BibleThianghlim – SUAHLANNAK

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

SUAHLANNAK

1 2 3 4 5 6 7 8 9 10
11 12 13 14 15 16 17 18 19 20
21 22 23 24 25 26 27 28 29 30
31 32 33 34 35 36 37 38 39 40

A ngantu: Mosi
A huap sung cān: B.C. 1446 hrawng
Ngan kum: B.C. 1446 le 1400 karlak

Semtirnak thuanthu ih thil cang mi netabikpawl le Suahlannak thil cang mi hmaisabikpawl karlak hi kum 400 hrawng a rei. Himi tikcucān sungah Pathian in Abraham tesinfapawl karhzaiter dingin a thutiamkam a rak kilhim. Israel-mipawl cu Izip ah miphun tumpi ah an rak cang. Anmahpawl Kanaan ram peknak ding thutiamkam tlamtlinternak ding Pathian hrangah cān a ra thleng. Asinan thubuai tumpi pakhat a rak um. Israel-mipawl cu Izip-mipawl le an siangpahrang hrohrang zet, Faro-ih sál an si. Suahlannak cabu in Izip ihsin anmah hruaisuak ding le Kanaan zin ih a hruai hai dān Pathian ih hnaṭuan thuanthu maksak a rêl. Hih cabu hin Pathian in Israel thawi pehzăwmawknak hleice neih a tum thu a simfiang fawn.

Bung 1-18 in Israel-mipawl runsuahnak thu a rêl. A hmaisabikah Pathian in Israel hruaitu si dingah Mosi a humhim ih a timlam. Cun hremnak phun hra thawn Izip hrem dingin Pathian in Mosi a hmang. Hremnak netabikah Pathian in Izip-mipawlih fatir a that, asinan Israel-mipawl cu a zuah hai. Israel-mipawl cu tuufa no raithawinak thisen in humhim an si. Israel-mipawl an pawhsuak tikah, Izip-mipawl hnen ihsin anmah runsuak dingah Pathian in Tipi Sen a ṭhencat.

Bung 19-40 ah Israel-mipawl in Sinai ih an tawnteh mi ngan a si. Hi tawkah Jehovah in a ropitnak le «puithiam miphun» dinhmun ih rawng an bawlnak ding Israel-mipawl hrangih a thil tum khal a phuanglang (19:6). Anih in cuih miphun thawn zangfahnak ih khat in thukham a tuah. Cumi in a dānpawl parih thulunnak a phût. Asinan cumi in anmah lakih Pathian cencilhnak hamṭhatnak a pe fawn. Biakbûk ah anih cu a cêng ding. Sikhalsehla hi Biakbûk sak an thăwk hlanah mi senpi in thilsual an tuah. Milem an bia, cutin Pathian in thihnak in anmah lakih mi tampi a hrem. Cun Biakbûk an sak ih, Pathian in Israel-mipawl a ngaidam hai, cule Biakbûk parah a ropitnak a rung ṭum.

Jesu Khrih ih runsuah kan sidān cu Suahlannak cabu ah a thlâm kan hmu. Anih cun Setan sál ihsin in runsuak. Himi in kan aiawh dingih Jesu-ih thisen luannak a huaptel. Thulungten amah kan rian ih, kan aipuang ih, leitlun ah a ropitnak kan lăngternak dingah, Khrih in in zalenter a si. Israel-mipawl vekin, Khristianpawl cu «rawngbawl dingih rundam» kan si.

Thuhlawm Ṭhen

I. Izip ihsin le harsatnak dangpawl ihsin Pathian in Israel a runsuak (bung 1-18)
II. Pathian in Israel kha amah thawn pehtlaihawknak thar ah a hruai (bung 19-40)

1 Hipawl hi Jakob thawi Izip ram ih a thlengtu Israel tefapawlih hmin an si. Mi kip anmai sungkua cio thawn an thleng. 2 Cupawl cu Reuben, Simeon, Levi le Judah, 3 Issakar, Zebulun le Benjamin, 4 Dân, Naftali, Gad le Asher tla an si. 5 Jakob-ih tesinfapawl cu an zaten mi 70 an si, ziangahtile Joseph cu Izip ah a rak um cia. 6 Cule Joseph le a unaupawl hmuahhmuah le amai san minung hmuahhmuah an thi thluh. 7 Asinan Israel tefapawl cu ci tampi an thlah ih, a tawr le sengin an ṭhang, an karhzai ih, nasazetin an cak deuhdeuh, cule annih cu ram sungah an khat ṭheh.

Izip Ram ih Israel Tuarnak

8 Joseph thei lo tu Izip uktu siangpahrang thar a hung suak. 9 Cule anih in a mipawl hnenah, «Zoh hnik uh, Israel tefapawlih miphun cu kanmah hnakin an tam in an caksawn. 10 Ra uh, anmah cu fim zetin tawlrel uhsi, culoasile an karhzai ding ih, hitin a si ding, ral do cān ah kan ralpawl lamah ṭang tahratin in do ding ih, ram ihsin an suak pang ding,» tiah a ti. 11 Curuangah an phurritpawl thawi anmah zawnzaiter dingin an tlunah khâwngtupawl an ruat. Cule Faro hrangah thilri retnak khawpi Pithom le Raamses an dĭn. 12 An zawnzaihter deuhdeuh le an pungzai ih an ṭhang sinsin riangri. Cule Israel tefapawl in anmahpawl cu an râp. 13 Cule Izip-mipawl in Israel tefapawl cu harsa zetin hna an ṭuanter. 14 Cule annih in a har zet mi sáltannak, tlăk, tlakrawh le ló ih hnaṭuan phunkim ṭuannak in an nun cu har fualfo ko an tuah. An ṭuanter mi hnaṭuan hmuahhmuah cu an harsa zet.

15 Cun Izip siangpahrang cun Hebru nausartupawl a sim, an lakih pakhat ih hmin cu Shifarah a si ih, a dangih hmin cu Puah a si. 16 Cule siangpahrang in, «Hebru nunaupawl nau nan hrinter tikah nau hrinnak hmun nan zoh pei ih, naute cu fapa asile nan that pei. Asinan naute cu fanu asile a nung pei,» tiah a ti. 17 Asinan nausartupawl cun Pathian an ṭihzah ruangah Izip siangpahrang thupek mi vekin tuah loin mipa nautepawl cu an zuah. 18 Cule Izip siangpahrang in nausartupawl cu a ko hai ih an hnenah, «Ziangruangah hivek thil tuahin, mipa nautepawl tla nan zuah?» tiah a ti.

19 Cule nausartupawl in Faro hnenah, «Ziangruangahtile Hebru nunaupawl cu Izip nunaupawl vek an si lo, ziangahtile annih cun an áwlsam ih an hnenih nausartupawl an thlen hlanah fa an hring,» tiah an ti.

20 Curuangah nausartupawl cu Pathian in ṭha zetin a zoh hai ih, miphun cu an karhzai, cule an cak deuhdeuh. 21 Cun hitin a si, nausartupawl in Pathian an ṭihzah ruangah anih in an hrangah sungkuapawl tla a pe.

22 Cule Faro in a mipawl hmuahhmuah cu, «A suak mi fapa kip cu tiva sungah nan hlăwn pei ih, fanu kip cu nan zuah pei,» tiin thu a pe.

Mosi a Suak

1 Levi hnám ihsin mi pakhat a feh ih, Levi fanu pakhat nupi ah a ṭhi. 2 Cule nunau cu fa a vun ih fapa a hring. Cun cu nu in amah cu naute hmel ṭha a si ti a hmuh tikah thla thum sung a thup. 3 Asinan naute a thuh thei nawn lo tikah naute hrangah phaiphengpawl thawi a tuah mi bâwm a la ih katṭaya le thingthlîng thawn a erh. Naute cu cumi sungah a ret ih tiva kap câlterûl lakah a ihter. 4 Cule a unu cu naute parah ziang a cang pei ti thei dingin hlaralah a ding.

5 Cun Faro fanu cu khawlhaw dingin tiva ah a vung ṭum. Cule a falapawl cu tiva kap tluanah an feh. Cule câlterûl lakih bawmte a hmuh tikah va la dingin a siahhlawhnu a hei thlah. 6 Cule cumi cu a ăwn tikah naute a hmu ih, ngai hnik, mipa naute cu a ṭap. Cun a parah lainatnak a nei ih, «Himi hi Hebru-mipawlih fātepawl lakih pakhat a si hi,» tiah a ti.

7 Cun Faro fanu hnenah a unu in, «Naute hnawi lo peksaktu dingah Hebru nunau lak ihsin hnawi fawhtu ding na hnenih ko dingin ka feh pei maw?» tiah a ti.

8 Cule Faro fanu in a hnenah, «Feh aw,» tiah a ti. Cun cu nute cu a feh ih naute nu cu a ko. 9 Cun Faro fanu in cu nuih hnenah, «Hih naute hi lain hnawi in peksak awla, na hlawhman ka lo pe ding,» tiah a ti. Cule cu nu cun naute cu a la ih a hnawi a fawh. 10 Cule naute cu a ṭhang ih, a nu in Faro fanu hnenah a hruai, cule a fapa ah a cang. Cun cu nu in, «Amah cu tidai ihsin ka hnuhsuak ruangah,» tiin a hmin ah Mosi a sak.

Mosi in Izippa a That

11 Cu laiah hitin a si, Mosi cu a pitlin tikah a unaupawl hnenah a fehsuak ih an phurritpawl tla a zoh. Cule a unaupawl lakih pakhat a si mi Hebru-mi pakhat cu Izippa pakhat in a vuak rero lai a hmu. 12 Cutikah khaw dang a tang ih, zohman a hmuh lo tikah Izippa cu a that ih vunnel sungah a thup. 13 Cule a ni hnihnak a fehsuak tikah, ngai hnik, Hebru-mi mi pahnih cu an sualaw rero, cule a mawhtupa hnenah, «Ziangah so na hawipi na vuak rero?» tiah a ti.

14 Cun anih in, «Kan tlunih uktu le thuṭhentu ah zo in a lo tuah? Izip-mi na rak thah bangin thah i tum maw si?» tiah a ti.

Cutikah Mosi cun a ṭih ih, «Hih thil cu theihngah taktak a si hi!» tiah a ti. 15 Faro in himi thu a theih tikah Mosi cu thah a tum. Asinan Mosi cu Faro hmaika ihsin a tlân ih Midian ram ah a va cêng, cule tikhur kiangah a to.

16 Midian puithiam in fanu pasarih a nei. Cun cupawl cu an ra ih tidai an khai, cule an paih rante rual tidai pe dingin tikuangpawl an thunkhat. 17 Cun rankhāltupawl an ra ih annih cu an hnawhsuak. Asinan Mosi cu a ding ih anmah a bawm, cule an rante rual cu tidai a pe.

18 An pa Reuel hnen an thlen tikah an pa cun, «Ziangtin tuihsun cu nan va thleng tuan ve?» tiah a rak ti hai.

19 Cule annih in, «Izippa pakhat in rankhāltupawl kut ihsin in runsuak ih tidai tiang hman khawp ko in khaisak ih rante rual tla tidai in peksak,» tiah an ti.

20 Cutikah anih in a fanupawl hnenah, «Amah cu khuiah so a si? Ziangruangah cu pa cu nan tān ta men? Amah cu rawl ei dingin ko uh,» tiah a ti.

21 Cun Mosi cu cu pa hnenih um dingin a lung a kim ih, cu pa cun Mosi hnenah a fanu Zipporah a pek. 22 Cule cu nu in fapa pakhat Mosi a hrinsak ih a hmin ah ^aGershom a sak, ziangahtile, «Keimah cu ram dang ah mikhual ka si,» tiah a ti.

2:22^a Gershom: «Cutawk ih mikhual» tinak a si.

23 Ni tampi a rei hnuah hitin a rak cang, Izip siangpahrang a thi. Cun Israel tefapawl cu sáltannak ruangah an hrûm ih an ausuak. Cule sáltannak ruangih an aunak cu Pathian hnenah a thleng. 24 Cule Pathian in an hrūmnak a thei ih, Abraham, Isak le Jakob thawi a thukham cu Pathian in a máng. 25 Cule Israel tefapawl cu Pathian in a zoh hai ih, Pathian in a thei hai.

Thingbŭk Alh le Mosi

1 Mosi cu Midian puithiam, a pu Jethro-ih rante rual a khāl. Cule ramṭhing nitlaknak lamah a rante rual a hruai ih, Pathian tlang, Horeb ah a thleng. 2 Cule a hnenah Jehovah-ih vancungmi cu thingbŭk ihsin meisa alh lakah a lang. Cule anih in a zoh ih, ngai hnik, thingbŭk cu a kāng rero nân, thingbŭk cu a ziam lo. 3 Cule Mosi in, «Ka va pial ding ih, hi hmuhnak maksak hi ka zoh hnik pei, ziangahso thingbŭk cu a kangrál lo,» tiah a ti.

4 Cule zoh dingin a va pial kha Jehovah in a hmuh tikah, Pathian in thingbŭk lak ihsin amah a ko ih, «Mosi, Mosi!» tiah a ti.

Cule anih in, «Hinah ka um,» tiah a ti.

5 Cun anih in, «Hi hmun rak naih hlah. Na ke ih na kedam phawih aw, ziangahtile na dinnak hmun hi lei thianghlim a si,» tiah a ti. 6 Cule anih in, «Keimah cu na paih Pathian, Abraham Pathian, Isak Pathian le Jakob Pathian ka si,» tiah a ti. Cule Pathian zoh ding a ṭih ruangah Mosi cun a hmai a thup.

7 Cule Jehovah in, «Izip ih a um mi ka mipawl palbĕt an sinak fiangten ka hmu zo ih, anmah khâwngtupawl ruangih an aunak ka thei zo, ziangahtile an zăwnzaihnakpawl ka thei. 8 Cule Izip-mipawlih kut ihsin anmah runsuak dingah le cutawk ram ihsin a ṭha mi le a kau mi ram, hnawiti le khuaitizu luannak ram, Kanaan-mipawl, Heth-mipawl, Amor-mipawl, Periz-mipawl, Hiv-mipawl le Jebus-mipawlih hmun ah anmah hruaisuak dingin ka rung ṭum zo. 9 Curuangah ngai hnik, Israel tefapawlih aunak ka hnenah a thleng zo ih, Izip-mipawl in palbĕtnak ih anmah an palbĕtzia ka hmu zo. 10 Curuangah atu ah ra aw, cule Izip ihsin ka mi Israel tefapawl hruaisuak dingah Faro hnenah ka lo thlah ding,» tiah a ti.

11 Asinan Mosi in Pathian hnenah, «Faro hnenah fehin le Izip ihsin Israel tefapawl hruaisuak dingah zo so ka si?» tiah a ti.

12 Cutikah anih in, «Na hnenah ka um rori ding ih, himi hi ka lo thlahnak hminsinnak a si ding: Izip ihsin mipi na hruaisuak ṭheh hnuah hi tlang ah Pathian na rian ding a si,» tiah a ti.

13 Cun Mosi in Pathian hnenah, «Ngai hnik, Israel tefapawl hnenah feh in an hnenah, ‹Nan pupápawlih Pathian in nan hnenah i thlah,› tiih ka sim tikah, ‹A hmin zo so?› in ti asile, an hnenah ziangso ka sim ding?» tiah a ti.

Keimah cu Keimah ka Si

14 Pathian in Mosi hnenah, «KEIMAH CU KEIMAH KA SI,» tiah a ti. Cule anih in, «Israel tefapawl hnenah, ‹KEIMAH in nan hnenah i thlah,› tiin na va ti hai pei,» tiah a ti. 15 Cuihhleiah Pathian in Mosi hnenah, «Israel tefapawl hnenah hitin na sim pei, ‹Nan pupápawlih Pathian Jehovah, Abraham Pathian, Isak Pathian le Jakob Pathian in nan hnenah i thlah. Hihi ka hmin a si kumkhua ih, himi hi san hmuahhmuah tiangih keimah in cīn ringring nak ding a si.› 16 Feh awla Israel upapawl fĭnkhawm aw, cule an hnenah, ‹Nan pupápawlih Pathian Jehovah, Abraham, Isak le Jakob Pathian cu ka hnenah a lang ih, «Ka lo vehvai taktak zo ih, Izip ah nan parah ziang tuah a si ti ka hmu zo; 17 cule Izip ram ih zăwnzaihnak ihsin Kanaan-mipawl, Heth-mipawl, Amor-mipawl, Periz-mipawl, Hiv-mipawl le Jebus-mipawl ih ram, hnawiti le khuaitizu luannak ram ah ka lo hruaisuak ding,» tiah ka rak sim zo,› tiah sim aw. 18 Cun na aw an ngaithla ding, cule nangmah le Israel upapawl cu Izip siangpahrang hnenah nan ra ding ih a hnenah, ‹Hebru-mipawlih Pathian Jehovah in kanmah in táwng zo ih, atu ah kan Pathian Jehovah hnenih raithawi dingin zangfahten ni thum feh ramṭhing ah in fehter aw,› tiah nan ti pei. 19 Asinan kut cak rori hmang hmanin Izip siangpahrang in a lo suakter lo ding ti ka thei. 20 Cule ka kut ka hawi ding ih a sungih ka tuah ding mi ka mangbangza thil hmuahhmuah thawn Izip ka vaw ding, cule cumi hnuah a lo fehter ding. 21 Cule Izip-mipawl mithmuhah hi miphun hi duhsaknak ka pe ding. Cule hitin a si ding, nan feh tikah kut lawngin nan feh lo ding. 22 Cuhnakin nunau pakhat cio in a innhnen le a inn ih a cêng mi hnen rori ah ngun thilri, sui thilri le hnipuan a dil pei ih nan fapapawl le nan fanupawl nan hruhter sawn pei. Cutin Izip-mipawl nan răm ding a si,» tiah a ti.

Hminsinnakpawl

1 Mosi in a sawn ih, «Asinan ngai hnik, in zum lo ding ih ka aw khal an ngai lo ding, ziangahtile, ‹Na hnenah Jehovah a rak lang lo,› an ti ding,» tiah a ti.

2 Cule Jehovah in a hnenah, «Na kut ih um mi kha ziang a si?» tiah a ti.

Anih in, «Kianghrăwl,» tiah a ti.

3 Cule anih in, «Cucu lei ah hlăwn aw,» tiah a ti. Cutin lei ah a hlăwn ih cumi cu rul ah a cang, cule cumi cu Mosi in a tlansan. 4–5 Cun Jehovah in Mosi hnenah, «Na kut suah awla a mei in kai aw, cuticun an pupápawlih Pathian Jehovah, Abraham Pathian, Isak Pathian le Jakob Pathian cu na hnenah a lang ti an zum ding,» tiah a ti. Cule a kut a suah ih a kai ih, a kut ah kianghrăwl ah a cang.

6 Cuihhleiah Jehovah in a hnenah, «Na kut in na âwm pur aw,» tiah a ti. Cule a kut in a âwm a pur ih a laksal tikah, ngai hnik, vur bangin a kut a phâr. 7 Cule Jehovah in, «Na kut in na âwm pur lala aw,» tiah a ti. Cule a kut in a âwm a pur lala, cule a kut cu a âwm ihta a hnuksuak tikah, ngai hnik, a titsa dang vekah a cangsal. 8 «Cun hitin a si ding, an lo zum lo ih, hminsinnak hmaisa thucah an ngai lo a si khalle, a netasawn hminsinnak thucah cu an zum ding. 9 Cule hitin a si ding, hi hminsinnak pahnih khal zum loin simaw, na aw ngai loin simaw an um asile tiva ihsin tidai na la pei ih, leiro parah na thle pei. Cule tiva ihsin na lâk mi tidai cu leiro parah thisen ah a cang ding,» tiah a ti.

10 Cun Mosi in Jehovah hnenah, «Maw ka Bawipa, kei cu tuih hlanah siseh, na siahhlawh hnenih na ṭawng hnuah siseh, keimah cu kamnâl mi ka si lo, ṭawng hnâng le awhak ka si sawn,» tiah a ti.

11 Cutikah Jehovah in a hnenah, «Minung kâ cu zo in so a tuah? Asilole ṭawng thei lo, hnaset, mitvâng le mitcaw cu zo in a tuah? Keimah, Jehovah ka si lo maw? 12 Curuangah atu ah feh awla, na kâ cu ka umpi ding ih na sim ding mi ka lo zirh ding,» tiah a ti.

13 Asinan anih in, «Maw ka Bawipa, zangfahten thucah cu mi dang hmangin thlah mai aw,» tiah a ti.

14 Cule Jehovah thinhengnak cu Mosi dokalhin a alh ih, «Levi-mi Aaron cu na unau a si lo maw? Ṭawng a thiam zet ti ka thei. Cun zoh hnik, amah khal nangmah lo táwng dingin a ra rero lai. Nangmah a lo hmuh tikah a thinlung ah a lung a awi ding. 15 A hnenah thu na sim pei ih a kâ ah ṭawngkampawl na ret pei. Cule na kâ le amai kâ cu ka umpi ding ih nan tuah ding mi ka lo zirh ding. 16 Cutin anih cu miphun hnenah na hrangih ṭawngtu a si ding. Cule amah rori cu na hrangah kâ vek a si ding ih nang cu a hrangah Pathian vek na si ding. 17 Cule na kut in hi kianghrăwl hi na keng pei ih, cumi thawn hminsinnakpawl na tuah ding a si,» tiah a ti.

Izip ah Mosi a Kir

18 Mosi cu a feh ih a pu Jethro hnenah a kirsal, cule a hnenah, «Zangfahten Izip ram ih a um mi ka unaupawl, an nung lai maw ti vehvai dingin an hnenah i fehter in, i kirter aw,» tiah a ti.

Cule Jethro in Mosi hnenah, «Hnangamten feh aw,» tiah a ti.

19 Cule Jehovah in Midian ih Mosi hnenah, «Feh aw, Izip ram ah kir aw, ziangahtile na nunnak hawltu mipa hmuahhmuah an thi thluh zo,» tiah a ti. 20 Cun Mosi in a nupi le a fapapawl cu a hruai ih lāk parah a toh hai, cule Izip ram ah a kir. Cun Mosi in a kut in Pathian kianghrăwl cu a keng. 21 Cule Jehovah in Mosi hnenah, «Izip ram ih na kirsal tikah na kut ih ka lo pek mi thilmak hmuahhmuah hi Faro hmaiah na tuah tengteng pei. Asinan mipi fehter lo dingin a thinlung ka hakter ding. 22 Cun Faro hnenah, ‹Jehovah in hitin a ti, «Israel cu ka fapa, ka fatir a si. 23 Cule na hnenah, ‹Ka fapa cu in rian dingah feh seh,› tiah ka lo sim. Asinan fehter ding na el a si ahcun, ngai hnik, na fapa, na fatir ka that ding,» tiah Jehovah in a ti,› tiah sim aw,» tiah a ti.

Mosi Fapa Serh Zim Tannak

24 Cule lamzin ah hitin a si, amah cu riahbûk ah Jehovah in a táwng ih thah a tum. 25 Cun Zipporah cun ṭêklung hriam a la ih, a fapaih serhvun a tansak ih Mosi ke a daiter, cule, «Nangmah cu ka hrangah thisen pasal rori na si!» tiah a ti. 26 Cutin Jehovah in Mosi cu a fehter. Cun a nupi in, serh zim tannak ruangah, «Nangmah cu thisen pasal na si!» tiah a ti.

Jehovah in Aaron a Bia

27 Jehovah in Aaron hnenah, «Mosi táwng dingah ramṭhing ah feh aw,» tiah a ti. Cule anih cu a feh ih, Pathian tlang ah amah cu a va táwng ih a hnam. 28 Cule Mosi in Aaron hnenah amah thlahtu Jehovah kamsuakthu hmuahhmuah le tuah dingih thu a rak pek mi hminsinnak hmuahhmuah kha a sim. 29 Cun Mosi le Aaron cu an feh ih Israel tefapawlih upapawl hmuahhmuah an kokhawm. 30 Cule Aaron in Mosi hnenih Jehovah in a rak sim mi kamsuakthu hmuahhmuah tla cu a sim. Cun mipi mithmuhah hminsinnakpawl tla a tuah. 31 Cutikah mipi in an zum, cule Jehovah in Israel tefapawl a rak vehvai hai ih an zăwnzaihnak tla a hmu ti an hna ih an theih tikah an kûn ih, an bia.

Faro Hmaiah Mosi le Aaron

1 Cumi hnuah Mosi le Aaron cu an feh ih Faro hnenah, «Israel-ih Pathian Jehovah in, ‹Ka mipawl in ramṭhing ah ka hnenih puai an tuah theinak dingah feh hai seh,› tiin a sim,» tiah an ti.

2 Cule Faro in, «Israel-mipawl fehter dingah a aw ka ngai ding mi Jehovah cu zo a si? Jehovah ka thei lo, Israel-mipawl khal ka fehter hai lo ding,» tiah a ti.

3 Cutikah annih in, «Hebru-mipawlih Pathian in in táwng zo. Zangfahten ni thum feh ramṭhing ah in fehter awla, kan Pathian Jehovah hnenah rai kan thawi ding, culole nathrisia simaw, ralnâm simaw kan parah a tla pang ding,» tiah an ti.

4 Cun Izip siangpahrang in an hnenah, «Mosi le Aaron, ziangahso mipi hnaṭuan lo ko nan tuah? Nanmai ritphurh ah kirsal uh,» tiah a ti. 5 Cule Faro in, «Zoh uh, atu ah rammipawl an tam zet ih anmah cu an ritphurh nan cawlhter!» tiah a ti.

6 Cule cuih ni thotho ah Faro in mipi khâwngtupawl le an hotupawl hnenah, 7 «Tuihhlan bangin minungpawl tla tlakrawh tuahnak ding cangpâwl nan pe nawn lo pei. Annih cu feh hai sehla, anmai hrangah cangpâwl khawm hai seh. 8 Cule tuih hlanih an rak tuah mi zăt tlakrawh nan tuahter ding a si. Nan ṭhumsak ding a si lo. Ziangahtile, annih cu an zang a zêl. Curuangah, ‹Kan Pathian hnenah raithawi dingin kan feh ding,› tiin an au. 9 Mipapawl parah hnaṭuan tamsin ṭhum si seh, cutin cumi ah ṭuanbāng hai sehla, bumnak ṭawngkampawl ngai hlah hai seh,» tiin thu a pe hai.

10 Cule mipi khâwngtupawl le an hotupawl cu an fehsuak ih minungpawl hnenah, «Faro in hitin a sim, ‹Cangpâwl ka lo pe lo ding. 11 Feh uh, nan hmuh theinak ihta nanmah ten cangpâwl la uh. Asinan nan hnaṭuan cu zianghman ṭhumsak si hlah seh,› tiin a sim,» tiah an ti. 12 Cutin mipi cu Izip ram zate hrawhsuak thluhin cangpâwl aiah fângko khawm dingah an vâkdarh. 13 Cule mikhâwngtupawl in, «Cangpâwl a um lai vekin nan hnaṭuan, nan ni tin hnaṭuan ṭuan ṭheh uh,» tiin hmanhmawh dingin an năwr. 14 Faro-ih mikhâwngtupawl in Israel tefapawl hotu dingih an ruat mipawl cu vua-in, «Ziangruangah tuih hlan vekin mizan le tuihsun hmuah nan tlakrawh tuah ṭuanvo nan rak ṭheh lo?» tiah an sut.

15 Cun Israel tefa hotupawl cu Faro hnenah an ra ih, «Ziangah so na siahhlawhpawl hi hivekih in tuah? 16 Na siahhlawhpawl hnenah cangpâwl pek a si lo ih, kan hnenah annih in, ‹Tlakrawh tuah uh!› tiah in ti. Cule ngai hnik, nangmai mipawlih tisual a si sawn nân, na siahhlawhpawl vuak an si,» tiin an au.

