About Bible Thianghlim | ©

BibleThianghlim – ZEKARIAH

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

ZEKARIAH

12345678910
11121314

• A ngantu: Zekariah
• A siartu: Persia-mipawlih an uk laiah Jew-pawl
• A huap sung cān: B.C. 519

Zekariah cu puithiam upa tuk lo (2:4; Neh 12:4, 16) Haggai zawng le a hnu khalih thuphuang a si. Jerusalem temple saksalnak thuhla ih Haggai-ih thuphuan mi a nĕmhnget. A thuken cu: Israel in buainak le harsatnak táwng hmansehla, an Siangpahrang le Rundamtu Jehovah-ih Vancungmi hmangin Jehovah in Israel-mipawl cu a danglamter ding ih, a sunlawih hai ding.

Haggai in a thuphuan hmaisabik a phuan hnu thla hnih hnuah, Zekariah in rawngbawl a thăwk. Cumi cu mipi in temple saksal an sunzăwmsal hnu zarhkar ziangmawzat hnuah a si. Lungthlengnak diklo tuahtu, an pupápawlih sualnak ih tlu lo dingin temple satupawl cu Zekariah in ralrinak a pe hai (1:1-6). Temple sak an thăwk thla nga hnuah zan khat ah profet Zekariah in larnak pasarih a dáwng. Hngeṭek a si mi Messiah in lallukhum a cohlan tikah cuih larnakpawl cu an cem. Cun temple ṭhehfel a si hlan kum khat duh ah thusuhnak khirhkhan zetzet profet in a sut. Cuih thusuhnakpawl cun Pathian lalram co theinak dinhmunpawl le thutiamkampawl a sim (bung 7-8).

A neta lamah Zekariah in thuphuan pahnih a nei (9:1; 12:1). Cupawl cun rairingpawlih lalrampawl ziangtin an tlu ding ti le ziangtin Israel tlen a si ding ih, sunlawih a si ding ti an phuanglang (bung 9-14). A hmaisa thucah ah cun, rairingpawl thuṭhen dingin Siangpahrang a ratdān ding (9:9-10) le nasazetih zăwnzaihter mi Pathian minungpawl tlendān ding thu profet in a sim (9:11-10:12). Profet in a thucah hmaisa cu tuukhal â-pawl thiamlo a cohnak in a cemter. Hih tuukhāltupawl hin Israel cu an hruaipêng ih, an Tuukhāltu diktak cu an rak hnáwng (bung 11). Thucah pahnihnak in Pathian in cān neta ah Israel thu a ṭhendan ding, a thlengawterdān ding, a sunlawihdān ding in sim (bung 12-14). Himi a netabik thuphuan-ih hmuitin mi cu Jerusalem a si. Jehovah in Jerusalem cu amah dotu leitlun ih miphun dangpawl hrangah «mihawrtertu no» ah le «lungto rit zet» ah a tuah ding (12:2). Hi doralpawl hin Jerusalem cu la khal hai sehla, a mipawl tlen ding le run dingah Jehovah a ra ding. A netnakah, leitlun miphunpawl cu Jerusalem ah Pathian be dingin an ra.

1

Sual Sir dingih Kawhnak

1 Darias a lal a kum hnihnak, thla riatnak ah Iddo-ih fapa, Berekiah fapa profet Zekariah hnenah Jehovah kamsuakthu a thleng, 2 «Nan pupápawl parah Jehovah a thin a heng zet. 3 Curuangah an hnenih ralkap rualpawlih Jehovah ih sim mi cu hihi a si tiah sim hai aw: ka hnenah ra kir uh, ralkap rualpawlih Jehovah in a ti, cule kei khal nan hnenah ka kir ve ding, ralkap rualpawlih Jehovah in a ti. 4 ‹Nan lamzin ṭhalo pawl ihsin le nan thil tiṭha lo pawl ihsin atu ah ra kirsal uh, ralkap rualpawlih Jehovah in a ti,› tiih hlanlai profetpawlih an simhnawh mi nan pupápawl vek si hlah uh. Annih cun an ngaithla lo ih, keimah in ngaihsak lo, tiah Jehovah in a ti.

5 «Nan pupápawl khuiah so an um? Cule profetpawl teh, kumkhua an nung maw? 6 Cutisikhalsehla ka siahhlawh profetpawl ka pek mi thupek ka kamsuakthupawl le ka sakhaw dānpawl cun nan pupápawl hnakin a daih rei a si lo maw? Cule an lamlêt ih, ‹Kan nundān zulhin le kan thil ti zulhin ralkap rualpawlih Jehovah in kan hnenih tuah dingih a rak ruahcat cia vekin anih cun kan hnenah a tuah,› tiah an ti,» tiin.

Larnak Pakhatnak: Rángpawl

7 Darias a lal a kum hnihnak, thla hleikhatnak, Shebat thla ni 24 ah Iddo-ih fapa Berekiah fapa profet Zekariah hnenah Jehovah kamsuakthu hitin a thleng: 8 «Zan ih ka hmuh mi cu, zoh hnik, ka hmaiah mi pakhat ráng sen a to ih, cuih ráng cu tivakua ih keuh hadas kung lakah a ding, cule cu pa dungah a sen, a pâwl le a var mi rángpawl khal ka hmu hai. 9 Cun kei in, ‹Ka bawipa, hipawl hi ziang an si?› tiah ka ti. Keimah i be rero tu vancungmi in ka hnenah, ‹Ziang an si ti ka lo hmuh ding,› tiah i ti.

10 «Cule hadas kungpawl lakih ding pa cun i sâng ih, ‹Hipawl cu leitlun hmun kip hrawh dingih Jehovah ih thlah mi an si,› tiah a ti.

11 Cun hadas kungpawl lakih ding Jehovah-ih vancungmi cu an sâng ih, ‹Leilung tlun kan hrawhsuak thluh ih, zoh hnik hman, leilung tlun hmuahhmuah cu hnangamten an um huahhi,› tiah an ti.

Jehovah in Zion a Thlangăm Ding

12 «Cun Jehovah-ih vancungmi in a sâng ih, ‹Maw ralkap rualpawlih Jehovah, kum 70 sung an parih na thinhengnak Jerusalem parah le Judah khawpipawl parah ziang tik tiang so zahngainak nei loih na um ding?› tiah a ti.

13 «Cule keimah i betu vancungmi hnenah Jehovah in ṭawngkam ṭha le thlangamnak ṭawngkam thawn a sâng. 14 Cule keimah i betu vancungmi in ka hnenah, ‹Ralkap rualpawlih Jehovah in hitin a ti tiin tlangau aw, i ti:

Jerusalem cu ka thîk ih,
Zion cu thîknak nasazet thawn.
15 Nuam zetih um miphunpawl parah ka thin a heng zet;
Ziangahtile málte lawng ka thin a heng laiah,
Vanduainak an bêt.

