About Bible Thianghlim | ©

BibleThianghlim – 1 SIANGPAHRANG

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 SIANGPAHRANG

  • A ngantu: Theih a si lo
  • Thil cang kum: B.C. 971-853
  • Ngan kum: B.C. 586 hnu.

Siangpahrang cabu pakhatnak le pahnihnak hi a thăwk ah cun bu khat a rak si. A ngantu in a thuanthu ngan mi a ngan theinak dingah ngan cia mi cabu ṭansan ṭha tampi a nei ti a fiang (1Sp 11:41; 15:23, 31). Jew-pawl thuanthu vek cun profet Jeremiah in Siangpahrang cabu pakhatnak le pahnihnak sung thu a tamsawn hi a ngan ti a si.

Samuel cabu pahnihnak thăwktir ah Saul thuhla kan hmu ih, cu lo hmuahhmuah cu David thuhla a si vekin Siangpahrang cabu pakhatnak a thăwknak lamah David thuhla kan hmu ih, cu lo hmuahhmuah cu Solomon thuhla a si (B.C. 971). Asinan hi cabupawl ih hmuitin mi bik cu siangpahrangpawl le lalrampawl thuanthu a si lo. A taktak ah cun, Siangpahrang cabu pakhatnak le pahnihnak ah hin Siangpahrangpawl cu a pawimawhbik mi an si lo. Cipciar zetih ngan mi thuanthupawl hi an dik ih an thupi, asinan a thuanthu ih a thupitter mi bik cu Pathian a si. Siangpahrang cabu pakhatnak le pahnihnak ih thupi laimu cu Pathian kamsuakthu in thuneihnak pumhlum a nei ih, rinsantlak a si taktak ti hi a si. Hi cabu ngantu in himi thupi hi a phunphunin a rel. Siangpahrang cabu pakhatnak le pahnihnak ah «Jehovah kamsuakthu» ti hi vei 55 hrawng a lang (Sansiarnak cabupawl ah cun vei 20 hrawng lawng).

«Jehovah in hitin a ti» ti khal vei 39 hrawng a lang (Sansiarnak cabupawl ah cun vei 15 hrawng lawng). Siangpahrang cabu pakhatnak le pahnihnak in simsungnak le cumi a tlamtlinnak vei 40 hnak tam a telh. Simsungnak thleng famkim cih mi a ngan tikah, thleng famkim hrih lo mipawl khal an thleng famkim tengteng ding tiin kan zumnak a hngetter. Pathian kamsuakthu phuannak hmanrua ngaingai cu profetpawl hi an si. «Profet,» «simsung» ti le «simsungnak» ti ṭawngkampawl hi siangpahrang cabu pakhatnak pahnihnak ah vei 89 hrawng an lang (Sansiarnak cabupawl ah cun vei 40 hrawng lawng). Siangpahrang cabupawl siarlo ah profet nun le hnaṭuan reluartu cu Jeremiah lawng a si. Siangpahrangpawlih cabu ah profet 17 a tarlang ih, profet bur ti khal a tarlang. Profet hrangih hmin dang a sim mi «Pathian mi» ti mi cu Siangpahrang cabu pakhatnak le pahnihnak ah vei 55 a lang (Sansiarnak ah vei 7 lawng).

Siangpahrang cabu pakhatnak le pahnihnak ih kan hmuh mi thupi in zumtu kip hnenah «Jehovah kamsuakthu» pauhpauh ah hnîn thei lo zumnak in pe ding a si.

A rak sim mi cu a sim vekin Jehovah in a tuah ding ti rinhlelhnak pauhpauh cu Siangpahrang cabu pakhatnak le pahnihnak in an haikiang ding a si.

Thuhlawm Ṭhen

  • I. Israel hmuahhmuah tlunah Solomon a lal (bung 1-11)
  • II. Israel le Judah an ṭhenaw ih khat le khat an do-aw (bung 12-16)
  • III. Israel le Judah an ṭangtlang (bung 17-22)

1

Siangpahrang David Bawm dingin Abishag a Ra

1 David siangpahrang cu a upa in a tar zet thlang, cule puan an sĭn nan anih cu a hlum thei cuang lo. 2 Curuangah a siahhlawhpawl in a hnenah, «Ka bawi siangpahrang hrangah fala him hawl si sehla, cu nu cu siangpahrang hmaiah um seh, cule anih in amah kilkhawi seh. Cule ka bawi siangpahrang a hlum theinak dingah na ṭāng sungah it seh,» tiah an ti. 3 Cutin Israel ramkulh sung hmuahhmuah ah fala duhum an hawl ih, Shunam-mi Abishag an hmu, cule amah cu siangpahrang hnenah an hruai. 4 Falanu cu duh a nung zet. Cule cu nu cun siangpahrang cu a kilkhawi ih amah a rian, asinan siangpahrang in cuih fala cu a ihpi lo.

Siangpahrang ah Adonijah a Phuangaw

5 Cun Haggith-ih fapa Adonijah cu khaisângawin, «Siangpahrang ka si ding,» tiah a ti. Cule amai hrangah a hmaiih tlân dingah ránglêngpawl le rángtothiampawl le pacang 50 a timtuah. 6 Cule a pa in, «Ziangruangah cuvek na rak tuah?» tiin ziang tik khalah amah a kawk dah lo. Amah cu pa hmel ṭha zet khal a si, Absalom hnuih a hrin mi a si.

7 Cun Adonijah in Zeruiah fapa Joab le puithiam Abiathar a sawm hai, cule Adonijah cu an thlun ih an bawm. 8 Asinan puithiam Zadok, Jehoiada fapa Benaiah, profet Nathan, Shimei, Rei le David-ih micakpawl cu Adonijah lamah an ṭâng lo. 9 Cule Adonijah cun tuu le câwcang pawl le ṭilva thaupawl thawn En Rogel kiangih um Zoheleth lung kiangah thawinak a tuah. Siangpahrang fapapawl, a unau mipapawl hmuahhmuah le siangpahrang siahhlawhpawl a si mi, Judah mipa hmuahhmuah a sawm. 10 Asinan profet Nathan, Benaiah, micakpawl le a unaupa Solomon cu a sawm lo.

Nathan le Bathsheba in Siangpahrang David Ralrinnak an Pe

11 Cun Nathan in Solomon nu Bathsheba hnenah, «Haggith fapa Adonijah cu siangpahrang ah a cang zo ih, kan bawi David in cumi cu a thei lo ti na hna in na thei hrih lo maw? 12 Curuangah ra aw, zangfahten, na nunnak le na fapa Solomon nunnak na runhim theinak dingah thurawn lo pe hnik ning. 13 Siangpahrang David hnenah feh lohli awla a hnenah, ‹Maw siangpahrang, ka bawipa, ka hnuah, «Na fapa Solomon in a uk tengteng ding ih, ka laltokham parah a to ding,» tiin na siahhlawhnu hnenah sia na săm zo a si lo maw? Ziangahso Adonijah cu siangpahrang ih a can?› tiah na ti pei. 14 Cun cutawk ih siangpahrang thawi nan biakawk laiah, ngai hnik, keimah khal na dungah ka ra ding ih, na ṭawngkampawl ka nĕmhnget ding,» tiah a ti.

15 Cule Bathsheba cu siangpahrang hnen pindan sungah a va lut. Atu ah cun siangpahrang cu a tar zet thlang ih, Shunam-mi Abishag in siangpahrang cu a rian. 16 Cule Bathsheba cu a lu a kûn ih siangpahrang hmaiah a băwkkhup. Cun siangpahrang in, «Ziang na duh?» tiah a rak ti.

17 Cun cu nu cun a hnenah, «Ka bawipa, ‹Na fapa Solomon in ka hnuah a uk tengteng ding ih, ka laltokham parah a to ding,› tiin Jehovah na Pathian hmin in na siahhlawhnu hnenah sia na rak săm. 18 Atu ah cun zoh hnik! Adonijah cu siangpahrang ah a cang zo, cule atu ah, ka bawi siangpahrang, nang in cuih thu cu na thei lo. 19 Anih cun câwcangpawl le ṭilva thaupawl le tuu tampi thawn thawinak a tuah ih, siangpahrang fapapawl hmuahhmuah, puithiam Abiathar le ralkap hotu Joab tipawl tla a sawm. Asinan na siahhlawh Solomon cu a sawm lo. 20 Cule nangmai hrang lawngte ah cun, Maw siangpahrang, ka bawipa, na parah Israel-mi hmuahhmuah ih mit cu a fu. Curuangah nangmah in ka bawi siangpahrang-ih laltokham ah amai hnuih totu ding anmah na sim a ṭul. 21 Culoasile hitin a si ding, ka bawi siangpahrang cu a pupápawl hnenih a cawlh tikah, keimah le ka fapa Solomon cu thilsual tuahtu ih siar kan si ding,» tiah a ti.

22 Cule zoh hnik, cu nu in siangpahrang a biak rero laiah profet Nathan khal a ra thleng ve. 23 Cun annih in siangpahrang hnenah, «Zoh hnik, profet Nathan a um,» tiin siangpahrang an sim. Cule anih cu siangpahrang hmaiih a thlen tikah, siangpahrang hmaiah a hmai leisin bihin a băwkkhup. 24 Cule Nathan in, «Maw siangpahrang, ka bawi, ‹Keimah hnuah Adonijah in a uk ding ih, ka laltokham parah a to ding,› na rak ti dah maw? 25 Ziangahtile anih cu tuihsun ah a suk ih câwcangpawl le ṭilva thaupawl le tuu tampi thawn thawinak a tuah ih, siangpahrang fapapawl hmuahhmuah le ralkap hotupawl le puithiam Abiathar tla a sawm. Cule zoh hnik, a hmaiah an ei ih an in rero. Cule, ‹Siangpahrang Adonijah a san sau hram seh!› tiah an ti. 26 Asinan na sál keimah siseh, puithiam Zadok siseh, Jehoiada fapa Benaiah siseh, na siahhlawh Solomon siseh a sawm lo. 27 Himi hi ka bawi siangpahrang ih rak tuah mi thil siin, amah hnuih ka bawi siangpahrang laltokham parih totu ding mi na sálpa na rak sim lo a si maw?» tiah a ti.

David in Siangpahrang ah Solomon a Phuang

<reference type="parallel">1San 29:21-25</reference>

28 Cun Siangpahrang David in a sâng ih, «Ka hnenah Bathsheba ko aw,» tiah a ti. Cule siangpahrang hnenah Bathsheba a ra thleng ih siangpahrang hmaiah a ding. 29 Cule siangpahrang cun sia a săm ih, «Vansannak phunkim lak ihsin ka nunnak i rak tlentu Jehovah a nun rori bangin, 30 ‹Na fapa Solomon cu ka hnuah siangpahrang a si tengteng ding ih, keimai aiah ka laltokham parah a to ding,› tiin Israel-ih Pathian Jehovah hmin in na hnenih sia ka rak săm vekin, tuihsun khalah ka tuah rori ding a si,» tiah a ti.

31 Cun Bathsheba cu lei ah a hmai kûn phahin siangpahrang hmaiah a băwkkhup ih, «Ka bawi Siangpahrang David kumkhuain dam hram seh!» tiah a ti.

32 Cule Siangpahrang David in, «Puithiam Zadok, profet Nathan le Jehoiada fapa Benaiah pawl tla ka hnenah ko uh,» tiah a ti. Cutin annih cu siangpahrang hmaiah an ra thleng. 33 An hnen khalah siangpahrang in, «Nan bawipaih siahhlawhpawl nan hnenah hruai uhla, keimai lākrang parah ka fapa Solomon toterin amah cu Gihona ah hruaithla uh. 34 Cu tawkah puithiam Zadok le profet Nathan in Israel tlunih siangpahrang dingah amah cu hriak thih hai seh. Cule tuupa ki phaw in, ‹Solomon siangpahrang a san sau hram seh!› ti hai seh. 35 Cun Solomon dungah nan so pei ih anih cu a ra ding ih ka laltokham parah a to ding. Cule keimai aiah siangpahrang a si ding. Ziangahtile amah cu Israel le Judah tlunih uktu dingah ka hril zo,» tiah a ti.

1:33a Gihon: Jerusalem tihna pakhat a si.

36 Jehoiada fapa Benaiah in siangpahrang cu a sâng ih, «Amen! Ka bawipa siangpahrang-ih Pathian Jehovah in cuvekin ṭawng ve hram seh. 37 Jehovah cu ka bawi siangpahrang hnenih a rak um bangin, Solomon hnen khalah um ve hram sehla, a laltokham cu ka bawi Siangpahrang David-ih laltokham hnakin ropisawn hram seh,» tiah a ti.

38 Cuticun puithiam Zadok, profet Nathan, Jehoiada fapa Benaiah, Kereth-mipawl le Peleth-mipawl cu an suk ih Siangpahrang David-ih lākrang parah Solomon cu an toter, cule amah cu Gihon ah an hruai. 39 Cun puithiam Zadok in Biakbûk ihta hriak retnak ki a la ih, Solomon a thih. Cule tuupa ki an phaw ih mi hmuahhmuah in, «Siangpahrang Solomon a san sau hram seh!» tiah an ti. 40 Cule amah thlunin mi hmuahhmuah an fehso ih mipi cu phirivaupawl tumin aipuannak nasazet thawn lungawiaipuangin an um, cutin an thâwm ruangah leilung a khĭng ṭheh zik a bang.

Adonijah in Solomon Siangpahrang a Si ti a Thei

41 Cule Adonijah le a hnenih um a sawm mipawl hmuahhmuah cun, ei an khawp tikah, cumi cu an hna in an thei. Cule Joab in tuupa ki thâwm a thei ih, «Ziangruangah so cutlukih thâwmri thangin khawpi a um?» tiah a ti. 42 A ṭawng rero laiah zoh hnik, puithiam Abiathar-ih fapa Jonathan a ra thleng. Cule Adonijah in a hnenah, «Rung lut aw, ziangahtile nang cu mizahum na si ih, thuthang ṭha run keng aw,» tiah a ti.

43 Cun Jonathan in a sâng ih Adonijah hnenah, «Si hlah e! Kan bawi Siangpahrang David in siangpahrang ah Solomon a tuah zo. 44 Solomon zawngah siangpahrang in puithiam Zadok, profet Nathan, Jehoiada fapa Benaiah, Kereth-mipawl le Peleth-mipawl a thlah ih, siangpahrang-ih lākrang parah amah an toter zo. 45 Cule puithiam Zadok le profet Nathan in Gihon ah amah cu siangpahrang ah hriak an thih zo, cule cutawk ihsin lungawiaipuangin an fehso, cutin khawpi cu a khâwk rumro. Thâwmri na rak theih mi cu cumi cu a si. 46 Solomon cu uknak laltokham ah a to fawn. 47 Cule cuihhleiah siangpahrang siahhlawhpawl cu kan bawi Siangpahrang David thlawsuah pe dingin an feh, ‹Pathian in na hmin hnakin Solomon-ih hmin ṭhater sawn hram sehla, amah in na laltokham hnakin amai laltokham ropiter sawn seh,› tiah an ti. Cun siangpahrang cu ihkhun parah a lu a kûn. 48 Cule siangpahrang khal cun hitin a ti, ‹Israel-ih Pathian Jehovah, ka mit ih hmu dingin tuihsun rori ih ka laltokham par totu ding ruattu cu thangṭhatin um seh,› » tiah a ti.

Solomon in Adonijah a Zuah

49 Cutin Adonijah hnenih um a sawm mipawl hmuahhmuah in an ṭih ih an tho, cule mi kip mai zin cio ah an feh. 50 Cule Adonijah in Solomon a ṭih ih, anih cu a tho, cule a feh ih Biakṭheng kipawl a pâwk. 51 Cule cumi cu, «Ngai hnik, Adonijah in Siangpahrang Solomon a ṭih, ziangahtile zoh hnik, anih cun Biakṭheng kipawl a pāwk ih, ‹Tuihsun ah amah in ralnâm thawn a siahhlawh a that lo ding tiin Siangpahrang Solomon in siasăm seh,› tiah a ti,» tiin Solomon cu an sim.

52 Cutikah Solomon in, «Mitling ih a nĕmhngehawk asile, a sám phang khat hman leilung ah a tla lo ding, asinan amah ah sualralnak hmuh a si ahcun, amah cu a thi ding a si,» tiah a ti. 53 Cule Siangpahrang Solomon in Biakṭheng ihsin amah hruaithla dingin anmah cu a thlah. Cule Adonijah cu a thleng ih Siangpahrang Solomon hmaiah a hlăwnaw, cule Solomon in a hnenah, «Na inn ah tlung aw,» tiah a ti.

2

David in Solomon Thu a Sim

<reference type="parallel">1San 28:20-21</reference>

1 Atu ah cun David-ih thih ni a nâi thlang, cule anih in a fapa Solomon thu a cah, 2 «Leilung mi hmuahhmuah lamzin ah ka feh, curuangah cak zetin um awla, pacang na sinak langawter aw. 3 Cule na tuah mi hmuahhmuah le na fehnak pauhpauh ih na hmuingil theinak dingah, Mosi Dān sungih ngan vekin, Jehovah na Pathian in a lamzinpawl zawh ding le a sakhaw dānpawl, a thupekpawl, a cīn le dānpawl, a thutheihtermipawl thlun dingih a thucah mi hi thlun aw. 4 Cutin Jehovah in ka thuhla ih, ‹Na fapapawl in an thinlung zate le an nunnak zate in ka hmaiah thutak ih feh dingah an nundān an fimkhur a si ahcun, Israel laltokham parih totu na tlasam lo ding,› tiih a rak ṭawng mi a kamsuakthu kha a famkimter ding.

5 «Cuihhleiah Zeruiah fapa Joab in ka parih a rak tuah mi le a rak thah mi Israel ralkappawl hotu pahnih Ner fapa Abner le Jether fapa Amasa parih a rak tuah mi khal na thei. Cule remdaihnak cān ah raldonak thisen a suah ih, raldonak thisen cu a tâi kimvelih a taikhap ah le a ke ih a um mi a kedampawl parah an um. 6 Curuangah na fimnak vekin tuah awla, a sám var cu daiten Sheol ah suk hlah seh.

7 «Asinan Gilead-mi Barzillai fapapawl hnenah ngilneihnak langter awla, annih cu na cabuai ih eitupawl lakih mi si hai seh. Ziangahtile annih cu na unaupa Absalom hnen ihsin ka tlan laiah ka hnenah an ra a si.

8 «Cule zoh hnik, Mahanaim ih ka feh ni ah huat um zet camsiatnak thawn i rak camsetu Bahurim ihsin Benjamin-mi, Gera fapa Shimei na hnenah a um. Asinan anih cu Jordan ah i hmuak dingin a suk ih, Jehovah hmin in a hnenah, ‹Ralnâm in ka lo that lo ding,› tiah sia ka rak săm.

9 «Curuangah atu ah mawh nei lo vekin amah cu zoh hlah, ziangahtile mifim na si ih a parah ziang na tuah a ṭul ti na thei. A sám var cu Sheol ah thisen thawn kenglut sawn aw,» tiah a ti.

David Thihnak

10 David cu a pupápawl hnenah a cawl ih, David Khawpi ah phum a si. 11 Israel parih David a lal sung cu kum 40 a si. Hebron ah kum sarih a lal ih, Jerusalem ah kum 33 a lal. 12 Cule Solomon cu a pa David-ih laltokham parah a to ih, a lalram cu hnget zetin dĭnhngeh a si.

Solomon in Adonijah a That

13 Haggith fapa Adonijah cu Solomon nu Bathsheba hnenah a ra. Cule Bathsheba cun, «Daihnak thawn na ra maw?» tiah a rak ti.

Cule anih in, «Daihnak thawn,» tiah a ti. 14 Cuihhleiah Adonijah cun, «Na hnenih lo sim ding ka nei,» tiah a ti.

Cule Bathsheba in, «Cumi cu sim aw,» tiah a ti.

15 Cun anih cun, «Lalram cu ka ta a si ti na thei ih, keimah in ka uk a ṭul ti Israel-mi hmuahhmuah in ka parah an ruahsannak an ṭhum. Sikhalsehla lalram cu a linglet ih ka unaupaih ta ah a cang. Ziangahtile cumi cu Jehovah hnen ihsin amai ta a si. 16 Atu ah thil pakhat ka lo dil, i ael siang hram hlah,» tiah a ti.

2:16a el: A ṭawng hrampi ah, «hmai hmun dang hawisan,» ti a si.

Cule Bathsheba in a hnenah, «Cumi cu sim aw,» tiah a ti.

17 Cun anih in, «Nupi ah Shunam-mi Abishag i pek theinak dingah zangfahten Siangpahrang Solomon be aw, ziangahtile anih cun a lo êl lo ding» tiah a ti.

18 Cutin Bathsheba in, «A ṭha e, siangpahrang hnenah ka lo simsak ding,» tiah a ti.

19 Curuangah Bathsheba cu Adonijah simsak dingin Siangpahrang Solomon hnenah a feh. Cule siangpahrang cu amah hmuak dingah a tho ih a hnenah a kûn. Cule a laltokham parah a to ih, siangpahrang-ih nu hrangah laltokham a hunter, cutin anih cu siangpahrang vawrh lamah a to. 20 Cun Bathsheba in, «Na hnenah dilnak fate pakhat neih ka duh, i êl siang hram hlah,» tiah a ti.

Cule siangpahrang in a hnenah, «Cumi cu dil aw, ka nu, ziangahtile ka lo êl lo ding,» tiah a ti.

21 Cutin Bathsheba cun, «Shunam-mi Abishag cu na unaupa Adonijah hnenah nupi dingih pek si seh,» tiah a ti.

22 Cule Siangpahrang Solomon in a sawn ih a nu hnenah, «Atu ah Adonijah hrangah ziangahso Shunam-mi Abishag cu na dil? Lalram khal dilsak lawlaw hmen, ziangahtile amah cu ka u a si. A hrangah siseh, puithiam Abiathar hrangah siseh, Zeruiah fapa Joab hrang khalah dil lawlaw hmen!» tiah a ti. 23 Cule Siangpahrang Solomon cun Jehovah hmin in, «Himi ṭawngkam cu Adonijah in amai nunnak dokalhih a ṭawng mi a si lo na vaih ah cun, Pathian in cuvekin i tuah sehla, cuhnakih nasa khalin! 24 Curuangah atu ah, nĕmhngetin ka hrangih sungza a rak dĭnsuaktu ka pa David-ih laltokham parih i rettu Jehovah a nun rori bangin, thu a kam vekin Adonijah cu tuihsun ah thah a si ding a si!» tiin sia a săm.

25 Cuticun Siangpahrang Solomon cun Jehoiada fapa Benaiah cu a thlah, cule anih in Adonijah parah kut a thlak ih, a thi.

Joab Thah a Si

26 Cule siangpahrang in puithiam Abiathar hnenah, «Anathoth ah, nangmai ló ah feh aw, ziangahtile nang cu thitlak na si. Asinan atu ah cun ka lo that lo ding, ziangruangahtile ka pa David hmaiah Bawipa Jehovah-ih Kuang na rak phur ih, ka pa a zăwnzaih tintein na rak zawnzai ve,» tiah a ti. 27 Cun Eli sungkua thuhla ah Jehovah in Shiloh ih a sim mi Jehovah kamsuakthu a famkimternak dingah, Solomon in Abiathar cu Jehovah-ih puithiam sinak ihsin a hlăwn.

28 Ziangahtile Joab cu Absalom hnenah a rak ṭâng lo nân, Adonijah hnenah a rak ṭâng a si ti mi thuthang cu Joab hnenah a thleng. Cutin Joab cu Jehovah-ih Biakbûk ah a tlânsia ih Biakṭheng kipawl a kai. 29 Cule, «Jehovah-ih Biakbûk ah a tlânsia, ngai hnik, amah cu Biakṭheng kiang teah a um,» tiin Siangpahrang Solomon hnenah an sim. Cutikah Solomon in Jehoiada fapa Benaiah a thlah ih, «Feh awla amah cu vawthlu aw,» tiah a ti.