17 Asinan anih in, «Nannih cu mizāngzêl nan si, mizāngzêl nan si! Curuangah, ‹Jehovah hnenah raithawi dingin feh uhsi,› tiah nan ti. 18 Cule atu ah feh uhla ṭuan uh, cangpâwl pek nan si lo ding, cuticingin nan tlakrawh tuah ding mi zât nan tuah thotho ding a si,» tiah a ti hai. 19 Cule Israel tefa hotupawl cun, «Nan ni tin ṭuanvo zât tlakrawh cu ṭhum a si lo ding,» tiih sim an si hnu cun an dinhmun a sia ti an hmu.

20 Cule Faro hnen ihsin an ra suah tikah, anmah táwng dingih ding Mosi le Aaron cu an táwng. 21 Cule annih in an hnenah, «Jehovah in lo zoh in thu lo ṭhen seh. Ziangruangahtile in that dingin an kut ih ralnâm ret dingah Faro mithmuhah le a siahhlawhpawl mithmuhah nanmah in fihnungza ah in tuah zo a si,» tiah an ti.

22 Cuticun Mosi cu Jehovah hnenah a kirsal ih, «Bawipa, ziangahso hi mi senpi hnenah buainak na thlen? Ziangruangah so i rak thlah? 23 Ziangahtile na hmin in thusim dingin Faro hnen ka thlen ihsin anih in hi mi senpi hnenah thil ṭhalo a rak tuah. Nang in le na mipawl na runsuak hai fawn si lo,» tiah a ti.

Pathian Thutiamkam

1 Jehovah in Mosi hnenah, «Atu ah Faro hnenih ka tuah ding mi na hmu ding. Ziangahtile a cak mi kut in anmah a fehter hai ding ih, a cak mi kut in a ram ihsin anmah a dawisuak ding,» tiah a ti.

2 Cule Pathian in Mosi a bia ih a hnenah, «Keimah cu Jehovah ka si. 3 Ziangkimtithei Pathian dinhmun in Abraham hnen, Isak hnen le Jakob hnenah ka rak lang, asinan Jehovah ti mi ka hmin in an hnenah ka rak theihteraw lo. 4 Kanaan ram anmah pe dingin anmah thawn ka thukham ka rak dĭn fawn. Cumi cu an khualtlawnnak ram, mikhual vekih an umnak ram a si. 5 Cuihtlunah Izip-mipawl in sál ih an ret mi Israel tefapawlih hrūmnak cu ka thei ih, ka thukham ka máng. 6 Curuangah Israel tefapawl hnenah, ‹Keimah cu Jehovah ka si, Izip-mipawlih phurrit hnuai ihsin ka lo hruaisuak ding. An sáltannak ihsin ka lo runsuak ding ih, bān suahin le thuṭhennak rapthlakpawl in ka lo tlen ding. 7 Ka mi ah ka lo la ding ih, keimah cu nan Pathian ka si ding. Cun keimah cu Izip-mipawlih phurrit hnuai ihsin a lo lasuaktu Jehovah nan Pathian ka si ti nan thei ding. 8 Abraham, Isak le Jakob hnenah pe dingih ^asia ka săm zo mi ram ah ka lo hruailut ding ih, cumi cu nan co dingah ka lo pe ding. Keimah cu Jehovah ka si,› tiah sim aw,» tiah a ti. 9 Cule Mosi in Israel tefapawl hnenah hitin thu a sim, asinan thinlung ānhainak le a har zet mi sáltannak ruangah Mosi cu an ngaithla lo.

6:8^a sia ka săm: A ṭawng hrampi ah «ka kut ka phar» ti a si.

10 Cule Jehovah in Mosi hnenah, 11 «Va lut aw, Israel tefapawl a ram ihsin suakter dingah Izip siangpahrang Faro va sim aw,» tiin a sim.

12 Cule Mosi in Jehovah hmaiah, «Israel tefapawl in in rak ngaithla lo. Cuticun ziangtin so Faro in i ngaithlak ding, ziangahtile kei cu ^aṭawngkam thiam lo ka si?» tiin a sim. 13 Cun Jehovah in Mosi le Aaron a bia ih, Israel tefapawl cu Izip ram ihsin hruaisuak dingah Israel-mipawl hrangah le Izip siangpahrang Faro hrangah thupek a pe hai.

6:12^a ṭawngkam thiam lo: A ṭawng hrampi ah «hmur serh tan lo» ti a si.

Israel Tesinfapawl

14 Hipawl hi an palepawlih sungza lubân an si. Israel-ih fatir, Reuben fapapawl cu: Hanok, Pallu, Hezron le Karmi tla an si. Hipawl hi Reuben-ih hrinpawl an si. 15 Simeon fapapawl cu Jemuel, Jamin, Ohad, Jakin, Zohar le Kanaan nunaunuih fapa a si mi Shaul tla an si. Hipawl hi Simeon-ih hrinpawl an si. 16 An tesinfanaupawl zulhin hipawl hi Levi fapapawlih hmin an si, Gershon, Kohath le Merari tla an si. Levi damsung kum cu 137 a si. 17 Gershon fapapawl cu an hrinpawl zulhin Libni le Shimi tla an si. 18 Cule Kohath-ih fapapawl cu Amram, Izhar, Hebron le Uzziel tla an si. Cule Kohath damsung kum cu 133 a si. 19 Merari fapapawl cu Mahli le Mushi an si. Hipawl hi an cithlahsâwng zulhin Levi hrinpawl an si.

20 Cule Amram cun a paih farnu Jokebed cu nupi ah a ṭhi ih, Aaron le Mosi a hrinsak. Cule Amram-ih damsung kum cu 137 a si. 21 Izhar fapapawl cu Korah, Nemfeg le Zikhri tla an si. 22 Cule Uzziel fapapawl cu Mishael, Elzafan le Zithri tla an si. 23 Aaron in Amminadab fanu Elisheba, Nahshon farnu cu a nupi ah a ṭhi ih Nadab, Abihu, Eleazar le Ithamar a hrinsak. 24 Cule Korah fapapawl cu Assir, Elkanah le Abiasaf tla an si. Hipawl hi Korah-mipawlih hrinpawl an si. 25 Aaron fapa Eleazar in Putiel fanupawl lakih pakhat cu a nupi ah a ṭhi ih Finehas a hrinsak. Hipawl hi an hrinpawl zulhin Levi-mipawlih pupápawlih lubân an si.

26 Hipawl hi Aaron le Mosi hnenah Jehovah in, «An ralkappawl zulhin Israel tefapawl cu Izip ram ihsin hruaisuak uh,» a rak ti mipawl kha an si. 27 Hih Mosi le Aaron hi Izip ihsin Israel tefapawl hruaisuak dingah Izip siangpahrang Faro hnenih ṭawngtu an si.

28 Cule hitin a si, Izip ram ah Jehovah in Mosi hnenih a ṭawng ni ah, 29 Jehovah in Mosi hnenah, «Keimah cu Jehovah ka si. Izip siangpahrang Faro hnenah na hnenih ka sim mi hmuahhmuah sim aw,» tiah a ti.

30 Asinan Mosi in Jehovah hmaiah, «Ngai hnik, kei cu ^aṭawngkam thiam lo mi ka si ih, ziangtin so Faro in ka thu a ngaithlak ding?» tiah a ti.

6:30^a ṭawngkam thiam lo: 6:12 simfiangnak zoh aw.

1 Jehovah in Mosi hnenah, «Zoh hnik, nangmah cu Faro hrangah pathian vekah ka lo tuah zo ih, na unaupa Aaron cu na profet a si ding. 2 Thu ka lo pek mi hmuahhmuah na sim ding a si. Cule na unaupa Aaron in a ram sung ihsin Israel tefapawl suah dingah Faro hnenah a sim ding a si. 3 Cule Faro-ih thinlung ka hakter ding ih, Izip ram ah ka hminsinnakpawl le ka mangbangzapawl ka karhter ding. 4 Sikhalsehla Faro in a lo ngaithla lo ding, cutin Izip parah ka kut ka thlâk ding ih, ka ralkappawl le ka mi Israel tefapawl cu dāntatnak rapthlak hmangin Izip ram ihsin ka lasuak hai ding. 5 Cule Izip parah ka kut suahin anmai lak ihsin Israel tefapawl ka hruaisuak tikah Izip-mipawl in keimah cu Jehovah ka si ti an thei ding,» tiah a ti.

6 Cun Mosi le Aaron in cutivekcun an tuah, Jehovah in anmah thu a pek hai vekin an tuah. 7 Cule Faro hnenih thu an sim laiah Mosi cu kum 80 mi a si ih, Aaron cu kum 83 mi a si.

Kianghrăwl cu Rul ah a Cang

8 Jehovah in Mosi le Aaron hnenah, 9 «Faro in, ‹Nanmai hrangah thilmak langter hnik uh,› tiin nan hnenih a ti tikah, nang in Aaron hnenah, ‹Na kianghrăwl la aw, cule Faro hmaiah hlăwn awla rul ah cang seh,› na ti ding,» tiin a sim. 10 Cule Mosi le Aaron cu Faro hnenah an lut ih, Jehovah in thu a pek vekin an tuah. Cule Aaron in Faro le a siahhlawhpawl hmaiah a kianghrăwl a hlăwn ih, cumi cu rul ah a cang.

11 Asinan Faro khal in mifimpawl le dawithiampawl a ko, cule Izip mitkherthiampawl khal in an camnakpawl thawn cuvekin an tuah ve. 12 Mi kip in an kianghrăwl an hlăwn ih, rul ah an cang. Asinan Aaron-ih kianghrăwl in an kianghrăwlpawl cu a dawlh thluh. 13 Cule Faro-ih thinlung cu a hak ih, Jehovah ih a sim cia bangin, anmah cu a ngaithla hai lo.

Tidai Thisen ah a Cang

14 Jehovah in Mosi hnenah, «Faro-ih thinlung cu a hak, mipi fehter ding a êl. 15 Zing ah Faro hnenah feh aw, tidai hmun ih a fehsuak tikah tiva kapah amah táwng dingin na ding pei ih, rul ih a cang dah mi kianghrăwl kha na kut in na keng pei. 16 Cule a hnenah, ‹Hebru-mipawlih Pathian Jehovah in na hnenah i thlah, «Ramṭhing ih in rĕn theinak dingah ka mipawl feh hai seh,» tiah a ti. Asinan ngai hnik, atu tiangah na ngaithla cuang lo! 17 Jehovah in, «Himi in keimah cu Jehovah ka si ti na thei ding. Ngai hnik, ka kut ih a um mi kianghrăwl thawn tiva sungih a um mi tidai ka vaw ding ih, cupawl cu thisen ah an cang ding. 18 Cule tiva sungih ngapawl an thi ding, tiva cu a namsé ding ih, Izip-mipawl in tiva ih tidai in ding an fih ding,» a ti,› tiah na ti pei,» tiah a ti.

19 Cun Jehovah in Mosi hnenah, «Aaron hnenah, ‹Thisen ih an can theinak dingah, na kianghrăwl la awla, Izip tipi tlun, an tivatepawl tlun, an tivapipawl tlun, an tilipawl tlun le an tuahcawp tilipawl tlunah na kut hawi aw. Cule Izip ram pumpi ih thing khukhēngpawl le lung khukhēngpawl sungah thisen a um ding,› tiin sim aw,» tiah a ti. 20 Cule Mosi le Aaron in Jehovah ih thupek vekin an tuah. Cule anih in a kianghrăwl a hawi ih, Faro mithmuhah le a siahhlawhpawlih mithmuhah tiva ih tidai cu a vuak. Cule tiva ih tidai hmuahhmuah cu thisen ah a cang. 21 Tiva sungih ngapawl an thi, tiva cu a namsia ih Izip-mipawl in tiva ih tidai an in thei lo. Curuangah Izip ram pumpi ah thisen a um.

22 Cun Izip-mi mitkherthiampawl in an thiamnak thuthuppawl hmangin cuvek an tuah ve, cule Faro-ih thinlung cu a hak. Cule Jehovah ih a rak sim vekin a ngaithla hai lo. 23 Cule Faro cu a kir ih a inn sungah a lut, hi thu cu ziang hmanah a siar cuang lo. 24 Cule Izip-mi hmuahhmuah in tiva kap tluan hmuahhmuah ah in ding tidai an lai, ziangruangahtile tiva ih tidai an in thei lo. 25 Cule Jehovah in tiva a vuak hnuah ni sarih a rung rei.

Butlak

1 Jehovah in Mosi hnenah, «Faro hnenah feh awla a hnenah, ‹Jehovah in, «In rĕn theinak dingah ka mipawl feh hai seh. 2 Asinan anmah fehter ding na el asile, ngai hnik, na ramkulh sung hmuahhmuah butlak in ka hrem ding. 3 Cule na inn sungah, na ihnak pindan sungah, na ihkhun parah, na sálpawlih inn sungah, na mipawl parah, na thŭkpawl ah le na sang nāwnnak khengkûmpawl sungah suak le lut dingin tiva in butlak a tawrih tawrin a suah ding. 4 Cule na parah, na mipawl parah le na siahhlawh hmuahhmuah parah butlak an kai ding,» a ti,› tiah sim aw,» tiah a ti.

5 Cun Jehovah in Mosi a bia ih, «Aaron hnenah, ‹Izip ram parah butlak hung suak dingah tivatepawl tlun, tivapawl tlun le tilipawl tlunah na kianghrăwl hawi aw,› tiah sim aw,» tiah a ti. 6 Cule Aaron in Izip tipi parah a kut a hawi ih, butlak an hung suak, cule Izip ram an khuh ṭheh. 7 Cule mitkherthiampawl in an thiamnak thuthuppawl hmangin cuvek an tuah ve ih, Izip ram ah butlak an hung suak.

8 Cun Faro in Mosi le Aaron a ko hai ih, «Ka hnen ihsin le ka mipawl hnen ihsin butlak a lakhlonak dingah Jehovah in dilsak uh, cule Jehovah hnenih rai an thawi theinak dingah mi senpi ka fehter hai ding,» tiah a ti.

9 Cule Mosi in Faro hnenah, «Na hnen le na innpawl ihsin butlak siatsuah ih tiva sung lawngih tāng dingin na hrang, na siahhlawhpawl hrang le na mipawl hrangih ka lo dilsak ding cān na thiahnak dingah upatnak ka lo pe,»tiah a ti.

10 Cule Faro in, «Thaizing ah,» tiah a ti.

Cule Mosi in, «Jehovah kan Pathian vek zohman an um lo ti na theihnak dingah na ṭawng bangtukin thleng seh. 11 Cule butlak cun na hnen ihsin, na innpawl ihsin, na siahhlawhpawl hnen ihsin le na mipawl hnen ihsin an lo suahsan ding. Tiva sung lawngah an tāng ding,» tiah a ti.

12 Cun Mosi le Aaron cu Faro hnen ihsin an suak. Cule Mosi cu Faro hnenih a rak umter mi butlak thu ah Jehovah hnenah a ausuak. 13 Cule Jehovah in Mosi-ih ṭawngkam bangtukin a tuah. Cule inn sung ihta, kăwt sung ihta le lópawl ihta butlak cu an thi. 14 Cupawl cu an pengkhawm ih ram sung cu a namsia. 15 Asinan Faro in thawvennak a um ti a hmuh tikah, Jehovah in a rak sim cia vekin, a thinlung a hakter ih a ngaithla hai lo.

Fikte

16 Jehovah in Mosi hnenah, «Aaron hnenah, ‹Izip ram pumpi ah ram ih leivut kha fikte a can ṭheh theinak dingah na kianghrăwl hawiin cuih ram ih leivut vaw aw,› tiin sim aw,» tiah a ti. 17 Cule cuvekin an tuah. Aaron in a kut a hawi ih, leilung leivut a vuak ruangah leivut cu minung par le ṭilva parah fikte ah an cang. Ram ih leivut hmuahhmuah cu Izip ram pumpi ah fikte ah an cang.

18 Mitkherthiampawl in an thiamnak thuthuppawl hmangin fikte suahter an tum nân, an ti thei lo. Cutin minung le ṭilva parah fikte an um. 19 Cun mitkherthiampawl in Faro hnenah, «Himi cu Pathian kutzung a si,» tiah an ti. Sikhalsehla Jehovah ih a rak sim cia vekin, Faro-ih thinlung a hak ih, anmah a ngaithla hai lo.

Thothe

20 Jehovah in Mosi hnenah, «Zing ah tuanten tho awla, Faro cu tidai hmun ih a ra suah tikah a hmaiah ding aw. Cun a hnenah, ‹Jehovah in, «Keimah in rĕn theinak dingah, ka mipawl feh hai seh. 21 Cuti si loih ka mipawl fehter na sian lo a si ahcun, ngai hnik, na par, na siahhlawhpawl par, na mipawl par le na innpawl sungah thothe rual ka thlah ding. Izip-mipawlih innpawl le an dinnak lei par khalah thothe rual an khat thluh ding. 22 Cule cuih ni ah hi leilung tlunah keimah cu Jehovah ka si ti na theihnak dingah ka mipawlih cēnnak a si mi Goshen cu ka danglamter ding, cu tawkah thothe rual an um lo ding. 23 Ka mipawl le na mipawl karlakah ^adanglamnak ka tuah ding. Hih hminsinnak cu thaizing ah a um ding,» tiin a sim,› tiah sim aw,» tiah a ti. 24 Cule Jehovah in cuvekin a tuah. Faro-ih inn sungah, a siahhlawhpawlih inn sungah le Izip ram pumpi ah thothe rual sahpi an thleng. Thothe rual ruangah ram cu a siat.

8:23^a danglamnak: Hebru ṭawng ah cun «tlennak» tinak a si.

25 Cun Faro in Mosi le Aaron a ko ih, «Feh uh, hi ram ah nan Pathian hnenah raithawi uh,» tiah a ti.

26 Cule Mosi in, «Cuvekih tuah cu a dik lo, ziangahtile Jehovah kan Pathian hnenah Izip-mipawlih fih mi rai kan thawi ah a cang ding. An mithmuhah Izip-mipawlih fih mi rai kan thawi asile lungto in in deng lo ding maw? 27 Ni thum feh ramṭhing ah kan feh ding ih, amah in thu in pek vekin, Jehovah kan Pathian hnenah rai kan thawi ding,» tiah a ti.

28 Cule Faro in, «Jehovah nan Pathian hnenih rai nan thawi theinak dingah ramṭhing ah ka lo fehter ding, hla tuk cu feh hlah uh. Ka hrangah in dilsak uh,» tiah a ti.

29 Cun Mosi in, «Ngai hnik, na hnen ihsin ka fehsuak ding ih, Faro hnen ihsin, a siahhlawhpawl hnen ihsin le a mipawl hnen ihsin thaisun ah thothe rual an tlān theinak dingah Jehovah hnenah ka dil ding. Asinan Faro in Jehovah hnenah raithawi dingah mi senpi fehter lo dingin bumnak hmang nawn hlah seh,» tiah a ti.

30 Cule Mosi cu Faro hnen ihsin a suak ih Jehovah hnenah a dil. 31 Cule Mosi-ih ṭawngkam bangtukin Jehovah in a tuah; cule Faro hnen ihsin, a siahhlawhpawl hnen ihsin le a mipawl hnen ihsin thothe rual cu a ṭhawn. Pakhat te hman an tâng lo. 32 Asinan Faro cun hih cān khalah a thinlung a hakter ih, mipi fehter a siang cuang lo.

Ṭilva Thihnak

1 Jehovah in Mosi hnenah, «Faro hnenah feh awla, ‹Hebru-mipawlih Pathian Jehovah in, «Keimah in rĕn theinak dingah ka mipawl feh hai seh. 2 Ziangahtile anmah fehter ding na êl ih, na kaibĕt hai a si ahcun, 3 ngai hnik, ló ih na sumhnámpawl par — rángpawl par, lākpawl par, kalaukpawl par, ranpi rualpawl par le rante rualpawl parah — Jehovah kut a thleng ding. Cumi cu a khirhkhan zet mi nathrisia a si ding. 4 Cule Jehovah in Israel sumhnám le Izip sumhnám karlakah danglamnak a tuah ding. Cule Israel tefapawlih ta pauhpauh cu pakhat hman an thi lo ding,» tiin a rel,› tiah amah sim aw,» tiah a ti. 5 Cun Jehovah in, «Thaizing ah Jehovah in ram sungah hi thil hi a tuah ding,» tiin cān khiah a tuah.

6 Cule Jehovah in a thaizing ah hi thil hi a tuah ih, Izip sumhnám hmuahhmuah cu an thi nân, Israel tefapawlih sumhnám cu pakhat hman an thi lo. 7 Cun Faro in mi a thlah ih, ngai hnik, Israel-mipawlih sumhnám cu pakhat te hman an thi lo. Asinan Faro-ih thinlung cu a hung hak ih, mipi a fehter hai lo.

Khuaihli

8 Cule Jehovah in Mosi le Aaron hnenah, «Nanmai hrangah meipi ihsin vutcâm zate khat in la uhla, cumi cu Mosi in Faro mithmuhah van lamah theh seh. 9 Cule cumi cu Izip ram sungah leivut ah a cang ding ih, cumi cun Izip ram hmuahhmuah ih minung le ṭilva pawl parah hnâi nei khuaihli a puaksuak ding,» tiah a ti. 10 Cun meipi ihsin vutcâm an la ih Faro hmaiah dingin Mosi in van lamah a theh. Cule cumi cun minung le ṭilva pawl parah hnâi a nei mi khuaihli a puaksuakter. 11 Cule khuaihli cu mitkherthiampawl le Izip-mi hmuahhmuah parih a um ruangah mitkherthiampawl cu khuaihli ruangah Mosi hmaiah an ding thei lo. 12 Sikhalsehla Jehovah in Faro-ih thinlung a hakter ih, Mosi hnenih Jehovah in a rak sim cia vekin, anmah a ngaithla hai lo.

Rial

13 Cun Jehovah in Mosi hnenah, «Zing ah tuanten tho awla Faro hmaiah ding aw, cule a hnenah, ‹Hebru-mipawlih Pathian Jehovah in, «Keimah in rĕn theinak dingah ka mipawl feh hai seh, 14 ziangahtile leilung hmuahhmuah ah keimah bangtuk zohman an um lo ti na theihnak dingah, na thinlung rori ah le na siahhlawhpawl par le na mipawl parah ka hremnak hmuahhmuah cu tuih cān ah ka thlah ding. 15 Atu ah ka kut hawisuakin nangmah le na mipawl nathrisia in lo vaw ningla cu leilung ihsin thaihloh na rak si zo ding. 16 Asinan thungaiten nangmah ah ka huham ka lăngter theinak dingah le leilung hmuahhmuah ah ka hmin thăn a si theinak dingah himi hrang rori ah nangmah ka lo tungding a si. 17 Anmah na fehter lo mi hi ka mipawl dokalhin nangmah le nangmah na khaisângaw lai thotho a si. 18 Ngai hnik, thaizing atu vek tikcu ah Izip dĭnsuah a si ihsin tu tiangah hmuh a rak si dah lo mi rial nasazet ka surter ding. 19 Curuangah atu ah thlah awla na sumhnám le lóram ih na neih mi hmuahhmuah khawm aw, ziangahtile inn ih tlŭn lo mi le lóram ih hmuh mi rannung kip par le mi kip parah rial a tla ding ih, an thi ding,» tiah a rel,› tiin sim aw,» tiah a ti.

20 Faro siahhlawhpawl lakih Jehovah kamsuakthu a ṭihzahtupa cun amai siahhlawhpawl le a sumhnámpawl cu inn lamah a tlânter. 21 Asinan Jehovah kamsuakthu ziang a siar lo tu cun ló ah a siahhlawhpawl le a sumhnámpawl a tan.

22 Cun Jehovah in Mosi hnenah, «Izip ram pumpi ih rial a tlaknak dingah van lamah na kut hawi aw, cutin Izip ram ih minung par, rannung par le ló ih thlai kung le hram kung kip parah rial a tla ding,» tiah a ti. 23 Cule Mosi cun van lamah a kianghrăwl a hawi ih, Jehovah in khawri le rial a thlah, cule lei parah meisa a tla. Cun Jehovah in Izip ram parah rial a surter. 24 Cutin rial a um ih, cuih rial lakah meisa a um. Cuvekih a nasazet mi rial cu ram pakhat a can ihsi thăwkin Izip ram pumpi ah a um dah lo. 25 Cule rial in Izip ram pumpuluk lóram ih a um mi hmuahhmuah minung siseh, rannung siseh a den. Cule lóram ih thlai kung le hram kung kip cu rial in a deng ih, lóram ih thingkung kip cu an parh ṭheh. 26 Israel tefapawl umnak hmun Goshen ram lawngah rial a tla lo.

27 Cule Faro cun mi thlahin Mosi le Aaron a ko ih an hnenah, «Tuih cān ah thilsual ka tuah a si. Jehovah cu a dingfel ih, kei le ka mipawl cu misualrál kan si. 28 Pathian khawri le rial a um nawn lonak dingah Jehovah dil uh, ziangahtile a tawk thlang. Ka lo fehter ding ih, hi tawkah nan um nawn lo ding,» tiah a ti.

29 Cule Mosi in a hnenah, «Khawpi ihsin ka suah veten Jehovah hnenah ka kut ka pharh ding ih, khawri a reh ding. Rial khal a um nawn lo ding. Cutin leilung hi Jehovah-ih ta a si ti na thei ding. 30 Asinan nangmah le na siahhlawhpawl lawngte cun Jehovah Pathian nan ṭihzah hrih cuang lo ding ti ka thei,» tiah a ti. 31 Cule patkung le barli sangvut pawl cu a siatsuah, ziangahtile barli vuih lai a si ih, patkung khal a mûm lai a si. 32 Asinan sangvut le kusemet sangvut cu thlai neta an si ruangah den an si lo.

33 Cule Mosi cu Faro hnen ihsin khawpi in a suak ih, Jehovah hnenah a kut a phâr. Cun khawri le rial a reh ih, leilung parah ruah a sûr nawn lo. 34 Cule Faro in ruah, rial le khawri a reh ti a hmuh tikah thilsual a tuahbêt lai hrih. Cule a thinlung a hakter, amah le a siahhlawhpawl thawn. 35 Cule Faro-ih thinlung cu a hak, Jehovah in Mosi hmangih a rak sim vekin, Israel tefapawl cu a fehter cuang lo.

Kharbawk

1 Jehovah in Mosi hnenah, «Faro hnenah feh aw, ziangahtile a hmaiah hi ka hminsinnakpawl ka lăngter theinak dingah a thinlung le a siahhlawhpawlih thinlung ka hakter zo. 2 Kei hi Jehovah ka si ti nan theihnak dingih Izip ram ih siava zetih ka rak tuah zo mi thilpawl le an lakih ka rak tuah mi hminsinnakpawl cu na fapa le na fapaih fapa theih ah na sim pei,» tiah a ti.

3 Cule Mosi le Aaron cu Faro hnenah an lut ih a hnenah, «Hebru-mipawlih Pathian Jehovah in, ‹Ka hmaiih tăngdawr dingah ziang tik tiang so na el ding? Keimah in rĕn theinak dingah ka mipawl feh hai seh. 4 Cuti si loih ka mipawl feh ding na el asile, ngai hnik, thaizing ah na ram sungah kharbawkpawl ka thlah ding. 5 Cule zohman in leilung hmu thei lo dingin cupawl in leilung vangdâp an khuh ding, cule rial ih a lo tăn mi, a tāngsŭn an ei ding ih, lóram ah na hrangih a kho mi thingkung kip cu an ei ding. 6 Na innpawl, na siahhlawh hmuahhmuah ih innpawl le Izip-mi hmuahhmuah ih innpawl ah an khat ding. Na palepawl le na pupápawl khal in leilung ih an um ni ihsin tuihni tiang cumi cu an hmu dah lo,› tiin a sim,» tiah an ti. Cule anih cu a kir ih, Faro hnen ihsin a suak.

