About Bible Thianghlim | ©

BibleThianghlim – 1 KORINTH

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 KORINTH

12345678910
111213141516

• A ngantu: Paul
• A siartu: Korinth Kawhhran
• Ngan kum: A.D. 55

Korinth khua hi Grik ram sung, Akaia ramṭhen ih khawpi thupibik a si. Lăwng cawlhnak hmun pahnih a nei ih, pursumleilawnnak hmunpi a si. Kum tin an tuah mi lehnak khalin mi tampi a hip. Cutawk ih a ratupawl in anmai nunphung le biaknaksakhua an rak luhpi. Cutin hmun kip ah milem biaknak le sualralnak a rak um.

Hih khawpi ah apostol Paul a rak thlen hmaisabik cān hi a missionary khualtlawn a vei hnihnak ah a si. Paul in hi khua ah Jew le Grik-mipawl hnenah Sabbath ni tinten thuthangṭha sim a thăwk (Apo 18:1-18). Jew-pawl in a rawngbawlnak an hnawn tikah, Zentelpawl lamah a her. Hi khawpi ah kum khat le a hrek a um. A hmaisa lamah cun puanthlam tahin amah te cawmawih rawngbawlin, Bawipa hnenah mi tampi a hruai. Hi khawpi a fehsan hnuah, Apollos in thuthangṭha hnaṭuan a run pehzăwm (Apo 18:27-19:1).

Korinth zumtupawl cu Bawipa in sualralnak lak ihsin a runsuak hai. Sikhalsehla rundamnak an co hnuah mi hrekkhat in an sualnak lamzin hlun an bansan lo. Paul in cuih thu a theih tikah, misualrálpawl lak ihsin thiarfihlimaw dingin zumtupawl hnenih thu a peknak ca a kuat (1Kor 5:9). Paul cun a missionary khualtlawn a vei thumnak, Efesa khua ih rawng a bawl laiah, Korinth kawhhran ah ṭhenawknak a um thu a thei (1:11). Korinth khawmipawlih thusuhnak a phunphun ca a rak dawng (7:1, 25; 8:1; 12:1; 16:1 siar aw). Cuvek dinhmun ruangah Efesa khua ihsin A.D. 55 hrawngah Korinth cakuat pakhatnak hi a ngan (16:8, 19 siar aw).

Korinth kawhhran hnenih cakuat ah thupi tam zet a ngan. Asinan Korinth khawmipawl in tisanak lăngter hnakin Bible vekih pitlinnak lăngter cu hi cakuatih a tumbik mi a si. Hruaitupawl thu (bung 1-4), zumtu dangpawl thawi pehtlaihawknak thu (bung 5-6), taksaruangpum hmanawkdān thu (bung 6), nupi le pasal thu (bung 7), Khristian zalĕnnak hmandān thu (bung 8-10), biakkhawmnak thu (bung 11), thlarau thilpekpawl hmandān thu (bung 12-14), thawhsalnak thu (bung 15) le peknak thu (bung 16) ah Bible vekih pitlinak an neih tengteng a ṭul thu a ngan.

Sualralnak leitlun ih um mi kan si bangin kannih zumtupawl hin, «lungthin bangrep le thutluknak bangrepin nan pehzăwmawk famkim thluh theinak ding,» ti mi hi kan zuam a ṭul (1:10). «Khrih-ih thinlung» neitu kan sinak kan lăngter a ṭul (2:16).

1

Cibaibûknak

1 Jesu Khrih-ih apostol si dingah, Pathian duhzawngih kawh mi Paul le kan unaupa Sosthenes in,

2 Korinth khua ih um Pathian kawhhran, Khrih Jesu ih tithianghlim mi, kan Bawipa, anmah le kanmah ih Bawipa Jesu Khrih hmin hmun kip ih a kotu, mithiang si dingih a kawh mipawl hmuahhmuah hnenah:

3 Kan Pa Pathian hnen le kan Bawipa Jesu Khrih hnen ihsin zangfahnak le hnangamdaihnak cu nan hnenah um hram seh.

Pathian hnenih Lungawi Thu Simnak

4 Khrih Jesu ah nan hnenih Pathian zangfahnak pek mi ruangah nan hrangah Pathian hnenah lungawi thu ka sim ringring. 5 Ziangahtile nannih cu ziang tinkim ah nan ṭawng mi hmuahhmuah ah le nan theihnak hmuahhmuah ah Pathian in a lo lianter a si. 6 Cumi cu Khrih thutheihpinak nanmah ih hngehterih a um vek khan a si. 7 Cutin kan Bawipa Jesu Khrih rung lăng ding hngakhlap zetih nan hngah laiah, thilpek pakhat te hman nan tlasam lo. 8 Anih cun kan Bawipa Jesu Khrih-ih ni ah sawihnăwm kâi lo nan si theinak dingah, a cemnet tiang a lo hngetter ding. 9 A Fapa, Jesu Khrih kan Bawipa thawi pawlkawmawknak sungih a lo kotu Pathian cu a rinum a si.

Ṭhenṭhekawknak Thu

10 U le nau tla, nan zaten nan ṭawng mi bangrepin, nan lakah ṭhenawknak um loin, lungthin bangrep le thutluknak bangrepin nan pehzăwmawk famkim thluh theinak dingah, kan Bawipa Jesu Khrih hmin in ka lo ngen a si. 11 Ziangahtile u le nau tla, nan lakah tawhawknak a um ti kha Kaloe teih sungkua lakih mi hrekkhat in in sim. 12 Hihi ka lo sim a si, mi kip in, «Kei cu Paul-ih pawl ka si;» «Kei cu Apollos-ih pawl ka si;» «Kei cu Kefas-ih pawl ka si;» «Kei cu Khrih-ih pawl ka si,» tiah nan ti. 13 Khrih cu ṭhenin a um maw si? Paul cu nan hrangah khĕnbet a si maw? Asilole nannih cu Paul-ih hmin in baptisma nan co maw si?

14 Nan lakah Khrispas le Kaias siarlo zohman baptisma ka lo pek lo ruangah, Pathian hnenah ka lung a awi. 15 Curuangah zohman in Paul in amai hmin in baptisma a pe tiah an ti thei lo. 16 A si, Stefanas teih sungkua khal baptisma ka rak pe hai. Cu lo mi dang baptisma ka pek mi ka thei lo. 17 Ziangahtile Khrih in kei cu baptisma pe dingah i thlah lo ih, thuthangṭha phuang dingah i thlah sawn a si. Asinan minung fimnak ṭawngkampawl thawn a si lo, cuti a si lo ahcun, Khrih-ih khraws cu zianghmanlo ih canter a si pang ding.

Khrih cu Pathian Huham le Fimnak

18 Ziangahtile khraws thucah cu a hlorál rero mipawl hrangah cun atthlak a si, asinan kannih rundam rero mipawl hrangah cun cumi cu Pathian huham a si. 19 Ziangahtile,

«Mifimpawlih fimnak cu ka ṭhiatbăl ding ih,
Thutheithiampawlih theihthiamnak cu zianghmanlo ah ka cangter ding,»

tiih ngan a si.

20 Khuitawkah mifim cu a um? Dānthiam cu khuiah a um? Tuih san mieltu cu khuiah so? Hi leitlun fimnak cu Pathian in atnak ah a canter a si lo maw? 21 Ziangahtile Pathian fimnak ah leitlun mipawl in anmai fimnak in Pathian an rak theih lo hnuah, thusim atthlak hmangih a zumtupawl rundam cu Pathian lunghmui zawng a si. 22 Ziangahtile Jew-pawl cun hminsinnak an phût ih, Grikpawl cun fimnak an hawl. 23 Asinan kannih cun Khrih khĕnbet thu kan sim a si. Cucu Jew-pawl hrangah tlûknak a si ih, Grikpawl hrangah cun atthlak a si. 24 Asinan kawh mi Jew-pawl le Grikpawl hrangih kan phuan mi cu Khrih a si, cuih kan phuan mi cu Pathian huham le Pathian fimnak a si. 25 Ziangruangahtile Pathian atnak cu minung fimnak hnakin a fimsawn ih, Pathian-ih cahlonak cu minung cahnak hnakin a caksawn.

Bawipa hnen lawngih Tluangkhawn

26 Ziangahtile u le nau tla, Pathian in a lo kawh laiah khan ziang vek mi nan si ti kha cîng ringring uh. Milai tahnak ih mifim nan tam lo, thiltithei nan tam lo, zahtlak khal nan tam lo. 27 Asinan mifimpawl ningzakter dingah Pathian in leitlun ih thil â-pawl a hril ih, micakpawl ningzakter dingah Pathian in leitlun ih thil caklopawl a hril. 28 Thil um mipawl zianghmanlo ih an can theinak dingah, leitlun ih thil pawimawh lo pawl, nautat mi thilpawl le thil um lo pawl Pathian in a hril a si. 29 Curuangah Pathian hmaiah zohman an tluangkhâwng thei lo. 30 Amah Pathian ruangah nannih cu Khrih Jesu ah nan um. Khrih cu Pathian hnen ihsin kan hrangah fimnak, dingfelnak, thianhlimnak le tlennak ih tuah a si. 31 Curuangah,

«Tluang a khawngtu cun Bawipa ah tluangkhâwng seh,»

tiih ngan mi vek khan a si.

2

Khrih Khĕnbet Thu

1 Cule u le nau tla, nan hnenah Pathian thu phuang dingih ka rat laiah khan, ṭawngkam thiam zet le fimnak thawn ka ra lo. 2 Ziangahtile nan lakah Jesu Khrih le khĕnbet ih a um thu siarlo, a dang zianghman thei lo dingin thutluknak ka nei. 3 Nan hnenih ka um laiah khan cak lo, ṭih le nasazetih khūrin ka um. 4 Cule ka ṭawng mi le ka phuan mipawl hi mihip thei minung fimnak ṭawngkam thawn a si lo, cuhnakin ka ṭawngkampawl cun Thlarau le huham an langter sawn a si. 5 Cuticun nan zumnak cu minung fimnak ah ding loin, Pathian huham ih a din sawn theinak dingah a si.

Thuthangṭha cu Van lam Fimnak

6 Asinan mipitlingpawl lakah cun fimnak thu kan sim, asinan cuih fimnak cu tuih san fimnak a si cuang lo ih, a hlorál ding mi tuih san uktupawl hnen ihsi khalin a si fawn lo. 7 Cuhnakin Pathian fimnak cu thuthup hmangin kan sim sawn a si. Cumi cu, leilung sēm hlan ihsin kan ropitnak ding hrangih, Pathian ih a ruat cia mi le a thuh mi fimnak a si. 8 Cumi cu tuih san uktu pakhat hman in an thei lo; ziangahtile rak thei hai sehla cu, ropitnak Lal cu an khengbĕt lo ding.

9 Asinan,

«Pathian in amah duhdawtupawl hrangih a rak timtuah cia mi thilpawl cu
Zawih mit khal in a hmu dah lo ih,
Zawih hna khal in a thei dah lo.
Zohman in an thinlung sungin an ruat dah lo,»

tiih ngan vek khan a si.

