuahhmuah hi ka siahhlawh, Babilon siangpahrang Nebukhadnezzar kut ah ka pe, cule ramsapawl khal amah rian dingin ka pe. 7 Cule a ram tlûk tikcucān a thlen hlanlo, miphun hmuahhmuah in amah le a fapa le a fapaih fapa an rian ding, cuihhnu ah miphun tampi le siangpahrang ropipawl in amah cu anmaih siahhlawh ah an tuah ve ding.

27:1a Zedekiah: Hebru kut ngan Bible hrekkhat ah Jehoiakim an ti.

8 Cule hitin a si ding, Babilon siangpahrang Nebukhadnezzar rian lo ding miphun le Babilon siangpahrang hngawngkol hnuaiih a hngawng ret duh lo miphun cu ralnâm, mangṭam le nathrisia in, amai kut hmangih ka hlohralter hlanlo, dān ka tat hai ding, Jehovah in a ti. 9 Curuangah nan hnenih, ‹Babilon siangpahrang nan rian lo ding,› tiih lo titu nan profetpawl, nan tinzohthiampawl, nan mang mantupawl, nan aizohthiampawl le nan dawithiampawl kha ngaithla hlah uh. 10 Ziangahtile nan ram ihsin hla zetih lo ṭhawn dingin nan hnenah thuphan an phuang, ka lo dawisuak ding ih nan hlorál ding a si. 11 Asinan Babilon siangpahrang hngawngkol hnuaiih hngawng rettu le amah riantu miphunpawl cu anmai ram ah ka umter hai ding, cule lei an let ding ih cu tawkah an cêng ding, Jehovah in a ti,» tiin,› a ti,» tiah a ti.

12 Hi ṭawngkampawl bangtukin Judah siangpahrang Zedekiah hnen khalah ka sim a si, «Babilon siangpahrang hngawngkol hnuaiah na hngawng ret awla, amah le a mipi cu rian aw, cule nung aw! 13 Babilon siangpahrang rian lo ding mi miphun dokalhin Jehovah a ṭawng bangtukin, nangmah le na mipi cu ziangahso ralnâm, mangṭam le nathrisia ih nan thih ding? 14 Curuangah nan hnenih, ‹Babilon siangpahrang nan rian lo pei,› tiih lo simtu profetpawlih ṭawngkampawl kha ngaithla hlah uh, ziangahtile annih cun nan hnenah thuphan an phuang a si; 15 ziangahtile annih cu ka thlah hai lo, cucingin nanmah rori, nanmah le nan hnenih thuphuangtu profetpawl ka lo dawisuak ih, nan hlohralnak dingah annih cun ka hmin in thuphan an phuang, Jehovah in a ti,» tiin.

16 Cule puithiampawl le hi minungpawl zate hnen khalah ka sim ih, «Jehovah in hitin a ti: Nan hnenah, ‹Ngai hnik uh, Babilon ihsin Jehovah inn ih bungbelpawl cu a rei hlanah run thlĕn a si ding,› tiih thuphuangtu profetpawlih ṭawngkampawl cu ngaithla hlah uh; ziangahtile nan hnenah thuphan an phuang a si. 17 Anmah cu ngaithla hlah uh; Babilon siangpahrang rian uhla nung uh! Ziangahso maw hi khawpi cu a siat ding? 18 Asinan anmah cu profet an si ih, Jehovah kamsuakthu cu an hnenih a um asile, Jehovah inn sung, Judah siangpahrang inn sung le Jerusalem ih tān ta mi bungbelpawl cu Babilon ih thiar tel lo dingin, atu ah Jehovah hnenah thlacam hai seh.

19–20 «Ziangahtile ralkap rualpawlih Jehovah in ṭhuampawl thuhla, tikuangpi thuhla, atohkālpawl thuhla le Judah siangpahrang Jehoiakim fapa Jekoniah le Judah le Jerusalem mizahum hmuahhmuah Jerusalem ihsin Babilon ah ralkaih ih a hruai ṭum ih hi khawpi sungih tān ta mi bungbel thuhla cu hitin a sim, 21 a si, Jehovah inn sung le Judah siangpahrang inn sung le Jerusalem ih rung tâng bungbelpawl thuhla ah ralkap rualpawlih Jehovah, Israel Pathian cun hitin a ti: 22 Cupawl cu Babilon ih thiar an si pei ih, cu tawkah ka vehvai hai hlanlo an um ding. Cuihhnu ah ka run keng hai ding ih, hi hmun ah ka ret hai leh ding, Jehovah in a ti,» tiin.

27:19-20a tohkālpawl: Dar ih tuah mi, dar cawhtawlh hunnak; 2San 4:6 ah cun Meiur Thilhlăn khawlhfainak ah an hmang. 1Sp 7:27-39 hi a simfiangnak a si.

28

Hananiah in Jeremiah a Do ih a Thi

1 Cule cuih kum thotho ah, Judah siangpahrang Zedekiah a lal thăwkpek, a kum litnak, thla ngatnak ah hitin a si, profet Hananiah, Azur fapa, Gibeon-mi cun puithiampawl le mipi zate mithmuhah, Jehovah inn ah ka hnenah thu a sim ih, 2 «Ralkap rualpawlih Jehovah, Israel Pathian cun hitin a ti: Babilon siangpahrang-ih hngawngkol ka khiak zo. 3 Kum hnih pumhlum sungah Jehovah inn ih bungbel hmuahhmuah cu Babilon siangpahrang Nebukhadnezzar in hi hmun ihsin a lâk ih Babilon ih a thiar mi hmuahhmuah kha, hi hmun ah hin ka run thlĕnkir ding. 4 Cule Judah siangpahrang Jehoiakim fapa Jekoniah le Babilon ih feh Judah ralkaih hmuahhmuah cu ka hruaisal leh ding; ziangahtile Babilon siangpahrang hngawngkol cu ka tisiat ding, Jehovah in a ti,» tiin.

5 Cun profet Jeremiah in puithiampawl le Jehovah inn hmaiih ding mipi zate hmaiah profet Hananiah hnenah thu a sim ih, 6 profet Jeremiah in, «Amen! Jehovah in cuticun tuah seh; Jehovah inn ih bungbelpawl le ralkaih ih hruaihloh mi hmuahmuah Babilon ihsi hi hmun ih run thlensal dingih na phuan mi na kamsuakthupawl cu Jehovah in famkimter seh. 7 Cutisikhalsehla na hna theih le mipi zate hnatheihih ka sim mi hi kamsuakthu cu atu ah ngaihthla aw. 8 Keimah le nangmah hlanih profetpawl cun tuan le mang ihsin ram tampi le lalram ropipawl parah ral doawknak siseh, thil ṭhalo siseh, nathrisia thuhla siseh an rak phuang. 9 Profet, remnak thuphuangtu, cuih profet-ih kamsuakthu a thlenkim tikah, cuih profet cu Jehovah in a thlah rori a si ti theih a si pei cu,» tiah a ti.

10 Cun profet Hananiah in profet Jeremiah hngawng ih hngawngkol cu a laksak ih a tisiat. 11 Cule Hananiah in mipi zate mithmuhah hitin thu a sim, «Jehovah in hitin a ti: Babilon siangpahrang Nebukhadnezzar hngawngkol cu hitivekin, kum hnih pumhlum sungah miphun hmuahhmuah hngawng ihsin ka tisiat ding,» tiin. Cule profet Jeremiah in a fehsan.

12 Cun profet Hananiah cun profet Jeremiah hngawng ihsin hngawngkol a tisiat hnuah, Jehovah kamsuakthu cu Jeremiah hnenah hitin a thleng, 13 «Hananiah hnenah feh awla, hitin sim aw, ‹Jehovah in hitin a ti: Thing hngawngkol na tisiat zo, asinan a airawlin thir hngawngkol na rak tuah. 14 Ziangahtile ralkap rualpawlih Jehovah, Israel Pathian in hitin a ti: Babilon siangpahrang Nebukhadnezzar an rĕn theinak dingah hi miphun hmuahhmuah ih hngawng ah thir hngawngkol ka bât hai; cule amah an rian ding. Ramsapawl tiangin amah ka pe a si,› a ti,» tiin.

15 Cun profet Jeremiah in profet Hananiah hnenah, «Atu ah ngaithla aw, Hananiah; Jehovah in a lo thlah lo, hi minungpawl hi thuphan na rinsanter hai men sawn a si. 16 Curuangah Jehovah in hitin a ti: ‹Ngai hnik, leilung vangdâp ihsin ka lo hlăwn ding. Tuih kum ah na thi ding, ziangruangahtile Jehovah dokalhin helnak na rak zirh,› » tiah a ti.

17 Cule cuih kum a thla sarihnak ah profet Hananiah cu a thi.

29

Ralkaih Babilon-mipawl hnenih Jeremiah Cakuat

1 Cule Nebukhadnezzar in Jerusalem ihsin Babilon ih a rak hruai mi a dang ralkaih upapawl, puithiampawl, profetpawl, mipi hmuahhmuah hnenah profet Jeremiah in Jerusalem ihsin ca a kuat mi ṭawngkampawl cu hipawl hi an si. 2 Himi cu siangpahrang Jekoniah, siangpahrang bawinu, bawipawl, Judah le Jerusalem uktupawl, zungthiampawl le soserthiampawl in Jerusalem an suahsan hnuih thil cang mi a si. 3 Judah siangpahrang Zedekiah in Babilon ah Babilon siangpahrang Nebukhanezzar hnenih a thlah mi Shafan fapa Elasah le Hilkiah fapa Gemariah kut in a kuat mi cu,

4 «Ralkap rualpawlih Jehovah, Israel Pathian in ralkaih mi hmuahhmuah, Jerusalem ihsin Babilon ih ka hruaihlohter hai mipawl hnenah hitin a ti: 5 innpawl tla sak uhla, cêng uh; hmuanpawl tla tuah uhla, a rah ei uh. 6 Nupi ṭhi uhla, fapa le fanu tla hring uh; cule fapa le fanu an neih theinak dingah nan fapapawl hrangah nupi ṭhi uhla nan fanupawl cu pasal neiter uh, cutin ṭumsuk hlah uhla, karhzai uh. 7 Cule ralkaih ih hruaihloh ka lo siternak khawpi hamṭhatnak ding hawl uhla, a hrangah Jehovah hnenah thlacam uh; ziangahtile a hamṭhatnak ah hamṭhatnak nan hmu ding. 8 Ziangahtile ralkap rualpawlih Jehovah, Israel Pathian in hitin a ti: nan lakih um profetpawl le tinzohthiampawl in lo bum hlah hai sehla, mang nei dingih tha nan pek mipawlih mang khal ngaithla hlah uh. 9 Ziangahtile nan hnenah ka hmin in diklo zetin thu an phuang a si; annih cu ka thlah hai lo, Jehovah in a ti.

10 «Ziangahtile Jehovah in hitin a ti: Babilon hrangah kum 70 a kim tikah ka lo vehvai ding ih, nanmah lamih ka kamsuakthu ṭha cu ka tuahsuak ding, cule hi hmun ah ka lo kirter ding. 11 Ziangahtile nanmah hrangih ka ruah mi khawruahnak cu ka thei, hmakhua le ruahsannak lo pe dingin, khawruahnak ṭhalo si loin hamṭhatnak khawruahnak sawn a si, Jehovah in a ti. 12 Cun nannih in in ko ding, nan ra ding ih ka hnenah thla nan cam ding, cule kei in ka lo ngaithla ding. 13 Cule nannih in in hawl ding, nan thinlung zateih in hawl tikah in hmu ding. 14 Nannih in in hmu ding, Jehovah in a ti, cule nan vanneihnak hmuahhmuah ka lo pekirsal ding; ka lo dawisuahnak miphun hmuahhmuah le hmun hmuahhmuah ihsin ka lo khawm ding, Jehovah in a ti, cule ralkaih ih hruaihloh ka lo siternak hmun ah khan ka lo hruaikirsal ding.

15 «Ziangruangahtile nannih in, ‹Jehovah in Babilon ah kan hrangah profetpawl in tundinsak,› tiah nan ti. 16 Curuangah David laltokham parih to siangpahrang thuhla ah le nan unau nan zawngih sáltannak ih feh lo hi khawpi ih a cêng mi hmuahhmuah thuhla ah Jehovah in hitin a ti; 17 ralkap rualpawlih Jehovah in hitin a ti: ngai hnik, an parah ralnâm, mangṭam le nathrisia ka thlah ding ih, ei theih lo mi theipi rah ṭăwt, se zet vekah ka tuah hai ding. 18 Cule ralnâm, mangṭam le nathrisia thawn ka dawi hai ding, cule leilung lalram hmuahhmuah ah harsatnak pe dingah, camsiatnak si dingah, mak ti dingah, sisio dingah le ka dawisuah hainak miphun hmuahhmuah lakih hmuahsuam dingah anmah cu ka pe ding. 19 Ziangruangahtile ka siahhlawh profetpawl hmangih ka thlah leuhleuh mi ka kamsuakthu an rak ngaithla lo, Jehovah in a ti, nan rak ngaithla duh lo, tiah Jehovah in a ti. 20 Curuangah nannih Jerusalem ihsin Babilon ih ka kuat mi sáltang nan zaten Jehovah kamsuakthu hi ngaithla uh.

21 «Ralkap rualpawlih Jehovah, Israel Pathian cun Kolaiah fapa Ahab le Maaseiah fapa Zedekiah, ka hmin ih thuphan nan hnenih phuangtu thuhla ah hitin a ti: Ngai hnik uh, Babilon siangpahrang Nebukhadnezzar kut ah anmah cu ka pe ding ih, nan mithmuhah anih in a satthat hai ding. 22 Cule anmah ruangah Babilon ram ih sáltang Judah-mi hmuahhmuah in, ‹Babilon siangpahrang in mei ih a rawh mi Zedekiah le Ahab vekin Jehovah in na parah ti seh,› ti hi camsiatawknak ah an hmang ding; 23 Israel ram ah thil atthlak an tuah ih, an innhnen nupi lakah an uire, thu ka rak pek hai lo mi cu ka hmin in thuphan an sim, keimah cu a theitu le thutheihpitu ka si, Jehovah in a ti,» tiin.

24 «Nehelam-mi Shemaiah hnen khalah hitin sim aw, 25 Ralkap rualpawlih Jehovah, Israel Pathian in hitin a ti, Jerusalem ih um mi hmuahhmuah hnen, puithiam Maaseiah fapa Zefaniah hnen le puithiam hmuahhmuah hnenah na hmin in hitin ca na kuat, 26 «Nangmah cu thuphuangtu mi-â pauhpauh parah Jehovah inn ih uktu si dingin, Jehovah in puithiam Jehoiada aiah puithiam ah a lo tuah. Cumi cu amah cu hrengsut ding le thir kol bŭn dingah a si. 27 Atu ah ziangahso na hnenih thuphuang Anathoth-mi profet Jeremiah cu na kawk lo? 28 Ziangahtile anih cun kan hnenah Babilon ah, ‹Hi sáltannak cu a rei ding, innpawl tla sak uhla, cêng uh, cule hmuanpawl tuah uhla, a rah ei uh,› tiin thu in cah,» tiin.

29 Cule puithiam Zefaniah in profet Jeremiah hnatheihah hi cakuat cu a siar. 30 Cun Jehovah kamsuakthu cu Jeremiah hnenah hitin a thleng, 31 «Sáltang hmuahhmuah hnenah Nehelam-mi Shemaiah thuhla ah Jehovah in hitin a ti: amah cu ka thlah lo, Shemaiah in nan hnenah thu a rak phuang ih, thuphan a lo rinsanter. 32 Curuangah Jehovah in hitin a ti: ngai hnik uh, Nehelam-mi Shemaiah le a cithlahpawl cu dān ka tat hai ding. Hi minungpawl lakih cêngtu ding mi pakhat hman a nei lo ding ih, ka mipawl parih ka tuah ding mi thil ṭha a hmu lo ding, ziangruangahtile Jehovah dokalhin helnak a rak zirh, Jehovah in a ti,» tiin.

30

Israel le Judah Tundinsal ding Tiamkamnak

1 Jeremiah hnenih Jehovah kamsuakthu rung thleng cu hitin a si, 2 «Israel-ih Pathian Jehovah cun hitin a sim: Na hnenih ka sim mi kamsuakthu hmuahhmuah kha cazual sungah ngan aw. 3 Ziangahtile ngai hnik, Jehovah in a ti, ka mi Israel le Judah hnenih vanneihnak ka peksal ding ni cu a thleng rero a si. Cule an pupápawl hnenih ka pek mi ram ah ka hruaikirsal hai ding ih, cumi cu an nei ding, Jehovah in a ti,» tiin.

4 Cule Israel le Judah thuhla ih Jehovah ih sim mi kamsuakthupawl cu hipawl hi an si.

5 «Jehovah in hitin a ti:
Ṭih le thlaphan authâwm kan thei,
Hnangamdaihnak a um lo.
6 Atu ah sut uhla, ruat hnik uh, mipa in nau a vei dah maw?
Ziangahso nunau nau vei bangih mipa kip in an kut in an tâi an dăwm ih,
An hmai hmuahhmuah râm ṭheh ih ka hmuh?
7 Ai maw! Cuih ni cu a va rapthlak ve, cuvek a um dah kêl lo;
Cumi cu Jakob-ih harsatnak tikcucān a si,
Asinan anih cu cumi ihta runsuah a si ding.

8 «Ziangahtile cuih ni ah hitin a si ding, ralkap rualpawlih Jehovah in a ti, na hngawng ihsin a hngawngkol ka khiak ding ih, na hripawl ka catter ding. Cule ram dang mipawl in anmah cu sál ah an tuah hai nawn lo ding. 9 Jehovah an Pathian le an hrangih ka tundīn ding mi an siangpahrang David an rian sawn ding.

10 «Curuangah ka siahhlawh Maw Jakob ṭih hlah, Jehovah in a ti, thlaphâng fawn hlah, Maw Israel;
Ziangahtile ngai hnik, ram hlapi ihta ka lo runsuak ding ih,
An ralkaihnak ihsin na cithlahpawl cu.
Jakob cu a kirsal ding ih cawlhahdam le ralmuangin a um ding,
Cule zohman in an thlaphangter lo ding.
11 Ziangahtile lo run dingah ka lo umpi a si, Jehovah in a ti.
Ka lo dawiṭeknak miphun hmuahhmuah cu ka cemter thluh hai ding,
Asinan nang cu ka lo cemter thluh lo ding ih,
Dik zetin ka lo rĕm ding,
Cule dāntat loin ka lo suah lo ding.
12 «Ziangahtile Jehovah in hitin a ti:
Na hma cu tidam theih a si lo,
Na hriamhma cu a bese tuk.
13 Na damlonak thuhla ah na thuhla lo dil saktu zohman an um lo;
Na hrangah damnak a um lo.
14 Na duh mipawl hmuahhmuah in an lo hngilh, an lo hawl lo;
Ziangahtile doral hriamhma le
Minunrâwng nunsimnak thawn ka lo tuahmawh a si,
Ziangahtile na mawhsualnak a nasatuk ih, na sualpawl a tam tuk.
15 Ziangahso na hriamhma ruangah na ṭah?
Na natnak cu tidam theih a si lo
Na mawhsualnak a nasatuk ih, na sualpawl a tam tuk ruangah,
Na parah hi thilpawl hi ka tuah a si.
16 Curuangah nangmah a lo dawlhtu hmuahhmuah cu dawlh an si ve ding ih,
Na doral hmuahhmuah, an zaten ralkaih ah an feh ding;
A lo rămtupawl cu răm an si ding ih,
A lo răwktu hmuahhmuah cu răwk mi ah ka tuah hai ding.
17 Ziangahtile harhdamnak ka lo pesal ding ih,
Na hriamhma ka lo tidam ding, Jehovah in a ti;
Ziangruangahtile ‹Hihi Zion cu a si, zohman in an hawl lo,› tiin
Nang cu hnawn mi tiah an lo ko.
18 «Jehovah in hitin a ti:
Ngai hnik, Jakob-ih puanthlam vanneihnak cu ka pekirsal leh ding ih,
A cēnnak hmunpawl parah zahngaihnak ka nei ding.
Khawpi cu mual parah dĭn a si ding ih,
Siangpahrang inn cu a umnak ding hmun ah a um ding.
19 Cupawl ihsin lungawi thu simnak le hlipárnak tuahtupawlih aw a thangsuak ding;
Anmah ka karhter ding ih,
An ṭumsuk lo ding;
Ka sunlawih hai fawn ding ih,
Mi málte an si lo ding.
20 An falepawl khal a hlan vekin an si ding ih,
An mipi-umkhawm cu ka hmaika-ah dĭnhnget an si ding,
Cule anmah palbĕttu hmuahhmuah dān ka tat hai ding.
21 An mizahum cu anmah lakih mi a si ding ih,
An uktu cu an lak ihsin a suak ding;
Cun amah cu ka kiangah ka run hruai ding ih,
Anih in i pan ding;
Ziangahtile zo so keimah pan dingih a nunnak hloh ngam? tiin Jehovah in a ti.
22 Nannih cu ka mi nan si ding ih,
Kei cu nan Pathian ka si ding,» tiin.
23 Ngai hnik uh, Jehovah phusîng cu!
Thinsonak cu a fehsuak,
Semhlotu thlipi cu,
Misualrálpawl lu cu nasazetin a nuai ding.
24 A thinlung ih tumtah mi a tuahsuak hlanlo le a hlĕnsuak hlanlo,
Jehovah thinhengnak nasazet cu a lamlêt lo ding.
Ni neta ah cumi cu nan theithiam leh ding.