16 ‹Curuangah Jehovah in hitin a sim,

Zahngainak thawn Jerusalem ah ka kirsal ding;
Cu tawkah Ka inn sak a si ding ih,
Tahnak hri cu Jerusalem tlunah dirh-rin a si ding, ralkap rualpawlih Jehovah in a ti.

17 ‹Phuangsal aw, ralkap rualpawlih Jehovah in hitin a sim tiin:

Ka khawpipawl cu hmuingilnak thawn an luangliamsal ding ih,
Jehovah in Zion cu a thlangăm leh ding,
Cule Jerusalem a hril lehsal ding,›

tiah i ti,» tiin.

Larnak Pahnihnak: Kipawl

18 Cun tlun lam cuanin khua ka zoh ih, ki pali ka hmu. 19 Cule i betu vancungmi hnenah, «Hipawl hi ziang an si?» tiah ka sut.

Anih in, «Hipawl cu Judah, Israel le Jerusalem ṭekdarh ko tuahtu ki an si,» tiah i sâng.

20 Cun Jehovah in zungthiam mi pali i hmuh. 21 Cule kei in, «Hipawl in ziang an ra tuah ding?» tiah ka sut.

Anih in, «Hipawl cu zohman an lu tung thei lo dingih, Judah ṭekdarhtertu ki an si; asinan kutzungthiampawl cu Judah ram dokalhin ṭekdarhter dingih an kipawl khaisângtu miphunpawlih ki hlăwnhlo dingin le anmah thlaphângter dingin an ra,» tiah i ti.

2

Larnak Pathumnak: Tahnak Hri

1 Cun tlun lam ka cuan ih ka zoh, cule zoh hnik, mi pakhat a kut ah tahnak hri keng ka hmu. 2 Kei in, «Khui ah na feh ding?» tiah ka ti.

Cule anih in ka hnenah, «Jerusalem ziang can a kau ih, ziang can a sau ti tah dingin ka feh ding,» tiah i ti.

3 Cule i betu vancungmi cu a fehsuak ih, a dang vancungmi pakhat keimah táwng dingin a ra, 4 anih cun a hnenah, «Tlân awla, khaih tlangval kha hitin sim aw: ‹A sungih minung le rannung an tam tuk ruangah, Jerusalem cu khawtepawl vekin kulh nei loin luah a si ding. 5 Ziangahtile kei cu amah kimvelah meisa kulh ka si ding, Jehovah in a thăn, a sungah sunlawinak ka si ding,› tiin,» tiah a ti.

Hmai lam Cān ih Zion le Miphunpawl Aipuannak

6 «Khai law, khai law! Sak lam ram ihsin tlân aw, Jehovah in a ti, ziangahtile nang cu van ih thli pali vekin kau pin ka lo darhter zo, Jehovah in a ti. 7 Khai law, Zion! Nang Babilon fanu hnenih cêng, tlânsuak aw.»

8 «Ziangahtile ralkap rualpawlih Jehovah in hitin a sim: sunlawinak hnuah nanmah a lo rămtu miphunpawl hnenah amah in i thlah, ziangahtile nangmah a lo tăwktu cu amai mitmu a tăwk tinak a si. 9 Ziangahtile ngai hnik, anmah dokalhin ka kut ka thing ding ih, an siahhlawhpawl hrangah ralthillawn an si ding. Cun nannih in kei cu ralkap rualpawlih Jehovah thlah mi ka si ti in thei ding.

10 Maw Zion Fanu, hla sak awla lungawiaipuangin um aw! Ziangahtile zoh hnik, ka ra ding ih nan lakah ka um ding, Jehovah in a ti. 11 Cuih ni ah miphun tampi in Jehovah an kăwp ding ih, ka mi ah an cang ding. Cule nan lakah ka cêng ding. Cun kei cu ralkap rualpawlih Jehovah in nan hnenah i thlah a si ti nan thei ding. 12 Cule Judah cu Jehovah in ram thianghlim ah a ro ah a nei ding ih, Jerusalem a hrilsal ding.»

13 Milai hmuahhmuah, Jehovah hmaiah daiten um uh, ziangahtile anih cu a umnak hmun thianghlim ihsin a tho a si!

3

Larnak Palitnak: Puithiam Lubik

1 Cun anih in Jehovah-ih vancungmi hmaiih ding puithiam lubik Joshua le amah hēk dingih a kut vawrh lamih ding Setan cu i hmuh. 2 Cule Jehovah in Setan hnenah, «Setan, Jehovah in a lo kawk a si! Jerusalem hriltu Jehovah in a lo kawk! Hi pa hi meisa sung ihsi dirhsuah mi thingthu bultán a si lo maw?» tiah a ti.

3 Joshua cu sinfen bālpawl thawn a thuamaw ih vancungmi hmaiah a ding.

4 Cun vancungmi cun a hmaiih ding vancungmipawl hnenah, «A hnen ihsin a sinfen bālpawl cu hlít uh,» tiah a ti. Cule anih in Joshua hnenah, «Zoh hnik, na hnen ihsin na mawhsualnak ka hlăwnhlo zo ih, kâwrfual mankhung ka lo hruhter ding,» tiah a ti.

5 Cule kei in, «A lu ah lupâwng fai pâwngter hai seh,» tiah ka ti. Cutin a lu ah cun lupâwng fai cu an pâwngter ih, hnipuan an hruhter. Cule Jehovah-ih vancungmi a kiangah a ding.

A Ra Suak ding mi Hngeṭek

6 Jehovah-ih vancungmi cun Joshua cu tha a pe, 7 «Ralkap rualpawlih Jehovah ih sim mi cu hitin a si: ka lamzinpawl nan zawh ih ka thupek nan thlun asile ka ^ainn khal nan fingkhawi ding ih, ka tualrawn khal ṭuanvo nan la ding; hitawk ih a ding mipawl lakah luhsuah theinak zalĕnnak ka lo pe ding. 8 Puithiam lubik, Maw Joshua, nangmah le na hmaiih to, a ra lai ding mi hmuhsaknak a si mi na hawipipawl thawn ngaithla uh, ziangahtile zoh hnik, ka Siahhlawh Hngeṭêk ka run hruai ding. 9 Ziangahtile, zoh hnik, Joshua hmaiih lungto ka ret mipawl, lungto pakhat in mit pasarih a nei. Zoh hnik, a parih ṭelh mi cu keimah in ka kher ding ih, cuih ram ih mawhsualnak cu ni khat sungah ka thaihlo ding, ralkap rualpawlih Jehovah in a ti. 10 Cuih ni ah, mi kip in mai sabit hri hnuai le mai theipi kung hnuaiah mai innhnen cio an sawm ding, ralkap rualpawlih Jehovah in a ti,» tiin.

3:7^a inn: Temple a relnak a si.