10 Asinan Pathian in kan hnenah cumi cu a Thlarau in a phuanglang zo. Ziangahtile Thlarau cun thil hmuahhmuah a hawlsuak, a si, Pathian-ih thil thûkpawl cu. 11 Ziangahtile amai sungih a um mi a thlarau siarlo in, minung ruahnak cu zo in so thei? Cutivek thothoin Pathian Thlarau siarlo zohman in Pathian ruahnak an thei lo. 12 Kan hnenah Pathian in alakih in pek mi thilpawl kan theih theinak dingah, leitlun thlarau si loin, Pathian hnen ihsin a ra mi Thlarau kan co sawn a si.

13 Cule cuih thilpawl kan sim tikah, minung ih in zirh mi fimnak ṭawngkampawl thawn kan sim lo, Thlarau Thianghlim ih in zirh mi ṭawngkam hmangin kan sim sawn a si. Thlarau lam thilpawl cu thlarau lam thilpawl hmangin kan khaikhin. 14 Khawvel mi cun Pathian Thlarau thilpawl a cohlang lo, ziangahtile cupawl cu a hrangah cun atthlak an si ih, cuih thilpawl cu thlarau lawngin a thleidăn thei ruangah a theih khal a thei thei lo. 15 Asinan thlarau mi cun thil ziangkim a ṭhenfel thiam, amah tu cu zohman in an ṭhenfel thiam lo. 16 Ziangahtile, «Amah zirh thei dingin zo in so Bawipaih lungthin thei?» Asinan kannih cun Khrih-ih lungthin kan nei a si.

3

Ṭhenṭhekawknak cu Tisa a Si

1 Cule u le nau tla, thlarau mipawl hnenih sim vekin nan hnenah thu ka sim thei lo. Nan hnenah cun tisa mi le Khrih ih nausenpawl hnenih sim vekin thu ka lo sim sawn a si. 2 Rawl hak si loin hnawiti in ka rak lo câwm hai; ziangahtile atu tiangah rawl hak nan dawngsáwng thei hrih lo ih, atu hmanah nan dawngsáwng thei hrih cuang lo, 3 ziangahtile nannih cu tisa mi nan si hrih lai a si. Ziangahtile iksiknak, doawknak le ṭhenawknak cu nan lakah a um, cuti a si ruangah nannih cu tisa mi nan si lo maw? Khawvel mipawl vekin nan nung a si lo maw? 4 Ziangahtile mi pakhat in, «Kei cu Paul-ih pawl ka si,» a ti ih, a dang pakhat in, «Kei cu Apollos-ih pawl ka si,» nan ti ih, nannih cu tisa mi nan si lo maw?

5 Paul cu zo a si? Apollos cu zo a si? Kannih cu Bawipa ih in pek fingfing dān vekin, nanmah zumnak ih a lo hruaitu rawngbawltu men lawng kan si. 6 Kei in ka phun ih, Apollos in ti a tawih. Asinan a ṭhangtertu cu Pathian a si. 7 Curuangah a phuntu le ti tawihtu cu an thupi lo, a ṭhangtertu Pathian lawng hi a thupi a si. 8 A phuntu le ti a tawihtu cu pumkhat an si ih, mi kip in an hnaṭuan mi vekin lawmman an ngah fingfing ding.

9 Ziangahtile kannih cu Pathian-ih hnaṭuanpi kan si; nannih cu Pathian-ih ló nan si, Pathian-ih inn khal nan si. 10 Ka hnenih pek mi Pathian zangfahnak bangtukin, innsakthiam mifim bangin kei in lungphum ka phum ih, mi dang in cumi parah an sak. Asinan mi kip in cumi parah ziangtin an sak ti kha fimkhur hai seh. 11 Ziangahtile zohman in phum zo mi lungphum siarlo, a dang lungphum an phum thei lo, cuih lungphum cu Jesu Khrih a si. 12 Cuih lungphum parah zokhal in sui in simaw, ngun in simaw, lung mankhung in simaw, zanthing in simaw, hrampi in simaw, fângkuang in simaw a sak asile, 13 mi kip hnaṭuan cu fiangten lăngter an si leh ding; ziangahtile cuih Ni in cumi cu a thăn ding. Ziangruangahtile cumi cu meisa in a pholang ding. Cule meisa in mi kip hnaṭuan cu ziang vek a si ti a hniksak ding. 14 Zokhal a hnaṭuan, cuih lungphum parih a sak mi a tān asile, lawmman a ngah ding. 15 Zokhal a hnaṭuan mi a kăng asile, a hloh ding, asinan amah cu meisa sung ihsi luat vekin rundam a si ding.

16 Nannih cu Pathian temple nan si ih, nan sungah Pathian Thlarau a cêng ti nan thei lo maw? 17 Zokhal Pathian temple a siatsuahtu cu, Pathian in a siatsuah ve ding. Ziangahtile Pathian temple cu a thianghlim a si, cuih temple cu nanmah hi nan si.

18 Zokhal amah le amah bum aw hlah seh. Nan lakih mi pakhat khat in tuih san ah mifim ih a ruahawk asile, mifim a si theinak dingah mi-â ah cang ta seh. 19 Ziangahtile hi leitlun fimnak cu Pathian hmaiah cun atthlak a si. Ziangahtile,

«Pathian in mifimpawl cu anmai hrăwkhrawlnak in a awk hai,»

20 cuihtlunah,

«Mifimpawlih ruahnak cu zianghmanlo men an si ti Bawipa in a thei,»

tiih ngan a si.

21 Curuangah zohman in milai ah tluangkhâwng hlah seh. Ziangahtile thil hmuahhmuah hi nan ta a si: 22 Paul siseh, Apollos siseh, Kefas siseh, leitlun siseh, nunnak le thihnak siseh, atu ih a um mi thilpawl le a ra lai ding mi thilpawl siseh, thil hmuahhmuah hi nan ta a si. 23 Cule nannih cu Khrih ta nan si ih, Khrih cu Pathian ta a si.

4

Apostolpawlih Rawngbawlnak

1 Kannih cu Khrih sál le Pathian thuthup kiltu ah mi in in ruat hai seh. 2 Cuihtlunah sumkiltu cu mirinum a si a ṭul. 3 Nanmah in simaw, milai thuṭhennak in simaw thu in ṭhen asile, cucu ka hrangah thil tenau zet a si. Thungaiten, keimah le keimah hman thu ka ṭhenaw lo. 4 Ziangahtile keimah le keimah zianghman mawhthlukawknak ka nei lo, asinan cumi cun thiam i coter cuang lo, thu i ṭhentu cu Bawipa a si sawn. 5 Curuangah Bawipa a rat hlanlo, a tikcu a kim hlanah zianghman thuṭhen hlah uh. Anih cun thim lakih thuh mi thilpawl kha tleu ah a lasuak ding ih, thinlung ih tumtah mipawl khal a langter ding. Cun mi kip in Pathian ih lăwm an co ding.

6 U le nau tla, an ngan mi lan ih nan ruahlonak dingah kanmah ih nan zir ding mi, hi thilpawl cu nan ṭhatnak dingah, keimah le Apollos ah ka bĕn a si, cutin nan lakah zohman in pakhat hril tahratin a dang pakhat dokalhin nan puarthaulonak dingah a si. 7 Ziangahtile zo in so mi dang hnakih danglam deuh dingin a lo tuah? Na dăwn lo mi thil na neih mi ziang a um? Na dăwn asile, dáwng lo vekin ziangahso tluang na khawn?

8 Nannih cu nan khăwpkham zo! Nannih cu nan lian zo! Kanmah tel loin siangpahrang vekin nan uk. Kannih khal nanmah thawn kan uk theinak dingah, nannih hin uk uhla ka va duh tak em! 9 Ziangahtile thah dingih ruat cia mi vekin kannih apostolpawl hi Pathian in a netabikah in ret tiah ka ruat; ziangahtile kannih cu leilung tlun le vancungmipawl le milaipawl zohnuamih tuah mi kan si. 10 Kannih cu Khrih ruangah mi-â kan si, nannih bélte Khrih ah mifim nan si. Kannih cu kan cak lo, nannih bélte nan cak. Nannih cu upat nan si, kannih bélte nautat kan si. 11 Atu cān tiang rori rilrâwng le tihâlin kan um, hnipuan ṭet hnianghniten kan um, mi in an kuttum in in thăwng, inn khal kan nei lo. 12 Cule kan kut in hnaṭuan har zet ṭuanin kan um. In zăwkzet tikah, thlawsuah kan pe; in tiduhdah tikah, kan tuar cuahco. 13 In thangsiat tikah, ṭawngkam thlumte thawn kan sawn. Kannih cu leitlun hnawmhne vekah le thil hmuahhmuah ih bawrhhlawh vekah tuihni tiangin kan cang.

Paul in Pa vekih mi a Kilkhawinak

14 Hih thilpawl hi nan ningzahnak dingah ka ngan lo, ka duhdawt zet mi ka falepawl vekin ralrinnak ka lo pe sawn a si. 15 Ziangahtile Khrih ah zirhtu mi 10000 nei khal uhla, pa cu tampi nan nei lo. Ziangahtile Khrih Jesu ah thuthangṭha hmangih ka hrin mi nan si. 16 Curuangah keimah i cawng dingin ka lo ngen hai a si. 17 Cumi ruangah Timothy cu nan hnenah ka rak thlah, amah cu Bawipa ah mirinum le ka duhdawt zet mi ka fapa a si. Amah in Khrih ih ka nundānpawl cu a lo mangtersal ding. Cuih ka nundān cu hmun kip ih kawhhran kip ka zirh vek khan a si.

18 Nan hnenah keimah ra lo dingah nan ruat ih, mi hrekkhat cu nan puarthau. 19 Asinan Bawipa in rem a ti asile, nan hnenah ka ra cing ding, cule mipuarthaupawlih ṭawngkam si loin an huham cu ka thei ding. 20 Ziangahtile Pathian uknak cu ṭawngkam ah a um lo ih, huham sawnah a um a si. 21 Ziang si maw nan duh? Nan hnenah fungfek thawn ka ra ding maw? Asilole duhdawtnak le nunnemnak thinlung thawn so ka rat ding?

5

Kawhhran sungih Nunau-Mipa Sualnak

1 Nan lakah nunau-mipa sualnak a um tiah hmun tampi ah mi in an rel. Cuih nunau-mipa sualnak cu Zentelpawl lak hmanah a um dah lo, mi pakhat in a paih nupi a laksak. 2 Cule nanmah cu nan duhaw lai hrih. Cuvek a tuahtu cu nan lak ihsin lakhlo a si theinak dingah riahse ding sawn nan si. 3 Ziangahtile thungaiten, kei cu nan hnenah taksapum in ka um lo nân, thlarau in ka um. Nan hnenih um vekin cuvek a tuahtupa cu thu ka ṭhensak zo. 4 Kan Bawipa Jesu Khrih hmin ih hmunkhatih nan umkhawm tikah, ka thlarau cu nan hnenah a um, kan Bawipa Jesu Khrih-ih huham khal a um ve. 5 Cu pa cu Bawi Jesu-ih Ni ah a thlarau rundam a si theinak dingah, a taksa cu siatrál dingin Setan hnenah pe uh.