31

Jehovah in Ṭahnak kha Aipuannak ah a Cangter Ding

1 «Cuih cān ah cun Israel hrin hmuahhmuah ih Pathian ka si ding ih, anmah cu ka minung an si ding, Jehovah in a ti.»

2 Jehovah in hitin a ti:

«Ralnâm ih thah hrelh mipawl cun
Israel in cawlhhahdamnak a hawl lai vek khan
Ramṭhing ah zangfahnak an hmu.
3 Hlapi ihsin ka hnenih rung lang Jehovah in hitin a ti,
A si, kumkhaw duhdawtnak in ka lo duhdawt;
Curuangah lainatduhdawtnak in ka lo hruai a si.
4 Ka lo dinṭha lehsal ding ih, dinṭhat na si ding,
Maw Israel fala him!
Na khuangtepawl na thing lehsal ding ih,
Lungawiaipuangih lāmpawl hnenah na pawk ve ding.
5 Samaria tlangpawl ah sabit hripawl tla na cīng ding;
A cīngtupawl in an phun ding ih, a rah cu an lungawipit ding.
6 Ziangahtile Efraim Tlang ah ralvengtupawl in
‹Tho uhla, Jehovah kan Pathian hnenah feh uhsi,› tiih an au ni a thleng leh ding,» tiin.

7 Ziangahtile Jehovah in hitin a ti:

«Jakob hrangah lungawiin hla sak uhla,
Miphunpawlih lubânpawl lakah au uh;
Phuang uh, thangṭhat uhla,
‹Maw Jehovah, Israel tangsŭn, na minungpawl runsuak aw!› tiin ti uh.
8 Ngai hnik, sak lam ram ihsin ka hruai hai ding ih,
Leilung dĕng ihta ka fĭnkhawm hai ding,
Cupawl lakah mitcaw le kebái,
Nunau nau pai le
Fahrinnat tuar rero lai an um;
Cu tawkah mipungkhawm tumpi an ra kir ding.
9 Ṭap phahin an ra ding ih,
Ka hruai hai laiah thla an cam ding.
Tiva kapah ka fehter hai ding,
An bahlonak ding a dĭng mi lamzin ah cun;
Ziangahtile keimah cu Israel-ih Pa ka si ih,
Efraim cu ka fatir a si.
10 «Maw nannih miphunpawl, Jehovah kamsuakthu hi ngaithla uhla,
A hla zet mi tipi kap tluanah thăn uh,
‹Israel ṭekdarhtertu in amah cu a fĭnkhawm leh ding ih,
Tuukhāltu in a rante rual a kilhim bangin a kilhim ding,› tiah ti uh.
11 Ziangahtile Jehovah in Jakob a runsuak ih,
Amah hnakih caksawn kut ihsin a tlen.
12 Curuangah Zion Tlang parah an ra ding ih hla an sak ding,
Jehovah ṭhatnak ah cun an êngza ding,
Sangvut le sabitzu thar le hriak ruangah,
Rante rual le ranpi rual fātepawl ruangah;
An nunnak cu hmuan ti tawih mi vek a si ding ih,
An riah a sia nawn hrimhrim lo ding.
13 Cun fala him cu lāmnak ah lungawiaipuangin a um ding ih,
Tlangvalpawl le tar khal hmunkhatah;
Ziangahtile an lungsiatnak cu aipuannak ah cangterin ka hnem hai ding,
Cule an riahsiatnak ihsin lungawiaipuang ko ka tuah hai ding.
14 Puithiampawlih nunnak cu sathau in ka tlăiter hai ding ih,
Ka minungpawl cu ka ṭhatnak thawn an di a riam ding, Jehovah in a ti,» tiin.

15 Jehovah in hitin a ti:

«Ramah ah aw theih a si,
Mithiṭah le nasazetih ṭahnak,
Rachel in a falepawl a ṭah,
A fale an um nawn lo ruangah
Hnĕm theih khal a si lo,» tiin.

16 Jehovah in hitin a ti:

«Ṭahnak ihsin na aw sūp awla,
Mitthli lak ihsin na mit;
Ziangahtile na hnaṭuan cu lawmman pek a si ding, Jehovah in a ti,
Cule ral ram ihsin an ra tlungkir ding.
17 Nan hmakhua ruahsan ding a um, Jehovah in a ti, nan falepawl tla anmai ram ah an kirsal ding.
18 Efraim ṭah aw ka thei rori:
‹Kei cu nunsim ka si,
Câwpa no săwizawi lo vekin, nang in nun i rak sim;
I lamlêtter awla, ka lamlêt ding,
Ziangahtile nang cu Jehovah ka Pathian na si.
19 Thungaiten, ka sirawk hnuah ka lung ka thleng;
Cule nun zirh ka si hnuah ka cāwnpi ka cumaw;
Ka ning a zak, a si, ningzahter ka si,
Ziangruangahtile ka no laiih mualphonak ka tuar a si,› tiin.
20 Efraim cu ka fapa duh a si maw?
Amah cu duhnungza fa a si maw?
Ziangahtile amah dokalhin ṭawng khal ningla,
Amah cu ka cîng thotho;
Curuangah ka thinlung in amah cu a ngai;
A parah zahngainak ka nei hrimhrim ding, Jehovah in a ti.
21 «Lamzin hminsinnak tuah aw,
Ramri tuah aw;
Na fehnak lamzin,
Zinpi lamah na thinlung ret aw.
Maw Israel fala him, ra kir aw,
Hih na khawpipawl ah hin kirsal aw.
22 Maw nang dungtawlh fanu,
Ziang tik tiang so na tawihvah hrih ding?
Ziangahtile Jehovah in leilung ah thil thar a rak tuah,
Nunau in mipa a hum ding,» tiin.

23 Ralkap rualpawlih Jehovah, Israel Pathian in hitin a ti: «An vanneihnak ka pekkirsal hai tikah Judah ram le a khawpipawl ah hivek ṭawngkam hi an hmang lehsal ding: ‹Maw diknak umnak hmun, tlang thianghlim, Jehovah in lo thlawsuah seh,› tiin! 24 Cule cu tawkah Judah-mipawl le a khawpi ih mi hmuahhmuah cu an umkhawm ding, lóthlopawl le rante rual thawi fehsuakpawl thawn. 25 Ziangahtile a caupawl ka tlăiter hai ih, lungsia pauhpauh ka hlipárter hai. 26 Cuihhnu ah ka ṭhangharh ih ka zohkûal, cule ka ihthah a thaw zet.

27 «Ngai hnik, Israel sungza le Judah sungza ah milai ci le ramsa ci ka tuh cān a thleng ding, Jehovah in a ti. 28 Cule hitin a si ding, anmah phawi ding, khuai ding, hlăwn ding le siatsuah ding, zawnzaiter dingih ka tawlrel vekin, anmah tungding dingin le phun dingin ka tawlrel ding, Jehovah in a ti. 29 Cuih cān ah cun,

‹Palepawl in sabit thûr an ei ih, falepawlih ha a ṭim,›

an ti nawn lo ding.

30 Asinan mi kip anmai mawhsualnak an thihpi ding; sabit thûr ei pauhpauh an ha a ṭim ding.

Thukham Thar

31 «Ngai hnik, Israel sungza le Judah sungza thawi thukham thar ka tuah ding cān a thleng zik thlang, Jehovah in a ti, 32 Izip ram ihsin kut in ka hruaisuah hai laiih an pupápawl thawi ka tuah mi thukham, an pasal ka si ko na cingih an rak pahbăl mi ka thukham vek si lo, Jehovah in a ti. 33 Himi hi, cumi hnuih anmah thawi ka tuah ding mi thukham cu a si, Bawipa in a ti: an thinlung ah ka Dānpawl ka ret ding ih, cupawl cu an ruahnak ah ka ngan ding. 34 Mi kip in, ‹Jehovah thei aw,› tiin anmai innhnen le an unau an zirh nawn lo ding, ziangahtile an lakih a tebik ihsin a tumbik tiangin an zaten keimah in thei ding, Jehovah in a ti. Ziangahtile an mawhsualnak ka ngaidam hai ding ih, an sual ka cîng nawn lo ding,» tiin.

35 Sun ih tleu dingah ni petu,
Zan ih vâng dingah arsipawl le thlapi hrangih dān hnget ruattu,
Tifinriat ṭhentu le
A tisuarpawl awn humhotertu Jehovah in hitin a ti,
A hmin cu ralkap rualpawlih Jehovah a si.
36 Hi dān hnget hi ka hmaika ihsin a hlorál asile,
Israel ci cu miphun pakhat sinak ihsin ka hmaika ihsin a hlorál kumkhua ve ding, Jehovah in a ti.

37 Jehovah in hitin a ti,

«Tlun lam van tah theih a si ih,
Hnuai lam leilung lungphumpawl hawlsuah theih asile,
An thil ti mipawl hmuahhmuah ruangah
Israel ci hmuahhmuah khal ka hlăwnhlo ding, Jehovah in a ti,» tiin.

38 «Ngai hnik uh, hi khawpi cu Hananel Dawlsâng ihsin Kil Kăwtka tiang Jehovah hrangih sakṭhat leh ding cān a thleng leh ding, Jehovah in a ti. 39 A tahnak hri cu Gareb tlangmual tlun tiangin dĭngten a thleng ding; cun Goah lamah a kâwi ding. 40 Cule mithi ruangpawl le vutcâm paihnak phaikuam pumpi le hramlak hmuahhmuah, Kidron Tivate tiang, nisuahnak lamih Ráng Kăwt kil tiangin Jehovah hrangah a thianghlim ding. Cumi cu kumkhuain phawi le hlăwnthlak a si nawn lo ding,» tiin.

32

Jeremiah in Ló a Lei

1 Judah siangpahrang Zedekiah a lal a kum hratnak, Nebukhadnezzar a lal a kum hleiriatnak ah, Jehovah hnen ihsin Jeremiah hnenih rung thleng kamsuakthu. 2 Cu laiah cun Babilon siangpahrangih ralkappawl in Jerusalem an kulhkhŭm ih, profet Jeremiah cu Judah siangpahrang inn kulh sungih um kiltupawl umnak hmun ah kharkhum a si. 3 Ziangahtile Judah siangpahrang Zedekiah in amah cu a kharkhum ih, «Nang in, ‹Jehovah in hitin a ti: Ngai hnik uh, hi khawpi cu Babilon siangpahrang kut ah ka pe ding ih, anih in cumi cu a la ding; 4 cule Judah siangpahrang Zedekiah cu Kaldia-mipawl kut ihsin a tlânsuak lo ding, cuhnakin Babilon siangpahrang kut ah pek a si hrimhrim sawn ding ih, amah thawn hmaităwnin an beaw ding; 5 cun anih in Babilon ah Zedekiah cu a hruai ding ih, anih cu ka veh hlanlo cu tawkah a um ding. Kaldia-mipawl cu do khal awla, na hlawhtling cuang lo ding, Jehovah in a ti,› tiah ziangah saw thu na phuan?» tiah a sut.

6 Cule Jeremiah in, «Jehovah kamsuakthu cu ka hnenah a thleng, 7 ‹Ngai hnik, na paseu Shallum fapa Hanamel cu, «Anathoth khua ih ka ló kha nangmai hrangah lei aw, ziangahtile nangmah cu lei ih tlennak tuah dingin thuneihnak na nei,» tiin na hnenah a ra ding. 8 Cun ka paseu fapa Hanamel cu Jehovah kamsuakthu bangtukin kiltupawl umnak hmun ka hnenah a ra ih, «Zangfahten Benjamin ram Anathoth ih ka ló i lei aw; ziangahtile ro ih co ding le tlen ding thuneihnak cu nangmai ta a si; cumi cu nangmai hrangah lei aw,» tiah i ti,› tiin. Cun himi cu Jehovah kamsuakthu a si ti ka thei.

9 «Cule ka paseu fapa Hanamel hnen ihsin Anathoth ih um a ló cu ka lei ih, a hrangah ngun tangka shekel hleisarih cuai an thlai. 10 Cule cahnah parah ka hmin ka ṭhu ih ka erhpit, cule theihpitu dingah mi ka ko ih, tangka cu cuaithlainak ah ka thlai. 11 Cun leiawknak cahnahpawl, thupek le nunphung dān ngannak erhpit mi le erhpit lo mi cu ka la; 12 cule leiawknak cahnah cu ka paseu fapa Hanamel hmaika le leiawknak cahnah parih hmin ṭhut theihpitu mit hmuh, kiltupawl umnak hmun ih to Judah-mi hmuahhmuah mithmuhah Mahseiah fapa Neriah fapa Baruk hnenah ka pe.

13 «Cun an mithmuhah Baruk cu, 14 ‹Ralkap rualpawlih Jehovah, Israel Pathian in hitin a ti: «Hih cahnahpawl, erhpit mi le erhpit lo mi leiawknak cahnah cu la awla, ni reipi daih dingin leibel sungah ret aw,» tiin. 15 Ziangahtile ralkap rualpawlih Jehovah, Israel Pathian in hitin a ti; «Hi ram ah innpawl, lópawl le sabit hmuanpawl cu neihsal a si ding,» tiin,› thu a pe.

Jeremiah in Theihthiamnak hrangah Thla a Cam

16 «Neriah fapa Baruk hnenah leiawknak ca ka pek hnuah Jehovah hnenah thla ka cam ih, 17 ‹Ai law, Bawipa Jehovah! Ngai hnik, na huham maksak le na bân suah mi in vanpawl le leilung na tuah. Na hrangah thil har tuk ti a um lo. 18 Maw Pathian ropi le cak, mi thawng tampi hnenah lainatduhdawtnak na langter ih, pupápawlih mawhsualnak cu an falepawlih ṭāng sungah na lehrūl, ralkap rualpawlih Jehovah cu a hmin a si. 19 Thurawnpeknak ih ropi le hnaṭuannak ih cak, minung fapapawlih lamzin hmuahhmuah zohtu, mi kip anmai nundān bangtuk le an thil ti rah bangtukih petu a si. 20 Izip ram ah hminsinnakpawl le mangbangzapawl na tuah, tuihni tiangin Israel le minungpawl lakah tuihni ihta vekin nangmai hrangah hmin na tuah. 21 Izip ram ihsin na mi Israel cu hminsinnakpawl le mangbangzapawl thawn, kut cak le bân suahnak thawn le ṭihnungza nasazet thawn na hruaisuak hai; 22 an pupápawl hnenah pe dingih sia na săm mi hi ram «hnawi le khuaitizu luannak ram» cu anmah na pe. 23 Cule an lut ih cuih ram cu an nei, asinan na aw an ngaithla lo ih, na dān an zawh lo. Tuah dingih thu na pek hai mi pakhat hman an tuah lo; curuangah hi vansiatnak hmuahhmuah hi an parah thleng dingin na tuah.

24 ‹Zoh hnik, khawpi la dingih an lei sunpâwng mi cun khawpi a can thlang; cule ralnâm, mangṭam le nathrisia ruangah khawpi cu a dotu Kaldia-mipawl hnenih pek a si zo. Na rak sim mi cu a thleng; ngai hnik, cumi cu na hmu! 25 Cule Maw Bawipa Jehovah, khawpi cu Kaldia-mipawl kut ah pek si cingin, «Tangka in ló cu lei awla, theihpitu la aw,» tiah ka hnenah i ti thotho,› tiin,» tiah a ti.

26 Cun Jehovah kamsuakthu cu Jeremiah hnenah hitin a thleng, 27 «Ngai hnik, keimah cu titsa hmuahhmuah ih Pathian Jehovah ka si. Ka hrangah thil harsa tuk a um maw? 28 Curuangah Jehovah in hitin a ti: Ngai hnik, hi khawpi cu Kaldia-mipawl kut, Babilon siangpahrang Nebukhadnezzar kut ah ka pe ding ih, anih in cumi cu a lâk ding. 29 Cule hi khawpi dotu Kaldia-mipawl an ra lut ding ih, hi khawpi cu meisa in an ur ding ih a kāng ding, ka thinhengnak căwktho dingih Baal hnenih rimthaw an rak hlănnak le pathian dangpawl hnenih Inding Thilhlănpawl an tawihnak inn tlunrāwn nei innpawl thawn; 30 ziangruangahtile Israel tefapawl le Judah tefapawl cun an no lai ihsin ka mithmuhah thil ṭhalo lawng an rak tuah. Ziangahtile Israel tefapawl in an kut thil ti mi in thinheng ding lawngin in rak căwktho, Jehovah in a ti. 31 Ziangahtile hi khawpi hi an sak ni ihsin tuihni tiang ka thinhengnak le ka thinsonak căwkthotu a si; cutin cumi cu ka hmaika ihsin ka ṭhawnhlo ding, 32 thinheng ko in căwktho dingin an rak tuah mi thil ṭhalo hmuahhmuah ruangah Israel tefapawl le Judah tefapawl: anmah, an siangpahrangpawl, an bawipawl, an puithiampawl, an profetpawl, Judah pacangpawl le Jerusalem luahtupawl cu ka ṭhawnhlo hai ding. 33 Cule annih cun hmai in hawih loin dung in tun; zirh leuhleuhin, anmah ka zirh hai ko na cingin, nun zirhnak cohlang dingin an rak ngaithla lo. 34 Asinan ka hmin pu mi inn sungah bawrhbangter dingin an fihnunnakpawl an ret. 35 Cule Hinnom Fapa Phaikuam ih um mi Baal hmun sângpawl an dâwl, an fapapawl le an fanupawl cu Molek hnenah meisa an paltlăngter, cumi cu thu ka pek mi a si lo ih, Judah sual tuahter dingin hi thil fihnungza an tuah mi hi ka lungthin sung khalih um mi a si lo.

Ka Mi an Si Ding: An Pathian ka Si Ding

36 «Curuangah, ‹Babilon siangpahrang kut ah ralnâm, mangṭam le nathrisia hmangin pek a si,› nan ti mi hi khawpi thuhla ah atu ah Israel Pathian Jehovah in hitin a ti: 37 Ngai hnik uh, ka thinhengnak, ka thinsonak le thinlingnak nasazetin ka dawisuak hainak ram hmuahhmuah ihsin ka fĭnkhawm hai ding; hi hmun ah ka hruaikirsal hai ding ih, ralmuangin ka khawsater hai ding. 38 Annih cu ka mi an si ding ih, kei cu an Pathian ka si ding; 39 cun anmai ṭhatnak le an lehhnu ih an tefapawl ṭhatnak ding hrangah, kumkhuaih in ṭihzah theinak dingah thinlung pakhat le lamzin pakhat ka pe hai ding. 40 Cule an hrangih thil ṭha tuah ka ṭhulhlonak dingah anmah thawn kumkhaw thukham ka tuah ding; cule ka hnen ihsin an tlanlonak dingah an thinlung ah keimah ṭihzahnak ka ret ding. 41 A si, an hrang thil ṭha tuah cu ka lungawi zawng a si ding ih, ka thinlung hmuahhmuah le ka ruahnak hmuahhmuah in himi ram ah anmah cu ka phun tengteng hai ding.

42 «Ziangahtile Jehovah in hitin a ti: Hi mipi parah hi siatnak maksak hmuahhmuah ka thlenter vekin, anmah ka rak tiamkam mi thil ṭha hmuahhmuah an parah ka thlengter ding. 43 Cule, ‹Ramṭhing, Kaldia-mipawl kut ih pek zo, minung le ramsa umlonak,› nan ti mi ram ah lópawl tla an lei ding. 44 Benjamin ram ah, Jerusalem kiangkap hmunpawl ah, Judah khawpipawl ah, tlang ram khawpipawl ah, hmun niam khawpipawl ah le Negev hmun ih khawpipawl ah mi in tangka in ló an lei ding, hmin an ṭhu ding ih an erhpit ding, cule theihpitupawl tla an ko ding; ziangahtile an vanneihnak ka pekirsal hai ding, Jehovah in a ti,» tiin.

33

Dāntat hnuih Tidamnak

1 Cuihtlunah Jeremiah cu kiltupawl umnak hmun ih kharkhum a si laiah, a hnenah a vei hnihnak Jehovah kamsuakthu a thleng, 2 «A hmin Jehovah ti mi, aleilung sersiamtu Jehovah, dĭnhnget dingih sēmsuahtu Jehovah in hitin a ti: 3 I ko awla, ka lo sawn ding, cule na theih lo mi thil ropi le maksak ka lo hmuh ding.

33:2a leilung: Hebru Bible ah cun a um lo, asinan Jer 10:12; 51:15 sirhsanin leilung tinak a bang, Septuagint khalah leilung ti a si.

4 «Ziangahtile lei sunpâwng le ralnâm lak ihsin kilhimawknak hrangih an rak siatbăl mi Judah siangpahrangpawlih innpawl le hi khawpi innpawl thuhla ah Israel Pathian Jehovah in hitin a ti: 5 ‹Kaldia-mipawl do dingin an feksuak, asinan ka thinheng le ka thinso ih ka thah ding mi mithi ruangpawl in ka khatter ding, ziangahtile an sualralnak hmuahhmuah ruangah hi khawpi ihsin ka hmai ka thup a si. 6 Ngai hnik, a hrangah harhdamnak le tidamnak ka run keng ding; ka tidam hai ding ih, an hnenah hnangamdaihnak luangliam le thutak ka phuanglang ding. 7 Cule Judah vanneihnak le Israel vanneihnak ka pekirsal hai ding ih, cuih hmunpawl cu a hmaisa lai vekin an saksal ding. 8 Ka parih sual an rak tuah mi an mawhsualnak hmuahhmuah lak ihsin ka thianfai hai ding ih, sual an rak tuah mi le ka parih dān an pahbălnak an mawhsualnak hmuahhmuah ka ngaithiam hai ding. 9 Cule thil ṭha hlir ka tuahsak mi leilung miphunpawl hmuahhmuah hmaika-ah ka hrangah cumi cu aipuannak hmin, thangṭhatnak le sunlawinak a si ding; a hrangih ka rak pek mi thil ṭha hmuahhmuah le hmuingilnak hmuahhmuah ruangah an ṭih ding ih an khūr ding,› tiin.