7 Cun Faro siahhlawhpawl in a hnenah, «Hi pa hi ziang tik tiang so kan hrangih tháng a si ding? Jehovah an Pathian rian dingah mipapawl feh hai seh. Izip cu siatsuah a si ti na thei hrih lo maw si?» tiah an ti.

8 Cule Mosi le Aaron cu Faro hnenah an hruaisal lala ih, anih in an hnenah, «Feh uh, Jehovah nan Pathian va rian uh. Zopawl saw a fehtu ding?» tiah a ti hai.

9 Cule Mosi in, «Kan mino le kan upa pawl thawn kan feh ding, kan fapapawl le kan fanupawl thawn, kan rante rualpawl le kan ranpi rualpawl thawn kan feh ding. Ziangahtile Jehovah hnenah puai kan tuah ding,» tiah a ti.

10 Cule anih in an hnenah, «Nan hnenih Jehovah um si sehla cu nanmah le nan fanau tetepawl hi ka lo fehter ding! Ralring uh, ziangahtile nan hmaiah thil ṭhalo a um. 11 Lamlam ah! Nannih mipapawl, atu ah feh uhla, Jehovah va rian uh, ziangahtile cumi cu nan duh mi a si,» tiah a ti. Cule annih cu Faro hmaika ihsin dawisuah an si.

12 Cun Jehovah in Mosi hnenah, «Izip ram ah kharbawk an ra suak ih, rial in a hlah mi hmuahhmuah, cuih ram thlai kung le hram kung tinkim an einak dingah kharbawk suak dingin Izip ram tlunah na kut hawi aw,» tiah a ti. 13 Cule Mosi in Izip ram tlunah a kianghrăwl a hawi ih, cuih sun hmuahhmuah le cuih zan hmuahhmuah ah Jehovah in nisuahnak lam thli a thlah. Zing lam a ra thlen tikah nisuahnak lam thli in kharbawkpawl a run phur. 14 Cule Izip ram pumpi ah kharbawk an ra suak ih, Izip ram sung hmuahhmuah ah an fu. An tam tuk lawmmam, a hlanah cuvek kharbawk an rak um dah lo, anmai hnu khalah cuvek an um dah lo ding. 15 Ziangahtile leilung vangdâp pumpi an khuh ṭheh, cutin ram cu a thim ih, rial ih a hlah mi ram thlai kung le hram kung tinkim le thingkung rah hmuahhmuah an ei thluh. Cule Izip ram thingkungpawl le lóram thlai kungpawl le hram kungpawl parah thil hring zianghman a tâng lo.

16 Cun Faro in hmanhmawh zetin Mosi le Aaron cu a ko ih, «Jehovah nan Pathian le nanmah dokalhin ka rak sual a si. 17 Curuangah atu ah hi vei khatte lawng hi ka sual in ngaidam uhla, hi thihnak hi ka hnen ihsin lahlo taktak dingin Jehovah nan Pathian in dilsak uh,» tiah a ti. 18 Cule anih cu Faro hnen ihsin a suak ih, Jehovah a dilsak. 19 Cule kharbawkpawl lahlo ih Tipi Sen sungih hrăntu, thli cu a cak zet mi nitlaknak lam thli ah Jehovah in a canter. Izip ram sung hmuahhmuah ah kharbawk pakhat hman an tâng nawn lo. 20 Asinan Jehovah in Faro-ih thinlung cu a hakter ih, Israel tefapawl a fehter lo.

Thimkhawzing

21 Cun Jehovah in Mosi hnenah, «Tham theih khawp a si mi thimkhawzing Izip ram ih thleng dingah van lamah na kut thlir aw,» tiah a ti. 22 Cule Mosi cun van lamah a kut a thlir ih, Izip ram sung hmuahhmuah ah ni thum sung a sah zet mi thimkhawzing a tlung. 23 Pakhat le pakhat an hmu-aw thei lo ih, ni thum sung cu zohman an umnak hmun ihsin an tho lo. Asinan Israel tefa hmuahhmuah cun an cēnnak hmunpawl ah tleu an nei.

24 Cun Faro in Mosi a ko ih, «Feh uh, Jehovah va rian uh, nan rante rualpawl le nan ranpi rualpawl lawng tân ta uh. Nan fanau tetepawl khal nan zawngah feh ve hai seh,» tiah a ti.

25 Asinan Mosi in, «Jehovah kan Pathian hnenih rai kan thawi theinak dingah, nang khal in raithawinakpawl le Meiur Thilhlănpawl in pe tengteng ding a si. 26 Kan sumhnámpawl khal kan zawngah an feh ve ding, an ketin pakhat hman tān ta a si lo ding. Ziangahtile kan Pathian Jehovah rian dingah anmah lakih a hrekkhat kan la ding ih, a khui mi bik thawn Jehovah kan rian ding ti mi khal cutawk kan thlen hlanlo kan thei lo,» tiah a ti.

27 Asinan Jehovah in Faro thinlung a hakter ih, anih in anmah fehter a siang lo. 28 Cun Faro in a hnenah, «Ka hnen ihsin suak aw! Nangmah hrangah fimkhur awla, ka hmel hmu nawn hlah! Ziangahtile ka hmel na hmuh ni ah na thi ding!» tiah a ti.

29 Cule Mosi in, «Dik zetin na ṭawng a si. Na hmel ka hmusal dah nawn lo ding,» tiah a ti.

Fatir Thihnak Sim Cianak

1 Jehovah in Mosi hnenah, «Faro par le Izip parah hremnak pakhat ka langter hrih ding. Cuihhnu ah hitawk ihsin a lo fehter ding. A lo fehter tikah cun hitawk ihsin a lo hnawhsuaktlang thluh rori ding. 2 Atu ah mipi hnatheihah sim aw, mipa kip in a innhnen ihsin le nunau kip in a innhnen ihsin ngun thilripawl le sui thilripawl dil seh,» tiah a ti. 3 Cule Izip-mipawlih mithmuhah Jehovah in mipi cu duhsaknak a pe. Cuihhleiah pacang Mosi cu Izip ram ah, Faro-ih siahhlawhpawlih mithmuhah le mipi mithmuhah a ropi zet.

4 Cun Mosi in, «Jehovah in, ‹Zan ṭim hrawngah Izip-mi lakah ka fehsuak ding ih, 5 Izip ram ih fatir hmuahhmuah, a laltokham parih to Faro-ih fatir ihsin, riallung phenih a to mi siahhlawh nunau ih hrin mi fatir tiangin le rannung fatir hmuahhmuah an thi ding. 6 Cun Izip ram pumpi ah aihramnak nasazet a um ding ih, cutivek cu a rak um dah lo ih, cuvek cu a um khal a umsal nawn lo ding. 7 Asinan Israel tefapawl lakih mipa pakhat asilole rannung pakhat hman uico in a bo lo ding, cutin Jehovah cun Izip-mipawl le Israel-mipawl a thleidang ti nan thei thei ding,› tiin a sim. 8 Cule hi na siahhlawh hmuahhmuah hi ka hnenah an ra ding ih, ka hnenah kûnin, ‹Fehsuak aw, nangmah a lo thluntu mipi hmuahhmuah thawn!› an ti ding. Cuihhnu ah ka feh ding,» tiah a ti. Cun anih cu Faro hnen ihsin a lingi lingih thinhengin a fehsuak.

9 Asinan Jehovah in Mosi hnenah, «Izip ram ih ka mangbangzapawl a karhzai theinak dingah Faro in a lo ngaithla lo ding,» tiah a ti. 10 Cule Mosi le Aaron in Faro hmaiah hi mangbangza hmuahhmuah hi an tuah ih, Jehovah in Faro thinlung a hakter, cule a ram ihsin Israel tefapawl a fehsuakter lo.

A Hmaisabik Lanta Puai

1 Izip ram ah Jehovah in Mosi le Aaron hnenah, 2 «Tuih thla hi nan thla thăwknak a si pei, himi hi kum khat sungih nan hrangah thla hmaisabik a si ding a si. 3 Israel mipi-umkhawm hmuahhmuah hnenah, ‹Tuih thla a ni hratnak ah mipa pakhat cio in anmai hrangah ^atuufano pakhat, an paih sungkua zulhin, sungkurûn pakhat hrangah tuufa no pakhat an keng fingfing pei. 4 Cule sungkua cu tuufa no hrangah an mál tuk asile, amah le amai inn sangtu a innhnen in an mipum zulhin tuufa no pakhat an keng pei. Mi tin an ei thei zât izirin tuufa no cu nan ruat pei. 5 Nan ranfano cu kum khat a si mi a pa, sawisel ding um lo mi a si pei. Cumi cu tuu rual lak ihsin asilole me rual lak ihsin na la ding a si. 6 Cun cumi cu cuih thla thotho a ni hleilitnak a ti hlanlo na retṭha pei. Cun ^bkhawthim zawngah Israel mipi-umkhawm burpi zaten cumi cu an that pei. 7 Cule thisen hrekkhat an la pei ih, sângka biang pahnih parah le cumi an einak innpawlih sângka lu parah an mān pei. 8 Cun cuih zan ah a sa cu an ei pei; meisa ah rawhin, thilnu telh lo sang le a khâ mi thlaihnah thawn an ei ding a si. 9 Cumi cu a hringin siseh, tidai thawn suangin siseh ei hlah uh, cuhnakin a lu, a kepawl le a sungrilpawl thawn meisa ah nan rawh sawn pei. 10 Cumi ihta cu zing lam tiang zianghman nan tangter lo pei ih, cumi lak ihta zing lam tiang a tāng mi cu meisa in nan ur pei. 11 Cule nan eidān ding cu hitin a si, nan tâi ah taikhap, nan ke ah kedam le nan kut ih kianghrăwl thawn nan ei ding a si. Cule manhlap zetin nan ei pei. Cumi cu Jehovah-ih Lantanak a si.

12:3^a tuufa no: Himi cu tuufa no asilole mefano khal a si thei. Câng 5-nak zoh awla, a fiang.

12:6^b khawthim zawngah: Hebru ṭawng ah cun «zan le zan karlak» a si.

12 ‹Ziangahtile cuih zan ah Izip ram ka paltlăng ding ih, Izip ram ih fatir hmuahhmuah, minung siseh, rannung siseh ka that thluh ding, cule Izip pathianpawl hmuahhmuah dokalhin thuṭhennak ka tuah ding. Keimah cu Jehovah ka si. 13 Cun nan umnak innpawl ih thisen cu nan hrangah hminsinnak a si ding. Cule thisen ka hmuh tikah ka lo lan ding ih, Izip ram ka vuak tikah nanmah lo siatsuah dingin nan parah hremnak a thleng lo ding.

14 ‹Cule hi ni hi nan hrangah hngilhlonak a si ding ih, nan tesinfa san tiangin Jehovah hnenih puai pakhat ah nan hmang ding a si. Cumi cu kumkhaw sakhaw dān puai vekin nan hmang ding a si. 15 Ni sarih sung thilnu telh lo sang nan ei pei. A ni khatnak ah nan innpawl ihsin thilnu nan hlăwn tengteng ding a si. Ziangahtile zokhal a ni khatnak ihsin a ni sarihnak tiang thilnu tel mi sang a eitu, cu pa cu Israel-mipawl lak ihsin thaihloh a si ding. 16 A ni khatnak ah tawnkhawmawknak thianghlim nan nei pei ih, a ni sarihnak ah tawnkhawmawknak thianghlim nan nei pei. Cuih nipawl ah cun ziang vek hna hman ṭuan a si lo pei, cuhnakin nan ti ding mi umsŭn cu nan ei ding mi timlam lawng hi a si pei. 17 Cule Thilnu telh lo Sang Puai nan hmang pei, ziangahtile himi ni thotho ah Izip ram ihsin nan ralkappawl ka hruaisuak ding a si. Curuangah hih ni hi nan kumkhaw sakhaw dān ah nan tesinfanau san tiangin nan hmang pei. 18 A thla hmaisabik cuih thla ni hleilitnak zan lam ihsin cuih thla ni 21-nak zan lam tiangin thilnu telh lo sang nan ei ding a si. 19 Ni sarih sung cu nan innpawl ah thilnu hmuh a si lo pei, ziangahtile zokhal thilnu rawi mi a eitu, cu pa cu ram dang mi an si ah simaw, rammi an si ah simaw, Israel mipi-umkhawm lak ihsin sahcat a si pei. 20 Thilnu tel mi zianghman nan ei lo pei, nan cēnnak hmun hmuahhmuah ah thilnu telh lo sang nan ei pei,› tiin sim uh,» tiah a sim hai.

21 Cun Mosi in Israel miupa hmuahhmuah a ko hai ih an hnenah, «Nan innsungsangpawl zulhin nanmai hrangah tuufa nopawl hril in la uhla, Lanta tuufa no that uh. 22 Cule hissop têl khat nan la pei ih, cawhtawlh sungih thisen ah nan hnim pei, cule cawhtawlh sungih thisen in sângka lu le sângka biang pahnih nan măn ding a si. Cule zing lam tiang zohman mai inn sângka lengah nan suak lo pei. 23 Ziangahtile Izip-mipawl vaw dingah Jehovah a fehtlăng ding ih, sângka lu parah le sângka biang pahnih parah thisen a hmuh tikah Jehovah in cuih sângka cu a lan ding ih, nanmah lo vaw dingin nan innpawl sungah siatsuahtu luh a siang lo ding. 24 Cule hi thil hi kumkhuain nangmah le na fapapawl hrangah sakhaw dān vekin nan hmang ding a si. 25 Hitin a si ding, Jehovah in a lo tiamkam cia bangin a lo pek mi ram nan thlen tikah hi rawngbawlhna hi nan hmang ringring pei. 26 Cule nan fātepawl in nan hnenih, ‹Hih rawngbawlhna hi nan hrangah ziang sullam so a nei?› tiih an lo suh tikah, hitin a si ding, 27 ‹Izip-mipawl a vuak ih kan sungkuapawl in runsuah laiah Izip ram ih Israel tefapawlih innpawl a rak lăntu Jehovah-ih Lanta raithawinak a si,› nan ti pei,» tiah a ti. Cule mipi cu an lu an kûn ih an bia. 28 Cun Israel tefapawl cu an feh ih, Mosi le Aaron hnenah Jehovah in thu a pek hai vekin an tuah.

Fatir Thihnak

29 Cule zanṭim ah hitin a si, a laltokham parih a totu Faro-ih fatir ihsi thăwkin thawnginn thim sungih ralkaih fatir tiang le rannung fatir hmuahhmuah, Jehovah in Izip ram ih fatir hmuahhmuah cu a that ṭheh. 30 Cule Faro cu a siahhlawhpawl hmuahhmuah le Izip-mi hmuahhmuah thawn zan laiah a tho. Cule inn khat ah mithi pakhat tal umlonak a um lo ruangah aihramnak nasazet Izip ram ah cun a thleng.

31 Cun anih in zan ah Mosi le Aaron a ko ih, «Tho uh, nanmah le Israel tefapawl thawn ka mipawl lak ihsin suak uh. Cule feh uhla nan sim zo vekin Jehovah cu va rian uh. 32 Nan sim zo bangin nan rante rualpawl le nan ranpi rualpawl tiangin hruai uhla, feh uh! Kei khal thlawsuah in pe uh,» tiah a ti.

33 Cule anmah kha ram ihsin suakter dingin Izip-mipawl in mipi manhlap dingin an ngen. Ziangahtile annih in, «Kan zaten kan thi thluh ding,» tiah an ti. 34 Cule Israel mipi in an sâng nāwn mi ah thilnu a luhngah hlanah an la ih, an nāwnnak khengkûmpawl cu an hnipuan sungah tuamin an liang parah an pu. 35 Mosi-ih ṭawngkam bangtukin Israel tefapawl in an tuah ih, Izip-mipawl hnen ihsin ngun thilripawl, sui thilripawl le hnipuanpawl tla an dil. 36 Cule an dil mi an peknak dingah, Izip-mipawl mithmuhah mi senpi cu Jehovah in duhsaknak a pe. Cuticun Izip-mipawl cu an răm.

37 Cun Israel tefapawl cu Rameses ihsin Sukkoth an pan, nauhakpawl hleiah mipa ting ruk hrawng ke in an feh. 38 Mipi căwkpawlh bur khat le sumhnám tam ngaingai, rante rualpawl le ranpi rualpawl tla anmai zawngah an feh. 39 Cule Izip ram ihsi an kensuak mi thilnu telh lo sangper nāwn mipawl cu an káng, ziangahtile cumi cu thilnu a tel lo. Ziangruangahtile annih cu Izip ihsin dawisuak an si ih, tlai thei an si lo, cuihtlunah anmai hrangah lamcaw an rak timtuah man lo.

40 Cun Izip ram ih a um mi Israel tefapawl cēn sung cu kum 430 a si. 41 Cule kum 430 a cem tikah hitin a si, cuih ni rori ah hitin a thleng, Jehovah-ih ralkap hmuahhmuah cu Izip ram ihsin an suak. 42 Cuih zan cu Israel tefa hmuahhmuah in an tesinfa san hmuahhmuah tiangin Jehovah hnenih an serh ding mi zan a si. Ziangruangahtile cuih zan ah Jehovah in Izip ram ihsin anmah hruaisuak dingin a rak kil hai.

43 Cule Jehovah in Mosi le Aaron hnenah, «Himi hi Lanta Puai thu ih sakhaw dān a si. Ram dang mi zohman in an ei ding a si lo. 44 Asinan paisa ih lei mi mi pakhat khat ih sál cu a serh zim na tan tiktikah cumi cu a ei thei. 45 Mikhual le hlawhfa cun an ei hrimhrim lo pei. 46 Cumi cu inn pakhat sungah ei a si pei, a sa pakhat hman inn lengah na thiar lo pei, a ruhpawl lakih pakhat hman nan khiak lo pei. 47 Israel mipi-umkhawm hmuahhmuah in cumi cu nan thlun ding a si. 48 Cule ram dang mi pakhat nan hnenih a cēn tikah Jehovah hnenah Lanta Puai hman a duh asile a mipa hmuahhmuah cu serh zim tan si hai seh. Cule rak naihin cumi cu hmang seh, cule anih cu rammi vek a si ding. Ziangahtile serh zim tan lo mi cun cumi cu a ei hrimhrim lo pei. 49 Rammi le nan lakih cêng mikhual hrangah dān pakhat a um pei,» tiah a ti.

50 Cuticun Israel tefa hmuahhmuah in an tuah, Mosi le Aaron hnenih Jehovah in thu a pek hai vekin an tuah. 51 Cule hitin a si, cuih ni rori ah anmai ralkappawl vek cio in Jehovah in Israel tefapawl cu Izip ram ihsin a hruaisuak hai.

Fatir Jehovah Ta

1 Jehovah in Mosi hnenah, 2 «Ka hnenah fatir hmuahhmuah serhhran uh, Israel tefapawl lakih sūl awngtu pauhpauh, minung le rannung an pahnih in, cumi cu ka ta a si,» tiin a sim.

3 Cule Mosi in mipi hnenah, «Tuihni, Izip ihsi nan fehsuak ni, sál inn ihsi nan suah ni hi cîng ringring uh. Ziangahtile Jehovah kut cakin hitawk hmun ihsin a lo hruaisuak. Thilnu tel mi sang cu ei ding a si lo. 4 Abib thla, tuihni ah nan fehsuak a si. 5 Cule hitin a si ding, Jehovah in Kanaan-mipawl le Heth-mipawl le Amor-mipawl le Hiv-mipawl le Jebus-mipawl umnak ram, nangmah hnenih pe dingih na pupápawl hnenih sia a rak săm mi, hnawiti le khuaitizu luannak ram ah a lo hruai tikah hi rawngbawlhna hi hi thla ah na hmang pei. 6 Ni sarih sung cu thilnu telh lo sang na ei ding ih, a ni sarihnak ah Jehovah hrangah puai a um ding. 7 Ni sarih sung thilnu telh lo sang ei a si pei. Cule nan lakah thilnu tel mi sang hmuh a si lo pei, cuihtlunah thilnu cu na ram sung hmuahhmuah ih nanmai lakah hmuh a si lo pei. 8 Cule na fapa hnenah cuih ni ah, ‹Himi hi Izip ram ihsin ka hung soh laiah Jehovah in ka hrangih a rak tuah mi ruangah tuah a si,› tiin na sim pei. 9 Jehovah in kut cak in Izip ram ihsin a lo hruaisuak ruangah Jehovah Dān hi na kâ sungih a um theinak dingah himi hi na kut parah hminsinnak le na mit karlakah hngilhlonak a si pei. 10 Curuangah hi sakhaw dān hi amai cān bikhiah ah kum khat hnu kum khat na hmang pei.

11 «Cule hitin a si ding, nangmah le na pupápawl hnenih sia a rak săm vekin Jehovah in Kanaan-mipawl umnak ram ah a lo hruailut ih cumi cu nangmah a lo pek tikah, 12 sūl awngtu hmuahhmuah, cumi cu na neih mi ṭilva ihsin fatir pauhpauh cu Jehovah hnenah na serhhran ding a si, a pa hmuahhmuah Jehovah ta a si pei. 13 Asinan lāk fatir pauhpauh cu tuufa no in na tlen pei, na tlen lo asile a hngawng na khiak pei. Cule na fapapawl lakih fatir mipa hmuahhmuah cu na tlen ding a si. 14 Cule hitin a si ding, a ra thleng lai ding mi cān ah na fapa in, ‹Himi hi ziang a si?› tiin a lo suh tikah a hnenah, ‹Jehovah in kut cak hmangin Izip ram ihsin, sáltannak inn ihsin in hruaisuak. 15 Cule hitin a si, kanmah fehter ding thu ah Faro a lung a ruh tikah, Jehovah in Izip ram ih fatir hmuahhmuah, mipa fatir le rannung fatir a that ṭheh. Curuangah sūl awngtu a pa hmuahhmuah cu Jehovah hnenah rai ka thawi, asinan ka fapapawl lakih fatir hmuahhmuah cu ka tlen,› tiin na sim pei. 16 Hihi na kut parah hminsinnak vek le na mit le mit karlakah calṭawnnak vek a si pei, ziangahtile kut cak hmangin Izip ram ihsin Jehovah in in hruaisuak a si,» tiah a ti hai.

Jehovah in Ramṭhing Zin in a Hruai

17 Cun hitin a si, Faro in mipi a fehter hai tikah Filisṭia-mipawlih ram lamzin cu a nâi ko nân, Pathian in cumi lamzin in a hruai hai lo. Ziangahtile Pathian in, «Mipi in raldonak an hmuh tikah, an thinlung thlengin Izip ram ah an kirsal pang ding,» tiah a ti a si. 18 Cule Pathian in mipi cu Tipi Sen ih ramṭhing lamzin in a hruaikûal hai. Cule Israel tefapawl cu Izip ram ihsin ral do ding tiar cia-in an hung so. 19 Cule Mosi in a zawngah Joseph-ih ruhpawl cu a keng, ziangahtile Joseph in Israel tefapawl kha, «Pathian in a lo vehvai rori ding ih, ka ruhpawl cu nanmah zawngah hitawk ihsin nan phurso pei,» tiin fek zetin sia a rak sămter hai. 20 Cule Sukkoth ihsin an khualtlawn an thăwk ih, ramṭhing dĕngih Etham ah riahhmun an sâm. 21 Cule Jehovah cu lamzin hruai dingah sun ah mero ṭhuam in le zan ah tleu pe dingah meisa ṭhuam in an hmaiah a feh, cutizawngcun a sun a zanin an feh thei. 22 Mipi hmai ihsin sun ih mero ṭhuam le zan ih meisa ṭhuam cu a lahlo dah lo.

Tipi Sen Tankainak

1 Jehovah in Mosi hnenah, 2 «Israel tefapawl hnenah sim aw, Pi Hahiroth hmai Migdol le tifinriat karlak Baal Zefon hmai zawnah herkirin riahhmun sâm hai seh. Tifinriat kap cutawk hmaiah riahhmun nan sâm pei. 3 Ziangahtile Faro in Israel tefapawl thu ah, ‹Ram sungah anmah le anmah an awkaw, ramṭhing in anmah a kharkhum,› a ti ding. 4 Cun anmah a dawi hainak dingah Faro-ih thinlung ka hakter ding. Cule Faro tlunah le a ralkap hmuahhmuah tlunah ka sunlawihaw ding, cutin Izip-mipawl in keimah cu Jehovah ka si ti an thei ding,» tiin a sim. Cule cutivekin an tuah.

5 Cun mipi an tlân zo ti mi thu Izip siangpahrang hnenah an sim ih, mipi thuhla ah Faro le a siahhlawhpawlih thinlung a thlengaw, cule annih in, «Israel-mipawl kanmah in rĕnnak ihsi kan fehsuahter hi, ziangruangah so maw hitivekih kan rak tuah?» tiah an ti. 6 Cule anih cu a ránglêng a timtuah ih, amai hnenah a mipawl a hruai. 7 Ránglêng ṭhabik bik 600 le Izip ram ih ránglêng hmuahhmuah, an zate tlunih bawipawl thawn a hruai hai. 8 Cule Jehovah in Izip siangpahrang Faro thinlung cu a hakter ih, Israel tefapawl a dawi hai, cule Israel tefapawl cu calhngal zetin an fehsuak. 9 Asinan anmah cu Izip-mipawl in an dawi, Faro-ih rángpawl le ránglêngpawl hmuahhmuah, a rángralkappawl le a ralkappawl in annih cu Baal Zefon hmaiih Pi Hahiroth kiang tifinriat kapih an riah laiah an hei man.

10 Cule Faro a ra nai tikah, Israel tefapawl cun khua an cuan, cule ngai hnik, Izip-mipawl cun an dungin an rak pan. Cule an ṭih tuk ih, Israel-mipawl cu Jehovah hnenah an ausuak. 11 Cun annih in Mosi hnenah, «Izip ram ah thlānmual a um lo ruangah ramṭhing ah thi dingin in hruaihlo a si lo maw? Ziangahso Izip ram ihsin hitiih in hruaisuah? 12 ‹Izip-mipawl rianin kanmah ten um men nung,› ti hi Izip ram ih kan lo sim mi ṭawngkam a si lo maw? Ziangahtile ramṭhing ih kan thih hnakin Izip-mipawl rĕn hi kan hrangah a ṭhasawn ding,» tiah an ti.

13 Cule Mosi in mipi hnenah, «Ṭih hlah uh. Cāng lo ten ding uhla, nan hrangih tuihsun ih a timtuah ding mi Jehovah-ih runsuahnak cu zoh uh. Ziangahtile tuihsun ih nan hmuh mi Izip-mipawl hi kumkhuain nan hmu lehsal nawn lo ding. 14 Jehovah in a lo dosak ding ih, nannih cu daiten nan um men ding,» tiah a ti.

15 Cule Jehovah in Mosi hnenah, «Ziangruangah so kei in auh? Hmai lam pan dingin Israel tefapawl sim aw. 16 Cun na kianghrăwl thlir awla tifinriat tlunah na kut hawiin cumi cu ṭhencat aw. Cule Israel tefapawl cu tifinriat laifang leiro par ihsin an fehtlăng ding. 17 Cule ngai hnik, Izip-mipawlih thinlung ka hakter ding ih, annih in anmah an thlun ding. Cule Faro tlunah le a ralkap hmuahhmuah, a ránglêngpawl le a rángralkappawl tlunah ka sunlawihaw ding. 18 Cun Faro, a ránglêngpawl le a rángralkappawl tlunih ka sunlawihawk tikah Izip-mipawl in keimah cu Jehovah ka si ti an thei ding,» tiah a ti.