6 Nan uarawk hi a ṭha hrimhrim lo. Thilnu málte in sang hlawm zaten a thoter thluh ti nan thei lo maw? 7 Curuangah nannih cu thilnu rawi lo mi nan si vekin, sang hlawm thar nan si theinak dingah, thilnu hlun kha thaihlo uh. Ziangahtile kan Lanta Puai tuufa no a si mi Khrih cu kan hrangih hlăn a si zo. 8 Curuangah thilnu hlun, mi dang parih lungput siava le sualralnak thawn si loin, thilnu rawi lo sang, diknak le taknak thawn puai tuah uhsi.

9 Nan hnenih ca ka lo kuat mi sungah nunau-mipa sualnak a tuahtupawl cu kawm hlah uh tiah ka rak ngan. 10 Cutiih ka ti tikah leitlun mi nunau-mipa sualnak a tuahtupawl, miduhhampawl, mi bumhmangpawl le milem bepawl kawm hlah uh ka tinak a si lo. Cuti si ta sehla leitlun nan suahsan a ṭul ding. 11 Asinan atu ah unaupa tiih nan kawh mi in nunau-mipa sualnak a tuah, a duhham, milem a bia, mizawkzet a hmang, zu a ri, mi a bum asile kawm hlah uh. Amah thawn rawl khal eitlang hrimhrim hlah uh tiah ca ka lo kuat zo.

12 Ziangahtile a leng lam mipawl thuṭhen dingah kei in ziang tuah ding so ka neih? Nannih cun kawhhran sung mipawl thu nan ṭhen ding a si lo maw? 13 Asinan a leng lam mipawl cu Pathian in thu a ṭhen hai a si. Curuangah cuih miṭha lopa cu nan lak ihsin dawisuak uh.

6

Cuzah Thuṭhennak ih Thlenawk Thu

1 Nan lakih pakhat in mi dang thawn thuhla a neih asile, mithiangpawl hnenah si loin, midingfel lo pawl hnenah cuih thu cu an rel dingah a thlĕn ngam ding maw? 2 Mithiangpawl in leitlun mipawlih thu an ṭhen leh ding ti nan thei lo maw? Nanmah in leitlun mipawl thu nan ṭhensak leh asile, thuhla fatepawl cu thu nan ṭhen thei a si lo maw? 3 Vancungmipawl hman an thu kan ṭhen leh ding ti nan thei lo maw si? Hi damsung nun thilpawl cu ziang tlukin so kan ṭhen sinsin ding? 4 Curuangah nannih in himi nun thuhla ah thuṭhen ding nan neih asile, kawhhran sungih mitenau ih ruah mipawl kha thuṭhentu dingah ruat uh! 5 Nan ning a zahnak dingah cucu ka ṭawng a si. Nan lakah mifim pakhat tal nan um lo maw si? Unau le unau lakih thubăwtcat theitu pakhat te tal nan um lo maw? 6 Unaupa in a unaupa kha cuzah thuṭhennak ah a fehpi sawn riangri ih, cucu zumlotupawlih hmaiah a si sapbai!

7 Curuangah atu ah nan lakah thilsual pakhat a um, ziangruangahtile pakhat le pakhat cuzah thuṭhennak ah nan feh. Ziangahso mi in nan parih thilsual an tuah nan sian men lo? Ziangahso nan thilri hloh cu nan tuar sawn men lo? 8 Cuti lamlam si loin, nannih cun thilsual nan tuah ih mi nan bum, cule cuih thilpawl cu nanmai unaupawl lala hnenah nan tuah. 9 Midingfel lo pawl in Pathian uknak cu ro ah an co lo ding ti nan thei lo maw si? Bumin um hlah uh, nunau-mipa sualnak a tuahtupawl, milem betupawl, uirepawl, mihurpawl, tawkahurpawl, 10 fifirpawl, miduhhampawl, zuripawl, ṭawng siakha hmangpawl le mi bumhmangpawl cun, Pathian uknak cu ro ah an co lo ding. 11 Cule nan lakih mi hrekkhat cu cuvek mi nan rak si dah. Asinan nannih cu Bawi Jesu hmin le kan Pathian Thlarau ih khawlh mi, thianhlimter mi le thiam coter mi nan si.

Nunau-Mipa Sualnak

12 Thil ziangkim hi ka hrangah tuah a thiang, asinan thil ziangkim hi ka hrangah hlawknak an si thluh kher lo. Thil ziangkim hi ka hrangah tuah a thiang, asinan ziang thuneihnak hnuai hmanah ka um lo ding. 13 Rawl cu pumpi hrangah a si ih, pumpi cu rawl hrangah a si, asinan Pathian in an pahnih in a siatrálter ding. Taksaruangpum cu nunau-mipa sualnak hrangah a si lo, Bawipa hrangah a si sawn, cule Bawipa cu taksaruangpum hrangah a si. 14 Pathian in Bawipa cu mithi lak ihsin a thoter ih, kannih khal a huham in in thoter leh ding. 15 Nan taksaruangpum cu Khrih-ih taksa pêng an si ti nan thei lo maw si? Khrih-ih taksa pêngpawl cu la tahratin hlawhhlâng taksa pêng ah ka tuah ding maw? Tuah lamlam hlah! 16 Asilole hlawhhlâng thawi a pehzăwmawtu cu amahnu thawn taksa pumkhat ah an cang ti nan thei lo maw? Ziangahtile Pathian in, «Pahnih cu taksa pumkhat ah an cang ding,» tiah a ti.

17 Asinan Bawipa a pehzăwmtu cu cuih Bawipa thawn thlarau pumkhat an si.

18 Nunau-mipa sualnak tlansan uh. Minung in a tuah mi a dang sualnak kip in taksaruangpum lengah a si, asinan nunau-mipa sualnak a tuahtu cu amai taksaruangpum ah a sual a si. 19 Asilole nan taksaruangpum cu Pathian hnen ihsi nan neih mi nan sungih um Thlarau Thianghlim-ih temple a si ti le nanmah cu nanmai ta nan si lo ti nan thei lo maw? 20 Ziangahtile nannih cu man ih lei mi nan si; curuangah Pathian-ih ta a si mi nan taksaruangpum le nan thlarau in Pathian sunlawih uh.

7

Nupa Umtudān Ding

1 Cun ka hnenih nan rak ngan mi thilpawl thawn pehparawin: mipa hrangah nunau dai lo a ṭha. 2 Sikhalsehla nunau-mipa sualnak hrial dingah mipa kip in nupi bul nei cio hai sehla, nunau kip in pasal bul nei cio hai seh. 3 Pasal in a nupi hnenah a co ding phu duatnak pe seh, cule cutivek thothoin nupi khal in a pasal hnenah tuah ve seh. 4 Nupi in amai taksaruangpum parah thuneihnak a nei lo, a pasal in a nei sawn. Cutivek thothoin pasal khal in amai taksaruangpum parah thuneihnak a nei lo ih, a nupi in a nei sawn a si. 5 Cān tawite sung rawlulhnak le thlacamnak ih nan pekawk theinak dingah tiih lungkimtlangnak nan neih ti dah lo ah cun, khat le khat nupa ihtlangnak kha êl aw hlah uh. Setan in sual a lo fawrhlonak dingah umtlangsal uh. Culole sūpawk theinak nan tlaksăm ruangah Setan in sual a lo fawrh pang ding. 6 Pathian in i sĕn ruangah hihi ka sim a si, Pathian-ih thupek cu a si lo. 7 Ziangah cutin ka ti tile, mipa hmuahhmuah hi keimah vekin um hai sehla ka duh. Asinan mi kip in anmai thilpek fingfing Pathian hnen ihsin an nei, pakhat in thilpek phun khat a nei ih, mi dang in phun dang a nei ve.

8 Asinan nupi-pasal nei lo pawl le nuhmeipawl hnenah ka sim a si: keimah vekih an um asile, a ṭha. 9 Asinan an sūpawk thei lo a si ahcun, nupi-pasal nei lawlaw hai seh. Ziangahtile nupi-pasal neih cu câkhiarnak nasazet thawi um rero hnakin a ṭhasawn.

10 Nupi-pasal a nei cia tupawl hnenah keimai thupek si loin, Bawipaih thupek ka lo pe: nupi in a pasal ṭhen hlah seh. 11 Asinan a ṭhen a si hmanah, pasal nei loin umlan seh, asilole a pasal thawn remawsal hai seh. Cule pasal khal in a nupi ṭhen hlah seh.

12 A dangpawl hnenah Bawipaih sim mi si loin keimah in ka sim hai: unau zokhal in zum lo tu nupi a rak nei ih cu nu in amah thawi umtlang a lungkim asile, cu nu cu ṭhen hlah seh. 13 Cule zum lo tu pasal a neitu nunau kha a pasal in amah thawi umtlang a lungkim asile, tân hlah seh. 14 Ziangahtile zum lo tu pasal cu a nupi ruangah thianter a si ih, zumlotu nupi khal a pasal ruangah thianter a si. Cuti rak si lo sehla, nan fātepawl cu an bawrhhlawh ding, asinan annih cu atu ah an thianghlim a si. 15 Asinan zumlotu in a ṭhen asile, ṭhen ko seh; cumi thu ah cun, unaupa asilole unaunu cu ṭemṭawn a si lo. Asinan Pathian in kannih cu remawtei nung dingah in ko a si. 16 Ziangahtile maw nupi, na pasal na rundam ding le ding lo na thei maw si? Asilole maw pasal, na nupi na rundam ding le ding lo ziangtin na thei?

Pathian ih a lo Kawhdān vekin Um Aw

17 Asinan Pathian in mi kip hnenih a zĕm kēl vekin le Bawipa in mi kip a kawh hai kēl vekin um hai seh. Cumi cu kawhhran hmuahhmuah hnenih thu ka pek mi a si. 18 Serh zim tan a co mi, Pathian ih kawh mi an um maw? An um asile, serh zim tan lo mi ah cang hlah seh. Serh zim tan lo mi, Pathian ih kawh mi an um maw? An um asile serh zim tan hlah seh. 19 Serh zim tan siseh, tan lo siseh, zianghman a si lo. Pathian thupekpawl thlun lawng hi a thupi mi a si. 20 Mi kip in Pathian in a kawh laiih a sinak kēl vek khan um ko hai seh. 21 Pathian in a lo kawh laiah nang cu sál na si maw? Cumi in na khawruah lo harter hlah seh. Asinan luatter theih na si le, cumi cu hmang sawn aw. 22 Ziangahtile sál a si laiah Pathian in Bawipa ah a kawh mi cu Bawipaih miluat a si. Cutivek thothoin miluat a si laiah Pathian in Bawipa ah a kawh mi cu Khrih-ih sál a si. 23 Nannih cu man ih lei mi nan si, milai sál ah cang hlah uh. 24 U le nau tla, mi kip in Pathian in a lo kawh laiih nan sinak kēl ah khan Pathian thawn umtlang ringring uh.