10 «Jehovah in hitin a ti: ‹Minung le ramsa um loin a lawnglak,› tiih nan ti mi Judah khawpipawl le minung um loin, luahtu um loin le ramsa um loih ṭhing reprepnak hi hmun Jerusalem kăwtthler ah, 11 aipuang aw le lungawi aw, mo neitu aw le mo aw le,

‹Ralkap rualpawlih Jehovah cu thangṭhat uh,
Ziangahtile Jehovah cu a ṭha,
Ziangahtile a zahngainak cu kumkhuain a hmun,›

tiih titu dingpawlih aw le Jehovah inn sungih thangṭhatnak thawinak kengtu dingpawlih aw a um leh ding. Ziangahtile a hmaisa vekin ram cu ka umtersal ding, Jehovah in a ti.

12 «Ralkap rualpawlih Jehovah in hitin a ti: ‹Minung le ramsa um lo ih a lawnglak mi hi hmun ah le a khuapawl hmuahhmuah ah an rante rual kûaltertu rankhāltupawlih cēnnak hmun a um leh ding. 13 Tlang ram khawpipawl ah, hmun niam khawpipawl ah, Negev khawpipawl ah, Benjamin ram ah, Jerusalem kiangkap hmunrampawl ah le Judah khawpipawl ah ran hruangkulh sungih rante rual an luh tikah rankhāltupawl in an siar leh ding, Jehovah in a ti,› tiin.

A Dingfel Mi Hnge le David thawi Thukham

14 «Ngai hnik, Israel sungza le Judah sungza parih ka rak tiamkam mi cuih thil ṭha ka tuahsuak ding cān a thleng rero thlang, Jehovah in a ti:

15 ‹Cuih cān le cuih tikcu ah,
Dingfelnak Hnge cu
David hrangah ka ṭhangter ding;
Anih cun leilung ah thuṭhennak le dingfelnak in ro a rel ding.
16 Cuih cān ah Judah cu runhim a si ding ih,
Jerusalem cu ralmuangin a um ding.
Cule KAN DINGFELNAK JEHOVAH ti cu amah an kawhnak hmin a si ding,› tiin.

17 «Ziangahtile Jehovah in hitin a ti: David in Israel sungza laltokham parih to a tlasam dah lo ding; 18 puithiampawl, Levi-mipawl in ka hmaika-ah Meiur Thilhlănpawl hlantu ding, Thlairawl Thilhlănpawl urtu ding le catbang loih raithawitu ding milai an tlasam dah lo ding,» tiin.

19 Cule Jeremiah hnenah Jehovah kamsuakthu a thleng, 20 «Jehovah in hitin a ti: Anmai tikcucān teah sun le zan um lo dingin, sun thawi ka thukham le zan thawi ka thukham nan ṭhiatbăl thei asile, 21 a laltokham parih uktu ding fapa a neihlonak dingah le ka hmaika-ih rawngbawl dingin Levi-mi puithiampawl a neihlonak dingah ka siahhlawh David thawi ka thukham khal ṭhiahbăl a si ve ding. 22 Van ih thilmak rual siar cawk an si lo vek le tifinriat vunnel tah cawk an si lo vekin, ka siahhlawh David tesinfapawl le i riantu Levi-mipawl khal ka karhzaiter hai ding,» tiin.

23 Cuihtlunah Jeremiah hnenah Jehovah kamsuakthu a thleng, 24 «Hi minungpawl in, ‹Jehovah in a hril mi sungkua pahnih, amah in a hlăwnhlo,› tiih an ti mi cu na rak ruat dah lo maw si?» tiin. Cutivekin an hmaika-ah miphun pakhat si nawn lo vekin, annih in ka mipawl an rak hmuhsuam.

25 Jehovah in hitin a ti, «Sun le zan thawn ka thukham tuah mi a hnget lo ih, van le leilung dān ka tihnget lo asile, 26 Jakob le ka siahhlawh David tesinfapawl ka dawihlo ding, cutin Abraham, Isak le Jakob tesinfapawl tlunih uktu dingah amai tesinfapawl lak ihsin pakhat hman ka la lo ding. Asinan an vanneihnak ka pekirsal hai ding ih, an parah zahngainak ka nei ding,» tiin.

34

Babilon ah Zedekiah a Thi Ding

1 Babilon siangpahrang Nebukhadnezzar le a ralkap hmuahhmuah, a uknak hnuaiih leilung lalram zate le minung hmuahhmuah in Jerusalem le a khawpi hmuahhmuah an do laiah Jehovah hnen ihsin Jeremiah hnenih kamsuakthu rung thleng mi cu, 2 «Israel Pathian Jehovah in hitin a ti: Judah siangpahrang Zedekiah hnenah feh awla, ‹Jehovah in hitin a ti: ngai hnik, hi khawpi cu Babilon siangpahrang kut ah ka pe ding ih, anih in cucu meisa in a ur ding. 3 Cule a kut sung ihsin na luatsuak lo ding, kaih tengteng na si sawn ding ih, a kut ah pek na si ding; cule Babilon siangpahrang thawn nan hmu-aw ding ih, hmaităwnin a lo be ding, cule Babilon ah na feh ding,› tiah sim aw,» ti a si. 4 Cucingin Maw Judah siangpahrang Zedekiah, Jehovah kamsuakthu cu ngaithla aw! Na thuhla ah Jehovah in hitin a ti: ‹Ralnâm in na thi lo ding. 5 Hnangamten na thi ding; na hlanih siangpahrang hmaisapawl, na pupápawlih rimhmui an ur bangin, na hrangah rimhmui an ur ve ding ih, «Ai maw, bawipa!» › tiah an lo ṭah ding. Ziangahtile thu ka rak phuangsuak zo, Jehovah in a ti,» tiin.

6 Cun Jerusalem ih Judah siangpahrang Zedekiah hnenah profet Jeremiah in hi thu hmuahhmuah cu a sim, 7 cumi cu Babilon siangpahrang-ih ralkappawl in Jerusalem le a tāng mi Judah khawpipawl hmuahhmuah, Lakish le Azekah an do laiah a si; ziangahtile Judah khawpipawl lakih kulh nei khawpi tāngsŭn cu hipawl lawng hi an si.

8 Himi hi siangpahrang Zedekiah in an hnenih zalĕnnak phuangsuak dingih Jerusalem ih um mipi hmuahhmuah thawi thukham a tuah hnuih Jehovah hnen ihsin Jeremiah hnenih rung thleng mi kamsuakthu a si: 9 Mi kip in Hebru mipa asilole Hebru nunau, an siahhlawh nunau le an siahhlawh mipa cu an zalenter ding a si; zohman in Judah-mi unaupa cu sál ah a nei ding a si lo. 10 Cule mi kip in an sálnu le an sálpa an zalenter ih, zohman in anmah cu sál ih an hman nawn lonak dingah, thukham tuahtu bawipawl le mipi hmuahhmuah cun thu an lung. Cutin thu an lung ih an zalenter hai. 11 Asinan lehhnu deuhah an lungthin an thleng ih an zalenter mi sálnupawl le sálpapawl cu an lakirsal ih, an thu hnuaiah sálnu le sálpa dingah an hruai.

12 Curuangah Jehovah kamsuakthu cu Jeremiah hnenah Jehovah hnen ihsin hitin a thleng, 13 «Israel Pathian Jehovah in hitin a ti: Izip ram, sáltannak inn ihta ka lo hruaisuah hai ni ah, nan pupápawl thawn hitin thukham ka tuah, 14 ‹Mi kip in anmai unaupa Hebru-mi, a hnenih rak zuar zo mi cu kum sarih a kim tikah zalenter seh; cule kum ruk a lo rĕn hnuah, na hnen ihsin zalenin na fehsuakter ding a si,› tiin. Asinan nan pupápawl in in rak ngaithla lo ih, an hna an tháwng fawn lo. 15 Cule nannih cu tupekte ah nan lamlêt ih, mi kip in mai innhnen hnenah zalĕnnak phuangin ka mithmuhah thildik nan tuah; cule ka hmaika-ah ka hmin pu mi inn ah thukham nan tuah. 16 Asinan nan lamlêt ih, ka hmin nan bawrhbangter, cule mi kip in anmai duhzawngih nan zalenter mi nan sálpa le sálnu cu nan hruaikirsal ih, nan sálnu le sálpa dingah nan thu hnuaiah nan hruaikirsal.

17 «Curuangah Jehovah in hitin a ti: ‹Mi kip in mai unaupa le mi kip in mai innhnen parih zalĕnnak nan phuannak ah ka thu nan rak thlun lo. Ngai hnik uh, ralnâm, nathrisia, mangṭam lakah nan hrangah zalĕnnak ka phuang, Jehovah in a ti. Cule leilung lalram hmuahhmuah lakah ṭhihṭhaihnak ah ka lo tuah ding. 18 Cule câwpa no cu phel hnih ah an phel ih, a karlakih an fehtlăng tikah, ka hmaika-ih an tuah mi thukham thu tuahsuak lo tu ka thukham pahbăltu pacangpawl: 19 Judah uktupawl, Jerusalem uktupawl, bawipawl, puithiampawl le câwpa no phel mi karlakih fehtlăngtu ram mipi hmuahhmuah cu, 20 an doralpawl kut ah le an nunnak hawltupawl kut ah ka pe hai ding. An mithi ruangpawl cu van zuang vâte le leilung ramsa hrangih rawl ah an cang ding. 21 Cule Judah siangpahrang Zedekiah le a bawipawl cu an doralpawl kut ah, an nunnak hawltupawlih kut ah, nan hnen ihsi fehsuaksal Babilon ralkappawl kut ah ka pe ding. 22 Ngai hnik, thu ka pe ding ih, hi khawpi ah ka kirsalter hai ding, an do ding ih an la ding, meisa in an urkāng ding; cule luahtu um loin Judah khawpipawl cu ka ṭhingter ding, Jehovah in a ti,› tiin,» a ti.

35

Rekab-mipawlih Thulunnak

1 Judah siangpahrang Josiah fapa Jehoiakim san ah Jehovah hnen ihsin Jeremiah hnenah hitin kamsuakthu a thleng, 2 «Rekab-mipawl sungza hnenah feh aw, an hnenah thusim awla, Jehovah inn sung, pindan pakhat sungah hruai hai aw, cule an in dingah sabitzu pe hai aw,» tiin.

3 Cun Habazziniah fapa Jeremiah-ih fapa Jaazaniah, a unaupawl le a fapa zaten, cun Rekab-mipawl sungza pumpi cu ka hruai ih, 4 Pathian mi Igdaliah fapa Hanan-ih fapapawlih pindan sung, Jehovah inn ah ka hruailut hai; cuih pindan cu bawipawlih pindan kiang, sângka kiltu Shallum fapa Maaseiah-ih pindan tlunih um a si. 5 Cun Rekab sungza fapapawlih hmaika-ah sabitzu a khat mi belpawl le nopawl ka hûng; cule an hnenah, «Sabitzu in uh,» tiah ka ti.

6 Asinan annih in, «Sabitzu kan in lo ding, ziangahtile kan pupá Rekab fapa Jonadab in, hitin thu in rak pe, ‹Kumkhuain sabitzu nan in lo pei, nanmah le nan fapapawl khal in. 7 Inn nan sak lo pei, thlaici nan cîng lo pei ih, sabit hmuan khal nan tuah lo pei, pakhat hman nan tuah lo pei; cuhnakin mikhual nan sinak ram ih nan dam rei theinak dingah, nan damsung hmuahhmuah puanthlam ah nan cêng sawn ding a si,› tiin. 8 Cutivekcun kan pupá Rekab fapa Jonadab-ih awka ih thu in pek mi hmuahhmuah, kan damsung kanmah le kan nupipawl, kan fapapawl le kan fanupawl in sabitzu in lo ding siseh, 9 kanmai hrang cēnnak ding inn sak lo ding le sabit hmuan, ló le thlaici khal neih lo ding cu kan thlun. 10 Asinan puanthlampawl ah kan um ih, kan pupá Jonadab ih thu in rak pek mi hmuahhmuah bangtukin kan thlun ih kan tuah. 11 Asinan hitin a si, Babilon siangpahrang Nebukhadnezzar in hi ram a run do tikah, kannih in, ‹Kaldia ralkappawl ṭih ruangah le Siria ralkappawl ṭih ruangah ra uh, Jerusalem ah feh uhsi,› kan ti ih, Jerusalem ah kan cêng,» tiah an ti.

12 Cun Jeremiah hnenah Jehovah kamsuakthu hitin a thleng, 13 «Ralkap rualpawlih Jehovah, Israel Pathian in hitin a ti: Va feh awla Judah pacangpawl le Jerusalem luahtupawl hnenah, ‹Ka kamsuakthupawl ngaithla dingin simfiangnak nan cohlang lo ding maw si? Jehovah in a ti. 14 A fapapawl hnenih thu a pek mi, sabitzu in lo ding ti mi Rekab fapa Jonadab-ih thu an thlun; cuticun tuihni tiangin zianghman an in lo ih, an pupáih thupek cu an thlun. Asinan nannih cu ka lo sim leuhleuh ko nain, nannih cun in rak ngaithla lo. 15 Ka siahhlawh profetpawl hmuahhmuah khal, nan hnenah ka rak thlah leuhleuh, «Mi kip nanmai nundān ṭhalo ihsin ra kir uh, nan thil tipawl rĕmṭha uhla, rian dingin pathian dangpawl thlun hlah uh; cun nanmah le nan pupápawl ka pek mi ram ah nan cêng ding,» tiin. Asinan nan hna nan tháwng lo ih, in rak ngaithla fawn lo. 16 A si, Rekab fapa Jonadab-ih fapapawl in an pupáih thucah anmah a cah mi cu an thlun, asinan hi minungpawl cun in rak ngaithla lo,› tiin a ti.

17 «Curuangah ralkap rualpawlih Jehovah, Israel Pathian in hitin a ti: Ngai hnik uh, Judah le Jerusalem luahtupawl hmuahhmuah dokalhih ka rak phuan mi siatnak hmuahhmuah an parah ka thlengter ding; ziangruangahtile an hnenah thu ka sim nân an rak ngaithla lo, cule anmah ka ko hai nân, in rak sawn lo,» tiin.

18 Cule Jeremiah in Rekab sungza hnenah, «Ralkap rualpawlih Jehovah, Israel Pathian in hitin a ti: Nan pupá Jonadab-ih thucah nan thlun ih, a nunphung dānpawl hmuahhmuah nan thlun, cule thu a lo pek mi hmuahhmuah bangtukih nan tuah ruangah, 19 Ralkap rualpawlih Jehovah, Israel Pathian in hitin a ti: ‹Rekab fapa Jonadab in ka hmaiih dingtu mipa kumkhuain a tlasam lo ding,› tiin,» tiah a ti.

36

Temple ah Cazual Siar a Si

1 Josiah fapa, Judah siangpahrang Jehoiakim a lal a kum litnak ah hitin a si, Jehovah hnen ihsin Jeremiah hnenah hi kamsuakthu hi a thleng, 2 «Cazual la awla, cu tawkah Israel, Judah le miphun hmuahhmuah dokalhin na hnenih thusim ka thăwk ni ihsin, Josiah san ihsin tuihni tiang na hnenih ka lo sim mi kamsuakthu hmuahhmuah cu ngan aw. 3 Judah sungza cun an parih thil ṭhalo thlenter ka tum mi hmuahhmuah cu hna in an thei ding ih, mi kip an nundān ṭhalo ihsin an lamlêt na hman maw; cutin an mawhsualnak le an sual ka ngaidam ding,» tiin.

4 Jeremiah in Neriah fapa Baruk a ko ih, Jehovah in a hnenih a ṭawng mi a kamsuakthu hmuahhmuah cu Jeremiah ih kâ ihsin Baruk in cazual ah a ngan. 5 Jeremiah in Baruk thu a pe ih, «Kei cu kharkhum ka si, Jehovah inn ah ka feh thei lo. 6 Curuangah nangmah feh awla, Jehovah kamsuakthupawl, ka kâ ihsin cazual ih na rak ngan mi kha rawlulh ni ah Jehovah inn ah mipi hnatheihah siar aw. Cule anmai khua cio ihsi ra Judah-mi hmuahmuah hnatheih khalah na siar pei. 7 Jehovah hmaiah zahngaih an dilnak thlenin mi kip in an nundān ṭhalo ihsin an lamlêt na hman maw! Ziangahtile hi mipi dokalhih a phuansuah mi thinhengnak thinso cu a nasatuk a si,» tiah a ti. 8 Cule Neriah fapa Baruk cun Jehovah inn ah Jehovah kamsuakthupawl cu cazual ihta siarin Jeremiah ih thu a pek bangtukin a tuah.

9 Josiah fapa, Judah siangpahrang Jehoiakim a lal a kum ngatnak, a thla kuatnak ah hitin a si, Jerusalem-mi hmuahhmuah le Judah khawpipawl ihsin Jerusalem ih ra mi hmuahhmuah in Jehovah hmaika-ah rawlulh ding an phuang. 10 Cun Jehovah inn ih Kăwtka Thar luhnak, tlunta tualrawn ih um cangantu Shafan fapa Gemariah-ih inn pindan sung ihsin mipi zate hnatheihah Jeremiah kamsuakthupawl cu cazual sung ihsin Baruk in a siar.

Siangpahrang Inn ah Cazual Siar a Si

11 Shafan fapa Gemariah fapa Mikaiah in cazual ihsin Jehovah kamsuakthu hmuahhmuah cu hna in a theih tikah, 12 siangpahrang inn sungih cangantuih pindan sungah a suk, cule ngai hnik, bawipawl hmuahhmuah cu an rak to: cangantu Elishama, Shemaiah fapa Delaiah, Akbor fapa Elnathan, Shafan fapa Gemariah, Hananiah fapa Zedekiah le a dang bawipawl hmuahhmuah cu. 13 Cun Mikaiah cun mipi hnatheihih Baruk in cazual ihsin a siar mi kamsuakthu hmuahhmuah kha an hnenah a thăn. 14 Curuangah bawipawl hmuahhmuah in Kushi fapa, Shelemiah fapa Nethania fapa Jehudia cu Baruk hnenah an thlah ih, a hnenah, «A sung thu mipi hnatheihih na siar mi cazual kha na kut in rak keng awla, ra aw,» tiah an ti. Cutin Neriah fapa Baruk cun a kut in cazual cu a keng ih an hnenah a va feh. 15 Cule annih in, a hnenah, «To awla, in siarsak aw,» tiah an ti. Cule Baruk in cumi cu a siarsak hai.

16 Cuih kamsuakthu hmuahhmuah an hna ih an theih tikah hitin a si, pakhat le pakhat ṭihin an zohaw ih, Baruk hnenah, «Hi kamsuakthu hmuahhmuah cu siangpahrang kan sim tengteng ding,» tiah an ti. 17 Cule Baruk an sut ih, «Atu ah in sim aw, hi kamsuakthu hmuahhmuah hi Jeremiah kâ ihsin ziangtin na rak ngan,» tiah an ti.

18 Baruk in a sâng hai ih, «Anih in a kâ in hi kamsuakthu hmuahhmuah hi ka hnenah a phuang ih, kei in cupawl cu cazual ah cati in ka ngan a si,» tiah a ti.

19 Cun bawipawl in Baruk hnenah, «Feh awla, nangmah le Jeremiah cu relh uh; cule nan umnak zohman in thei hlah hai seh,» tiah an ti.

Siangpahrang in Jeremiah-ih Cazual a Urkāng

20 Cazual cu cangantu Elishama-ih pindan ih an ret hnuah, annihpawl cu tualrawn ah, siangpahrang hnenah an feh; cule kamsuakthu hmuahhmuah cu siangpahrang hnatheihah an sim. 21 Cutikah siangpahrang cun cazual la dingin Jehudi cu a thlah ih, anih in cangantu Elishama pindan ihsin cumi cu a lâk. Cule Jehudi in siangpahrang hnatheihah le siangpahrang kiangih ding bawipawl hmuahhmuah hnatheihah cumi cu a siar. 22 A thla kuatnak ah siangpahrang cu a hmaiih thŭk meisa aiin thlatâng inn ah a to. 23 Cule hitin a si, Jehudi in thuhlawm thum hlawm li hrawng a siarngah tikah, siangpahrang in cumi cu cangantuih nâmte in a hlep ih, thŭk sungih meisa ah a paih, thuk sungih meisa ah cazual hmuahhmuah a kangrál thluh tiangin. 24 Cuticingin siangpahrang le hi kamsuakthu theitu a siahhlawhpawl hmuahhmuah cu an thla a phâng lo, an sinfen khal an thlek lo. 25 Elnathan, Delaiah le Gemariah in cazual urkāng lo dingin, siangpahrang an dil nân, anih in a ngaithla hai lo.

26 A ngaithlak hai lo hleiah, siangpahrang in siangpahrang fapa Jerahmeel, Azriel fapa Seraiah le Abdeel fapa Shelemiah pawl cu cangantu Baruk le profet Jeremiah kai dingin thu a pe, asinan Jehovah in a thup hai.