4

Larnak Pangatnak: Meitoṭhuam le Olif Thingkungpawl

1 Keimah i betu vancungmi cu a ra kir ih, mi itthat lai an ṭhang vekin i ra ṭhang. 2 Anih in ka hnenah, «Ziang na hmu?» tiah i ti.

Cule kei in, «Ka zoh ih, ngai hnik, sui hlir ih tuah mi meitoṭhuam, a lu zim ah khengkûm a um, a parah meito pasarih a um, cuih meito pasarih cun an lu zim ah hmur pasarih cio an nei. 3 A kiangah olif thingkung pahnih khal an um, pakhat cu khengkûm vawrh lamah a um ih, pakhat deuh cu a keh lamah a um,» tiah ka ti. 4 Cule keimah i betu vancungmi hnenah ka sâng ih, «Ka bawipa, hipawl tla hi ziang an si?» tiah ka ti.

5 Cun keimah i betu vancungmi cun i sâng ih, «Hi bangpawl hi ziang an si na thei lo maw?» tiah i ti.

Cule kei in, «Ka thei lo, ka bawipa,» tiah ka ti.

6 Anih in in sâng ih ka hnenah, «Himi hi Zerubbabel hnenih thleng mi Jehovah kamsuakthu a si: ‹Cahnak in si loin, thiltitheinak khal in si loin, ka Thlarau sawnin a si,› ralkap rualpawlih Jehovah in a ti. 7 Maw tlang tumpi, zo na si? Zerubbabel hmaika-ah phairawn ah na cang ding! Cule anih in luanglu ih lung cu, ‹A parah zangfahnak, zangfahnak um seh,› tiih auaw thawn hmai lamah a keng ding,» tiah a ti.

8 Cuihtlunah Jehovah kamsuakthu cu ka hnenah hitin a thleng: 9 «Hi temple lungphum cu Zerubbabel kut ih phum mi a si; amai kut thotho in a sak ṭheh ding. Cun ralkap rualpawlih Jehovah in nan hnenah i thlah ti nan thei ding. 10 Ziangahtile zo in so thil tenau thlen ni a hmuhsuam ding? Ziangahtile hi pasarih pawl in Zerubbabel kut ih darhlumthlai hri an hmuh tikah lungawiaipuangin an um ding. Hi pasarih pawl cu leitlun pumpuluk hrawhtu Jehovah mit an si,» tiah a ti.

11 Cun kei in ka sut ih a hnenah, «Hi meitoṭhuam keh lam le vawrh lamih um olif thingkung pahnih teh ziang an si,» tiah ka ti. 12 Cule keimah thotho in a vei hnihnak ka sutbêt ih a hnenah, «Sui hriak sungbŭngnak sui titler pahnih kiangih olif thing hngeṭêk pahnih teh ziang an si?» tiah ka ti.

13 Cun anih in i sâng ih ka hnenah, «Hipawl hi ziang an si na thei lo maw si?» tiah i ti. Cule kei in, «Ka thei lo, ka bawipa,» tiah ka ti.

14 Cule anih in, «Hipawl cu leilung tlun pumpi ih Bawipaih kiangih ding, hriak thih mi, mi pahnih an si,» tiah a ti.

5

Larnak Paruknak: Cazual Zám

1 Cun ka heraw ih tlun lam ka cuan, cule cu tawkah cazual zám ka hmu. 2 Cule vancungmi cun ka hnenah, «Ziang na hmu?» tiah i ti.

Kei in, «Cazual zám ka hmu. A sau lam dawng 20 a si ih, a kauh lam dawng hra a si,» tiah ka sâng.

3 Cun vancungmi in ka hnenah, «Himi hi leitlun pumpi hrawhsuaktu camsiatnak a si: Fifir pauhpauh cazual khat lamih ngan bangtukin dawisuak an si ding ih, diklo zetih sesămtu pauhpauh cazual khat lamih ngan bangtukin dawisuah an si ding,» tiah i ti.

4 Ralkap rualpawlih Jehovah in, «Camsiatnak ka thlahsuak ding ih, fifir inn le diklo zetih ka hmin ih sesămtu inn ah a lut ding. Cumi cu a inn ah a tāng ding ih, a inn cu a eirál ding, thingphel le lungtopawl tiangin,» tiah a ti.

Larnak Pasarihnak: Kho parih Nunau

5 Cun i betu vancungmi cu hmai lamah a suak ih ka hnenah, «Atu ah tlun lam cuan awla, thil feh rero lai hi ziang a si ti zoh hnik?» tiah i ti.

6 Cun kei in, «Hihi ziang a si?» tiah ka sut.

Cule anih in, «Himi hi a feh rero lai mi tahnak kho a si,» tiah i ti. Amah thotho in, «Himi hi leilung tlun pumpuluk ih an mit a si,» tiah i ti. 7 Suan ih tuah mi a sin cu a áwng ih, kho sungah nunau pakhat a to.

8 Cule anih in, «Himi cu sualralnak a si!» tiah a ti. Cule anih in nunaunu cu kho sungah a tûl ih, a sin cu kho kâ ah a thlak. 9 Cun tlun lam ka cuan ih, ka zoh, nunau pahnih an thla ih thli thawn an ra; ziangahtile vaca thla vek thla an nei ih, annih in kho cu lei le van karlakah an khaikâng.

10 I betu vancungmi hnenah, «Khuitawk ah kho an thiar zik?» tiah ka sut.

11 Cule anih in ka hnenah, «Amai hrang inn saknak dingah Shinar ram ah an thiar zik; cuih inn cu timlamfel a si tikah kho cu a umnak hmun kēl ah ret a si ding,» tiah i ti.

6

Larnak Pariatnak: Ránglêng Pali

1 Cun ka heraw ih tlun lam cuanin ka zoh ih, zoh hnik, ránglêng pali cu tlang pahnih karlakin an rung suak, tlangpawl cu dar tlang an si. 2 Ránglêng hmaisabik cun ráng senpawl a nei hai ih, a pahnihnak lêng cun ráng dúmpawl a nei. 3 A pathumnak lêng cun ráng varpawl tla a nei ih, a palitnak cun ráng pâwlpawl tla a nei, an zaten ráng cak an si. 4 Cun i betu vancungmi hnenah ka sut ih, «Hihi ziang an si, ka bawipa?» tiah ka ti.

5 Cule cuih vancungmi in i sâng ih ka hnenah, «Hipawl hi leilung hmuahhmuah ih Bawipaih hmaiih an din hnuih fehsuak van thlarau pali an si. 6 Ráng dúmpawlih dirh mi lêng cu sak lam ram panin a so, ráng varpawl in an dung ihsin an thlun ih, ráng pâwlpawl cun thlang lam ram an pan,» tiah i ti. 7 Cun ráng cakpawl an feh ih, leitlun pumpi hrawhsuak ding an hiar tuk. Cule anih in, «Păwk uh, leilung tlun hrawhsuakin feh uh,» tiah a ti. Cule annih cu leilung tlun an hrawhsuak. 8 Cule amah in i rak ko ih i bia, «Zoh hnik, sak lam ram panih fehpawl cun sak lam ram ah ka thinhengnak an rehter,» tiah a ti.