Nupi-Pasal Nei Lo le Nuhmeipawl

25 Nupi pasal nei hrih lo pawlih thuhla ah cun: Bawipa hnen ihsin thupek ka nei lo: asinan rinsantlak mi si dingah Bawipa hnen ihsin zahngainak ka rak co ruangah ka ruahnak ka suah a si. 26 Tulai vansannak ruangah mipa cu a si kēl vek khan um ko sehla a ṭha tiah ka ruat. 27 Nupi ah ṭemṭawn na si maw? Phawihnak hawl hlah. Nupi ihsin mizalen na si maw? Nupi hawl hlah. 28 Asinan nupi na neih asile, sual tuah na si lo. Fala him pakhat in pasal a neih asile, thilsual a tuah lo. Asinan nupi le pasal a neitupawl cun himi nun ah buainak an táwng ding, asinan kei cun cumi ihsin lo luatter ka duh.

29 Asinan u le nau tla, hihi ka sim a si, cān málte lawng a um a si, atu thăwkin nupi neipawl in nei lo vekin nung hai seh. 30 A ṭap mipawl in ṭap lo vekin, lungawiaipuang mipawl in lungawiaipuang lo vekin, thil leitupawl khal in zianghman nei lo vekin um hai seh. 31 Hi leitlun thil a hmangtupawl khal in hmang luar tuk lawmmam lo vekin um hai seh. Ziangahtile hi leitlun milai umtudān hi a hlorál rero a si.

32 Nannih cu dawnharnak ihsin luat uhla ka lo duhsak. Nupi nei lo tu cun ziangtin Bawipa a lung ka hmuiter ding tiin Bawipaih thilpawl a ngaihtuah. 33 Asinan nupi neitu cun ziangtin ka nupi a lung ka hmuiter ding tiin leitlun thilpawl a ngaihtuah. 34 Nupi le fala him lak khalah danglamnak a um. Pasal nei lo nunau cun a taksaruangpum le a thlarau a thianhlim theinak dingah, Bawipaih thilpawl a ngaihtuah. Asinan pasal nei nunau cun a pasal lung a hmuiter theinak dingah, leitlun thilpawl a ngaihtuah. 35 Cule himi hi nanmai hlawknak ding hrangah ka sim a si, nan hmaiih thangkam ka tum a si lo. Mawi zetin nan nun ih, zianghman in lo hnaihnăwk lo ih, Bawipa lawng nan rĕn theinak dingah hihi ka sim a si.

36 Asinan mipa zokhal a fala himte parah mawi loin ka um tiah amah le amah a ruahawk ih, a pasal neih kum khal a luan cuahco ih, cu nu in pasal neih a ṭul a si ahcun, cu pa cun a duh vekin tuah ko seh. Thilsual a tuah lo; neiaw hai seh. 37 Sikhalsehla mipa in a thinlung in hngetkhoh zetin a ding, ṭul tinak a nei lo, asinan amai duhnak tlunah thuneihnak a nei thei ih, a thinlung in cuih fala him cu ṭhi lo dingih a ruahcat asile, a tiṭha a si. 38 Curuangah nupi ṭhitu cun a tiṭha a si, asinan nupi ṭhi lo tu in a tiṭha sinsin.

39 Nupi cu a pasal a nunsung hmuah cu Dān in a pasal ah a ṭemṭawn. Asinan a pasal a thih asile, Bawipa ih um mi rori a duh mi nei dingah a zalen a si. 40 Asinan kei ka ruahdān ah cun mi dangih nupi si lo teih a um asile, a lungawi sawn ding. Cule kei khal in Pathian Thlarau neiah ka ruataw ve a si.

8

Milem hnenih Hlăn Mi Thil

1 Cule milempawl hnenih an hlăn mi thilpawl thuhla ah cun: kan zaten theihnak kan nei ti kan thei. Theihnak cun mi a puarthauter, asinan duhdawtnak cun mi a tuahṭha. 2 Cule mi pakhat khat in thil ziang simaw thei ih a ruahawk asile, a theih ding vekin a thei hrih lo a si. 3 Asinan mi pakhat khat in Pathian a duhdaw asile, cu pa cu Pathian in a thei.

4 Curuangah milempawl hnenih hlăn mi thil ei thuhla ah cun, leitlun ah milem cu zianghman a si lo ti le Pathian amah pakhat siarlo a dang Pathian a um lo ti kan thei. 5 Van ah siseh, lei ah siseh pathian tiih an kawh mi tampi rak um hman hai sehla, («pathian» tampi, «bawi» tampi an um vekin), 6 kannih hrang lawngte ah cun Pathian pakhat, Pa lawng a um. Thil hmuahhmuah hi amai hnen ihsin an si ih, kannih cu amai hrangah kan um. Kan hrangah Bawi pakhat Jesu Khrih a um ih, thil hmuahhmuah hi amah ruangih um le kannih khal amah thawngih nung kan si.

7 Sikhalsehla mi kip in cuih theihnak cu an nei lo: mi hrekkhat cun atu tiangin milem hmaiih an hlăn mi rawl an ei tikah, milem hnenih hlăn mi a si ti ruatin an ei; cule cumi cun a cak lo mi an sia le ṭha theihnak cu a bawrhbangter. 8 Asinan rawl cun Pathian hnenah dinhmun ṭha ah in ret cuang lo. Ziangahtile kan ei khal asile, ṭhatdeuhnak kan nei cuang lo ih, kan ei lo a si khalle, kan siat phah cuang lo.

9 Asinan himi nan zalĕnnak hin a cak lo mipawl a tlukterlonak dingah va fimkhur uh. 10 Ziangahtile nang cun theihnak na nei ih, milem biaknak inn ah rawl ei dingih na to kha a sia le ṭha theihnak a cak lo mi pa in a lo hmuh a si ahcun, milem hmaiih hlăn mi thilpawl cu ei dingah a ral a ṭhater lo ding maw? 11 Cule na theihnak ruangah a hrangih Khrih a thi mi a cak lo mi unaupa kha a hlorál ding maw? 12 Nannih in unaupawl parah cutivekih sual nan tuah ih a cak lo mi a sia le ṭha theihnak nan tuahmawh tikah, Khrih parah sual nan tuah a si sawn. 13 Curuangah rawl in ka unau a tlukter ding a si ahcun, ka unau ka tlukterlonak dingah ziang tik hmanah sa ka ei nawn lo ding.

9

Paul-ih Pumpekawknak

1 Keimah cu apostol ka si lo maw? Keimah cu mizalen ka si lo maw? Kan Bawipa Jesu Khrih cu ka hmu zo a si lo maw? Nannih cu Bawipa ih ka ṭuansuah mi nan si lo maw? 2 Mi dang in apostol ih in ruah lo a si hmanah, nan hnenah cun rinhlelh ding um loin apostol ka si hrimhrim. Ziangahtile nanmah hi Bawipa ah apostol ka sinak hminsinnak cu nan si.

3 I zăwihliahtupawl hnenih ka humawknak cu hitin a si: 4 Kannihpawl hin in le ei theinak kan nei lo maw si? 5 Apostol dangpawl, Bawipaih naulepawl le Kefas bangin zumtu nupi hruai theinak kan nei ve lo maw si? 6 Asilole pumcawmnak hrangah hnaṭuan lo dingin kei le Barnabas lawng hi thuneihnak nei lo kan si cuangce maw si? 7 Zo so mah te tumaw ih, ralkap ṭuan? Zo so sabit hmuan tuah ih a rah ei lo um? Zo so tuukhal tahratih tuu hnawiti in loih um?

8 Cuih thilpawl cu milai vekin ka sim maw? Dān khal in cuvekin a sim a si lo maw? 9 Ziangahtile Mosi Dān sungah,

«Câwcang in thlairawl a cīl laiah a hmur na ṭem lo pei,» tiih ngan a si.

Pathian in câwcangpawl lawng maw a ngaihsak? 10 Asilole Pathian in cumi cu kanmai hlawknak ding hrangah a sim maw? Rinhlelh ding um loin cuih thu cu kan hlawknak dingih ngan a si. Lei lettu cun fâng ah ding ruahsannak a nei ih, ruahsannak thawi fâng a cīltu in a cīl mi fâng ei ding a ruahsan a si. 11 Nan hnenah thlarau lam thilpawl kan tuh zo asile, nan hnen ihsin leitlun thilpawl at khal nungla, cucu thil pipa a si maw? 12 Mi dang in nan parah nan neih mi thil co theinak an neih a si ahcun, kannih hi nei sinsin ding kan si lo maw?

Sikhalsehla cuih thuneihnak cu kan hmang ve lo, cuhnakin Khrih thuthangṭha kan dawnkhamlonak dingah thil ziangkim hi kan tuar ṭenṭo sawn a si. 13 Temple sungih thil thianghlimpawl lakih rawngbawltupawl cun cuih thil thianghlimpawl cu an ei ih, biakṭheng ih rawngbawltupawl cun biakṭheng thilpawl an co ve ti nan thei lo maw? 14 Cutivek thothoin thuthangṭha simtupawl cu thuthangṭha ihsin pum câwmaw dingin Bawipa in thu a pe zo.

15 Asinan hih thilpawl hi kei cun pakhat hman ka hmang lo ih, ka parah cuvekih nan tuah dingah hih thupawl hi ka ngan fawn lo. Ziangahtile Bawipa ih ka tluangkhawnnak hi mi zokhal in zianghmanlo ih an canter ding hnak cun thih hi ka hrangah a ṭhasawn. 16 Thuthangṭha hi phuang hman ningla, tluangkhawn ding zianghman ka nei lo, ziangahtile phuang loin ka um thei lo; a si, thuthangṭha ka phuan lo a si ahcun, ka hmakhua a pit ding! 17 Ziangahtile cumi cu keimai duhhrilnak in ka ti asile, lawmman ka ngah ding; asinan ka duhhrilnak si loih ka ṭuan asile, ṭuanvo hleice kilter ka si tinak a si. 18 Cuti asile ka lawmman cu ziang a si? Thuthangṭha ih ka covo ka hman thluh lonak dingah, thuthangṭha ka phuan tikah Khrih thuthangṭha cu hlawh la loih ka phuan hi a si.

19 Ziangahtile kei cu mi hmuahhmuah hnen ihsin miluat si khal ningla, mi a tam theipatawpih ka ngah theinak dingah, mi hmuahhmuah ih sál ah keimah le keimah ka tuahaw. 20 Jew-pawl ka ngah theinak dingah, Jew-pawl hnenah cun Jew vekin ka um. Dān hnuaiih umpawl ka ngah theinak dingah, Dān hnuaiih um mipawl hnenah cun Dān hnuaiih um vekin ka um. 21 Dān neilopawl ka ngah theinak dingah, Dān nei lo pawl hnenah cun Dān nei lo mi vekin ka um. Pathian hmaiah Dān nei lo si si loin, Khrih dān hnuaiih um mi si sawn siin, 22 micaklopawl ka ngah theinak dingah, micaklopawl hnenah cun micaklo vekin ka um. Ziangmawtitalih mi hrekkhat ka run theinak dingah, mi hmuahhmuah hnenah thil ziangkim ah ka cang. 23 Nanmah thawn thuthangṭha ah covo neitu ka si theinak dingah, thuthangṭha ruangah hipawl hi ka tuah a si.