Jeremih in Cazual a Ngansal

27 Jeremiah kâ ihsin Baruk ih a rak ngan mi cazual sungih kamsuakthu siangpahrang ih a ur hnuah, Jeremiah hnenah Jehovah kamsuakthu hitin a thleng: 28 «Judah siangpahrang Jehoiakim ih a urkăng mi cazual sungih kamsuakthu hmaisa hmuahhmuah kha cazual dang la awla, cumi ah ngan aw. 29 Cule Judah siangpahrang Jehoiakim hnenah hitin na sim pei, ‹Jehovah in hitin a ti: Babilon siangpahrang a ra tengteng ding ih, hi ram a tisiat ding, cule hitawk ihsin milai le ramsa a cemrálter ding, ziangahso cumi sungih na ngan?› tiin hi cazual cu na urkāng. 30 Curuangah Judah siangpahrang Jehoiakim thuhla ah Jehovah in hitin a ti, ‹David laltokham parih totu ding a nei lo ding ih, amai ruak cu sun ni sa le zan vur lakah hlăwnsuak a si ding. 31 An mawhsualnak ruangah amah, a cithlah le a siahhlawhpawl cu dān ka tat hai ding; cule anmah par le Jerusalem luahtupawl par le Judah mipapawl parah anmah dokalhih ka rak phuan zo mi thil ṭhalo hmuahhmuah cu ka thlengter ding; asinan annih in an rak ngaithla lo,› tiah a ti,» tiin.

32 Jeremiah in a dang cazual a la ih, cumi cu Neriah fapa cangantu Baruk a pek, anih cun cumi parah Jeremiah kâ ihsin cazual sungih kamsuakthu hmuahhmuah, Judah siangpahrang Jehoiakim ih meisa urkăng zo mi zaten a ngan. Cuihhleiah ṭawngkam bangaw tampi bêt a si.

37

Zedekiah-ih Thulolak Ruahsannak

1 Babilon siangpahrang Nebukhadnezzar in Judah ram siangpahrang ih a ret mi Josiah fapa Zedekiah cu Jehoiakim fapa Koniah aiah a lal. 2 Asinan profet Jeremiah hmangih a sim mi Jehovah kamsuakthupawl cu amah in siseh, a siahhlawhpawl in siseh, a ram mipi in siseh an rak ngaithla lo.

3 Siangpahrang Zedekiah in Shelemiah fapa Jehukal le puithiam Maaseiah fapa Zefaniah cu profet Jeremiah hnenah, «Kan hrangah Jehovah kan Pathian hnenah thlacam hram aw,» tiih sim dingin a thlah. 4 Jeremiah cu mipi lakah a um, ziangahtile amah cu thawng an thlak hrih lo. 5 Cun Izip ihsin Faro ralkappawl an hung so; cule Jerusalem kulhkhŭmtu Kaldia-mipawl in cuih thuthang an theih tikah, Jerusalem an tlansan.

6 Cun profet Jeremiah hnenah Jehovah kamsuakthu hitin a thleng, 7 «Israel Pathian Jehovah in hitin a ti, ‹Ka hnen ihsin thuhla sut dingih lo thlahtu Judah siangpahrang hnenah hitin na sim pei: Ngai hnik, nangmah lo bawm dingih hung so Izip ralkappawl cu anmai ram Izip ah an kir ding. 8 Cule Kaldia-mipawl an rasal ding ih, hi khawpi hi an do ding, cule an la ding ih, meisa in an ur ding,› tiin. 9 Jehovah in hitin a ti: ‹Nanmah le nanmah, «Kaldia-mipawl cun in fehsan tengteng ding,» tiin bum aw hlah uh, ziangahtile annih cun an lo tlansan lo ding. 10 Ziangahtile nanmah lo dotu Kaldia ralkap pumpi cu neh in, an puaninn ah hriamhma pu mipapawl lawng tâng khal hai sehla, an tho ding ih khawpi cu meisa in an ur ding,› tiah a ti,» tiin.

Jeremiah Thawngthlak a Si

11 Cule hitin a si, Faro ralkap rual ruangah Kaldia ralkap rual in Jerusalem an kulhkhŭmnak ihsin an suah tikah, 12 Jeremiah cu a mipawl lakah a ro co dingin Benjamin ram ah Jerusalem ihsin a fehsuak. 13 Benjamin Kăwtka ih a um tikah, kiltupawl hotu Hananiah fapa Shelemiah fapa a hmin Irijah cu a rak um; cu pa cun, «Kaldia-mipawl lamah na ṭang a si,» tiin profet Jeremiah cu a rak kai!

14 Cun Jeremiah in, «Thuphan! Kaldia-mipawl lamah ka ṭang lo,» tiah a ti. Asinan anih in amah cu a rak ngaithla lo.

Cule Irijah in Jeremiah cu a kai ih bawipawl hnenah a hruai. 15 Curuangah bawipawl cu Jeremiah parah an thin a heng ih, amah cu an rak vua, cule cangantu Jonathan-ih inn sungah thawng an thlak. Ziangahtile cumi cu thawnginn ah an hmang.

16 Jeremiah cu inn sungah an run hruai ih, inn hnuai khur thim ah an ret, cu tawkah ni tampi sung a tâng. 17 Cun siangpahrang Zedekiah in mi a thlah ih amah cu a suah; cule siangpahrang in a inn ah athupten a sut ih, a hnenah, «Jehovah hnen ihsin kamsuakthu ziang tal a um maw?» tiah a ti.

Cule Jeremiah in, «Um e!» tiah a ti. Cun anih in, «Nangmah cu Babilon siangpahrang kut ih pek na si ding!» tiah a ti.

18 Cuihtlunah Jeremiah in siangpahrang Zedekiah hnenah, «Nangmah dokalhin simaw, na siahhlawhpawl dokalhin simaw, na mipi dokalhin simaw, ziang thilsual ka tuah ruangah so thawng i thlak? 19 Na hnenah, ‹Babilon siangpahrang cu nangmah dokalhin le na ram dokalhin a ra lo ding,› tiih phuangtu na profetpawl kha khuiah so atu ah an um? 20 Curuangah maw ka bawi siangpahrang, atu ah ngaithla hram aw, ka dilnak hi na hmaika-ah cohlan si hram sehla, cangantu Jonathan inn ah i kirter hlah aw, culole cu tawkah ka thi pang ding,» tiah a ti.

21 Cun siangpahrang Zedekiah in Jeremiah cu sentari kiltupawlih hruang sungih ret dingin le khawpi sungih sang a cem hlanlo sang rawhtupawlih kăwtthler ihsin ni tin sang pe dingin thu a pe. Cutivekin Jeremiah cu sentari kiltupawlih hruang sungah cun a um.

38

Khur sungah Jeremiah Thlak a Si

1 Mattan fapa Shefatiah, Pashur fapa Gedaliah, Shelemiah fapa Jukal le Malkiah fapa Pashhur in mipi zate hnenih Jeremiah sim mi thupawl an rak thei ih, 2 «Jehovah in hitin a ti: Hih khawpi ih tāngtu cu ralnâm, mangṭam le nathrisia in a thi ding; asinan Kaldia-mipawl lamih a fehtu cu a nung ding, ziangahtile a nunnak cu a hrangah rallâkthil vek a si ding ih, amah cu a nung ding. 3 Jehovah in hitin a ti: ‹Hih khawpi hi Babilon siangpahrang ralkap rual kut ih pek tengteng a si ding ih, a la ding,› tiin,» tiah an ti.

4 Curuangah bawipawl in siangpahrang hnenah, «Kan lo ngen a si, hi pa hi thah si seh, ziangahtile anih in an hnenah hitivek ṭawngkampawl simin hi khawpi ih tâng ral do mipawlih kut le mipi zate kut cu a cak loter a si. Ziangahtile hi pa hin hi mipi ṭhatnak ding a ruat lo ih, an siatnak ding a ruat sawn a si,» tiah an ti.

5 Siangpahrang Zedekiah in, «Zoh hnik uh, amah cu nan kut ah a um a si. Ziangahtile siangpahrang in nanmah dokalhin zianghman a tuah thei lo,» tiah a ti. 6 Cuticun Jeremiah cu an hruai ih, sentari kiltupawlih hruang sungih um siangpahrang fapa Malkiah-ih khur thim sungah an hlăwn, Jeremiah cu hridai in an thlak. Cuih khur sungah cun ti a um lo, leibêk lawng a um. Jeremiah cu leibêk ah a tla.

Khur sung ihsin Jeremaiah Runsuah a Si

7 Siangpahrang inn ih um tilper mipawl lakih pakhat Kush-mi, Ebed-Melek in Jeremiah cu khur thim sungah an thlak ti hna in a rak thei. Benjamin Kăwt ah siangpahrang cu a to ih, 8 Ebeb-Melek cu siangpahrang inn ihsin a suak ih siangpahrang hnenah thu a sim: 9 «Ka bawi siangpahrang, hipawl in profet Jeremiah parih an tuahdān ah hin thil ṭhalo an tuah a si, khur thim sungah an hlăwn ih, a umnak hmun ah rilrâwngin a thi ding. Ziangahtile khawpi sungah sang a um nawn lo,» tiah a ti. 10 Cun siangpahrang in Kush-mi Ebed-Melek cu thu a pe ih, «Hitawk ihsin na kut hnuaiih mipa 30 hruai awla, profet Jeremiah cu a thih hlanah khur thim ihsin lasuak aw,» tiah a ti. 11 Ebed-Melek in mipapawl cu a hnenah a hruai hai ih, siangpahrang inn ih hlawnthil retnak hnuaiah a lut, cule cutawk ihsin hnipuan hlun le sinfen sia pawl cu a la ih, Jeremiah hnen khur thim sungah hridai in a vun thlak. 12 Cun Kush-mi Ebed-Melek in Jeremiah hnenah, «Hi hnipuan hlun le sinfen sia pawl hi na zak hnuaiah dăm awla, hridai in hreng cih aw,» tiah a ti. Cule Jeremiah in cutivekin a tuah. 13 Cutin hridai in Jeremiah cu an dir ih, khur thim ihsin lengah an suah. Jeremiah cu sentari kiltupawlih hruang sungah a um.

Jeremiah in Zedekiah Ralrinnak a Pesal

14 Siangpahrang Zedekiah in mi a thlah ih profet Jeremiah cu Jehovah inn luhnak pathumnak ah an hruai. Cule siangpahrang in Jeremiah hnenah, «Thil pakhat ka lo sut ding, ka hnen ihsin zianghman thup hlah aw,» tiah a ti.

15 Jeremiah in Zedekiah hnenah, «Na hnenah cumi ka lo sim a si ahcun, i that tengteng lo ding maw? Thurawn ka lo pek khal le, i ngaithla lo ding,» tiah a ti.

16 Asinan siangpahrang Zedekiah in Jeremiah hnenah athupten sia a săm ih, «Hi nunnak tuahtu Jehovah a nun rori bangin, ka lo that hrimhrim lo ding ih, na nunnak hawltu hi minungpawl kut khalah ka lo pe lo ding,» tiah a ti.

17 Cun Jeremiah in Zedekiah hnenah, «Ralkap rualpawlih Pathian, Jehovah, Israel Pathian in hitin a ti: Babilon siangpahrangih bawipawl hnenih na pekawk asile, na nung ding, hi khawpi khal meisa ih urkăng a si lo ding ih, nangmah le na sungza cu nan nung ding. 18 Asinan Babilon siangpahrang-ih bawipawl hnenih na pekawk lo asile, hi khawpi cu Kaldia-mipawl kut ah pek a si ding ih, annih in meisa in an ur ding, cule nangmah khal an kut ihsin na tlânsuak lo ding,» tiah a ti.

19 Cule siangpahrang Zedekiah in Jeremiah hnenah, «Kaldia-mipawl lamih ṭang dingih peaw zo Judah-mipawl ka ṭih, Kaldia-mipawl in cupawl kut ah in pe ding ih, in puahcăwk pang ding,» tiah a ti.

20 Asinan Jeremiah in, «An lo pe lo ding. Ka lo ngen a si, ka lo sim mi Jehovah aw hi zangfahten ngaithla aw; cutin na hrangah a ṭha ding ih, na nung ding. 21 Asinan pekawk na el asile, Jehovah ih i rak hmuh mi kamsuakthu cu hihi a si: 22 Atu ah ngai hnik, Judah siangpahrang inn sungih tān ta mi nunau zaten Babilon siangpahrang-ih bawipawl hnenah hruaisuah an si ding ih, cuih nunaupawl in:

‹Na rinsan mi rualpipawl in an lo bum ih,
An lo neh;
Na ke cu ciarbêk lakah a pil ih,
An lo kirsan,›

tiah an ti ding.

23 «Na nupipawl le na fātepawl cu Kaldia-mipawl hnenah hruai an si ding. An kut ihsin na tlânsuak lo ding, cuhnakin Babilon siangpahrang kut ih kaih na si sawn ding. Cule hi khawpi cu meisa ih urkăng a si ding,» tiah a ti.

24 Zedekiah in Jeremiah hnenah, «Hi thu hi zohman in thei hlah hai seh, cule na thi lo ding. 25 Asinan bawipawl in nangmah thawn kan beaw ti hna ih an theih asile, na hnenah an ra ding ih, ‹Siangpahrang hnenih na sim mi le siangpahrang ih a lo sim mi atu ah in sim awla, kan hnen ihsin thup hlah, cule kan lo that lo ding,› tiah an lo ti ding. 26 Cutikah an hnenah, ‹Jonathan inn ih thi dingin i kirter hlah tiah siangpahrang hnenah ka dil,› tiah sim hai aw,» tiah a ti.

27 Cun bawipawl hmuahhmuah cu Jeremiah hnenah an ra ih, amah cu an sut. Cule anih in an hnenih siangpahrang in thu a pek mi hmuahhmuah bangtukin a rak sim hai. Cule cuih thuhla cu theih a si lo ruangah amah cu an sut nawn lo. 28 Jerusalem lâk a si ni tiangin Jeremiah cu sentari kiltupawlih hruang sungah a um. Jerusalem lâk a si tikah anih cu cu tawkah a rak um.

39

Jerusalem Siatnak

1 Judah siangpahrang Zedekiah a lal a kum kuatnak, a thla hratnak ah, Babilon siangpahrang Nebukhadnezzar le a ralkap rual zaten Jerusalem an do ih, an kulhkhŭm. 2 Zedekiah a lal a kum hleikhatnak, a thla litnak, cuih thla ni kuatnak ah khawpikulh cu an virhăwng.

3 Cun Babilon siangpahrangih bawipawl hmuahhmuah cu an ra ih, Kăwtka Laita ah an to: cucu Nergal-Sharezer, Samgar-Nebo, Sarsekim Rabsaris, Nergal-Sarezer Rabmag le a tāng mi Babilon siangpahrang-ih bawipawl hmuahhmuah thawn an si.

4 Cule hitin a si, Judah siangpahrang Zedekiah le ral do mipa zaten cupawl an hmuh tikah, an tlansuak ih zan ah phăr pahnih karlak ihsin suakin, siangpahrang hmuan zin zawhin, khawpi ihsin an suak. Cule aArabah lam panin an feh. 5 Asinan Kaldia ralkap rual in annihpawl cu an dawi vivo ih, Jeriko phairawn ah Zedekiah cu an hei man. An kaih hnuah Babilon siangpahrang Nebukhadnezzar hnenah, Hamath ram Riblah ah an hruai ih, cuih hmun ah anih in a parah thu a ṭhen. 6 Zedekiah mithmuhah a fapapawl cu Babilon siangpahrang in Riblah ah a that hai; Babilon siangpahrang in Judah mizahumpawl hmuahhmuah khal a satthat ṭheh. 7 Cuihhleiah Zedekiah mit a phawrh ih, Babilon ih hruai vivo dingin dar cikcin in an khit. 8 Cule Kaldia-mipawl in siangpahrang inn cu an ur ih mipi innpawl cu meisa in an ur, cule Jerusalem kulh cu an bălsiat. 9 Cun khawpi sungih a tāng mi umsŭn le a hnenih pelutawtupawl cu, a tangsŭn mipi thawn Babilon ah kiltupawl hotu Nebuzaradan in ralkaih ah a hruai hai. 10 Asinan kiltupawl hotu Nebuzaradan in Judah ram ih mifarah, zianghman nei lo mipawl cu a tân ta ih, cuih ṭum ah sabit hmuanpawl le lópawl a pe cih hai.

39:4a Arabah: Jordan phaikuam a si. A hleicein Tipi Thi sak lam le thlang lam ih um phaikuam a si.

Jeremiah a Zalen

11 Babilon siangpahrang Nebukhadnezzar in Jeremiah thuhla ah kiltupawl hotu Nebuzaradan hnenah hitin thu a cah ih, 12 «Amah hruai awla ṭhaten kilkhawi aw, tuahmawh hlah, na hnenih a lo sim vekin tuahsak sawn aw,» tiah a ti. 13 Cutin kiltupawl hotu Nebuzaradan in Nebushaban Rabsaris, Nergal-Sharezer Rabmag le Babilon siangpahrang-ih bawipawl hmuahhmuah cu a cah hai. 14 Cun annihpawl in mi an thlah ih sentari kiltupawlih hruang sung ihsin Jeremiah cu an hruaisuak ih, Shafan fapa Ahikam fapa Gedaliah hnenah inn ih tlunpi dingin an ap. Cutin anih cu mipi lakah a cêng.

15 Sentari kiltupawlih hruang sungih khum a si laiah Jeremiah hnenah Jehovah kamsuakthu a thleng ih, 16 «Ethiopia-mi Ebed-Melek hnenah feh awla, ‹Ralkap rualpawlih Jehovah, Israel Pathian in hitin a ti: Ngai hnik, hi khawpi parah ka kamsuakthupawl cu thil ṭhalo hrangah ka thlengter ding, thil ṭha hrangah si loin, cule cuih ni ah na hmaika-ah tisuah an si ding. 17 Asinan cuih ni ah ka lo runsuak ding, Jehovah in a ti, cule na ṭih mipawlih kut ah pek na si lo ding. 18 Ka lo runsuak tengteng ding ih, ralnâm in na tlu lo ding; cuhnakin na nunnak cu na hnenah rallâkthil vek a si sawn ding, ziangruangahtile keimah in rinsan a si,› Jehovah in a ti, tiah va sim aw,» tiah a ti.

40

Jeremiah le Uktu Gedaliah

1 Jerusalem le Judah ihsin ralkaih ih hruaihloh mipawl thawn Jeremiah cu cikcin ih ṭawnin Babilon ih ralkaih ih hruaihloh an si laiah kiltupawl hotu Nebuzaradan in amah cu Ramah khua ih a suahter hnuah a hnenih Jehovah kamsuakthu thleng.

2 Kiltupawl hotu in Jeremiah cu a hruai ih, a hnenah: «Jehovah na Pathian in hi thil ṭhalo hi himi hmun parah a phuang zo. 3 Atu ah Jehovah in cumi cu a rak thlengter zo ih, a sim vekin a tuah. Ziangruangahtile nannih in Jehovah dokalhin thilsual nan rak tuah ih, a aw nan rak ngaithla lo, curuangah hi thil hi nan parah a thleng a si. 4 Atu ah ngai hnik, tuihni ah na kut ih um cikcin ihsin ka lo zalenter a si. Babilon ah ka zawngih rat na duh sawn asile, ra awla, ka lo zohṭha ding. Asinan Babilon ih rat na duh lo asile, hi tawkah tāng ko aw. Ngai hnik, leiram hmuahhmuah cu na hmaiah a um; ṭha na tinak hmun pauhpauh le feh na remcānnak kip ah feh aw,» tiah a ti.

5 Jeremiah a kir man hlanah, Nebuzaradan in, «Judah khawpipawl uktu dingah Babilon siangpahrang in a tuah mi Shafan fapa, Ahikam fapa Gedaliah hnenah tlungkir awla, mipi lak, amai hnenah um aw; culole na hrangih feh a remnaknak ah feh aw,» tiah a ti. Cuticun kiltupawl hotu in lamcaw le thilpek a pe ih a fehter. 6 Cun Jeremiah cu Mizpah ah Ahikam fapa Gedaliah hnenah a feh ih, ram ih mipi rung tāngpawl thawn a hnenah a cêng.

7 Lópawl ih um ralkappawlih bawi hmuahhmuah, anmah le an mipapawl in Babilon siangpahrang in Ahikam fapa Gedaliah cu ram uktu dingah a tuah ih, mipapawl, nunaupawl, nauhakpawl le Babilon ralkaih ih hruaihloh lo mi ram sungih mifarahbikpawl cu a hnenah a ap ti hna in an rak thei. 8 Cun Mizpah khua ih Gedaliah hnenah an ra: Nethaniah fapa Ishmael, Kareah fapa Johanan le Jonathan, Tanhumeth fapa Seraiah, Netofat-mi Efai fapapawl le Maakath-mi fapa Jaazaniah, anmah le an hopawl cu an ra. 9 Cule Ahikam fapa, Shafan fapa Gedaliah in annih-ih hmaika-ah le an mipapawl hmaika-ah sia a săm ih, «Kaldia-mipawl rĕn ding ṭih hlah uh. Ram sungah cêng uhla, Babilon siangpahrang cu rian uh, cule cumi cu nan hrangah a ṭha ding. 10 Kei lawngte cu, ngai hnik uh, kan hnenih ra ding mi Kaldia-mipawl hmaiah nan aiih ding dingin Mizpah ah ka cêng ding. Asinan nannih cun sabitzu, ṭhal thing rah le hriak khawm uhla, nan bungbelpawl sungah thun uh, cule nan rak lâk mi khawpipawl ah cêng uh,» tiah a ti. 11 Cuvek thothoin Moab ram ih um, Ammon-mipawl lak le Edom ih umpawl le ram hmuahhmuah ih um Judah-mi hmuahhmuah in Babilon siangpahrang in Judah-mi a tāngsŭnpawl cu a tân ih, anmah uktu dingah Shafan fapa, Ahikam fapa Gedaliah a ret ti hna ih an theih tikah, 12 dawisuah an sinak hmunpawl hmuahhmuah ihsin Judah-mi hmuahhmuah cu an ra kir ih, Judah ram Mizpah khua ih Gedaliah hnenah an ra thleng, cule sabitzu le ṭhal thing rah a tawrin an khawm.