30 Cule Benaiah cu Jehovah-ih Biakbûk ah a feh ih a hnenah, «Siangpahrang in, ‹Ra suak aw,› a ti,» tiah a ti.

Cule Joab in, «Si lo e, hi tawkah ka thi sawn ding,» tiah a ti. Cule Benaiah in siangpahrang hnenah thu a thlensal ih, «Joab in hitin a ti ih, anih in hitin in sâng a si,» tiah a ti.

31 Cun siangpahrang in a hnenah, «Ka hnen ihsin le ka paih sungza ihsin mawh nei lo thisen Joab in a suah mi na lakhlohnak dingah, a sim vekin tuah aw, amah cu vawthlu awla phum aw. 32 Cutin amah hnakih dingfel sawn le ṭhasawn mi pahnih, Israel ralkap bawi Ner fapa Abner le Judah ralkap bawi Jether fapa Amasa tla ka pa David ih theih loin a sat ih ralnâm thawn anmah a thah ruangah, Jehovah in a thisen man cu amai lu par rori ah a kirsalter ding. 33 Curuangah an thisen man cu Joab lu parah le a tesinfapawlih lu parah a kir kumkhua ding a si. Asinan David le a tesinfapawl, a sungza le a laltokham ah cun Jehovah hnen ihsin kumkhuain daihnak a um ding,» tiah a ti. 34 Cule Jehoiada fapa Benaiah cu a fehso ih Joab cu a bei ih a that. Cule amah cu ramṭhing ih amai inn sung rori ah phum a si. 35 Siangpahrang in Jehoiada fapa Benaiah cu amah aiawhin ralkappawl tlunah a ret ih, puithiam Zadok cu Abiathar aiah a ret.

Shimei Thah a Si

36 Cun siangpahrang in mi a thlah ih Shimei a ko, cule a hnenah, «Na hrangah Jerusalem ah inn sak awla, cu tawkah cêng aw. Cule cutawk ihsin khuitawk hman feh hlah aw. 37 Ziangahtile hitin a si ding, na fehsuak ih Kidron Tivate na tankai ni ah na thi tengteng ding ti thei aw, na thisen man cu nangmai lu par rori ah a um ding,» tiah a ti.

38 Cule Shimei in siangpahrang hnenah, «Na sim mi cu a ṭha. Ka bawi siangpahrang in a sim vekin, na siahhlawh in a tuah ding,» tiah a ti. Cutin Shimei cu Jerusalem ah ni tampi a cêng.

39 Cun kum thum a cem tikah hitin a si, Shimei-ih sál pahnih cu Maakah fapa Akish, Gath siangpahrang hnenah an tlân. Cule Shimei hnenah, «Zoh hnik, Gath khawpi ah na sálpawl an um!» tiah an sim. 40 Cule Shimei cu a tho, a lāk a dăm ih a sálpawl hawl dingin, Akish hnenah Gath ah a feh. Cule Shimei cu a feh ih, Gath ihsin a sálpawl cu a hruai hai.

41 Cule Shimei cu Jerusalem ihsin Gath ah a feh ih a thlengkirsal ti Solomon an sim. 42 Cutikah siangpahrang in mi a thlah ih Shimei cu a ko. Cule a hnenah, « ‹Fiangten thei aw, na fehsuak ih na tlawnnak pauhpauh ah na tlawn ni ah na thi tengteng ding a si,› tiin Jehovah hmin in sia ka rak lo sămter ih, ralrinnak ka lo pe a si lo maw? Cule nang in ka hnenah, ‹Ka theih mi thu cu a ṭha,› tiah na ti. 43 Ziangruangah Jehovah-ih thukam le ka lo pek mi thupek na rak thlun lo,» tiah a ti. 44 Siangpahrang in Shimei hnenah, «Na thinlung in a theih bangin, ka pa David hnenih na tuah mi sualralnak hmuahhmuah tla na thei. Curuangah Jehovah in nangmai lu par rori ah na sualralnak a lo khirh ding. 45 Asinan Siangpahrang Solomon cu thlawsuah a si ding ih, David-ih laltokham cu Jehovah hmaiah kumkhuain dĭnhngeh a si ding,» tiah a tibêt. 46 Cun siangpahrang in Jehoiada fapa Benaiah thu a pe, cule anih cu a fehsuak ih Shimei cu a bei, cule Shimei cu a thi. Cuticun lalram cu Solomon kut ah dĭnhngeh a si.

3

Solomon in Fimnak a Dil

<reference type="parallel">2San 1:1-13</reference>

1 Solomon in Izip siangpahrang Faro thawn pehtlaihawknak a tuah ih, Faro fanu a ṭhi. Cun anih in cu nu cu amai inn, Jehovah inn le Jerusalem khaw kimvel hmuahhmuah kulh a dĭn ṭheh tiangin David Khawpi ah a ret. 2 Cu laiah mipi cun hmun sângpawl ah an thawiaw, ziangruangahtile cuih ni tiangah Jehovah hmin hrangih inn sak mi a rak um lo. 3 Cule hmun sângpawl ah rai a thawi ih, rimhmui a ur ti bak lo cu, Solomon cun a pa David-ih sakhaw dānpawl thlunin Jehovah a duhdawt. 4 Hmun sâng ropi a si ruangah cutawk ih raithawi dingin siangpahrang cu Gibeon ah a feh. Solomon in cuih biakṭheng parah Meiur Thilhlăn 1000 a hlan.

5 Zan ah Gibeon ah cun Solomon hnenah a mang ah Jehovah a lang, cule Pathian in, «Dil aw! Ziang ka lo pe ding?» tiah a ti.

6 Cule Solomon in, «Na siahhlawh ka pa David hnenah zahngainak ropi na rak hmuh zo. Ziangruangahtile anih cu na hmaiah thutak, dingfelnak le thinlung dĭngnak thawn a feh. Nang in amai hrangah hih ngilneihnak nasa hi na pebêt vivo ih, tuihni vekin, a laltokham parih totu ding fapa na pe. 7 Atu ah, Maw Jehovah ka Pathian, ka pa David aiawhin na siahhlawh cu siangpahrang ah na tuah zo, asinan kei cu nauhakte ka si. Thil tidān ding ka thei lo. 8 Cule na siahhlawh cu na rak hril mi mipi, mipi tam zet, siar cawk lo ih tam tuk mi na mipawl lakah a um. 9 Curuangah na siahhlawh hnenah na mipawl thuṭhen dingin a ṭha le a ṭhalo ka thleidăn theinak dingah theihthiamnak thinlung i pe aw. Ziangahtile hi zozai na minungpawl cu zo in so a uk thei ding?» tiah a ti. 10 Solomon in himi thil a dilnak ṭawngkam in Bawipa a lunghmuiter.

11 Cun Pathian in a hnenah, «Himi thil na dil ruangah le na hrangah nun saunak na dil lo ih, na hrangah lennakpawl khal na dil lo, cule na ralpawlih nunnak khal na dil fawn lo, cuhnakin na hrangah diknak thleidăn theinak dingah theihthiamnak na dil ruangah, 12 ngai hnik, na ṭawngkampawl vekin ka tuah zo a si. Zoh hnik, fimnak le theihthiamnak thinlung ka lo pe, cutin na hlanah nangmah vek mi pakhat hman an rak um lo ih, na hnu khalah nangmah vek an um lo ding. 13 Cule na dil lo mi lennakpawl le cawimawinak khal ka lo pe, cutin na damsung ah siangpahrangpawl lakah zohman nangmah bang an um lo ding. 14 Cule na pa David ih a zawh bangin ka sakhaw dānpawl le ka thupekpawl thlun dingin ka lamzinpawl na zawh asile, na san khal ka sauter ding,» tiah a ti.

15 Cun Solomon cu a ṭhangharh ih, ngai hnik, cumi cu mang a rak si. Cule anih cu Jerusalem ah a feh ih Jehovah-ih Thukham Kuang hmaiah dingin, Meiur Thilhlănpawl a hlan, Remnak Thilhlănpawl a hlan ih, a siahhlawhpawl hmuahhmuah hrangah puai a tuah.

Fim zetin Solomon in Thu a Ṭhen

16 Cun siangpahrang hnenah nunau hlawhhlâng pahnih an ra thleng ih a hmaiah an ding. 17 Cule nunau pakhat in, «Maw ka bawipa, himi nunau le keimah cu inn khat ah kan cêng, cule inn sungih amah a um laiah fa ka hring. 18 Cun hitin a si, fa ka hrin a ni thum hnuah hih nunau khal in fa a hring ve. Cule kannih cu kan umtlang. Inn sungih kanmah pahnih ti lo cu inn sungah mi pakhat hman kan hnenah an um lo. 19 Cule hih nunaunuih fapa cu zan ah a thi, ziangruangahtile amah in a nĕn. 20 Cule zan laiah a tho ih na siahhlawhnu a ih laiah ka kiangih ka fapa a lâk ih amah cu a ṭāng sungah a hlum ih, ka ṭāng sungah a thi mi a fapa a hlum. 21 Cule ka fapa hnawi fawh dingin zing ka thawh tikah, ngai hnik, anih cu a rak thi. Asinan anih cu zing ah ka zohfiang tikah, ngai hnik, amah cu ka hrin mi ka fapa a si lo,» tiah a ti.

22 Cule a dang nunau in, «A si lo! A nung mi sawn hi ka fapa a si ih, a thi mi sawn hi na fapa a si,» tiah a ti.

Cule a hmaisa nunau khan, «A si lo! A thi mi hi nangmai fapa a si ih, a nung mi hi ka fapa a si,» tiah a ti. Cutin siangpahrang hmaika-ah an rel.

23 Cule siangpahrang in, «Pakhat in, ‹Hi a nung mi sawn hi ka fapa a si ih a thi mi sawn hi na fapa a si,› a ti. Cun a dang in, ‹A si lo! Na fapa cu a thi mi sawn a si ih a nung mi sawn hi ka fapa a si,› a ti,» tiah a ti. 24 Cun siangpahrang in, «Ralnâm i hun pe uh,» tiah a ti. Cutin siangpahrang hmaiah ralnâm an rak keng. 25 Cule siangpahrang in, «A nung mi naute kha pahnih in ṭhen uhla a hrek cu pakhat hnenah pe uh, cule a hrek a dang pakhat hnenah,» tiah a ti.

26 Cun a nung mi fapa neitu nunau cun a fapa a lainat tuk ruangah siangpahrang hnenah a ṭawng ih, «Maw ka bawipa, a nung mi nauhak cu amah pe uhla that hrimhrim hlah uh!» tiah a ti.

Asinan pakhat sawn cun, «Amah cu ka ta khal si hlah seh, nangmai ta khal si hlah seh. Ṭhen sawn uh,» tiah a ti.

27 Cun siangpahrang in a sâng ih, «Nunau hmaisatu hi a nung mi naute pe uhla, naute cu that hrimhrim hlah uh, amahnu hi a nu a si,» tiah a ti.

28 Cule Israel-mi hmuahhmuah in siangpahrang ih thuṭhennak a tidān an hna in an thei ih, siangpahrang cu an ṭih. Ziangahtile diknak ih hoha dingah Pathian fimnak amah ah a um ti an hmu.

4

Solomon-ih Bawipawl

1 Solomon cu Israel-mi hmuahhmuah tlunih siangpahrang a si. 2 Cule hipawl hi a hotupawl an si: Zadok fapa Azariah cu puithiam a si, 3 Shisha fapapawl Elihoref le Ahijah cu cangantu an si, Ahilud fapa Jehoshafat cu ngankhumtu a si, 4 Jehoiada fapa Benaiah cu ralkap hotu a si, Zadok le Abiathar cu puithiam an si, 5 Nathan fapa Azariah cu hotupawl uktu a si, Nathan fapa Zabud cu puithiam le siangpahrang rualpi a si, 6 Ahisar cu lalsungkua hotu a si, cule Abda fapa Adoniram cu hranhramih hna ṭuantermipawl hotu a si.

7 Cule Solomon in siangpahrang le a sungkua rawl petu, Israel ramṭhenpawl hmuahhmuah tlunih ram uktu hleihnih a nei, pakhat in kum khat ah thla khat cio rawl an timtuah. 8 Hipawl hi an hmin a si: Efraim tlang ram ah Ben-Hur, 9 Makaz khua, Shaalbim khua, Beth Shemesh khua ah Ben-Deker, 10 Arubboth ah Ben-Hesed, Sokoh le Hefer ram hmuahhmuah cu amai ta a si. 11 Dor ramṭhen hmuahhmuah ah Ben-Abinadab, cu pa in Solomon fanu Tafath nupi ah a nei. 12 Ahilud fapa Baana in Taanak khua le Megiddo khua ah siseh, Jezreel khaw hnuai, Jerethan khua kiangih um Beth Shean bial hmuahhmuah siseh, Beth Shean ihsin Abel Meholah siseh, Jokneam ram khat lam ral tiangin a co. 13 Ramoth Gilead khua ah Ben-Geber, cu pa cun Gilead ram ih um Manasseh fapa Jair-ih khuapawl khal amah in a co. Bashan ram ih a um mi Argob ramṭhen, kulh le kăwtka kalhnak dar tlâng nei khaw tumpi pi khaw 60 khal a co. 14 Mahanaim khua ah Iddo fapa Ahinadab, 15 Naftali ram ah Ahimaaz, anih khal in Solomon fanu Basemath nupi ah a nei. 16 Asher le Aloth khua ah Hushai fapa Baanah, 17 Issakar ram ah Paruah fapa Jehoshafat, 18 Benjamin ah Elah fapa Shimei, 19 Amor-mipawlih siangpahrang Sihon-ih ram le Bashan siangpahrang Og-ih ram ah, Uri fapa Geber, amah cu cuih ram ih um uktu umsŭn a si.

Solomon-ih Neihnunnak le Fimnak

20 Judah le Israel pawl tam lam cu tifinriat vunnel zât in an tam ih, ei le in le nuamin an um. 21 Solomon in Tiva ihsin Filisṭia-mipawlih ram tiangih lalram hmuahhmuah, Izip ramri tiang a uk. Annih in ngunkhuai an rak keng ih, a damsung hmuahhmuah Solomon cu an rian. 22 Cun Solomon-ih ni khat rawl ei mi cu sangvut phŭt kor 30, sangvut kor 60 le, 23 câwcang thau 10, ran tlannak ihta câwcang 20 le sakhi, zuknêngpawl, sakhi papawl le vâte thau hleiah tuu 100 tla an si. 24 Hi lam Tiva khat lam ral ram hmuahhmuah, Tifsah ihsin Gaza tiang, Tiva-ih hi lam kap siangpahrang hmuahhmuah tlunah a lal, cule a kimvel hmuahhmuah tlunah remdaihnak a nei. 25 Solomon-ih san sung hmuahhmuah, Judah le Israel cu mi kip mai sabit hri le theipi kung hnuai cio ah, Dân ihsin Beersheba tiangin, ralmuangten an cêng. 26 Solomon in a lêngpawl hrang ránginn 40000 le rángtothiam mipa 12000 a nei. 27 Cule himi ram uktupawl in anmai thla kim cio ah Siangpahrang Solomon le Siangpahrang Solomon cabuai ih a ratu hmuahhmuah hrangah rawl an timtuah. An rawl timtuah mi ah tlaksăm mi a um lo. 28 Rángpawl le rángtlâncakpawl hrangah barli sangvut le cangpâwl khal mi kip mai ṭuanvo cio in a hmun dik ah an ret.

29 Solomon cu Pathian in fimnak le theihthiamnak nasazetih ropi le tifinriat kapih vunnel vekih kau thinlung a pe. 30 Cutin Solomon cun nisuahnak lamih mifimpawl hmuahhmuah le Izip fimnak hmuahhmuah a hleih. 31 Ziangahtile anih cu mi hmuahhmuah hnakin a fimsawn: Ezrah-mi Ethan le Mahol fapapawl Heman, Kalkol le Darda pawl hnakin a fimsawn, cule a hmin cu a kiangkapih miphunpawl hmuahhmuah lakah a thang. 32 Thufim 3000 a ṭawngsuak ih, a hlapawl cu fing 1005 a si. 33 Cuihtlunah thingkung thuhla khal Lebanon tlang ih sidar thing ihsin kulh ih a kho mi hissop thu tiangin a sim, ramsapawlih thuhla, vâtepawlih thuhla, băwkvâkpawlih thuhla le ngapawlih thuhla khal a sim. 34 Solomon-ih fimnak thuhla rak theitu leitlun siangpahrang hmuahhmuah ihsin miphun hmuahhmuah cu Solomon-ih fimnak ngai dingin an ra.

5

Temple Sak dingin Solomon a Timlam

<reference type="parallel">2San 2</reference>

1 Ṭaiar siangpahrang Hiram in Solomon cu a pa aiah siangpahrang ah hriak an thih zo ti a hna in a theih ruangah a hnenah a siahhlawhpawl a thlah, ziangahtile Hiram in David a duhdawt ringring. 2 Cun Solomon in Hiram hnenah mi a thlah ih, 3 «Ka pa David cun a kil kip in amah dokalhih raldoawknakpawl ruangah a ke zaphak hnuaiah Jehovah in a ralpawl a ret hlanlo cu Jehovah a Pathian hmin hrangah inn a sak thei lo ti na thei. 4 Asinan atu ah cun Jehovah ka Pathian in a kil kip ah cawlhnak i pe, doral siseh, thil ṭhalo thleng mi siseh a um lo. 5 Cule ngai hnik, Jehovah in ka pa David hnenih, ‹Na laltokham ah na aiah ka ret ding mi na fapa in ka hmin hrangah inn a sak ding a si,› tiin a rak sim bangin, Jehovah ka Pathian hmin hrangah inn sak ka tum a si. 6 Curuangah atu ah, Lebanon ihta ka hrangih sidar thingpawl hau dingin thu pe awla, ka siahhlawhpawl in na siahhlawhpawl an bawm ding ih, na sim mi pauhpauh bangtukin na siahhlawhpawl hrangah hlawhman ka lo pe ding. Ziangahtile Sidon-mipawl bangih thing hau thiam kan lakah zohman an um lo ti na thei,» tiah a ti.

7 Cule hitin a si, Hiram in Solomon-ih ṭawngkampawl a theih tikah, nasazetih lungawiaipuangin a um ih, «Tuihsun ah Jehovah cu thangṭhatin um seh, ziangahtile amah in David hnenah hi mipi ropi tlunah fapa fim a pe!» tiah a ti. 8 Cun Hiram in Solomon hnenah mi a thlah ih, «I kuat mi thu ka rak ruat ih, sidar thing le mirang far thing thu ah na duh mi hmuahhmuah ka tuah ding. 9 Ka siahhlawhpawl in tifinriat ah cupawl cu Lebanon tlang ihsin an run keng ding, cupawl cu tifinriat ihsin i sim mi hmun ah pûm in ka tawlh hai ding ih, cu tawkah cupawl cu ka phelhter hai ding, cule cupawl cu na rak la thei ding. Cule ka sungkua hrangih rawl i peknak in ka duhnak na famkimter ding,» tiah a ti.

10 Cun Hiram in Solomon hnenah sidar thing le mirang far thing a duh zât in a pe. 11 Cule Solomon in Hiram hnenah a sungkua rawl hrangah sangvut kor 20000 le sawr mi hriak kor 20 a pe. Cuticun Solomon in Hiram hnenah kum tintein a pe. 12 Cule Jehovah in amah a rak tiamkam zo bangin, Solomon cu fimnak a pe. Hiram le Solomon karlakah remdaihnak a um ih, an pahnih in thukham an tuah.

13 Cun Solomon in Israel hmuahhmuah lak ihsin hranhramih ṭuanter mi hnaṭuantu a dĭnsuak ih, hranhramih ṭuanter mi hnaṭuantu mipa 30000 an si. 14 Anmah cu Lebanon tlang ah thla khat ih thlengaw vivo in mi 10000 a thlah ṭheu: Lebanon tlang ah thla khat, inn ah thla hnih tiin anmah cu a thlah hai. Adoniram cu hranhramih ṭuanter mi hnaṭuantu hotu a si. 15 Solomon in phur thiartu mi 70000 le tlangpawl ih lung sertu mi 80000 a nei, 16 cuhleiah Solomon cun hnaṭuan kilkhawitu tlunih hotu hleice, hnaṭuan zohliahtu mi 3300 a nei. 17 Cule siangpahrang in thu a pe ih, annih in temple lungphum phum dingin lung tumpi pi, lung mankhungpawl le ser zo mi lungpipawl tla an rak keng. 18 Solomon-ih inn saktupawl, Hiram-ih inn saktupawl le Gebal rammipawl in an ser ih temple sak dingah thing le lungpipawl an timtuah.

6

Solomon in Temple a Sak

<reference type="parallel">2San 3</reference>

Hramthawhnak

<reference type="parallel">2San 3:1-2</reference>

1 Cule hitin a si, Israel tefapawl Izip ram ihsin an suah hnu kum 480-nak, Solomon in Israel tlunih a lal a kum litnak, a thla hnihnak a si mi Ziv thla ah Jehovah inn sak a thăwk.

Temple leng lam Lăngdan

<reference type="parallel">2San 3:3-8</reference>

2 Siangpahrang Solomon in Jehovah hrangih a sak mi inn cu a sau lamah dawng 60, a kauh lamah dawng 20 le a san lamah dawng 30 a si. 3 Temple Hmun Thianghlim hmaiih hulhliap cu inn sau lam hrutin dawng 20 le inn hmai ihsin hulhliap kauh lam cu dawng 10 a si. 4 Cule Solomon in inn tukvirhpawl hrangah a tlâng kawkalhpawl a tuah.

5 Temple phăr dungtunin a kimvelah, temple pharpawl dung tluanah Hmun Thianghlim le sungta Hmun Thianghlim sung kimvel hmuahhmuah ah pindanpawl a sak. Cutin a kimvelah a sir pindanpawl a tuah. 6 A niambik pindan cu dawng nga a kau, a laita cu dawng ruk a kau ih, a pathumnak cu dawng sarih a kau. Ziangahtile a dotu tlângpawl cu temple pharpawl sungih hrawlh ṭul loin, temple leng lam tluanah a hngahnak bitepawl a tuah. 7 Temple cu sak rero lai a si tikah, lunglaknak ih ser ṭheh mi lungto thawn sak a si, cutin temple sak a si laiah sobul simaw, hreitlung simaw, thir hmanrua thâwm simaw theih a si lo. 8 A sâwng hnihnak sângka zin cu temple vawrh lam sirah a um. Cupawl cu kailawnpawl ihsin sâwng laita ah, a laita ihsin a pathumnak ah an fehso. 9 Cutin Solomon in temple a sak ih a ṭheh, cule temple cu sidar thing tlângpawl le thingphengpawl in a tuam. 10 Temple pumpi sir tluanah dawng nga cio sângin pindanpawl a sak, cupawl cu sidar thing tlângpawl thawn temple ah an pehaw.

Pathian in Solomon a Besal

11 Solomon hnenah Jehovah kamsuakthu a thleng, 12 «Na sak rero mi temple thuhla ah, ka sakhaw dānpawl na zawh, ka cīn le dānpawl na thlun, ka thupekpawl hmuahhmuah na kilhim ih, cupawl na thlun asile, na pa David hnenih ka rak sim mi, ka kamsuakthu cu nangmah ah ka tuahsuak ding. 13 Cule Israel tefapawl lakah ka cêng ding ih, ka mi Israel ka thlauthla lo ding,» tiah a ti.

Temple Sung Lam

<reference type="parallel">2San 3:3-8</reference>

14 Cuticun Solomon cun Temple a sak ih a ṭheh. 15 Sidar thingphengpawl thawn Temple sung pharpawl a sak. Temple zial ihsin a siling tiang thing thawn a sung a tuam. Temple zial khal mirang far thingphengpawl thawn a tuam. 16 Cun temple dung lamah dawng 20 pindan cu zial ihsin siling tiangin sidar thingphengpawl thawn a sak. A sung lamah sungta Hmun Thianghlim a sak, cumi cu Hmun Thianghlimbik a si. 17 Cule cumi hmaiah temple innpi cu dawng 40 a sau. 18 Temple sung lam cu par mûmpawl le par parhpawl lemih kher mawi mi sidar thing hlir a si, lungto hmuh ding a um lo.