19 Cule Israel riahhmun khuarnak hmaiih a feh rero tu Pathian vancungmi cu a ṭhawn ih an dungah a feh, cule an hmai ihsin mero ṭhuam a ṭhawn ih, an dungah a ding. 20 Mero ṭhuam cu Izip-mipawlih riahhmun le Israel-mipawlih riahhmun khuarnak karlakah a ra. Cumi cu Izip-mipawl hrangah mero le khawthim a si, asinan cumi cun Israel-mipawl hrangah zan ah tleu a pe. Cule zanvar khat lam riahhmun khuarnak le khat lam riahhmun khuarnak an pannâiaw thei lo.

Tipi Sen Ṭhenawknak

21 Cun Mosi in tifinriat tlunah a kut a hawi, cule Jehovah in cuih zan zanvar nisuahnak lam thli cak zet hmangin tifinriat a kirsalter, tifinriat cu leiro ah a tuah ih, tipi cu an ṭhenaw. 22 Cule Israel tefapawl cu tifinriat sung leiro parah an feh ih, tipi cu an vawrh lamah le an keh lamah an hrangah phăr a si. 23 Cule Izip-mipawl in an dawi ih, Faro-ih rángpawl, a ránglêngpawl le a rángralkappawl hmuahhmuah cu tifinriat sungin an dung ihsin an feh.

24 Cule hitin a rak si, zing khawvâng zawng sentari kil cān ah meisa le mero ṭhuam ihsin Jehovah in Izip-mipawlih ralkappawl cu a vun cuan ih, Izip-mipawlih ralkappawl cu a tibuai. 25 Cule harsa zetih mâwng dingin Jehovah in an ránglêng kepawl a thlawngter. Cule Izip-mipawl in, «Israel-mipawl hmaika ihsin tlân uhsi, ziangahtile Jehovah in Izip-mipawl dokalhin anmah a dosak hai a si,» tiah an ti.

Izip-mipawl Thahnak

26 Cun Jehovah in Mosi hnenah, «Izip-mipawl par, an ránglêngpawl par le an rángralkappawl parih tipi a ra kirsal theinak dingah tifinriat tlunah na kut hawi aw,» tiah a ti. 27 Cule Mosi cun tifinriat tlunah a kut a hawi ih, zing a thlen tikah, a sung lam panih Izip-mipawl an tlân rero laiah tifinriat cu a kēl ah a cangkirsal. Cule Izip-mipawl cu Jehovah in tifinriat sungah a ^ahlăwn hai. 28 Cun tipi cu a kirsal ih, an dung lam tifinriat sungih ratu ránglêngpawl, rángralkappawl le Faro-ih ralkappawl hmuahhmuah cu a khuh ṭheh. An lakih mi pakhat hman an tâng lo. 29 Sikhalsehla Israel tefapawl cu tifinriat sung leiro parah an feh ih, tipi cu an vawrh lamah le an keh lamah an hrangah phăr a si.

14:27^a hlăwn: A ṭawng hrampi ah «thingthla» tinak a si.

30 Cutin Jehovah in cuih ni ah Izip-mipawlih kut sung ihsin Israel-mipawl a runsuak hai ih, Israel-mipawl in tifinriat kapah a thi mi Izip-mipawl an hmu. 31 Cule Jehovah in Izip ram ih a rak tuah mi a thil ti ropi cu Israel-mipawl in an hmu ih, mipi in Jehovah an ṭihzah, cule Jehovah le a siahhlawh Mosi cu an zum.

Mosi Hla

1 Mosi le Israel tefapawl in Jehovah hnenah hi hla hi an sak ih, hitin an ti:

«Jehovah hnenah hla ka sak ding,
Ziangahtile anih cu ropi zetin a cawisângaw!
Ráng le a totu cu tifinriat sungah a rak hlăwn!
2 Jehovah cu ka cahnak le ka hla a si,
Cule anih cu ka runsuahnak ah a cang.
Amah cu ka Pathian a si ih, amah ka thangṭhat ding,
Amah cu ka paih Pathian a si ih, amah ka khaisâng ding.
3 Jehovah cu ral do mi a si,
A hmin cu Jehovah a si.
4 Tifinriat sungah Faro-ih ránglêngpawl le a ralkappawl a hlăwn.
A hril mi ralbawipawl khal Tipi Sen sungah an tla.
5 Thûknakpawl in anmah an khuh;
Lungto bangin a tawnet ah an pil.
6 «Na vawrh lam kut cu, Maw Jehovah, thiltitheinak thawn a ropi a si.
Na vawrh lam kut cun, Maw Jehovah, ral cu a khekkuai ṭheh.
7 Cule na cungnunnak nasatak cun
Nangmah a lo dokalhtupawl na hlorálter zo.
Na thinlingnak na thlahsuak,
Cumi in fângko bangin anmah a kangrál thluh.
8 Cule na hnar ih thaw in tipi an kăwmaw,
Tilik cu thil penkhawm mi bangin a ding,
Ti thûknakpawl cu tifinriat laifangah an khál ṭheh.
9 Ral in, ‹Ka dawi ding,
Ka man ding,
Ralthillawn ka zem ding.
An parah ka duhnak a diriam ding.
Ka ralnâm ka phawi ding,
Ka kut in anmah a hlorálter ding,› tiah a ti.
10 Na thaw in na sēm hai,
Tifinriat in anmah a khuh ṭheh.
Sûan bangin a thûk zet mi tipi sungah an pil.
11 «Maw Jehovah, pathianpawl lakah hin nang vek zo so um?
Thianhlimnak lamih ropi,
Thangṭhattlak sinak lamih zahum,
Mangbangzapawl tuah ṭheu tu,
Nangmah vek zo so um?
12 Na vawrh lam kut na pharh,
Leilung in anmah a dawlh ṭheh.
13 Nang cun na tlen cia mi miphun cu na zahngainak in na hruai hai.
Na cēnnak hmun thianghlim ah na cahnak thawn anmah na hruai hai zo.
14 «Minungpawl in an thei ding ih an khūr ding.
Filistia luahtupawl cu riahsiatnak in a kai hai ding.
15 Cun Edom hotupawl cu an lung a phâng ding.
Moab pacakpawl, khŭrhnak in a kai hai ding.
Kanaan ih cêngpawl zaten an zŭp thluh ding.
16 An parah ṭihnak le râpnak a thleng ding.
Na bân nasatak ruangah lungto bangin daiten an um ding.
Na mipawl an fehtlăng tiang, Maw Jehovah,
Na lei zo mi na mipawl an fehtlăng tiangin.
17 Anmah na hruailut ding ih, ro ih na co mi tlang ah anmah na phun ding;
Maw Jehovah, nangmai cēnnak hrangih na rak tuah mi hmun ah,
Maw Bawipa, na kut ih na rak dĭn mi, hmun thianghlim ah.
18 «Jehovah in kumkhua ihsin kumkhua a uk ding,»

tiin.

19 Ziangahtile Faro-ih rángpawl cu a ránglêngpawl le a rángralkappawl thawn tifinriat sungah an fehlut, cule Jehovah in tifinriat tidai cu an parah a kirtersal. Asinan Israel tefapawl cu tifinriat sung leiro parah an feh.

Miriam Hla

20 Cun nunau profet Miriam, Aaron-ih unu in a kut ah khuangte a keng, cule nunau hmuahhmuah in khuangtepawl thawn lām phahin an thlun.

21 Cule Miriam in an hnenah,
«Jehovah hnenah hla sak uh,
Ziangahtile anih cu a cawisângaw zo!
Ráng le a parih to cu tifinriat sungah a hlăwn zo!»

tiin a sawn hai.

Ti khâ Thlumternak

22 Cutin Mosi cun Israel-mipawl cu Tipi Sen ihsin a hruai hai, cun Shur Ramṭhing an thleng. Cule ni thum sung ramṭhing ah an feh ih, tidai an táwng lo. 23 Cun ^aMarah hmun an thlen tikah Marah tidai an in thei lo, ziangahtile cuih tidai cu a khâ. Curuangah cumiih hmin cu Marah tiih kawh a si. 24 Cule mipi cu Mosi dokalhin, «Ziang kan in ding?» tiah an phunzai. 25 Cule anih in Jehovah hnenah a ausuak ih, Jehovah in thingkung pakhat a hmuh. Cumi cu tidai sungih a thlak tikah, tidai cu a thlum.

15:23^a Marah: «A khâ» tinak a si.

Cu tawkah anih in an hrangah sakhaw dān le cīn le dān a tuahsak hai. Cule cu tawkah anmah a hniksak hai ih, 26 «Jehovah na Pathian aw ṭha zetin na ngai ih, a mithmuhah a dik mi na tuah, a thupekpawl lamah na hna na tŭn ih, a sakhaw dānpawl hmuahhmuah na thlun thluh asile na parah Izip-mipawl parih ka rak thlĕn mi natnak zianghman ka thlengter lo ding. Ziangahtile keimah cu ^aJehovah Rapha ka si,» tiah a ti.

15:26^a Jehovah Rapha: «Nanmah a lo tidamtu Jehovah» tinak a si.

27 Cun tihna hleihnih le ṭhulhfau kung 70 umnak Elim hmun an thleng. Cule tidai kiangah riahhmun an sâm.

Van ihsin Manna

1 Elim ihsin an fehsuak ih, Israel tefa umkhawm hmuahhmuah cu Sin Ramṭhing an thleng, cumi cu Elim le Sinai karlakih um a si, Izip ram ihsin an pawhsuah hnu a thla hnihnak ni hleinga ni ah a si. 2 Cun Israel tefa umkhawm zaten Mosi le Aaron dokalhin ramṭhing ah an phunzai. 3 Cule Israel tefapawl in an hnenah, «Aw, sabelpawl kiangih kan to lai le khăwpkham takih sang kan ei laiah khan Jehovah-ih kut in Izip ram ah rak thi sawn ta nungna maw! Ziangahtile nannih in hi ramṭhing ah hi mipungkhawm hmuahhmuah hi rilrâwngih that dingin in hruaisuak a si,» tiah an ti.

4 Cun Jehovah in Mosi hnenah, «Ngai hnik, nan hrangah van ihsin sang ka surter ding. Cule mipi an fehsuak pei ih, ni tin an covo tawkin ni khat hrangah an sar pei, cutin ka dān an thlun maw thlun lo ti ka hniksak thei hai ding. 5 Cule a ni ruknak ah hitin a si ding, an va sar mi cu an timtuah ding ih, cumi cu ni tin an sar mi ih alet in a tam ding,» tiah a ti.

6 Cun Mosi le Aaron in Israel tefapawl hmuahhmuah hnenah, «Jehovah in Izip ram ihsin a lo hruaisuak a si ti tuihzan ah nan thei ding. 7 Cule zing lamah Jehovah ropitnak nan hmu ding, ziangahtile Jehovah dokalhih nan phunzainak cu amah in a thei. Kannih cu ziangso maw kan si ih, kanmah dokalhih nan phunzai?» tiah an ti. 8 Cule Mosi in, «Kannih cu ziangso kan si? Jehovah in zan lamah ei ding sa le zing lamah sang khăwpkhamin a lo pek tikah le nan phunzainak Jehovah in a theih tikah nan phunzainakpawl cu kanmah dokalh si loin, Jehovah dokalh nan si sawn ti nan theithiam ding,» tiah a ti.

9 Cun Mosi in Aaron hnenah, «Israel tefa umkhawm hmuahhmuah hnenah, ‹Jehovah hmai ra naih uh, ziangahtile nan phunzainakpawl a thei zo,› tiah sim aw,» tiah a ti. 10 Cule hitin a si, Israel tefa umkhawm zate hnenih Aaron in a sim tikah, ramṭhing lam an hawi ih, ngai hnik, Jehovah ropitnak cu mero ah a lang.

11 Cule Jehovah in Mosi hnenah, 12 «Israel tefapawlih phunzainak ka thei zo. An hnenah, ‹^aKhawthim zawngah sa nan ei ding ih, zing lamah sang in pum puarter nan si ding. Cule keimah cu Jehovah nan Pathian ka si ti nan thei ding,› tiin sim aw,» tiah a sim.

16:12^a Khawthim zawngah: 12:6 simfiangnak zoh aw.

13 Cule hitin a si, zan lamah vanîm an ra suak ih riahhmun khuarnak an khuhkhat ṭheh, cun zing lamah an riahbûk kiangkap hmuahhmuah ah dai a tla. 14 Cule cuih daitla cu a hŭl tikah, ngai hnik, ramṭhing vangdâp parah, vur var vek, thil hlûm fate lei parah a um. 15 Cule cumi cu Israel tefapawl in an hmuh tikah, pakhat le pakhat, «Himi hi ziang a si?» tiah an tiaw. Ziangahtile cumi cu ziang a si ti an thei lo.

Cule Mosi in an hnenah, «Himi hi Jehovah in nan ei dingih a lo pek mi sang a si. 16 Himi hi Jehovah in, ‹Mi kip in an ṭuldān ciar vekin, mi pakhat hrangah omer khat ciar, nan minung pum zulhin, mi kip in an puanthlam sungih um mipawl hrangah sar hai seh,› tiih thu a pek mi a si,» tiah a ti hai.

17 Cun Israel tefapawl in cutin an tuah, cule mi hrek in tamdeuhin, mi hrek in máldeuhin an sar. 18 Cule tahnak omer ih an tah tikah tampi a sartu in a hlei a nei cuang lo ih, málte a sartu khal a tlasam cuang lo. Mi kip in an ṭuldān vek ciar in an sar. 19 Cule Mosi in, «Zohman in zing lam tiang zianghman tân hlah seh,» tiah a ti. 20 Sikhalsehla annih in Mosi an ngaithla cuang lo. An lakih mi hrekkhat in zing lam tiang a hrekkhat an tân ih, cumi cu a lúng ih a namsia. Cule Mosi cu an parah a thin a heng. 21 Cule mi kip in an ṭul tawk cio in zing tin cumi cu an sar. Cule ni a hung săt tikah cumi cu a zŭp.

22 Cule hitin a si, a ni ruknak ah aletih tam in sang an sar, mi pakhat ciar hrangah omer hnihin. Cule mipi-umkhawm hotu hmuahhmuah cu an ra ih Mosi an sim. 23 Cun anih in an hnenah, «Himi hi Jehovah in, ‹Thaizing cu Sabbath cawlh, Jehovah hrangih Sabbath thianghlim a si. Tuihsun ah nan kăn ding mi káng uhla, nan suan ding mi sûang uh, cule thaizing tiang ret dingah a tāng mi hmuahhmuah nanmai hrangah ret uh,› tiih a sim mi a si,» tiah a ti. 24 Cule Mosi ih thu a pek vekin cumi cu zing lam tiang an ret, cule cumi cu a namsé lo ih, a sungah tholung khal an um lo. 25 Cun Mosi in, «Tuihsun cu Jehovah hrangih Sabbath a si ruangah cumi cu tuihsun ah ei uh, cumi cu tuihsun ah cun ramlak ah nan hmu lo ding. 26 Ni ruk sung cumi cu nan khawm ding, asinan Sabbath a si mi a ni sarih ni ah cun pakhat hman a um lo ding,» tiah a ti.

27 Cule hitin a rak cang, mi hrekkhat cu a ni sarih ni ah sar dingin an fehsuak, asinan pakhat hman an hmu lo. 28 Cule Jehovah in Mosi hnenah, «Ziangtik tiang so ka thupekpawl le ka dānpawl thlun hi nan el ding? 29 Zoh hman! Jehovah in Sabbath a lo pek hi; curuangah a ni ruknak ah ni hnih hrang sang a lo pe. Mi kip in anmai hmun ah um hai seh; a ni sarihnak ah mi pakhat hman amai hmun ihsin fehsuak hlah seh,» tiah a ti. 30 Cutin mipi cu a ni sarihnak ah an cawl. 31 Cule Israel sungza in cumi cu manna tiah hmin an sak. Cumi cu ^anannan ci vek a si ih a var, a thawtdān cu khuaitizu thawi tuah mi sangper páte vek a si.

16:31^a nannan: Thlai phun khat a si ih, Mediterenian tipi kap tluan le Israel ram nisuahnak lam rampawl ih um a si. Cuih thlai kung cun pangpar var fate zet le sen dâng nawn a nei; a ci cu rimhmui hrangih hman a si.

32 Cun Mosi in, «Himi hi Jehovah in, ‹Nan tesinfanau tiang hrangih ret dingah, cumi cun omer pakhat khatter uh, cutin Izip ram ihsin ka lo hruaisuak laiah ramṭhing ih ka lo cawmnak sang an hmu thei ding,› tiih thu a pek mi thil a si,» tiah a ti. 33 Cule Mosi in Aaron hnenah, «Bel pakhat la awla cumi sungah manna omer khat thun aw, cule cumi cu na tesinfanau san hrangih ret dingah Jehovah hmaiah retṭha aw,» tiah a ti. 34 Jehovah in Mosi thu a pek vekin, Aaron in ret ding hrangah, cumi cu ^aTheihpinak hmaiah a retṭha. 35 Cule Israel tefapawl cun minung umnak ram an thlen hlanlo, kum 40 sung manna an ei, Kanaan ram ramri an thlen hlanlo manna an ei. 36 Omer khat cu efa khat ih ṭhen hra ṭhen khat a si.

16:34^a Theihpinak: Himi hi Thukham Kuang hmin pakhat a si.

Lungpi ihsin Tidai

1 Israel tefa umkhawm hmuahhmuah cu Jehovah thupek bangtukin Sin Ramṭhing ihsin feh vivo dingin an păwksuak ih, Refidim ah riahhmun an sâm, asinan mipi hrangah in ding tidai a um lo. 2 Curuangah mipi in Mosi an to ih, «Kan in dingah tidai in pe aw,» tiah an ti.

Cule Mosi in an hnenah, «Ziangah so keimah in tawh? Ziangahso Jehovah nan hniksak?» tiah a ti hai.

3 Cun mipi cu cu tawkah an ti a hâl ih, mipi cu Mosi parah an phunzai, cule, «Ziangah so kanmah le kan fātepawl le kan sumhnámpawl tihâlih thah dingah Izip ram ihsin in hruaisuak?» tiah an ti.

4 Cule Mosi cu Jehovah hnenah, «Hih mipi hi ziangtin ka tuah ding? Lungto ih in deng dingin an tiar ṭhepṭhep,» tiin a ausuak.

5 Cule Jehovah in Mosi hnenah, «Mipi hmaiah feh awla Israel miupa hrekkhat na hnenah hruai aw. Tiva na rak vuaknak na kianghrăwl khal na kut in keng awla, feh aw. 6 Ngai hnik, Horeb lungpi par, cu tawkah na hmaiah ka rak ding ding, cule lungpi na vaw ding ih, cumi ihsin tidai a ra suak ding, cutin mipi in an in ding,» tiah a ti. Cule Mosi in Israel miupapawl mithmuhah cutincun a tuah. 7 Cule Israel tefapawlih tawhnak ruangah le, «Jehovah kan lakah a um maw um lo?» tiin Jehovah an hniksak ruangah, cuih hmun hmin cu ^aMassah le Meribah tiah a ko.

17:7^a Massah: «Hniksak» tinak a si.

Amalek-mipawl thawi Doawknak

8 Cule Amalek-mipawl an ra ih, Refidim ah Israel-mipawl an do. 9 Cule Mosi in Joshua hnenah, «Kan hrangah mipa hrekkhat hril awla fehsuak aw, Amalek-mipawl do aw. Thaizing ah ka kut ih Pathian kianghrăwl thawn tlangmual zimah ka ding ding,» tiah a ti. 10 Cutin Mosi ih a sim vekin Joshua in a tuah ih, Amalek-mipawl a do. Cule Mosi, Aaron le Hur cu tlangmual zimah an fehso. 11 Cule hitin a si, Mosi in a kut a hawiso tikah, Israel-mipawl in an neh, cule a kut a thlak tikah, Amalek-mipawl in an neh. 12 Asinan Mosi-ih kut cu a khâm, lungto an la ih, amai hnuaiah an ret, cule cumi parah a to. Cun Aaron le Hur cun a kut cu pakhat in khat lam, a dang pakhat in khat lam an dăwmsak, cule a kut cu nitlak tiangin kêl a awh. 13 Cule Joshua in Amalek le a mipawl cu ralnâm hriam in a neh.

14 Cun Jehovah in Mosi hnenah, «Himi hi cazual sungah hngilhlonak dingah ngan awla, Joshua hnatheihah cumi cu siarsal aw. Amalek cīn ringring nak cu van rāng hnuai ihsin ka thaihlo thluh ding,» tiah a ti. 15 Cule Mosi in biakṭheng pakhat a dâwl ih a hmin ah, ^aJehovah Nissi, tiah a ko. 16 Cule anih in, «^bA kut cu Jehovah laltokham parah a um. Jehovah in, Amalek-mipawl cu san khat hnu san khat a do ding,» tiah a ti.

17:15^a Jehovah Nissi: «Jehovah cu ka thantar a si» tinak a si.

17:16^b A kut cu Jehovah laltokham parah a um: «Jehovah in sia a săm zo» asilole «Amalek-mipawlih kut cu Jehovah dokalhin a um» tinak a si thei.

Jethro-ih Thurawnpek

1 Mosi-ih pu, Midian puithiam Jethro in Mosi le Pathian mipi Israel-mipawl hrangih Pathian in a rak tuah mi hmuahhmuah, Jehovah in Izip ihsin Israel-mipawl a hruaisuak thu a rak thei. 2 Cun Mosi-ih pu, Jethro cun Mosi ih a rak thlahkirsal mi Mosi nupi Zipporah cu, 3 a fapa pahnih thawn a rak hruai. Pakhat ih hmin cu ^aGershom a si, ziangahtile Mosi in, «Keimah cu ram dang ah mikhual ka rak si,» tiah a ti. 4 A dang pakhat ih hmin cu ^bEliezer a si, ziangahtile Mosi in, «Ka paih Pathian cu i bawmtu a si ih, Faro-ih ralnâm ihsin i runsuak,» tiah a ti. 5 Cule Mosi-ih pu, Jethro cu Mosi fapapawl le Mosi nupi thawn, Pathian tlang hram, riahhmun an sāmnak hmun ramṭhing ih Mosi hnenah a thleng. 6 Cun anih in Mosi hnenah, «Keimah, na pu Jethro cu, na nupi le a hnenih a fapa pahnih thawn, na hnenah ka ra a si,» tiah a ti.

18:3^a Gershom: 2:22 simfiangnak zoh aw.

18:4^b Eliezer: «Ka Pathian cu bawmtu a si» tinak a si.

7 Cule Mosi cu a pu hmuak dingin a fehsuak ih a băwk, cule amah cu a hnam. Cun pakhat le pakhat an thuhla an sutaw ih, puanthlam sungah an lut. 8 Cun Mosi in a pu hnenah, Israel-mipawl ruangih Jehovah in Faro hnen le Izip-mipawl hnenih a rak tuah mi hmuahhmuah, lamzin tluanih an parih a thleng mi retheihzăwnzaihnak hmuahhmuah le Jehovah in anmah a rak runsuahdān thupawl tla a sim. 9 Cun Jethro cu Izip-mipawlih kut ihsin a rak runsuah mi Israel-mipawl hrangih Jehovah in thil ṭha a tuah mi hmuahhmuah ruangah lungawiaipuangin a um. 10 Cule Jethro in, «Izip-mipawl kut ihsin le Faro kut ihsin a lo runsuaktu le Izip-mipawl kut hnuai ihsi mipi runsuaktu Jehovah cu thangṭhatin um seh. 11 Cun Jehovah cu pathianpawl hmuahhmuah hnakin a ropisawn ti ka thei, ziangahtile puarthau zetih an căngvaihnak thil rori ah, cupawl tlunah anih cu a um,» tiah a ti. 12 Cun Mosi-pu, Jethro cun Pathian hnenah Meiur Thilhlăn le raithawinak dangpawl Pathian hnenih hlan dingin a la. Cule Aaron cu Mosi-pu thawi Pathian hmaiih sang ei dingin Israel miupapawl thawn a ra.

13 Cule hitin a si, a thaisun ah Mosi cu mipi thuṭhen dingin a to, cule mipi cu zing ihsin zan lam tiang Mosi hmaiah an ding. 14 Cun Mosi-pu in mipi hrangih Mosi ih tuah mi hmuahhmuah a hmuh tikah, «Hih mipi hrangih na tuah mi thil hi ziang a si? Ziangruangah nangmah lawng na to ih, zing ihsin zan lam tiang na hmaiah mipi hmuahhmuah cu an din?» tiah a ti.

15 Cule Mosi in a pu hnenah, «Ziangruangahtile mipi cu Pathian răwn dingah ka hnenah an ra. 16 Thubuai an neih tikah ka hnenah an ra ih, pakhat le pakhat karlakah thu ka ṭhen, cule Pathian-ih sakhaw dānpawl le a dānpawl ka theihter ṭheu hai,» tiah a ti.

17 Cule Mosi-pu in a hnenah, «Na tuah mi thil hi a ṭha lo. 18 Nangmah le na hnenih um hi mipi cu nan bāng hnephnep leh tengteng ding. Ziangahtile hi thil cu na hrangah a tam tuk, nangmah ten himi hi na ṭuansuak thei lo ding. 19 Atu ah ka aw ngai aw, thurawn ka lo pe ding ih, Pathian cu na hnenah a um ding. Thubuaipawl Pathian hnenih na thlen theinak dingah mipi hrangah Pathian hmaiah ding aw. 20 Cule sakhaw dānpawl le dānpawl cu anmah na zirh ding ih, an fehnak ding lamzin le an tuah ding mi hmuh aw. 21 Cun mipi zate lak ihsin thiltithei mipapawl, Pathian ṭihzah mi, midik, a dik lo mi hlawknak huatu ti vekpawl na hril pei. Cule a thawng hotu, a za hotu, sawmnga hotu le pahra hotu ah tiin an tlunah na ret hai pei. 22 Cule ziang tik lai khalah anmah in mipi thuṭhen hai seh. Cun thu pipa kip cu na hnenah an run thlĕn pei, asinan thu tenau kip cu anmah ten an ṭhen pei. Cule annih in phurrit an lo phurhpi ding ih, na hrangah a áwldeuh ding. 23 Hih thil na tuah ih, cumi tuah ding Pathian in thu a lo pek a si ahcun, na tuar thei ding ih, hi mipi hmuahhmuah khal anmai hmun ah hnangamten an feh ve ding,» tiah a ti.

Mosi in Hotupawl a Hril

24 Cun Mosi in a pu-ih aw cu a ngaithla ih, a sim mi hmuahhmuah a tuah. 25 Cule Mosi in Israel-mipawl zate lak ihsin thiltithei mipapawl a hril ih, a thawng hotu, a za hotu, sawmnga hotu le pahra hotu ah tiin mipi tlunih lubân ah anmah cu a tuah. 26 Cule annih cun ziang tik lai khalah mipi thu an ṭhen ṭheu, thu harsapawl cu Mosi hnenah an thlĕn, asinan thu tenau pauhpauh cu anmah ten thu an ṭhen.

27 Cun Mosi in a pu cu a thlah ih, anih cu amai ram ah a tlung.

Sinai Ramṭhing ah Israel-mipawl

1 Israel tefapawl Izip ram ihsin an fehsuak hnu a thla thumnak, cuih ni thotho ah, Sinai Ramṭhing an thleng. 2 Cule Refidim ihsin an păwksuak, Sinai Ramṭhing an thleng thlang, cule ramṭhing ah riahhmun an sâm. Cule Israel-mipawl cu tlang hmai cu tawkah riahhmun an sâm.