13 Cuihtlunah Kareah fapa Johanan le ló ih um ralkap rual hotupawl hmuahhmuah cu Mizpah khua ih Gedaliah hnenah an ra ih, 14 a hnenah, «Ammon-mipawlih siangpahrang Baalis in Nethaniah fapa Ishmael cu nangmah that dingin a rak thlah ti na thei maw?» tiah an ti. Asinan Ahikam fapa Gedaliah in a zum hai lo.

15 Cun Kareah fapa Johanan in Mizpah khua ih Gedaliah hnenah athupten hitin a sim, «Ka lo ngen a si, i fehter awla, Nethaniah fapa Ishmael ka that ding, cule cumi cu zohman in an thei lo ding. Nangmah ra pankhawmtu Judah-mipawl an darh ih Judah tāngsŭnpawl hlorál dingin ziangahso maw a lo thah ding?» tiah a ti.

16 Asinan Ahikam fapa Gedaliah in Kareah fapa Johanan hnenah, «Hi thil cu na tuah lo pei, ziangahtile Ishmael thuhla na rel mi hi a dik lo a si,» tiah a ti.

41

Gedaliah Thah a Si

1 Cule a thla sarihnak ah hitin a si, Elishama fapa Nethaniah fapa Ishmael, siangpahrang cikuang le siangpahrang-ih bawipawl cu mipa pahra thawn Mizpah khua ah Ahikam fapa Gedaliah hnenah an ra. Cule cutawk Mizpah ah sang an eikhawm. 2 Nethaniah fapa Ishmael le a hnenih um mipa pahra cu an tho ih, Babilon siangpahrang in ram uktu ih a tuah mi Shafan fapa Ahikam fapa Gedaliah cu ralnâm in an sat ih an that. 3 A hnenih um Jew-pawl hmuahhmuah, Mizpah khua ih Gedaliah hnenih um le cutawk ih tawn mi Kaldia ralkappawl cu Ishmael in a that hai fawn.

4 Cule Gedaliah a thah hnu a thaisun ah hitin a si, zohman ih an theih hlanah, 5 mi hrekkhat cu Shekem ihsin, Shiloh ihsin le Samaria ihsin mipa 80 cu an khahmul metin le an hnipuanpawl tlekin, anmah le anmah âtawin, an kut ah thilhlănpawl le rimhmui kengin Jehovah inn ih keng dingin an ra. 6 Cule Nethaniah fapa Ishmael cu anmah hmuak dingin Mizpah ihsin a fehsuak, lamzin tluanah ṭap phahin a feh; cule anmah a tawn hai tikah an hnenah, «Ahikam fapa Gedaliah hnenah ra uh,» tiah a ti hai. 7 Cule khawpi sung an thlen tikah, Nethaniah fapa Ishmael le a hruai mi mipapawl cun annih cu an that ih, khur sungah an hlăwn.

8 Asinan an lakih tawn mi mi pahra pawl cun Ishmael hnenah, «In that hlah, ziangahtile retnak ló ah sangvut, barli sangvut, hriak le khuaitizu kan nei,» tiah an ti. Cuticun a zuah hai ih, an unaupawl lakah a that hai lo.

9 Atu ah Ishmael in Gedaliah ruangih a mi thah mi pacangpawlih ruang a hlăwnnak khur cu Israel siangpahrang Baasha ruangih siangpahrang Asa in a rak tuah mi a si. Cuih khur cu Nethaniah fapa Ishmael in mithi ruak in a khatter. 10 Cun Mizpah khua ih a tāng lai mi mipi hmuahhmuah, siangpahrang fanupawl le kiltupawl hotu Nebuzaradan in Ahikam fapa Gedaliah kut ih a ap mi Mizpah ih tâng mipi hmuahhmuah cu Ishmael in ralkaih ah a hruaihlo hai. Cule Nethaniah fapa Ishmael in anmahpawl cu sál ah a hruai hai ih, Ammon-mipawl umnak khat lam ralah a fehpi hai.

11 Asinan Kareah fapa Johanan le a hnenih um ralkap rual hotupawl hmuahhmuah in Nethaniah fapa Ishmael ih thil ṭhalo a tuah mi hmuahhmuah an theih tikah, 12 mipa hmuahhmuah cu an hruai ih Nethaniah fapa Ishmael do dingin an feh; cule amah cu Gibeon ih tili tumpi kiangah an hmu. 13 Cule Ishmael hnenih um mipi hmuahhmuah in Kareah fapa Johanan le a hnenih um ralkap rual hotupawl hmuahhmuah an hmuh tikah, an lung a awi. 14 Cun Ishmael in ralkaih ih a hruaihloh mipawl hmuahhmuah cu Mizpah khua ihsin an her ih an kirsal, cule Kareah fapa Johanan hnenah an feh. 15 Asinan Nethaniah fapa Ishmael cu mipa pariat thawn Johanan hnen ihsin an tlânsuak ih, Ammon-mipawl hnenah an feh.

16 Cun Ahikam fapa Gedaliah cu Nethaniah fapa Ishmael in a thah hnuah Mizpah khua ih Ishmael hnenih um, a tāngsŭn hmuahhmuah: Gibeon ihsi a rak hruaikir mi ral do mipapawl, nunaupawl, nauhakpawl le tilper mipawl cu Kareah fapa Johanan le a hnenih um ralkap rual hotupawl hmuahhmuah in an hruaisuak. 17 Kaldia-mipawl ruangah Izip ram ah feh tumin an păwksuak ih, Bethlehem khaw kiangih um Geruth Kimham ah an câm. 18 Ziangahtile anmahpawl cu an ṭih; Babilon siangpahrang in ram uktu dingih a ret mi, Ahikam fapa Gedaliah cu Nethaniah fapa Ishhmael in a thah ruangah a si.

42

Izip Ram ih Tlan Kham a Si

1 Ralkap rual hotupawl zate, Kareah fapa Johanan, Hoshaiah fapa Jezaniah le mipi zate, a tebik ihsin a tumbik tiangin an va naih ih, 2 profet Jeremiah hnenah, «Kan lo ngen a si, kan dilnak cu na hmaika-ah cohlan si sehla, Jehovah na Pathian hnenah kan hrangah thlacam aw, hi a tāngsŭnpawl hrangah hin; ziangahtile kannih cu, in hmuh vek hin, mi tam zet lak ihsin tān mi mi málte kan si. 3 Jehovah na Pathian in kan zawh ding mi lamzin in hmuhnak dingah le kan tuah ding mi thil in hmuhnak dingah,» tiah an ti.

4 Cun profet Jeremiah in an hnenah, «Ka hna in ka rak lo thei hai zo. Ngai hnik uh, nan ṭawngkampawl bangtukin Jehovah nan Pathian hnenah thla ka cam ding; cule Jehovah ih a lo sān mi ziangkhal, nan hnenah ka thăn ding, nan hnen ihsin zianghman ka sûp lo ding,» tiah a ti hai.

5 Cule annih in Jeremiah hnenah, «Jehovah na Pathian in kan hnenih a lo thlahnak săn thil hmuahhmuah bangtukih kan tuah lo asile, Jehovah cu kan karlakah theihpitu dik le rinum si seh. 6 Cumi cu a duhum simaw, duhum lo simaw, a hnenih kan lo thlahnak Jehovah kan Pathian aw cu kan ngaithla ding, Jehovah kan Pathian aw kan ngaithlak tikah, kan lam a tluang ding,» tiah an ti.

7 Ni hra hnuah hitin a si, Jeremiah hnenah Jehovah kamsuakthu a thleng. 8 Jeremiah in Kareah fapa Johanan le a hnenih um ralkap rual hotupawl zate le a tebik ihsin a tumbik tiang mipi zaten a ko hai ih, 9 an hnenah, «Jehovah nan Pathian, a hmaika-ah nan dilnak thlĕn dingih a hnenih in rak thlahnak pa khan hitin a ti: 10 ‹Hi ram ih nan um hrih ding asile, ka lo tuahṭha ding ih, ka lo tûlthla lo ding, cule ka lo phun ding ih, ka lo phawi lo ding. Ziangahtile nan parih thil ṭhalo ka rak thlenter mi thuhla ah ka lamlet ding. 11 Nan ṭih mi Babilon siangpahrang cu ṭih hlah uh, amah cu ṭih hlah uh, Jehovah in a ti, ziangahtile nanmah lo run dingin le a kut ihsin lo runsuak dingin nan hnenah ka um. 12 Nan parih zahngainak a neih theinak dingah zahngainak ka lo hmuh ding ih, nan ram rori ah ka lo kirter ding,› tiin.

13 «Asinan, ‹Hi ram ah kan cêng lo ding,› nan ti ih, Jehovah nan Pathian aw khal nan ngaithla lo, 14 ‹Lamlam, Izip ram ah kan feh sawn ding, cu tawkah ral doawknak kan hmu lo ding ih, tuupa ki phawt awn khal kan thei lo ding, cule rawl tlaksăm a um lo ding ih, cu tawkah kan cêng sawn ding,› nan ti asile, 15 Maw nannih a tāngsŭn Judah-pawl, atu ah Jehovah kamsuakthu hi ngaithla uh! Ralkap rualpawlih Jehovah, Israel Pathian in hitin a ti: ‹Izip ram ih lut dingin le cutawk ih cêng dingin thutluknak nan neihfel asile, 16 hitin a si ding, nan rak ṭih mi ralnâm in cutawk Izip ram ah a lo man ding ih, nan rak ṭih mi mangṭam in cutawk Izip ah naiten a lo thlun ding; cule cu tawkah nan thi ding. 17 Izip ram ih cêng dingih thutluknak neifeltu mipa hmuahhmuah ralnâm, mangṭam le nathrisia in an thi ding. An parih ka thlenter ding mi thil ṭhalo ihsin anmah lakah zohman an tâng lo ding ih, an tlânsuak fawn lo ding,› tiin.

18 «Ziangahtile ralkap rualpawlih Jehovah, Israel Pathian in hitin a ti: ‹Jerusalem luahtupawl parah ka thinhengnak le ka thinsonak thletbŭng a si vekin, Izip nan luh tikah, ka aithawknak cu nan parah thletbŭng a si ding. Cule nanmah cu camsiat tuar, miṭhihṭhaihnak, camsiat mi le hmuhsuam mi nan si ding; cule hi hmun hi nan hmu nawn lo ding,› tiin.

19 «Maw nannih Judah tāngsŭnpawl, Jehovah in nan thuhla a sim zo, ‹Izip ah feh hlah uh,› tiah a ti. Tuihsun ah ralrinnak ka lo pe ti theihliah uh. 20 Ziangahtile thil nan tisual a si, ‹Jehovah kan Pathian hnenah thla in camsak awla, Jehovah kan Pathian ih a sim mi hmuahhmuah bangtukin in thăn aw, cule cumi cu kan tuah ding,› tiih Jehovah nan Pathian hnenih in thlahtu nan si ruangah. 21 Cule cumi cu tuihsun ah nan hnenah ka thăn a si, asinan Jehovah nan Pathian aw nan ngaithla lo ih, keimah hmangih nan hnenih a thlah mi ziang thu khal nan lung lo. 22 Curuangah cêng dingih feh na duhnak hmun ah ralnâm in, mangṭam in le nathrisia in nan thi ding ti atu ah theihliah uh,» tiah a ti.

43

Izip ah Jeremiah Hruai a Si

1 Cule Jeremiah in mipi hmuahhmuah hnenih Jehovah an Pathian kamsuakthu hmuahhmuah, Jehovah an Pathian in sim dingih an hnenih a thlahnak săn, hi kamsuakthu hmuahhmuah sim a ṭheh tikah, 2 Hoshaiah fapa Azariah, Kareah fapa Johanan le mipa mipuarthau hmuahhmuah in Jeremiah cu an bia ih, «Thuphan na per a si! ‹Izip ram ah cêng dingin feh hlah uh,› tiih sim dingin Jehovah kan Pathian in a lo thlah lo. 3 Kanmah cu Kaldia-mipawl kut ah pe in, in thah theinak dingah simaw, Babilon ah ralkaih ih hruaihlo kan si theinak dingah simaw, Neriah fapa Baruk in nangmah cu kanmah dokalhin a lo fawrh sawn a si,» tiah an ti. 4 Cuticun Kareah fapa Johanan, ralkap rual hotu zate le mipi hmuahhmuah in Judah ram ih cêng dingin Jehovah aw an ngaithla lo. 5 Kareah fapa Johanan le ralkap rual hotupawl zaten Judah ram ih cêng dingin hnawhsuah an sinak miphun dang hmuahhmuah ihsi ra kir Judah tāngsŭn hmuahhmuah: 6 mipapawl, nunaupawl, nauhakpawl, siangpahrang fanupawl le kiltupawl hotu Nebuzaradan in Shafan fapa, Ahikam fapa Gedaliah hnenih a rak tān ta mi le profet Jeremiah le Neriah fapa Baruk pawl khal an hruai riangri. 7 Cule Izip ram ah an feh, ziangahtile annih in Jehovah aw cu an rak ngaithla lo, cuticun Tahpanhes tiang an rak feh a si.

8 Cun Tahpanhes ah Jeremiah hnenah Jehovah kamsuakthu hitin a thleng ih, 9 «Na kut in lung tumpi pi la awla, Tahpanhes ih Faro inn luhnak ih tlakrawh tualrawn ih bellei lakah Judah mipapawl mithmuhah thup aw. 10 Cule an hnenah, ‹Ralkap rualpawlih Jehovah, Israel Pathian in hitin a ti: Ngai hnik uh, ka siahhlawh Babilon siangpahrang Nebukhadnezzar ka cahsuak ding ih, ka rak thuh mi hi lungtopawl tlunah a laltokham a hung ding. Cupawl tlunah a siangpahrang puanthlam a pharh ding. 11 Amah a rat tikah, Izip ram a do ding, thi dingih ruat mipawl cu an thi ding ih, ralkaihnak ih hruai dingih ruat mipawl cu ralkaihnak ih hruai an si ding, ralnâm ih thi dingih ruat mipawl cu ralnâm in an thi ding. 12 Izip pathianpawlih innpawl ah meisa a muah ding, cule anih in cupawl cu a ur hai ding ih, ralkaih ah a hruaihlo hai ding. Cule tuukhāltu in a sinfen a hruh vekin, Izip ram thawn a thuamaw ding, cule cutawk ihsin hnangamten a fehsuak ding. 13 Izip ram ih um aBeth Shemesh ṭhuamserhpawl khal a siatbăl ding ih, Izip-mipawlih pathianpawlih innpawl cu meisa in a urkāng ding,› tiah a ti,» tiin.

43:13a Beth Shemesh: Ni temple a si.

44

Izip ah Israel-mipawl Dāntat an si Ding

1 Izip ram ih cêng Jew-pawl hmuahhmuah, Migdol khua, Tahpanhes khua, Nof khua le Pathros ram ih cêng pawl thuhla ih Jeremiah hnenih thu rung thleng mi cu hitin a si, 2 «Ralkap rualpawlih Jehovah, Israel Pathian in hitin a ti: Jerusalem le Judah khawpipawl parih ka rak thlenter mi thil ṭhalo hmuahhmuah cu nan rak hmu zo; ngai hnik uh, tuihsun ah cupawl cu an ṭhing thluh ih, cuih hmunpawl ah zohman an um lo, 3 anmah le nanmah le nan pupápawl khalih an rak theih dah lo mi pathian dangpawl rian le rimhmui urin, ka thinhengter dingin an rak tuah mi an sualralnak ruangah a si. 4 Cucingin ka siahhlawh profetpawl hmuahhmuah nan hnenah ka rak thlah leuhleuh hai, ‹Maw, ka huat mi hi fihnungza thil hi tuah hlah uh!› tiah an ti. 5 Asinan an sualralnak ihsin lamlêt dingin, pathian dangpawl hnenih rimhmui ur lo dingin an ngaithla lo ih, an hna khal an tháwng lo. 6 Curuangah ka thinso le ka thinhennak cu thletbŭng a si ih, Judah khawpipawl ah le Jerusalem kăwtthler ah an alh; cule tuihni ih nan hmuh vek hin cupawl cu an ṭhing ih an lawnglak.

7 «Curuangah atu ah, ralkap rualpawlih Pathian, Israel Pathian Jehovah in hitin a ti: Zohman zuah loih nan lak ihsin nunau le mipa, nauhak le hnawifawp lai pawl cu nannih Judah-mipawl lak ihsin thathlo thluh dingin ziangahso hi thil ṭhalo zet hi nanmah le nanmah dokalhawih nan tuah? 8 Cêng dingih nan va fehnak Izip ram ih pathian dangpawl hnenah rimhmui urin leilung miphunpawl hmuahhmuah lakah camsiat tuar le hmuhsuam nan sinak dingah le thahhlo thluh nan sinak dingah ziangahso nan kut thil ti mipawl in ka thin in lingter? 9 Judah ram le Jerusalem kăwtthler ih an rak tuah mi nan pupápawlih sualralnak, Judah siangpahrangpawlih sualralnak, an nupipawlih sualralnak, nanmah rori ih sualralnak le nan nupipawlih sualralnak cu nan rak hngilh maw si? 10 Tuihni tiangin an phahniamaw cuang lo ih, an ṭih fawn lo; nan pupápawl le nanmai hmaika-ih ka ret mi ka dān le ka sakhaw dānpawl khal an thlun lo.

11 «Curuangah ralkap rualpawlih Jehovah, Israel Pathian in hitin a ti: Ngai hnik uh, thil ṭhalo hrangah le Judah hmuahhmuah that dingin nanmah dokalhin ka hmai ka hawi ding. 12 Izip ram ah feh dingin, cutawk ih va cêng dingih an hmai hawitu Judah tāngsŭnpawl cu ka hruai hai ding ih, an zaten Izip ram ah an hlorál ding ih, ralnâm in an tlu ding, cule mangṭam in an hlorál ding. A tebik ihsin a tumbik tiang ralnâm le mangṭam in an thi ding; cule anmah cu camsiat tuar le miṭhihṭhaihnak, camsiat mi le nautat mi ah an cang ding! 13 Ziangahtile ralnâm, mangṭam le nathrisia in Jerusalem dān ka tat vekin, Izip ram ih cêng mipawl cu dān ka tat hai ding, 14 cutin Izip ram luh hnuih, kir le cēn an câknak Judah ram ih kir dingin Judah mitangsŭn zohman nungdam an um lo ding; ziangahtile a tlânsuak málte ngaingai dah ti lo cu zohman tlungkir khal an um lo ding,» tiin.

15 Cun an nupipawl in pathian dangpawl hnenah rimhmui an ur ti theitu mipa hmuahhmuah le cutawk ih ding nunau hmuahhmuah, mipungkhawm tum zet, Izip ram Pathros ih cêng mi hmuahhmuah in Jeremiah cu hitin an sawn, 16 «Jehovah hmin in kan hnenih na sim mi kamsuakthu kha cu kan lo ngaithla lo ding! 17 Asinan kanmah le kan pupápawl, kan siangpahrangpawl le kan bawipawl in Judah khawpipawl ah le Jerusalem kăwtthler ih an rak tuah ṭheu vekin, van siangpahrang bawinu hnenih rimhmui ur le a hnenih Inding Thilhlănpawl thletbŭng ding cu kan kâ ihsi suak mi thil vekin kan tuah hrimhrim ding. Ziangahtile kha laiah khan rawl a tawrin kan nei, kan hmuingil ih, thil ṭhalo zianghman kan hmu lo. 18 Asinan van siangpahrang bawinu hnenih rimhmui ur kan bān ihsin le Inding Thilhlănpawl a hnenih thletbŭng kan bān ihsin ziangkim kan tlasam ih, ralnâm le mangṭam in kan hlorál a si,» tiah an ti.

19 Cun nunaupawl in, «Van siangpahrang bawinu hnenih rimhmui kan ur lai le a hnenih Inding Thilhlănpawl kan thletbŭng laiah, kan pasalpawlih siannak tel loin, amahnu biaknak ah a hrangah sang kan tuah ih, a hnenah Inding Thilhlănpawl kan thlebung maw si?» tiah an ti.

20 Cun Jeremiah in mipi hmuahhmuah, mipapawl, nunaupawl le amah sawntu mipi hmuahhmuah hnenah hitin a ti: 21 «Judah khawpipawl le Jerusalem kăwtthler ih nanmah le nan pupápawl, nan siangpahrangpawl le nan bawipawl, ram minungpawl in nan ur mi rimhmui cu Jehovah in a cingin, a lungthin ah a lut lo maw si? 22 Nan thil ṭhalo tuah mipawl ruangah le nan tuah mi fihnungzapawl ruangah Jehovah in a tuar thei nawn lo. Curuangah nan ram cu tuihni ih nan hmuh vek hin a ṭhing ih, miṭhihṭhaihnak le camsiat mi, luahtu um lo ah a cang. 23 Rimhmui nan ur ih, Jehovah parah nan sual, cule Jehovah aw cu nan ngaithla lo ih, a dān, a sakhaw dānpawl le a thutheihtermipawl nan thlun lo, curuangah hi thil ṭhalo hi tuihni ih nan hmuh vek hin nan parah a thleng a si,» tiah a ti.