19 Cule Jehovah-ih Thukham Kuang retnak dingah temple sungih sungta Hmun Thianghlim cu a timtuah. 20 Sungta Hmun Thianghlim cu dawng 20 sau, dawng 20 kau le dawng 20 sâng a si. Cumi cu sui hlirhlăng a khût ih sidar biakṭheng khal a khût. 21 Cutin Solomon in temple sung cu sui hlirhlăng a khût. Sungta Hmun Thianghlim hmai lam hrawhin sui cikcinpawl a zar ih, cumi cu sui a khût. 22 Temple zate a ṭheh tiangin, temple pumpi cu sui a khût, sungta Hmun Thianghlim ih a um mi Biakṭheng pumpi khal sui a khût.

Temple Bungrua

<reference type="parallel">2San 3:10-4:11</reference>

23 Sungta Hmun Thianghlim sungah olif thing in dawng hra sâng mi cherub pahnih a tuah. 24 Cherub-ih thla pakhat cu dawng nga a si ih, a pakhat sawnih thla khal dawng nga a si. Thla pakhat zim ihsin a dang thla pakhat zim tiang dawng hra a si. 25 Cule a dang cherub cu dawng hra a si, cherub pahnih cu an tia-aw ih, an bangaw. 26 Cherub pakhat ih san lam cu dawng hra a si ih, cuvekin a dang cherub khal a si. 27 Cun cherub-pawl cu pindan sungta sungah a ret hai ih, annih in cherub-pawlih thla cu an pharh, cutin pakhat ih thla in phăr pakhat a dai ih, a dang cherub thla in a dang phăr a dai. Cule pindan laifangah an thla pakhat le pakhat an daiaw. 28 Anih in cherub-pawl khal sui a khût.

29 Cun temple phăr hmuahhmuah cu a kimvelin cherub-pawl, ṭhulhfau kungpawl le pangpar parh lempawl kher mawi mi in pindan sungta le a lengta cu a kher. 30 Cule temple zial cu, pindan sungta le a lengta thawn sui a khût.

31 Cun sungta Hmun Thianghlim luhnak hrangah olif thing in sângkapawl a tuah, sângka tlun le sângka biangpawl cu a phăr hmun nga ṭhen ih hmun khat tia a si. 32 Sângka pahnih cu olif thing in a si ih, an parah cherub-pawlih zuk cu ṭhulhfau kungpawl le pangpar parhpawl in a kher, cule cupawl cu sui a khût. Cule sui cu cherub-pawl le ṭhulhfau kungpawl ah a darhter.

33 Hmun Thianghlim sângka hrangah olif thing in sângka biangpawl, phăr ṭhen li ṭhen khat in a tuah fawn. 34 Cule sângka pahnih cu mirang far thing in, kăwp hnih cu bil theihin, a dang kăwp hnih khal bil theih an si. 35 Cherub-pawl, ṭhulhfau kungpawl le pangpar parhpawl an parah a kher ih, kher mi parah sui páte in a khût.

36 Cule tual sungta cu ser mi lung thuah thum in le sidar tlângpawl thuah khat in a sak.

37 A kum litnak, Ziv thla ah Jehovah inn lungphum cu phum a si. 38 Cule a kum hleikhatnak, a thla riatnak Bul thla ah inn cu a cipciar hmuahhmuah le ruahmandān hmuahhmuah vekin ṭheh a si. Cutin Solomon cu cumi saknak ah kum sarih a rei.

7

Solomon ih Sak mi a dang Innpawl

1 Asinan Solomon in amai inn saknak ah cun kum hleithum a rei, cutin a inn hmuahhmuah a ṭheh thluh. 2 Solomon in sidar ṭhuam tlar li le ṭhuampawl parah sidar tlângpawl thawn, a sau lam dawng 100, a kauh lam dawng 50 le a san lam dawng 30 in Lebanon Tupi Inn khal a sak. 3 Cule ṭhuam 45 tlunih a tlângpawl cu sidar thingpheng ih khuh a si, tlar khat ah hleinga vivo in. 4 Tlar thum in tukvirh a um ih, tukvirh cu hmai hawihawin sâwng thum in an um. 5 Cule sângkapawl le sângka biangpawl hmuahhmuah cu thingphengpawl in a tuah ih, tukvirh cu hmai hawihawin sawng thum in an um.

6 Hulhliap cu ṭhuampawl thawn a tuah, cumiih sau lam cu dawng 50, a kauh lam dawng 30 a si ih, cupawlih hmaiah ṭhuampawl thawn hulhliap a um ih, an hmaiah daihnem a um. 7 Cun laltokham hrangah hulhliap, thu a ṭhennak ding thuṭhennak hulhliap a tuah, cule cumi cu a zial ihsin siling tiangin sidar thing ih tuam mi a si.

8 Cule a cēnnak inn cun hulhliap sungah a dang vekin tual dang a nei. Solomon in nupi ih a rak neih mi Faro fanu khal himi hulhliap vek inn a tuahsak.

9 Hipawl hmuahhmuah cu lung mankhung zetzet pawl, a tawk ciah vivo ih ser mi, thil ahnak ih ah mi lungto ih sak a si, sung lam khal, leng lam khal a lungphum ihsin a zim tiangin le cuvek thothoin a leng ihsin tual kaupi tiangin. 10 A lungphum cu lung mankhung zetzet pawl, lung hlaipi pi, hrekkhat dawng hra le hrekkhat dawng riat a kau mi lungtopawl ih tuah a si. 11 Cule a tlun cu lung mankhung zetzet, a tawk ciah ih ser mi lung le sidar thing a si. 12 Tual kaupi cu ser mi lungto tlar thum le sidar thingphengpawl tlar khat in kulh a si. Jehovah inn tual sungta le temple hulhliap vekin a si.

Zungthiam Huram

13 Siangpahrang Solomon in mi a thlah ih, Ṭaiar ihsin Huram a hruai. 14 Anih cu Naftali hnám nuhmei fapa a si ih, a pa cu Ṭaiar-mi, dar tuahtu a si, anih cu fimnak le theihthiamnak in a khat ih, dar tuahnak hnaṭuan phun zakip thiam a si. Cutin anih cu Siangpahrang Solomon hnenah a thleng ih a hna hmuahhmuah a ṭuan.

Temple hrangih Dar Ṭhuampawl

<reference type="parallel">2San 3:15-17; 4:13</reference>

15 Anih in dar ṭhuam pahnih a bur, an san lam dawng hleiriat le an kimvel cu dawng hleihnih veve an si. 16 Cun ṭhuam zimpawlih bŭn dingah dar bur mi lubol pahnih a tuah. A tuamnak pakhat ah dawng nga a sâng, a tuamnak dang pakhat ih san lam khal dawng nga a si. 17 Ṭhuam zimih lubol hrangah cun ṭial ṭhekṭhi le ngerhawin, lubol pakhat ah ngerh sarih le a dang lubol pakhat ah ngerh sarih a tuah. 18 Cuticun ṭhuampawl cu a tuah ih, cuih ṭhuampawl lu zimih lubolpawl khuhnak dingah ṭial ṭhekṭhi tlunah a kimvelin talê rahpawl tlar hnih a tuah, cutivekin a dang lubol pakhat hrang khalah a tuah.

19 Hulhliap sung ṭhuampawl lu zimih dawng li a si mi a lubolpawl cu lily pianzia vek an si. 20 Ṭhuam pahnih lu zimih a lubolpawlih a tlâng ah, ṭial ṭhekṭhi kiang teah talê rahpawl an um, cule talê rahpawl cu cuih lubolpawl kimvel hmuahhmuah ah 200 veve a tlarin an um.

21 Cun temple hulhliap ah ṭhuampawl a dĭn, vawrh lamah ṭhuam a phun ih cumi cu a hmin ah aJakin a sak ih, a keh lam khalah ṭhuam a phun ih cumi cu a hmin ah bBoaz a sak. 22 Ṭhuam zimpawl cu lily pianzia vek an si. Cutin ṭhuam hnaṭuan cu ṭheh a si.

7:21a Jakin: Hebru ṭawng ih a sullam cu «a dĭn» tinak a si.

7:21b Boaz: Hebru ṭawng a si ih, a sullam cu «cumi ah cahnak tha a um,» tinak a si.

Maihumpi le Câwcangpawl

<reference type="parallel">2San 4:2-5</reference>

23 Cule Dar bur Tikuangpi a tuah ih, a tlâng cu khat lam ihsin khat lam tiang dawng hra a si, cumi cu a kûal. A san lam dawng nga a si ih, a tlâng kimvel cu dawng 30 a si. 24 A tlâng hnuaiah cei mi par mûm in a velkûal thluh, dawng khat ah pahra vivo in Tikuangpi kimvelin a si. Par mûm cu bur a si laiah tlar hnih in bur a rak si. 25 Cumi cu câwcang hleihnih tlunah a ṭhumaw ih, pathum in sak lam an hawi, pathum in nitlaknak lam an hawi ih, pathum in thlang lam an hawi, cule pathum in nisuahnak lam an hawi. Cupawl parah Tikuangpi toh a si ih, an taw lamin sung lam an hawih thluh. 26 Cumi cu zabăwk sah a si ih, a tlâng cu no tlâng pianhmang, lily par vek a si. Cumi in abath 2000 a dâwl.

7:26a bath 2000: kalan 11500 hrawng a si.

Dar Tohkālpawl

<reference type="parallel">2San 4:14</reference>

27 Dar in tohkāl pahra khal a tuah, tohkāl kip ih sau lam cu dawng li, a kauh lam dawng li le a san lam dawng thum a si. 28 Cule hihi tohkālpawlih pianhmang a si: cupawl cun kuar an nei ih, a kuarpawl cu a tlâng karlakah a si. 29 A tlângpawl karlakih a kuarpawl ah cun kiosapawl, câwcangpawl le cherub-pawl an um. Cule a tlângpawl zimah tohkāl a um. Kiosapawl le câwcangpawl hnuaiah ceimawi mi tete an um. 30 Tohkāl pakhat cio in dar lêngke pali le dar kehrawlh fung a nei ih, a ke pali in dotu an nei. Maihum hnuaiah a tlâng kip ih dar bur mi dotupawl an um. 31 Cuih dotu sung lam tlâng cu dawng khat tluan a si, cule a kâ kimvel cu a kûal, tohkāl pianhmang nei, a leng lam ihsin dawng khat le a hrek a si. Cule a kua khal kher mi an si, asinan a kuarpawl cu pûm loin, kil li nei canaw an si. 32 Tohkālpawl hnuaiah lêngke pali an um ih, lêngzâpawl cun a lêng an peh. Lêngke pakhat ih san lam cu dawng khat le a hrek a si. 33 Cuih lêngkepawl tuahdān cu ránglêng kepawl tuahdān vek a si, an zâpawl, a kūalpawl, a kalhnakpawl le a lai bolpawl cu dar bur mi hlir an si. 34 Cule lêng pakhat cio ih a tlâng pali pawl ah dotu pali an nei, a dotupawl cu lêng thawn sakhat an si. 35 Tohkāl tlunah cun dawng hrek a sannak ah, a kūal lĕnglĕng a um. Cule tohkāl tlunah a hūnnakpawl le a kuarpawl khal bur mi an si ve. 36 A hūnnak kephengpawl par le a kuarpawl parah hmun an luahkauh dān izir ciar in cherub-pawl, kiosapawl, ṭhulhfau kungpawl a kher ih, a kimvelin ceimawinak a tuah. 37 Cuticun lêng pahra a tuah. An zaten bangrepih sūn mi, tia-aw thluh le canaw thluh an si.

38 Cun dar in maihum pahra a tuah, maihum pakhat cio ah abath 40 a dâwl ih, maihum pakhat cio cu dawng li an si. Lêng pahra parah maihum pakhat cio a um. 39 Cule anih in inn vawrh lam sirah tohkāl panga le inn ih keh lam sirah tohkāl panga a ret. Tikuangpi cu inn vawrh lam kap, nisuahnak thlang lamah a ret.

7:38a bath 40: kalan 230 hrawng a si.

Temple Bungruapawl

<reference type="parallel">2San 4:12-22</reference>

40 Hiram in maihumpawl le vutcâm lawhnakpawl le suahdurpawl a tuah. Cutin Huram cun Siangpahrang Solomon hrangih Jehovah ih inn hrangah a tuah ding hna hmuahhmuah cu a ṭheh: 41 ṭhuam pahnih le ṭhuam pahnih zimih khengkûm vek lubol pahnih, ṭhuampawl tlunih khengkûm vek a lubol tuamtu thil ṭial ṭhikṭhek pahnih, 42 cumi tuamnak thil ṭial ṭhikṭhek pahnih hrangah talê rah 400, ṭhuampawl zimih a um mi khengkûm vek lubol pahnih tuamtu ding ṭial ṭhikṭhek veve hrangih talê rah tlar hnih veve in, 43 tohkāl pahra le tohkālpawl parah maihum pahra, 44 Tikuangpi par le Tikuangpi hnuaiih câwcang hleihnih, 45 belpawl, suahdurpawl le khengkûmpawl a tuah ṭheh. Huram in Siangpahrang Solomon hrangah Jehovah inn hrangih a tuah mi himi bungbelpawl cu dar hnawhtle hlir ih tuah an si. 46 Jordan phairawn ih Sukkoth le Zaretan karlakih bellei hmun ah siangpahrang in cupawl cu a burter. 47 Cule Solomon in bungbelpawl hmuahhmuah in khing a khai lo, ziangruangahtile an tam tuk, dar ih rihnak cu theih cawk a si lo.

48 Cuticun Solomon in Jehovah inn hrangah bungrua hmuahhmuah cu: sui Biakṭheng le a parih Sangserh retnak sui Cabuai, 49 sui hlirhlăng in Meitoṭhuampawl, hmun thianghlim sungta hmaiih a vawrh lamah panga le a keh lamah panga, pangparpawl le meitopawl le caicehpawl thawn sui in, 50 cawhtawlhpawl, meica cehnakpawl, khengkûmpawl, haidaupawl le meiling lâknakpawl cu sui hlirhlăng in, Hmun Thianghlim Bik ti mi pindan sungta sângkapawl le temple hulhliap sângkapawl hrangah sângka bunnakpawl cu sui in a tuah.

Solomon in Temple sungah Ziangkim a Ret

<reference type="parallel">2San 5:1</reference>

51 Siangpahrang Solomon in Jehovah inn hrangih hna hmuahhmuah cu a ṭheh, cule Solomon in a pa David ih rak serhhran zo mi thilpawl, ngun le sui le bungruapawl cu a lalut ih, Jehovah inn ih ropawl lakah a ret.

8

Thukham Kuang Lâkluh a Si

<reference type="parallel">2San 5</reference>

1 Solomon in Israel upapawl le hnám lubânpawl hmuahhmuah, Israel tefapawl hotupawl cu Jerusalem ih Siangpahrang Solomon hnenah, Zion a si mi, David Khawpi ihsin Jehovah-ih Thukham Kuang an kensoh theinak dingah a kokhawm hai. 2 Curuangah Israel mipa hmuahhmuah cu Siangpahrang Solomon thawn thla sarihnak Ethanim thla sungih puai ah an khawmaw. 3 Cule Israel upapawl hmuahhmuah an ra ih puithiampawl in Kuang cu an kengso. 4 Cun annih in Jehovah Kuang, Tawnawknak Puanthlam le Puanthlam sungih bungrua thianghlimpawl hmuahhmuah an kengso. Puithiampawl le Levi-mipawl in cupawl cu an kengso. 5 Siangpahrang Solomon le a hnenih a pungkhawm mi Israel mipi-umkhawm hmuahhmuah cu Kuang hmaiah amai zawngah an um ih, tuupawl le câwcangpawl an tam ruangih siar cawk lo le a zât theih cawk lo thawn thawinak an tuah.

6 Cun puithiampawl in Jehovah Thukham Kuang cu amai hmun, temple sungta Hmun Thianghlim, Hmun Thianghlim Bik ih cherub-pawl thla hnuaiah an kenglut. 7 Ziangahtile cherub-pawl cun an thla pahnih in Kuang hmun tlunah an pharh ih, cherub-pawl in Kuang le a zawnfungpawl cu an hei hliap. 8 A zawnfungpawl an sau ruangah a zawnfung zimpawl cu Hmun Thianghlim, sungta Hmun Thianglim hmai ihsin hmuh theih a si, asinan a leng ihsi cun hmuh theih an si lo. Cule cupawl cu tuihni tiangin cu tawkah an um. 9 Izip ram ihsin an suah laiah, Jehovah in Israel tefapawl thawi thukham a rak tuah laiih, Mosi in Horeb ah cutawk ih a ret mi lungpheng pahnih ti lo cu Kuang sungah zianghman a um lo.

10 Cule hitin a si, puithiampawl cu Hmun Thianghlim ihsin an suah tikah, Jehovah inn cu khawdur in a khat, 11 cutin puithiampawl cun khawdur ruangah rawngbawl an pehzăwm thei lo. Ziangahtile Jehovah-ih ropitnak in Jehovah inn cu a luahkhat a si.

Temple Hlănnak

<reference type="parallel">2San 6</reference>

12 Cun Solomon in,

«Jehovah in, ‹Khawdur thim ah ka cêng ding,› tiah a ti.
13 Thungaiten inn ropi ka lo saksak,
Na hrangah kumkhuaih na cēnnak hmun cu,»

tiah a ti.

14 Cun siangpahrang cu a heraw ih Israel mipungkhawm pumpi an dĭn laiah, Israel mipungkhawm pumpi cu thlawsuah a pe. 15–16 Cule anih in, «Ka pa David hnenah a kâ in, ‹Izip ram ihsin ka mi Israel ka hruaisuah ni ihsin Israel hnám lakih khui khua hman ka hmin umnak ding inn saknak dingah ka hril dah lo, asinan ka mi Israel hruaitu dingah David hi ka hril a si,› tiih rak simtu, amai kut rori ih famkimtertu Israel-ih Pathian Jehovah cu thangṭhatin um seh.

17 Israel-ih Pathian Jehovah hmin hrangih temple sak ding ka pa David thinlung ah a rak um. 18 Asinan Jehovah in ka pa David hnenah, ‹Ka hmin hrangah temple sak ding cu na thinlung sungah a um, cutiih na thinlung ih a um cu na tiṭha a si. 19 Sikhalsehla nang in temple cu na sak lo ding, na taksa ihsi a suak ding mi na fapa sawnin ka hmin hrangah temple a sak ding a si,› tiah a ti. 20 Cule Jehovah in a rak sim mi amai kamsuakthu a famkimter ih, kei in ka pa David-ih dinhmun lain, Jehovah ih tiamkam cia bangin Israel laltokham parah ka to ih, Israel-ih Pathian Jehovah hmin hrangah temple ka sak. 21 Cule cu tawkah Kuang hrangah hmun ka tuah. Cumi sungah kan pupápawl thawn, Izip ram ihsin a hruaisuah laiih, a rak tuah mi Jehovah-ih Thukham a um,» tiah a ti.

Solomon Thlacam

22 Solomon cu Israel mipungkhawm hmuahhmuah mithmuhah Jehovah Biakṭheng hmaiah a ding ih, van lamah a kutpawl a pharh, 23 cule anih in, «Jehovah, Israel Pathian, an thinlung zateih na hmaiih a fehtu, na siahhlawhpawl thawn na thukham le zahngainak kilhimtu tlun lam van ah siseh, hnuai lam lei ah siseh, nangmah vek Pathian an um lo. 24 Nang cun na siahhlawh ka pa David na tiamkam mi na rak kilhim. Tuihsun ih a si bangin, nang cun na kâ in na rak sim ih na kut in na famkimter.

25 «Curuangah Jehovah Israel Pathian, atu ah na siahhlawh ka pa David hnenih, ‹Na fapapawl in an nundān an fimkhur ih ka hmaiih nangmah na rak feh bangin ka hmaiah an feh a si ahcun, ka hmaiah Israel laltokham parih totu ding pa na tlasam lo ding,› tiih na rak sim mi hlĕnsuak aw. 26 Cule Maw Israel Pathian, zangfahten na siahhlawh ka pa David hnenih na rak sim mi na kamsuakthu thleng dik hram seh.

27 «Asinan Pathian cu leilung ah a cêng taktak ding maw si? Ngai hnik, van le vanpawlih van ah na tlem lo si khawh, ka sak mi himi temple cu ziangtlukih tenau so a si! 28 Sikhalsehla na siahhlawhih thlacamnak le a dilnak ngaithla aw, Maw Jehovah ka Pathian, tuihsun ah na hmaiih na siahhlawh auaw le thlacam hi ngai aw. 29 Na mit cu sun le zanin himi temple lam, ‹Cu tawkah ka hmin a um ding a si,› tiih na sim mi hmun lamah meng hram seh, cutin na siahhlawh in hi hmun lamih a thlacam thei hram aw. 30 Cule hi hmun lam hawiih thla an cam tikah, na siahhlawh le na mi Israel-ih dilnak ngaithla hram aw. Na cēnnak hmun van in ngaithla awla, na theih tikah ngaidam hai hram aw.

31 «Mi zokhal in a innhnen parah thilsual a tuah ih, hranhramin thukam lakter a si ih, rain na Biakṭheng hmaiah himi temple sungah thukamnak a lâk tikah, 32 van ihsin ngai awla misualrál cu a lu parah a lamzin vekin thiamlo coterin, midingfel cu amai dingfelnak vekih thiam coterin, cāngvaiin na siahhlawhpawl thuṭhen aw.

33 «Na mi Israel cu na lakah thilsual an tuah ruangih ral hmaiih neh an si tikah, na lam an hawikir ih na hmin an phuan ih, himi temple sungah thlacam in na hnenih dilnak an tuah asile, 34 van in thei hai aw, cule na mi Israel-ih sual ngaidam awla, an pupápawl hnenih na pek mi ram ah anmah hruaikirsal aw.

35 «Na parih thilsual an tuah ruangah vanpawl khar a si ih, ruah a um lo tikah, hi hmun lam hawiin thla an cam ih, na hmin an hlâm ih, anmah na zawnzaiter hai ruangih an sual ihsin an kir asile, 36 van in ngaithla hai awla, na mi Israel, na siahhlawhpawlih sual ngaidam aw, cutin an zawh ding mi lamzin ṭha na zirh hai ding ih, na mipawl hnenih ro ih na rak pek mi na ram parah ruah surter aw.

37 «Ram sungah mangṭam siseh, nathrisia siseh, rocarnak siseh, ṭawihnak siseh, kharbawkpawl siseh, khaukhuappawl siseh an um ih, an ralpawl in an ram sung akhawpipawl ih anmah an kulhkhŭm tikah siseh, ziang vek nathri le ziang vek natnak a tlun tikah siseh, 38 mi zokhal in asilole na mi Israel zaten mi pakhat cio in anmai thinlung fingfing in nathri an thei ih himi temple lamah an kut pharhin ziang vek thlacamnak siseh, ziang vek dilnak siseh an tuah tikah, 39 na cēnnak hmun van ihsin thei hai awla ngaidamin cāngvai aw, cule nang an thinlung theitu, mi kip anmai umdān hmuahhmuah vekin pe hai aw, ziangahtile nangmah lawng in minung fapapawl hmuahhmuah ih thinlung na thei a si, 40 cutin kan pupápawl hnenih na pek mi ram ih an um sung hmuahhmuah ah nangmah an lo ṭih ding.

8:37a khawpipawl: A ṭawng hrampi ah, «kăwtkapawl,» ti a si.

41 «Cuihhleiah, ram dang mi, na mi Israel a si lo nân, na hmin ruangah ram hlapi ihsin a ra mi thuhla ah 42 (ziangahtile annih in na hmin ropi le na kut cak le na bân suah mi tla an hna in an thei ding a si), himi temple lamah rain thla a cam tikah, 43 na cēnnak hmun van ihsin thei awla ram dang mi in nangmah a lo kawhnak hmuahhmuah zulhin tuah aw, cutin na mi Israel vekin leitlun ih miphun hmuahhmuah in na hmin an thei ding ih an ṭihzah ding, cule ka sak mi himi temple hi na hmin ih kawh mi a si ti an thei ding.

