About Bible Thianghlim | ©

BibleThianghlim – 2 PETER

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 PETER

123

• A ngantu: Peter
• A siartu: Asia Minor sak lamih zumtupawl
• Ngan kum: A.D. 66-67

Thathoum zet Pentikos ni (A.D. 30; Apo 2 zoh aw) ih thil cang hnu a rei hlanah, Khrih-ih hnaṭuan siatsuah dingin zirhtu diklopawl an suak. Jesu in cuvek mipawl an ra suah ding thu a rak sim cia (Mat 7:15; 24:4-5, 11, 24-26; Mar 13:22-23) ih, Paul khal in cuvek mipawl an rat ding thu ralrinnak a rak pe (Apo 20:29-30).

Zumtupawl in a ra rero lai mi zirhtu diklopawl thu ah timtuahaw cia dingin apostol Peter in Peter cakuat pahnihnak hi a ngan (2:1). Judas cakuat hi Peter cakuat pahnihnak thawn bangawknak tampi a nei. Asinan Judas cun zirhtu diklopawl zumtupawl lakih um rero zo vekin a rel (Judas 4). Curuangah hi cakuat hi Peter in Judas cakuat hlanih a ngan mi a si men thei.

Peter in hi cakuat hi himi zumtupawl hnenih a vei hnihnak a ngan mi a si thu a rel (3:1). A cakuat hmaisa cu Asia Minor ram sak lamih tiduhdahnak a tuar rero tupawl hnenih a ngan mi a si. Anmah thotho hi Peter cakuat pahnihnak rak dawngtu an si. Hi cakuat hi Peter in Peter cakuat pakhatnak hnuih a ngan mi a si ruangah A.D. 66-67 hrawngih a ngan mi a si ding. A thi cing ding ti amah le amah a theiaw (1:13-14). Curuangah a ra thleng lai ding mi ṭihnunnakpawl hrangih timtuahaw dingah cakuat nganbêt a duh (1:15).

Peter in a cakuat thawhnak lamah cun zirhtu diklopawlih thu a buaipi lo. Cuhnakin thlarau lam ṭhanlennak thu cipciarin a rel sawn (1:1-11). Ṭhanlen a ṭulzia a sim ih, ṭhanlen duhnak nei dingin anmah a năwrbêt. A tambik ah cun thlarau lam nun ih ṭhanlennak hrangih hmanrua a si mi Cathianghlim theihnak thu a sim uar. Peter in zumtupawl kha Cathianghlim «ngaihsak» dingin a sawm, ziangruangahtile cumi lawng hi thuneitu le a dik mi umsŭn a si (1:12-21). Bung hnihnak ah Peter in Cathianghlim le thuṭhimnakpawl hmangin siatráltertu zirhtu diklopawl le hmuhsuamtupawl ih thu a phawrhlang (2:1-3:13). A cakuat hi Pathian thuṭhennak le Khrih ratsalnak le ralrin peknak zulhih thapeknak in a net (3:14-18).

Peter-ih thusim mi hi san hmuahhmuah ih zumtupawl hrangah a thupi zet mi a si. «Zangfahnak le kan Bawipa le Rundamtu Jesu Khrih theihnak ih ṭhan» (3:18) lawngin misualrálpawlih sualnak lakah kan dinghnget thei ding.

1

Cibaibûknak

1 Jesu Khrih-ih ṭemṭawn sál le apostol a si mi, Simon Peter in, kan Pathian le Rundamtu Jesu Khrih dingfelnak zarih kanmai neih mi vek zumnak sunglawi neitupawl hnenah:

2 Pathian le kan Bawipa Jesu theihnak ruangah nan hnenah zangfahnak le hnangamdaihnak cu tam sinsin hram seh.

Pathian Kawhnak le Hrilnak

3 A ropitnak le a ṭhatnak maksak hmangih in kotu theihnak zarah nunnak le Pathian ngaihsaknak hrangih kan ṭul mi hmuahhmuah cu a Pathian sinak huham cun in pe zo a si. 4 Cuih thilpawl hmangin a nasazet mi le a sunglawi zet mi thutiamkampawl in pe, cucu câkhiarnak ruangih leitlun ih siatnak thleng mi ihsin nan tlânsuak ih, thutiamkampawl hmangih Pathian mizia ṭawmpitu nan si theinak dingah a si.