24 Tlan zuamawknak ih mi an tlan tikah an zaten an tlân, asinan mi pakhat lawngin nehmanlaksawng a ngah ti nan thei lo maw? Nehmanlaksawng ngah dingin cutivekcun tlân uh. 25 Cule zuamawknak ih mi a zuamtu cun thil ziangkim ah a sūpaw. A siat thei mi lukhum ngah dingah cutin an tuah. Asinan kannih cun a siat thei lo mi nehmanlaksawng ngah dingah cutin kan tuah ve a si. 26 Curuangah hmuitin mi nei loin ka tlân lo. Cun thli a thawng rero tu vek menin ka thawng lo. 27 Cuhnakin mi dang hnenih thu ka phuan hnuah Pathian in tling lo i tilonak dingah, ka taksaruangpum cu nasazetin ka thunun ih ka thu hnuaiah ka ret sawn a si.

10

Israel Thuanthu ihsi Ralrin Peknak

1 Cuihhleiah, u le nau tla, kan pupápawlih thuhla thei loih nan um ka duh lo, an zaten mero hnuaiah an um ih, tifinriat an tánsuak. 2 Mosi hnenah an zaten mero sungah le tifinriat sungah baptisma an co. 3 An zaten thlarau rawl bangrep an ei. 4 Cule an zaten thlarau ti bangrep an in. Ziangahtile anmah a rak thluntu thlarau lam Lungpi ihta an in, cuih Lungpi cu Khrih a si. 5 Asinan mi tamsawn in Pathian lung an hmuiter hrimhrim lo, ziangahtile annih cu Pathian in ramṭhing ah a thiter hai.

6 Annih in thil ṭhalo pawl nasazetih an câk vekih kan câk ve lonak dingah, cuih thilpawl cu kan hrangah kan zohṭhim ding mi an si. 7 Cule anmah lakih mi hrekkhat in milem an biak vekin be ve hlah uh. «Mipi cu ei le in dingah an to ih, lek dingah an tho,» tiih ngan vek khan a si. 8 Cun an lakih mi hrekkhat in nunau-mipa sualnak an rak tuah vekin tuah ve hlah uhsi, cule ni khat ah anmah lakih mi 23000 cu an tlu ih an thi. 9 An lakih mi hrekkhat in Khrih an hniksak vekin, hniksak ve hlah uhsi. Pathian in anmah cu rulpawl a cukthatter. 10 Cule anmah lakih mi hrekkhat an phunzai vekin phunzai hlah uhsi, cule annihpawl cu siatsuahtu in a siatsuah thluh hai a si.

11 Kan zohṭhim dingah cuih thil hmuahhmuah cu an parah a thleng a si, san cemnakih a rak man mi kanmahpawl ralrin peknak ah cupawl cu ngan an si. 12 Curuangah dingih a ruatawtu cu fimkhur seh, culoasile a tlu pang ding. 13 Mi zo cio par khalih a thleng mi siarlo nan parah sualfawrhnak a thleng lo. Asinan Pathian cu a rinum a si. Anih cun nan tuar thei lo ding mi sualfawrhnak nan hnenih thlenter a siang lo ding. Cuih sualfawrhnak nan tuar theinak dingah tlansuahnak lamzin a lo tuahsak ding.

14 Curuangah ka duhdawt mitla, milem biaknak ihsin tlân uh. 15 Mifimpawl hnenih thusim vekin ka lo sim a si, ka lo sim mi thu hi nanmah ten thuṭhen uh. 16 Thlawsuah kengtu no kha thlawsuah kan pe, cuih no cu Khrih thisen ih kan pawlkawmawknak hi a si lo maw? Sang kan phel tikah khan, Khrih taksaruangpum ah kan pawlkawmaw a si lo maw? 17 Ziangahtile kannih cu tampi si hman nungla taksaruangpum pakhat kan si, ziangahtile kan zaten cuih sang hlawm pakhat cu kan ṭawmaw a si.

18 Taksa lamih Israel a si mipawl khi zoh hnik uh: raithawinak sa a eitupawl kha biakṭheng ṭawmpitu an si ve lo maw? 19 Cuti asile ka sim mi cu ziang a si? Milem cu ziangso a si, ka ti maw si? Asilole milempawl hnenih an thawi mi kha ziangso a si ka tinak a si maw? 20 Si hlah e, ka lo sim mi cu, Zentelpawlih thawiawknak thilpawl cu Pathian hnenah si loin khawsiapawl hnenah an thawi a si, ti hi a si sawn. Khawsiapawl thawn pawlkawmawknak nan neih ding ka duh lo. 21 Bawipaih no le khawsiapawlih no cu nan inkăwp thei lo; Bawipaih cabuai ta le khawsiapawlih cabuai ta khal nan eikăwp thei lo. 22 Asilole Bawipa cu thîkthuse ko kan tăwkhrawk maw? Kannih cu amah hnakin kan caksawn maw?

Ziangkim Pathian Sunlawinak ding Hrangah

23 Thil ziangkim hi ka hrangah tuah a thiang, asinan thil ziangkim tuah hi ka hrangah hlawknak a si lo. Thil ziangkim hi ka hrangah tuah a thiang, asinan thil ziangkim in mi a tuahṭha lo. 24 Zohman in amai hlawknak lawng hawl hlah seh, cuhnakin mi kip in mi dang hlawknak ding hawl sawn hai seh.

25 Sa zuarnak ih an zuar mi pauhpauh cu nan sia le ṭha theihnak ruangah, thu zianghman sut loin ei uh. 26 Ziangahtile, «Leilung cu Bawipaih ta a si, a sungih um hmuahhmuah thawn.»

27 An lakih zumlotu pakhat khat in rawl ei a lo sawm ih feh nan duh asile, nan sia le ṭha theihnak ruangah thu zianghman sut lo ten nan hmaiih a lo hun mi pauhpauh cu ei uh. 28 Asinan mi pakhat khat in na hnenah, «Himi cu milem hnenih hlăn mi sa a si,» a lo ti asile, a lo simtupa ruangah le a sia le ṭha theihnak ruangah, cumi cu ei hlah aw. Ziangahtile, «Leilung le a sungih a um mi hmuahhmuah cu Bawipaih ta an si.» 29 Nangmai sia le ṭha theihnak hrangah si loin cu paih, «Sia le ṭha theihnak,» ruangah ka sim a si sawn. Mi dang pakhat sia le ṭha theihnak in ka zalĕnnak cu ziangahso maw thu i ṭhensak ding? 30 Lungawi thu simnak thawn ka ei asile ziangahso cumi hrangih lungawi thu ka sim mi ah anih in keimah dokalhin ṭawng ṭhalo a ṭawng riangri?

31 Curuangah nan ei ah siseh, nan in ah siseh, nan tuah mi pauhpauh cu, Pathian sunlawinak hlirah tuah uh. 32 Jew-pawl hnenah siseh, Grikpawl hnenah siseh, Pathian kawhhran hnenah siseh tlûknak ding zianghman tuah hlah uh. 33 Thil ziangkim ah mi hmuahhmuah lung ka hmuiter, ka tuah vekin nan tuah ding a si. Keimai hlawknak ka hawl lo, cuhnakin mi tampi rundam an si theinak dingah, mi tampi ih hlawknak ka hawl sawn a si.

11

1 Kei in Khrih nun ka cawn vekin, nannih khal in i cawng ve uh.

Lu Khuhawk Thu

2 U le nau tla, thil ziangkim ah in máng ih nan hnenih ka lo peksâwngsin mi vek khan, cīn le dānpawl nan kaihhnget ruangah ka lo lawm a si. 3 Asinan hihi nan theih dingah ka duh, mipa kip ih lu cu Khrih a si, nunauih lu cu mipa a si, cule Khrih-ih lu cu Pathian a si. 4 Mipa zokhal a lu khuh tahratih thlacamtu le profet thuphuan ih thuphuangtu cun a lu a upat lo a si. 5 Asinan nunau zokhal lu khuh loih thlacam le profet thuphuan ih thuphuangtu cun a lu a upat lo a si, ziangahtile cutiih a tuah asile, a lu a metkawlh mi nunau thawn a bangrep. 6 Ziangahtile nunau in a lu a khuh lo asile, a lu khal metkawlh lawlaw seh. Asinan nunau hrangah lu ziahkawlh asilole lu mehkawlh cu ningzakza a si. Curuangah nunau cu a lu khuh seh. 7 Ziangahtile mipa cu Pathian-ih hmuihmel le ropitnak a si ruangah, a lu khuh hrimhrim hlah seh; asinan nunau cu mipaih ropitnak a si. 8 Ziangahtile mipa cu nunau ihsin a si lo, nunau sawn kha mipa ihsin a si. 9 Mipa cu nunau hrangih sersiam a si lo, nunau sawn kha mipa hrangih sersiam a si. 10 Cumi ruangah nunau cun vancungmipawl ruangah a lu parah ^athuneihnak hminsinnak nei seh. 11 Sikhalsehla Bawipa ah cun mipa cu nunau lakah a zalen lo ih, nunau khal mipa lakah a zalen lo. 12 Ziangahtile nunau cu mipa ihsi ra um mi a si, cutivek thothoin mipa khal nunau ihsin ra um mi a si ve; asinan thil ziangkim hi Pathian hnen ihsi ra um mi an si.

11:10^a thuneihnak: Nunau in mipa tlunih thuneihnak si loin, mipa in nunau tlunah thu a neihzia lăngternak a si sawn.

13 Nunau in lu khuh loin Pathian hnenih thla a cam ding cu a mawi maw mawi lo? Nanmah ten thuṭhen aw hnik uh. 14 Mipa sám saupi zuah cu a hrangah ningzakza a si ti leitlun zephung khal in a lo zirh a si lo maw? 15 Asinan nunau in sám saupi a neih asile, cucu a ropitnak a si; ziangahtile a khuhawknak dingah Pathian in sám a pe. 16 Asinan cuih thu ah mi pakhat khat in a el duh asile, a dang nunphung kan nei lo. Pathian kawhhranpawl khal in nunphung dang an nei lo.

Bawipaih Zanriah

17 Hmunkhatih nan punkhawmawknak hi ṭhatsinnak hrangah si loin, siatsinnak hrangah a si ruangah, cuih thu nanmah ka lo zirh tikah khan ka lo lawm lo. 18 Ziangahtile a pakhatnak ah kawhhran ih nan ratkhawm tikah, nan lakah ṭhenṭhekawknak a um a si tiah ka thei ih, cuih ka theih mi cu ka zum nawn ko. 19 Ziangahtile nan lakih Pathian ih a pawm mipawl lăngter an si theinak dingah, nan lakah fehsualpawl khal an um tengteng ding a si. 20 Curuangah hmun pakhat ih nan ratkhawm tikah, cucu Bawipaih zanriah ei dingah a si lo. 21 Ziangahtile mi tin in nan ei tikah mai bul zanriah nan ei hmaisa cio. Cule mi pakhat cu rilrâwngin a um ih, a dang pakhat cu a ri. 22 Ei le in dingah inn nan nei a si lo maw? Pathian kawhhran nan nautat ih thil zianghman nei lo pawl an ning nan zakter a si lo maw? Nan hnenah ziang ka sim ding? Himi ah ka lo lawm ding maw? Ka lo lawm lo a si.