44 «Na mipawl cun an ral do dingin na thlah hainak hmun kip ih an fehsuak ih, na rak hril mi khawpi le na hmin hrangih ka sak mi temple lam hawiih Jehovah hnenih thla an cam asile, 45 van ihsin an thlacamnak le an dilnak thei awla, an thuhla dinpi hram aw.

46 «Thilsual tuah lo mi pakhat hman an um lo ruangah na parah thilsual an tuah ih, an parah na thinhengin anmah cu ralpawl hnenah na ap, cule anmahpawl cu a hla ah simaw, a nâi ah simaw, ralpawlih ram ah ralkaih ah an hruai, 47 cucingin ralkaih ih hruai an sinak ram ah an hmusuakaw ih, ralkaih ih hruai an sinak ram ah lung thlengin, ‹Thilsual kan rak tuah ih, thil kan tipalh, sualrálnak kan rak tuah a si,› tiin na hnenah dilnak an tuah ih, 48 ralkaih ih hruaitu an ralpawl ram ih an thinlung zate le an ruahnak zate in na lam an hawisal ih, an pupápawl na pek mi ram lam, na hril mi na khawpi lam le na hmin hrangih ka sak mi temple lam hawiih na hnenih thla an cam asile, 49 na cēnnak hmun van ihsin an thlacam le an dilnak thei awla, an thuhla dinpi hram aw. 50 Cule na parih thilsual a rak tuahtu na mipawl le na parih dānpahbălnak an rak tuah mi an dānpahbălnak hmuahhmuah tla ngaidam aw, cule an parah annih in lainatnak an neihnak dingah ralkaih ih anmah hruaitupawl hmaiah lainatnak hmuh aw, 51 ziangahtile annih cu na mi le na ro, thir rawhtitnak meipi lak, Izip ihsin na hruaisuah mi an si, 52 cutin na mit cu na siahhlawhih dilnak le na mi Israel-ih dilnak ah mengin, nangmah an lo kawh tinten anmah ngaithla hram aw. 53 Ziangahtile Maw Bawipa Jehovah, kan pupápawl Izip ihsin na hruaisuak hai laiah na siahhlawh Mosi hmangih na sim bangin, annih cu na ro si dingah, leitlun ih miphun hmuahhmuah lak ihsin na rethran hai a si,» tiah a ti.

Solomon in Thlawsuah a Pe

54 Cule hitin a si, Solomon in Jehovah hnenih hi thlacamnak le dilnak hmuahhmuah a ṭheh tikah, Jehovah-ih Biakṭheng hmaiah van lamih a kut thlir ih, a khuk a bilnak ihsin a tho. 55 Cun a ding ih aw ring zetin Israel pungkhawm hmuahhmuah cu, 56 «A thutiamkam hmuahhmuah zulhih a mi Israel cawlhnak petu Jehovah cu thangṭhatin um seh. A siahhlawh Mosi hmangih a thutiamkam ṭha hmuahhmuah cu kam khat hman a pelhsawlh lo. 57 Jehovah kan Pathian cu kan pupápawl hnenih a rak um vekin kan hnenah um hram seh. In tlansanin in thlauthla hram hlah seh, 58 cutin kan pupápawl hnenih a fial mi a lamzinpawl hmuahhmuah zawhin, a thupekpawl le a sakhaw dānpawl le a cīn le dānpawl kilhim dingin kan thinlung cu a hnenah hawiter hram seh. 59 A siahhlawh thuhla ah le a mi Israel thuhla ah ni tin a ṭuldān vekin a căngvaih theinak dingah hi ka ṭawngkampawl, Jehovah hmaiih dilnak ka rak tuah mi cu sun le zanin Jehovah kan Pathian hnenah um camcin hram seh. 60 Cule leitlun ih miphun hmuahhmuah in Jehovah cu Pathian a si, a dang a um lo, ti an thei thei ding. 61 Curuangah nan thinlung cu a sakhaw dānpawl zawh dingin le a thupekpawl thlun dingin, tuihsun vekin, Jehovah kan Pathian ah hnget seh,» tiin thlawsuah a pe hai.

Temple Hlănnak

62 Cule siangpahrang le amah thawn Israel hmuahhmuah in Jehovah hmaiah thawinakpawl an hlan. 63 Solomon in Jehovah hnenih a hlăn mi Remnak Thilhlănpawl thawinak a hlăn mi cu câwpa 22000 le tuu 120000 a si. Cule siangpahrang le Israel tefapawl hmuahhmuah in Jehovah inn an hlan. 64 Jehovah hmaiih dar Biakṭheng cu Meiur Thilhlănpawl, Thlairawl Thilhlănpawl le Remnak Thilhlănpawlih thau dawng dingah a fatet tuk ruangah cuih ni ah Jehovah inn hmaiih um mi tual laita cu siangpahrang in a serhhran ih, cu tawkah Meiur Thilhlănpawl, Thlairawl Thilhlănpawl le Remnak Thilhlănpawlih thau a hlan.

65 Cuih tikcucān ah Solomon in amah thawn Israel hmuahhmuah in Hamath luhnak ihsin Izip Tivate tiangin mipungkhawm nasazet thawn Jehovah kan Pathian hmaiah ni sarih le a dang ni sarih, ni hleili sung puai a tuah. 66 A ni riatnak ah minungpawl a thlahkir. Cule annih in siangpahrang thlawsuah an pe ih Jehovah in a siahhlawh David le a mi Israel hrangih a rak tuah mi thil ṭha hmuahhmuah ruangah aipuang le lungawiin an puanthlam ah an tlung.

9

Solomon hnenah Pathian a Langsal

<reference type="parallel">2San 7:11-22</reference>

1 Cule hitin a si, Solomon in Jehovah inn le siangpahrang inn sak le Solomon in tuah dingih a duh mi hmuahhmuah a ṭheh thluh tikah, 2 Jehovah cu Gibeon khua ih a hnenih a rak lăng bangin, Solomon hnenah a vei hnihnak a lang. 3 Cule Jehovah in a hnenah, «Ka hmaiih na rak tuah mi na thlacamnak le na dilnak ka thei. Kumkhuain cu tawkah ka hmin pu dingih na rak sak mi himi inn cu ka serhhran zo, cule ka mit le ka thinglung cu cu tawkah a um tlaitluan ding. 4 Cun na pa David a feh bangin, ka rak lo fial mi hmuahhmuah vekih tuah dingin thinlung felfai le dĭngnak in ka hmaiah na feh ih, ka sakhaw dānpawl le ka cīn le dānpawl na thlun a si ahcun, 5 na pa David hnenih, ‹Israel laltokham parah mi na tlasam lo ding,› tiih ka tiamkam bangin, a kumkhuain Israel tlunah na lalram laltokham ka dĭnhnget ding.

6 «Asinan nangmah simaw, na fapapawl simaw in keimah thlunnak ihsin nan kir pumhlum ih, na hmaiih ka rak dĭn mi ka thupekpawl le ka sakhaw dānpawl thlun loih fehin, pathian dangpawl rianin anmah nan biak sawn asile, 7 Israel cu anmah ka rak pek mi ram ihsin ka sâtcat ding, cule ka hmin hrangih ka sehhran mi himi inn hi ka mithmuh ihsin ka hlăwn ding. Israel cu miphun hmuahhmuah lakah ṭawngṭhimnak le hnihsuahsainak ah a cang ding. 8 Cule khaisan a si mi himi inn thu ah cun, himi paltlăngtu mi kip in mak tiin, ‹Ziangah so hi ram le hi inn ah Jehovah in hivekin a tuah?› tiin an cekcek ding. 9 Cun annih in, ‹Ziangruangahtile Izip ram ihsin an pupápawl hruaitu Jehovah an Pathian an tlansan ih pathian dangpawl pawmin, anmah bia-in an rak rian. Curuangah Jehovah in an parah hi vanduainak hmuahhmuah a thlĕn a si› tiah an sâng ding,» tiah a ti.

Solomon le Hiram Thilpek an Thlengaw

10 Cule kum 20 a cem tikah hitin a si, Solomon in inn pahnih, Jehovah inn le siangpahrang inn a sak hnuah, 11 Siangpahrang Solomon in Galili ram sungih khawpi 20 cu Hiram hnenah a pe (Ṭaiar siangpahrang Hiram in Solomon hnenah sidar thing, mirang far thing le sui a duh zâtzât a rak kuat zo a si). 12 Cun Hiram cu Solomon in amah a rak pek mi khawpipawl zoh dingin Ṭaiar ihsin a ra, asinan cupawl cun a lung an hmuiter lo. 13 Cule anih in, «Ka unaupa, i rak pek mi khawpipawl cu ziang vek so an si?» tiah a ti. Anih in tuihni tiangih an hmin vek hin, cupawl cu aKabul ram tiah a ko hai. 14 Cun Hiram in sui talent 120 siangpahrang a rak kuat.

9:13a Kabul: Ṭawng lam mithiampawl himi ṭawngfáng sullam an reldān a bangaw lo; asinan fiang zetin «ziang hrang khalih ṭha lo» ti lam a sawhkhih.

Solomon-ih Hlawhtlinnak Dangpawl

15 Cule himi hi Siangpahrang Solomon in hranhramih ṭuanter mi hnaṭuantupawl a dĭnnak săn a si: Jehovah inn, amai inn, Millo, Jerusalem khawkulh, Hazor, Megiddo le Gezer sak dingah a si. 16 Izip siangpahrang Faro cu a so ih, Gezer a la, cule meisa in a ur, cuih khua ih cêng Kanaan-mipawl a that, cule cuih khua cu a fanu, Solomon nupi hnenah thlahawknak thilpek ah a rak pe a si.

17 Cule Solomon in Gezer, Beth Horon hnuaita, 18 Baalath le Judah ram ramṭhing ih Tadmor, 19 Solomon-ih neih mi thilri retnak khawpipawl hmuahhmuah, a ránglêngpawl hrangih khawpipawl, a rángtothiampawl hrangih khawpipawl le Jerusalem ih sak a duh mi pauhpauh, Lebanon ah le a uknak ram sung hmuahhmuah ah a sak.

20 A tāng mi Amor-mipawl, Heth-mipawl, Periz-mipawl, Hiv-mipawl hmuahhmuah le Israel tefa a si ve lo mi Jebus-mipawl kha cu, 21 an tesinfa, cuih ram ih um Israel tefapawl in an rak hlohralter verver thei lo mipawl lak ihsin tuihni tiangih a si bang hin, Solomon in hranhramih ṭuanter mi hnaṭuantupawl a dĭn. 22 Asinan Israel tefapawl lak ihsin Solomon in hranhramih ṭuanter mi hnaṭuantupawl a tuah lo, ziangruangahtile annihpawl cu ral do mipapawl le a siahhlawhpawl: a bawipawl, a ralbawipawl, a ránglêngpawl le a rángtothiampawl hotupawl tla an si. 23 Mi dangpawl cu Solomon-ih hna tlunih hotu lupawl: hnaṭuantu mipi tlunih uktu mi 550 an si.

24 Asinan Faro fanu cu David Khawpi ihsin Solomon in a saksak mi inn ah a thleng. Cun Solomon in Millo a dawl.

25 Cule Solomon in Jehovah hrangih a rak sak mi Biakṭheng parah Meiur Thilhlănpawl le Remnak Thilhlănpawl cu kum khat ah vei thum a hlan ih, cupawl thawn Jehovah hmaiih Biakṭheng parah rimhmui a ur. Cutin Temple a sak ṭheh.

26 Siangpahrang Solomon in Edom ram, Tipi Sen kap Elath kiangih um Ezion Geber ah lăwng rual a sak. 27 Cun Hiram in Solomon-ih siahhlawhpawl thawn ṭuankhawm dingah tifinriat theitu lăwngtothiampawl cu lăwng thawn a thlah hai. 28 Cule Ofir ah an feh ih, cutawk ihsin sui talent 420 an ngah, cule cumi cu Siangpahrang Solomon hnenah an keng.

10

Sheba Siangpahrangnuih Faknak

<reference type="parallel">2San 9:1-12</reference>

1 Sheba siangpahrang bawinu in Jehovah hmin thawn pehparin Solomon-ih hminthannak a theih tikah, thusuhnak harpawl thawn amah hniksak dingin a ra. 2 Anih cu dungthluntu tam ngaingai le rimhmui phurtu kalaukpawl thawn, sui tam zet le lung mankhungpawl thawn Jerusalem ah a ra, cule Solomon hnen a thlen tikah, anih cun a thinlung ih a thu pai mi hmuahhmuah phawrhfai thluhin amah cu a bia. 3 Cun Solomon in a thusuhnakpawl hmuahhmuah cu a sâng, siangpahrang hrangih har tuk, siangpahrang bawinu hnenih a simfiang thei lo mi pakhat hman a um lo. 4 Cule Sheba siangpahrang bawinu in Solomon-ih fimnak hmuahhmuah, a sak mi inn, 5 a cabuai parih rawl, a siahhlawhpawl todan, a cabuai fingkhawitupawlih hnaṭuandān le an ceiawkdan, a no kengtupawl le Jehovah Temple ih a Meiur Thilhlănpawl a hmuh tikah thinlung mumal a nei nawn lo. 6 Cun anih in siangpahrang hnenah, «Ka ram ih ka rak theih mi na ṭawngkampawl le na fimnak hi a dik mi thuthan a rak si. 7 Sikhalsehla ka ra ih ka mit rori ih ka hmuh hlan sung cu cuih ṭawngkampawl cu ka rak zum lo, cule ngai hnik, a hrek hman sim ka rak si lo aw. Na fimnak le na hmuingilnak in ka rak theih mi thuthang a lan. 8 Na mipapawl cu mithlawsuak an si ih, na hmaiah ding tlaitluan ih na fimnak theitu, hi na siahhlawhpawl cu mithlawsuak an si! 9 Nangmah ah lungsiin Israel laltokham parih lo rettu, Jehovah na Pathian cu thangṭhatin um seh! Ziangruangahtile Jehovah in kumkhuain Israel a duhdawt, curuangah diknak le dingfelnak tuah dingah siangpahrang ah a lo tuah a si,» tiah a ti. 10 Cun siangpahrang bawinu in sui talent 120, rimhmui tam ngaingai le lung mankhungpawl tla siangpahrang a pe. Sheba siangpahrang bawinu in Siangpahrang Solomon hnenih a pek zat ih tam rimhmuipawl a thlengsal dah nawn lo.

11 Cuihhleiah Ofir ihsin Hiram-ih lăwngpawl ih ken mi suipawl, almug thing tam ngaingai le Ofir ihsin lung mankhungpawl an run phur. 12 Cule siangpahrang in almug thing cu Jehovah Temple le siangpahrang inn ṭhuam hrangah le hla saktupawl hrangih ṭingṭangpawl le cawngcingpawl hrang khalah a hmang. Tuihni tiangin cu tawkah khavek almug thing a thleng nawn lo ih, cuvek cu hmuh khal a si nawn lo. 13 Cun Solomon in a duhsak ruangih a pek mipawl hleiah, Siangpahrang Solomon in Sheba siangpahrang bawinuih duh mi hmuahhmuah, a dil mi pauhpauh cu a pe. Cule anih cu a kir ih amah le a siahhlawhpawl thawn amai ram ah a tlung.

Solomon-ih Neihnunnak

<reference type="parallel">2San 1:14-17; 9:13-20</reference>

14 Solomon hnenih kum tin a thleng mi sui cu talent 666 rit a si, 15 cuihleiah sumtuah khualtlawngpawl hnen ihsin, sumdâwngpawl hnen ihsin, Arabia siangpahrangpawl hmuahhmuah hnen ihsin le ram sung uktupawl hnen ihsi khalin a dáwng.

16 Cule Siangpahrang Solomon in sŭtmam mi suipheng in ralphaw kaupi 200 a tuah, ralphaw pakhat ah sui shekel 600 ciar a feh. 17 Sŭtmam mi suipheng in ralphaw 300 khal a tuah, ralphaw pakhat ah sui amina thum ciar a feh. Cupawl cu siangpahrang in Lebanon Tupi Inn sungah a ret.

10:17a mina: Bible ih thil tahnak phunphun zoh aw.

18 Cuihhleiah siangpahrang in vuiho laltokham ropi a tuah ih, cumi cu sui hlirhlăng a khût. 19 Cuih laltokham in karbak paruk a nei ih, laltokham zim dung lam cu a pûm, tonak sir veve ah kuthngahnak a um veve, cule kuthngahnakpawl sirah kiosa pahnih an ding. 20 Cu tawkah kiosa hleihnih, karbak paruk ah pakhat ciar an um, lalram dangah hivek hrimhrim zianghman tuah a si dah lo.

21 Siangpahrang Solomon-ih thil innak bungbel hmuahhmuah cu sui an si ih, Lebanon Tupi Inn bungbel hmuahhmuah khal sui hlir an si. Ngun pakhat hman a um lo, ziangahtile cumi cu Solomon san laiah cun hivek cu ziang hmanah siar a rak si lo. 22 Ziangahtile siangpahrang in tifinriat ah Hiram-ih sumdâwng lăwng rual thawn Tarsish lăwngpawl a nei. Sui, ngun, vuiho, zawngpawl le ar-awn tla Tarsish lăwngpawl in kum thum vei khat an phur ṭheu.

23 Cutin Solomon in lennak le fimnak ah leitlun siangpahrangpawl hmuahhmuah a hleih. 24 Cule Pathian in a thinlung sungih a ret mi a fimnak ngai dingin leitlun hmuahhmuah in Solomon-ih lăng cān an hawl. 25 Mi kip in anmai laksawng cio kum tin pek bikhiah neiin ngun le sui bungbelpawl, sinfenpawl, ralthuampawl, rimhmuipawl, rángpawl le lākrangpawl tla an rak keng.

26 Cun Solomon in ránglêngpawl le rángtothiampawl a khawm; ránglêng 1400 le rángtothiam 12000 a nei, cupawl cu ránglêng khawpipawl le siangpahrang hnen Jerusalem ah a ret. 27 Siangpahrang cun Jerusalem ah ngun cu lungtopawl tlukih tam in a tuah ih, sidar thingpawl khal phairawn ih a um mi asikamor kungpawl tlukih tam in a tuah. 28 Solomon in Izip le Kue ihsin lakluh mi rángpawl khal a nei. Cupawl cu Kue ihsin man neiin siangpahrangih sumdâwngpawl in an dáwng. 29 Cun Izip ihsi lakluh mi ránglêng cu pakhat ah ngun shekel 600 le rángcu pakhat ah ngun shekel 150 an man, cule cutivek thothoin, cupawl cu Heth-mipawlih siangpahrangpawl le Siria siangpahrangpawl hmuahhmuah hnenah an kuatsuak.

10:27a sikamor: Theipi kung phun khat a si.

11

Solomon Thinlung a Pial

1 Asinan Siangpahrang Solomon in ram dang nunau tampi: Moab nunaupawl, Ammon nunaupawl, Edom nunaupawl, Sidon nunaupawl le Heth nunaupawl a duhdawt, Faro fanu khal. 2 Cuih miphunpawl thuhla cu Jehovah in Israel tefapawl hnenah, «Ṭhitawknak in an lakah nan lut lo pei ih, anmah khal in nanmah lakah ṭhitawknak in an lut lo pei. Annih cun an pathianpawl lamah nan thinlung an lo hruaihlo tengteng ding,» tiah a rak sim. Solomon cu hipawl hnenah duhdawtnak in a kăwp hai. 3 Cule anih in nupi 700, siangpahrang bawinu ih canter mi le nusûn 300 a nei. Cule a nupipawl in a thinlung an herpêng.

4 Ziangahtile hitin a si, Solomon cu a tar tikah, a nupipawl in a dang pathianpawl hnenah a thinlung an herpêng ih, a pa David thinlung vekin Jehovah a Pathian ah a thinlung a rinum lo. 5 Ziangahtile Solomon cu Sidon-mipawlih khawzingnu aAshtoreth a thlun ih, Ammon-mipawlih fihnungza Milkom a thlun. 6 Solomon in Jehovah mithmuhah thil ṭhalo a tuah ih, a pa David bangin Jehovah a thlun famkim lo. 7 Cun Solomon in Jerusalem nisuahnak lamih tlang ah Moab-mipawlih fihnungza pathian Kemosh hrangah le Ammon-mipawlih fihnungza Molek hrangah hmun sâng a dĭn. 8 Cule cuvek thothoin ram dang mi a nupipawl hmuahhmuah, an pathianpawl hnenih rimhmui ur le thawiawpawl hrang khalah a tuah.

11:5a Ashtoreth: Fonisia-mipawlih nunau pathian a si. «Astarte» ti khalih kawh a si.

9–10 Cun Israel-ih Pathian Jehovah a hnenih vei hnih lang, himi thil thuhla ih pathian dangpawl dung thlun lo dingih a hnenih thu rak petu hnen ihsin a thinlung a pial ruangah, Jehovah cu Solomon parah a thin a heng, asinan Jehovah in thu a rak pek mi cu a thlun cuang lo. 11 Curuangah Jehovah in Solomon hnenah, «Hivek na rak tuah ih thu ka lo pek mi ka thukham le ka sakhaw dānpawl na thlun lo ruangah, na hnen ihsin lalram ka ṭhen taktak ding ih, cumi cu na siahhlawh ka pe ding. 12 Sikhalsehla na pa David ruangah cumi cu nangmai san ah ka tuah lo ding, cumi cu na fapa kut ihsin ka ṭhen ding. 13 Asinan lalram pumpi cun ka ṭhen lo ding, ka siahhlawh na pa David ruangah le ka hril zo mi Jerusalem ruangah hnám khat cu na fapa ka pe ding,» tiah a ti.

Solomon-ih Doralpawl

14 Jehovah in Solomon dokalhin doral pakhat Edom-mi Hadad a thoter, amah cu Edom siangpahrang tesinfa a si. 15 Ziangahtile hitin a rak cang, Edom ah David a um laiih a mi thah mipawl phum dingih ralkap bawipi Joab a feh ih, Edom mipa hmuahhmuah a thah hnuah, 16 (ziangruangahtile Joab cu Edom ih mipa hmuahhmuah a sahthluk thluh hlanlo, Israel-mi hmuahhmuah thawn thla ruk sung cu tawkah a cam a si), 17 cutin Hadad cu Izip ram ah, amah le a paih siahhlawhpawl lakih Edom-mi mi hrekkhat pawl thawn feh dingin a tlân. Hadad cu nauhakte a si lai. 18 Cun annih cu Midian ihsin an tho ih Paran an thleng, cule Paran ihsin an zawngah mipapawl an hruai ih, Izip ih Faro siangpahrang, amah inn rak petu, a hrangih rawl covo le ram rak petu hnenah an thleng. 19 Cule Hadad cu Faro mithmuhah duhsaknak nasazet a co, cutin a nupi-ih naunu cu nupi ah a pe, cu nu cu siangpahrang bawinu Tahpenes-ih unaunu a si. 20 Cun amah cu Tahpenes-ih unaunu in fapa Genubath a hrinsak, cuih fapa cu Tahpenes in Faro inn ah hnawi a thlei. Cule Genubath cu Faro fapapawl lakah Faro sungkua ah a um.

21 Hadad in Izip ihsin David cu a pupápawl hnenah a cawl zo ti le, ralkap bawipi Joab a thi zo ti a theih tikah, Hadad in Faro hnenah, «Ka ram ih ka feh theinak dingah, i suakter aw,» tiah a ti.

22 Cun Faro in a hnenah, «Ka hnenah hin ziangso tlaksăm mi na neih, ngai hnik, cutiih na ram ih tlun na tum?» tiah a ti.

Cule anih in, «Zianghman a si lo, ziang a va si khalle i fehter hrimhrim aw,» tiah a sâng.