3 Cule Mosi cu Pathian hnenah a fehso ih, Jehovah in, «Jakob sungza hnenah hitin na sim pei ih, Israel tefapawl na sim pei: 4 ‹Izip-mipawl hnenih ka tuah mi le ziangti vekin muvanlai thla parah ka lo cawi ih, ka hnen rori ah ka lo hruai ti nan hmu zo. 5 Curuangah atu ah ka aw nan ngaithla taktak ih, ka thukham nan thlun asile ka hrangah miphun hmuahhmuah hnakin ka hlawnthil hleice nan si ding, ziangahtile leilung hmuahhmuah cu ka ta a si. 6 Cule ka hnenah puithiam miphun le miphun thianghlim nan si ding,› tiin. Hipawl hi Israel tefapawl hnenih na sim ding mi kamsuakthupawl an si,» tiin tlang ihsin amah cu a ko.

7 Cule Mosi cu a ra ih, mipi upapawl a ko hai. Cule Jehovah in amah thu a pek mi hi kamsuakthu hmuahhmuah cu an hmaiah a ret. 8 Cun mipi hmuahhmuah in hmunkhatah an sâng ih, «Jehovah ih a rak sim mi hmuahhmuah kan tuah ding,» tiah an ti. Cule Mosi in mipi ṭawngkampawl cu Jehovah hnenah a thlenkirsal.

9 Cule Jehovah in Mosi hnenah, «Ngai hnik, mipi in nangmah ka lo biak lai an hna in an thei ih an lo zum kumkhua theinak dingah, mero sahpi sungah na hnenah ka ra thlang ding,» tiah a ti. Cutin Mosi in mipi ṭawngkampawl cu Jehovah hnenah a sim.

10 Cun Jehovah in Mosi hnenah, «Mipi hnenah feh awla tuihsun le thaisun ah serhhran hai aw, cule an hnipuan sawp hai seh. 11 Cule a ni thumnak hrangah tiar hai seh. Ziangahtile a ni thumnak ah mipi hmuahhmuah mithmuhah Sinai Tlang parah Jehovah a rung ṭum ding. 12 ‹Tlang ih kaiso lo dingin le tlang hram dai lo dingin fimkhur uh. Tlang a daitu pauhpauh cu thah tengteng an si pei. 13 Tlang daitu cu kut pakhat hman in a thâm lo pei, cumi cu minung a si ah simaw, rannung a si ah simaw, lung ih den asilole thálfung ih sai tengteng a si pei, tlang daitu cu a nung lo pei,› tiin mipi hrangah a kimvelin ramri khamsak aw. Tawtawrawt reipi a áwn tikah tlang an rak naih ding a si,» tiah a ti.

14 Cule Mosi cu tlang ihsin mipi hnenah a ṭum ih, mipi a tithianghlim, cule an hnipuan an sawp. 15 Cun anih in mipi hnenah, «A ni thumnak hrangah tiar uh, nunau naih hlah uh,» tiah a ti hai.

16 Cun a ni thumnak ah hitin a si, zing ah tlang parah khawri le nimthlakaupawl le mero sahpi a um, cule tuupa ki phawt aw cu a ring zet, cuticun riahhmun khuarnak ih um mipi hmuahhmuah cu an khūr. 17 Cule Mosi in mipi cu Pathian táwng dingin riahhmun khuarnak ihta a hruaisuak hai ih, tlang hramah an ding. 18 Cun Sinai Tlang cu meikhu in a khat ṭheh, ziangruangahtile Jehovah cu tlang parah meisa in a rung ṭum. A khu cu meipi khu vekin a kaiso ih, nasazetin tlang pumpi cu a hnîn. 19 Cule tuupa ki phawt mi cu reipiin a awn ih, a rin deuhdeuh tikah Mosi a ṭawng, cule Pathian in aw in amah cu a sawn. 20 Cun Jehovah cu Sinai Tlang par, tlang zimah a rung ṭum. Cule Jehovah in tlang zimah Mosi a ko ih, Mosi cu a kaiso.

21 Cule Jehovah in Mosi hnenah, «Ṭum awla mipi ralrinnak pe aw, culoasile Jehovah zoh dingin an pahtlăng ding ih, tampi an thi pang ding. 22 Cun Jehovah a naihtu puithiampawl cu anmah le anmah serhhran aw hai seh, culoasile Jehovah in anmah a hrem hai pang ding,» tiah a ti.

23 Asinan Mosi in Jehovah hnenah, «Sinai Tlang parah mipi an kaiso thei lo, ziangahtile nangmah in, ‹Tlang kimvelin ri kham in serhhran aw,› tiin ralrinnak in rak pe a si kha,» tiah a ti.

24 Cun Jehovah in a hnenah, «Feh aw! Ṭum awla, na zawngah Aaron hun hruaiso aw. Asinan puithiampawl le mipi cu Jehovah hnenih ra kai dingin pahtlăng hlah hai seh, culoasile anmah a hrem hai pang ding,» tiah a ti. 25 Cutin Mosi cu mipi hnenah a ṭum ih, anmah a sim.

Thupek Pahra

1 Pathian in hi kamsuakthu hmuahhmuah hi a ṭawngsuak:

2 «Keimah cu Jehovah na Pathian, Izip ram, sáltannak hmun ihsin a lo hruaisuaktu ka si.
3 «Ka hmaiah pathian dangpawl na nei lo pei.
4 «Khercawp milim, tlun lam van ihta siseh, hnuai lam leilung ihta siseh, leilung hnuai tidai ihta siseh, cumi băngnak nei na hrangah zianghman na tuah lo pei. 5 An hmaiah na kûn lo pei ih, anmah na rian fawn lo pei. Ziangahtile keimah, Jehovah na Pathian cu thîkthusia Pathian, keimah huatupawl cu an palepawlih mawhsualnak kha an tefa parah san thum san li tiang lehrūl ṭheu tu ka si. 6 Asinan keimah i duhdawtupawl le ka thupekpawl thluntu thawng tampi hnenih zahngainak langtertu ka si.
7 «Jehovah na Pathian hmin umze nei loin na hmang lo pei, ziangahtile umze nei loih a hmin hmangtu cu Jehovah in mawh nei lo ah a ruat lo ding.
8 «Sabbath ni thianghlim teih ul dingah, cuih ni cu cîng ringring aw. 9 Ni ruk sung ṭuanbāng in, na hna hmuahhmuah na ṭuan pei, 10 asinan a ni sarihnak cu Jehovah na Pathian-ih Sabbath a si. Cuih ni ah hna zianghman na ṭuan lo pei. Nangmah siseh, na fapa siseh, na fanu siseh, na siahhlawh mipa siseh, na siahhlawh nunau siseh, na ṭilva siseh, na kăwtkapawl sungih na mikhual in siseh ziang hna hman nan ṭuan lo pei. 11 Ziangahtile Jehovah in ni ruk sungah vanpawl le leilung, tifinriat le an sungih um mi hmuahhmuah a tuah ih, a ni sarihnak ah a cawl. Curuangah Jehovah in Sabbath ni cu a thlawsuah ih, cumi cu a thianghlimter.
12 «Na Pathian Jehovah ih a lo pek ding mi ram ah na san a sau theinak dingah na nu le na pa upat aw.
13 «Lai na that lo pei.
14 «Na uire lo pei.
15 «Rûk na ru lo pei.
16 «Na innhnen parah theihpinak dik lo na rel lo pei.
17 «Na innhnen inn na daw lo pei, na innhnen nupi siseh, a siahhlawh mipa siseh, a siahhlawh nunau siseh, a câwcang siseh, a lāk siseh, na innhnen thil zianghman na daw lo pei,»

tiin a sim.

Mipi in Jehovah an Ṭih

18 Cun mipi hmuahhmuah in khawri, nimthlakau, tuupa ki awn le tlang meikhu pawl an hmu, cule mipi in cumi an hmuh tikah an khūr ih, hlaralah an ding. 19 Cun Mosi hnenah, «Kan hnenah nang ṭawng awla kan ngai ding, asinan Pathian cu kan hnenah ṭawng hlah seh, kan thi pang ding,» tiah an ti.

20 Cule Mosi in mipi hnenah, «Ṭih hlah uh, ziangahtile nan mithmai ah amah ṭihzahnak a um ih, cutin nan suallonak dingah Pathian cu nanmah hniksak dingin a ra zo,» tiah a ti. 21 Cule mipi cu hlaralah an ding, asinan Mosi cu Pathian umnak hmun thim sahpi lam a hei naih.

Raithawinak Dān

22 Cun Jehovah in Mosi hnenah, «Israel tefapawl hnenah, ‹Van ihsin nanmah ka lo bia ti nan hmu zo. 23 Keimah zawngah sui le ngun pathian dangpawl nan tuah lo pei ih, nanmai hrangah pathianpawl nan tuah lo pei. 24 Ka hrangah leilung biakṭheng na tuah pei ih, cumi parah na rante rual le na ranpi rual pawl in Meiur Thilhlănpawl le Remnak Thilhlănpawl na thawi pei. Ka hmin hngilh lo dingih ka umter hainak hmun kip ah na hnenah ka ra ding ih, ka lo thlawsuah ding. 25 Cule ka hrangih lungto biakṭheng na dawl asile, ser mi lung in na tuah lo pei, ziangahtile cumi parih na hmanrua na hman asile cumi cu thianglo ah na cangter a si. 26 Na taklawngnak cu cumi parih lăngter a silonak dingah ka biakṭheng karbakpawl ah na kai fawn lo pei,› tiin na sim hai pei.

Siahhlawh Thuhla Dān

1 «Hipawl hi an hmaiih na ret ding mi cīn le dān an si: 2 Hebru-mi siahhlawh na lei asile, kum ruk sung hna a ṭuan pei, cule a kum sarihnak ah cun zianghman pe ta loin, zalenin a fehsuak pei. 3 Amah te lawng a ra lut asile, amah ten a suaksal pei, nupi nei ih a ra lut asile, amai zawngah a nupi cu a fehsuak pei. 4 A pu in amah cu nupi a pek ih, cumi nu in fapapawl lole fanupawl a hrinsak asile, a nupi le a fātepawl cu a pu-ih ta an si pei ih, anih cu amah te lawngin a fehsuak pei. 5 Asinan siahhlawh cun tlăng takin, ‹Ka bawipa, ka nupi le ka fātepawl ka duhdawt, ka suakzalen lo ding,› a ti asile, 6 a pu in amah cu thuṭhentupawl kiangah a hruai pei. A pu in cu pa cu sângka kiangah simaw, sângka biang ah simaw a hruai pei ih, a pu cun thirzúm in a hna a vit pei; cule cu pa cun kumkhuain a pu a rian pei.

7 «Cule mi pakhat in a fanu cu siahhlawh si dingah a zuar asile, cu nu cu siahhlawh mipapawl bangin a fehsuak lo pei. 8 Amai hrangih amah a rak hamtu a pu a lung a hmuiter lo asile, a pu in amah cu a tlenawter pei. Cu nu cu a rak bum ruangah a pu in anih cu ram dang mi hnenih zuar theinak a nei lo. 9 Cule a pu in a fapa hrangih a ham asile, amah cu fanupawlih nunphung bangtukin a zoh pei. 10 Nupi dang a ṭhit asile a rawl, a hnipuan le pasal a ihpi theinak pawl a ṭhumsak lo pei. 11 Cule cu nuih hrangah a pu in hi thil pathum a tuahsak lo asile, paisa pe ta loin a suakzalen pei.

Nunrawnnak Thuhla Dān

12 «Thi ko mi a thawitu cu thah tengteng a si pei. 13 Sikhalsehla a bawh hrim si loin, amai kut ah Pathian in a pek a si sawnah cun, a tlansuahnak dingah na hrangah hmun ka ruat ding.

14 «Asinan mi pakhat cu a innhnen dokalhin hrăwkhrawl zetin, thah tum tahratin tumcianak thawn a cāngvai asile, a thih theinak dingah ka Biakṭheng ihsin amah cu nan hruai pei.

15 «Cule a pa asilole a nu a thawitu cu thah tengteng a si pei.

16 «Minung ru tahratih zuartu simaw, a kut sungih an hmuh ah simaw cu pa cu thah tengteng a si pei.

17 «Cule a pa asilole a nu camsetu cu thah tengteng a si pei.

18 «Minungpawl cu pakhat le pakhat toawin pakhat in lungto thawn simaw, a kuttum thawn simaw mi dang kha a thawi ih, cu pa cu a thi lo nân, a ihkhun ah hmuntoin a um. 19 Cule a thosal ih a kianghrăwl thawn lengah a feh asile, amah vawtu cu thlah a si pei. A tikcu khawhral mi man lawng a kuan pei ih, a damfel tiangin a câwm pei.

20 «Cule mi pakhat in a siahhlawh mipa simaw, a siahhlawh nunau simaw fungfek thawn a vuak ih a kut ih a thih asile, amah cu dāntat tengteng a si pei. 21 Cutisikhalsehla ni khat simaw, ni hnih simaw nungin a um a si ahcun, amah cu dāntat a si lo pei; ziangahtile amah cu a paisa a si.

22 «Mipapawl sualawin, nunau nau pai an natter, cutin thla kim loin fa a hring nân, siatnak dang a um cuang lo asile, nunaunuih pasal in a hnenih a phût mi bangtukin dāntat a si pei. Cule thuṭhentupawlih thusah vekin a kuan pei. 23 Asinan siatsuahawknak pakhat khat in a thlun a si ahcun, nunnak aiah nunnak, 24 mit aiah mit, ha aiah ha, kut aiah kut, ke aiah ke, 25 meikāng aiah meikāng, hriamhma aiah hriamhma, vuaknak aiah vuaknak na pe pei.

26 «Mi in a siahhlawh mipa asilole a siahhlawh nunauih mit a thawi ih, a tisiat asile a mit ruangah a suakzalenter pei. 27 Cule a siahhlawh mipa simaw a siahhlawh nunau simaw ih ha a thlawngter asile, a ha ruangah a suakzalenter pei.

28 «Câwcang in mipa simaw nunau simaw, a khîtthat a si ahcun, cuih câwcang cu lungto ih denthat tengteng a si pei ih, a sa cu ei a si lo pei; asinan, câwcang neitupa cu mawh nei lo a si pei. 29 Asinan câwcang in a hlanah a ki in mikhît a rak hmang ih, cumi cu a neitu theihter a rak si, cule anih in a rak khum lo, cutin cuih câwcang cun mipa asilole nunau a that a si ahcun, cuih câw cu lung ih denthat a si pei ih, a neitu khal thah a si pei. 30 A hnenah sumpai phût mi a um asile, a hnenih phût mi pauhpauh cu amai nunnak tlen dingin a kuan pei. 31 Cuih câw in fapa simaw, fanu simaw a khît asile, hi cīn le dān bangtukin a parah tuah a si pei. 32 Câwcang in siahhlawh mipa simaw, siahhlawh nunau simaw a khît asile, an pu hnenah câwcang neitu in ngun tangka shekel 30 a pe pei ih, câwcang cu denthat a si pei.

33 «Cule mi pakhat in khur a áwng, asilole mi pakhat in khur a lai ih, cumi cu a khuh lo ih, câwcang simaw, lāk simaw cumi sungih a tlak asile, 34 khur neitu in a rūl pei; anmah neitu hnenah paisa a pe pei, asinan a thi mi ṭilva cu amai ta a si pei.

35 «Mi pakhat ih câwcang in mi dang ta a tuahmawh, cutin cumi cu a thi a si ahcun, a nungtu câwcang cu an zuar pei ih, cumi ihsi paisa cu an ṭhen aw pei. Cule a thi mi câw khal an ṭhen aw pei. 36 Cuti si loin câwcang cun a hlanah mikhît a rak hmang ih, cumi neitu in a khum lo a si ti theih asile, câwcang aiah câwcang a rūl tengteng pei ih, a thi mi ran cu amai ta a si pei.

Thil Neih mi Thuhla Dān

1 «Mi pakhat in câwcang simaw, tuu simaw a rûk ih, cumi cu a that asilole a zuar a si ahcun, câwcang pakhat aiah câwcang panga le tuu pakhat aiah tuu pali a rūl pei. 2 A băuh rero laifang fifir hmuh a si ih, amah cu vuak tuarin a thih asile, a thisen suak ruangah mawh a um lo pei. 3 Fifirpaih parah ni a rak suak zo a si ahcun, a thisen suak ruangah mawh a um pei. A pekirsal thluh ding a si; zianghman a nei lo asile, a rûkrûk man ah amah zuar a si pei. 4 Rûkrûk mi cu a kut ah a nungin hmuh felfai asile, cumi cu câwcang a si ah simaw, lāk a si ah simaw, tuu a si ah simaw, alet in a rūl pei.

5 «Mi pakhat in lóram simaw, sabit hmuan simaw eiterin, a ṭilva a thlah ih, mi dang lóram a eiter asile, amai lóram lakih a ṭhabik mi le a sabit hmuan lakih a ṭhabik in a rūl pei.

6 «Mei kāngter tahratin hlingtáwm a kāngkai, cutin khawm mi thlairawl, a ding lai mi thlairawl, asilole lóram a kāng thluh asile, mei kāngtertu in a rūl tengteng pei.

7 «Mi pakhat in a innhnen hnenah paisa asilole thilri kil dingah a pe, cule cumi cu a inn ihta rûk mi a si ih, fifir cu hmuh asile, alet in a kuan pei. 8 Fifir cu hmuh a si lo ahcun, inn neitu cu a innhnenih thilripawl a la maw la lo thei dingah, thuṭhentupawl hnenah hruai a si pei.

9 «Ziangahtile thilsual tuahnak thu pauhpauh ah câwcang thu ah siseh, lāk thu ah siseh, tuu thu ah siseh, asilole hnipuan thu ah siseh, asilole mi in amai ta si ih a rel mi thil hlo ziang thu khalah siseh, an pahnih in thuṭhentupawl hmaiah hruai an si pei, cule thuṭhentupawl in thiamlo an coh mi pauhpauh cun a innhnen hnenah alet in a kuan pei. 10 Mi in a innhnen hnenah lāk, câwcang, tuu, asilole ṭilva pakhat khat kil dingin a ap ih cumi cu a thi, hriamhma a pu, asilole cumi cu zohman ih hmuh loin rûkhlo si ta sehla, 11 a innhnenih thilripawl a lâk lo thu ah an pahnih karlakah Jehovah hmin in thukamnak a um pei, cule cumi cu a neitu in a pawm pei ih, a rūlsal lo pei. 12 Sikhalsehla cumi cu amai hnen ihsin rûksak rori a si ahcun, a neitu cu a rūlsal pei. 13 Cumi cu ramsa in a thlekdarh a si ahcun, cumi lăngternak a rak keng pei ih, thlek a si mi cu a rūl lo pei.

14 «Cule mi pakhat in a innhnen ihsin ziangkhal a hlang ih hriamhma a pu asilole a thi asile, a neitu cu a ran zawngih a um lo a si ahcun, anih in cumi cu a rūlsal tengteng pei. 15 A ran zawngah a neitu a um a si ahcun, cumi cu a rūlsal lo pei. Man pe ih sān mi a si ahcun, a san man lawng pek a si pei.

Serh le sâng le Nuncan Thuhla Dān

16 «Pa pakhat in ham lo mi fala him cu zawl tahratin a ihpi asile, a nupi si dingin cu nuih hrangah man a pe tengteng pei. 17 A pa in a hnenih pek ding a el rori a si ahcun, fala himpawlih man bangtukin ^apaisa a pe pei.

22:17^a paisa a pe: «Ngun khing a khai» tinak a si.

18 «Dawithiam nunau cu na nungter hrimhrim lo pei.

19 «Rannung a ihpitu pauhpauh cu thah tengteng an si pei.

20 «Jehovah hnen lawng siarlo, ziang pathian hnen khalih raithawitu cu hlohralter verver a si pei.

21 «Miphun dang na tuahse lo pei ih, na palbĕt fawn lo pei, ziangahtile nanmah khal Izip ram ah mikhual nan rak si dah.

22 «Ziangvek nuhmei asilole pa nei lo nauhak na zawnzaiter lo pei. 23 Ziangti zawng khalih anmah na zawnzaiter ih, ka hnenih an au asile, an aunak cu ka thei tengteng ding ih, 24 ka thinhengnak cu a sa ding, cule ralnâm in ka lo that ding. Nan nupipawl nuhmei ah an cang ding ih, nan fātepawl pa nei lo ah an cang ding.

25 «Nan lakih ka mi mifarahpawl hnenah paisa na cawih asile, a hnenah paisa cawihtu vekin na um lo pei, amah cu a ṭhang na dil lo pei. 26 Kămawknak ah na innhnen teih sinfen na laksak asile, ni a tlak hlanah cumi cu a hnenah na pekirsal pei. 27 Ziangahtile cumi cu a khuhawknak neihsŭn a si, cumi cu a taksa hrangih a sinfen a si. Anih cu ziang thawn saw a ih ding? Cule hitin a si ding, anih cu ka hnenih a au tikah ka thei ding, ziangahtile kei cu mi zangfah thei zet ka si.

28 «Pathian na thangsiat lo pei ih, na mipawl hotu khal na camsiat lo pei.

29 «A cu hmaisabik na thlai le na theiti hmaisabik hlan dingah na tlai lo pei. Na fapapawl lakih fatir cu keimah i pe pei. 30 Cuvek thothoin na câwcang le na tuu pawl khal na tuah pei. Cumi cu ni sarih sung a nu thawn a um pei, a ni riatnak ah cumi cu keimah i pe pei.

31 «Cule ka hnenah mithianghlim nan si ding, ramlak ih ramsapawl ih an bawhthlek mi sa nan ei lo pei, cumi cu uicopawl hnenah nan hlăwn ding a si.

1 «A dik lo mi thuthang na simsâwng lo pei. Theihpitu dik lo si dingah misualrál thawn va ṭuantlang hlah. 2 Thil ṭhalo tuah dingin mipi na thlun lo pei, thubuai relnak ah diknak merhkâwi dingin mi tam lam ṭangin thu na theihpi lo pei. 3 Mifarahpa hnenah a thubuai relnak ah thleidănnak na langter lo pei.

4 «Na ralih câwcang lole lāk a tlân mi na tawn asile, a hnenah na hruaikirsal tengteng pei. 5 Nangmah a lo huatuih lāk cu a thil phurh mi hnuaiih a băwk na hmuh asile, băwm duhnak na neih lo a si khalah cu pa cu a lāk thawn na bawm tengteng pei.

6 «A thubuai relnak ah na mifarahih thuṭhennak na merhkâwisak lo pei. 7 Thuhla dik lo ihsin hlapi ah um aw; mawh nei lo le midingfel va that hlah. Ziangahtile misualrál cu thiam ka coter lo ding. 8 Cule nawhthuh na la lo pei, ziangahtile nawhthuh in thleidănthiamnak mit a câwtter ih, midingfel ṭawngkampawl a merhkâwi.

9 «Mikhual khal na palbĕt lo pei, ziangahtile mikhual thinlung cu nan thei. Ziangahtile nanmah cu Izip ram ah mikhual nan rak si dah.

Sabbath Dān

10 «Kum ruk sung na ló ah ci na tuh pei ih, a rah na khawm pei, 11 asinan a kum sarihnak ah cun ló cu na cawlter pei ih, na cūlter pei, cutin na mipawl lakih mifarahpawl in an ei thei ding; cule an hlah mi cu ramsapawl in an ei ding. Cuvek thothoin na sabit hmuan le na olif hmuan khal na tuah pei. 12 Ni ruk sung na hna na ṭuan pei ih, a ni sarihnak ah na cawl pei, cutin na câwcang le na lāk an cawl ding ih, na siahhlawh nunauih fapa le mikhual tla an tha a tharsal ding.

13 «Cule nan hnenih ka sim zo mi hmuahhmuah ngaihsak uhla, pathian dangpawlih hmin hrimhrim sāl hlah uh, na kâ ihsi khalin cumi cu theih si hlah seh.

Kum Tin Puai Phun Thum

14 «Kum khat sungah ka hnenah puai vei thum na tuah pei: 15 Thilnu telh lo Sang Puai na hmang pei. Abib thla ih cān khiah mi ah thu ka lo pek zo vekin ni sarih sung thilnu telh lo sang na ei pei, ziangahtile cuih cān ah Izip ihsin na suak, ka hmaiah zohman kut lawngin an lang lo pei. 16 Na lóram ih na cīn mi na ṭuanbăng rah hmaisabikpawl, ^aThlaithar Puai le lóram ihsin na hnaṭuan rahpawl na khâwm ṭheh tikah, kum a cemin ^bRawlkhâwm Puai na tuah pei.

23:16^a Thlaithar Puai: «Pentikost Puai» asilole «Zarhkar Sarih hnu Puai» tiih kawh a si.

23:16^b Rawlkhâwm Puai: «Bûkte Puai» ti khalih kawh a si.

17 «Na mipapawl hmuahhmuah cu Bawipa Jehovah hmaiah kum khat ah vei thum an ra lang pei.

18 «Ka raithawinak thisen cu thilnu telh mi sang thawn na hlan lo pei, keimai puai ih a thau khal zing lam tiang a tâng lo pei. 19 Na leiram rah hmaisabikpawl lakih a ṭhabik cu Jehovah na Pathian inn ah na keng pei. Meno cu a nuih hnawiti in na sûang lo pei.

Israel hmaiah Vancungmi a Feh

20 «Ngai hnik, lamzin ih lo kil dingin na hmaiah le ka timtuah cia mi hmun ih lo hruailut dingin na hmaiah vancungmi ka thlah. 21 Amai ān ngai awla a thu lung aw; a lakah hél hlah, ziangahtile na dānpahbălnakpawl a lo ngaidam lo ding; ziangahtile ka hmin cu amah ah a um. 22 Asinan a thu na lun taktak ih, ka sim mi hmuahhmuah na tuah asile, na ralpawlih ral ka si ding ih, a lo dokalhtupawl dokalhtu ka si ding. 23 Ziangahtile ka vancungmi cu na hmaiah a feh ding ih, Amor-mipawl le Heth-mipawl le Periz-mipawl le Kanaan-mipawl le Hiv-mipawl le Jebus-mipawl hnenah a lo hruai ding, cule anmah cu ka thaihlo thluh hai ding. 24 An pathianpawl hnenah na kûn lo pei, na rian hai fawn lo pei, an hnaṭuan mipawl bangtukin na tuah fawn lo pei. Cuhnakin anmah cu na cimitter thluh sawn hai pei ih, an ṭhuamserhpawl na ṭhiatbăl ṭheh sawn pei.

25 «Cule Jehovah nan Pathian nan rian ding ih, na rawl le na tidai thlawsuah a lo pe ding. Cule nan lak ihsin natnak ka lahlo ding. 26 Na ram ah zohman nausiat simaw, cíng simaw an um lo ding. Na damsung nipawl ka kimter ding.

27 «Na hmaika-ah mipi ṭihnak nei ko ka tuah ding, na thlennak mipi hmuahhmuah lakah buainak ka umter ding ih, na ral hmuahhmuah cu an dung lo tŭn ko ka tuah ding. 28 Cule na hmai ihsin Hiv-mi, Kanaan-mi le Heth-mi pawl dawisuaktu ding na hmaiah khuaingalpawl ka thlah ding. 29 Anmah cu kum khat sungah na hmai ihsin ka dawisuak hai lo ding, culoasile na hrangah ram cu a ṭhing ding ih, ramsapawl an tam tuk pang ding. 30 Na karhzai ih ram na luahngah hlanlo na hmai ihsin málte ten anmah cu ka dawisuak ding. 31 Cule na ramripawl cu Tipi Sen ihsin ^aFilisṭia-mipawlih tifinriat tiang, cule ramṭhing ihsin ^bTivapi tiang ka tuah ding. Ziangahtile ram luahtupawl cu na kut ah ka lo pe ding ih, na hmaiah na dawisuak hai pei. 32 Anmah thawn siseh, an pathianpawl thawn siseh thukham zianghman na tuah lo pei. 33 Na ram ah an cêng lo pei, culole keimah dokalhin an lo sualter pang ding. Ziangahtile an pathianpawl na rian asile, cumi cu na hrangah tháng a si tengteng ding,» tiah a ti.