24 Cuihhleiah Jeremiah in mipi zate hnenah le nunau zate hnenah, «Izip ram ih um Judah-mi hmuahhmuah in Jehovah kamsuakthu hi ngaithla uh! 25 Ralkap rualpawlih Jehovah, Israel Pathian in hitin a ti: Nanmah le nan nupipawl cun, ‹Van siangpahrang bawinu hnenah rimhmui ur le a hnenih Inding Thilhlănpawl thletbŭng cu kan rak tuah vekin kan thutiam mi cu kan tuahsuak tengteng ding,› tiin nan kâ in nan ṭawng ih, nan kut in nan thlengkimter. Nan tiamkam mi cu hlĕnsuak tengteng hmen uh! Nan tiamkam mi cu tuahsuak tengteng hmen uh! 26 Curuangah nannih Izip ram ih um Judah-mi hmuahhmuah in Jehovah kamsuakthu hi ngaithla uh: Ngai hnik uh, ka hmin ropi sālin sia ka săm a si, Jehovah in a ti, Izip ram pumpi ih Judah mi zo-ih kâ hman in, ‹Bawipa Jehovah a nung a si,› tiin ka hmin an sâl nawn lo ding. 27 Ngai hnik, ṭhatnak dingah si loin, thil ṭhalo hrangah anmah ka thlingthla hai ding. Cule Izip ram ih um mipa hmuahhmuah cu an cem thluh hlanlo ralnâm le mangṭam in an hlorál ding. 28 Ralnâm ihsi luatsuak mipum málte cu Izip ram ihsin Judah ram ah an kir ding; cule cêng dingih Izip ram ih fehsuak Judah tāngsŭnpawl hmuahhmuah in zo-ih ṭawngkam dinghnget sawn pei, keimai maw anmai ti an thei ding. 29 Cule himi hi nan hrangah hminsinnak a si ding, Jehovah in a ti, ka kamsuakthu hi nan parah thil ṭhalo hrangah a dinghnget tengteng ding ti nan theihnak dingah hi hmun ah dān ka lo tat ding.

30 «Jehovah in hitin a ti: Ngai hnik, Judah siangpahrang Zedekiah cu a nunnak hawltu a doral Babilon siangpahrang Nebukhadnezzar kut ih ka pek bangin, Izip siangpahrang Faro Hofra cu a ralpawlih kut ah, a nunnak hawltupawlih kut ah ka pe ding,» tiah a ti.

45

Baruk hnenih Thucah

1 Judah siangpahrang Josiah fapa Jehoiakim a lal a kum litnak ah, Jeremiah ka ihsin hi kamsuakthupawl cazual sungih Neriah fapa Baruk in a ngan laiih a hnenih profet Jeremiah ih sim mi kamsuakthu cu hitin a si: 2 «Maw Baruk, Israel Pathian Jehovah in na hnenah hitin a ti: 3 Nang in, ‹Ka hmakhua a pit! Ziangahtile Jehovah in ka riahsiatnak ah thinnatnak a bêt. Ka hrumnak ah ka cau ih, cawlhhahdamnak ka hmu lo,› na ti.

4 «A hnenah hitin na sim pei, ‹Jehovah in hitin a ti: Ngai hnik, ka sak zo mi ka băl ding ih, ka phun zo mi ka phawi ding, cucu hi ram pumpi hi a si. 5 Nangmai hrangah thil ropipawl na hawl maw? Cupawl cu hawl hlah; ziangahtile, ngai hnik, milai hmuahhmuah parah thil ṭhalo ka thlengter ding, Jehovah in a ti. Asinan na nunnak cu ralthillâk vekin na fehnak hmun kip ah ka lo pe ding,› tiin,» ti a si.

46

Izip parih Thuṭhennak

1 Miphunpawl thuhla ih Profet Jeremiah hnenih rung thleng Jehovah kamsuakthu.

2 Izip thuhla, Judah siangpahrang Josiah fapa Jehoiakim a lal a kum litnak ah, Zufraṭis Tiva kapih um Karkemish khawpi ih Babilon siangpahrang in a neh mi Izip siangpahrang Faro Neko ralkappawlih thuhla:

3 «Ralphaw tûm le ralphaw te timlam uhla,
Doawknak kiangnaiah va feh uh!
4 Rángpawl thuam uhla,
Ráng parah to uh!
Nan lukhumpawl thawn ding uh,
Feipawl hnawttle uh,
Ralthuam hruh uh!
5 Ziangso ka hmuh? Anmah cu thlaphâng le dungsipin an um.
An micakpawl nehin an um;
Dunglet hawi loin,
Zamrang zetin an tlân.
Ziangahtile ṭihnak cu kil kip ah a um, tiah Jehovah in a ti.
6 «Mizuanzângpawl tlânhlo hlah hai sehla,
Micakpawl khal tlânsuak hlah hai seh;
Zufraṭis Tiva kiang, sak lamah
An bah ding ih an tlu ding.
7 «Nile vekih so luihlo hi zo so a si?
A tidaipawl cu tivapawl vekin a so luihlo.
8 Izip cu Nile bangin a tho luihlo ih,
Tivapi luang luihlo vekin;
Cule anih in, ‹Ka kaiso ding ih, leilung ka cîm ding,
Khawpi le a luahtupawl ka siatsuah ding,› tiah a ti.
9 Nannih rángpawl, so uhla, nannih ránglêngpawl tlân vutvo uh!
Micakpawl in hmai năwr hai seh:
Ralphaw keng Kush-mipawl le Libia-mipawl le,
Thál keng ih nawp Lud-mipawl kha.
10 Ziangahtile hihi ralkap rualpawlih Bawi Jehovah-ih ni,
Phuba lâk ni a si,
Cutin amah in a doralpawl phuba a la ding;
Ralnâm in a eirál hai ding;
A tlai ding ih, an thisen a in ding;
Ziangahtile ralkap rualpawlih Bawi Jehovah in sak lam ram,
Zufraṭis Tiva kiangah raithawinak a nei.
11 Gilead ah so awla, thing hnâi la aw,
Maw fala him, Izip fanu;
Si tampi na hmangrál lak men ding;
Na dam cuang lo ding.
12 Miphunpawl in na mualphozia hna in an thei ih,
Na ṭahnak in ram a luahkhat ṭheh;
Ziangahtile micakpa cu micak parah a bah;
An pahnih in an rīltlang,» tiin.

Babilon in Izip a Do Ding

13 Babilon siangpahrang Nebukhadnezzar ra tahratin Izip ram a dodān ding, profet Jeremiah hnenih Jehovah ih sim mi thu:

14 «Izip ah thăn uhla, Migdol ah phuang uh;
aNof ah le Tahpanhes khalah;
‹Dinghnget uhla timlam aw uh,
Ziangahtile ralnâm in nan kiangkung hmuahhmuah a eirál ṭheh,› tiah ti uh.
15 Ziangahso na ralthiampawl nuaihloh ih an um?
An ding thei lo,
Ziangruangahtile Jehovah in a hnawhsuak hai.
16 Mi tam zet a tluter hai;
A si, mi pakhat parah pakhat a tlu.
Cule annih in, ‹Tho uh!
Palbĕttuih ralnâm lakin
Kan minungpawl hnenah kir uhsi,
Kan suahnak ram ah,› tiah an ti.
17 ‹Izip siangpahrang Faro hi thawmvâng men lawng a si,
Cān khiah cu a lan zo!› tiin cu tawkah an au.
18 «A hmin ralkap rualpawlih Jehovah ti mi Siangpahrang in,
Tobor cu tlangpawl lakih a um vek le
Tifinriat kapih Karmel a um vekin
Amah cu ka nun vekin a ra tengteng ding, tiin a phuang.
19 Maw nang fanu, Izip ih um,
Sáltannak ih feh dingin na zâl timtuah aw!
Ziangahtile Nof cu a răm ding ih, urkăng a si ding, luahtu nei loin.
20 «Izip cu câwla mawi zet vek a si,
Asinan mikeuhmang tho a ra, sak lam ihsin a ra.
21 A kawlrawih mi ralkappawl cu an lakah câwpa no cawmthau vek an si,
Ziangahtile annih khal dung an kir ih,
An tlânsetlang.
An ṭanhmun ah an ding lo,
Ziangahtile an vansiat ni cu an parah a rak thleng,
Dāntat cān khal.
22 «Rul vekih siksikin Izip a tlânhlo ding,
Ziangahtile a ralpawl cu ralkap rual bangin an ra ih,
Thing hautupawl bangin,
Amah dokalhin hreitlung thawn an ra.
23 Annih in a tupi an hau ding,
Hmuh ding a um nawn riai lo ding, Jehovah in a ti,
Khaukhuappawl hnakih tamsawn le
Siar cawk lo si hai hmansehla.
24 Izip fanu cu a ning a zak ding;
Anih cu sak lam mipawl kut ih pek a si ding,» tiin.

46:14a Nof: Hihi Memfis khawpi a si.

25 Ralkap rualpawlih Jehovah, Israel Pathian in hitin a ti: «Ngai hnik, Thebesh khawpi ih aAmon, Faro le Izip, an pathianpawl le an siangpahrangpawl thawn dān ka tat hai ding; Faro le amah rinsantupawl rori cu. 26 Cule anmahpawl cu an nunnak hawltupawl kut, Babilon siangpahrang Nebukhadnezzar le a siahhlawhpawl kut ah ka pe ding. Cuihhnu ah Izip cu a hlan vekin luah a si leh ding, Jehovah in a ti.

46:25a Amon: Izip pathian a si.

Pathian in Israel a Kilhim Ding

27 «Asinan nang ka siahhlawh Jakob, ṭih hlah aw;
Maw Israel, thlaphângin um hlah!
Ziangahtile, ngai hnik, hlapi ihsin ka lo run ding ih,
Na cithlah cu ralkaih an sinak ram ihsin;
Jakob a ra tlungkir ding, ih cule an cawlhahdam ding, cule thawvéng in an um ding;
Zohman in thlaphang ko an tuah lo ding.
28 Maw Jakob ka siahhlawh, ṭih hlah, Jehovah in a ti,
Ziangahtile ka lo umpi a si;
Ziangahtile ka lo hnawhsuahnak ih
Miphunpawl hmuahhmuah ka hlorálter verver ding.
Asinan nang cu ka lo hlorálter verver lo ding.
Dik zetin nun ka lo rĕm ding,
Ziangahtile dāntatnak lo pe loin ka lo tān lo ding,» tiin.

47

Filisṭia parih Thuṭhennak

1 Faro in Gaza a doneh hlan, Filisṭia-mipawl thuhla ih profet Jeremiah hnenih thleng Jehovah kamsuakthu:

2 Jehovah in hitin a ti,

«Ngai hnik, sak lam ihsin tipi a tho ih,
Tilian maktak a si ding;
Ram a cîm ding ih, a sungih um hmuahhmuah thawn,
Khawpi le a sungih cêngpawl khal;
Cun mipapawl an au ding ih,
Ram luahtupawl hmuahhmuah an râk ding.
3 A rángpawlih ke awn thlurhthlo thawmvâng ah,
A ránglêngpawl awn durdo ah,
A lêng kepawl awn hngawr thâwm ah,
Ralṭhatnak tlaksăm ruangah,
Fāte hrangah palepawl an hawikir lo,
4 Filisṭia-mi hmuahhmuah răm ni,
Ṭaiar le Sidon ihsin a umsŭn mi bawmtu kip sahcat ni a thlen ruangah;
Ziangahtile Jehovah in Kaftor tikulh ih nungdam umsŭn,
Filisṭia-mipawl a răm ding.
5 Gaza parah lukawlhnak a rak thleng,
Ashkelon cu sahcat a si,
Maw an phaikuam ih mitāngsŭnpawl,
Ziang tik tiang so nanmah le nanmah nan âtaw ding?
6 A ze, Jehovah ralnâm,
Ziang tik tiang so cawl loih na um ding?
Na kawm sungah lut aw,
Cawl awla, daiten um aw!
7 Jehovah in ti ding a pek si ah cun,
Ziangtin so daiten a um thei ding?
Ashkelon le tipi kap do dingin,
A ruat fawn si ah cun,» tiin.

48

Moab parih Thuṭhennak

1 Moab thuhla.

Ralkap rualpawlih Jehovah, Israel Pathian in hitin a ti:

«Nebo cu a hmakhua a pit!
Ziangahtile anih cu răm a si,
Kirjathaim cu ningzak ko tuah le lâk a si;
Kulhhnget cu ningzak ko tuah le tisiat a si.
2 Moab in lăwm a hlawh nawn lo;
Heshbon ah amah dokalhin thil ṭhalo khua an khâng:
‹Ra uh, miphun pakhat a sinak ihsin sâtcat uhsi,› tiah an ti.
Maw Madmen khua, nang khal hauthluk na si ding!
Ralnâm in a lo dawi ding.
3 «Horonaim ihsin auaw a um ding:
‹Rămnak le siatnak maksak cu!› tiin.
4 Moab cu tisiat a si;
A fahniang tetepawl an ṭap;
5 Ziangahtile Luhith Kaisohnak ah ṭap phahin an kai;
Ziangahtile Horonaim sukthlaknak ah siatnak ṭah thâwm an thei.
6 Ramṭhing ih junipa vek si dingin
Tlânse uh, nan nunnak runsuak uh!
7 Na hnaṭuanpawl le na hlawnthilpawl na rinsan ruangah,
Nangmah khal kaih na si ding.
Cule aKemosh cu sál ah a feh ding,
A puithiampawl le a bawipawl thawn.
8 Mirămtupawl khaw kip ah an ra ding ih,
Zohman an tlânsuak lo ding.
Phaikuam khal a hlorál ding ih,
Phairawn khal siatsuah a si ding, Jehovah ih a rak sim vekin.
9 «A tlânsia ih, a zamhloh theinak dingah
Moab cu thla pe uh;
Ziangahtile a khawpipawl cu an ṭhing ding,
Cu tawkah zohman an cêng lo ding.
10 Daithlang zetih Jehovah hna a ṭuantu cu camsiatin um seh,
Cule thisen lak ihsi a ralnâm sūptu cu camsiatin um seh.
11 «Moab cu a no lai ihsin ralmuangin a um;
Thâwl khatin thâwl khat ih tlĕng loin,
A bawm ah a um ringring,
Sáltannak khalah a rak feh lo.
Curuangah a thawtnak cu amah ah a tāng ih,
A rim khal a thlengaw dah lo.
12 Curuangah ngai hnik, nipawl cu an thleng a si, Jehovah in a ti,
A thletu ding sabitzu ṭuantu ka thlah ding ih,
A bungbelpawl a lawngter ding,
Cule thâwlpawl a khuai ding.
13 An rinsan mi Bethel cu Israel in a zahpi bangin,
Moab in Kemosh a zahpi ding.
14 ‹Kanmah cu micak le raldonak ih micak kan si,› tiah ziangtin na ti thei?
15 Moab cu răm a si ih, a khawpipawl ah mi an so;
A hril mi tlangvalpawl cu mi thattu kut ah an tlu, a hmin ralkap rualpawlih Jehovah ti mi Siangpahrang in a ti.
16 Moab-ih vanduainak cu a thleng cing ding,
Cule a zăwnzaihnak cu rang zetin a thleng ding.
17 Nannih a kimvelih umpawl hmuahhmuah in amah cu ṭah uh;
Cule nannih a hmin theitupawl hmuahhmuah in,
‹Ziangtin so kianghrăwl cak cu a kiak,
A mawi zet mi fungfek cu!› tiah ti uh.
18 Nang fanu, Dibon luahtu,
Na ropitnak ihsin ṭum awla,
Leiro ah to aw;
Ziangahtile Moab rămtu cu na parah a thleng,
Anih in na hauhruangpawl a siatbăl.
19 Maw Aroer luahtu,
Lamzin kapah ding awla, thlir aw;
A tlânsepa le
A tlânsuaknu kha sut aw;
‹Ziang a cang,› tiah ti aw.
20 Moab cu a mualpho, ziangahtile anih cu siatbăl a si.
Râk awla, ṭap aw!
Moab cu tisiat a si tiin Arnon tiva kapah phuang uh.
21 Phairawn ram ah thuṭhennak a thleng:
Holon, Jahzah le Mefaath parah,
22 Dibon, Nebo le Diblathaim parah,
23 Kirjathaim, Beth Gamul le Beth Meon parah,
24 Kerioth le Bozrah parah
Moab ram khawpipawl hmuahhmuah a hla le a nai parah.
25 Moab ki cu sahtan a si ih,
A bān cu khiah a si, Jehovah in a ti.
26 Jehovah dokalhin a khaisanawk ruangah
Ri ko tuah uh.
Moab cu amai luak lakah a tâl ding ih,
Amah cu hnihsan a si fawn ding.
27 Ziangahtile Israel cu na hrangah hnihsuakza a si lo maw?
Amah cu fifirpawl lakah hmuh a si maw?
Ziangahtile a thuhla na rel tinten
Hmuhsuamin na lu na thing.
28 «Maw nannih Moab ih cêngpawl,
Khawpipawl tansan uhla lungkhāmhrap lakah cêng uh,
Cule pûk kâ kapih thuro busâm vek si uh.
29 Moab hngalzia hna in kan rak thei,
Anih cu a puarthau tuk lawmmam,
A pawrhawkzia le a duhawkzia, a hngalzia le
A thinlung uanawkzia pawl tla.
30 A thinlingzia ka thei, Jehovah in a ti,
Asinan cucu zianghman a ṭhahnem lo;
A tluangkhawnnak cun zianghman a hngăwng lo.
31 Curuangah Moab hrangah ka râk ding ih,
Moab zate hrangah ka ṭap ding;
Kir Heres mipawl ka sūn ding.
32 Maw Sibmah sabit hmuan! Jazer ṭahnak thawn ka lo ṭah ding.
Na hngeṭekpawl cu tipi tlun an thleng,
Jazer tipi an bān.
Na ṭhal thing rah le na sabit rah cu siatsuahtu in a tuam.
33 Aipuannak le lungawinak cu
Thing rah tam zetnak lóram ṭha ihsin le
Moab ram ihsin lakhlo a si;
Sabit sawrnak ihsin sabitzu ka cemter;
Zohman in au phahin an cîl nawn lo ding,
A aunak cu aipuan au a si lo!
34 «Heshbon ihsin Elealeh le Jahaz tiang an au,
An aw an suah,
Zoar ihsin Horonaim tiang le
Eglath-shelishiyah tiang,
Ziangahtile Nimrim tipi khal a kāng ding.
35 Cuihtlunah, hmun sângpawl ih thawinak hlantu le
A pathianpawl hnenih rimhmui urtu cu
Moab ah ka cemter ding, tiah Jehovah in a ti.
36 Curuangah ka thinlung cu phirivau bangin Moab hrangah a ṭap ding ih,
Phirivau bangin Kir Heres mipawl hrangah ka thinlung a ṭap ding.
Curuangah an khawl mi lennakpawl an hlorál.
37 Ziangahtile lu hmuahhmuah mehkawlh a si ding ih, khahmul i kip meh a si ding;
Kut hmuahhmuah ah a si ding ih, tâipawl ah buri-hnipuan ven a si ding.
38 Moab inn tlun hmuahhmuah ah le
A kăwtthler ah ṭahnak a um ding;
Ziangahtile Moab cu duh nawn lo mi bungbel bangin ka khuai a si, Jehovah in a ti.
39 A va se lawmmam ve!
An va ṭap nasa ve!
Moab cu ningzahnak thawn dunglet a hawi!
Cutin Moab cu hnihsan a si ding ih,
A kiangkapih um hmuahhmuah hrangah tuksumza a si ding.»
40 Ziangahtile Jehovah in hitin a ti:
«Ngai hnik, anih cu muvanlai bangin a zam ding ih,
Moab dokalhin a thla a pharh ding.
41 Keriot cu kaih a si ih,
A hauhruangpawl cu kulhkhŭm an si;
Cuih ni ah Moab micakpawlih thinlung cu
Nunau fahrinnat tuar cān ih thinlung vek a si ding.
42 Jehovah dokalhin a khaisanawk ruangah,
Moab cu miphun pakhat sinak ihsin tisiat a si ding.
43 Maw Moab luahtu,
Na parah ṭihnak, khur le tháng a um ding, Jehovah in a ti.
44 Ṭihnak ihsin a tlânsetu cu khur sungah a tla ding ih,
Khur sung ihsin a suaktu cu tháng in a awk ding.
Ziangahtile a parah, Moab par rori ah
An dāntatnak kum ka thlengter ding, Jehovah in a ti.
45 Cauh ruangah Heshbon thlahlim tăngah a tlânsepawl an ding.
Asinan Heshbon ihsin meisa a suak ding,
Sihon ihsin meialh,
Cule Moab beksám a kāngfai ding,
Buainak ngainatupawlih lu ruh a kāng.
46 Maw Moab, na hmakhua a pit a si!
Kemosh-ih milaipawl an hlorál;
Ziangahtile na fapapawl cu ralkaih ih hruai an si ih,
Na fanupawl khal ralkaih ih hruai an si.

48:7a Kemosh: Moab pathian a si.

47 Cucingin ni neta ah, Moab vanneihnak cu ka dinṭhasal leh ding, Jehovah in a ti,» tiin. Moab parih thuṭhennak cu hitin a cem.