23 Cule Pathian in Solomon dokalhin doral dang, Eliadah fapa Rezon, a bawi Hadadezer, Zobah siangpahrang hnen ihsi tlânsuak kha a run tungding. 24 Cun David in Zobah khawmipawl a thah laiah, Rezon cun a hnenah mipapawl a khawm ih, suamhmang bur hotu ah a cang. Cule Damaskas ah an feh ih, cu tawkah an cêng, cule Damaskas in an uk. 25 Hadad ih tuah mi buainak hleiah, amah cu Solomon damsung hmuahhmuah ah Israel doral a si. Cule anih in Israel a fih ih Siria a uk.

Jeroboam Helnak

26 Solomon siahhlawh Jeroboam, Nebat fapa, Zereda khua ih Efraim-mi khal in siangpahrang dokalhin a hél, a nuih hmin cu Zeruah a si ih, nuhmei a si. 27 Cule himi hi siangpahrang dokalhih héltertu a si: Solomon in Millo a dĭn ih a pa David Khawpikulh siatnak hmunpawl a rĕm. 28 Mipa Jeroboam cu micak ralṭha a si ih, Solomon in cuih tlangvalpa cu mitaima a si ti a hmuh tikah, amah cu Joseph inn ih hnaṭuantupawl hmuahhmuah tlunih thuneitu ah a tuah.

29 Cuih cān ah hitin a si, Jeroboam cu Jerusalem ihsin a suah tikah, amah cu Shilon-mi profet Ahijah in lamzin ah a táwng, Ahijah cu sinfen thar in a thuamaw ih, an pahnih lawngin ramlak ah an um. 30 Cun Ahijah cun a parih a sinfen thar cu a kai ih, cumi cu ṭhen hleihnih ah a thlek. 31 Cule anih in Jeroboam hnenah, «Na hrangah ṭhen hra la aw, ziangahtile Jehovah, Israel Pathian in hitin a ti, ‹Ngai hnik, Solomon kut ihsin lalram ka ṭhen ding ih, hnám hra cu nangmah ka lo pe ding. 32 Asinan anih in ka siahhlawh David ruangah le Israel hnám hmuahhmuah lak ihsin ka rak hril mi khawpi Jerusalem ruangah hnám khat a co ding. 33 Ziangruangahtile annih cun keimah in tlansan ih, Sidon-mipawlih khawzingnu Ashtoreth, Moab rammipawlih pathian Kemosh le Ammon-mipawlih pathian Milkom an bia, cule ka mithmuhih a dik mi tuah ding le ka sakhaw dānpawl le ka cīn le dānpawl thlun dingin a pa David vekin ka lamzinpawl an zawh lo. 34 Sikhalsehla a kut ihsin lalram zate cun ka la lo ding, ziangruangahtile ka thupekpawl le ka sakhaw dānpawl a thlun ruangih ka hril mi ka siahhlawh David ruangah amah cu a damsung hmuahhmuah uktu ah ka tuah zo. 35 Asinan lalram cu a fapa kut ihsin ka la ding ih, hnám hra cu nangmah ka lo pe ding. 36 Cule ka siahhlawh David in cutawk ih ka hmin retnak dingah, ka hril mi khawpi Jerusalem ah ka hmaiih meito a neih ringring theinak dingah hnám khat cu a fapa ka pe ding. 37 Cun nangmah hi ka lo hril ding ih, na thinlung ih duh mi hmuahhmuah na uk ding, cule Israel siangpahrang na si ding. 38 Cun hitin a si ding, thu ka lo pek mi hmuahhmuah na ngaithla ih, ka lamzinpawl na zawh ih, ka siahhlawh David vekin ka sakhaw dānpawl le ka thupekpawl thlun dingin ka mithmuhih a dik mi na tuah asile, na hnenah ka um ding ih, David hrangih ka sak bangin na hrangah rei a daih mi inn ka lo saksak ding, cule na hnenah Israel ka lo pe ding. 39 Cule David tesinfapawl cu himi ruangah ka zawnzaiter hai ding, asinan kumkhua cun a si lo ding,› tiin,» tiah a ti.

40 Curuangah Solomon in Jeroboam that dingin a hawl. Asinan Jeroboam cu a tho ih Izip ram ah, Izip siangpahrang Shishak hnenah a tlân, cule Solomon thih tiangin Izip ah a va um.

Solomon Thihnak

41 Solomon-ih căngvaihnak dang, a tuah mi hmuahhmuah le a fimnakpawl cu Solomon-ih căngvaihnakpawl cazual ah a ngan a si lo maw? 42 Solomon in Israel hmuahhmuah tlunah Jerusalem ih a lal sung cu kum 40 a si. 43 Cun Solomon cu a pupápawl hnenah a cawl ih, a pa David-ih Khawpi ah phum a si. Cule amai aiawhah a fapa Rehoboam in a uk.

12

Lalram Ṭhenawknak

1 Rehoboam cu Shekem ah a feh, ziangahtile amah kha siangpahrang ih tuah dingah Israel-mipawl hmuahhmuah cu Shekem ah an rak feh. 2 Cule hitin a si, Nebat fapa Jeroboam in cui thu a theih laiah anih cu Izip ah a um, Siangpahrang Solomon hmaika ihsin a tlânsuak ruangah Izip ram ah a va cêng a si. 3 A hnenah mi an thlah ih amah cu an ko. Cun Jeroboam le Israel mipungkhawm pumpi an ra ih Rehoboam hnenah, 4 «Na pa in kan kawn a ritter, curuangah na paih phurrit hnaṭuan le kan parih a ṭhum mi a hngawngkol rit cu zângter awla, nangmah kan lo rian ding,» tiah an ti.

5 Cule anih in an hnenah, «Ni thum sung kiang hrih uh, cun ka hnenah ra kirsal uh,» tiah a ti. Cule mipi cu an fehkiang ta.

6 Siangpahrang Rehoboam cun a pa Solomon a dam laiih a hmaiih ding upapawl cu thu a ráwn ih an hnenah, «Hih milaipawl sâng dingah ziang vek ruahnak so in pek?» tiah a ti.

7 Cule annih in a hnenah, «Tuihsun ah hih milaipawl hnenih siahhlawh na si ih, anmah na rian ih, anmah na sâng ih, an hnenih ṭawngkam ṭhapawl na ṭawng asile, anmah cu kumkhuain na siahhlawh an si ding,» tiah an ti.

8 Asinan a hnenih upapawl ih an rak pek mi ruahnak cu a hnáwng ih, a hmaiih a ding mi, amah thawi a pitling mi tlangvalpawl cu thu a ráwn. 9 Cule an hnenah, «Nannih in ziang ruahnak in pe? Ka hnenih, ‹Kan parah na pa ih ret mi hngawngkol zângter aw,› tiih a ṭawngtu hi milaipawl hi ziangtin kan sâng ding?» tiah a ti.

10 Cun amah thawi a pitling mi tlangvalpawl cun a hnenah, «Hi minungpawl, ‹Na pa in kan hngawngkol a ritter, asinan cumi cu nang in kan parah zângter aw,› tiih na hnenih ṭawngtupawl hnenah, hitin ti awla, hitin an hnenah sim aw, ‹Ka zungte cu ka paih tâi hnakin a tûm sawn! 11 Cule ka pa in nan parah hngawngkol rit a ret ih, kei cun nan hngawngkol ka bêt ding, ka pa in vuaknak thawn nun a lo sim ih, kei cun tlangkaikuangpawl thawn nun ka lo sim ding!› tiin na ti pei,» tiah an ti.

12 Cule a ni thumnak ah Jeroboam le mipi hmuahhmuah cu siangpahrang in, «A ni thumnak ah ka hnenah rasal uh,» tiih a cah vekin, Rehoboam hnenah an ra. 13 Cun siangpahrang cun mipipawl cu rorum zetin a rak sawn hai ih, upapawl in an rak pek mi ruahnak cu a hnáwng. 14 Cule tlangvalpawl ih ruahnakpek vekin, «Ka pa in nan hngawngkol a ritter ih, kei in nan hngawngkol ka bêt ding, ka pa in vuaknakpawl thawn nun a lo sim ih, kei cun tlangkaikuangpawl thawn nun ka lo sim ding,» tiin an hnenah a sim. 15 Cun siangpahrang in mipi cu a ngaithla lo, ziangahtile thil cangsuaktertu cu Jehovah hnen ihsin a si, Jehovah in Shilon-mi Ahijah hmangin Nebat fapa Jeroboam hnenih a rak sim mi a kamsuakthu a famkimter theinak dingah a si.

16 Cule siangpahrang in anmah a ngaithla lo ti Israel hmuahhmuah in an hmuh tikah, mipi in siangpahrang hnenah,

«David ah ziang covo so kan neih?
Jesse fapa ah ro kan nei lo a si.
Maw Israel, nan puanthlam cio ah!
Nangmai sungkua ngaihtuah men aw, Maw David,»

tiah an sang.

Cutin Israel-mipawl cu an puanthlampawl ah an tlung. 17 Asinan Rehoboam in Judah khawpipawl ih a cêng mi Israel tefapawl cu a uk.

18 Cun Siangpahrang Rehoboam in hranhramih hna ṭuantermipawl hotu a si mi Adoram cu an hnenah a thlah, asinan Israel hmuahhmuah in amah cu lungto in an rak deng ih a thi. Curuangah Siangpahrang Rehoboam cu manhlap zetin Jerusalem ih tlân dingah a ránglêng ah a kai. 19 Cutin Israel cu tuihni tiang David sungza dokalhin a hél.

Rehoboam in Lalram Lâksal a Tum

20 Cule hitin a si, Israel hmuahhmuah in Jeroboam a ra kir ti an theih tikah, a hnenah mi an thlah ih mipi-umkhawm hnenah amah cu an ko, cule Israel hmuahhmuah tlunih siangpahrang ah amah cu an tuah. Judah hnám ti lo cu David sungza thluntu pakhat hman an um lo.

21 Jerusalem ah Rehoboam a thlen tikah, Judah sungza hmuahhmuah cu Benjamin hnám thawn, Solomon fapa Rehoboam hnenah lalram a dĭnsal theinak dingah, Israel sungza do dingih hril mi mipa ral do thiam ting khat le thawng sawmriat a fĭnkhawm.

22 Asinan Pathian kamsuakthu cu Pathian mi Shemaiah hnenah a thleng ih, 23 «Solomon fapa Rehoboam, Judah siangpahrang, Judah le Benjamin sungza hmuahhmuah hnenah le a tāng mi mipi hnenah hitin, 24 ‹Jehovah in hitin a sim, «Nan va so lo pei ih, nan unau Israel tefapawl cu nan do fawn lo pei. Mi kip mai inn cio ah kir hai seh, ziangahtile hih thil cu keimah hnen ihsin a si,» tiin sim aw,› i ti,» tiah a ti. Curuangah annih in Jehovah kamsuakthu cu an lung ih, Jehovah kamsuakthu vekin an kir ih an tlung.

Jeroboam-ih Sui Câwpawl

25 Jeroboam cu Efraim tlang ram ah Shekem khua a dĭn ih, cu tawkah a cêng. Cuihtlunah amah cu cutawk ihsin a fehsuak ih, Penuel khua a sat. 26 Cule Jeroboam in a thinlung sungah, «Ngai hnik, David sungza hnenah lalram a kirsal pang pei maw: 27 hih mipi in Jerusalem ih Jehovah Temple ah raithawinakpawl hlan dingin an feh asile, hih mipipawlih thinlung cu an bawipa, Judah siangpahrang Rehoboam hnenah a kirsal ding, cule annih in keimah in that ding ih, Judah siangpahrang Rehoboam hnenah an kir ding,» tiah a ti.

28 Curuangah siangpahrang in ruahnak a dil hai, sui câwpa no pahnih a tuah, cule mipi hnenah, «Nan hrangah Jerusalem ih hung soh ding cu a har tuk. Zoh hnik uh, nan pathianpawl hi, Maw Israel, Izip ram ihsi a lo hruaisuaktu an si!» tiah a ti. 29 Cule anih cun Bethel ah pakhat a dĭn ih, Dān ah a dang pakhat a ret. 30 Cun hi thil hi sual ah a cang, ziangahtile mipi cu cutawk ih aa um mi be dingin Dān tiangtiangin an feh. 31 Jeroboam in hmun sângpawl ah innpawl a sak ih, Levi fapa a si lo mi, mi menmen lak ihsin puithiampawl a tuah.

12:30a a um mi: Sui câwpa no a relnak a si (câng 28).

32 Jeroboam cun Judah ram ih puai an neih vekin, a thla riatnak ni hleingatnak ah puai a ruat ih, biakṭheng parah raithawinakpawl a hlan. Bethel khalah a tuah mi câwpa nopawl hnenah raithawinak a tuah. Cule Bethel ih a tuah mi hmun sângpawl ah puithiampawl a ret. 33 Cutin a thla riatnak ni hleingatnak, amai thinlung sungih a remruat mi thla ah Bethel ih amai tuah mi biakṭheng parah raithawinakpawl a tuah. Cule Israel tefapawl hrangah puai a ruat ih, biakṭheng parah raithawinakpawl a hlan ih, rimhmui a ur.

13

Judah Ram ihsin Pathian Mi in Jeroboam Hnenah Thu a Sim

1 Cule zoh hnik, Pathian mi pakhat cu Jehovah kamsuakthu vekin Judah ihsin Bethel ah a ra ih, Jeroboam cu biakṭheng kiangah rimhmui ur dingah a ding. 2 Pathian mi cun Jehovah kamsuakthu hmangin biakṭheng dokalhin a au ih, «Maw biakṭheng, biakṭheng! Jehovah in hitin a ti, ‹Zoh hnik, fapa, a hmin Josiah cu David sungza ah a suak ding ih, anih in na parih rimhmui ur ṭheu tu, hmun sângpawl ih puithiampawl hi na parah rai a thawi hai ding, cule mipapawlih ruhpawl cu na parah urkăng an si ding,› a ti,» tiah a ti. 3 Cule anih in cuih ni ah hminsinnak a pe ih, «Himi hi Jehovah ih sim mi hminsinnak a si, ‹Biakṭheng cu a ṭhendarhaw tengteng ding ih, cumi parih vutcâm cu an bung ding a si,› a ti,» tiah a ti.

4 Cule hitin a si, Siangpahrang Jeroboam in Bethel ih biakṭheng dokalhin a autu Pathian mi ih sim mi a theih tikah, biakṭheng ihsin a kut a suah ih, «Amah cu kai uh!» tiah a ti. Cun cu pa lamih a suah mi a kut cu a ro, cutin a kut cu a hnûksal thei lo. 5 Biakṭheng khal a ṭhendarhaw ih, Pathian mi in a rak pek mi Jehovah kamsuakthu hminsinnak vekin vutcâm cu biakṭheng ihsin an bung. 6 Cun siangpahrang in Pathian mi cu a sâng ih, «Ka kut a damsal theinak dingah, zangfahten Jehovah na Pathian-ih duhsaknak dil awla ka hrangah thlacam aw,» tiah a ti. Cutin Pathian mi cun Jehovah a dil ih siangpahrang kut cu a damsal ih a hlan vekah a cang.

7 Cun siangpahrang in Pathian mi hnenah, «Ka hnenah inn ah ra awla cawlhahdam aw, cule lawmman ka lo pe ding,» tiah a ti.

8 Asinan Pathian mi cun siangpahrang hnenah, «Na inn hrek i pe ding hman si awla, na zawngah ka feh lo ding ih, hi hmun ah rawl khal ka ei lo ding, tidai khal ka in fawn lo ding. 9 Ziangahtile cumi cu Jehovah kamsuakthu in, ‹Rawl na ei lo pei ih, tidai khal na in fawn lo pei, na ratnak zin kêl khal in na tlung fawn lo pei,› tiah thu i pe a si,» tiah a ti. 10 Cutin zin dangah a feh ih Bethel a pannak zin ihsin a kir lo.

Profet Hlun in Pathian Mi a Bum

11 Profet patar pakhat cu Bethel ah a cêng, cule a fapapawl an ra thleng, cuih ni ih Pathian mi in Bethel ih a tuah mi thil tipawl hmuahhmuah cu amah an sim. Siangpahrang hnenih a sim mi ṭawngkampawl khal an pa cu an sim. 12 Cule an pa in an hnenah, «Khuitawk lamzin in a feh?» tiah a ti. Ziangahtile a fapapawl in Judah ram ihsin a ra mi Pathian mi in khuitawk zin a zawh ti an hmu. 13 Cun anih in a fapapawl hnenah, «Ka hrangah lāk dăm uh,» tiah a ti. Cutin a hrangah lāk cu an dam ih anih cu a parah a to, 14 cule Pathian miih dung ihsin a dawi ih, ela thingkung hnuaiih a to lai a va hmu. Cutikah anih in a hnenah, «Nang hi Judah ram ihsi ra mi Pathian mi na si maw?» tiah a ti.

Cule anih in, «Ka si,» tiah a ti.

15 Cun anih in a hnenah, «Ka zawngah inn ah ra awla, rawl ra ei aw,» tiah a ti.

16 Cule anih in, «Na zawngah ka kir thei lo ih, na zawngah ka feh thei fawn lo, nangmah thawn hi tawkah rawl ei in le tidai in khalin ka um thei lo. 17 Ziangahtile Jehovah kamsuakthu in, ‹Cu tawkah rawl na ei lo pei, tidai khal na in lo pei ih, na ratnak zin khalin na kir fawn lo pei,› tiih sim ka si,» tiah a ti.

18 Anih in a hnenah, «Kei khal nangmah bangin profet ka si ih, Jehovah kamsuakthu hmangin vancungmi in ka hnenah, ‹Rawl ei ih tidai in dingin, amah kha na zawngah na inn ah hruaikir aw,› tiin i sim a si,» tiah a ti. A hnenah thuphan a sim a si. 19 Cule amah zawngah cun a kir ih a inn ah rawl ei in tidai a in.

20 Cun hitin a si, cabuai ih an to laiah amah hruaikirtu profet hnenah Jehovah kamsuakthu a thleng. 21 Judah ram ihsin a ra mi Pathian mi hnenah a au ih, «Jehovah in hitin a ti, ‹Jehovah-ih kamsuakthu na lung lo ih, na Pathian Jehovah ih thu a lo pek mi thupek na thlun lo ih, 22 kirsal sawnin, na hnenah Jehovah in, «Rawl ei hlah, tidai in hlah,» a lo tinak hmun ah rawl ei le tidai inih na um sawn ruangah, na pupápawlih thlān ah na ruak a thleng lo ding,› a ti,» tiah a ti.

23 Cule hitin a si, rawl a ei ṭheh ih tidai a in ṭheh tikah, a rak hruaikir mi profet hrangah lāk a dăm. 24 A fehliam tikah, kiosa in lamzin ah amah cu a táwng ih a that. Cule a ruak cu lamzin parah hlăwn a si ih, a kiangah lāk cu a ding, cule kiosa khal ruak kiangah cun a ding. 25 Cule ngai hnik, lamzin sirih ruak le ruak kiangih a ding mi kiosa cu mi veivâkpawl in an hmu. Cun an feh ih profet patar cēnnak khawpi sungah feh in cuih thu cu an sim.

26 Cule lamzin ihsin amah hruaikirtu profet in cumi a theih tikah, «Pathian mi, Jehovah kamsuakthu lung lo tupa kha a si cu! Curuangah amah cu Jehovah in kiosa hnenah a pek. Cuticun Jehovah in a hnenih a sim mi a kamsuakthu bangtukin amah cu a thlek ih a that a si,» tiah a ti. 27 Cule anih in a fapapawl hnenah, «Ka hrangah lāk dăm uh,» tiah a ti. Cule annih in lāk cu an dăm. 28 Cun anih cu a feh ih lamzin parih thehvawrh mi a ruak le ruak kiangih ding lāk le kiosa cu a va hmu. Kiosa in ruak cu a ei lo ih, lāk khal a băwtthlek lo. 29 Profet cun Pathian miih ruak cu a la, lāk parah a hlum ih a phurkir. Cutin profet patar cu ṭah dingah le amah phum dingah khua cu a va thleng. 30 Cun a ruak cu amai thlān ah a hlum ih an ṭah, «Ai maw, ka unaupa!» tiah an ti.

31 Cule hitin a si, amah a phum ṭheh hnuah a fapapawl hnenah, «Ka thih tikah Pathian mi phumnak thlān ah in phum pei ih ka ruhpawl cu a ruhpawl kiangah nan ret pei. 32 Ziangahtile Bethel ih biakṭheng dokalhin le Samaria khawpipawl ih um hmun sângpawl ih inn hmuahhmuah dokalhin Jehovah kamsuakthu a aupi mi a thleng tengteng ding a si,» tiah a ti.

Jeroboam in Pathian thu a Lung lo Vivo

33 Himi thil a can hnuah, Jeroboam cu a lamzin ṭhalo ihsin a kir lo, cuhnakin hmun sângpawl hrangah mi menmen lak ihsin puithiampawl a tuah sawn riangri, a duhtu zokhal cu a serhhran ih hmun sângpawl ih puithiampawl lakih pakhat ah a cang. 34 Cule himi thil hi Jeroboam sungza sualnak anmah cimittertu le leilung vangdâp ihsin hloráltertu a rak si.

14

Pathian in Jeroboam Thu a Ṭhen

1 Cuih cān ah Jeroboam-ih fapa Abijah a dam lo. 2 Cule Jeroboam in a nupi hnenah, «Zangfahten tho awla, Jeroboam nupi ti an lo theihlonak dingah danglamawter aw, cule Shiloh ah feh aw. Ngai hnik, cu tawkah hi minungpawl tlunih siangpahrang si dingih i rak simtu, profet Ahijah a um. 3 Cuihtlunah sang hlawm hra, sangperpawl le khuaitizu thâwl khat na zawngah keng awla a hnenah feh aw. Anih in nauhak ziang a cang ding ti a lo sim ding,» tiah a ti.

4 Cule cuvekin Jeroboam nupi cun a tuah, a tho ih Shiloh ah a feh, cule Ahijah-ih inn a thleng. Asinan Ahijah cun khua a hmu thei nawn lo, ziangahtile a tar ruangah a mit a māl. 5 Cule Jehovah in Ahijah hnenah, «Ngai hnik, a fapa thu ah thil hrekkhat lo sut dingin, Jeroboam nupi a ra, ziangahtile anih cu a dam lo. Cutin khatin a hnenah na sim pei. Ziangahtile hitin a si ding, a ra thlen tikah nunau dang pakhat vekin a umawter ding,» tiah a ti.

6 Cule hitin a si, Ahijah in sângka lam panin amahnu a thleng ti a kekar thâwm a theih tikah, «Rung lut aw, Jeroboam nupi. Ziangruangah mi dang pakhat vekih na umawkter? Ziangahtile kei cu na hnenah thuthang sia thawi thlah mi ka si. 7 Feh aw, Jeroboam kha, ‹Israel-ih Pathian Jehovah in hitin a ti, «Mipi lakah ka lo khaisâng ih, ka mi Israel tlunih uktu ah ka lo tuah ruangah, 8 David sungza ihsin lalram cu ka thlek ih, cumi cu ka lo pe. Sikhalsehla ka thupekpawl kilhimtu le ka mithmuhah a dik mi lawng tuah dingih a thinlung zateih keimah thluntu ka siahhlawh David vek na rak si lo. 9 Cuhnakin nang cun na hlanih mi hmuahhmuah hnakin thil ṭhalo tamsin na tuah riangri, ziangahtile nang cu na feh ih ka thinhengnak căwktho dingin na hrangah pathian dangpawl le burcawp milimpawl tla na tuah ih, na dung i tun. 10 Curuangah ngai hnik, Jeroboam sungza ah vanduainak ka thlĕn ding ih, Jeroboam ihsin Israel ram ih mipa kip in ṭemṭawn le miluat khal ka sâtcat ding, mi pakhat in a zateih a cem tiangih êk a hlawnhloh vekin, Jeroboam sungza ih a tāngsŭn cu ka hlawnhlo ding. 11 Zokhal Jeroboam-ih sungkhat, khawpi sungih thi cu uicopawl in a ei ding ih, zokhal ramlak ih thi cu van ih vâtepawl in an ei ding. Ziangahtile Jehovah in a sim zo!» tiah a ti,› tiin ti aw.