Joshua Lallukhum Khumter dingih Thupeknak

9 Cun Jehovah kamsuakthu ka hnenah a thleng, 10 «Cun Babilon ihsi ra thleng ralkaih Heldai, Tobijah le Jedaiah pawl hnen ihsin thilpek cohlang awla, cuih ni thotho ah fehin, Zefaniah fapa Josiah inn ah lut aw. 11 Sui le ngun la awla, lallukhum tuah aw, cule cumi cu Jehozadak fapa puithiam lubik Joshua lu ah khumter aw.

12 «Cun a hnenah, ‹Ralkap rualpawlih Jehovah in hitin a sim:

«Zoh hnik, a hmin Hngeṭêk a si mi mi pakhat a um!
Anih cu amai hmun ihsin a ṭêksuak ding,
Cule amah in Jehovah temple a sak ding.
13 A si, amah in Jehovah temple a sak ding.
Amah in ropitnak a keng ding ih,
A laltokham ah toin a uk ding;
Amah cu a laltokham parah puithiam a si ding ih,
An pahnih karlakah remawknak thurawnpek a um ding,» tiin,›

ti aw.

14 «Cuih lallukhum cu Heldai, Tobijah, Jedaiah le Zefaniah fapa Hen mantersalnak hrangah hngilhlonak ah Jehovah temple sungah a um ding. 15 Hmun hlatpi ih um mipawl khal an ra ding ih, Jehovah temple an ra sak ding. Cun keimah cu ralkap rualpawlih Jehovah in nan hnenah i thlah ti nan thei ding. Cule Jehovah nan Pathian aw nan ngaithlak pumhlum asile, cumi cu a thleng ding,» tiin.

7

Rawlulhnak Diklo

1 Siangpahrang Darias a lal a kum litnak, thla kua, ni li, Kislev thla ah, Jehovah kamsuakthu cu Zekariah hnenah a rung thleng. 2–3 Ralkap rualpawlih Jehovah inn ih um puithiampawl le profetpawl hnenah, «Kum tampi ka rak tuah ṭheu bangin thla nga kimnak ah ṭapin rawl ka ul ding maw?» tiah thusut ih, Jehovah duhsaknak hawl dingin Bethel khawmipawl in Sherezer cu Regeme-Melak le a mipawl thawn an rak thlah zo a si.

4 Cun ralkap rualpawlih Jehovah kamsuakthu ka hnenah a rung thleng, 5 «Ram sungih um mipi hmuahhmuah le puithiampawl hnenah sim aw: ‹Hi kum 70 sungah atu a thla ngatnak le thla sarihnak ih rawl nan ulh le nan ṭah tikah keimai hrang taktak ah nan ul maw? 6 Nan ei ih nan in tikah, nanmai hrangah nan ei ih nan in a si lo maw? 7 Jerusalem le a kiangkap khawpipawl luah le hmuingil ih an um lai, Negev le ^ahmunphai lam luah an si laiah khan tuih hlan profetpawl hmangih Jehovah thuphuan mipawl cu hipawl hi an si lo maw?› tiah a ti,» tiin.

7:7^a hmunphai: Mediterenian kap tluan phairawn le Judea tlang ram karlakih um phairawn a relnak a si.

Thulunlonak Rah cu Sáltannak

8 Cun Jehovah kamsuakthu cu Zekariah hnenah a rung thleng, 9 «Ralkap rualpawlih Jehovah ih sim mi cu hitin a si: ‹Thuṭhennak diktak thawn thuṭhen uh, mi kip in a unaupa hnenah zahngainak le lainatnak langter seh. 10 Nuhmei siseh, pa nei lo siseh, khawtluang mi siseh, mirethei siseh palbĕt hlah uh. Nanmah lakah zohman in a thinlung in a unaupa dokalhin thil ṭhalo khuakhâng hlah seh,› tiin.

11 «Asinan annih in ziang hmanah an siar lo ih, lungruh zetin an pialhlo, cule thei thei lo dingin an hna an ^aphit. 12 A si, an thinlung cu daimon hak vekin an hakter ih, hi hlan profetpawl paltlăngin a Thlarau hmangih ralkap rualpawlih Jehovah in a rak thlah mi Dān le kamsuakthupawl ngaithlak an êl. Curuangah Jehovah hnenin thinlingnak rapthlak a suak. 13 Curuangah hitin a si, thu ka rak phuang ih in ngaithlak lo vekin, nan au ih ka lo ngaithla ve hai lo,» tiah ralkap rualpawlih Jehovah in a ti. 14 «Cule an rak theih dah lo mi miphunpawl lakah phusîng in anmah cu ka ṭhekdarh hai. An tān tâk mi ram cu a ṭhing ih, mi veivak zohman an um lo; ziangahtile ram nuam cu ṭhing ko an tuah,» tiah a ti.

7:11^a phit: A ṭawng hrampi ah cun, «ritter» ti a si.

8

Zion hrangih Thutiamkam

1 Ralkap rualpawlih Jehovah kamsuakthu cu a rung thlengsal, 2 «Ralkap rualpawlih Jehovah in hitin a sim:

‹Thîknak nasazetin Zion hrangah ka thîk;
A hrangah nasazetih thinheng tiangin ka thîk a si,› tiin.

3 «Jehovah in hitin a ti:

‹Zion ah ka kir ding ih,
Jerusalem sungah ka cêng ding.
Jerusalem cu Thutak Khawpi tiih kawh a si ding,
Ralkap rualpawlih Jehovah Tlang cu
Tlang Thianghlim tiah kawh a si ding,› tiin.

4 «Ralkap rualpawlih Jehovah in hitin a sim:

‹Jerusalem kăwtthler ah putar le pitar an tosal leh ding, an upat tuk ruangah mi kip an kut ih anmai kianghrăwl cio thawn. 5 Khawpi lamzinpawl cu mipa nauhak le nunau nauhak an khat ding, kăwtthler ah an lek celcel ding,› tiin.

6 «Ralkap rualpawlih Jehovah in hitin a sim:

‹Cuih cān ah a tāngsŭn mipi mithmuhah hihi mangbangza a si ruangah,
Keimai mithmuhah teh mangbangza a si pei maw?› tiah ralkap rualpawlih Jehovah in a ti.

7 «Ralkap rualpawlih Jehovah in hitin a sim:

‹Zoh hnik, ka mipawl cu nisuahnak ram ihsin le
Nitlaknak ram ihsin ka runsuak hai ding;
8 Anmah cu ka hruaikirsal hai leh ding ih,
Jerusalem khawpi sungah an cêng ding.
Annih cu ka mi an si ding ih,
Thutak le dingfelnak ah keimah cu an Pathian ka si ding,› tiin.