23 Ziangahtile Bawipa hnen ihsin ka ngah mi cu ka lo pesin a si. Phiarsawm a si zan ah Bawi Jesu in sang kha a lâk ih, 24 lungawi thu a sim hnuah, a phel. Cule, «La uhla ei uh; hihi nan hrangih phel mi ka taksa a si, keimah in cīn ringring nak dingah himi hi tuah uh,» tiah a ti. 25 Cutivek thothoin zanriah an ei hnuah, Jesu in no cu a lâk ih, «Hih no hi ka thisen ih thukham thar a si. Hih no nan in tinten keimah in cīn ringring nak dingah in uh,» tiah a ti.

26 Ziangahtile hih sang nan ei tinte le hih no nan in tinten, Bawipaih thihnak cu a ratsal hlanlo nan phuang a si.

27 Curuangah zokhal himi Bawipaih sang le no tlaklopi in a ei ih a intu cu Bawipaih taksaruangpum le thisen parah sual a tuah a si. 28 Asinan mi pakhat in amah le amah cekfelaw ta sehla, cuih sang cu ei in cuih no cu in seh. 29 Ziangahtile tlaklopi in a ei ih a intu cu amah thuṭhennak hrangah a ei ih a in a si, anih cun Bawipaih taksaruangpum thuhla cu a theihliah lo. 30 Himi ruangah nan lakah mi tampi cak lo le dam loin an um ih, mi tampi an thi. 31 Ziangahtile kanmah le kanmah thu kan ṭhenawk asile, thuṭhen kan si lo ding. 32 Asinan Bawipa in thu in ṭhen tikah, leitlun mipawl thawi thiamlo in coterlonak dingah nun in sim a si.

33 Curuangah ka u le ka nau tla, Bawipaih zanriah ei dingih nan ratkhawm tikah, pakhat le pakhat hngak aw uh. 34 Zokhal a ril a rawn asile, inn ah ei sawn seh, culole thuṭhen tuar dingih ratlangkhawm nan si pang ding. Cule a tāng lai mi thupawl cu ka rat tikah ka tifel leh ding.

12

Thlarau Thilpekpawl

1 U le nau tla, atu ah thlarau thilpekpawl thuhla ah thei loih nan um ding ka duh lo. 2 Rairing mi nan rak si laiah cun, an lo hruainaknak ah, a ṭawng thei lo mi milempawl hnenah hruai nan si ti nan thei. 3 Curuangah zohman in Pathian Thlarau in Jesu cu camsiat si seh, tiah an ṭawng kêl lo ih, Thlarau Thianghlim ihsi lo cun zohman in Jesu cu Bawi a si, tiah an ti thei lo ti ka lo theihter a si.

4 Thilpek a phunphun a um, asinan Thlarau cu pakhat a si. 5 Rawngbawlnak dangdang a um, asinan Bawipa cu pakhat a si. 6 Cule hnaṭuandān a phunphun a um, asinan mi hmuahhmuah hnenih thil ziangkim a ṭuantu Pathian cu pakhat a si. 7 Hlawktăwnnak ding hrangah Thlarau phuanlăngnak cu mi kip hnenah pek a si sawn. 8 Ziangahtile Thlarau in mi pakhat hnenah fimnak kamsuakthu a pe. Cuih Thlarau thotho in a dang pakhat hnenah theihnak kamsuakthu a pe. 9 Cuih Thlarau thotho cun a dang hnenah zumnak a pe, cuih Thlarau thotho in mi dang hnenah tidamnak thilpek a pe. 10 A dang hnenah thilmakpawl tuah theinak, a dang hnenah profet thuphuan ih thuphuan theinak, mi dang hnenah thlaraupawl thleidăn theinak, mi dang hnenah ṭawng phun dangdangih ṭawng theinak, a dang hnenah ṭawng phun dangdang leh theinak a pe. 11 Asinan cupawl hmuahhmuah cu Thlarau bangrep le pakhat ih căngvaihnak a si, a duhdān vekin mi kip hnenah thilpekpawl cu a zem fingfing.

Ruangpum Pakhat ah Peng Tampi

12 Taksaruangpum cu pakhat lawng si khal sehla, pêng tampi a nei. Taksa pêng hmuahhmuah cu tam hman hai sehla, taksaruangpum pakhat a si, Khrih khal cuvek a si ve. 13 Ziangahtile Jew-pawl siseh, Grikpawl siseh, sálpawl siseh, miluatpawl siseh, kan zaten taksaruangpum pakhat ah, Thlarau pakhat in baptisma in rak pe. Kan zaten Thlarau pakhat ah in dingin in tuah.

14 Ziangahtile taksaruangpum cun pêng pakhat lawng a nei lo ih, pêng tampi a nei a si. 15 Ke in, «Kei cu kut ka si lo ruangah taksaruangpi-ih ta ka si lo,» ti hnik sehla, cutiih a ti ruangah taksaruangpi-ih ta a si lo ngaingai maw? 16 Cule hna in, «Kei cu mit ka si lo ruangah taksaruangpi-ih ta ka si lo,» ti hnik sehla, cutiih a ti ruangah taksaruangpi-ih ta a si lo ngaingai maw? 17 Taksaruangpum pumhlum hi mit si thluh hnik sehla, ziangtin a ngaithla thei ding? Taksaruangpum pumhlum hi hna hlir si hnik sehla, ziangtin rim a hnim thei ding? 18 Asinan atu ah Pathian in amai duhdān vekin, taksa pêng zaten taksaruangpi ah a ret cio hai. 19 Cule taksa pêng an zaten pêng pakhat lawng si ta hnik sehla, taksaruangpi cu khuiah so a um ding?

20 Atu ah thungaiten, taksa pêng cu tampi a um nân, taksaruangpi cu pakhat a si. 21 Cule mit in kut hnenah, «Ka lo ṭul lo,» tiah a ti thei lo ih, lu in ke hnenah, «Ka lo ṭul lo,» tiah a ti thei fawn lo. 22 Lamlam ah, taksaruangpumih siat áwlsawn zet a bang mi pêng hrekkhat cu a ṭulbik mi sawn an si. 23 Cule upattlak lem loih kan ruah mi taksa pêngpawl, cupawl cu kan upat nasasawn ṭheu. Cun kan taksa pêng zahpi mipawl kha mawiten kan thuam. 24 Asinan a mawi mi kan taksa pêng hrekkhat cun ṭul mi an nei lo. Pathian in taksa pêngpawl cu pumkhat ah remten a kăwm, upatnak a tlasam mi taksa pêngpawl cu upatnak tamsawn Pathian in a pe. 25 Taksaruangpum ah ṭhenṭhekawknak a umlonak dingah cutivekin a tuah. Cuih taksa pêngpawl cun pakhat le pakhat bangrepin ngaihsakawktăwnnak an neih sawnnak dingah a si. 26 Taksa pêng pakhat in a tuar tikah, taksa pêng hmuahhmuah in an tuarpi ve. Asilole taksa pêng pakhat cu upat a si tikah taksa pêng hmuahhmuah in an lungawiaipuanpi ve.

27 Nannih cu Khrih-ih taksaruangpum nan si ih, pumpak cio hi cuih taksaruangpumih pêng nan si fingfing. 28 Pathian in a pakhatnak ah apostolpawl, a pahnihnak ah profetpawl, a pathumnak ah zirhtupawl, cuihhnu ah thilmakpawl, cun tidamnak thilpekpawl, mibăwm theinak thilpekpawl, mi hohat theinak thilpekpawl le ṭawng phun dangdang ṭawng theinak thilpekpawl cu kawhhran ah a ret. 29 An zaten apostol an si maw? An zaten profet an si maw? An zaten zirhtu an si maw? An zaten thilmak tuahtu an si maw? 30 An zaten tidamnak thilpekpawl an nei maw? An zaten ṭawng phun dangdangin an ṭawng maw? An zaten cuih ṭawng phun dangdang cu an let maw? 31 Thilpek ṭhabikpawl cu nasazetin câk sawn uh. Cule lamzin ṭhasin ka lo hmuh hrih ding.

13

Duhdawtnak Diktak

1 Minung ṭawngpawl le vancungmi ṭawngpawl in ṭawng hman ningla, duhdawtnak ka neih si lo ah cun, kei cu dar awn vek men le darsumsel awn vek men ka si. 2 Cule profet thuphuan ih thuphuan theinak thilpek neiin, thuthup hmuahhmuah theithiamin le theihnak hmuahhmuah neiin, cule tlangpawl ṭhawn theinak zumnak hmuahhmuah nei hman ningla, duhdawtnak ka neih si lo ah cun, zianghmanlo men ka si. 3 Mifarahpawl cawmnak ah ka neih mi thil hmuahhmuah pe thluhin, ka taksaruangpum hi ur dingah pe hman ningla, duhdawtnak ka neih si lo ah cun, ka hrangah hlawknak zianghman a um lo.

4 Duhdawtnak cu a thin a sau ih ngil a nei; duhdawtnak cun mi a iksik lo, a duhaw lo ih, a puarthau fawn lo; 5 mawi loin a nung lo, amai hlawknak lawng a hawl lo, áwlten a thin a heng lo ih, thil ṭhalo a ruat lo, 6 dingfellonak ah a ai a puang lo ih, thutak ah lungawiaipuangin a um sawn; 7 ziangkim a khuh thluh, ziangkim a zum, ziangkim a ruahsan ih, ziangkim a tuarsuak thei.

8 Duhdawtnak cu a cem dah lo. Asinan profet thuphuan ih thuphuan theinak hi um khal hai sehla, an hlorál leh ding; ṭawng phun dangdangih ṭawng theinak hi um khal hai sehla an tawp leh ding; theihnak a um khalle, a hlorál leh ding. 9 Ziangahtile kim loin kan thei ih, kim loin profet thuphuan in thu kan phuang. 10 Asinan a famkim mi a ra thlen tikah cun, a kim lo mi hi hlohralter a si leh ding.

11 Nauhak ka si laiah, nauhak vekin ka ṭawng, nauhak bangtukin ka theithiam ih, nauhak vekin ka ruat; asinan ka pitlin tikah cun nauhak thilpawl cu ka hlăwn thluh. 12 Ziangahtile atu ah cun thlalang sungah kan hmu diadi a si, asinan cu tikcān ah cun hmaităwnin kan hmu leh ding. Atu ah cun famkim loin ka thei, asinan cu tikcān ah cun Pathian ih i theih thluh vekin thil ziangkim ka thei thluh ve leh ding.

13 Cule atu ah hi thil pathum, zumnak, ruahsannak le duhdawtnak an um; asinan hipawl lakih a ropibik cu duhdawtnak a si.

14

Thusim a Cungnunzia

1 Duhdawtnak hi dawi uhla, thlarau thilpekpawl cu câk uh, a hleicein profet thuphuan ih thu phuan hi câk uh. 2 Ziangahtile ṭawng dang ih a ṭawngtu cun minung hnenah a ṭawng lo ih, Pathian hnenah a ṭawng sawn, ziangahtile zohman in a ṭawng mi an theithiam lo; sihmansehla thlarau ah cun thuthuppawl a sim a si. 3 Asinan profet thuphuan ih thuphuangtu cun minung hnenah tuahṭhatnak thu, thazangpeknak thu le hnangamnak thu a sim. 4 Ṭawng dangih a ṭawngtu cun amah le amah a tuahṭhaaw, asinan profet thuphuan ih thuphuangtu cun kawhhran a tuahṭha. 5 Nan zaten ṭawng dangdangin ṭawng uhla ka duh, asinan profet thuphuan ih thu nan phuan ding cu ka duh sawn, ziangahtile ṭawng dangdangih ṭawngtu in kawhhran tuahṭhatnak dingah a leh lo a si ahcun, profet thuphuan ih thuphuangtu cu a ropisawn a si.