12 «Curuangah nangmai inn ih feh dingin tho aw. Na ke in khawpi a luh tikah, nauhak cu a thi ding. 13 Cule Israel hmuahhmuah in amah cu an sūn ding ih an phum ding, ziangahtile amah lawng hi thlān ah a thleng ding mi Jeroboam-ih milai pakhat a si, ziangruangahtile Jeroboam sungza lakah Israel-ih Pathian Jehovah lamih thil ṭha hrekkhat amah ah hmuh a si. 14 Cuihhleiah Jehovah in amai hrangah Israel tlunih siangpahrang pakhat, Jeroboam sungza cimittertu ding a tungding ding, cucu tuihni hi a si. Atu ah teh ziang a cang pei? 15 Ziangahtile tidai sungih câlte a hninter vekin, Jehovah in Israel a vaw ding. Amah in an pupápawl hnenih a pek mi himi ram ṭha ihsin Israel a phawng ding ih, aTiva ralah anmah a ṭhekdarh ding, ziangruangahtile Jehovah thinheng ko căwktho dingin an Asherah an tuah. 16 Cule anih in Israel thilsual tuahter ih, thilsual tuahtu Jeroboam-ih sualpawl ruangah Israel a thlauthla ding,» tiah a ti.

14:15a Tiva: Zufraṭis tiva a relnak a si.

17 Cun Jeroboam nupi cu a tho ih, a păwk, cule Tirzah khua a thleng. Inn sângka hram a thlen tikah nauhak cu a thi. 18 Cule amah cu an phum, cun Jehovah in a siahhlawh profet Ahijah hmangih a sim mi a kamsuakthu bangtukin Israel hmuahhmuah in amah cu an sûn.

Jeroboam Uknak Cemnetnak

19 Cule Jeroboam-ih căngvaihnak dangpawl, ral a dodān le a ukdān pawl tla cu, ngai hnik, Israel siangpahrangpawlih san thuanthu cazual sungah ngan a si. 20 Jeroboam ih a uk sung cān cu kum 22 a si. Cutin anih cu a pupápawl hnenah a cawl. Cun a fapa Nadab cu a aiah a lal.

Judah Siangpahrang Rehoboam

Rehoboam Uknak Hramthawhnak

21 Cule Solomon fapa Rehoboam in Judah ram a uk. Rehoboam cu siangpahrang a si tikah kum 41 a si. Jehovah in amai hmin retnak dingah Israel hnám hmuahhmuah lak ihsin a rak hril mi khawpi Jerusalem ah kum 17 a lal. A nuih hmin cu Naamah, Ammon-mi a si.

22 Cun Judah hnám cun Jehovah mithmuhah thil ṭhalo a tuah ih, an pupápawl ih an rak tuah mi hmuahhmuah hnakih nasasawnin thilsual an tuah mi an sualpawl cun a thîksiatnak an căwktho. 23 Ziangahtile annih khal anmai hrangah hmun sângpawl, ṭhuamserhpawl le tlang sâng kip parah le thingbŭknîm hnuai kip ah Asherah-pawl an dĭn. 24 Cule ram sungah mipa hlawhhlângpawl khal an um. Jehovah in Israel tefapawl hmaiih a rak dawisuak mi miphunpawlih thil fihnungza hmuahhmuah bangtukin an tuah a si.

Shishak in Jerusalem a Do

25 Siangpahrang Rehoboam-ih kum ngatnak ah hitin a si, Izip siangpahrang Shishak cu Jerusalem dokalhin a hung so. 26 Cule anih in Jehovah inn ih hlawnthilpawl le siangpahrang inn ih hlawnthilpawl a la, thil tinkim a la thluh. Solomon ih tuah mi sui ralphawpawl khal a la. 27 Cun Siangpahrang Rehoboam in an aiah dar ralphawpawl a tuah ih, cupawl cu kiltu ralbawipawl, siangpahrang inn luhnak kiltupawl hnenah a ap. 28 Cule hitin a si, siangpahrang in Jehovah inn a luh tinten, kiltupawl in cuih darphawpawl cu an keng ih cupawl cu kiltupawlih pindan sungah an kengkir.

Rehoboam Uknak Cemnetnak

29 Cule a tāng lai mi Rehoboam-ih căngvaihnak le a tuah mipawl hmuahhmuah cu Judah siangpahrangpawlih sansiarnak cazual ah ngan a si lo maw? 30 Rehoboam le Jeroboam karlakah an damsung hmuahhmuah doawknak a um. 31 Cun Rehoboam cu a pupápawl hnenah a cawl ih, David Khawpi ah a pa hnenih phum a si. A nuih hmin cu Naamah, Ammon-mi a si. Cun a aiah a fapa Abijam a lal.

15

Judah Siangpahrang Abijam

1 Nebat fapa Siangpahrang Jeroboam a lal a kum hleiriatnak ah, Abijam cu Judah tlunah siangpahrang ah a cang. 2 Cule Jerusalem ah kum thum a lal. A nuih hmin cu Maakah, Abishalom tunu a si. 3 Cule amai hlanih a pa ih tuah mi sualpawl hmuahhmuah a tuah, a thinlung cu a pa David thinlung bangin, Jehovah a Pathian ah a rinum lo.

4 Sikhalsehla David ruangah Jehovah a Pathian in a hnuih a fapa tundīnnak in le Jerusalem dĭnhngetnak in amah cu Jerusalem ah meito a pe. 5 Ziangruangahtile David cun Jehovah mithmuhah a dik mi a tuah ih, Heth-mi Uriah thuhla siarlo ah cun, a damsung hmuahhmuah ah thu a pek mi ziang lak hmanin a pial lo. 6 Cule a damsung hmuahhmuah cu Rehoboam le Jeroboam karlakah doawknak a um.

7 Cun a tāng lai mi Abijam-ih căngvaihnakpawl le a tuah mi hmuahhmuah cu Judah siangpahrangpawlih sansiarnak cazual ah ngan an si lo maw? Cule Abijam le Jeroboam karlakah doawknak a um. 8 Cutin Abijam cu a pupápawl hnenah a cawl ih, amah cu David Khawpi ah an phum. Cun a aiah a fapa Asa a lal.

Asa in Judah Ram a Uk

Asa ih Uk Thăwknak

9 Israel siangpahrang Jeroboam a lal a kum 20-nak ah, Asa cu Judah ram ah siangpahrang ah a cang. 10 Cule anih cu Jerusalem ah kum 41 sung a lal. A pi-ih hmin cu Maakah, Abishalom tunu a si. 11 Asa cun a pa David bangin Jehovah mithmuhah a dik mi a tuah.

12 Cule anih in temple amipa hlawhhlângpawl cu ram sung ihsin a hnawtsuak hai ih a pupápawl ih an rak tuah mi milem hmuahhmuah tla a ṭhiatbăl. 13 A pi Maakah khal fihnungza Asherah a tuah ruangah, siangpahrang bawinu sinak ihsin a hlăwn. Cule Asa in a fihnungza milem cu a hauthlu ih, cumi cu Kidron Tivate kiangah a ur. 14 Asinan hmun sângpawl cu ṭhiahbăl an si lo. Sikhalsehla Asa thinlung cu a damsung hmuahhmuah Jehovah parah a rinum. 15 A pa ih rak serhhran mipawl le amah rori ih a serhhran mi ngun le sui le bungbelpawl cu Jehovah inn sungah a kenglut.

15:12a mipa hlawhhlâng: Biaknaksakhua thawi pehtlai mi hlawhhlâng a si. An biaknaksakhua temple ah an um ṭheu.

Asa in Siangpahrang Ben-Hadad a Rinsan

16 Cun Asa le Israel siangpahrang Baasha karlakah an damsung hmuahhmuah doawknak a um. 17 Cule Israel siangpahrang Baasha in Judah a hung do ih, Judah siangpahrang Asa hnenih lut le suak ding a kham theinak dingah Ramah khua a dĭn. 18 Cun Asa cun Jehovah inn hlawnthil retnak sungih a tāng mi sui le ngun hmuahhmuah le siangpahrang inn ih hlawnthilpawl cu a la ih, cupawl cu a siahhlawhpawl kut ah a pe. Cule Siangpahrang Asa in Damaska khua ih cêng Hezion-ih fa Tabrimmon fapa, Siria siangpahrang Ben-Hadad hnenah, 19 «Na pa le ka pa karlakih a rak um bangin, nangmah le keimah lakah thukham um seh. Zoh hnik, ngun le sui laksawng ka lo kuat sokhaw. Israel siangpahrang Baasha hi ka hnen ihsin a sīp theinak dingah, ra awla, amah thawi nan thukham kha pahbăl aw,» tiah a ti ih cupawl cu a kuat.

20 Cule Ben-Hadad in Siangpahrang Asa cu a ngaithla ih, Israel khawpipawl do dingin a ralkap hotupawl a thlah. Anih in Ijon khua, Dān khua, Abel Beth Maakah khua le Kinneroth peng hmuahhmuah, Naftali ram hmuahhmuah thawn a do. 21 Cule hitin a si, cumi cu Baasha in a theih tikah, Ramah khaw dĭn cu a bang ih Tirzah ah a tāng ta. 22 Cule Siangpahrang Asa in Judah ram hmuahhmuah ah thuphuansuah a tuah, a tel lo zohman um loin, Baasha in khaw dĭnnak hrangih a hman mi Ramah ih lungtopawl le thingpawl cu an thiar. Cule Siangpahrang Asa in cupawl thawn Mizpah khua le Benjamin ram ih Geba khua a dĭn.

Asa Uknak Cemnetnak

23 A tāng lai mi Asa-ih căngvaihnak hmuahhmuah, a cahnak hmuahhmuah, a tuah mi hmuahhmuah le a rak dĭn mi khawpi hmuahhmuah pawl cu Judah siangpahrangpawlih sansiarnak cazual ah ngan an si lo maw? Asinan a tar hnuah a kepawl ah nathri a um. 24 Cule Asa cu a pupápawl hnenah a itthat ih, a pa David-ih Khawpi ah phum a si. Cun a aiah a fapa Jehoshafat a lal.

Israel Siangpahrang Nadab

25 Jeroboam fapa Nadab cu Judah siangpahrang Asa a lal a kum hnihnak ah Israel tlunah siangpahrang ah a cang. 26 Cule anih in Jehovah mithmuhah thil ṭhalo a tuah ih, a paih lamzin, Israel sual a tuahternak a sualnak cu a zawh ve.

27 Cun Issakar sungza lakih mi pakhat Ahijah fapa Baasha in amah cu a phiarthup. Cule Nadab le Israel hmuahhmuah in Gibbethon khua an kulhkhŭm laiah, Filisṭia-mipawlih ta a si mi Gibbethon khua ah amah cu Baasha in a that. 28 Judah siangpahrang Asa in kum thum a uknak ah, amah cu Baasha in a that ih, a aiah amah cu a lal.

29 Cule hitin a si, anih cu siangpahrang a can tikah, Jeroboam sungza hmuahhmuah a that ṭheh. Jehovah in Shilon-mi a siahhlawh Ahijah hmangin a rak sim mi a kamsuakthu bangtukin amah a hlohralter ṭheh hlanlo, thaw a thaw mi pakhat hman anih in Jeroboam hrangah a zuah lo. 30 Cumi cu Jeroboam-ih sualpawl, Israel a sualternak le a thilsual tuah mi ruangah le Israel-ih Pathian Jehovah thinheng ko a căwkthawhnak thinhengnak ruangah a si.

31 Cun a tāng lai mi Nadab-ih căngvaihnakpawl le a tuah mi hmuahhmuah cu Israel siangpahrangpawlih sansiarnak cazual ah ngan an si lo maw? 32 Cule Asa le Israel siangpahrang Baasha karlakah an damsung hmuahhmuah doawknak a um.

Israel Siangpahrang Baasha

33 Judah siangpahrang Asa a lal a kum thumnak ah, Ahijah fapa Baasha cu Tirzah khua ah Israel hmuahhmuah tlunih siangpahrang ah a cang, cule kum 24 sung a lal. 34 Anih cun Jehovah mithmuhah thil ṭhalo a tuah ih, Jeroboam-ih lamzin a zawh, cule Israel sual a tuahternak a sualnak kha a tuah ve.

16

1 Hanani fapa Jehu hnenah Baasha dokalhin Jehovah kamsuakthu a thleng ih, 2 «Leivut lak ihsin ka lo khaisâng ih, ka mi Israel tlunih uktu ah ka lo tuah, cule Jeroboam-ih lamzin na zawh, an sualpawl thawn thinheng ko in căwktho dingin ka mi Israel sual na tuahter. 3 Ngai hnik, Baasha cithlah le a sungza cithlah ka hlăwnhlo ding ih, na inn cu Nebat fapa Jeroboam inn vekah ka cangter ding. 4 Zokhal Baasha-ih innsang khawpi sungih thi mi cu uicopawl in an ei ding ih, zokhal ramlak ih thi mi cu van ih vâtepawl in an ei ding,» tiah a ti.

5 Cun a tāng lai mi Baasha-ih căngvaihnakpawl, a tuah mi le a cahnakpawl cu Israel siangpahrangpawlih sansiarnak cazual ah ngan an si lo maw? 6 Cutin Baasha cu a pupápawl hnenah a itthat ih, Tirzah khua ah phum a si. Cun a aiah a fapa Elah a lal. 7 Cuihtlunah Jeroboam-ih sungza thawn bangawin, a kut hnaṭuan mi in Jehovah thinheng dingih căwkthoin a mithmuhah thil ṭhalo a tuah mi hmuahhmuah ruangah le anmah a thah ruangah, Hanani fapa profet Jehu hmangin Baasha le a innsungsang dokalhin Jehovah kamsuakthu a thleng fawn.

Israel Siangpahrang Elah

8 Judah siangpahrang Asa in kum 26 a uk sungah Baasha fapa Elah cu Israel tlunah siangpahrang ah a cang, Tirzah khua ah kum hnih a lal. 9 Cule a siahhlawh Zimri, a ránglêng a hrek uktu ralbawi in amah dokalhin thil ṭhalo khua a khâng, cu laiah amah cu Tirzah khua ah, Tirzah khua ih a inn kilkhawitu Arza-ih inn ah in le ri in a um. 10 Cule Judah siangpahrang Asa lal kum a kum 27-nak ah, Zimri cu a lut ih a parah kut a thlak ih, a that, cule a aiah a lal. 11 Cun hitin a si, lal a thăwk tikah, a laltokham ih a to leveten Baasha sungkua hmuahhmuah a that, a sungkhatpawl siseh, a rualpipawl siseh mipa pakhat hman a zuah lo. 12 Cutivekcun profet Jehu hmangin Baasha dokalhih a rak sim mi Jehovah kamsuakthu bangtukin Baasha sungkua hmuahhmuah cu Zimri in a that ṭheh, 13 ziangahtile an milempawl hmangin Israel-ih Pathian Jehovah thinhengnak căwkthoin, an tuahsualnak le Israel an sualternak, Baasha-ih sualpawl hmuahhmuah le a fapa Elah-ih sualpawl ruangah a si.

14 Cule a tāng lai mi Elah-ih căngvaihnakpawl le a tuah mi hmuahhmuah cu Israel siangpahrangpawlih sansiarnak cazual ah ngan an si lo maw?

Israel Siangpahrang Zimri

15 Judah siangpahrang Asa a lal a kum 27-nak ah Zimri cu Tirzah khua ah ni sarih sung a lal. Cule mipi in Filisṭia-mipawlih ta a si mi, Gibbethon doin ṭanhmun an khuar. 16 Cun ṭanhmun khuartu mipi in, «Zimri in thil ṭhalo khua a khâng ih siangpahrang khal a that,» ti an rak thei. Cule Israel hmuahhmuah in ralkap hotu Omri cu, cumi ni ah ṭanhmun khuarnak hmun ah, Israel siangpahrang ah an tuah. 17 Cun Omri le a hnenih Israel-mi hmuahhmuah cu Gibbethon khua ihsin an so ih Tirzah khua an kulh. 18 Cule hitin a si, Zimri in khawpi lâk a si zo ti a hmuh tikah, siangpahrang inn ih kulhhnget ah a lut ih amai parah meisa thawn siangpahrang inn cu a ur ih a thi. 19 Jehovah mithmuhah thil ṭhalo tuahin a rak tuah mi sualpawl ruangah le Jeroboam-ih lamzin zawhin le Israel sual a tuahternak a sualpawl ruangah a si. 20 Cule a tāng lai mi Zimri-ih căngvaihnakpawl le phiarthupnak a tuah mipawl cu Israel siangpahrangpawlih sansiarnak cazual ah ngan an si lo maw?

Israel Siangpahrang Omri

21 Israel-mipawl cu hmun hnih ah an ṭhenaw: a hrek in siangpahrang ih tuah dingah Ginath fapa Tibni an thlun ih, a hrek in Omri an thlun. 22 Asinan Omri thluntu milaipawl in Ginath fapa Tibni thluntu milaipawl cu an neh. Cutin Tibni cu a thi ih Omri in a uk.

23 Judah siangpahrang Asa in a uk kum 31-nak ah Israel tlunah Omri cu siangpahrang ah a cang, cule amah cu kum 12 sung a lal. Cun amah cu Tirzah khua ah kum ruk sung a lal. 24 Cule anih in Shemer hnen ihsin ngun talent hnih in Samaria tlangmual a lei, cun tlangmual ah khawpi a dĭn ih a dĭn mi cu tlang neitu Shemer hmin cawiin Samaria tiah a sak.

25 Omri in Jehovah mithmuhah thil ṭhalo a tuah ih, a hlanih mi hmuahhmuah hnakih siava sinin a tuah. 26 Ziangahtile anih cu Nebat fapa Jeroboam-ih lamzinpawl hmuahhmuah a zawh, Israel sual a tuahternak a sualnak in Israel-ih Pathian Jehovah thinheng dingin a căwktho. 27 A tāng lai mi Omri ih căngvaihnakpawl le a lăngter mi a cahnakpawl cu Israel siangpahrangpawlih sansiarnak cazual ah ngan an si lo maw? 28 Cule Omri cu a pupápawl hnenah a cawl ih, Samaria khua ah phum a si. Cun a aiawhah a fapa Ahab a lal.

Israel Siangpahrang Ahab

29 Judah siangpahrang Asa a lal a kum 38-nak ah Omri fapa Ahab cu Israel tlunah siangpahrang ah a cang. Cun Omri fapa Ahab cu Samaria ah kum 22 sung a lal. 30 Cun Omri fapa Ahab cun a hlanih mi hmuahhmuah hnakin Jehovah mithmuhah thil ṭhalo tamsin a tuah. 31 Cule hitin a si, Nebat fapa Jeroboam-ih sualpawl ih feh cu a hrangih thil tenau ah ruat vekin, Sidon-mipawlih siangpahrang Ethbaal fanu Jezebel cu nupi ah a ṭhi, cule a feh ih Baal a rian ih a bia. 32 Cun Samaria ih a rak sak mi Baal temple sungah Baal biakṭheng pakhat a dâwl. 33 Cule Ahab cun Asherah a tuah. Ahab cun amai hlanih Israel siangpahrang hmuahhmuah hnakin Israel-ih Pathian Jehovah thinheng dingih căwktho dingah a tuah nasasawn.

34 Amai san laiah Bethel-mi Hiel in Jeriko a dĭn. Nun fapa Joshua hmangih a rak sim mi Jehovah kamsuakthu bangtukin a fatir Abiram hlohin khaw lungphum cu a phum ih, a fapa nautabik Segub hlohin khaw kăwtkapawl a dĭn.

17

Kerith Phaikuam ah Elijah a Um

1 Gilead luahtu lakih Tishbi-mi Elijah in Ahab hnenah, «A hmaiih ka din ṭheu nak Israel-ih Pathian Jehovah a nun rori vekin, ka ṭawngkam lo cun hi kumpawl ah dai simaw, ruah simaw a um lo ding,» tiah a ti.

2 Jehovah kamsuakthu cu a hnenah, 3 «Hitawk ihsin suak awla, nisuahnak lamah feh aw, cule Jordan ih a luangthla mi Kerith Tivate ah relh aw. 4 Cule hitin a si ding, tivate ihta na in ding ih, cu tawkah nangmah lo câwm dingin tlangâkpawl ka rak fial zo,» tiin a thleng. 5 Cutin anih cu a feh ih Jehovah kamsuakthu vekin a tuah, cule a feh ih Jordan ih a luangthla mi Kerith Tivate kiangah a va um. 6 Tlangâkpawl in zing lamah sang le sa an rak kĕn ih, sîm lamah sang le sa, cule tivate ih ti a in. 7 Cun tawkfang a rei hnuah hitin a si, cuih ram ah ruah a um lo ruangah tivate cu a kâng.

Elijah le Zarefath Nuhmeinu

8 Jehovah kamsuakthu cu a hnenah, 9 «Tho aw, Sidon ta a si mi Zarefath khua ah feh awla, cu tawkah va cêng aw. Ngai hnik, cu tawkah nangmah lo câwm dingin nuhmei pakhat thu ka pe zo,» tiah a ti. 10 Cule anih cu a tho ih Zarefath ah a feh. Khawpi kăwtsuah a thlen tikah, ngai hnik, cu tawkah nuhmeinu thing fâwm rero in a um. Cule anih in amahnu cu a ko ih, «Zangfahten ka in dingah no in tidai málten in kĕn aw,» tiah a ti. 11 Cule anih in cumi lâk a tum tikah amahnu cu a ko ih, «Zangfahten na kut sungih sang them fate kha i kĕn aw,» tiah a ti.

12 Cutikah nuhmeinu in, «Na Pathian Jehovah a nun rori vekin, sang ka nei lo, kuang sungih sangvut phut zate khat le thâwl sungih hriak málte lawng ka nei, cule ngai hnik, ka lut ih keimai hrang le ka fapa hrangih ka timtuah theinak dingah thing málte ka fâwm rero a si, cumi cu kan ei ding ih, kan thi ding,» tiah a ti.

13 Cule Elijah in cu nu hnenah, «Ṭih hlah, feh awla na sim vek cun tuah ko, asinan cumi ihsin ka hrangah sangper fate tuah hmaisa awla, ka hnenah rak keng aw, cule cuihhnu ah nangmai hrang le na fapa hrangah tuah aw. 14 Ziangahtile Israel-ih Pathian Jehovah in hitin a ti, ‹Jehovah in leitlun ih ruah a surter ni a thlen hlanlo, kuang ih sangvut phut cu hmancem a si lo ding ih, hriak thâwl khal a kăng fawn lo ding,› tiin,» tiah a ti.

15 Cule nuhmeinu cu a fehsuak ih Elijah-ih ṭawngkam vekin a tuah, cule amahnu le Elijah le cu nuih sungkua in ni tampi sung an ei. 16 Elijah hmangih Jehovah kamsuakthu bangtukin, kuang ih sangvut phut cu hmancem a si lo ih, hriak thâwl khal a kâng lo.

Elijah in Nuhmeinuih Fapa a Nungtersal

17 Cun hi thilpawl hnuah hitin a si, inn neitunu, nunaunuih fapa cu a dam lo. Cule a natnak a luar zet ih amah ah thaw a um nawn lo. 18 Cule cu nu cun Elijah hnenah, «Nang le kei hi ziang pehtlaihawknak so kan neih, Maw Pathian mi? Ka mawhsualnak i mángsalter dingah le ka fapa that dingah ka hnenah na ra maw si?» tiah a ti.

19 Cule Elijah in cu nuih hnenah, «Na fapa cu i pe aw,» tiah a ti. Cule Elijah in nuhmeinuih ṭāng ihta a fapa cu a lâk ih, amai umnak inn tlun pindan ah a cawi ih a ihkhun parah a hlum. 20 Cun Elijah cu Jehovah hnenah a au ih, «Maw Jehovah ka Pathian, a fapa thahsaknak in ka thlen inn nuhmeinuih par tiang khalah thil ṭhalo na thlĕn maw si?» tiah a ti. 21 Cule nauhak parah vei thum a băwk ih, Jehovah hnenah a au ih, «Maw Jehovah ka Pathian, ka lo dil a si, a hnenah himi nauhakih nunnak kirtersal aw,» tiah a ti. 22 Cun Jehovah in Elijah-ih aw a thei ih nauhakih nunnak cu a hnenah a kirsal, cule anih cu a nungsal. 23 Elijah in nauhak cu a la ih inn tlun pindan ihsin inn sungah a hruai, cule a nu hnenah a pe. Cule Elijah in, «Zoh hnik, na fapa a nung!» tiah a ti.