9 «Ralkap rualpawlih Jehovah in hitin a sim: ‹Ralkap rualpawlih Jehovah inn lungphum an phum ni ih tel ve profetpawlih kâ ihsin hi kamsuakthupawl tuih cān ih a ngaithlatu nannih tla, temple saksuak a si theinak dingah nan kutpawl cakter uh. 10 Ziangahtile cuih nipawl hlanah cun minung hrangah siseh, rannung hrangah siseh hlawhman ngah a rak um lo. Doral ruangah a veivâkpawl hrangah ralmuannak a um lo; ziangahtile mi hmuahhmuah, mi kip mai innhnen dokalh dingin ka tuah,› tiin.

11 « ‹Asinan atu ah cun hlanih ka rak tuah hai bangin, hi mitangsŭnpawl hnenah ka tuah hai nawn lo ding, ralkap rualpawlih Jehovah in a ti.

12 ‹Ziangahtle thlaici ṭhaten an keuh ding, sabit hri in rah a suah ding ih, lei khal in a rah a suah ding, cule vanpawl in an daifim an pe ve ding. Hi thil hmuahhmuah co dingah hi mipi tāngsŭnpawl hi ka tuah hai ding. 13 Cule hitin a si ding, miphunpawl lakah nanmah camsiat nan si vekin, maw Judah sungza le Israel sungza, ka lo runsuak ding ih, thlawsuah nan si ding. Ṭih hlah uh, nan kutpawl cakter uh.›

14 «Ziangahtile ralkap rualpawlih Jehovah in hitin a sim: ‹Nan pupápawl ih in thinlingter laiah nanmah dān lo tat dingin ka rak ruatcat ih, ka lamlet lo bangin, ralkap rualpawlih Jehovah in a ti, 15 Tuih cān ah Jerusalem le Judah sungza parah thil ṭha tuah ka tum lehsal. Ṭih hlah uh. 16 Hipawl hi nan tuah ding mi thil an si: mi kip in thudik sim awtăwn cio hai seh; nan kăwtsuahpawl ah thudik, diknak le remnak hrangah thuṭhen uh. 17 Nanmah lakah zohman in nan innhnen dokalhin nan thinlung in thil ṭhalo ruat hlah uh; cule diklo zetih thukam duh hlah uh. Ziangahtile cupawl cu ka huat mi thil an si,› Jehovah in a ti,» tiin.

18 Cun ralkap rualpawlih Jehovah kamsuakthu ka hnenah a rung thleng, 19 «Ralkap rualpawlih Jehovah in hitin a sim: ‹Thla litnak rawlulh, thla ngatnak rawlulh, tla sarihnak rawlulh le, thla hratnakih rawlulh cu Judah sungza hrangah aipuannak, lungawinak le năwmnak puai a si ding. Curuangah thutak le remnak duh uh,› tiin.

20 «Ralkap rualpawlih Jehovah ih sim mi cu hihi a si:

‹Miphunpawl an ra hrih ding,
Khawpi tampi luahtupawl cu;
21 «Jehovah duhsaknak dil dingin le,
Ralkap rualpawlih Jehovah hawl dingin fehlan uhsi.
Keimah rori khal ka feh ve ding,» tiin
Khawpi pakhat luahtupawl cu a dangah an feh ding.
22 A si, minung tampi le a cak mi miphunpawl cu
Ralkap rualpawlih Jehovah hawl dingin le,
Jehovah duhsaknak dil dingin Jerusalem ah an ra ding,› tiin.

23 «Ralkap rualpawlih Jehovah in hitin a sim: ‹Cuih cān ah miphunpawl lakih ṭawng tinkim ihsin mipa pahra in Jew-mi mipa pakhat ih sinfen zim fekten an kai ding ih, «Na hnenah feh ve nung, ziangahtile nang cu Pathian in a lo umpi a si ti kan rak thei,» an ti ding,› tiin,» tiah a ti.

9

A Ralpawl lak ihsin Israel Humnak

1 Jehovah thuphuan kamsuakthu cun
Hadrak ram le
A tĭn mi hmun Damaskas a dokalh,
Ziangahtile minungpawlih mit le
Israel hnám hmuahhmuah ih mit cu Jehovah parah a fu;
2 Damaskas ramri ih um Hamath par khalah,
Fim zet hman hai sehla,
Ṭaiar le Sidon par khalah.
3 Ziangahtile Ṭaiar cun amah ten dawlsâng a dĭn,
Ngun cu leivut men bangin a pengkhawm,
Cule sui cu khawlak ciarbêk bangin a pengkhawm.
4 Ngai hnik, a neih thilri cu Jehovah in a hlăwnsuak ding;
A neihnunnak cu tifinriat ah a tisiat ding ih,
Amah cu meisa in a kangrál ding.
5 Ashkelon in cumi cu a hmu ding ih a ṭih ding;
Gaza khal a riah a sia zet ve ding,
Ekron khal; ziangahtile a ruahsannak cu a cuai.
Siangpahrang khal Gaza ihsin a hlorál ding ih,
Askelon cu luah a si lo ding.
6 Ashdod cu miphun căwkcawrawi in an luah ding ih,
Filisṭia-mipawlih hngalnak ka sattán ding.
7 A kâ ihsin thisen le a ha karlak ihsin thil finungzapawl ka lahlo ding.
Asinan a tāngsŭnpawl cu kan Pathian ta an si ding ih,
Judah ram ah hrin pakhat vek an si ding,
Cule Ekron cu Jebus-mi vek a si ding.
8 Ralkappawl ruangah,
Suk le so rero tu amahpa ruangah,
Ka inn ka kulh ding.
Mipalbĕttu zohman in amah cu an páltlăng nawn lo ding,
Ziangahtile atu ah ka mit rori in ka hmu zo a si.

A Ra lai ding Mi Siangpahrang

9 Maw Zion fanu, nasazetin lungawiaipuangin um aw!
Maw Jerusalem fanu, au aw!
Zoh hnik, na Siangpahrang cu na hnenah a ra;
Anih cu midik a si ih runsuahnak a nei,
Anih cu minunnêm a si ih lāk parah a to,
Cumi cu lākfano, lāknote a si.
10 Efraim hnenin ránglêng le Jerusalem hnenin ráng ka sattán ding;
Cule doawknak thál sahtan a si ding.
Anih in miphunpawl hnenah remnak thu a sim ding;
A uknak cu tifinriat ihsin tifinriat tiang le ^aTivapi ihsin leilung net tiang a si ding.

9:10^a Tivapi: Zufraṭis a relnak a si.