Ṭawng dang ih Ṭawng Thilpek

6 Ka u le ka nau tla, atu ah ṭawng dangdangih ṭawngin nan hnenah ra hnik ningla, cumi cun ziang hlawknak a lo pe pei? Pathian ih thu phuansuah mi in siseh, theihnak in siseh, profet thuphuan ih thuphuan theinak in siseh, asilole zirhnak in siseh nan hnenih ka sim lawngah cumi cun a lo hlawkter a si. 7 Nunnak nei lo mi thilpawl, phirivau le ṭingṭang hman in aw an suah tikah, anmai aw dik an suah lo asile, zohman in phirivau an tum ti le ṭingṭang an tum ti an thei thei lo ding. 8 Ziangahtile tawtawrawt khal in aw fiang a suah lo asile, zo so ral do dingah a tim a tuah ding? 9 Cutivek thothoin nan hnen khalah a si, nannih in theihthiam áwl mi lei ṭawngkampawl nan ṭawng lo asile, ziang nan ṭawng ti ziangtin mi in an thei ding? Ziangahtile nannih cu thli lakih ṭawng rero men nan si ding. 10 Rinhlelh ding um loin, leilung tlunah ṭawng phun dangdang tam zet a um ih, cupawl cun sullam an nei fingfing. 11 Curuangah mi pakhat in ka hnenah a ṭawng ih a ṭawng miih sullam ka theih lo ah cun, a hrangah kei cu barbaros-mi vek ka si ding ih, anih khal ka hrangah ram dang mi vek a si ve ding. 12 Cutivek thothoin nan hnen khalah a si, thlarau lam thilpekpawl nasazetin nan câk, cutiih nan câknak ah kawhhran tuahṭhatthiam zettu si ding cu câk uh.

13 Curuangah ṭawng dang ih a ṭawngtu cun a leh theinak dingah thlacam seh. 14 Ziangahtile ṭawng dang ih thla ka cam asile, ka thlarau in thla a cam, asinan ka theihthiamnak cun rah zianghman a suah lo. 15 Cuti asile, ziangtin kan ti ding? Thlarau thawn thla ka cam ding ih, theihthiamnak thawn khal ka cam ding. Thlarau thawn hla ka sak ding ih, theihthiamnak thaw khal in ka sak ding. 16 Culoasile na thlarau ih Pathian na thangṭhat tikah, leng lam mi cutawk ih a umtupa cun ziang na sim ti a theithiam lo ruangah, Pathian hnenih lungawi thu na sim tikah cu pa cun ziangtin, «Amen,» tiah a ti thei ding? 17 Ziangahtile lungawi thu cu na sim ṭha taktak ko, asinan cu pa cu tuahṭhat a si cuang lo.

18 Nannihpawl hmuahhmuah hnakin ṭawng dangdangih ka ṭawng tamsawn ruangah ka Pathian hnenah lungawi thu ka sim a si. 19 Sikhalsehla kawhhran sungah cun ka ṭawngkam in mi dang khal ka zirh theinak dingah ṭawng dang ih kam 10000 ka ṭawng hnakin ka theihthiamnak thawi ṭawngkam kam nga ṭawng ka duh sawn.

20 Ka u le nau tla, theihthiamnak ah nauhak hlah uh; sikhalsehla mi dang parih lungput ṭhalo thu lamah cun nausen si uhla, theihthiamnak lamah cun pitling sawn uh.

21 Dān bu sungah hitin nganin a um,

«Hi minungpawl hnenah
Ram dang ṭawngpawl a ṭawngtu le ram dang mipawlih hmur hmang tahratin
Ka ṭawng ding;
Cutin tuah khal ningla in ngai cuang lo ding,»

tiah Bawipa in a ti.

22 Curuangah ṭawng phun dangdang cu zumtupawl hrangah si loin, zumlotupawl hrangih hminsinnak a si. Asinan profet thuphuan ih thuphuan theinak cu zumlotu hrangah si loin, zumtu hrangah a si sawn. 23 Curuangah kawhhran mi hmuahhmuah hmun pakhat ah rakhawmin nan zaten ṭawng phun dangdangih nan ṭawng asile, cu tawkah zir lo mi le zumlotu an rat tikah nannih cu mi-â an si an lo ti lo ding maw? 24 Asinan kawhhran mi zaten profet thuphuan ih thu an phuan a si ahcun, zumlotu le zir lo mi a ra luh tikah an zaten anih cu a sualnak an theisuakawter ding ih, an zaten anih cu an hmusuakawter ding. 25 Cutivekcun a thinlung ih thuthuppawl cu phuanlăng a si ding. Cule a băwkkhup ding ih, Pathian a be ding, cule nan hnenah Pathian a um taktak a si, tiah a thăn ding.

Mipi Khawmnak ih Thlarau Thilpek Hman

26 Ka u le ka nau tla, ziangtin a si? Nan khawmawk tikah pakhat cio in Sam hla sak ding siseh, thuzirh ding siseh, ṭawng dang siseh, Pathian-ih thuphuansuah mi siseh, ṭawng dang leh theinak siseh nan nei. Thil ziangkim hi tuahṭhatawktăwnnak hrangah tuah si seh. 27 Mi pakhat khat in ṭawng dang in a ṭawng asile, mi pahnih asilole a tambik ah mi pathum si hai seh, pakhat hnu pakhat ṭawng hai sehla, mi dang pakhat in an ṭawng let seh. 28 Asinan lettu a um lo asile, a ṭawngtu cu kawhhran sungah daiten um seh. Amah le amah hnenah le Pathian hnenah ṭawng seh.

29 Profetpawl cun pahnih asilole pathum in thuphuang hai sehla, a dangpawl in thu rak ṭhenfel hai seh. 30 Asinan a kiangih to mi dang hnenah thil pakhat khat phuanlăng asile, a hmaisapa cu daiten rak um men seh. 31 Ziangahtile mi kip in an zir ih thazang an ngah theinak dingah, nan zaten profet thuphuan in pakhat hnu pakhat thu nan phuang thei. 32 Profetpawlih thlarau cu profetpawlih thu hnuaiah a um. 33 Ziangahtile Pathian cu buainak Pathian a si lo ih, mithiangpawlih kawhhran hmuahhmuah ah daihnak a um vekin, anih cu daihnak Pathian a si sawn.

34 Kawhhranpawl ah nan nunaupawl cu daiten um hai seh, ziangahtile annih cu ṭawng sian an si lo, Dān ih a sim vekin, annih cu tuhlutawin um sawn men hai seh. 35 Thil ziangkhal zir an duh asile, inn ah an pasal sut hai seh; ziangahtile nunau hrangah kawhhran sungih ṭawng cu ningzakza a si.

36 Asilole Pathian kamsuakthu cu nanmah hnen ihsin maw a thăwk? Asilole nanmah hnen lawngah maw a thlen? 37 Mi zokhal amah le amah profet le thlarau mi ih a ruahawk asile, nan hnenih ka ngan mi thupawl hi Bawipaih thupek an si ti thei seh. 38 Asinan mi pakhat khat in cumi cu a theihthiam lo asile, thei loin um men seh.

39 Curuangah u le nau tla, profetpawl vekih thuphuan ding hi nasazetin câk uhla, ṭawng phun dangdangih ṭawng ding hi kham hlah uh. 40 Thil ziangkim hi mawi zet le fel zetin tuah si seh.

15

Khrih Thawhsalnak

1 Cuihtlunah u le nau tla, nan hnenih ka rak phuan zo mi, nan rak cohlan zo mi le nan dinnak khal a si mi thuthangṭha cu nan hnenih thănsal ka duh. 2 Nan hnenih ka rak phuan mi kamsuakthu kha nan cīn ringring ih nan zumnak kha ṭhathnemnak nei lo a si lo ahcun, cuih thuthangṭha hmangin rundam nan si fawn ding.

3 Ziangahtile a hmaisabikah keimah khalih ka rak cohlan ve mi cu nan hnenah ka rak lo pesâwngsin. Cumi cu hitin a si, Cathianghlim ih a sim vekin Khrih cu kan sualpawl hrangah a thi. 4 An phum ih, Cathianghlim ih a sim vekin a ni thumnak ah a thosal. 5 Cule anih cu Kefas hnenah a lang, cun mi hleihnih pawl hnenah a lang. 6 Cuihhnu ah vei khatte unau 500 lenglo hnenah a lang, cupawl lakih a tamsawn cu atu tiang an nung lai, asinan a hrekkhat cu an itthat zo. 7 Cuihhnu ah James hnenah a lang, cun apostolpawl hmuahhmuah hnenah a lang. 8 Cun a netabikah a tikcucān lo ih suak, keimah hnen khalah a lang ve.

9 Ziangahtile kei cu apostolpawl hmuahhmuah lakah a thupilobik ka si, Pathian kawhhran ka tiduhdah ruangah apostol tiih kawhtlak hman ka si lo. 10 Asinan ka sinak hi Pathian zangfahnak ruangih si ka si, ka parih zangfahnak i pek mi cu rahsuah nei lo a si lo. An zate hnakin tamsawn ka ṭuan; asinan a ṭuantu cu keimah ka si lo, ka hnenih um Pathian zangfahnak in a ṭuan sawn a si. 11 Curuangah keimah in siseh, annih in siseh, cuih thuthangṭha cu kan phuang ih nannih in cucu nan rak zum.

Mithi Thawhsalnak

12 Mithi lak ihsin Khrih a thosal ti hi kan phuang, cutin kan phuang ko na cingin nanmah lakih mi hrekkhat cun mithi thawhsalnak a um lo, tiah nan ti, ziangtin cutin nan ti thei? 13 Mithi thawhsalnak a um lo asile, Khrih khal a thosal lo tinak a si ding. 14 Cule Khrih a thawhsal lo asile, kan thusim mi cu zianghmanlo men a si ding ih, nan zumnak khal zianghmanlo men a si ding. 15 A si, kannih cu Pathian thutheihpitu diklo ih hmuh kan si ding, ziangruangahtile mithi an thawhsal taktak lo a si ahcun, a thosal lopi Khrih kha Pathian in Khrih a thosalter tiah Pathian thuhla kan rak theihter a si ding. 16 Ziangahtile mithi an thawhsal lo a si ahcun, Khrih khal a thosal lo tinak a si ding. 17 Khrih cu thawhter a si lo ahcun, nan zumnak cu ṭhathnemnak nei lo a si ding ih nanmah khal nan sualpawl ah nan rak um hrih lai tinak a si ding! 18 Cun Khrih ih a itthat mipawl khal an hlorál lan ta tinak a si ding. 19 Hi nunsung hrang lawngah Khrih ah ruahsannak kan neih asile, mi dang hmuahhmuah hnakih zangfahumzabik kan si ding.