24 Cun nunaunu in Elijah hnenah, «Atu ah cun himi ihsin nang cu Pathian mi na si ih, na ká sungih Jehovah kamsuakthu cu thutak a si ti ka thei,» tiah a ti.

18

Elijah in Ahab hnenah Thu a Phuang

1 Cule hitin a si, ni tampi hnuah Jehovah kamsuakthu cu, a kum thumnak ah, Elijah hnenah a ra thleng ih, «Feh aw, Ahab hnenah va langawter awla, leilung ah ruah ka surter ding,» tiah a ti. 2 Elijah cu Ahab hnenih va langawter dingin a feh ih, Samaria ah a nasatuk mi mangṭam a um.

3 Cule Ahab in a inn hohatu a si mi Obadiah cu a ko. Obadiah cun nasazetin Jehovah a ṭihzah, 4 ziangahtile hitin a si, Jezebel in Jehovah-ih profetpawl a thah laiah khan, Obadiah in profet 100 a hruai ih 50 bur in pûk ah a thup hai ih, sang le tidai in anmah cu a rak câwm a si. 5 Cule Ahab in Obadiah hnenah, «Sumhnám pakhat hman kan hlohlonak dingah, ram sungih cirhti hmuahhmuah ah le tivate hmuahhmuah ah feh aw, rángpawl le lākrangpawl nunnak hum dingah hrampi kan hmuh pangah,» tiah a ti. 6 Cule ram fángsuak dingin anmah lakah ram an ṭhenaw, Ahab cu amah tein zin pakhat ah a feh ih, Obadiah cu amah tein zin dang pakhat ah a feh.

7 Obadiah a feh laiah, ngai hnik, Elijah in amah cu a táwng, cule Obadiah in amah cu a theithiam ih, a hmai leisin bihin a băwk ih, «Nangmah na si maw ka bawi Elijah?» tiah a ti.

8 Cule anih in, «Keimah ka si. Feh aw, ‹Zoh hnik, hinah Elijah a um› tiin na bawipa va sim aw,» tiah a sâng.

9 Cutikah anih in, «Ziang thilsual so ka rak tuah ih, in that dingin na siahhlawh hi Ahab kut ih i pek ding? 10 Jehovah na Pathian a nun rori vekin, nangmah lo hawl dingin ka bawipa in mi a thlahlonak miphun le lalram a um lo, cule annih in, ‹Hi tawkah amah a um lo,› an ti tikah nangmah lo hmu thei lo tu lalram le miphun cu sia a sămter. 11 Cule atu ah nang in, ‹Feh aw, «Hi tawkah Elijah a um,» tiin na bawipa sim aw,› tiah i ti! 12 Cule hitin a si ding, na hnen ihsin ka fehliam veten Jehovah Thlarau in ka theihlonak hmun ah a lo hruai ding, cutin feh tahratin Ahab ka va sim tikah, anih in a lo hmungah thei lo ding ih, anih in keimah i that ding. Asinan kei na siahhlawh cun ka no lai ihsin Jehovah ka rak ṭihzah. 13 Jezebel in Jehovah-ih profetpawl a thah laiah ziang ka tuah, Jehovah-ih profet 100 tla, 50 bur bur in pûk ah ziangtin ka thup hai ih, rawl le tidai thawn anmah ka cawm thu ka bawipa hnenah simthan a si lo maw si? 14 Atu ah nang in, ‹Feh aw, «Hi tawkah Elijah a um,» tiin na bawipa va sim aw,› i ti. Anih in i that ding a si si!»tiah a ti.

15 Elijah in, «A hmaiih ka din ṭheu mi ralkap rualpawlih Jehovah a nun rori vekin, tuihsun ah a hnenah ka langawter rori ding a si,» tiah a ti.

16 Cutin Obadiah cu Ahab táwng dingin a feh ih, amah cu a sim, cule Ahab cu Elijah táwng dingah a feh. 17 Cun hitin a si, Ahab in Elijah a hmuh tikah, Ahab in a hnenah, «Nangmah hi na si lo maw, Israel buaitertupa cu?» tiah a ti.

18 Cule anih in, «Kei in Israel ka buaiter lo, nangmah le na paih sungza sawn nan si, Jehovah thupekpawl nan thlauthla ih Baalpawl nan thlunnak ah hin. 19 Curuangah atu ah, Karmel Tlang ah Israel hmuahhmuah thlahin, Jezebel-ih cabuai ih ei vetu Baal profet 450 le Asherah profet 400 cu ka hnenah fĭnkhawm aw,» tiah a sang.

Elijah in Baal Profetpawl a Zuam

20 Ahab in Israel tefapawl hmuahhmuah hnenah mi a thlah ih Karmel Tlang ah profetpawl a kokhawm. 21 Cule mipi hmuahhmuah hnenah Elijah a thleng ih, «Ruahnak phun hnih karlakah ziang tik tiang so nan vaivuan ding? Jehovah cu Pathian a si ahcun, amah thlun uh, asinan Baal a si sawn le amah thlun uh,» tiah a ti hai. Asinan mipi cun kam khat hman an sawn lo.

22 Cun Elijah in mipi hnenah, «Jehovah-ih profet cu keimah lawng ka tâng, asinan Baal profet cu mipa 450 an si. 23 Curuangah câwpa pahnih in pe hai sehla, annih in anmai hrangah câwpa pakhat hril hai seh, cumi cu satcip nêknêkin, thing parah ret hai seh, asinan a hnuaiah meisa ret hlah hai seh; cule kei in câwpa dang ka timtuah ve ding ih, thing parah ka ret ding, asinan a hnuaiah meisa ka ret lo ding. 24 Cun nannih in nan pathianpawlih hmin ko uhla, kei in Jehovah hmin ka ko ding, cule meisa hmangih sangtu Pathian cu, Pathian a si,» tiah a ti.

Cutin mipi hmuahhmuah in an sâng ih, «Cucu thil ṭha a si,» tiah an ti.

25 Cule Elijah in Baal profetpawl hnenah, «Nan hrangah câwpa pakhat hril uhla, cumi cu timtuah hmaisa uh, ziangahtile nannih cu nan tam. Nan pathian hmin ko uh, asinan a hnuaiah meisa ret hlah uh,» tiah a ti hai.

26 Cun anmah an pek mi câwpa cu an la ih an timtuah, cule zing lam ihsin sun tiang Baal hmin an ko, «Maw Baal, in thei aw!» tiah an ti. Asinan aw a um lo, zohman in an sâng lo. Cun an rak tuah mi biakṭheng kiangah cun an khir ciamco.

27 Cule hitin a si, sundir ah Elijah in anmah cu a zăwkzet hai ih, «Ringpin au hnik uh, ziangahtile anih cu pathian a si, anih cu ngunngaih zetin thu a ruat simaw, a man lo zet simaw, khual a tlawng lai simaw, a itthat lai simaw tla siin ṭhang a ṭul khal a si thei,» tiah a ti. 28 Cule aw ring zetin an au ih an tikēl vekin nâmpawl le feipawl in anmah parih thisen khawhsuak tiangin anmah le anmah an âtaw. 29 Cule hitin a si, sun hrek a liam ih zan lam raithawinak hlăn tikcu tiang thu an phuang rero. Asinan aw a um lo, zohman in an sang lo, zohman in an ngaithla lo.

30 Cun Elijah in mipi hmuahhmuah hnenah, «Ka hnenah rak naih uh,» tiah a ti. Cutin mipi hmuahhmuah cun amah cu an ra naih. Cule anih in a siat zo mi Jehovah-ih biakṭheng cu a rĕm. 31 Cule, «Na hmin cu Israel a si ding,» tiih Jehovah kamsuakthu dawngtu Jakob fapapawlih hnám zât in lungto hleihnih Elijah in a la. 32 Cuih lungtopawl thawn anih cun Jehovah hmin in biakṭheng pakhat a dâwl ih, biakṭheng kimvelin fâng ci aseah hnih tlem ih kauin khur a tuah. 33 Cule a sangsángten thing a ret, câwpa cu a cánnâwi ih, thing parah a ret, cule, «Tibel pali in tidai khatter uhla, Meiur Thilhlăn parah le thing parah burh uh,» tiah a ti. 34 Cun anih in, «A vei hnihnak tuah uh,» a ti ih annih in a vei hnihnak an tuah. Cule anih in, «A vei thumnak tuah uh,» a ti ih annih in a vei thumnak an tuah. 35 Cule biakṭheng kimvel hmuahhmuah ah tidai a luang; cule khur khal tidai a khatter.

18:32a seah: Seah khat cu no 28 hrawng a si.

36 Cule hitin a si, zan lam raithawinak hlăn tikcu ah profet Elijah cun a va naih ih, «Abraham, Isak le Israel-ih Pathian Jehovah, tuihsun ah nang cu Israel ram ah Pathian na si ti le kei hi na siahhlawh ka si ih, hipawl hmuahhmuah hi na kamsuakthu ih ti ka sizia tuihsun ah theihter aw. 37 I ngai aw, Maw Jehovah, hi mipi in nang cu Jehovah Pathian na si ti an lo theih ih, na hnenah an thinlung na kirtersal ti an theihnak dingah, i ngai aw,» tiah a ti. 38 Cun Jehovah-ih meisa cu a tla ih Meiur Thilhlăn le thing le lungtopawl le leivutpawl cu a kangrál ṭheh ih, khur sungih a li mi tidai khal a kăng ṭheh. 39 Cule mipi hmuahhmuah in cumi an hmuh tikah an băwkkhup ih, «Jehovah, amah cu Pathian a si! Jehovah, amah cu Pathian a si!» tiah an ti.

40 Cule Elijah in an hnenah, «Baal profetpawl kha kai uh! An lakih mi pakhat hman luatter hlah uh!» tiah a ti. Cutin annih in cupawl cu an kai, cule Elijah in cupawl cu Kishon Tivate ah a hruaithla hai ih cu tawkah anmah cu a that hai.

Elijah in Ruah Sur ding a Phuang

41 Elijah in Ahab hnenah, «Fehso aw, ei awla in aw, ziangahtile ruah tampi thâwm a um a si,» tiah a ti. 42 Cutin Ahab cu ei le in dingah a fehso. Cule Elijah cu Karmel Tlang zimah a kai, cun lei ah a kûn ih, a khuk karlakah a hmai a ret. 43 Cule a siahhlawh hnenah, «Atu ah fehso aw, tifinriat lam zoh hnik,» tiah a ti.

Cun anih cu a fehso ih a zoh, cule, «Zianghman a um lo,» tiah a ti. «Fehsal aw,» tiin vei sarih a ti.

44 Cun hitin a si, a vei sarihnak ah, «Tifinriat ihsin a kaiso mi mipa kuttum tia tlukih fate khawdur a um,» tiah a ti.

Cule Elijah in, «Fehso aw, Ahab hnenah, ‹Na ránglêng timtuah awla ruahpi in a lo kham hlanah suk aw,› tiin va sim aw,» tiah a ti.

45 Cule cumi laiah hitin a si, van cu khawdur le thli thawn a dum ah a cang ih, ruahpi tak zet a sur. Cutin Ahab cu a ránglêng a to ih, Jezreel ah a feh. 46 Cun Jehovah kut cu Elijah tlunah a thleng, cule anih cun a tai a ṭawn ih, Ahab hmaiah Jezreel khawluhnak ah a tlân.

19

Horeb Tlang ah Elijah

1 Ahab in Elijah ih tuah mi hmuahhmuah le ralnâm thawi profet hmuahhmuah a thahdān cu Jezebel a sim. 2 Cun Jezebel in Elijah hnenah palai pakhat a thlah ih, «Na nunnak hi thaisun atu tikcu ah anmah lakih mi pakhat ih nunnak vekin ka tuah lo a si ahcun, pathianpawl in cutivekcun in tuah hai seh, cuhnakih nasa khalin,» tiah a ti. 3 Cule Elijah in cumi a hmuh tikah a tho ih a nunnak hrangah a tlân, cule Judah ta a si mi Beersheba ah a feh ih, cu tawkah a siahhlawh cu a tān. 4 Amah tu cu ni khat feh ramṭhing ah a feh, cule a thleng ih juniper thing hnuaiah a to. Cun thi dingin thla a cam, «Tawk thlang seh! Atu ah Jehovah, ka nunnak la aw, ziangahtile kei cu ka pupápawl hnakin ka ṭha cuangce lo!» tiah a ti.

5 Cun anih cu juniper thing hnuaiah a zau ih, a itthat, ngai hnik, vancungmi in amah cu a run thâm ih a hnenah, «Tho awla ei aw,» tiah a ti. 6 Cun a zoh ih, ngai hnik, a lu kiangah meiling parih kăn mi sangper le ti thâwl pakhat a rak um. Cutin a ei ih a in, cule a zau lala. 7 Cule Jehovah-ih vancungmi cu a vei hnihnak a rasal ih, amah cu a thâm, «Tho awla ei aw, ziangruangahtile na hrangah na khualtlawnnak hi a nasatuk,» tiah a ti. 8 Cutin anih cu a tho ih, a ei ih a in, cule cuih rawlih thazang thawn Pathian tlang, Horeb tiangih hla ni 40 le zan 40 sung a feh.

9 Cule cutawk ih pûk sungah a feh ih, cuih hmun ah zan a riak, cule ngai hnik, a hnenah Jehovah kamsuakthu a thleng ih a hnenah, «Hi tawkah ziang na tuah, Elijah?» tiah a ti.

10 Cutikah anih in, «Ralkap rualpawlih Pathian Jehovah hrangah ṭhahnem ka rak ngai zet, ziangahtile Israel tefapawl in na thukham an thlauthla a si, na biakṭhengpawl an siatsuah ih, ralnâm thawn na profetpawl an that. Keimah lawng ka tang ih, ka nunnak la dingin an hawl,» tiah a ti.

11 Cun anih in, «Fehsuak awla, tlang parah Jehovah hmaiah va ding aw,» tiah a ti. Cule ngai hnik, Jehovah cu a fehtlăng ih, thlipi maktak le cakin tlangpawl a kăkter ih Jehovah hmaiah lungpipawl an kûaidarh, asinan Jehovah cu thli ah a um lo. Cule thli hnuah linghnîn a um, asinan linghnîn ah Jehovah a um lo. 12 Cule linghnîn hnuah meisa a um, asinan meisa ah Jehovah a um lo. Cule meisa hnuah aw dam ziaizo a um.

13 Cule hitin a si, Elijah in cumi a theih tikah a puan in a hmai a tuam ih a suak, cule pûk luhkâ ah a ding. Ngai hnik, a hnenah aw a thleng ih, «Hi tawkah ziang na tuah, Elijah?» tiah a ti.

14 Cule anih in, «Ralkap rualpawlih Pathian Jehovah hrangah ṭhahnem ka rak ngai zet, ziangruangahtile Israel tefapawl in na thukham an thlauthla, na biakṭhengpawl an siatsuah ih, ralnâm thawn na profetpawl an that. Keimah lawng hi ka tāng ih ka nunnak la dingin an hawl,» tiah a ti.

15 Cun Jehovah in a hnenah, «Feh aw, Damaskas Ramṭhing lamah kir aw, cule na thlen tikah Siria siangpahrang dingah Hazael kha hriak thih aw. 16 Nimshi fapa Jehu khal Israel tlunih siangpahrang dingah hriak na thih pei. Na aiih profet dingah Abel Meholah khawmi Shafat fapa Elisha khal hriak na thih pei. 17 Hitin a si ding, zokhal Hazael-ih ralnâm ihsin a luattu cu Jehu in a that ding ih, zokhal Jehu-ih ralnâm ihsin a luattu cu Elisha in a that ding. 18 Sikhalsehla Israel ram ah Baal hnenih khukbil hrih lo mi le kâ in amah hnam hrih lo mi zaten 7000 ka rethim a si,» tiah a ti.

Elisha cu Elijah Siahhlawh ah a Cang

19 Elijah cu cutawk ihsin a păwk ih Shafat fapa Elisha a va hmu, anih cu lei a rak let rero, a hmaiah câwcang hâl hleihnih a um, amah cu a hleihnihnak ah cun a um. Cun Elijah in amah cu a hei lan ih a parah a puan a sēp. 20 Cule anih cun a câwcangpawl a tân ih, Elijah dungah a tlân ih, «Zangfahten ka pa le ka nu va hnam ta ning, cule ka lo thlun ding,» tiah a ti.

Cule anih in a hnenah, «Va tlungkir aw, ziangahtile na hnenah ziangso ka rak tuah ih?» tiah a ti.

21 Cutin Elisha cu a hnen ihsin a va kirsal ih câwcang hâl khat a la ih a that hai, cule câwcangpawlih hmanrua hmangin an sa cu a sûang ih, cumi cu mipi a pe, cule an ei. Cun anih cu a tho ih Elijah a thlun, cule a siahhlawh ah a cang.

20

Israel le Siria Doawknak

1 Siria siangpahrang Ben-Hadad in a hnenih siangpahrang 32 le rángpawl le ránglêngpawl thawn ralkap hmuahhmuah a fĭnkhawm. Cule a va so ih Samaria khua cu a kulh, cule cuih khua cu a do. 2 Cun khawpi sungih Israel siangpahrang Ahab hnenah palaipawl a thlah ih a hnenah, «Ben-Hahad in hitin a ti, 3 ‹Na sui le na ngun pawl cu ka ta an si, na nupi duhnungbik bikpawl le na fātepawl khal ka ta an si,› a ti,» tiah a ti.

4 Cule Israel siangpahrang in a sâng ih, «Ka bawipa, Maw siangpahrang, na sim bangin, keimah le ka neih mi hmuahhmuah cu na ta an si,» tiah a ti.

5 Cule palaipawl cu an kirsal ih, «Ben-Hadad in hitin a ti, ‹Ka hnenah «Na sui le na ngun, na nupipawl le na fātepawl na thlah ding a si,» tiin mi ka thlah, 6 asinan thaisun tuvek tikcu ah na hnenah ka siahhlawhpawl ka thlah hai ding ih, annih in na inn le na siahhlawhpawlih innpawl an hawl ding. Cule hitin a si ding, na mit latu pauhpauh cu an kut ah an ret ding ih, cumi cu an la ding,› tiin,» tiah an ti.

7 Cun Israel siangpahrang in a ram sungih upapawl hmuahhmuah a ko ih, «Zangfahten hminsin uhla, hi pa in ziangtin buainak tuah a tum ti hmu uh, ziangahtile anih cu ka hnenah ka nupipawl, ka fātepawl, ka sui le ka ngun hrangah mi a thlah ih, amah cu ka rak êl lo,» tiah a ti.

8 Cule upapawl hmuahhmuah le mipi hmuahhmuah in a hnenah, «Ngaithla hlah aw, rem tipi fawn hlah,» tiah an ti.

9 Curuangah Ben-Hadad-ih palaipawl hnenah, «Ka bawi siangpahrang hnenah, ‹Na siahhlawh hnenih a hmaisa ih na ngĕn mi hmuahhmuah cu ka tuah ding, asinan himi cu ka tuah thei lo a ti,› tiin sim uh,» tiah a ti.

Cule palaipawl cu an fehsuak ih a hnenah thu an kengsal.

10 Cun Ben-Hadad in a hnenah mi a thlah ih, «Ka dungthluntupawl hmuahhmuah ih Samaria khua leivut ṭhuam khat ciar khal a tâng a si ahcun, pathianpawl in an titi in in ti hai seh, cuhnakih nasa khalin,» tiah a ti.

11 Cule Israel siangpahrang in a sâng ih, « ‹Ralthuam hruhtu cu hlîttu vekin tluangkhâwng hlah seh,› tiin amah sim uh,» tiah a ti.

12 Cule hitin a si, Ben-Hadad in himi thu a theih tikah, amah le siangpahrangpawl cu an riahbûk ih an in rero laiah, a siahhlawhpawl hnenah, «Tiar cia uh,» tiah a ti hai. Cule khawpi do dingah tiar cia-in an um.

13 Ngai hnik, profet pakhat in Israel siangpahrang Ahab a naih ih, «Jehovah in hitin a ti, ‹Hih mipi tam ngaingai hi na hmu maw? Ngai hnik, cumi cu tuihsun ah na kut ah ka lo pe ding ih, kei hi Jehovah ka si ti na thei ding,› a ti,» tiah a ti.

14 Cun Ahab in, «Zo hmangin?» tiah a ti.

Cule anih in, «Jehovah in, ‹Ramṭhenpawl uktu minopawl hmangin,› a ti,» tiah a ti.

Cun anih in, «Zo in ral dodān a tawlrel ding» tiah a ti.

Cule anih in, «Nangmah in,» tiah a ti.

15 Cun amah in ramṭhenpawl hotu minopawl a khawm ih mi 232 an si, cule anmai hnuah mipi hmuahhmuah le Israel tefapawl hmuahhmuah cu a khawm, mi 7000 an si. 16 Cutin sundir laifangah an fehsuak. Cu laiah Ben-Hadad le amah bawmtu siangpahrang 32 cu an bûk ah an rak ri. 17 A hmaisabikah ramṭhenpawl uktu minopawl an fehsuak. Cule Ben-Hadad in thlingthlatu a thlah ih annih in a hnenah, «Samaria ihsin mipapawl an ra thleng rero!» tiah an sim.

18 Cule anih in, «Daihnak hrangih ra an si le a nungin anmah kai uh. Cun doawknak hrangih ra an si khalle a nungin kai uh,» tiah a ti.

19 Cun ramṭhenpawl uktu minopawl cu anmah thluntu ralkappawl thawn khawpi ihsin an fehsuak. 20 Cule pakhat cio in anmai tāwng fingfing an that, cutin Siria-mipawl cu an tlânsuak ih, Israel-mipawl in anmah an dawi. Cun Siria siangpahrang Ben-Hadad cu a rángparah rángtothiam thawn a tlânsuak. 21 Cun Israel siangpahrang cu a fehsuak ih rángpawl le ránglêngpawl cu a do, cule Siria-mipawl cu thahnak nasazetin a that.

22 Cule Israel siangpahrang hnenah profet a ra thleng ih a hnenah, «Feh aw, cakawter aw, hminsin awla, na tuah ding mi ruat aw, ziangahtile kum a vawi tikah nangmah do dingin Siria siangpahrang a hung so ding,» tiah a ti.

Israel le Siria Doawknak Dang

23 Siria siangpahrang-ih siahhlawhpawl in a hnenah, «An pathianpawl cu tlang pathian an si. Curuangah a si annih cu kanmah hnakih an cahsawn, asinan anmah cu phairawn ih kan do asile, anmah hnakin kan caksawn tengteng ding. 24 Cutin himi thil hi tuah aw: Siangpahrangpawl hi an dinhmun cio ihsin bāngter hai awla, anmai hmunpawl ah ralbawipawl ret aw, 25 cule na hloh zo mi ralkap vekin, ránghrangah ráng, ránglêng hrangah ránglêng tiin, ralkap na khawm pei. Cun anmah cu phairawn ah kan do ding ih, anmah hnakin kan caksawn tengteng ding,» tiah an ti. Cule an aw a ngai ih cuticun a tuah.

26 Cun hitin a si, kum thăwktir ah Ben-Hadad in Siria-mipawl a khawm ih Israel do dingin Afek ah a hung so. 27 Cule Israel tefapawl cu fĭnkhawm an si, cule an ṭulhai mi pek an si ih, anmah do dingin an feh. Cule Siria-mipawl cu ramlak an luahkhah ṭheh laiah, Israel tefapawl cu me rual fate rual hnih vekin, an hmaiah ṭanhmun an khuar.