49

Ammon parih Thuṭhennak

1 Ammon-mipawlih thuhla.

Jehovah in hitin a ti:

«Israel in fapapawl tla a nei lo maw?
Rosartu teh a nei lo maw?
Ziangahso Milkom in Gad cu ro ah a co ih,
A khawpipawl ah a minungpawl an cēn?
2 Curuangah ngai hnik uh, a tikcucān cu a thleng ding a si, Jehovah in a ti,
Ral do awthâwm ka theihter hai ding,
Rabbah khua ah, Ammon-mipawl;
Anih cu thil se penkhawm ah a cang ding ih,
A khawṭekpawl cu meisa ih ur an si ding.
Cule Israel in ro ih a co mi cu a la ding, Jehovah in a ti.
3 «Maw Heshbon, râk rero aw, ziangahtile Ai khua cu răm a si!
Nannih Rabbah fanupawl, ṭap uh,
Buri-hnipuan hruh uh!
Ṭap uhla, kulh sungah tlankûal rero uh;
Ziangahtile Milkom cu a puithiampawl le a bawipawl thawn sáltannak ah an fehtlang ding.
4 Ziangahso na phaikuampawl na tluangkhawnpi?
Na phaikuam cu a hlorál rero a si, Maw dungtawlh fanu.
A hlawnthilpawl rinsan in,
‹Zo in so i do ding?› tiah na ti.
5 Ngai hnik, na parah ṭihnak ka thlĕn ding,
Na kimvelih umtupawl hmuahhmuah hnen ihsin, ralkap rualpawlih Bawi Jehovah in a ti;
Raltlânpawl cu fĭnkhawmtu ding zohman nei loin,
Ṭhekdarh seksek nan si ding.

6 «Asinan cuihhnu ah Ammon-mipawlih vanneihnak cu ka dinṭhasal leh ding, Jehovah in a ti,» tiin.

Edom parih Thuṭhennak

7 Edom thuhla.

Ralkap rualpawlih Jehovah in hitin a ti:

«Teman ah fimnak a um nawn lo maw?
Khawruatthiam hnen ihsin thurawnpek a cemrál maw si?
An fimnak a ziamrál maw si?
8 Maw Dedan luahtupawl, tlânsia uh, kirsal uh, hmun thuk ah um ta uh!
Ziangahtile amah cu dān ka tat tikcān ah,
Esau vanduainak cu a parah ka thlengter ding.
9 Sabit rah lo tupawl na hnenih an rat asile,
Lawh hrelh mi lêp an tân ta lo ding maw?
Zan ah fifirpawl in,
An ṭul zăt lawng an ru lo ding maw?
10 Asinan Esau cu ka kawlawngter;
A hmun thuppawl ka hlít ih,
A relh thei lo ding.
A tesinfapawl cu răm an si,
A unaupawl le a innhnenpawl cu,
Cule amah khal a um nawn lo.
11 Pa nei lo na falepawl cu tân aw,
Nungdam ten ka kilveng hai ding;
Cule na nuhmeipawl in keimah in rinsan hai seh,» tiin.

12 Ziangahtile Jehovah in hitin a ti: «Ngai hnik, no in dingih thuṭhensak lo mipawl in an in ngaingai. Nang cu dāntat loih fehlan ding na si maw? Dāntat loin na fehlan lo ding, cumi cu na in hrimhrim sawn ding. 13 Ziangahtile keimah le keimah salawin sia ka săm a si, Bozrah cu miṭhihṭhaihnak, hmuhsuam mi, hmun lawnglak le camsiat mi ah a cang ding. Cule a khawpipawl hmuahhmuah cu a răm lan ta ding, Jehovah in a ti,» tiin.

14 Jehovah hnen ihsin thucah ka thei ih,
Palai cu miphunpawl hnenih thlah a si:
«Fĭnkhawm aw uhla, amah cu do uh,
Cule ral do dingin tho uh!
15 Ziangahtile, ngai hnik, nangmah cu miphunpawl lakah fate ko ka lo tuah,
Minungpawl lakah hmuhsuam na si.
16 Ṭihnungza na sinak in a lo bum zo,
Na thinlung hngalnak in,
Maw nang lungkhamhrâppawl lakih cêng,
Tlang sâng luahtu!
Muvanlai bangin sângpi ah na bu sâm khal awla,
Cutawk ihsin ka lo dirthla ding, Jehovah in a ti.
17 «Edom cu miṭhihṭhaihnak ah a cang ding;
A kiangih fehtu pauhpauh an khawruah a har ding ih,
A hriamhma parah an cekcek ding.
18 Sodom le Gomorrah le an khaw innhnenpawl siatbăl an si vekin,
Cu tawkah zohman an tâng nawn lo ding ih,
Cu tawkah milai an cêng lo ding, Jehovah in a ti.
19 Ngai hnik uh,
Tidai kāng dah lo ran tlannak hmun dokalhih Jordan phūl lak ihsi kiosa a soh bangin
Anih cu a so ding;
Asinan hmakhatteah amah cu cuih hmun ihsin tlânhlo ko ka tuah ding.
Cule a tlunih thuneitu dingah ka hril mi cu ka ruat ding.
Ziangahtile keimah bang cu zo a si?
Zo in so thuṭhennak ih i kawh ding?
Ka hmaiih ding thei cuih tuukhāltu cu zo a si?
20 Curuangah Edom dokalhih a rak pek mi Jehovah-ih khawkhannak le
Teman luahtupawl dokalhih a tumtah mipawl hi ngaithla uh:
Rante rual lakih a fatebikpawl tiangin dirhsuah an si tengteng ding;
Anih in an cēnnak hmunpawl cu anmah thawn a kawlawngter tengteng ding.
21 An tlûk thâwm ah leilung a hnîn;
Ṭahthâwm cu Tipi Sen ihsin theih a si.
22 Zoh hnik uh, anih cu a hung so ding ih, muvanlai bangin a zam ding,
Cule Bozrah dokalhin a thla a pharh ding;
Cuih ni ah Edom micakpawlih thinlung cu
Nunau fahrinnat tuar thinlung vek a si ding,» tiin.

Damaskas parih Thuṭhennak

23 Damaskas thuhla.

«Thuthang sia an theih ruangah,
Hamath le Arpad cu an ning a zak;
An thinlung a cau;
Tipi kapah vansanglămnak a um;
Cumi cu rehter theih a si lo.
24 Damaskas a ṭawnṭai thlang,
Tlânsehlo dingin a heraw ih,
Ṭihnak in amah cu a kaingah.
Nunau fahrinnat tuar vekin, amah cu ānhainak le riahsiatnak in a rak kai.
25 Ka aipuannak khawpi, an simfak mi khawpi cu ziangtin so tlansan a si thlang lo?
26 Curuangah cuih ni ah a tlangvalpawl cu kăwtthler ah an tlu ding ih,
Ral do thiampawl hmuahhmuah cu duaiter an si ding, ralkap rualpawlih Jehovah in a ti.
27 Damaskas kulh ah meisa ka muah ding ih,
Ben-Hadad siangpahrang innpawl a kāngral ding,» tiin.

Kedar le Hazor parih Thuṭhennak

28 Babilon siangpahrang Nebukhadnezzar ih a neh mi Kedar thuhla le Hazor lalrampawl thuhla.

Jehovah in hitin a ti:

«Tho uh, Kedar ah so uhla,
Nisuahnak lam mipawl siatsuah uh!
29 An puanthlampawl le an rante rualpawl an lakhlosak ding.
An puanzarpawl cu anmai hrangah an la ding,
An bungbelpawl le an kalaukpawl hmuahhmuah thawn;
Cule, ‹Kil kip ah ṭihnak a um!› tiah pakhat le pakhat an auhaw ding.
30 Nannih Hazor luahtupawl,
Tlânse uh, hlapi ah feh uh, hmun thuk ah cêng uh! Jehovah in a ti.
Ziangahtile nanmah dokalhin Babilon siangpahrang in khua a khang zo ih,
Nanmah dokalhin tumtahnak a nei.
31 Ralmûang zet le him zetih cêng miphun dokalhin tho uhla so uh,
Kăwtkapawl le a kharpawl khal nei lo,
Mah lawngih cêng hnenah, Jehovah in a ti.
32 An kalaukpawl cu ralthillâk hrangah an si ding ih,
An sumhnám tam zet cu rallâksum hrangah.
Sam tawipawl cu thli lakah ka thehdarh hai ding ih,
An vanduainak cu kil kip ihsin ka thlengter ding, Jehovah in a ti.
33 Hazor cu sihálpawl cēnnak a si ding, a răm kumkhua ta ding;
Cu tawkah zohman an um lo ding ih,
Milai zohman an cêng lo ding,» tiin.

Elam parih Thuṭhennak

34 Judah siangpahrang Zedekiah a lal thăwk pek ih Elam thuhla profet Jeremiah hnenih Jehovah kamsuakthu thleng cu hitin a si, 35 Ralkap rualpawlih Jehovah in hitin a ti:

«Ngai hnik, an cahnakbik
Elam-ih thál ka khiak ding.
36 Elam parah van kil li ihsin thli pali ka thlengter ding ih,
Cuih thlipawl lamah ka ṭekdarhter hai ding;
Hnawhsuah mi Elam fehlonak miphun a um lo ding.
37 Ziangahtile Elam cu an ralpawl hmaiah le,
An nunnak hawltupawl hmaiah thlaphâng ko ka tuah hai ding.
An parah thil ṭhalo ka thlengter ding,
Ka thinhengnak nasazet rori cu, Jehovah in a ti;
Cule anmah ka eirál thluh lai hlanlo,
An dung thlunin ralnâm ka thlah ding.
38 Cule Elam ah ka laltokham ka ret ding ih,
Siangpahrang le bawipawl ka siatsuah ding, Jehovah in a ti.
39 Asinan ni neta ah hitin a si ding:
Elam vanneihnak ka dinṭhasal leh ding, Jehovah in a ti,» tiin.

50

Babilon le Babilon-mipawl parih Thuṭhennak

1 Babilon thuhla le Kaldia-mipawlih ram thuhla ih profet Jeremiah hmangin Jehovah ih sim mi kamsuakthu.

2 «Miphunpawl lakah thăn uh,
Phuang uhla, thantar khai uh;
Phuang uh, thup hlah uh:
‹Babilon cu lâk a si, Bel cu ningzak ko tuah a si.
Merodak cu a kuaidarh ṭheh;
A milempawl an mualpho,
A milimpawl an kuaidarh ṭheh,› ti uh.
3 Ziangahtile sak lam ihsin amah do dingin miphun pakhat a ra,
Cumi cun a ram ṭhing ko a tuah ding ih,
Cu tawkah zohman an cêng lo ding.
An ṭhawnhlo, an suahsan,
Minung le ramsa in.
4 Cuih ni le cuih tikcucān ah, Jehovah in a ti,
Israel tefapawl an ra ding,
Anmah le Judah tefapawl;
Ṭap phah rero in an ra ding ih,
Jehovah an Pathian an hawl ding.
5 Zion lam hawiin
Zion lamzin an sut ding,
‹Ra uh, hngilh lo ding mi kumkhaw thukham ah
Jehovah run kăwp uhsi,› tiah an ti ding.
6 Ka mipawl cu tuu hlo an rak si;
Anmah khāltupawl in an hruaipêng;
Tlang parah an pialhloter.
Tlang pakhat ihsin tlang dangah an feh rero;
An cawlhnak hmun an hngilh.
7 Anmah hmutu hmuahhmuah in anmah cu an eirál;
Cule an doralpawl in, ‹Kannih kan mawh lo,
Diknak luahtu Jehovah,
An pupápawlih ruahsannak Jehovah dokalhin thilsual an tuah ruangah a si,› tiah an ti.
8 Babilon ram ihsin tawivâk uhla, Kaldia ram ihsin suak uh; rante rual hmaihruaitu mecang tluk fangah cang ve uh.
9 Ziangahtile ngai hnik, Babilon run do dingin sak lam ram ihsin miphun maksak rual pungkhawmaw cu ka thoter ding ih ka păwkter ding,
Cule amah do dingin an tlaraw ding;
Cutawk ihsin anih cu kaih a si ding.
An thálfungpawl cu kut lawngih tlung lo raldothiampawl vek an si.
10 Cule Kaldia cu răm a si ding;
Amah rămtu hmuahhmuah an tlái ding, Jehovah in a ti.
11 «Maw nannih ka ro siatsuahtupawl,
Nan lungawi ruangah, nan aipuan ruangah,
Thlairawl cîl câwla bangin nan khir ruangah le
Rángcang bangih nan ai ruangah,
12 Nasazetin nan nu a ning a zak ding;
A lo hringtunu a ning a zak ding.
Ngai hnik uh, anih cu miphunpawl lakih fatebik, ramṭhing, ramro le thlaler a si ding.
13 Jehovah thinlingnak ruangah
Anih cu luah a si lo ding,
Cuhnakin a ṭhing sawn ding.
Babilon kiangih a fehtu kip cu an lâu ding ih,
A hriamhma hmuahhmuah parah an cekcek ding.
14 Nannih thál nawptupawl,
Babilon do dingin a kimvel hmuahhmuah ah tlar aw uh;
Amah cu sai uh, thálfungpawl sūp hlah uh,
Ziangahtile anih cu Jehovah parah thilsual a tuah.
15 A kimvel hmuahhmuah ah amah dokalhin au uh,
A ṭhuampawl an tlu,
A kulhpawl an cim;
Ziangahtile himi cu Jehovah phulei samnak a si.
A parah phulei sam uh.
Mi dang parih a tuah vekin a parah tuah uh.
16 Babilon ihsi thlaici vawrhtu le,
Fâng ah cān ih favah kaitu that uh.
Ziangahtile palbĕttuih ralnâm ṭih ruangah
Mi kip anmai miphun cio hnenah an kir ding ih,
Mi kip anmai ram cio ah an tlânse ding.
17 Israel cu tuu rual vâkdarh vek a si;
Kiosapawl in an dawihlo.
A hmaisabikah Assiria siangpahrang in a eirál,
Netabikah Babilon siangpahrang Nebukhadnezzar in a ruhpawl a khiahsak,» tiin.

18 Curuangah ralkap rualpawlih Jehovah, Israel Pathian in hitin a ti:

«Ngai hnik uh, Assiria siangpahrang dān ka tat bangin,
Babilon siangpahrang le a ram cu dān ka tat ding
19 Asinan Israel cu a tlimno umnak hmun ah ka hruaikirsal ding ih,
Karmel le Bashan ah tlimno a piat ding;
Efraim le Gilead tlang ram ah a tlái ding.
20 Cuih ni le cuih tikcucān ah, Jehovah in a ti,
Israel mawhsualnak cu hawl a si ding, asinan a um lo ding;
Cule Judah sualpawl khal hawl a si ding, asinan hmuh a si lo ding;
Ziangahtile ka kilhim mipawl cu ka ngaidam hai ding.
21 «Merathaim ram do dingin so uh, amah cu do uhla,
Pekod luahtupawl do uh.
Rămter uhla, siatsuah verver uh, Jehovah in a ti,
Thu ka lo pek mi hmuahhmuah bangtukin tuah uh.
22 Ram sungah raldo thâwm a um,
Rapthlak zetih siatnak cu.
23 Leilung pumpi sobul cu sahtan a si ih a va kekkuai nasa ve!
Miphunpawl lakah Babilon cu miṭhihṭhaihnak ah a cang!
24 Maw Babilon, na hrangah tháng ka kam ih, na theih hlanah awh na si,
Hmuh na si ih kaih na si,
Ziangruangahtile Jehovah na rak do.
25 Jehovah in a ralthuam retnak a áwng ih,
A aithawknak hriamhreipawl a lasuak;
Ziangahtile himi cu Kaldia-mipawl ram ih,
Ralkap rualpawlih Bawi Jehovah hnaṭuan a si.
26 A hlatbiknak ramri ihsin ra uhla amah cu do uh,
A thilretkhawmnak inn cu áwng uh;
Amah cu thilsia penkhawm vekin hlăwn uhla,
Amah cu siatsuah verver uh;
A thil zianghman tān si hlah seh.
27 A câwpa tûaipawl zaten that uh,
Sathattu hnenah suk hai seh.
An hmakhua a pit a si!
Ziangahtile an cān a thleng zo, dāntat an sinak tikcucān cu.
28 Zion ah Jehovah kan Pathian ih phubalaknak, a Temple hrangih phubalaknak thăn dingin,
Babilon ram ihsi tlânsia le tlânsuakpawl ih aw a um.
29 Babilon do dingin thálsaithiam tampi kokhawm uh.
Nannih thál nawptupawl hmuahhmuah,
Amah dokalhin a kimvel hmuahhmuah ah ṭanhmunkhuar uh;
Pakhat hman tlânsuakter hlah uh.
A thil ti bangtukin lehrūl uh;
A tuah mi hmuahhmuah bangtukin a parah tuah uh;
Ziangahtile anih cu Jehovah dokalhin,
Israel-ih Mi Thianghlim dokalhin a puarthau,
30 Curuangah a tlangvalpawl cu kăwtthler ah an tlu ding ih,
A ral do mipapawl cu cuih ni ah duaiter an si ding, Jehovah in a ti.
31 «Ngai hnik, maw nang lungruh pa, nangmah ka lo do a si, ralkap rualpawlih Bawi Jehovah in a ti;
Ziangahtile na ni a thleng zo,
Nangmah dān ka lo tat ding tikcucān cu.
32 Mipuarthaubik a bah ding ih a tlu ding,
Cule zohman in an kaitho lo ding;
A khawpipawl ah meisa ka muah ding ih,
A kimvel hmuahhmuah a kāng ṭheh ding,» tiin.

33 Ralkap rualpawlih Jehovah in hitin a ti:

«Israel tefapawl cu palbĕt an si,
Judah tefapawl khal;
Ralkaih ih hruaitu hmuahhmuah in hnget zetin an kai;
Thlah an siang lo.
34 Anmah Tlentu cu a cak;
A hmin cu ralkap rualpawlih Jehovah a si.
Cule ram sungih cawlhhahdamnak a pek hai theinak dingah le
Babilon luahtupawl a tibuai theinak dingah
Cipciarin an thuhla a ngensak hai ding.
35 «Ralnâm in Kaldia-mipawl a do,
Babilon luahtupawl a do ih,
A bawipawl le a mifimpawl a do, Jehovah in a ti.
36 Ralnâm in aizohthiampawl a do ih, anmah cu mi-â ah an cang ding.
A micakpawl cu ralnâm in a do ih, an thla a phâng ding.
37 Ralnâm in an rángpawl a do,
An ránglêngpawl a do ih,
An lakih um miphun căwkcawrawipawl hmuahhmuah a do;
Cule annih cu nunaupawl vekah an cang ding.
Ralnâm in a hlawnthilpawl a do ih, annih cu răm an si ding.
38 Khawkheng in a tidaipawl a do ih, an kāng thluh ding.
Ziangahtile himi cu khercawp milimpawlih ram a si ih,
An milempawl an atcilh.
39 Curuangah cu tawkah nelrawn ramsapawl cu sihálpawl thawn an cêng ding ih,
Kalauk vapawl khal cu tawkah an cêng ding.
Cuih hmun cu kumkhuain luah a si nawn lo ding ih,
San khat hnu san khat cuih hmun cu luah a si lo ding.
40 Pathian in Sodom le Gomorrah le a khaw innhnenpawl a tisiat vekin
Cu tawkah zohman an um lo ding ih,
Milai zohman an cêng lo ding, Jehovah in a ti.
41 «Zoh hnik, sak lam ihsin mipi bur khat an ra ding ih,
Leilung dĕng ihsin
Miphun ropi le siangpahrang tam zet an ra suak ding.
42 Annih in thálpawl le feipipawl an keng ding;
Annih cu an nun a râwng ih, zahngainak an langter lo ding.
An aw cu tipi vekin a hûk ding;
Ráng an to ding,
Ral do dingih mi pakhat tiaraw bangin an tlaraw ding,
Nangmah dokalhin, Maw Babilon fanu.
43 An thuhla thăn mi cu Babilon siangpahrang in a rak thei ih,
A kut a zăwi ṭheh.
Ānhainak in amah cu a kai,
Nunau fahrinnat tuar vekin.
44 «Ngai hnik uh, tidai kāng dah lo ran tlannak hmun dokalhih Jordan phūl lak ihsi kiosa a soh bangin
Anih cu a so ding,
Asinan hmakhatteah amah cu cuih hmun ihsin tlânhlo ko ka tuah ding.
Cule a tlunih thuneitu dingah ka hril mi ka ruat ding.
Ziangahtile keimah bang cu zo a si?
Zo in so thuṭhennak ih i kawh ding?
Ka hmaiih ding thei cuih tuukhāltu cu zo a si?
45 Curuangah Babilon dokalhih a rak pek mi Jehovah khawkhannak le
Kaldia-mipawlih ram dokalhih a rak tumtah mipawl hi ngaithla uh:
Rante rual lakih a fatebikpawl tiangin dirhsuah an si tengteng ding;
Anih in an cēnnak hmunpawl cu anmah thawn a ṭhingter tengteng ding.
46 Babilon an kaihnak awthâwm ah
Leilung a hnîn ih,
Miphunpawl lakah a ṭah aw theih a si,» tiin.