20 Asinan atu ah Khrih cu mithi lak ihsin a thosal ih, a itthat mipawlih rah hmaisabikah a cang. 21 Mi pakhat ruangin thihnak a ra ih, mithi lak ihsin thawhsalnak khal mi pakhat ruangin a ra. 22 Adam ah mi hmuahhmuah an thih vekin, cutivek thothoin Khrih ah mi hmuahhmuah nunter an si ve ding. 23 Sihmansehla anmai cān cio ah mi kip an tho ding: Khrih cu rah hmaisabik a si, cuihhnu ah, Khrih a ratsal tikah Khrih ta a si mipawl an tho ding. 24 Cun Khrih in uknak hmuahhmuah, thuneihnak hmuahhmuah le huham cu zianghmanlo ah a cangter ding ih a uknak cu Pa Pathian hnenih a hlăn hnuah, san cemnak cu a ra thleng ding. 25 Ziangahtile anih cun a ral hmuahhmuah a ke hnuaiih a ret thluh hlanlo a uk ding. 26 Siatbăl ding mi a netabik ral cu thihnak a si. 27 Ziangahtile, «Pathian in thil hmuahhmuah cu Khrih-ih ke hnuaiah a ret ṭheh.» Asinan, «Thil hmuahhmuah cu Khrih-ih ke hnuaiah a ret ṭheh,» a ti tikah, thil hmuahhmuah amai ke hnuaiih rettu cu a huaptel ve lo ti a fiang.

28 Fapa hnuaiah thil ziangkim ret thluh a si tikah, Fapa hnuaiih thil ziangkim ret thluhtu Pathian hnuaiah Fapa amah rori khal a retaw ding ih, Pathian cu ziangkimih ziangkim a si thei ding.

29 Cuti a si lo ahcun, a thi mipawl hrangih baptisma a cotupawl hin, mithi an thawhsal riai lo asile, ziang an tuah pei? Ziangahso mithipawl hrangah baptisma an co? 30 Cule ziangahso kannihpawl hi ṭihphângih kan um ringring? 31 Khrih Jesu kan Bawipa ah nanmah ih tluangkhawnnak ka neih mi thawngin, ni tin ka thi a si ti ka nĕmhnget. 32 Milai sualawkdān vekih Efesa khua ah sahrangpawl thawn rak sualaw nungla teh, ka hrangah hlawknak ziang a um ding? Mithi an thawhsal lo asile,

«Ei uh sila in uhsi. Ziangahtile thaisun ah kan thi ding,»

tiah kan ti pei cu!

33 Bumin um hlah uh, «Miṭha lo pawl thawi kawmawknak cun nuncan ṭha a siatsuah.» 34 Dingfelnak ah ṭhangharh uhla, thilsual tuah hlah uh; ziangahtile mi hrekkhat cun Pathian an thei lo. Cuih thu cu nan ning a zahnak dingah ka sim a si.

A Sunglawi Mi Taksaruangpum

35 Asinan mi hrekkhat in, «Mithipawl cu ziangti vekin thawhter an si? Ziang taksaruangpum thawn an tho?» tiah an ti ding. 36 Nang mi-â, na tuh mi thlaici kha a thih lo ah cun a nung thei lo. 37 Cule thlaici na tuh tikah a ra um ding mi a kung kha na tuh lo, cuhnakin sangvut siseh, thlaici dang siseh, a ci lawng na tuh sawn a si. 38 Asinan Pathian in cuih thlaici hrangah a duhdān vekin kung a pe hai ih, thlaici hmuahhmuah hrangah anmai kung cio a pe fingfing.

39 Titsa hmuahhmuah hi titsa phun khat an si lo, minung titsa a dang, ramsapawlih titsa a dang, ngapawlih titsa a dang, vâtepawlih titsa khal a dang. 40 Van taksa a um ih, lei taksa khal a um; asinan van taksa ropitnak cu a dang ih, lei taksa ropitnak khal a dang. 41 Ni ropitnak a dang ih, thlapi ropitnak a dang, arsipawlih ropitnak khal a dang. Arsi le arsi khal ropitnak ah an bangaw lo.

42 Mithi thawhsalnak khal cutivek thotho a si. Taksaruangpum cu ṭawih thei in tuh a si ih, ṭawih thei loin thawhter a si. 43 Taksaruangpum cu santlailo zetih tuh a si ih, ropi zetin thawhter a si. Cak lo zetih tuh a si ih, huham neiih thawhter a si. 44 Lei taksaruangpum cu lei taksaruangpum in tuh a si ih, thlarau taksaruangpum ih thawhter a si. Lei taksaruangpum a um ih, thlarau taksaruangpum khal a um. 45 Cumi cu, «Milai hmaisa Adam cu a nung mi lei taksaruangpum ah a cang,» tiih ngan vek khan a si. Adam neta cu nunnak petu thlarau a si.

46 Sikhalsehla a pakhatnak cu thlarau lam milai a si lo, anih cu lei milai a si sawn, cuihhnu ah thlarau lam milai a ra. 47 Milai pakhatnak cu leilung mi, leivut ihsin tuah mi a si; a pahnihnak milai cu van ihsin a ra mi Bawipa a si. 48 Leivut ih tuah mi milaipawl cu, cuih leivut ih tuah mi milaipa vek kha an si. Cule van ih um mipawl cu, cuih van milaipa vek kha an si. 49 Leivut ih tuah mi milai băngnak kan ken bangin, van milaipa băngnak khal kan keng ding a si.

Kan Nehnak Netabik

50 U le nau tla, atu ah hihi ka sim a si, milai titsa le thisen cun Pathian uknak cu ro ah a co thei lo ih, a ṭawih thei mi in a ṭawih thei lo cu ro ah a co thei fawn lo. 51 Ngai hnik uh, thuthup ka lo sim: kan zaten kan itthat ṭheh lo ding, kan zaten tidanglam kan si leh sawn ding. 52 Tawtawrawt netabik a ăwn tikah rei lo te sungah, mit ṭhep karah tidanglam kan si ding. Ziangahtile tawtawrawt a awn ding ih mithipawl cu ṭawih thei loin an tho ding, cule tidanglam an si ding. 53 Ziangahtile a ṭawihrál thei mi hi taksaruangpum hin a ṭawih thei lo mi a hruh tengteng ding ih, a thi thei mi hi taksaruangpum hin a thi thei lo mi a hruh tengteng ding.

54 Cule a ṭawihrál thei mi hin a ṭawihál thei lo mi a hruh ih a thi thei mi hin a thi thei lo mi a hruh tikah,

«Thihnak cu nehnak in a dawlh ṭheh,
55 Maw Thihnak, na mi hĕnnak hmanrua cu khuiah so?
Maw Mithi khua, khuiah so na nehnak cu?»

tiih ngan mi cu a thlengkim ding.

56 Thihnakih mi hĕnnak hmanrua cu sual a si ih, sualih cahnak cu Dān hi a si. 57 Asinan kan Bawipa Jesu Khrih zarih nehnak in petu, Pathian hnenah lungawi thu um seh.

58 Curuangah ka duhdawt mi u le nau tla, nan ṭuanbăngnak cu Bawipa ah a lak men a si lo ti nan theih ruangah dinghnget uh, ṭhawn theih loin um uhla, catbang loin Bawipaih hnaṭuannak ah pe aw sinsin uh.

16

Mithiangpawl hrangih Thawhhlawm

1 Atu ah mithiangpawl hrangih thawhhlawm khăwn thuhla ah, Galatia peng ih um kawhhranpawl hnenih thu ka rak pek vek khan nannih khal in tuah ve uh. 2 Zarh khat ih a ni khatnak ah mi kip in malsawm nan dawndān cio vekin rak rethran uhla, rak khâwl cia uh, cutin nan hnenih ka rat tikah sumpai nan khăwn a ṭul nawn lo ding. 3 Cule ka rat tikah siang zetih nan thilpek cu, Jerusalem ih fehpitu dingah nan ca sungih rem nan ti mipawl cu ka thlah hai ding. 4 Keimah rori feh a remcān asile, annih cu ka zawngah an feh ve sawn ding.

Khualtlawng dingih Ruahmannak

5 Masidonia peng ka paltlăng tikah nan hnenah ka ra ding, ziangahtile Masidonia peng cu ka paltlăng ding a si. 6 Cule ka khualtlawnnak khuitawk hmun khalih in thlah theinak dingah, thlatang sung hmuahhmuah nan hnenah ka câm khal a si men thei. 7 Ziangahtile atu ka feh phahih nanmah lo hmuh men cu ka duh lo; neta ah Bawipa in i sian asile, nanmai hnenih cān tawkfang cām ding ka beisei sawn a si. 8 Asinan Pentikos puai tiang Efesa khua ah ka cām ding. 9 Ziangahtile ka hrangah a kau zet mi le hmual nei sângka a áwngaw ih, dodaltu tampi khal an um ve.

10 Timothy a ra thlen asile, thlaphâng loih nan hnenih a um theinak dingah rak ngaihsak uh; ziangahtile anih cun Bawipaih hna ka ṭuan vekin a ṭuan ve. 11 Curuangah zohman in amah cu nautat hlah hai seh. Ka hnenih a rat theinak dingah hnangamten thlah uh; ziangahtile unaupawl zawngih amah a rat ding cu ka thlir a si.

12 Kan unaupa Apollos thuhla ah unaupawl zawngah nan hnenih ra dingin nasazetin tha ka pe, asinan atu ah cun rat a duh lo, cān remcâng a neih tikah a ra leh ding.

Thazang Peknak Netabik

13 Ralring uh, zumnak ah dinghnget uh, pacang zetin um uhla, cak zetin um uh. 14 Nan tuah mi hmuahhmuah cu duhdawtnak ih tuah si seh.

15 U le nau tla, Stefanas teih sungkua cu Akaia peng ih rah hmaisabik an si ti nan thei. Annih cu mithiangpawl rawngbawlsaknak ah an rak peaw zet. 16 Cuvek mipawl hnenah le zokhal kan hnaṭuanpi a si mi le nasazetih hna a ṭuantupawl hnenah tlulut dingin ka lo ngen a si. 17 Stefanas, Fortunaṭas le Akaikas an rak thlen ruangah ka lung a awi, ziangahtile nannih ih nan rak tuah lo mipawl kha annih in an rak pe thluh. 18 Ziangahtile annih cun ka thlarau le nan thlarau cu tha thar an pe. Curuangah khavek mipawl kha rak lawm uh.

Cibaibûknak Netabik

19 Asia peng ih kawhhranpawl hmuahhmuah in cibai an lo bûk. Akuila le Prisila in, an inn ih a um mi kawhhran thawn lungawi zetin Bawipa ah cibai an lo bûk. 20 Unaupawl hmuahhmuah in cibai an lo bûk.

A thianghlim mi hnămawknak thawn cibaibûk aw uh.

21 Keimah, Paul in hih cibaibûknak hi ka kut rori in ka ngan.

22 Zokhal Bawi Jesu Khrih a duhdaw lo asile, anih cu ^aAnathema in um seh. ^bMaranatha!

16:22^a Anathema: Grik ṭawng a si ih, «Camsiat,» tinak a si.

16:22^b Maranatha: Aramik ṭawng a si ih, «Bawipa ra aw,» tinak a si.

23 Bawi Jesu Khrih zangfahnak cu nan hnenah um seh.

24 Khrih Jesu ih um nan zate hnenah ka duhdawtnak um hram seh. Amen.