28 Cun Pathian mi cun a va naih ih Israel siangpahrang hnenah a ṭawng, «Jehovah in hitin a ti, ‹Siria-mipawl in, «Jehovah cu tlang Pathian a si, phaikuampawlih Pathian cu a si lo,» tiah an ti, curuangah hi mipi tam zet hmuahhmuah hi na kut ah ka lo pe ding, cule nannih in keimah cu Jehovah ka si ti nan thei ding,› tiin Jehovah in a ti,» tiah a ti.

29 Cule annih cu pakhat le pakhat raldenawin ni sarih sung ṭanhmun an khuar. Cun hitin a si, a ni sarihnak ah doawknak an thăwk ih, Israel tefapawl in ni khat sungah lei ralkap ting khat an that. 30 Asinan a dang cu Afek khawpi sungah an tlân, cun a tāng mi mipa 27000 parah khawkulh a tlu. Cule Ben-Hadad cu a tlân ih khawpi sungih siangpahrang inn sung, pindan sungta ah a lut.

31 Cun a siahhlawhpawl in Ben-Hadad hnenah, «Atu ah zoh hnik, Israel sungza siangpahrangpawl cu zahngainak nei siangpahrang an si ti kan thei. Zangfahten, kan tâipawl vĕlin buri-puan hruhin le kan lu ah hri vĕlin, Israel siangpahrang hnenah feh uhsi, anih in na nunnak a zuah mahna,» tiah an ti. 32 Cutin an tâipawl vĕlin buri-puan hruhin le an lu ah hripawl vĕlin, Israel siangpahrang hnenah an thleng ih, «Na siahhlawh Ben-Hadad in, ‹Zangfahten i nungter hram seh,› a ti,» tiah an sim.

Cule anih in, «Amah cu a nung lai maw si? Anih cu ka unaupa a si,» tiah a ti.

33 Cule mipapawl cu a hnen ihsin zahngainak hminsinnak ziang tal a suak pei maw tiin naih zetin an thlir cuahco, cule himi ṭawngkam zamrang zetin an kaingah ih, «Na unaupa Ben-Hadad,» tiah an ti.

Cule anih ih, «Feh uh, amah cu run hruai uh,» tiah a ti. Cun Ben-Hadad cu a hnenah a ra suak ih, anih in amah cu ránglêng ah a lutter.

34 Cule Ben-Hadad in a hnenah, «Ka pa in na pa hnen ihta a lâk mi khawpipawl ka lo pesal ding ih, ka pa in Samaria ih a rak tuah vekin, Damaskas ah nangmai hrangah zinpi na dĭn ve pei,» tiah a ti.

Cun Ahab in, «Himi thukham thawn ka lo thlah ding,» tiah a ti. Cutin amah thawn thukham a tuah ih amah cu a thlah.

Profet in Ahab Thih ding a Phuang

35 Cule profetpawlih fapapawl lakih pakhat in Jehovah kamsuakthu hmangin a innhnen mi pakhat hnenah, «Zangfahten i vaw aw,» tiah a ti. Cule cu pa cun amah vuak ding a êl. 36 Cun anih in a hnenah, «Jehovah aw na ngaithlak lo ruangah, ngai hnik, ka hnen ihsin na suah veten kiosa in a lo dehthat ding,» tiah a ti. Cule amah a fehsan veten, kiosa in amah cu a táwng ih a dehthat.

37 Cule a dang mi pakhat a táwng ih, «Zangfahten i vaw aw,» tiah a ti. Cu pa cun a vua ih hma a baih. 38 Cun profet cu a fehsuak ih lamzin kapin siangpahrang a hngak, cule a mit tlun calṭawnnak in a mit tlun tluan ṭawnawin a danglamawter. 39 Cutin siangpahrang a ra thlen tikah, siangpahrang hnenah a au ih, «Na siahhlawh cu doawknak lakah a fehsuak ih, ngai hnik, mipa pakhat a ra ih ka hnenah mipa pakhat a rak hruai, cule, ‹Hi pa hi kil aw, ziangti zawng khalin amah a hloh asile, a nunnak aiah na nunnak a si ding, culoasile ngun talent khat na pe ding,› tiah i ti. 40 Khat lam khat lam ih na siahhlawh a buai laiah, anih cu a rak hlo,» tiah a ti.

Cun Israel siangpahrang in a hnenah, «Na dāntatnak vekin si seh, cumi cu nangmah in na băwtcat zo a si,» tiah a ti.

41 Cule a mit tlun ihsin a tuamnak cu zamrang zetin a phawih, cule Israel siangpahrang in profetpawl lakih pakhat a si ti a theithiam. 42 Cun anih in a hnenah, «Jehovah in hitin a ti, ‹Siatral verver dingih ka ruah mi pa pakhat cu na kut ihsin na suahter ruangah, a nunnak aiah na nunnak a feh ding ih, a mipawl aiah na mipawl,› tiin,» tiah a ti. 43 Cule Israel siangpahrang cu ngui zet le lunghmui lo zetin a inn ah a tin ih, Samaria a thleng.

21

Naboth-ih Sabit Hmuan

1 Hih thilpawl hnuah hitin a si, Jezreel-mi Naboth in sabit hmuan a nei, cucu Jezreel khua, Samaria siangpahrang Ahab inn kiangah a si. 2 Ahab in Naboth hnenah, «Na sabit hmuan i pe awla cumi cu hanghnahhangrah hmuan hrangah ka nei ding, ziangruangahtile cumi cu a nâi, ka inn kiang a si, cule cumi hrangah cuhnakih ṭhasawn sabit hmuan dang ka lo pe ding. Asilole na hrangih ṭhasawn dingih na ruah asile, a man tawk paisa cu ka lo pe ding,» tiah a ti.

3 Asinan Naboth in Ahab hnenah, «Ka pupápawlih ro na hnenih lo pek ding cu Jehovah in i kham a si!» tiah a ti.

4 Ahab cu Jezreel-mi Naboth in a hnenih a rak sim mi ṭawngkam ruangah ngui zet le lunghmui lo zetin a inn ah a tin, ziangahtile Naboth in, «Ka pupápawlih ro cu ka lo pe lo ding,» tiah a ti a si. Cule Ahab cu a ihkhun parah a it, khat lam a hawi ih, rawl a ei lo. 5 Cun a nupi Jezebel a ra thleng ih, a hnenah, «Ziangruangah na nun cu a ngui ih rawl na ei lo?» tiah a ti.

6 Anih in a hnenah, «Ziangruangahtile Jezreel-mi Naboth ka bia ih a hnenah, ‹Na sabit hmuan hi paisa in i leiter aw, culole, na lung a si dingah cun cumi hrangah sabit hmuan dang ka lo pe ding,› tiah ka ti. Cule anih in, ‹Ka sabit hmuan ka lo pe lo ding,› i ti,» tiah a sâng.

7 Cutikah a nupi Jezebel in a hnenah, «Atu nang cu Israel lalram tlunih thuneitu na si lo maw? Tho aw, rawl ei awla na thinlung cu nuam zetin um seh, Jezreel-mi Naboth-ih sabit hmuan cu ka lo pe ding,» tiah a ti.

8 Jezebel cun Ahab hmin in ca a ngan ih, a tacik in a khĕn, cule capawl cu khaw sungih Naboth thawi a cêng mi upapawl le mizahumpawl hnenah a kuat. 9 A cakuatpawl sungah, «Rawlulh thu phuang uhla, Naboth cu mipi lakah upatnak ropi thawn toter uh. 10 Cule, ‹Pathian le siangpahrang na thangsiat a si,› tiih thutheihpitu dingah mihlothlau pahnih a hmaiah toter uh. Cun amah cu lasuak uhla dengthat uh,» tiah a ngan.

11 Cutin a khaw mipapawl, a khaw luahtu upapawl le mizahumpawl cun an hnenih Jezebel ih a kuat mi, cakuatpawl sungih ngan mi vekin an tuah. 12 Rawlulh thu an phuang ih, Naboth cu mipi lakah upatnak ropi thawn an toter. 13 Cule mihlothlau mi pahnih an ra ih a hmaiah an to, cuih pa pahnih cun amah dokalhin thu an theihter, Naboth an dokalh ih, mipi hmaiah, «Naboth in Pathian le siangpahrang a thangsiat a si!» tiah an ti. Cun amah cu khawpi lengah an hruai ih lungto in an deng, cule a thi. 14 Cun Jezebel hnenah, «Naboth cu dēn a si ih a thi zo,» tiah mi an thlah.

15 Cule hitin a si, Naboth cu dēn a si ih a thi zo ti Jezebel in a theih tikah, Jezebel in Ahab hnenah, «Tho aw, Jezreel-mi Naboth-ih sabit hmuan, paisa ih a lo leiter sian lo mi kha va nei thlang aw, ziangahtile anih cu a nung nawn lo, a thi zo,» tiah a ti. 16 Cule hitin a si, Naboth a thi zo ti Ahab in a theih tikah, Ahab cu a tho ih Jezreel-mi Naboth-ih sabit hmuan nei dingin a feh.

Elijah in Ahab le Jezebel hnenah Thucah a Phuang

17 Cun Tishbi-mi Elijah hnenah Jehovah kamsuakthu a thleng ih, 18 «Tho aw, Samaria ih um mi Israel siangpahrang Ahab táwng dingin feh aw. Ngai hnik, amah cu Naboth-ih sabit hmuan ah a um, cumi va nei dingin a suk. 19 A hnenah, ‹Jehovah in hitin a ti, «Na that ih, na neihsak fawn a si lo maw?» tiin,› na ti pei, cule a hnenah, ‹Jehovah in hitin a ti, «Uicopawl in Naboth thisen an liahnak hmun ah, na thisen, nangmai ta rori cu uicopawl in an liak ding a si,» tiin,› tiah na ti pei,» tiah a ti.

20 Cule Ahab in Elijah hnenah, «I táwngngah riai maw, Maw ka ral pa?» tiah a ti.

Cule anih in, «Ka lo táwngngah riaiaw, ziangruangahtile nang cun Jehovah mithmuhih thil ṭhalo tuah dingah nangmah le nangmah na rak zuaraw, 21 ‹Ngai hnik, na parah thil ṭhalo ka thlĕn ding. Na cithlah ka lahlo ding ih, Ahab ihsin ṭemṭawn mi mipa siseh, miluat siseh, Israel ram ah ka sâtcat ding,› tiah a ti. 22 Nang in ka thin i hengter ih Israel na sualter ruangah, na inn cu Nebat fapa Jeroboam-ih inn vekin le Ahijah fapa Baasha-ih inn vekin ka tuah ding. 23 Cule Jezebel thuhla khalah Jehovah in, ‹Jezreel khawkulh kiangah uicopawl in Jezebel an ei ding,› tiah a ti. 24 Zokhal Ahab-ih sungkhat, khaw sungih thi cu uicopawl in an ei ding ih, zokhal ramlak ih thi van ih vâtepawl in an ei ding,» tiah a ti.

25 Asinan Jehovah mithmuhah sualralnak tuah dingin, Ahab vekih mah le mah zuaraw mi zohman an um lo, ziangruangahtile a nupi Jezebel in amah cu a căwktho. 26 Cule anih cun Jehovah in Israel tefapawl hmaiih a hnawhsuak mi Amor-mipawlih thil ti mi hmuahhmuah vekin, milempawl thlunin fihnungza zetin a nung.

27 Cule hitin a si, Ahab in cuih ṭawngkampawl a theih tikah, a hnipuan a thlek ih a takpum ah buri a sĭn, cule rawl a ul ih buri-puan sungah a zau, cule ralring zetin a feh. 28 Cule Tishbi-mi Elijah hnenah Jehovah kamsuakthu a thleng ih, 29 «Ka hmaiih Ahab a tăngdawrawkterzia hi zoh hnik! Anih cu ka hmaiih a tăngdawrawkter ruangah amai san sungah cun thil ṭhalo ka thlĕn lo ding. A fapaih san sungah a sungkua parah thil ṭhalo ka thlĕn ding,» tiah a ti.

22

Mikaiah in Ahab Ralrinnak a Pe

1 Siria le Israel karlakah ral um loin kum thum a liam. 2 Cule hitin a si, a kum thumnak ah Judah siangpahrang Jehoshafat cu Israel siangpahrang leng dingin a suk. 3 Cule Israel siangpahrang in a siahhlawhpawl hnenah, «Ramoth Gilead khua hi kanmai ta a si ti cingin, Siria siangpahrang kut ihsin cumi lâk ding cu kan ṭhukṭhun ti nan thei maw?» tiah a ti. 4 Cun anih in Jehoshafat hnenah, «Ramoth Gilead khua do dingin ka zawngah na feh pei maw?» tiah a ti.

Jehoshafat in Israel siangpahrang hnenah, «Keimah cu nangmah tluk ka si, ka mipawl cu na mipawl tluk an si, ka rángpawl cu na rángpawl tluk an si,» tiah a ti. 5 Cuihtlunah Jehoshafat in Israel siangpahrang hnenah, «Zangfahten, tuihsun ah Jehovah kamsuakthu sut aw,» tiah a ti.

6 Cun Israel siangpahrang in profetpawl a kokhawm hai ih, mipa 400 hrawng an si, cule an hnenah, «Ramoth Gilead do dingin ka feh pei maw, ka sīp ding saw?» tiah a ti.

Cule annih in, «Fehso uh, ziangahtile Bawipa in siangpahrang kut ah annih cu a pe ding,» tiah an ti.

7 Cule Jehoshafat in, «Amah kan suh dingah hi tawkah Jehovah-ih profet a um lai lo maw?» tiah a ti.

8 Israel siangpahrang in Jehoshafat hnenah, «Jehovah kan suh theinak ding mi pakhat cu a um lai, Imlah fapa Mikaiah a si, asinan anih cu ka hua, ziangruangahtile ka thuhla ah a ṭha lam a phuang dah lo, a se lam lawnglawng a phuang ṭheu,» tiah a ti.

Cule Jehoshafat in, «Siangpahrang in cuvek thilpawl sim hlah seh!» tiah a ti.

9 Cutikah Israel siangpahrang in bawi pakhat a ko ih, «Zamrangten Imlah fapa Mikaiah ko aw!» tiah a ti.

10 Israel siangpahrang le Judah siangpahrang Jehoshafat cu an kâwrfual hruhin anmai laltokham par veve ah an to, Samaria kăwtsuah ih hruihhmun ah; cule profetpawl hmuahhmuah in an hmaiah thu an phuang. 11 Cule Kenaanah fapa Zedekiah in amai hrangah thir kipawl a tuah, cule anih in, «Jehovah in hitin a ti, ‹Hipawl thawn Siria-mipawl hlohralter thluh an si tiang nan khît ding,› tiin,» tiah a ti. 12 Cule cuvekin profetpawl hmuahhmuah in an phuang, «Ramoth Gilead ah so uhla hlawhtling uh, ziangahtile Jehovah in siangpahrang kut ah cumi cu a pe ding,» tiah an ti.

13 Cun Mikaiah ko dingih a fehtu palai in a hnenah, «Atu ah ngai hnik, profetpawlih ṭawngkampawl cun lungrualin siangpahrang tha an pe. Zangfahten na ṭawngkam cu an lakih mi pakhat ṭawngkam vek si sehla, thapeknak va ṭawng aw maw,» tiah a sim.

14 Cule Mikaiah in, «Jehovah a nun rori bangin, Jehovah in ka hnenih a sim mi pauhpauh ka ṭawng ding,» tiah a ti.

15 Cun siangpahrang hnen a thleng ih, siangpahrang in a hnenah, «Mikaiah, Ramoth Gilead do dingah kan feh pei maw, kan hnûkdawkaw ding?» tiah a ti.

Cule Mikaiah in, «Feh awla hmuingil aw, ziangahtile cumi cu Jehovah in siangpahrang kut ah a ap ding!» tiah a ti.

16 Cule siangpahrang in a hnenah, «Thutak siarlo ka hnenah Jehovah hmin ih sim lo dingin vei ziang zat meng so sia ka lo sămter ding?» tiah a ti.

17 Cun Mikaiah in, «Israel zaten khāltu nei lo tuu bangin tlang parah ṭekdarhin ka hmu. Cule Jehovah in, ‹Hipawl in hotu an nei lo. Mi kip mai inn cio ah hnangamten tlungkir hai seh,› a ti,» tiah a ti.

18 Cule Israel siangpahrang in Jehoshafat hnenah, «Anih in a se lam ti lo cu ka thu ah a ṭha lam a phuang dah lo ti ka lo sim a si lo maw?» tiah a ti.

19 Cun Mikaiah in, «Curuangah Jehovah kamsuakthu ngai aw, Jehovah cu a laltokham ih to-in, a vawrh lam le a keh lamah van ralkap rual zaten dingin ka hmu. 20 Cule Jehovah in, ‹Ahab hi Ramoth Gilead ih a tluk theinak dingah zo in hung so dingin amah cu a lēm pei?› tiah a ti. Cule pakhat in hitin a sim ih, a dang pakhat in khatin a sim. 21 Cun thlarau pakhat hmaiah a ra suak ih, Jehovah hmaiah a ding, ‹Keimah in amah ka lēm ding,› tiah a ti. 22 Jehovah in a hnenah, ‹Ziangti zawngin?› tiah a ti. Anih in, ‹Ka fehsuak ding ih, a profetpawl hmuahhmuah ih kâ ah thuphan per thlarau ka si ding,› tiah a ti. Cule Jehovah in, ‹Amah cu na lēm pei ih na neh fawn ding, fehsuak awla cuticun tuah aw,› tiah a ti. 23 Curuangah zoh hnik! Hi profetpawl hmuahhmuah ih kâ ah Jehovah in thuphan per thlarau a ret ih, nangmah dokalhin Jehovah in thil ṭhalo a thăn zo,» tiah a ti.

24 Cule Kenaanah fapa Zedekiah cun a va naih ih Mikaiah-ih biang ah a bēng ih, «Jehovah Thlarau cu ka hnen ihsin na hnenih thusim dingah khui zin ah saw a feh?» tiah a ti.

25 Cule Mikaiah in, «Ngai hnik, relh dingin pindan sungta ih na feh ni ah na hmu ding!» tiah a ti.

26 Cun Israel siangpahrang in, «Mikaiah hruai uhla, khawpi uktu Amon hnen le siangpahrang fapa Joash hnenah kirter uh. 27 Cule, ‹Siangpahrang in hitin a ti, «Hi pa hi thawng ah khum uhla, daihnak thawi ka thlen hlanlo, amah cu khăwpkham lo rawl le khăwpkham lo tidai thawn rak câwm uh,» tiin,› a ti,» tiah a ti.

28 Asinan Mikaiah cun, «Hnangamten na ra tlungkir asile, Jehovah in keimah hmangin thu a sim lo a si ding,» tiah a ti. Cule anih in, «Nannih mipi hmuahhmuah tla, fimkhur uh,» tiah a ti.

Doawknak ah Ahab a Thi

29 Cule Ramoth Gilead ah Israel siangpahrang le Judah siangpahrang Jehoshafat cu an hung so. 30 Israel siangpahrang in Jehoshafat hnenah, «Ka danglamawter ding ih doawknak ah ka feh ding, asinan nang cun na kâwrfual hruh aw,» tiah a ti. Cutin Israel siangpahrang cu a danglamawter ih, doawknak ah a feh.

31 Cule Siria siangpahrang in a ránglêng ralbawi 32 pawl cu thu a pe ih, «Israel siangpahrang siarlo, a tûm siseh, a fate siseh do hlah uh,» tiah a ti. 32 Cule hitin a si, ránglêng ralbawipawl in Jehoshafat an hmuh tikah, «Himi hi Israel siangpahrang a si rori!» tiah an ti. Curuangah amah do dingin sir an her, cule Jehoshafat cu a ausuak. 33 Cule hitin a si, ránglêng bawipawl in cumi cu Israel siangpahrang a si lo ti an hmuh tikah, amah dawinak ihsin an kirsal. 34 Cun mi pakhat in hmuitin nei loin a thál a nawp ih, Israel siangpahrang cu a ralthuam pehawknakpawl karlakah a saingah. Cule siangpahrang in a ránglêng mâwngtu hnenah, «Her awla, doawknak ihsin i suahpi aw, ziangahtile tuahmawh ka si aw,» tiah a ti. 35 Cuih ni ah doawknak cu a sosang ih, siangpahrang cu Siria-mipawl hawihin amai ránglêng ah an dingter ih, zan lamah a thi. Thisen cu an tuahmawhnak ihsin ránglêng zial parah a luang thluahthlo. 36 Cun ni a tlak cuahco tikah, ralkappawl lakah, «Mi kip mai khua ah le mi kip mai ram ah!» tiin an au.

37 Cutin siangpahrang cu a thi ih Samaria ah phurh a si. Cule Samaria ah siangpahrang cu an phum. 38 Cun Samaria tili pakhat ah cuih ránglêng cu an khawlh, cuih hmun ah cun hlawhhlângpawl an khawlhaw; Jehovah in a rak sim mi a kamsuakthu bangtukin, uicopawl in a thisen cu an liak.

Ahab Uknak a Cem

39 Cun a tāng lai mi Ahab-ih căngvaihnakpawl le a tuah mi hmuahhmuah, vuiho inn a sak mi le khawpi a dĭn mi hmuahhmuah pawl cu, Israel siangpahrangpawlih sansiarnak cazual ah ngan an si lo maw? 40 Cutin Ahab cu a pupápawl hnenah a cawl. Cun a aiah a fapa Ahaziah a lal.

Judah Siangpahrang Jehoshafat

41 Israel siangpahrang Ahab a lal a kum litnak ah, Asa fapa Jehoshafat cu Judah tlunah siangpahrang ah a cang. 42 Jehoshafat siangpahrang a can tikah kum 35 a si ih, Jerusalem ah kum 25 sung a lal. A nuih hmin cu Azulah, Shilhi fanu a si. 43 Cule anih cun a pa Asa-ih lamzin hmuahhmuah a zawh. Cupawl ihsin a rak pial lo, Jehovah mithmuhah a dik mi a tuah. Sikhalsehla hmun sângpawl cu lakhlo an si lo, ziangahtile mipi in hmun sângpawl ah raithawinak an hlan ih rimhmui an ur. 44 Cuihtlunah Jehoshafat in Israel siangpahrang thawn remnak a tuah.

45 Cule a tāng lai mi Jehoshafat-ih căngvaihnakpawl, a lăngter mi cahnak, ral a dodān pawl cu, Judah siangpahrangpawlih sansiarnak cazual ah ngan an si lo maw?

46 Cule a pa Asa dam laiih amipa hlawhhlâng a tāng mipawl kha, a ram ihsin a hnawtsuak hai. 47 Cun Edom ah siangpahrang a rak um lo, siangpahrang aiawhtu lawng a um.

22:46a mipa hlawhhlâng: Biaknaksakhua thawi pehtlai mi hlawhhlâng a si. An biaknaksakhua temple ah an um ṭheu.

48 Jehoshafat in Ofir ih sui phur ding Tarshish lăwngpawl a tuah, asinan an feh dah lo, ziangahtile lăwngpawl cu Ezion Geber hmun ah an siat. 49 Cun Ahab fapa Ahaziah in Jehoshafat hnenah, «Lăwngpawl sungah ka siahhlawhpawl hi na siahhlawhpawl zawngah feh hai seh,» tiah a ti. Asinan Jehoshafat cun a siang lo.

50 Cule Jehoshafat cu a pupápawl hnenah a itthat ih, a pa David-ih Khawpi ah a pupápawl hnenih phum a si. Cun a aiah a fapa Jehoram in a uk.

Judah Siangpahrang Ahaziah

51 Judah siangpahrang Jehoshafat a lal a kum 17-nak ah, Ahab fapa Ahaziah cu Samaria ah Israel tlunah siangpahrang ah a cang, cule Israel tlunah kum hnih a lal. 52 Jehovah mithmuhah thil ṭhalo a tuah ih, a paih lamzin, a nuih lamzin le Israel sualtertu Nabat fapa Jeroboam lamzin a zawh. 53 Ziangahtile anih cun Baal a rian ih a bia, cule a pa ih rak tuah mi hmuahhmuah vekin, Israel-ih Pathian Jehovah thinhengter dingin a căwktho.