23:31^a Filisṭia-mipawlih tifinriat: Mediṭerenian tifinriat a si.

23:31^b Tivapi: Zufariṭis tiva a si.

Thisen Thukham

1 Jehovah in Mosi hnenah, «Nangmah le Aaron, Nadab le Abihu le Israel miupa 70 pawl tla Jehovah hnenah hung so uhla, hlaral ihsin kûn uh. 2 Cule Mosi lawngin Jehovah a ra naih pei, asinan annih cun an naih lo pei, mipi khal a zawngah an fehso lo pei,» tiah a ti.

3 Cule Mosi cu a ra ih, Jehovah kamsuakthu hmuahhmuah le cīn le dān hmuahhmuah cu mipi a sim. Cule mipi zaten aw khat in an sawn ih, «Jehovah ih sim mi kamsuakthu hmuahhmuah cu kan tuah ding a si,» tiah an ti. 4 Cule Mosi in Jehovah kamsuakthu hmuahhmuah cu a ngan. Cule anih cu zing takah a tho ih, tlang hramah biakṭheng a dâwl, cule Israel hnám hleihnih hrangah hngilhlonak ṭhuam hleihnih a phun. 5 Cun Meiur Thilhlănpawl hlantu le Jehovah hnenih câwpa tûaipawl ih Remnak Thilhlănpawl raithawitu Israel tefapawl lakih minopawl a thlah hai. 6 Cule Mosi in thisen a hrek a la ih, cawhtawlhpawl sungah a ret, cule thisen hrek cu biakṭheng parah a theh. 7 Cun Thukham Cazual a la ih, mipi hnatheihah a siar. Cule annih in, «Jehovah ih a sim mi hmuahhmuah cu kan tuah ding ih, thulung mi kan si ding,» tiah an ti.

8 Cule Mosi in thisen a la ih, mipi parah a theh, cule, «Zoh hnik uh, hi kamsuakthu hmuahhmuah bangtukih Jehovah in nanmah hnenih a tuah mi thukham thisen a si,» tiah a ti.

9 Cun Mosi le Aaron cu Nadab le Abihu le Israel miupa 70 pawl thawn an fehso. 10 Cule Israel-mipawlih Pathian an hung hmu. Cule a ke hnuaiah safaira lungrĕm mi vek a um ih, cumi cu a fim kelkel mi vanpawl vek a si. 11 Sikhalsehla Israel tefapawlih mizahumpawl parah Pathian in a kut a thlak lo. Cule annih in Pathian an hmu, cule an ei ih an in.

12 Cun Jehovah in Mosi hnenah, «Tlang parah ka hnenah hung so awla, cu tawkah um aw. Cule mipi na zirh dingah lungphengpawl parih ka ngan mi dān le thupekpawl ka lo pe ding,» tiah a ti. 13 Cule Mosi cu amah bawmtu Joshua thawn an tho, cule Mosi cu Pathian tlang ah cun a fehso.

14 Cun miupapawl hnenah, «Nan hnenih kan ra thlenkirsal hlanlo hitawk ihsin in rak hngak uh. Ngai hnik uh, nan hnenah Aaron le Hur an um. Mi pakhat khat in thubuai a neih asile, an kiangah va feh seh,» tiah a ti. 15 Cun Mosi cu tlang parah a fehso ih, tlang cu mero in a khuh.

16 Cun Jehovah ropitnak cu Sinai Tlang ah a ṭhumaw ih, cuih tlang cu mero in ni ruk sung a khuh. Cule a ni sarihnak ah Jehovah in mero lak ihsin Mosi a ko. 17 Jehovah ropitnak lăngdān cu Israel tefapawlih mit ah cun tlang zimih thil kangrál rero mi meisa vek a si. 18 Cule Mosi cu mero lakah a lut ih, tlang ah a fehso. Cule Mosi cu tlang parah ni 40 le zan 40 sung a um.

Biakbûk hrang Thawhhlawm

1 Jehovah in Mosi a sim. 2 «Thawhhlawm in rak kĕn dingin Israel tefapawl hnenah sim aw. A thinlung in siang zetih a petu pauhpauh hnen ihsin ka thawhhlawm na kháwng pei. 3 Cule himi hi an hnen ihsin na khăwn ding mi thawhhlawm a si. Cupawl tla cu sui, ngun, dar, 4 mepian, sendup, senlar ih cawih mi, puan nem páte le me hmul, 5 buh sen mi tuucang phawpawl, ṭhakhas phawpawl le akasia thing, 6 meitleu hrang hriak, hnih mi hriak hrang le rimhmui thaw hrangah rimthawpawl, 7 oniks lungpawl le Puithiam Kâwrcung par le ṭāngbĕn ih bŭn ding mi lungpawl tla an si. 8 Cule an lakih ka cēnnak dingah hmun thianghlim in tuahsak hai seh. 9 Biakbûk pianhmang le a bungrua hmuahhmuah ih pianhmang cu a zateih ka lo hmuh bangtukin nan tuah pei.

Thukham Kuang

10 «Cule akasia thing in Kuang na tuah pei ih, a sau lam cu dawng hnih le a hrek, a kauh lam dawng khat le a hrek, a san lam dawng khat le a hrek a si pei. 11 Cule cumi cu sui hlirhlăng na khût pei, a sung le a leng na khût pei ih, a kimvel hmuahhmuah ah sui tlâng na tuah pei. 12 Cumi hrangah sui khâng pali na bur pei ih, a hnuai lam kil pali pawl ah na bŭn ding a si. Khâng pahnih cu khat lam sirah, a dang khâng pahnih cu khat lam sirah a si pei. 13 Cule akasia thing in zawnfungpawl na tuah pei ih, cupawl cu sui na khût pei. 14 Cupawl hmangin Kuang an zawn theinak dingah zawnfungpawl cu Kuang sirpawlih khângpawl sungah na hrawlh pei. 15 Zawnfungpawl cu Kuang khângpawl sungah an um pei ih, cutawk ihsin lâk an si lo pei. 16 Cule Kuang sungah ka lo pek ding mi Theihpinak cu na ret pei.

17 «Sui hlirhlăng in Tlăwnlungawithawinak Hmun na tuah pei, a sau lam dawng hnih le a hrek le a kauh lam dawng khat le a hrek a si pei. 18 Cule sui cherub pahnih na tuah pei, Tlăwnlungawithawinak Hmun zim pahnih ihta pawl cu a serin na ser pei. 19 A zim pakhat ah cherub pakhat, a zim dangah a dang cherub pakhat tuah aw; cuih zim pahnih ah cherub cu Tlăwnlungawithawinak Hmun thawn sakhatin na tuah pei. 20 Cule cherub-pawl in tlunah an thla an pharh pei, an thla in Tlăwnlungawithawinak Hmun khuhin, pakhat le pakhat hmai an hawih aw pei. Cherub-pawlih hmai cun Tlăwnlungawithawinak Hmun lam an hawih pei. 21 Tlăwnlungawithawinak Hmun cu Kuang tlunah na ret pei ih Kuang sungah ka lo pek ding mi Theihpinak cu na ret pei. 22 Cule cu tawkah ka lo táwng ding ih, Theihpinak Kuang parih a um mi cherub pahnih karlak, Tlăwnlungawithawinak Hmun tlun ihsin Israel tefapawl hnenah thupek ih ka lo pek ding mi thil pauhpauh thuhla ah ka lo be ṭheu ding.

Sangserh Cabuai

23 «Akasia thing in cabuai khal na tuah pei, a sau lam dawng hnih, a kauh lam dawng khat, a san lam dawng khat le a hrek a si pei. 24 Cule cumi cu sui hlirhlăng na khût pei ih, sui in a kimvelah a tlâng na tuah pei. 25 Zabăwk tia-in cumi hrangah a kimvel hmuahhmuah ah tlângkawm na tuah pei ih, a kimvel hmuahhmuah ih tlângkawm hrangah sui tlâng na tuah pei. 26 Cule cumi hrangah sui khâng pali na tuah pei ih, cumiih a ke pali parih a um mi a kil pali pawl parah khângpawl na bŭn pei. 27 Cabuai dĭn theitu zawnfungpawl kaitu ah khângpawl cun a tlângkawm naih hai seh. 28 Cule Cabuai zawnnak dingah akasia thing zawnfungpawl na tuah pei ih, cupawl cu sui na khût pei. 29 A khēngpawl, a haidaupawl, a tawihnak hrangah thâwlpawl le khengkûmpawl na tuah pei. Cupawl cu sui hlirhlăng na tuah pei. 30 Cule ka hmaiih Cabuai parah Sangserh na ret ringring pei.

Sui Meitoṭhuam

31 «Sui hlirhlăng in Meitoṭhuam khal na tuah pei, Meitoṭhuam cu ser mi a si pei. A kopi, a ṭêkpawl, a khengkûmpawl, a cângbolpawl le a pangparpawl cu an sakhat ding a si. 32 Cule cumiih sirpawl ihsin ṭêk paruk a ra suak pei. Cupawl cu sir khat ih Meitoṭhuam ṭêk pathum, a dang sirih Meitoṭhuam ṭêk pathum an si. 33 A ṭêk pakhat parah ^aalmond par mûm vek khengkûm pathum cu cângbol pakhat le pangpar pakhat thawn, cule a dang a ṭêk parah almond par mûm vek khengkûm pathum cu cângbol pakhat le pangpar pakhat thawn tuah a si pei. Cutin a ṭêk paruk pawl cu Meitoṭhuam ihsin an suak pei. 34 Meitoṭhuam par rori ah almond par mûm vek khengkûm pali cu pakhat cio in cângbol le pangpar ciar thawn tuah a si pei. 35 Cule Meitoṭhuam ihsin a ṭêk mi a ṭêk paruk pawl zulhin a pakhatnak a ṭêk pahnih hnuaiah cângbol pakhat, a pahnihnak a ṭêk pahnih hnuaiah cângbol pakhat, a pathumnak a ṭêk pahnih hnuaiah cângbol pakhat an um pei. 36 An cângbolpawl le an ṭêkpawl cu an sakhat pei, a zaten sui hlirhlăng ih ser mi a si pei. 37 Cumi hrangah meito pasarih na tuah pei ih, an hmai lam tleuter dingin, cuih meitopawl cu remten an um pei. 38 Cule a caicehpawl le meiling suahdurpawl cu sui hlirhlăng a si pei. 39 Cumi cu himi bungrua hmuahhmuah thawn sui hlirhlăng talent khat hmangih tuah a si pei. 40 Cule tlang parih a pianhmang hmuh na si vek khan na tuah pei.

25:33^a almond: Sem 30:37 simfiangnak zoh aw.

Biakbûk

Biakbûk Tlun Khuh Puanzar Pakhatnak

1 «Cuihhleiah hmawih mi patzai fêmte puanzar pahra le mepian, sendup, senlar puan thawn Biakbûk na tuah pei; thiam zetih ruahman mi cherub-pawl cuangih tah mi in cupawl cu na tuah hai pei. 2 Puanzar kip ih sau lam cu dawng 28, a kauh lam dawng li cio a si pei. Cule puanzar kip in an canaw ṭheh pei. 3 Puanzar panga cu pakhat le pakhat an peh aw pei ih, a dang puanzar panga khal pakhat le pakhat an peh aw pei. 4 Cule puanzar peh khat tlâng parah mepian hnâpawl na tuah pei ih, cuvek thothoin a lengtasawn puanzar peh hnihnak tlâng par khalah na tuah ding a si. 5 Puanzar pakhat ah hnă 50 na tuah pei, cule peh hnihnak puanzar zim khalah hnă 50 in na tuah pei, cutin a hnâpawl cu a dungta thawn pakhat le pakhat an peh aw ding a si. 6 Cule sui in a kilhnak 50 na tuah pei ih, Biakbûk pakhat a can theinak dingah kilhnakpawl in puanzarpawl cu na peh awter pei.

Biakbûk Tlun Khuh Puanzar Pahnihnak

7 «Biakbûk tlun khuh hrangah mehmul puanzarpawl khal na tuah pei. Puanzar hleikhat na tuah ding a si. 8 Puanzar pakhat ciar ih sau lam cu dawng 30 a si pei ih, puanzar pakhat ciar ih kauh lam cu dawng li a si pei, cule puanzar hleikhat pawl cu an can aw ṭheh ding a si. 9 Cule puanzar panga cu a dangten peh khat ah, puanzar paruk khal a dangten peh khat ah na peh awter pei ih, a paruknak puanzar cu Puanthlam hmai lamah na bil pei. 10 Puanzar peh khat tlâng ah hnâ 50 na tuah pei ih, a peh hnihnak puanzar tlâng khalah hnă 50 na tuah pei. 11 Cule dar kilhnak 50 in na tuah pei, a kilhnak cu a hnă sungah bŭn awla, pakhat a can theinak dingah puanthlam cu na peh awter pei. 12 Puanthlam puanzar hlei a tāng mi, puanzar a tāng mi a hrek cu Biakbûk dung tlunah a tlai ding a si. 13 Cule Puanthlam puanzar a sau lamih a hlei mi khat lamih dawng khat le a dang khat lamih dawng khat cu Biakbûk sirpawl ah cumi khuh dingin hi lam sirah le khat lam sirah a tlai pei.

Biakbûk Tlun Khuh Puanzar Pathumnak le Palitnak

14 «Puanthlam hrangah buh sen mi tuucang phaw in a khuhnak le cumi tlunah ṭhakhas phaw in khuhnak na tuah pei.

Biakbûk Phărtleppawl

15 «Biakbûk hrangah akasia thing in phartleppawl cu dĭng zetih dingin na tuah pei. 16 Phărtlep pakhat ih sau lam cu dawng hra a si pei ih, phartlep pakhat ciar ih kauh lam cu dawng khat le a hrek a si pei. 17 Phărtlep pakhat le pakhat pehawknak hrangah ke pahnih a um pei. Cutivekcun Biakbûk phartlep hmuahhmuah cu na tuah ding a si. 18 Cule Biakbûk hrangah phartlep, thlang lam sir hrangah tlep 20 in na tuah pei. 19 Phărtlep 20 hnuaiah ngun in tawkhuar 40 in, phartlep pakhat ciar ih hnuaiih a ke pahnih hrangah tawkhuar pahnih na tuah pei. 20 Cule Biakbûk khat lam sir, sak lam sir hrangah phartlep 20 le, 21 ngun tawkhuar 40 a um pei ih, phartlep pakhat ciar hnuaiah tawkhuar pahnih a um pei. 22 Biakbûk nitlaknak lam sir hrangah phartlep paruk na tuah pei. 23 Cule Biakbûk dung lam kil pahnih hrang khalah phartlep pahnih na tuah pei. 24 Cupawl cu a taw ah an peh aw pei ih, a zimah khâng pakhat in a pehkhawmawter ding a si. Cutivekcun an pahnih hrangah a si pei. Cupawl cu a kil pahnih hrangah an si ding a si. 25 Cutin phartlep pariat pawl cu tlep khat fingfing taw ah ngun tawkhuar pahnih neiin, anmai tawkhuar hleiruk thawn an um ding a si.

26 «Cule akasia thing in phartlângpawl, Biakbûk sir pakhat ah phartleppawl hrangah panga in, 27 Biakbûk sir khat lam parih phartleppawl hrangah phartlâng panga in, Biakbûk sir dung, nitlaknak lam sirih phartleppawl hrangah phartlâng panga in na tuah ding a si. 28 A laiih phartlâng cu phartleppawl laifangin khat lam zim ihsin khat lam zim tiang a fehtlăng ding a si. 29 Phărtleppawl cu sui na khût pei, phărtlângpawl kaitu dingah an sui khângpawl na tuah pei ih, phărtlângpawl cu sui na khût ding a si. 30 Cule tlang parih hmuhter na si mi pianhmang vekin Biakbûk na dĭn pei.

Hmun Thianghlimbik Pindan Puanzar

31 «Tah mi pindan puanzar pakhat mepian, sendup le senlar le hmawih mi patzai fêmte in na tuah pei. Cumi cu thiam zetih ruahman mi cherub-pawl cuangih tah mi a si pei. 32 Cumi cu sui khût mi akasia ih tuah mi ṭhuam pali parah na thlai pei. Ngun tawkhuar pali tlunah ṭhuampawlih sui kūaipawl an um pei. 33 Cule a kilhnakpawl ihsin puanzar na thlaih pei. Cun cutawk, puanzar dung lamah Theihpinak Kuang cu na kenglut pei. Puanzar cu na hrangah Hmun Thianghlim le Hmun Thianghlimbik ṭhentertu a si pei. 34 Hmun Thianghlimbik sungih Theihpinak Kuang parah Tlăwnlungawithawinak Hmun cu na ret ding a si. 35 Puanzar lengah Cabuai na hung pei ih, thlang lam kap Biakbûk sir Cabuai zawnah Meitoṭhuam na ret pei, cule sak lam sirah Cabuai na ret pei.

Puanthlam Luhnak Puanzar

36 «Puanthlam luhnak hrangah puantahthiam ih tah mi mepian, sendup le senlar le hmawih mi patzai fêmte in puanzar na tuah pei. 37 Cule puanzar hrangah akasia thing ih tuah mi ṭhuam panga na tuah pei ih, sui na khût pei. An kūaipawl cu sui an si pei ih, an hrangah dar tawkhuar panga na bur pei.

Meiur Thilhlăn Biakṭheng

1 «Akasia thing in dawng nga sau le dawng nga kau Biakṭheng na tuah pei. Biakṭheng cu sir li canaw a si pei ih, a san lam dawng thum a si pei. 2 Cumiih kil pali ah a kipawl na tuah pei, cuih kipawl cu Biakṭheng thawn an sakhat pei. Cule cumi cu dar in na khût ding a si. 3 Cun a vutcâm lawhnak ding haidaupawl, suahdurpawl, cawhtawlhpawl, salaknak hmanruapawl le meiling suahdurpawl na tuah pei. A bungrua hmuahhmuah cu dar in na tuah pei. 4 Cumi hrangah dar ih tuah mi hrîknak khohrîk na tuah pei ih, a hrîknak parah cun a kil li ah darkhâng pali na tuah pei. 5 Cumi a hrîknak cu Biakṭheng laifang thleng dingin Biakṭheng biang hnuaiah na ret pei. 6 Cule Biakṭheng hrangah zawnfungpawl, akasia thing zawnfungpawl na tuah pei ih, cupawl cu dar na khût hai pei. 7 Zawnfungpawl cu khângpawl sungah thluah an si pei ih, cumi zâwn dingin zawnfungpawl cu Biakṭheng sir pahnih ah an um ding a si. 8 Biakṭheng cu kawráwngin thingphelpawl in na tuah pei, cumi cu tlang parih hmuh na si vekin tuah an si pei.

Biakbûk Tualrawn hrang Puanzar

9 «Biakbûk tualrawn khal na tuah pei. Thlang lam sir, sir khat hrangah hmawih mi patzai fêmte dawng 100 sau a tualrawn puanzarpawl a um pei. 10 Cule cumiih a ṭhuam 20 le a tawkhuar 20 pawl cu dar an si pei. Ṭhuampawlih kūaipawl le an tlângkhanpawl cu ngun a si pei. 11 Cuvek thothoin, sak lam sir tluanah dawng 100 sau puanzar, cumiih a ṭhuam 20 pawl le dar tawkhuar 20 pawl, ngun ṭhuam kūaipawl le ngun tlângkhanpawl an um pei.

12 «Cule nitlaknak lam sir tualrawn a kauhnak lam tluanah dawng 50 sau puanzar cu an ṭhuam pahra pawl le an tawkhuar pahra pawl zawngah a um pei. 13 Nisuahnak lam sir tualrawn kauhnak lam cu dawng 50 a si pei. 14 Luhnak sir khat ih puanzar cu dawng hleinga, an ṭhuam pathum pawl le an tawkhuar pathum pawl thawn a si pei. 15 Cule khat lam sirah dawng hleinga puanzar cu an ṭhuam pathum pawl le an tawkhuar pathum pawl zawngah an um pei.

16 «Tualrawn luhnak hrangah thiamtahthiam ih tah mi, tah mi mepian, sendup le senlar le hmawih mi patzai fêmte puanzar dawng 20 sau pakhat a um pei. Cumi cun ṭhuam pali le tawkhuar pali a nei pei. 17 Tualrawn kimvelih ṭhuam hmuahhmuah in ngun tlângkhan an nei pei. An kūaipawl cu ngun an si pei ih, an tawkhuarpawl cu dar an si pei. 18 Tualrawn sau lam cu dawng 100, a kauh lam cu a tluansuakin dawng 50, a san lam dawng nga, hmawih mi patzai fêmte ih tuah mi le dar ih tuah mi a tawkhuarpawl thawn a si pei. 19 Cumi ṭuannak hmuahhmuah hrangih Biakbûk bungrua hmuahhmuah, a hrenhngetnak hmuahhmuah le tualrawn hrenhngetnak hmuahhmuah cu dar an si pei.

Meitoṭhuam Hriak

20 «Cule catlak loih meito ^avâng dingin meitleu hrangah sawr mi olif hriak fimte na hnenih rak keng dingin Israel tefapawl thu na pe pei. 21 Tawnawknak Puanthlam sungah, Theihpinak hmaiih puanzar lengah Aaron le a fapapawl in zan lam ihsin zing lam tiang Jehovah hmaiah cumi cu an kilkhawi pei. Cumi cu Israel-mipawl aiawhin an tesinfanaupawl hnenih kumkhua ka sakhaw dān a si pei.

27:20^a vâng: A ṭawng hrampi ah cun, «kaisohter» ti a si.

Puithiam Lubik Sinfen

1 «Puithiam dinhmun in keimah in rĕn theinak dingah na unaupa Aaron cu amah le a fapapawl thawn Israel-mipawl lak ihsin hril awla na kiangah hruai aw. Aaron le Aaron-ih fapapawl cu: Nadab, Abihu, Eleazar le Ithamar tla an si. 2 Cule ropitertu dingah le mawitertu dingah na unaupa Aaron hrangah sinfen thianghlim na tuah pei. 3 Cutin fimnak thlarau thawi ka khahter mi kutthiam nei hmuahhmuah hnenah na sim pei, cule puithiam dinhmun ih keimah rian dingah amah serhhran dingin Aaron-ih sinfen an tuah pei. 4 Cule an tuah ding mi sinfen cu: ṭāngbĕn pakhat, Puithiam Kâwrcung pakhat, angki sau pakhat, thiam zetih tah mi kâwrfualpi pakhat, puithiam lubik lupâwng pakhat le taikhap tla an si pei. Cule puithiam dinhmun ih i rĕn theinak dingah, annih in na unaupa Aaron le a fapapawl hrangah sinfen thianghlimpawl an tuahsak pei.

Puithiam Kâwrcung

5 «Annih in sui, mepian, sendup le senlar ih cawih mi le puan nem páte an la pei ih, 6 annih in Puithiam Kâwrcung cu themthiam zetih tuah mi sui, mepian, sendup le senlar le hmawih mi patzai fêmte pawl in an tuah pei. 7 Lianghri pahnih cu an zim pahnih ah an peh aw pei, cutivekcun an peh aw ding a si. 8 Cule thiam zetih tah mi Puithiam Kâwrcung parih Puithiam Kâwrcung taiṭēm cu themthiamnak bangrepin sui, mepian, sendup le senlar le hmawih mi patzai fêmte ih tuah mi a si pei.

9 «Cule oniks lung pahnih na la pei ih, an parah Israel fapapawlih hmin: 10 an hmin paruk cu lung pakhat parah, cule hmin paruk cu a dang lung parah an suahdăn a sangsángten na kher pei. 11 Hminkhennak kherdănpawl vekin, lung parih lung khertu in a ṭuannak in, lung pahnih cu Israel fapapawlih hmin cuangin na kher pei. Cupawl cu sui kuarpawl sungah na bŭn pei. 12 Cun lung pahnih cu Israel fapapawl hrangih hngilhlonak lung ah Puithiam Kâwrcung liang parah na bĕn pei. Cule Aaron in hngilhlonak hrangah a liang pahnih parah Jehovah hmaiah an hmin cu a hruh pei. 13 Sui kuarpawl khal na tuah pei ih, 14 hrihrual bangin sui hlirhlăng in cikcin pahnih na tuah pei, cule hmawih mi cikcin cu a kuarpawl sungah na bunhnget pei.

Ṭāngbĕn

15 «Thuṭhennak ih hman ding mi ṭāngbĕn na tuah pei. Cumi cu Puithiam Kâwrcung tuahdān bangtukin themthiam zetih tah mi in na tuah pei, cumi cu sui, mepian, sendup le senlar le hrual mi patzai fêmte pawl in na tuah pei. 16 Cumi cu sir li canawin thuah ding a si pei ih, a sau lam khâp khat le a kauh lam khâp khat a si pei. 17 Cule cumi parah lung mankhung tlar li in lung mankhungpawl na phum pei: a tlar khatnak ah sardias pakhat, ṭopaz pakhat le emerald pakhat a si pei, cumi cu a tlar khatnak a si pei. 18 A tlar hnihnak cu turquoise pakhat, safaira pakhat le daimond pakhat a si pei. 19 A tlar thumnak ah jacinth pakhat, agate pakhat le amethist pakhat; 20 cule a tlar litnak ah birul pakhat, oniks pakhat le jasper pakhat a si pei. Cupawl cu sui kualpawl sungah phum an si pei. 21 Cule lung mankhungpawl cun Israel fapapawlih hmin, an hmin zulhin hleihnih an nei pei. Hminkhennak kher vekin anmai hmin pakhat ciar in hnám hleihnih zulhin an si pei.

22 «Sui hlirhlăng ih phiar mi hrihrualpawl vekin a zimah ṭāngbĕn hrangah cikcinpawl na tuah pei. 23 Cule ṭāngbĕn hrangah sui khâng pahnih na tuah pei ih, cuih khâng pahnih cu ṭāngbĕn zim hnih ah na thlaih pei. 24 Cun phiar mi sui cikcin pahnih cu ṭāngbĕn zimpawlih a um mi khâng pahnih ah na sih pei, 25 cule phiar mi cikcin pahnih ih a khat lam zimpawlih kuar pahnih ah na bunhnget pei ih, a hmai lamih Puithiam Kâwrcung lianghripawl ah na sih pei.

26 «Suikhâng pahnih na tuah pei ih, Puithiam Kâwrcung lam hawihtu ṭāngbĕn sung lamih a um mi, ṭāngbĕn zim hnih ih zîkah na thlaih pei. 27 Cule sui khâng dang pahnih na tuah pei ih, cupawl cu Puithiam Kâwrcung lianghri pahnih, a hmai lam hnuai, thiam zetih tah mi Puithiam Kâwrcung taiṭēm a ṭhitnak cekci ah na thlaih pei. 28 Cupawl cun ṭāngbĕn cu cuih khângpawl hmangin Puithiam Kâwrcung khângpawl ah, hri mepian hmangin an sih pei, cutin cumi cu thiam zetih tah mi Puithiam Kâwrcung taiṭēm tlunah a um pei ih, cutin ṭāngbĕn cu Puithiam Kâwrcung ihsin a pelh lo ding. 29 Cule Hmun Thianghlim ih Aaron a luh tikah a lung zawnih thuṭhennak ih hman ding mi ṭāngbĕn parah Israel fapapawlih hmin cu Jehovah hmaiih hngilhlonak ah a thlaih ringring ding a si.