Pathian in a Mipawl a Run Ding

11 Na hrang lawngte ah cun,
Nangmah thawi ka thisen thukham ruangah,
Na thawngtlapawl cu tidai um lo khur sung ihsin ka suah hai ding.
12 Nannih ruahsannak nei thawngtlapawl,
Nan hauhruang ah ra kir uh.
Alet in ka lo rūl ding tiah tuihsun ah ka phuang a si.
13 Ziangahtile ka thál bangin Judah ka nawp ding,
Thál ah cun Efraim ka thluah ding,
Maw Grik, na fapapawl dokalh dingin,
Maw Zion, na fapapawl ka kaitho ding.
Nangmah cu raldothiam ralnâm vekin ka lo tuah ding.
14 Cun an tlunah Jehovah a lang ding ih,
Nimthlakau bangin a thálfung a fehsuak ding.
Bawipa Jehovah in tuupa ki a phaw ding ih,
Thlang lam phusîng zawngah a feh ding.
15 Ralkap rualpawlih Jehovah in anmah a hum ding;
Annih in an eirál ding ih herhli lunghlumpawl thawn an duaiter ding.
An in ding ih, sabitzu ri bangin an au tluaktlo ding;
Biakṭheng kilpawlih cawhtawlhpawl vekin thisen in an khat ding.
16 Cuih ni ah Jehovah an Pathian in anmah cu a run ding,
A tuu rual mipi an si ruangah.
Ziangahtile annih cu anihih ram tlunah tlein
Lallukhum parih keplung vek an si ding.
17 Maw ziangtitlukih ṭha le mawi si tak pei maw!
Thlairawl cun tlangvalpawl a ṭhangter ding ih,
Sabitzu thar in fala tleirawlpawl.

10

Judah le Israel Tundinsalnak

1 Ṭhâl tawp ruah sur cān ah Jehovah ruah dil uh.
Jehovah cu khawpiri le khawdur tuahtu a si;
Anmah cu ruahpi tak zet a pe hai ding,
Mi kip hrangah ló ah thlai kung.
2 Ziangahtile sungkaw milempawl in thulolak an sim,
Simsungthiampawl in larnak thuphan an rak hmu ih,
Mang diklo an rel;
Thulolak in mi an thlangăm.
Curuangah mipi cu tuu bangin an vâkvai;
Tuukhāltu um lo ruangah vansanglamin an um.
3 «Tuukhāltupawl parah ka thinhengnak cu a alh ih, ^aMecangpawl dān ka tat hai ding.
Ziangahtile ralkap rualpawlih Jehovah in a rante rual,
Judah sungza a vehvai ding ih,
Anmah cu raldonak ih siangpahrang ráng vekah a tuah hai ding.
4 A hnen ihsin a kilih lungto pawimawh a suak ding ih,
A hnen ihsin puanthlam khenkilhnak,
A hnen ihsin raldonak thál,
A hnen ihsin uktu an zaten hmunkhatah.
5 Anmah cu raldonak kăwtthler ih ciarbêk ah ralpawl palbĕttu
Miralṭhapawl vek an si ding.
Jehovah in a umpi hai ruangah an do ding ih,
Ráng parih a totupawl cu ningzahter an si ding.
6 «Judah sungza ka cakter hai ding ih,
Joseph sungza ka runhim ding.
Ka hruaikirsal hai ding,
Ziangahtile an parah zahngainak ka nei.
Anmah cu ka hnawn dah lo mi vek an si ding;
Ziangahtile keimah cu Jehovah an Pathian ka si ih,
Ka ngaithla hai ding.
7 Efraim cu miralṭha vek a si ding ih,
Sabitzu in a lungawiter vekin an thinlung cu a lungawi ding.
A si, an fātepawl in cucu an hmu ding ih, an lung a awi ding;
An thinlung cu Jehovah ah lungawiaipuangin a um ding.
8 Anmah cu hurhuk in ka ko hai ding ih, ka khawm hai ding,
Ziangahtile ka tlen hai ding;
Cule hlanih an rak tam bangkhan an rak tamsal ding.
9 «Miphunpawl lakah ṭekdarhter hai hman ningla,
Ram hlapipawl ihsin keimah in máng ringring ding;
An fātepawl thawn an um ding ih,
An ra tlungkir ding.
10 Izip ram ihsi khalin ka hruaikirsal hai ding ih,
Assiria ihsin ka fĭnkhawm hai ding.
Umnak hman tlem lo tiangin
Gilead le Lebanon ram ah ka hruailut hai ding.
11 Harsatnak tifinriat a paltlăng ding ih,
Tifinriat suar săwp lai a vaw ding: Tiva thûknak zaten a ro thluh ding.
Cule Assiria hngalnak cu dirhthlak a si ding ih,
Izip siangpahrang kianghrăwl a cem ding,
12 Jehovah ah anmah ka cakter hai ding ih,
Amai hmin in an veivak ding,» tiah Jehovah in a ti.

10:3^a Mecangpawl: Hruaitupawl a relnak a si.

11

Israel Ṭhinnak

1 Na sidar thingpawl meisa in a kangrál thluhnak dingah, Maw Lebanon, na sângkapawl áwng aw.
2 Maw mirang far thing, râk rero aw, ziangahtile sidar thing cu a tlu zo,
Ziangruangahtile thing ropipawl an siat.
Maw Bashan elon thingpawl, râk uh,
Ziangahtile tupi sah zet a cem zo.
3 Tuukhāltupawlih râk thâwm a um!
Ziangahtile an ropitnak a siat.
Kiosa hûk thawmvâng a um!
Ziangahtile Jordan hngalnak a siat.

4 Ka Pathian Jehovah in hitin a sim, «Thah ding mi rante rual khāl uh, 5 a neitupawl in anmah cu an that ih, mawh nei ih ruah an si lo; a zuartupawl in, ‹Jehovah cu thangṭhat si ko seh, ziangahtile ka lian thlang,› tiah an ti cio; cule an tuukhāltupawl in an zangfah hai lo. 6 Ziangahtile ram luahtupawl ka zangfah hai nawn lo ding,» Jehovah in a ti. «Asinan zoh hnik, mi kip an innhnen kut ah le anmai siangpahrang cio kut ah ka pe thluh ding. Annih in cupawlih ram cu an do ding, cule an kut ihsin ka runsuak hai lo ding,» tiin.

7 Cun thah ding mi rante rual cu ka rak khāl hai, a hleicein rante rual lakih zawnzaibikpawl. Keimai hrangah kianghrăwl pahnih ka la: pakhat cu Duhsak tiah ka ko ih, a dang pakhat cu Ṭangrual tiah ka ko; cule rante rual ka khāl. 8 Thla khat sungah tuukhāl pathum ka cawlter hai. Ka thinlung in a zāwi thei hai lo ih, an thinlung in in zāwi thei ve lo. 9 Cun kei in, «Ka lo khāl lo ding. A thi ding cu thi ko seh, a siatrál ding cu siatrál ko seh. A tāng lai mipawl cu pakhat le pakhat an sa eiaw hai seh,» tiah ka ti. 10 Cule Duhsak ti mi ka kianghrăwl cu ka lâk ih, miphunpawl hmuahhmuah thawi ka rak tuah mi thukham ka pahbăl theinak dingah pahnih ah ka tăn. 11 Cule cumi cu cuih ni ah pahbăl a si. I rak thlirtu rante rual zawnzaipawl cun himi cu Jehovah kamsuakthu a si ti an thei. 12 Cun kei in an hnenah, «Nan lungkim asile, ka hlawhman i pe uhla nan lungkim lole in pe hlah uh,» tiah ka ti. Cule ka hlawhman hrangah ngun paisa 30 an thlai.