5 Cutivek a si ruangah nan zumnak ah ṭhatnak bêt dingin nasazetin taimak suah uhla, ṭhatnak ah theihnak, 6 theihnak ah sūpawknak, sūpawknak ah tuarfainak, tuarfainak ah Pathian ngaihsaknak, 7 Pathian ngaihsaknak ah unau lainatawknak, unau lainatawknak ah duhdawtnak bêt uh. 8 Ziangahtile cuih thilpawl cu nanmah ah a um ih a ṭhan vivo asile, kan Bawipa Jesu Khrih nan theihnak ah ṭhahnem lo le rah nei loin nan um lo ding. 9 Asinan cuih thilpawl nei lo tu cu mitcaw a si, hlapi a hmu thei lo ih, hi hlanih a sualpawl khawlhfaisak a si ti a hngilh a si.

10 Curuangah u le nau tla, a lo kawhnak le a lo hrilnak fiangter dingin taimak suah sinsin uh, ziangahtile cumi nan tuah asile nan tlu dah riai lo ding. 11 Ziangahtile cutivekcun kan Bawipa le Rundamtu Jesu Khrih ih kumkhaw uknak sungih luh theinak cu nasazetih pek nan si ding.

12 Cumi ruangah atu ih thutak nan neih mi hi theiin, cumi ah hngehter si khal uhla, cuih thilpawl cu nannih lo theihtersal ringring ding hi ka daithlang lo ding. 13 A si, hi puanthlam ih ka um sung cu lo theihthartersal ṭheu ih, lo cawkthawh cu dikin ka ruat. 14 Kan Bawipa Jesu Khrih in i hmuhter zo bangin, hi ka puanthlam hi a rei hlanah ka hlít tengteng ding ti ka thei. 15 Cuihtlunah ka fehsuah hnu khalah cuih thilpawl nan cīn ringring theinak dingah taimak ka suah sinsin ding.

Khrih Ropitnak le Sim Sungnak

16 Ziangahtile kan Bawipa Jesu Khrih-ih huham le a ratsalnak ding thupawl kan lo theihter laiah khan, hrăwkhrawl zetih phuahcawp thuanthu kan thlun lo ih, mit rori ih a cungnunnak hmutu kan si sawn. 17 Ziangah cutin ka ti tile Ropitnak Nasa zet ihsi a ra suak mi aw cun, «Hihi ka duhdawt zet mi ka Fapa a si, a parah ka lung a hmui zet,» ti thu a hnenih a rung thlen laiah khan Pa Pathian hnen ihsin cawimawinak le ropitnak a dawng.

18 Tlang thianghlim ah a hnenih kan um laiah, van ihsi a rung thleng mi cuih aw cu kan thei a si.

19 Cule rintlak sinsin mi simsungnak thu kan nei, khua a van hlan le deirel arsi nan thinlung sungih a suah hlanlo simsungnak kamsuakthu cu thim lakih êng mi tleu vekih nan ngaihven asile, nan tiṭha ding a si. 20 Cathianghlim sungih simsungnak thu hrimhrim hi mi pakhat khat hrilhfiahnak ihsi ra um a si lo ti hi a hmaisabikah thei uh. 21 Ziangahtile simsungnak thu cu milai duhzawngih ra a si dah lo, Thlarau Thianghlim ih a hruai hai vekin, Pathian mithianghlimpawl in an rak phuang a si sawn.

2

Profet Diklo le Zirhtu Diklo

1 Sihmansehla mipi lak khalih profet diklo an um vek khan nan lakah zirhtu diklo an um leh ding. Annih cun mi siatsuah thei zirhnak sual cu athupten an run kenglut ding ih, anmah leitu Bawipa rori hman an hnáwng ding. Cule anmah ten cawp le cilhih siatralnak cu an parah an thlengter ding. 2 Cule mi tampi in an siatnak lamzinpawl cu an run thlun ding ih, anmai ruangah thutak lamzin cu thangsiatin a um ding. 3 Duhhamnak ruangah thuphan ṭawngkampawl hmangin anmai hlawknak hrangah an lo hmang ding. Hlanih an parih thuṭhen mi cu a ding ringring lo ih, an siatralnak khal a itthat dah lo.