Urim le Thummim

30 «Cule thuṭhennak ih hman ding mi ṭāngbĕn sungah Urim le Thummim na ret pei ih, cupawl cu Jehovah hmaiih Aaron a luh tikah a lung zawnah an um pei. Cun Aaron in Israel tefapawlih thuṭhennak ih hman mi ṭāngbĕn cu a lung zawnah Jehovah hmaiah a thlaih ringring ding a si.

Puithiam Kâwrcung Kâwrfual

31 «Puithiam Kâwrcung kâwrfual cu mepian hlir in na tuah pei. 32 Cumiih laifangah a lu hrawlhnak hrangah kâ a um pei. A tleklonak dingah a kâ kimvel hmuahhmuah cu kâwr hngawng an khūl vekin tlâng khūlnak a nei pei. 33 Cule cumiih fêm ah mepian, sendup le senlar in talê rahpawl, a fêm kimvel hmuahhmuah ah le cupawl karlak kimvel hmuahhmuah ah sui khîngtepawl: 34 sui khîngte pakhat le talê rah pakhat, sui khîngte pakhat le talê rah pakhat, tiin a kâwrfual fêm kimvel hmuahhmuah parah na tuah pei. 35 Cule rawng a bawl tikah Aaron parah hitin a si pei, Jehovah hmaika Hmun Thianghlim sungih a luh tikah le a suah tikah, a thihlonak dingah, cumi awn cu theih a si ding.

Lupâwng le Sui Khēng

36 «Sui hlirhlăng tlep pakhat na tuah fawn pei ih, hminkhennak kher vekin: THIANGHLIMNAK CU JEHOVAH TA, tiah a parah na kher pei.

37 «Cule cumi cu puithiam lubik lupâwng parih um dingin hri mepian parah na ret pei. Cumi cu puithiam lubik lupâwng hmai lam parah a si pei. 38 Aaron in Israel tefapawl in an thawhhlawm thianghlim hmuahhmuah ih an tithianghlim mi, thil thianghlimpawlih mawhsualnak a phurh theinak dingah cumi cu Aaron-ih cal ah a um pei. Cule annih cu Jehovah hmaiih cohlan an si theinak dingah cumi cu a cal ah a um ringring pei.

Puithiam Hnipuanpawl

39 «Tah mi puan nem páte kâwrfualpi cu thiam zetin na tah pei, puithiam lubik lupâwng puan nem páte na tuah pei ih, tah mi taikhap na tuah pei.

40 «Aaron fapapawl hrangah kâwrfualpipawl na tuah pei ih, an hrangah taikhappawl na tuahsak hai pei. Cule an hrangah ropitertu dingah le mawitertu dingah lupâwng na tuahsak hai pei. 41 Cule cupawl cu na unaupa Aaron parah le a hnenih um a fapapawl na hruhter pei. Puithiam dinhmun in keimah in rĕn theinak dingah anmah cu hriak na thih hai pei, anmah cu na serhhran hai pei ih, anmah cu na tithianghlim hai pei. 42 Cule an taklawngnak khuhnak dingah patzai ih tah mi bâwngbite na tuahsak hai pei. Cupawl cu tâi ihsin cāwn tiang an thleng pei. 43 Mawhsualnak suakterin an thihlonak dingah, cupawl cu Tawnawknak Puanthlam sung an luh tikah simaw, Hmun Thianghlim ah rawngbawl dingin Biakṭheng an ra naih tikah simaw Aaron parah le a fapapawl parah an um pei. Cumi cu amah le a hnuih a cithlahpawl hrangah sakhaw dān a si kumkhua ding a si.

Puithiampawl Serhhrannak

1 «Puithiam dinhmun ih keimah in rian dingin anmah tithianghlim dingah himi hi an hnenih na tuah ding mi a si: sawihsel ding um lo câwpa tûai pakhat le tuucang pahnih, 2 thilnu telh lo sang, hriak rawi mi thilnu telh lo sangperpawl le hriak măn mi thilnu telh lo sangper páte la aw; cupawl cu sangvut phŭt in na tuah pei. 3 Cupawl cu kho pakhat sungah na ret pei ih, câwpa tûai le tuucang pahnih zawngah kho in na keng pei.

4 «Cule Aaron le a fapapawl cu Tawnawknak Puanthlam luhnak ah na hruai hai pei ih, anmah cu tidai in na khawlh pei. 5 Cun sinfen cu na la pei ih, Aaron cu kâwrfualpi na hrukter pei, cule Puithiam Kâwrcung kâwrfual, Puithiam Kâwrcung, ṭāngbĕn le thiam zetih tah mi Puithiam Kâwrcung taiṭēm in na ṭawn pei. 6 A lu ah puithiam lubik lupâwng na pâwngter pei ih, puithiam lubik lupâwng parah lukhap thianghlim na khapter pei. 7 Cule thih mi hriak na la pei, cumi cu a lu parah na tawih pei ih, amah na thih pei. 8 Cun a fapapawl na hruai pei ih, an parah kâwrfualpi na hruhter hai pei. 9 Cule Aaron le a fapapawl cu taiṭawnpawl ṭawnsak awla, an parah lupâwngpawl pâwngter aw. Puithiam sinak cu an hrangah kumkhaw sakhaw dān a si pei. Cun Aaron le a fapapawl cu na serhhran hai pei.

10 «Tawnkhawmawknak Puanthlam hmaiah câwpa tûai ken mi khal na nei pei ih, Aaron le a fapapawl in câwpa tûai lu parah an kut an suang ding a si. 11 Cun Tawnawknak Puanthlam luhnak kiangah Jehovah hmaiah câwpa tûai na that pei. 12 Câwpa tûai thisen hrekkhat na la pei ih, na kutzung in Biakṭheng kipawl ah na mān pei. Cule Biakṭheng tawphah kapah thisen cu na thle thluh pei. 13 Cule a sungril tuamtu thau hmuahhmuah, a thinhnûn thau le a kaileng pahnih le an parih a thau na la thluh pei ih, Biakṭheng parah na ur pei. 14 Asinan câwpa tûai sa lawngte cu a vun le a êk thawn riahhmun khuarnak lengah meisa in na ur pei. Cumi cu Sual Thilhlăn a si.

15 «Tuucang pakhat khal na la pei, cule Aaron le a fapapawl in tuucang lu parah an kut an suang pei ih, 16 tuucang cu na that pei. Cule a thisen na la pei ih, cumi cu Biakṭheng kimvel hmuahhmuah ah na theh pei. 17 Cun tuucang cu na cánnâwi pei, a sungrilpawl le a kepawl na khawlh pei ih, cupawl cu a sa cannāwipawl le a lu thawn na ret pei. 18 Cule tuucang cu a zaten Biakṭheng parah na ur pei. Cumi cu Jehovah hnenih Meiur Thilhlăn a si, cumi cu rimthaw, Jehovah hnenih meisa ih ur mi thilhlăn a si.

Tuucang Serhhrannak

19 «A pahnihnak tuucang khal na la pei ih, Aaron le a fapapawl in tuucang lu parah an kut an suang pei. 20 Cun tuucang cu na that pei, cule a thisen hrekkhat na la pei ih Aaron-ih vawrh lam hna zimah le a fapapawlih vawrh lam hna zimah, an vawrh lam kut zungpi ah le an vawrh lam ke zungpi ah na mān pei. Cule thisen cu Biakṭheng kimvel hmuahhmuah ah na theh pei. 21 Cule Biakṭheng parih a um mi thisen hrekkhat le hnih mi hriak hrekkhat na la pei ih, Aaron par le a sinfen parah, a fapapawl le a hnenih um a fapapawlih sinfen parah na theh pei. Cule amah le a sinfen, a fapapawl le a hnenih um a fapapawlih sinfen cu amah zawngah serhhran an si pei.

22 «Tuucang thau, a mei thau, a sungrilpawl tuamtu thau, a thinhnûn thau, a kaileng pahnih le an parih thau le serhhran mi tuucang a si ruangah a vawrh lam cāwn, 23 sang hlawm khat, hriak thawi tuah mi sangper pakhat le Jehovah hmaiih a um mi thilnu telh lo sang kho sung ihta sangper páte pakhat khal na la pei ih, 24 hipawl hmuahhmuah cu Aaron-ih kut le a fapapawlih kut ah na ret pei. Cule cupawl cu Jehovah hmaiah sēp thilhlăn hrangah na sēp pei. 25 Cupawl cu an kut ihsin na lasal pei ih, Jehovah hmaiih rimthaw dingah, Meiur Thilhlăn hrangah Biakṭheng parah na ur pei. Cumi cu Jehovah hnenih meisa ih ur mi thilhlăn a si.

26 «Cun Aaron serhhrannak tuucangih ṭâng na la pei ih, Jehovah hmaiih sēp thilhlăn hrangah na sēp pei, cule cumi cu nangmai vo a si pei. 27 Cule serhhran mi tuucang ihsin sēp mi sēp thilhlăn saṭâng le cawikan mi cawikhai thilhlăn cāwn cu na serhhran pei. Cule himi hi cumi ihsin Aaron le a fapapawlih an co ding mi a si. 28 Cumi cu Israel tefapawl hnen ihsin Aaron le a fapapawl hrang le Israel tefapawl hrangah sakhaw dān a si kumkhua pei. Ziangahtile himi cu cawikhai thilhlăn a si, cumi cu an Remnak Thilhlănpawlih raithawinakpawl ihsin Israel tefapawl hnen ihsin cawikhai thilhlăn a si pei, cumi cu Jehovah hnenih an cawikhai thilhlăn a si.

29 «Cule Aaron-ih sinfen thianghlim cu amah hnuih a fapapawlih ta an si pei ih, annih cu cuih hnipuan hruhterin hriak thih le serhhran an si pei. 30 Amai dinhmun ih puithiam ih a hung cangtu fapa in Hmun Thianghlim ih rawngbawl dingin Tawnawknak Puanthlam ih a luh tikah cupawl cu ni sarih sung a hruk pei.

31 «Cule serhhran mi tuucang na la pei ih hmun thianghlim ah a sa na sûang pei. 32 Cun tuucang sa cu Aaron le a fapapawl in kho sungih sang thawn Tawnawknak Puanthlam luhnak ah an ei pei. 33 Anmah tithianghlim ding le serhhran dingah sualkhuhthawinak tuahnak ih hman mi thilpawl cu an ei ding a si. Asinan mi dangpawl cun an ei lo pei, ziangruangahtile cupawl cu an thianghlim a si. 34 Cule serhhrannak thilhlănpawlih sa pakhat khat simaw, sang simaw zing lam tiang a hlei asile, a hlei mi cu meisa in na ur pei. Cumi cu ei a si lo pei, ziangruangahtile cumi cu a thianghlim a si.

35 «Cule thu ka lo pek mi hmuahhmuah vekin Aaron le a fapapawl hnenah na tuah pei. Ni sarih sung anmah na serhhran hai pei. 36 Cule sualkhuhthawinak hrangih Sual Thilhlăn ah ni tin câwpa tûai na hlan pei. Biakṭheng hrangih sualkhuhthawinak na tuah tikah Biakṭheng cu na thianfai pei, cule Biakṭheng tithianghlim dingah Biakṭheng cu hriak na hnih pei. 37 Ni sarih sung cu Biakṭheng hrangah sualkhuhthawinak na tuah pei ih, na tithianghlim pei. Cule Biakṭheng cu a thianghlim zet mi a si pei. Biakṭheng daitu ding pauhpauh cu an thianghlim pei.

Ni Tin Thilhlănpawl

38 «Himi hi Biakṭheng parih na hlăn ding mi a si: ni tin a pehpehin kum khat a ti mi tuufa no pahnih na hlan pei. 39 Tuufa no pakhat cu zing lamah na hlan pei ih, a dang tuufa no pakhat cu khawthim zawngah na hlan pei. 40 Tuufa no pakhat cu sawr mi hriak kalān khat ih ṭhen li ṭhen khat thawi rawi mi sangvut phŭt efa khat ih ṭhen hra ṭhen khat le Inding Thilhlăn hrangih sabitzu kalān ṭhen li ṭhen khat thawn a si pei. 41 Cule a dang tuufa no cu khawthim zawngah na hlan pei ih, cumi cu Thlairawl Thilhlăn le Inding Thilhlăn thawn rimthaw hrangah Jehovah hnenih meisa ih ur mi thilhlăn, zing lamih na hlăn vekin, na hlan ding a si. 42 Cumi cu na tesinfa san tiangin Tawnawknak Puanthlam luhnak ah Jehovah hmaiih Meiur Thilhlăn a si ringring pei, cu tawkah nangmah lo be dingin ka lo táwng ṭheu ding. 43 Cule cu tawkah Israel tefapawl ka táwng ding ih, Biakbûk cu ka ropitnak in tithianghlim a si ding. 44 Cun Tawnawknak Puanthlam le Biakṭheng cu ka serhhran ding. Aaron le a fapapawl khal puithiam dinhmun ih keimah in rian dingin ka serhhran hai ding. 45 Israel tefapawl lakah ka cêng ding ih, an Pathian ka si ding. 46 Cule keimah cu Jehovah an Pathian, Izip ram ihsin anmah hruaisuaktu ka si ti an thei ding, cutin an lakah ka cêng ding. Keimah cu Jehovah an Pathian ka si.

Rimhmui Biakṭheng

1 «Rimhmui urnak ding Biakṭheng pakhat na tuah pei, cumi cu akasia thing in na tuah ding a si. 2 Cumi ih a sau lam cu dawng khat le a kauh lam khal dawng khat a si pei. Sir li can aw a si pei, cule a san lam cu dawng hnih a si pei. Cumiih ki cu amah thawn sakhat an si pei. 3 Cule a zim, a sir kimvel hmuahhmuah le a kipawl cu sui hlirhlăng na khût pei ih, a kimvel hmuahhmuah ah sui tlâng na tuah pei. 4 Cumi hrangah sui khâng pahnih, a sir pahnih parih a tlâng hnuaiah na tuah pei. Cupawl cu a sir pahnih ah na bŭn pei ih, cupawl cu cumi zawnnak ding zawnfungpawl awktu an si ding. 5 Zawnfungpawl cu akasia thing in na tuah pei ih, cupawl cu sui na khût hai pei. 6 Cule cumi cu, nangmah ka lo tawnnak ding hmun, Theihpinak tlunih Tlăwnlungawithawinak Hmun hmai, Theihpinak Kuang hmaiih puanzar hmaiah na ret pei.

7 «Cumi parah Aaron in zing tin rimthaw a ur pei, meitopawl a timtuah tikah, cumi parah rimhmui thaw a ur ding a si. 8 Cule Aaron in khawthim zawngih meito a van tikah, cumi parah rimhmui a ur pei, cumi cu nan tesinfa san tiangin Jehovah hmaiih rimhmui a si vivo pei. 9 Cumi parah rimhmui danglam siseh, Meiur Thilhlăn siseh, Thlairawl Thilhlăn siseh na hlan lo pei ih, cumi parah Inding Thilhlăn na burh fawn lo pei. 10 Cule Aaron in Biakṭheng kipawl parah sualkhuhthawinak cu sualkhuhthawinak Sual Thilhlăn thisen thawn kum khat vei khat a tuah pei. Amah in Biakṭheng parah nan tesinfa san tiangin kum khat vei khat sualkhuhthawinak a tuah pei. Cumi cu Jehovah hrangah a thianghlim zet mi a si,» tiah a ti.

Tlennak Paisa

11 Cun Jehovah in Mosi hnenah, 12 «Israel tefapawlih mipum hrangah mipum siarnak na tuah ih an mipum na siar tikah, mipa pakhat cio in Jehovah hnenah anmai hrangah tlennak an pe ding a si, cutin an mipum na siar tikah an lakah hremnak a thleng lo ding. 13 Himi hi mipum siar mi pakhat cio ih an pek ding mi cu a si: hmun thianghlim shekel siarnak vekin shekel hrek (shekel khat cu gerah 20 a si). Shekel hrek cu Jehovah hnenih thawhhlawm a si pei. 14 Mipum siar mi lakih mi pakhat cio, kum 20 ihsin a tlun lam mi in Jehovah hnenah thawhhlawm a pe ding a si. 15 Nanmai hrangih sualkhuhthawinak tuah dingah Jehovah hnenih thawhhlawm nan pek tikah milian in tam cuangin a pe lo pei ih, mifarah in shekel hrek hnakih mál a pe lo pei. 16 Cule Israel tefapawlih sualkhuhthawinak paisa cu na la pei ih, cumi cu Tawnawknak Puanthlam rawngbawlnak hrangah na ruat pei, cutin nanmai hrangih sualkhuhthawinak tuah dingah cumi cu Israel-mipawl hrangah Jehovah hmaiih hngilhlonak a si thei ding,» tiin a sim.

Dar Maihum

17 Cun Jehovah in Mosi hnenah, 18 «Khawlhawknak hrangah dar maihum khal, a tohkual khal dar in na tuah pei. Cumi cu Tawnawknak Puanthlam le Biakṭheng karlakah na ret pei. Cule cumi sungah tidai na ret pei. 19 Ziangahtile cumiih tidai in Aaron le a fapapawl in an kut le an ke an khawlh ding a si. 20 Jehovah hnenih meisa ih ur mi thilhlăn tuah dingin Tawnawknak Puanthlam sungih an luh tikah simaw, rawngbawl dingin Biakṭheng an rak naih tikah simaw tidai in an khawlh aw pei, culole an thi ding. 21 Cutin an thihlonak dingah an kut le an ke an khawlh pei. Cule cumi cu an tesinfa san hmuahhmuah tiangin amah le a cithlahpawl hnenih ka sakhaw dān a si kumkhua ding,» tiin a sim.

Hnih Mi Hriak Thianghlim

22 Cuihhleiah Jehovah in Mosi hnenah, 23 «Na hrangah rimhmui ṭhabikpawl, mura ti shekel 500, cumi hrek tluk i rit thingthak rimthaw shekel 250 le kane rimthaw shekel 250, 24 hmun thianghlim shekel bangtukin kassia shekel 500, olif hriak kalān khat pawl tla la aw. 25 Cule hipawl ihsin rimhmui tuahtu ih kutsuak bangtukin hnih mi hriak thianghlim, rawi mi hnih mi hriak na tuah pei. Cumi cu hnih mi hriak thianghlim a si pei. 26 Cumi thawn Tawnawknak Puanthlam le Theihpinak Kuang, 27 Cabuai le a bungrua hmuahhmuah, Meitoṭhuam le a bungruapawl, Rimhmui Biakṭheng, 28 Meiur Thilhlăn Biakṭheng le a bungrua hmuahhmuah thawn, Maihum le a tohkual cu hriak na hnih pei. 29 A thianghlim zet mi an si theinak dingah cupawl cu na serhhran hai pei. Cupawl daitu ding ziangkhal a thianghlim pei. 30 Cule puithiam dinhmun in keimah in rĕn theinak dingah Aaron le a fapapawl cu hriak na hnih pei ih, na serhhran hai pei.

31 «Cule Israel tefapawl hnenah, ‹Himi hi nan tesinfanau tluansuakin ka hrangih hnih mi hriak thianghlim a si pei. 32 Cumi cu minung taksa parah burh a si lo pei. Amah bang mi, cumi tuahdān bangtukih tuah mi a dang khal na tuah lo pei. Cumi cu a thianghlim ih, na hrangah a thianghlim ding a si. 33 Zokhal cumi vekih a tuahtu asilole zokhal cumi ihta ziangkhal mi dang parih a rettu cu a mipawl lak ihsin sahcat a si pei,› tiin na sim pei,» tiah a sim.

Rimhmui

34 Cule Jehovah in Mosi hnenah, «Rimhmui thawpawl, ^anataf le ^bshekhelet le ^ckhelbenah le frankinsense hlirhlăng pawl cu rimhmui thawpawl thawn na la pei, a tam zât an bang aw ciar pei. 35 Rimhmui tuahtu ih kutsuak bangtukih cawhrawi mi, cite thlak mi, a fai mi le a thianghlim mi cu hipawl ihsin rimhmui na tuah pei. 36 Cule cumiih a hrekkhat cu ṭha zetin na vaw pei ih, ka lo tawnnak ding hmun, Tawnawknak Puanthlam sungih Theihpinak hmaiah a hrekkhat na ret pei. Cumi cu nan hrangah a thianghlim zet mi a si ding a si. 37 Sikhalsehla na tuah ding mi rimhmui lawngte cu nan hrangah cumi tuahdān vekin zianghman na tuah lo pei. Cumi cu na hnenah Jehovah hrangih a thianghlim mi a si ding. 38 Cumi hnīm dingah cuvekih a tuahtu pauhpauh cu an mipawl lak ihsin sahcat an si pei,» tiah a ti.

30:34^a nataf: Thingkung ihsi lâk mi hnâi a si.

30:34^b shekhelet: Keplung ihsi tuah mi a si.

30:34^c khelbenah: Palisṭin nisuahnak lam ram ih um, kung fate ihsi lâk mi rimhmui tihnâi a si. Hmun Thianghlimbik hmaiih sui biakṭheng parih ur mi rimhmui a si.

Themthiampawl

1 Jehovah in Mosi hnenah, 2 «Zoh hman, Hur fapa Uri, Uri fapa Judah hnám Bezalel cu a hmin in ka ko zo. 3 Cule amah cu fimnak ah, theihthiamnak ah, theihnak ah le themthiamnak tinkim ah Pathian Thlarau in ka khatter zo. 4 Cutin amah cu kutthiam hnapawl ruangzĭng dingah, sui, ngun le dar ṭuan dingah, 5 remkhawm dingih lung mankhungpawl tánin, thing kherin le kutthiam hna tinkim ṭuan dingah a si. 6 Cule keimah, ngai hnik, keimah rori in Dân hnám ihsin Ahisamak fapa Aholiab cu amai zawngah ka ruat zo ih, thu ka lo pek mi hmuahhmuah an tuahsuak theinak dingah kutthiam nei hmuahhmuah ih thinlung ah fimnak ka ret zo. 7 Annih in Tawnkhawmawknak Puanthlam, Theihpinak Kuang le cumi parih um Tlăwnlungawithawinak Hmun, Puanthlam bungrua hmuahhmuah, 8 Cabuai le a bungruapawl, Sui hlirhlăng Meitoṭhuam le a bungrua hmuahhmuah, Rimhmui Biakṭheng, 9 Meiur Thilhlănnak Biakṭheng le a bungrua hmuahhmuah, Maihum le a tohkual, 10 rawngbawlnak sinfen, puithiam dinhmun ih rawngbawl dingin puithiam Aaron hrangih sinfen thianghlim le a fapapawlih sinfen, 11 hnih mi hriak le hmun thianghlim hrangih rimhmui thawpawl tla an tuah theinak dingah ka ret a si. Thu ka lo pek mi hmuahhmuah bangtukin an tuah pei,» tiin a sim.

Sabbath Dān

12 Cule Jehovah in Mosi hnenah, 13 «Israel tefapawl hnen khalah, ‹Ka Sabbath-pawl nan ul tengteng pei, ziangahtile keimah cu a lo tithianghlimtu Jehovah ka si ti nan theih theinak dingah cumi cu nan tesinfa san tluansuakin keimah le nanmah karlakih hminsinnak a si. 14 Curuangah Sabbath cu nan ul pei, ziangahtile cumi cu nan hrangah a thianghlim a si. Cumi a bawrhbangtertu kip cu thah tengteng an si pei, ziangahtile zokhal cuih ni ih hna a ṭuantu, cu pa cu a mipawl lak ihsin thaihloh a si pei. 15 Hna cu ni ruk sung ṭuan a si pei, asinan a ni sarihnak cu Sabbath cawlh, Jehovah hrangih a thianghlim mi a si. Sabbath ni ih hna a ṭuantu pauhpauh cu thah tengteng an si pei. 16 Curuangah Israel tefapawl cun Sabbath cu an hmang tengteng pei. Kumkhaw thukham hrangah an tesinfa san hmuahhmuah tiangin Sabbath cu an ul ding a si. 17 Cumi cu keimah le Israel tefapawl karlakih hminsinnak a si kumkhua ding, ziangahtile Jehovah in ni ruk sungah vanpawl le leilung a tuah, cule a ni sarihnak ah a cawl ih, a tha a tharsal,› tiin sim aw,» tiah a ti.

18 Cule Jehovah in Sinai Tlang parah amah thawi biakawk a ṭheh tikah, Jehovah in Mosi hnenah Pathian kutzung ih ngan mi lungpheng, Theihpinak lungpheng pahnih a pe.

Sui Câwno

1 Mipi in tlang ihsin Mosi a rung ṭum tlai ti an hmuh tikah, mipi cu Aaron hnenah an pungkhawmaw ih a hnenah, «Izip ram ihsin in hruaisuaktu hi Mosi parah ziang a cang ti kan thei lo. Curuangah ra awla, kan hmaiih fehtu ding kanmai hrangah pathianpawl in tuahsak aw,» tiah an ti.

2 Cule Aaron in an hnenah, «Nan nupipawl, nan fapapawl le nan fanupawl ih hna parih a um mi sui hnakhaihpawl kha phawih uhla, cupawl cu ka hnenah rak keng uh,» tiah a ti. 3 Cule mi senpi hmuahhmuah in anmai hna par ihta sui hnakhaihpawl cu an phawih ih, Aaron hnenah an rak keng. 4 Cule anih in an kut ihta sui cu a cohlang ih, cumi cu a khernak hmanrua thawn a rĕm ih burcawp câwno a tuah. Cun annih in, «Maw Israel, himi hi Izip ram ihsin a lo hruaisuaktu na pathianpawl an si!» tiah an ti.

5 Cun Aaron in cumi a hmuh tikah cumi hmaiah biakṭheng a dâwl. Cule Aaron in thuthannak a tuah ih, «Thaizing cu Jehovah hnenih puai ni a si,» tiah a ti. 6 Cule a thaizing zing zetah an tho ih Meiur Thilhlănpawl an hlan ih, Remnak Thilhlănpawl tla an keng, cule mipi cu ei le in dingah an to ih, lek dingah an tho.

7 Cule Jehovah in Mosi hnenah, «Tho awla, ṭum aw! Ziangahtile Izip ram ihsin na hruaisuah mi na mipawl cu anmah le anmah an bawrhhlawhawter zo. 8 Anmah thu ka rak pek mi lamzin ihsin an rak pial rang tuk. An hrangah burcawp câwno an tuah, cule cumi cu an bia ih a hnenah raithawiin, ‹Maw Israel, hipawl hi Izip ram ihsin a lo hruaisuaktu na pathianpawl an si,› tiah an ti,» tiah a ti. 9 Cule Jehovah in Mosi hnenah, «Hi mipi cu ka hmu zo ih, ngai hnik, hipawl hi lungruh minung an si! 10 Curuangah ka thinhengnak cu anmah dokalhin a alh ih, anmah ka kangrálter theinak dingah atu ah keimah ten um ning. Cule nangmah ihsin miphun tumpi ka tuah ding,» tiah a ti.

Mosi in Israel a Ngensak

11 Cule Mosi in Jehovah a Pathian a ngen ih, «Jehovah, ziangahso Izip ram ihsin huham ropi le kut cak thawn na rak hruaisuak zo mi na mipawl dokalhih na thin a heng? 12 Ziangahso Izip-mipawl in, ‹Amah in anmah siatsuah dingah, tlang parah anmah that dingin le leilung vangdâp ihsin anmah cimitter dingah a hruaisuak hai a si,› an ti ding? Tuksumza na thinhengnak cu kiangter awla, na mipawl hnenih himi siatsuahnak ihsin lamlêt aw. 13 An hnenah, ‹Na cithlahpawl cu van ih arsipawl zât in ka karhzaiter ding ih, ka rak sim zo mi hi ram pumpi cu na cithlahpawl hnenah ka pe ding ih, cumi cu kumkhuain an luah ding,› tiih an hnenih nangmah rori ih sia na rak sămnak na siahhlawh Abraham, Isak le Israel tla cîng ringring aw,» tiah a ti. 14 Cule Jehovah in a mipawl hnenah a tuah tum mi siatsuahnak ihsin a lamlêt.