13 Cule Jehovah in ka hnenah, «Ka man hrangih tam lutuk ih an ruah mi cu, beltuahtu hnenah hlăwn aw,» tiah i ti. Cun ngun paisa 30 cu ka la ih, beltuahtupa hnenah Jehovah inn sungah ka hlăwn. 14 Cun Judah le Israel teih unau sinak ka tisiat theinak dingah a dang ka kianghrăwl Ṭangrual ti mi cu pahnih ah ka tăn.

15 Cule Jehovah in ka hnenah, «Tuukhāl mi-â hmanruapawl cu nangmai hrangah la hrih aw. 16 Ziangahtile zoh hnik, cuih ram ah tuukhāl ka tungding ding, anih cun a hlorál rero mipawl a ngaihsak lo ding, a ṭekdarh mipawl a hawl lo ding, hriamhma tuar a tidam lo ding, a harhdam mipawl rawl a pe lo ding. Cuhnakin anih cun sa thauthau a ei sawn ding ih, an ketin a thlekdarh ding.

17 Rante rual tlansantu tuukhāl ṭhahnem lo cu a hmakhua a pit a si!
Ralnâm in a bân a dokalh ding ih,
A mit vawrh lam khal a dokalh ding;
A bân a ro thluh ding ih,
A vawrh lam mit a caw reprep ding,»

tiah i ti.

12

Judah Runsuaktu Ratnak

1 Israel thuhla ih Jehovah thuphuan kamsuakthu. Vanpawl pharhtu, leilung lungphum phumtu le minung sungih minung thlarau sersiamtu Jehovah in hitin a ti: 2 «Ngai hnik, Jerusalem cu a kiangkap minungpawl hrangah mihawrtertu no ah ka tuah ding; Jerusalem an kulhkhŭm tikah, Judah khal an kulhkhŭm ve ding. 3 Cule cuih ni ah hitin a si ding, Jerusalem cu minungpawl hmuahhmuah hrangah lungto rit zetah ka tuah ding; cuih lung cawitu hmuahhmuah cu nasazetin an tuahmawhaw ding. Sikhalsehla leilung tlun miphunpawl hmuahhmuah in cuih lung dokalhin an fĭnkhawmaw. 4 Cuih ni ah, ráng pauhpauh buai ko ka vaw ding ih, an par totu â ko ka tuah ding; Judah sungza ngunngaih zetin ka zoh ding ih, miphunpawlih ráng cu an mitcaw ko ka vaw ding, Jehovah in a ti. 5 Cule Judah hotupawl in an thinlung sungin, ‹Jerusalem luahtupawl kha an Pathian, ralkap rualpawlih Jehovah thawngin kan cahnak a si,› tiah an ti ding.

6 «Cuih ni ah Judah hotupawl cu tihthing pen parih suanbel le cangpâwl lakih meisa alh bangin ka tuah hai ding; vawrh lam le keh lamih um miphunpawl hmuahhmuah cu an eirál thluh ding, asinan Jerusalem khawmipawl cun amai hmun kēl ah Jerusalem an luahsal ding.

7 «Judah hnakin David sungza ropitnak le Jerusalem luahtupawlih ropitnak a natsatsawn lonak dingah, Jehovah in a hmaisabikah Judah puanthlampawl a runsuak ding. 8 Cuih ni ah Jerusalem luahtupawl cu Jehovah in a humhim hai ding; an lakih micaklo cu cuih ni ah David vek a si ding ih, David sungza cu Pathian vek le an hmaiah Jehovah-ih vancungmi vek an si ding. 9 Cuih ni ah hitin a si ding, Jerusalem dotu miphun hmuahhmuah hlorálter dingin ka karsuak ding.

Fei Sŭn Mi Pa Ṭah a Si

10 «Cule David sungza parah le Jerusalem luahtupawl parah zangfahnak Thlarau le zangfah dilnak ka burh ding; cun an sŭn mi keimah in zoh ding. A si, mi in a fapa neihsŭn a ṭah vekin amah an ṭah ding ih, mi in a fatir ruangih a thin a nat vekin amah ruangah an thin a na ding. 11 Cuih ni ah Jerusalem ah Megiddo phaikuam ih Hadad Rimmon ih lusûnṭahnak vekin nasazetih lusûnṭahnak a um ding. 12 Cule cuih ram cun lu a sūn ding, sungkua tin anmah te cio in, David sungza hrinpawl khal anmah tein, cun an nupipawl khal anmah ten; Nathan sungza hrinpawl khal anmah ten, cule an nupipawl khal anmah ten; 13 Levi sungza hrinpawl khal anmah ten, cun an nupipawl khal anmah ten; Shimei hrin anmah ten, cun an nupipawl khal anmah ten; 14 hrin dang a tāng mipawl hmuahhmuah, hrin tin in anmah ten, cun an nupipawl khal anmah ten lusūn in an ṭap ding.

13

Milem Biaknak Ṭhiatbălnak

1 «Cuih ni ah David sungza hrangah le Jerusalem luahtupawl hrangah an sualnak le an bawrhhlawhnak khawlhfainak hrangah tihna ăwnsak a si ding.

2 «Cuih ni ah hitin a si ding, ram sung ihsin milempawlih hmin ka ṭhiatbăl thluh ding ih, theih an si nawn lo ding. Profetpawl le thlarau bawrhhlawhpawl cuih ram ihsin ka hlăwnhlo hai ding, ralkap rualpawlih Jehovah in a ti. 3 Hitin a si ding, mi pakhat khat in thu a phuan asile, a hringtu a nu le a pa in a hnenah, ‹Jehovah hmin ih thuphan na sim ruangah na nung lo ding,› tiah an ti ding. Cun thu a phuan tikah amah cu a hringtu a nu le a pa in an dawttlăng ding.

4 «Cuih ni ah hitin a si ding, profet pauhpauh in thu an phuan tikah an larnak an zahpi ding. Mi bum dingin sahmul kâwrfual an hruh lo ding. 5 Cuhnakin, ‹Kei cu profet ka si lo, lóthlopa men ka si; ziangahtile ka no lai ihsin mi pakhat in sál ah in rak zuar,› tiah a ti sawn ding. 6 Cule mi pakhat in a hnenah, ‹Na ^abanpawl karlakih hriamhma hi ziang an si?› tiah a ti ding. Cule anih in, ‹Ka rualpipawl inn ih in rak tuahmawh mi hriamhma an si,› tiah a ti ding.