4 Ziangahtile sual a tuahtu vancungmipawl cu Pathian in a zuah hai lo ih, thuṭhensak dingin ^akumkhaw hremnak hmun ah a thlak hai ih, thim cikcin sungah ṭawnin a khum sawn hai. 5 Cun amah ngaihsak lo pawlih umnak leitlun cu ti a likter ih, hlanlai leilung cu a zuah lo, asinan dingfelnak thusimtu, Noah cu mi dang pasarih thawn a runhim a si. 6 Cule Sodom khawpi le Gomorrah khawpi cu vutcâm ah a cangter ih, amah Pathian ngaihsak lo rung um leh dingpawlih zohṭhim dingah hlorál dingin thiamlo a coter. 7 Cule misualrálpawlih nundān bawrhhlawh ruangih thinna zettu midingfel Lot kha a runsuak a si ahcun 8 (ziangahtile cuih midingfelpa cu an lakih a cēn laiah, ni tin dān nei loih an nundānpawl a mit in a hmu ih, a hna in a theih tikah a dingfel mi a thinlung cu a nâ zet ṭheu a si), 9 Bawipa cun amah ngaihsaktupawl sualfawrhnak ihsin runsuahdān le midingfel lo pawl thuṭhen ni hrangih cawhkuan pek dingih retdān le, 10 a hleicein, câkhiarnak bawrhhlawh cu dawiih, taksa dān vekih nungtupawl le thuneitupawl nautattupawl dāntat dingih retdān a thei. Cupawl cu miralṭha le mai thu duh an si ih, huham ropi neitupawl relsiat khal an ṭih lo. 11 Cahnak le huham nei nasasawn vancungmipawl hman in huham ropi neitupawl Bawipa hmaika-ah an relse dah lo. 12 Asinan hibangpawl hi, pianphung ihsi khawruahnak nei lo ramsa, kai tahratih hlohralter ding fang vek men hi an si, an theih lo mi thil an relsia ih, anmai siatnak ah cun an hlorál nêknêk ding.

2:4^a kumkhaw hremnak hmun: Grik ṭawngfáng Tartarus a si ih, Grik-mipawl in Pathian hremnak hmun, cu tawkah cun tuarnak nasazet umnak hmun, cuih hmun cu Hades hmun hnakih niam sawn ah an ruat.

13 An dingfellonak hlawhman an ngah ding. Sun ih năwmcēnnak tuah cu nuam an ti. Nan hnenih puai an hman tikah kâwr răwngkai vek le bawrhhlawh kai vek hi an si ih, mi bum hi nuam an ti zawng tak a si. 14 An mit cu uiretnak in a khat ih, sual an bansan thei lo, mihngetlopawl an thlemthlu. Duhhamnak thinlung an zirhaw ih, annih cu camsiat fa an si. 15 Dingfellonak hlawhman ngainatu, Beor-ih fapa Balaam-ih lamzin an thlun ih, lamzin dik cu tlansanin, an fehpêng. 16 Asinan anih cu amai sualralnak ruangah nunsimin a um, ṭawng thei lo mi lāk cu minung ṭawng in a ṭawng ih, profet-ih atnak cu a rak kham.

17 Cupawl cu tidai um lo mi tikhur le thlipi ih a hrăn mi khawdurpawl vek an si, thim sah mepmep cu an hrangah retsak kumkhua a si.

18 Ziangahtile thulolak men cu titeraw zetih relin, sual ih a um mipawl lak ihsi tlânsuak zopawl cu taksa câkhiarnak le fihnungza hursualtuahnak hmangin an lēmkir ṭheu. 19 Zirhtu diklopawl cun anmah rori siatnak sál ah tāng cingin, mi dang hnenah luatnak ding thu an tiamkam. Ziangahtile milai cu thil ziang in simaw a neh asile cuih a nehtu thilih sál a si. 20 Cupawl cun kan Bawipa le Rundamtu Jesu Khrih theihnak ruangah khawvel bawrhhlawhnak ihsin an tlânsuak hnuah, cumi thotho ah lutsalin, nehih an um a si ahcun, an nundān netasawn cemnetnak cu a hmaisa hnakin a sesawn ding. 21 Ziangahtile dingfelnak zin theih hnuih an hnenih pek mi thupek thianghlim an tlansan hnakin, dingfelnak zin kha rak thei lo lawlaw hai sehla an hrangah a ṭhasawn. 22 Asinan,

«Amai luak lamah uico cu a kirsal,» ih,
«A khawlhaw zo mi văwkpi cu ciarbêk lakah tâl dingin a kirsal,»

tiah a dik mi thufim ih a ti vekin an parah a thlengkim a si.