51

Babilon Siat Ververnak

1 Jehovah in hitin a ti:

«Ngai hnik, Babilon parah,
aLeb Kamai ih cêngpawl parah
Siatsuahnak thinlung ka căwktho ding.
2 Cule amah theh dingin le a ram lawnglakter dingin
Babilon ah thehtupawl ka thlah hai ding.
Ziangahtile siatnak ni ah
Annih cun a kimvel hmuahhmuah in an do ding.
3 Amah dokalhin thálsalthiam in a thál nawp sehla,
A ralthuam thawn amah dokalhin ding seh.
A tlangvalpawl kha zuah hai hlah;
A ralkap hmuahhmuah that thluh verver aw.
4 Cutivekcun thah mipawl cu Kaldia-mipawlih ram ah an rīl ding ih,
Sŭntlăng mipawl cu a kăwtthler ah.
5 Ziangahtile an ram cu Israel-ih Mi Thianghlim parih mawhnak in a khat ko na cingin,
Israel cu a Pathian, ralkap rualpawlih Jehovah in, a hngilh lo, Judah khal.
6 Babilon lak ihsin tlânse aw,
Cule mi kip an nunnak runsuak hai seh!
Dāntat a sinak ah hlorálawter hlah,
Ziangahtile hihi Jehovah ih phubalak cān a si;
Anih in amah cu phuba a la ding.
7 Babilon cu leilung hmuahhmuah ritertu,
Jehovah kut ih um sui no a si,
Miphunpawl in a sabitzu an in;
Curuangah miphunpawl cu an â ṭheh.
8 Rinlopiin Babilon cu a tlu ih a siat.
Ṭah uh!
A natnak hrangah thing hnâi run keng uh,
A dam mahna.
9 Babilon cu tidam kan tum nân,
A dam cuang lo.
Tlansan men uhla, mi kip mai ram cio ah feh uhsi;
Ziangahtile thu an ṭhensaknak in van a tăwng ih, van boruak tiang khaisan a si.
10 Jehovah in kan dingfelnak a phuanglang zo.
Ra uhla, Jehovah kan Pathian thil ti cu Zion ah thăn uhsi.
11 «Thálfungpawl tathriam uh!
Thálfung bawm khatter uh!
Jehovah in Medes siangpahrangpawlih thinlung a thoter.
Ziangahtile a khawkhan mi cu Babilon dokalhih tisiat ding hi a si,
Ziangruangahtile cucu Jehovah-ih phubalaknak a si,
A temple hrangih phubalaknak cu.
12 Babilon kulh dokalhin thantar thlai uh;
Kiltu tamter uh,
Ralvengtupawl ret uh,
Bawhtu timlam uh.
Ziangahtile Jehovah in Babilon luahtupawl thuhla a rak sim mi thu ah amah in khua a khang ih a hlensuak.
13 Nang tidai tampi kiangih cêng,
Hlawnthil tam ngaingai nei,
Na netnak a thleng a si,
Na tikcucān tawiter a si.
14 Ralkap rualpawlih Jehovah in amah le mah salawin sia a săm,
Kharbawk vekin milai in ka lo khatter tengteng ding ih,
Nangmah dokalhin an ausuak ding.
15 A huham in leilung a tuah;
A fimnak in leitlun a dĭnhnget ih,
A theihthiamnak in van a pharh.
16 A aw a suah tikah, vanpawl ah tidai thâwm a um:
Leilung dĕng ihsin tikhu a kaisoter;
Ruah hrangah nimthlakau a tuah;
A thil retnakpawl sung ihsin thli a suakter.
17 Mi kip cu ruahnak nei lo, theihnak nei lo hlir an si;
Sui ertu kip in khercawp milim hmangin ningzahter an si ding;
Ziangahtile an kher mi milim cu bumawknak men a si ih,
An sungah thaw a um lo.
18 Cupawl cu zianghmanlo men an si, hnihsuakza hnaṭuan an si;
Dāntat an si tikcucān ah, an hlorál ding.
19 Jakob-ih vo cu cuvek a si lo,
Ziangahtile anih cu thil hmuahhmuah Tuahtu a si;
Cule Israel cu ro ih a co mi hnâm a si.
Ralkap rualpawlih Jehovah ti hi a hmin a si.
20 Nang cu ka raldonak hreitlung le raldonak hriamhrei na si:
Ziangahtile nangmah hmangin miphun ka khuai nêknêk ding;
Nangmah hmangin lalrampawl ka siatsuah ding;
21 Nangmah hmangin ráng le a parto cu ka kekkuaiter nêknêk ding;
Nangmah hmangin ránglêng le a totu ka kekkuaiter nêknêk ding;
22 Nangmah hmangin nunau le mipa ka săwprăwpter ding;
Nangmah hmangin tar le mino ka săwpter ding;
Nangmah hmangin tlangval le fala ka săwprăwpter ding;
23 Nangmah hmangin tuukhāl le rante rual ka săwprăwpter nêknêk ding;
Nangmah hmangin lo neitu le a câwcang hngawngkol ka săwprăwpter nêknêk ding;
Cule nangmah hmangin uktupawl le thuneitupawl ka săwprăwpter nêknêk ding.
24 Cule nanmai mithmuhah Zion ah,
Thil ṭhalo an tuah mi hmuahhmuah cu
Babilon le Kaldia luahtupawl hmuahhmuah parah ka lehrūl ding, Jehovah in a ti.
25 «Ngai hnik, leilung hmuahhmuah siatsuahtu,
Maw siatsuahtu tlang, nangmah ka lo dokalh a si, Jehovah in a ti.
Cule na parah ka kut ka thlak ding,
Lungtopawl ihsin ka lo hrilthla ding ih,
Tlang kāng ah ka lo tuah ding.
26 Na hnen ihsin a kilih phum ding mi lungto an la lo ding ih,
Lungphum hrangah lungto khal an la lo ding,
Nang cu na kawlawng kumkhua ding, Jehovah in a ti.
27 Ram sungah thantar tar uh,
Miphunpawl lakah tuupa ki phaw uh!
Amah dokalhin miphunpawl timtuah uh,
Amah dokalhin Ararat, Minni le Ashkenaz lalrampawl ko uh.
Amah dokalhin ralbawipi ruat uh;
Kharbawk bupi bangin, rángpawl hung soter uh.
28 Amah do dingin miphunpawl timtuah uh,
Medes siangpahrangpawl le,
A uktupawl le a thuneitupawl,
A uk mi ram hmuahhmuah thawn.
29 Cule ram cu a khūr ding ih a riah a sia ding;
Ziangahtile Babilon ram luahtu um loih ṭiauter dingin,
Babilon parih Jehovah thil tum hmuahhmuah cu tuahsuak a si ding.
30 Babilon micakpawl ral do an bâng,
An hauhruang sungah an tâng;
An cahnak a cem,
Nunaupawl vekah an cang;
A cēnnak hmunpawl an urkāng,
A kăwtka tlângpawl an kiak.
31 A khawpi pumpi cu lâk a si ti Babilon siangpahrang sim dingah,
Zualko pakhat cu a dang pakhat dungah a tlân ih,
Thuphurtu pakhat cu a dang thuphurtu dungah;
32 Tiva kaipawl phih an si,
Phaikungpawl meisa in an ur ih,
Ral do mipapawl an thla a phâng,» tiin.

51:1a Leb Kamai: Hi ṭawngfángih sullam cu «I dokalhtupawl lakah» tinak a si. Hihi Hebru ṭawng ih «Kaldiamipawl» kawhnak a si, asinan ca ih ngan cun cafáng linglet zawngin a si.

33 Ziangahtile ralkap rualpawlih Jehovah, Israel Pathian in hitin a ti:

«Babilon fanu cu buh cīl tikcucān ih hruihhmun vek a si,
A rei hlanah, amah sengkhâwm cān a thleng ding.
34 Babilon siangpahrang Nebukhadnezzar in i rak eirál, i săwprăwpter;
Bungbel kawlawng ah i tuah,
Rulhreng vekin i dawlh;
A pum cu ka rawl thaw in a khatter,
Anih cun i khaksuak.
35 Ka par le ka sungkhat parih tuah mi thahrumsuahnak cu Babilon parah thleng seh, tiin
Zion luahtu in a ti ding;
‹Ka thisen mawh cu Kaldia luahtupawl parah um seh!› Jerusalem luahtu in a ti ding,» tiin.

36 Curuangah Jehovah in hitin a ti:

«Ngai hnik, na hrangah ka ding ding ih, na hrangah phuba ka sam ding.
A tipi ka kāngter ding ih, a cirhti ka kāngter ding.
37 Babilon cu hnawmpen ah a cang ding,
Sihálpawl cēnnak hmun ah,
Luahtu um loin,
Miṭhihṭhaihnak ah le sisio mi ah.
38 Kiosapawl vekin an hûkkhawm ding,
Kiosa fano bangin an hngirhngir ding.
39 An tha a thawh tikah puai ka tuahsak hai ding;
Lungawiaipuangih an um theinak dingah le
Zianghman thei loin an ihthah lan ih,
An ṭhanglonak dingah
Ka riter hai ding, Jehovah in a ti.
40 Ran thattu hnenah tuufa no bangin ka hruai hai ding,
Tuucangpawl le mepapawl bangin
Ka hruaisuk hai ding.
41 «aSheshak cu ziangtin neh a si thlang ih,
Leilung pumpi ih simfak mi cu ziangtin kaih a si thlang!
Miphun dang lakah Babilon cu mi ih miṭhihṭhaihnak ah a cang!
42 Babilon tlunah tipi a tho;
Anih cu tipi suar tam zetin a khuh.
43 A khawpipawl cu an kawlawng,
Ramro le ramṭhing,
Zohman cēnlonak ram,
Milai zohman ih paltlănglonak ah a cang.
44 Babilon ah Bel cu dān ka tat ding ih,
A rak dawlh mi kha a kă sung ihsin ka lasuak ding;
Cule miphunpawl cu amah ah an luanglutkhawm nawn lo ding.
A si, Babilon kulh a cim ding.
45 Ka mipawl tla, a sung ihsin suak uh!
Cule a nasazet mi Jehovah thinhengnak lak ihsin mi kip runsuak aw uh.
46 Nan thanau hlah seh,
Ram sungih titilenglawng nan theih ding mi ṭih fawn hlah uh.
Ziangahtile kum khat ah titilenglawng a thleng ding ih,
Cuihhnu ah, kum dangah titilenglawng a thleng leh ding,
Ram sungah thahrumsuahnak a um ding, uktu in uktu a do ding.
47 «Curuangah ngai hnik uh,
Babilon milimpawl dān ka tat cān a thleng ding,
A ram pumpi cu ningzakin an um ding ih,
A mithi hmuahhmuah cu a mipi lakah an um ding.
48 Cun vanpawl le leilung le a sungih um hmuahhmuah cu Babilon tlunah
Aipuang zetin an au ding;
Ziangahtile sak lam ihsin rămtupawl a hnenah an thleng ding, Jehovah in a ti.
49 Babilon ruangah leilung minung hmuahhmuah an thih vekin,
Israel-ih mithipawl ruangah Babilon a tlu tengteng ding.
50 «Nannih ralnâm ihsi tlânsuakpawl,
Fehhlo uh! Ding ringring hlah uh!
Hlatpi ihsin Jehovah cîng ringring uhla,
Nan lungthin ah Jerusalem câm ringring seh.
51 Nautatnak kan theih ruangah kan ning a zak.
Ningzahnak in kan hmai a khuh,
Ziangahtile Jehovah inn ih hmun thianghlimpawl ah mikhual an lut.
52 Curuangah ngai hnik, a milimpawl dān ka tat ding tikcucān a thleng ding, Jehovah in a ti.
A ram pumpuluk ah hriam tuar mipawl an hrûm ding.
53 Babilon cu van tăwng khal sehla,
A cahnak hmun sâng cu kulhhnget hmansehla,
Ka hnen ihsin rămtupawl a hnenah an ra ding, Jehovah in a ti.
54 Babilon ihsin ṭah aw a suak ding,
Kaldia ram ihsin siatnak maksak aw khal!
55 Jehovah in Babilon a răm ding ih,
A aw ring reh ko a tuah ding.
A tisuarpawl cu tipi nasazet vekin a hûk ding,
An awthâwm a thang ding.
56 A parah, Babilon parah rămtu a thleng ding ih,
A micakpawl laksak an si ding.
An thálfungpawl a kiak ding;
Ziangahtile Jehovah cu phulei sam Pathian a si,
Famkim zetin phuba a la ding.
57 A bawipawl le mifimpawl,
A ram uktupawl le a bawipawl le a micakpawl ri ko ka tuah hai ding.
Cule an itthat lan ding ih,
An ṭhang lo ding, a hmin ralkap rualpawlih Jehovah ti mi, Siangpahrang in a ti.
58 «Ralkap rualpawlih Jehovah in hitin a ti:
Babilon kulh kaupi cu a cim verver ding ih,
A kăwtka sângpawl cu meisa ih ur a si ding;
Mipi cu an ṭuan lak ding ih,
Meisa ruangah miphunpawl
An tha a cem ding,» tiin.

51:41a Sheshak: Hihi Hebru ṭawng ih «Babilon» kawhnak hmin a si, asinan cafáng linglet zawngih ngan a si.

Seraiah hnenih Jeremiah Thupek

59 Hi thu hi Judah siangpahrang Zedekiah a lal a kum litnak ah Babilon ih amah zawngih feh ve, Mahseiah fapa, Neriah fapa Seraiah hnenih profet Jeremiah ih thupek kamsuakthu a si. Seraiah cu hotu bawi a si. 60 Jeremiah in Babilon parih thil ṭhalo thleng ding hmuahhmuah, Babilon thuhla ngan mi hi kamsuakthupawl hmuahhmuah hi cazual pakhat ah a ngan. 61 Jeremiah in Seraiah hnenah, «Babilon na thlen tikah hi kamsuakthupawl hmuahhmuah hi awsuakin siar aw, 62 cule nang in, ‹Maw Jehovah, minung siseh, ramsa siseh, a sungah zianghman um lo dingin, hi hmun na băl ding thuhla ah na ṭawngsuak zo, kumkhuain a ṭiau lan ta ding,› tiah na ti pei. 63 Cule hitin a si ding, hi cazual na siar ṭheh tikah, lungto ṭawn cih awla, Zufraṭis Tiva sungah hlăwn aw. 64 Cun, ‹Babilon cu hitivekhin a pil ding ih, a parih vanduainak ka thlĕn ding mi ihsin a tho lo ding. Cule an tha a cem ding,› tiah na ti pei,» tiah a ti.

Hi vial hi Jeremiah kamsuakthupawl cu an si.

52

Jerusalem Tlûknak Thlirsalnak

1 Zedekiah cu siangpahrang a si tikah kum 21 mi a si ih, Jerusalem ah kum hleikhat sung a lal. A nuih hmin cu Hamutal a si ih, Libnah khawmi Jeremiah fanu a si. 2 Jehoiakim ih a tuah mi hmuahhmuah bangtukin, Jehovah mithmuhah anih khal in thil ṭhalo a tuah. 3 Jehovah thinhengnak ruangah, a hmaika ihsin anmah hlăwnsuak tiangin, hihi Jerusalem ah le Judah ah a cang. Cun Zedekiah cu Babilon siangpahrang parah a hél.

4 Cule Zedekiah a lal a kum kuatnak, a thla hratnak, cuih thla ni hra ah, Babilon siangpahrang Nebukhadnezzar le a ralkap rual zaten Jerusalem an do ih, cumi dokalhin ṭanhmun an khuar; cule cumi kimvel hmuahhmuah ah kulhkhŭmnak sunpâwng an tuah. 5 Khawpi cu siangpahrang Zedekiah kum hleikhat a uk tiangin kulhkhŭm a si. 6 Thla litnak, cuih thla ni kuatnak ah, khawpi sungah ṭam a luarkai tuk ih, ram sung mipawl hrangah rawl a um lo. 7 Cun khawpi hruangkulh an tisiat ih, ral do mipapawl hmuahhmuah an tlânsuak, cule siangpahrang hmuan kiangih phăr pahnih karlak ihsin, kăwtka lamzin ihsin zan ah khawpi sung ihsin an suak ih Arabah lam panin an feh (Kaldia-mipawl cu khawpi kimvelah an um).

8 Asinan Kaldia ralkappawl in siangpahrang cu an dawi ih, Jeriko phairawn ah Zedekiah cu an hei man. A ralkappawl hmuahhmuah cu a hnen ihsin an ṭekdarh ṭheh. 9 Cun siangpahrang cu an hruai ih, Hamath ram, Riblah ah, Babilon siangpahrang hnenah an fehpi, cule anih in a parah thuṭhennak a phuang. 10 Babilon siangpahrang in a mithmuhah Zedekiah-ih fapapawl cu a that. Cule Riblah ah Judah bawipawl hmuahhmuah a that hai. 11 Zedekiah-ih mit khal a phawrhsuak, amah cu Babilon siangpahrang in dar cikcin in a ṭawn ih, Babilon ah a hruai, cule a thih ni tiangin thawng a thlak.

Temple Urkăng a Si

12 Babilon siangpahrang Nebukhadnezzar a lal a kum hleikuatnak, thla ngatnak, ni hratnak ah Babilon siangpahrang hmaiih ding ih kilvengtupawl hotu Nebuzaradan cu Jerusalem ah a ra. 13 Anih in Jehovah inn le siangpahrang inn a urkāng; Jerusalem inn hmuahhmuah le inn ropi hmuahhmuah cu meisa in a ur ṭheh. 14 Cule kiltupawl hotu hnenih um Kaldia ralkappawl hmuahhmuah in Jerusalem kulh hmuahhmuah an bălthla. 15 Cun kiltupawl hotu Nebuzaradan in mifarah hrekkhat, khawpi sungih rung tâng mipi, raltlân, Babilon siangpahrang hnenih peaw mipawl le a tāng mi zungthiampawl cu ralkaih ah a hruaihlo. 16 Asinan kiltupawl hotu Nebuzaradan in ram mifarahbikpawl lakih hrekkhat cu sabit hmuan ṭuantu dingah le ló thlotu dingah a tân ta hai.

17 Jehovah inn ih dar ṭhuampawl le Jehovah inn ih a tohkāl le dar Tikuangpi cu Kaldia-mipawl in an khuai nêknêk ih, an dar hmuahhmuah cu Babilon ah an thiar. 18 Belpawl, suahdurpawl, meica cehnakpawl, khengkûmpawl, haipawl le puithiam rawngbawlnak dar bungbelpawl hmuahhmuah khal an thiar. 19 Kiltupawl hotu in cawhtawlhpawl, meiling suahdurpawl, khengkûmpawl, belpawl, meitoṭhuampawl, haidaupawl le thawinak ih hman mi nopawl, sui a si mi pauhpauh le ngun a si mi pauhpauh cu a thiarhlo ṭheh. 20 Dar ṭhuam pahnih, Tikuangpi pakhat le a hnuaiih um dar câwpa hleihnih le a tohkāl, siangpahrang Solomon in Jehovah inn hrangih a tuah mi, hi dar bungbelpawl hmuahhmuah cu khīngkhai cawk an si lo. 21 Ṭhuampawl thuhla ah: ṭhuam pakhat san lam cu dawng 18 a si, a velkimin dawng hleihnih a tum ih, a sah lam cu zabăwk a si, cumi cu a kawlawng. 22 A parah dar lubol a um, lubol pakhat ih san lam cu dawng nga a si, cuih lubol, dar hlir ih tuah mi kimvelah ṭelh sengsi mi le talê rahpawl an um. A pahnihnak ṭhuam khal in cuvek thothoin talê rahpawl a nei ve. 23 A sirpawl ah talê rah 96 a um; ṭelh singseng mi kimvelah a zaten talê rah 100 a um.

Babilon ah Mipi Ralkaih ih Hruai an Si

24 Cule kiltupawl hotu in puithiam lubik Seraiah, puithiam pahnihnak Zefaniah le sângka kiltu pathum cu a hruai hai. 25 Ral do mipapawl parih hotu ih ruat le khawpi sungih um mi pasarih, siangpahrang ih thurawn mipawl le ram mipi khawmtu ralbawipiih cangantu le khawpi sungih hmuh mi rammi pacang 60 pawl khal a hruai hai. 26 Kiltupawl hotu Nebuzaradan in hipawl cu a hruai hai ih, Riblah ah, Babilon siangpahrang hnenah a thlenpi hai. 27 Cun Babilon siangpahrang in cupawl cu Hamath ram Riblah ah a sat hai ih, a that hai. Cuticun Judah cu amai ram ihsin ralkaih ih hruaihlo a si.

28 Hipawl hi Nebukhadnezzar in ralkaih ih a hruaihlo mipawl an si: a kum sarihnak ah Jew-mi 3023; 29 Nebukhadnezzar ih kum hleiriat a uknak ah, Jerusalem ihsin mi 832 cu ralkaih ah a hruaihlo hai; 30 Nebukhadnezzar in kum 23 a uknak ah, kiltupawl hotu Nebuzaradan in Jew-mi 745 cu ralkaih ah a hruaihlo hai. An zaten mi 4600 an si.

Thawng ihsin Jehoiakin Suah a Si

31 Cule Judah siangpahrang Jehoiakin sál ih hruai a si kum 37-nak hitin a si, a thla hlei 12-nak, cuih thla 25 ni ah, Babilon siangpahrang Evil-Merodak a lal a kum khatnak ah Judah siangpahrang Jehoiakin hnenah duhsaknak a pe ih, thawng ihsin a suah. 32 Cule amah cu ngilnei zetin a bia ih, Babilon ih a hnenih um siangpahrangpawl hnakih tokham cungnungsawn a pe. 33 Cule Jehoiakin cun a thawngtla sinfen cu a thleng ih, a damsung hmuahhmuah cu siangpahrang hmaika-ah rawl a ei ringring. 34 Cule amah cawmnak ah, Babilon siangpahrang in tlaitluanin a covo, a damsung hmuahhmuah, a thih ni tiangin, a ni tin covo cu amah a pe.