13:6^a banpawl: Taksaruangpum a relnak a si men thei.

Runsuaktu Tuukhāl

7 «Maw ralnâm, ka tuukhāltu dokalhin le,
Ka kăwppipa dokalhin ṭhang aw, ralkap rualpawlih Jehovah in a ti.
Tuukhāl vaw awla,
Tuupawl an ṭekdarh ding;
Cun minautapawl parah ka kut ka thlâk ding.
8 Cule ram sung hmuahhmuah ah hitin a si ding, ram sungih ṭhen thum ṭhen hnih cu sahtan an si ding ih an thi ding, Jehovah in a ti.
Asinan ṭhen thum ṭhen khat lawng ram sungah an tāng ding.
9 Ṭhen thum ṭhen khat cu meisa ah ka paih ding,
Ngun erfai bangin ka erfai hai ding ih,
Sui hniksak vekin ka hniksak hai ding.
Ka hmin an ko ding ih,
Ka rak sawn hai ding.
Kei in, ‹Hipawl hi ka mi an si,› tiah ka ti ding.
Cule, ‹Jehovah cu ka Pathian a si,› tiah an ti cio ding,» tiin.

14

Jehovah Ni

1 Zoh hnik, Jehovah ni cu a ra thleng ding ih, na ralthillawnpawl cu nan lakah ṭhen a si ding. 2 Ziangahtile Jerusalem dokalhih raltho dingin miphunpawl hmuahhmuah ka fĭnkhawm ding; khawpi cu lâk a si ding, innpawl cu ṭhiahbăl an si ding ih, nunaupawl sualpi an si ding. Khawpi hrek cu sáltannak ih hruai an si ding, asinan a tāng mipawl cu khawpi ihsin sahtan an si lo ding.

3 Cun Jehovah in doawk ni ih a do vekin, cuih miphunpawl dokalhin a fehsuak ding ih a do hai ding. 4 Cule cuih ni ah Jerusalem nisuahnak lamih Olif Tlang parah a ke a ṭhum ding. Cule Olif Tlang cu nisuahnak lam ihsin nitlaknak lamah hmun hnih ah a ṭhenaw ding, phaikuam kau ngaingai a tuahaw ding; Cuih tlang a hrek cu sak lamah a ṭhawn ding ih, a hrek cu thlang lamah a ṭhawn ding. 5 Cun ka tlang phaikuam ah nan tlân ding, ziangahtile cuih tlang phaikuam cu Azal tiang a thleng ding. A si, Judah siangpahrang Uzziah san laiih linghnîn ruangih nan tlan bangin nan tlân ding. Cule Jehovah ka Pathian cu mithianghlimpawl hmuahhmuah thawn nan hnenah a ra ding.

6 Cuih ni ah hitin a si ding, tleu a um lo ding; tlepawl khal a râu ding. 7 Cumi cu Jehovah lawngih theih mi, sun um lo, zan khal um lo, ni lamdang a si ding, asinan zan a thlen tikah tleu a um ding. 8 Cule cuih ni ah hitin a si ding, Jerusalem ihsin tinung a luang ding, a hrek cu nisuahnak lam tifinriat ah le a hrek cu nitlaknak lam tifinriat ah a luang ding; fur le ṭhâl ti loin cumi cu a luang ding. 9 Cule Jehovah cu leilung pumpi ah Siangpahrang a si ding. Cuih ni ah a umsŭn cu Jehovah lawng a si ding ih, hmin umsŭn khal amai hmin lawng a si ding.

10 Ram pumpi cu Geba ihsin Jerusalem thlang Rimmon tiang hmunrawn ah a thlengaw ding. Benjamin Kăwt ihsin Kăwt Hmaisabik tiang, cun a Kil Kăwtka tiang, cun Hananel Dawlsâng ihsin siangpahrang sabit sawrnak tiang Jerusalem cu a umnak hmun kēl ah santer a si ding.

11 A sungah mi an cêng ding; cule cu tawkah camsiatnak a um nawn lo ding, cuhnakin Jerusalem cu ralmuangin a um huahhi sawn ding.

12 Cule Jerusalem dokalhih dotu mi hmuahhmuah Jehovah in a vuaknak ding nathrisia cu hihi a si ding:

An ke ih an din laiah an taksa a ṭawih ding,
An mit cu a kaw sungah a ṭawih ding ih,
An kâ sungah an lei a ṭawih ding.
13 Cuih ni ah hitin a si ding,
Lungphannak rapthlak Jehovah hnen ihsin an lakah a um ding.
Mi tin in anmai innhnen kut an rek ding ih,
An innhnen kut dokalhin anmai kut cio an suah ding;
14 Judah khal in Jerusalem ah ral a do ve ding.
Cule a kiangkap miphunpawl hmuahhmuah ih lennak cu fĭnkhawm a si ding:
Sui, ngun le hnipuan a tawrin a um ding.
15 Cutivekin nathrisia cu
Ráng le lākrang,
Kalauk le lāk le ṭanhmun khuarnakpawl ih um rannung hmuahhmuah parah a um ding.
Cuih nathrisia cu cutin a um ding.

Miphunpawl in Siangpahrang an Bia

16 Cule hitin a si ding, Jerusalem dokalhih ra miphunpawl hmuahhmuah lak ihsin a nungdam mipawl cu ralkap rualpawlih Jehovah, Siangpahrang be dingin le Bûkte Puai hmang dingin, kum tinten an so ding. 17 Cule hitin a si ding, ralkap rualpawlih Jehovah, Siangpahrang be dingin Jerusalem ih so ve lo leilung tlunih sungkua pauhpauh parah ruah a sur lo ding. 18 Izip sungza hung so loin le lut loin an um asile, an parah ruah a sur lo ding. Bûkte Puai hmang dingih so ve lo tu miphunpawl cun Jehovah in vuaknak ih a hman mi nathrisia an co ding. 19 Himi cu Izip dāntatnak le Bûkte Puai hmang dingih feh duh lo miphunpawl hmuahhmuah dāntatnak hrangah a si ding.

20 Cuih ni ah «THIANHLIMNAK CU JEHOVAH HNENAH» ti mi cu ráng kuangpawl parah kher a si ding. Jehovah inn sungih belpawl cu Biakṭheng hmaiih khengkûmpawl vek an si ding. 21 A si, Jerusalem le Judah ih bel pauhpauh cu ralkap rualpawlih Jehovah hrangah thianhlimnak an si ding. Raithawitu pauhpauh an ra ding ih cuih belpawl cu an la ding, cule a sungah rawl an sûang ding. Cuih ni ah ralkap rualpawlih Jehovah inn sungah Kanaan-mipawl an um nawn lo ding.