3

Bawipaih Ni

1 Duhdawt mitla, atu ah nan hnenah hi cakuat a pahnihnak hi ka ngan a si. A pahnih in nan lungthin thianglo căwktho dingah hi thupawl lo theihthartersal dingin ka ngan a si. 2 Profet thianghlimpawl in hi hlanih an rak sim mi kamsuakthupawl le kannih apostolpawl hmangih kan Bawipa le Rundamtuih thupek nan ngaihsak ringring theinak ding hrang khalah ka ngan a si.

3 Hihi thei hmaisa uh: ni neta ah cun mi hnihsanhmang an ra suak ding ih, anmai câkhiarnak bangtukin an nung ding. 4 Cule annih in, «A ratsalnak ding thutiamkam cu khuiah so a si? Ziangahtile kan pupápawl an ihthah ni ihsi khan thil hmuahhmuah hi sersiam thăwk ihsin anmai sidān kēlten an um,» tiah an ti ding. 5 Ziangah cutin an ti tile, Pathian kamsuakthu hmangin hlanlai ah vanpawl cu an rung um ih, leilung khal tidai ihsin le tidai hmangin tuah a si ti hi an ngaihthah hrim a si, 6 cuih tidai cun leilung cu a khuh thluh ih, cuih leilung cu a siatsuah ta. 7 Asinan cuih kamsuakthu thotho hmangin atu ih vanpawl le leilung hi meisa ih urkāng dingin, Pathian ngaihsak lo pawl thu a ṭhen ni le an siatrál ding ni hrangah a zuah a si.

8 Asinan duhdawt mitla, Bawipaih ruahdān ah cun ni khat hi kum 1000 tluk a si ih, kum 1000 khal hi ni khat tluk a si ti mi thil pakhat hi hngilh hlah uh. 9 Mi hrekkhat in muangih an ruah bangin Bawipa cu a thutiamkam mi thuhla ah a muang lo; zohman an siatrál ding a duh lo ih, mi hmuahhmuah an lung an thleng ding a duh sawn ruangah, kanmah lamah thinsauin a um hrih sawn hi a si.

10 Sikhalsehla Bawipaih Ni cu zan ih fifir a rat vekin a ra thleng ding. Cuih ni ah vanpawl cu a nasazet mi awn thawn an hlorál ding ih, thil búlhrampawl cu meisa ih emzupin an um ding. Leilung le a sungih thil um mipawl cu an kangrál ṭheh ding.

11 Hih thil hmuahhmuah cu cutivekin an siatrál ding ruangah, Pathian ngaihsak le nundān thianghlim ih nung ding mi nan si lo maw? 12 Pathian ni cu hngakhlap zetih hngakih nan um laiah, cutivekcun nung uh. Cuih ni ah vanpawl cu meisa in a kangrál ding, cule thil búlhrampawl khal meisa ih emzup an si ding. 13 Sikhalsehla a thutiamkam bangin, dingfelnak umnak hmun van thar le lei thar cu kan hngak a si.

Thucemternak

14 Curuangah duhdawt mitla, cuvek thilpawl nan hngah ruangah bawrhhlawh kai lo le sawihnăwm kâi lo le hnangam zetih nan um amah in a hmuh theinak dingah taimak suah uh. 15 Cule kan duhdawt mi, kan unaupa Paul khal in a hnenih fimnak pek a si bangtukih nan hnenih ca a ngan vek khan, kan Bawipaih thinsauzia cu rundamnak ah ruat uh. 16 A cakuatpawl hmuahhmuah khalah hi thilpawl hi a ngan. A thil ngan mi hrekkhat cu theihthiam an har ih, cupawl cu zir lo mipawl le mihngetlopawl in an siat phahnak dingih Cathianghlim dang an lakpēn bangin an lapêng ṭheu.

17 Curuangah duhdawt mitla, nannih in cuih thupawl cu nan rak theih cia zo ruangah fimkhur uh. Culole nanmah khal misualrálpawlih sualralnak ah hruaiin nan um ding ih, nan dinhngehnak ihsin nan tlu pang ding. 18 Cuhnakin kan Bawipa le in Rundamtu Jesu Khrih-ih zangfahnak ah le theihnak ah rak ṭhang sawn uh.

Atu le a kumkhuain amai hnenah ropitnak um seh. Amen.