15 Cule Mosi cu a kut ah Theihpinak lungpheng pahnih thawn a kir ih, tlang ihsin a ṭum. Lungpheng cu an hmai veve ah ngan an si ih, pakhat parah le a dang pakhat parih ngan an si. 16 Lungpheng cu Pathian ih tuah mi an si ih, ngan mi khal lungpheng parah kherin Pathian ih a ngan mi an si. 17 Cule mipi an au ih an thâwm Joshua in a theih tikah, Mosi hnenah, «Riahhmun khuarnak ah raldo thâwm a um,» tiah a ti.

18 Asinan anih in,

«Cumi cu nehnak authâwm a si lo,
Neh mi ih ṭahnak thâwm khal a si lo,
Ka theih mi cu hla sak thâwm sawn a si,»

tiah a ti.

19 Cule hitin a si, Mosi cu riahhmun khuarnak kiang a thlen veten câwno lem le milâmpawl a hmu. Cun Mosi-ih thinhengnak cu a sa, cule lungphengpawl cu a kut ihsin a hlăwn ih, tlang hramah a khuai hai. 20 Cun an rak tuah mi câwno lem cu a la, cumi cu meisa ah a ur ih, a rialdip ṭheh, cule tidai parah thehdarh tahratin Israel tefapawl a inter hai. 21 Cule Mosi in Aaron hnenah, «Hi mi senpi hin ziangso na hnenah an rak tuah ih, an parih sual nasatuk na rak thlen?» tiah a ti.

22 Cule Aaron in, «Ka bawipaih thinhengnak cu so hlah seh. Mipi cu thil ṭhalo lam hawi cia an sizia na thei. 23 Ziangahtile annih in ka hnenah, ‹Izip ram ihsin in rak hruaisuaktu hi Mosi cu a parah ziang a cang ti kan thei si lo, kan hmaiih feh dingah pathianpawl in tuahsak aw,› tiah in ti. 24 Cule kei in an hnenah, ‹Sui neitu pauhpauh cun an suipawl cu phawih hai seh,› tiah ka ti. Cutin cumi cu annih in keimah in pe ih, cumi cu meisa ah ka thlak, cule hi câwno hi a ra suak,» tiah a ti.

25 Cule mipi cu Aaron in an ralpawl lakah ningzakzain a rak thlahthlam ruangah an duh duhin an rak um ti Mosi in a hmuh tikah, 26 Mosi cu riahhmun khuarnak luhnak ah dingin, «Zo so Jehovah lamih ṭang? Ka hnenah ra seh,» tiah a ti. Cule Levi tefa hmuahhmuah a hnenah an ra pungkhawm. 27 Cule an hnenah, «Israel-ih Pathian Jehovah in, ‹Mipa kip in an ralnâm pai hai sehla, riahhmun khuarnak tluanih luhnak pakhat hnu pakhat lutin suak hai seh, cule mipa kip in an unaupa, mipa kip in an hawipi le mipa kip in an innhnen that hai seh,› tiin a sim,» tiah a ti. 28 Cule Levi tefapawl in Mosi-ih ṭawngkam bangtukin an tuah. Cule cuih ni ah mipi lakih pacang 3000 hrawng an thi. 29 Cule Mosi in, «Tuihsun ah amah in nan parih thlawsuah a lo pek theinak dingah, tuihsun ah Jehovah hnenah nanmah le nanmah serhhran aw uh, ziangahtile mipa kip in anmai fapa le anmai unaupa an do a si,» tiah a ti.

30 Cun a thaizing ah hitin a si, Mosi in mi senpi hnenah, «Sual rapthlak nan tuah zo. Curuangah atu ah Jehovah hnenah ka fehso ding, nan sualnak hrangah sualkhuhthawinak ka tuah thei pangah,» tiah a ti.

31 Cun Mosi cu Jehovah hnenah a kirsal ih, «Hi mi senpi hin sual rapthlak an rak tuah ih, anmai hrangah sui pathianpawl an rak tuah hi aw! 32 Sikhalsehla atu ah, an sual na ngaidam pei maw? Na ngaidam lo a si ahcun, na rak ngan zo mi na cazual ihsin i thaihlo dingin ka lo ngen a si,» tiah a ti.

33 Cule Jehovah in Mosi hnenah, «Keimah dokalhih a rak sualtu pauhpauh cu ka cazual ihsin ka thaihlo ding. 34 Curuangah feh aw, ka rak lo sim mi hmun ah mi senpi hruai aw. Ngai hnik, na hmaiah ka vancungmi a feh ding. Sikhalsehla lehrūl dingih ka rat ni ah cun an sual ruangah an parah ka lehrūl ding a si,» tiah a ti.

35 Cule Jehovah in mi senpi cu Aaron ih tuah mi câwno lem thawi an tuah mi ruangah a hrem hai.

Pathian ih Israel Umpinak

1 Jehovah in Mosi hnenah, «Hitawk ihsin păwksuak uhla, nangmah le Izip ram ihsi na rak hruaisuak mi mi senpi cu, ‹Na cithlahpawl hnenah ka lo pe ding,› tiin Abraham, Isak le Jakob hnenih sia ka rak săm mi ram ah fehso uh. 2 Cule na hmaiah ka vancungmi ka thlah ding ih, Kanaan-mi, Amor-mi, Heth-mi, Periz-mi, Hiv-mi le Jebus-mi pawl ka dawisuak hai ding. 3 Hnawiti le khuaitizu luannak ram ah fehso uh, ziangahtile nan lakah ka fehso lo ding, culoasile lamzin ah ka lo cimitter thluh pang ding, ziangahtile nannih cu lungruh minung nan si,» tiah a ti.

4 Cule mi senpi in hi thuthang sia an theih tikah lungkuaiin an ṭap ih, zohman in an ceiawknak an bĕnaw lo. 5 Ziangahtile Jehovah in Mosi hnenah, «Israel tefapawl hnenah, ‹Nannih cu lungruh minung nan si. Hmakhatteah nan lakah rain ka lo cimitter thluh thei. Curuangah na hnenah ziang ka tuah ding ti ka theihnak dingah atu ah na ceiawknakpawl phawih aw,› tiin sim aw,» tiah a ti. 6 Cule Israel tefapawl cun Horeb Tlang kiangah anmah ten an ceiawknak an phawih.

7 Mosi in puanthlam cu a la ih, cumi cu riahhmun khuarnak lengah, riahhmun khuarnak ihsin a hlatnak ah a zar ih, cumi cu tawnawknak puanthlam tiah a ko. Cule hitin a si, Jehovah a hawltu pauhpauh cu riahbûk lengih tawnawknak puanthlam ah an fehsuak. 8 Cule hitin a si, Mosi cu puanthlam panih a fehsuak tinten mi senpi hmuahhmuah cu an tho, cule mi kip mai puanthlam luhnak cio ah an ding ih, puanthlam sungih Mosi a luhngah tiangin an thlir. 9 Cule hitin a si, puanthlam sungih Mosi a luh tikah mero ṭhuam a rung ṭum ih, puanthlam luhnak ah a ding, cule Jehovah in Mosi a sim. 10 Mipi zaten puanthlam hmaiih a ding ringring mi mero ṭhuam an hmu, cule mipi zaten an tho ih, mi kip in mai puanthlam luhnak cio ah an bia. 11 Cule Jehovah in Mosi cu mi pakhat in a rualpi a biak vekin, hmaităwnin a bia. Cule anih cu riahhmun khuarnak ah a kirsal ṭheu, asinan amah bawmtu Nun fapa tlangval Joshua cun puanthlam a suahsan lo.

12 Cun Mosi in Jehovah hnenah, «Zoh hman, ka hnenah, ‹Hi mi senpi hi hruaiso aw,› tiah i ti. Asinan ka zawngih na thlah ding mi cu i theihter hrih lo. Cuticingin nang in, ‹Na hmin in ka lo thei ih, nang khal in ka mithmuhah zangfahnak na hmu zo,› tiah na ti. 13 Curuangah atu ah thla ka cam, na mithmuhah zangfahnak ka co asile, atu ah na lamzin i hmuh aw, cutin nangmah ka lo thei ding ih, na mithmuhah zangfahnak ka co thei ding. Cule hi miphun hi na mipawl an si tiah ruat aw,» tiah a ti.

14 Cule Jehovah in, «Keimah rori in ka lo fehpi ding ih, cawlhhahdamnak ka lo pe ding,» tiah a ti.

15 Cun anih in a hnenah, «Nangmah rori ih in fehpi lo ahcun, hitawk ihsin in hruaiso hlah aw. 16 Ziangahtile kan zawngih na feh lo asile, na mipawl le kei in na mithmuhah zangfahnak kan hmu ti ziangtin theih a si ding? Cutin na mi senpi le keimah cu leilung vangdâp parih mipi hmuahhmuah lak ihsin thliarhran kan si ding a si,» tiah a ti.

17 Cule Jehovah in Mosi hnenah, «Na sim zo mi hi thil khal ka tuah ve ding, ziangahtile nangmah cu ka mithmuhah zangfahnak na hmu zo ih, nangmah cu na hmin in ka lo thei a si,» tiah a ti.

18 Cule anih in, «Zangfahten, na ropitnak i hmuh aw,» tiah a ti.

19 Cun anih in, «Na hmaiah ka ṭhatnak hmuahhmuah ka fehtlăngter ding ih, na hmaiah Jehovah hmin ka phuang ding. Ka zangfah ding mi cu ka zangfah ding ih, lainatnak ka neih ding mi parah lainatnak ka nei ding,» tiah a ti. 20 Asinan anih in, «Ka hmel cu na hmu thei lo ding, ziangahtile i hmu ih nung milai zohman an um lo ding,» tiah a ti. 21 Cule Jehovah in, «Zoh hnik, ka kiangah hmun pakhat a um ih, lungpi parah na ding pei. 22 Cule hitin a si ding, ka ropitnak a fehtlăng laiah, lungpi kâk sungah ka lo ret ding ih, ka fehtlăng laiah ka kut in ka lo hup ding. 23 Cun ka kut ka lakiang ding ih, ka dung lam na hmu ding, asinan ka hmel cu hmuh a si lo ding,» tiah a ti.

Lungpheng Tharpawl

1 Jehovah in Mosi hnenah, «A hmaisa tapawl vekin nangmah hrangah lungpheng pahnih ser awla, hi lungpheng pahnih parah na khuai mi a hmaisa lungphengpawl parih a rak um mi kamsuakthupawl ka ngan ding. 2 Cule zing ah tiar awla, zing ah Sinai Tlang ah hung so aw, cule cutawk tlang zimah ka hnenah ra langawter aw. 3 Cule na zawngah mi zohman an hung so lo pei, cule tlang pumpi ah mi zohman hmuh ding an um lo pei. Cuih tlang hramah rante rualpawl siseh, ranpi rualpawl siseh an tláng lo pei,» tiah a ti.

4 Cun anih in a hmaisa tapawl vekin lungpheng pahnih a ser. Cun Mosi cu zingpit teah a tho ih, Jehovah in thu a rak pek vekin, Sinai Tlang ah a kaiso. Cule a kut in lungpheng pahnih a keng.

5 Cule Jehovah cu mero lakah a ṭum ih, cu tawkah Mosi zawngah a ding, cule Jehovah hmin cu a phuang. 6 Cule Jehovah cu a hmaiah a fehtlăng ih, «Jehovah, Jehovah Pathian, zahngainak le zangfahnak ih khat, thinsaunak le ṭhatnak le thutak ih khat, 7 mi thawng tampi hrangih zahngainak kaihngettu, mawhsualnak le dānpahbălnak le sual ngaidamtu, mimawh luatter men lo tu, palepawlih mawhsualnak cu fātepawl le fātepawlih fātepawl hnen, san thum le san li tiang lehrūltu,» tiin a phuang.

8 Cule Mosi cu manhlap zetin leilung lam hawiin a lu a kûn ih, Pathian a bia. 9 Cun anih in, «Na mithmuhah zangfahnak ka hmuh asile, Maw Bawipa, thla ka cam, kanmai lakah ka Bawipa feh seh. Kannih cu lungruh minung kan si nân, kan mawhsualnak le kan sualnak in ngaithiam awla, na ro ah in la aw,» tiah a ti.

10 Cule anih in, «Ngai hnik, thukham ka tuah. Na mi senpi hmuahhmuah hmaiah leilung hmuahhmuah parah siseh, ziang miphun lak khalah siseh tuah a rak si dah lo mi thil maksakpawl ka tuah ding; cule an lakih nan umnak mipi hmuahhmuah in Jehovah ih hnaṭuan an hmu ding. Ziangahtile cumi cu thil maksak na hnenih ka tuah ding mi a si.

Jehovah cu Thîkthusia Pathian

11 «Tuihni ih thu ka lo pek mi thlun aw. Ngai hnik, Amor-mi, Kanaan-mi, Heth-mi, Periz-mi, Hiv-mi le Jebus-mi pawl cu na hmai ihsin ka dawisuak hai ding. 12 Nangmah hrangah fimkhur aw, culoasile na fehnak ding ram luahtupawl thawn thukham na tuah pang ding, culoasile nan lakah cumi cu tháng ah a cang pang ding. 13 Asinan an biakṭhengpawl nan siatbăl pei, an ṭhuamserhpawl nan ṭhiatbăl pei ih, an Asherah-pawl nan hauthlu pei 14 (ziangahtile pathian dang na be lo pei, a hmin thîkthusia a si mi Jehovah cu thîkthusia Pathian a si), 15 culoasile ram luahtupawl thawn thukham na tuah pang ding ih, an pathianpawl thawn hlawhhlannak an tuah ding ih, an pathianpawl hnenah rai an thawi ding ih, an lakih mi pakhat khat in lo sawm in an raithawinak na ei pang ding, 16 cule na fapapawl hrangah an fanupawl na ṭhi ding ih, an fanupawl cu an pathianpawl thawn hlawhhlannak an tuah ding ih, na fapapawl khal in an pathianpawl thawn hlawhhlannak an tuah ve pang ding.

17 «Na hrangah burcawp pathianpawl na tuah lo pei.

Kum Tin Puaipawl

18 «Thilnu telh lo Sang Puai na hmang pei. Thu ka lo pek vekin, Abib thla ih tikcu khiah mi ah, ni sarih sung thilnu telh lo sang na ei pei, ziangahtile Abib thla ah Izip ram ihsin na suak a si. 19 Na sumhnámpawl lakih a pa fatir, sūlka awngtu ranpi hmuahhmuah le rante hmuahhmuah cu ka ta an si. 20 Asinan lāk fatir cu tuufa no in na tlen pei. Cule amah cu na tlen lo asile, a hngawng na khiak pei. Na fapapawl lakih fatir hmuahhmuah cu na tlen ding a si. Cule ka hmaiah mi pakhat hman kut lawngin an ra lang ding a si lo. 21 Ni ruk sung hna na ṭuan pei, asinan a ni sarihnak ah cun na cawl pei, leileh tikcu le rawl khawm tikcu hmanah na cawl ding a si. 22 Cule kum cem tikah sangvut rah hmaisabik sĕngnak a si mi, ^aZarhkar Sarih hnu Puai le ^bRawlkhâwm Puai na hmang ding a si. 23 Na mipapawl hmuahhmuah cu Bawipa, Israel-ih Pathian Jehovah hmaiah kum khat ah vei thum an ra lang pei. 24 Ziangahtile miphunpawl cu na hmaiah ka dawisuak hai ding ih na ramripawl ka kauter ding. Jehovah na Pathian hmaiih kum khat ah vei thum lang dingih na fehso tikah mi pakhat hman in na ram an lo daw fawn lo ding.

34:22^a Zarhkar Sarih hnu Puai: «Pentikost Puai» asilole «Thlaithar Puai» tiih kawh a si.

34:22^b Rawlkhâwm Puai: «Bûkte Puai» ti khalih kawh a si.

25 «Ka raithawinak thisen cu thilnu telh mi sang thawn na hlan lo pei, Lanta Puai raithawinak khal zing lam tiang a tâng lo pei. 26 Na leiram rah hmaisabikpawl lakih a ṭhabik cu Jehovah na Pathian inn ah na keng pei. Meno cu a nuih hnawiti in na sûang lo pei,» tiah a ti.

Mosi le Lungpheng Tharpawl

27 Cun Jehovah in Mosi hnenah, «Hi kamsuakthupawl hi ngan aw, ziangahtile hi kamsuakthupawl bangtukin nangmah le Israel-mipawl thawn thukham ka tuah zo,» tiah a ti. 28 Cule anih cu cu tawkah Jehovah hnenah ni 40 le zan 40 sung a um, anih cun sang a ei lo ih, tidai khal a in lo. Cule Jehovah cun lungphengpawl parah thukham thu, Thupek Pahra pawl cu a ngan.

29 Cule hitin a si, Tlang ihsin a rung ṭum tikah Mosi kut ah Theihpinak lungpheng pahnih a um. Mosi cu Sinai Tlang ihsin a rung ṭum tikah Jehovah thawi an biakawk hnuah a hmai vun a êng ti Mosi in a theiaw lo. 30 Cule Aaron le Israel tefapawl hmuahhmuah in Mosi an hmuh tikah, ngai hnik, a hmai vun cu a êng ih, amah ra naih ding an ṭih. 31 Cun Mosi in annih cu a ko hai ih, Aaron le mipi-umkhawm hotu hmuahhmuah cu a hnenah an kirsal, cule Mosi in anmah a bia. 32 Cu hnuah Israel tefapawl hmuahhmuah in an ra naih ih, Sinai Tlang ah a hnenah thupekpawl hrangih Jehovah in a rak sim mi hmuahhmuah a pe hai. 33 Cule Mosi cu an hnenih ṭawng a ṭheh tikah puan in a hmai a khuh. 34 Asinan amah be dingin Jehovah hmaiih Mosi a luh tinten a suah hlanlo puan cu a áwng. Cule a suak ih a hnenih thupek mi pauhpauh Israel tefapawl hnenah a sim. 35 Cule Israel tefapawl cun Mosi-ih hmai an hmuh tinten, Mosi-ih hmai vun cu a rak êng ṭheu, cule Mosi cu Pathian be dingih a luh hlanlo puan in a hmai a khuhsal ṭheu.

Sabbath Cawlh

1 Mosi in Israel tefa umkhawm hmuahhmuah cu a fĭnkhawmawter hai ih, an hnenah, «Hipawl hi Jehovah in tuah dingih thu a lo pek mi kamsuakthu cu an si: 2 hna cu ni ruk sung ṭuan a si pei, asinan a ni sarihnak cu nan hrangih ni thianghlim, Jehovah hnenih Sabbath cawlh a si pei. Cumi ni ih ziang hna khal a ṭuantu pauhpauh cu thah an si pei. 3 Sabbath ni ah cun nan cēnnak hmun hmuahhmuah ah meisa hrimhrim nan tik lo pei,» tiah a ti.

Biakbûk hrang Thawhhlawm

4 Cule Mosi in Israel tefa umkhawm hmuahhmuah hnenah, «Hih thil hi Jehovah ih thupek a si, 5 ‹Nan lak ihsin Jehovah hnenah thawhhlawm kháwng uh. Duhnak thinlung a neitu pauhpauh in cumi cu Jehovah hnenih thawhhlawm hrangah keng hai seh, cupawl tla cu: sui, ngun, dar, 6 mepian, sendup le senlar ih cawih mi, puan nem páte le me hmul, 7 buh sen mi tuucang phawpawl, ṭhakhas phawpawl le akasia thing, 8 meitleu hrang hriak, hnih mi hriak hrang le rimhmui thaw hrangah rimthawpawl, 9 oniks lungpawl, Puithiam Kâwrcung par le ṭāngbĕn ih bŭn ding mi lungpawl tla rak keng hai seh.

Biakbûk Saknak

10 ‹Nan lakih kutthiam nei hmuahhmuah ra in, Jehovah ih thu a pek mi hmuahhmuah tuah hai seh. 11 Biakbûk hrangih thilpawl cu: a puanthlam, a khuhnak, a kilhnakpawl, a phartleppawl, a phartlângpawl, a ṭhuampawl le a tawkhuarpawl, 12 Kuang le a zawnfungpawl, Tlăwnlungawithawinak Hmun le pindan puanzar, 13 Cabuai le a zawnfungpawl, a bungrua hmuahhmuah le Sangserh, 14 meitleu hrangih Meitoṭhuam khal, a bungruapawl, a meitopawl le meitleu hrang hriak, 15 Rimhmui Biakṭheng, a zawnfungpawl, hnih mi hriak, rimhmui thaw le Biakbûk luhnak sângka puanzar, 16 Meiur Thilhlănnak Biakṭheng le a dar khohrîk, a zawnfungpawl, a bungrua hmuahhmuah, Maihum le a tohkual, 17 tualrawn puanzarpawl, a ṭhuampawl, an tawkhuarpawl le tualrawn luhnak puanzar, 18 Biakbûk hrenhngetnakpawl, tualrawn hrenhngetnakpawl le an hripawl, 19 hmun thianghlim sungih rawngbawl dingin rawngbawlnak sinfen, puithiam dinhmun ih rawngbawl dingin puithiam Aaron hrangih sinfen thianghlim le a fapapawl hrangih sinfen tla hi,› tiah a ti,» tiin a sim.

20 Cule Israel tefa umkhawm hmuahhmuah cu Mosi hmaika ihsin an suak ṭheh. 21 Cun thinlung thathotu kip le duhnak thinlung a neitu kip cu an ra ih, Tawnawknak Puanthlam hna hrang, Biakbûk rawngbawlnak hmuahhmuah hrang le sinfen thianghlim hrangah Jehovah-ih thawhhlawm an rak keng. 22 A nu a pa in duhnak thinlung a nei mi hmuahhmuah an ra ih, hnakhaihpawl le hnarkhaihpawl, zunghrukpawl le ṭhipawl, sui thilpawl hmuahhmuah cu an rak keng. Cutivekcun sui thawhhlawm a thawhtu mi kip cun Jehovah hnenah an rak keng. 23 Cule mi kip in mepian, sendup le senlar ih cawih mi, puan nem páte, me hmul, tuucang phaw sen pawl le ṭhakhas phawpawl neitu pauhpauh in an rak keng. 24 Mi kip ngun simaw, dar simaw thawhhlawm a thawhtu in Jehovah-ih thawhhlawm an rak keng. Cule akasia thing a neitu mi kip in rawngbawlnak hna tinkim hrangah an rak keng. 25 Nunau kutthiam nei hmuahhmuah in an kut in pat an hnûk ih, an rak hnuh mi mepian, sendup, senlar le puan nem páte pawl tla an rak keng. 26 Cule fimnak thawn thinlung thatho mi nunau hmuahhmuah in mehmul pat an hnûk. 27 Hotupawl in oniks lungpawl, Puithiam Kâwrcung le ṭāngbĕn ih bŭn ding mi lungpawl, 28 meitleu hrang, hnih mi hriak hrang le rimhmui thaw hrangah rimthawpawl le hriakpawl tla an rak keng. 29 Jehovah in Mosi hmangin tuah dingih thu a rak pek mi hna phunkim hrangah duhnak thinlung a neitu Israel tefa, mipa le nunau hmuahhmuah in Jehovah hnenah lungpuak thawhhlawm an run keng.

Bezalel le Aholiab

30 Cule Mosi in Israel tefa hnenah, «Zoh uh, Hur fapa Uri, Uri fapa Judah hnám Bezalel cu Jehovah in a hmin in a ko zo, 31 cule Jehovah in anih cu fimnak ah le theihthiamnak ah, theihnak ah le themthiamnak tinkim ah Pathian Thlarau in a khatter zo, 32 kutthiam hnapawl ruangzĭng dingah, sui le ngun le dar ṭuan dingah, 33 remkhawm dingih lung mankhungpawl tánin, thing kherin le kutthiam hna hmuahhmuah ṭuan dingah a si. 34 Cule anih in Bezalel le Dân hnám ihsin Ahisamak fapa Aholiab-ih thinlung ah zirh theinak a ret zo. 35 Annih cu thil kher hna, ruangzĭng hna, pat mepian, sendup le senlar ih cawih mi le puan nem páte cawih hna, hna phun kip ṭuantu le kutthiam hnapawl ruangzĭngtu thiamtah hnapawl hmuahhmuah ṭuan dingah themthiamnak in a khatter hai zo.

1 «Bezalel le Aholiab le hmun thianghlim rawngbawlnak hrangih hna hmuahhmuah ṭuandān ding thei dingin Jehovah in fimnak le theihthiamnak a pek zo mi kutthiam nei kip in Jehovah in thu a rak pek mi hmuahhmuah bangtukin an tuah pei,» tiah a ti.

Ṭul mi hnakih tam Thawhhlawm

2 Cun Mosi in Bezalel le Aholiab le Jehovah in fimnak a rak pek mi kutthiam nei kip, thinlung thatho mi kip cu ra tahratih hnaṭuan dingin a ko hai. 3 Cule Israel tefapawl in hmun thianghlim tuahnak rawngbawlhna hrangih an rak ken mi thawhhlawm hmuahhmuah cu Mosi hnen ihsin an dâwng. Cun a hnenah lungpuak thawhhlawmpawl cu zing tinten an rak keng ringring. 4 Cun hmun thianghlim hna hmuahhmuah a ṭuan rero tu zungthiam hmuahhmuah cu an ṭuan lai mi an hna ihsin an ra suak cio, 5 cule Mosi hnenah, «Mipi in Jehovah ih tuah dingih thu in pek mi rawngbawlhna hrangah a daihtawk hnakih tamsawn an rak keng,» tiin an sim.

6 Cule Mosi cun thupek a pe ih, riahhmun khuarnak tluanah, «Mipa in siseh, nunau in siseh hmun thianghlim thawhhlawm hrangah hna ṭuan nawn hlah hai seh,» tiin cumi cu an phuangter. Cule mi senpi cu thawhhlawm ken an bâng, 7 ziangahtile an thilri neih mi cu an hnaṭuan hmuahhmuah ṭhehnak dingah a daih zo, a tam tuk lam a si.

Biakbûk Sak

Tlun khuh Puanzarpawl

8 Cun Biakbûk ṭuantupawl lakih kutthiam nei mi hmuahhmuah cun an ṭuan. Bezalel in puanzar pahra cu hmawih mi patzai fêmte, mepian, sendup le senlar in a tuah. Cule thiam zetih ruahman mi cherub-pawl cuangin cupawl cu a tuah. 9 Puanzar kip ih sau lam cu dawng 28 a si ih, puanzar kip ih kauh lam cu dawng li a si, puanzarpawl cu an canaw thluh. 10 Cule puanzar panga cu pakhat le pakhat a pehawter ih, a dang puanzar panga khal pakhat le pakhat a pehawter. 11 Puanzar peh khat tlâng ah mepian in hnâpawl a tuah, cuvek thothoin a lengtasawn puanzar peh hnihnak tlâng par khalah a tuah. 12 Puanzar pakhat ah hnă 50 a tuah ih, a peh hnihnak zimih puanzar tlâng ah hnă 50 thotho a tuah. A hnâpawl in puanzar pakhat le pakhat an awkaw. 13 Cule sui in a kilhnak 50 a tuah ih, Biakbûk pakhat a can theinak dingah, kilhnakpawl in puanzarpawl pakhat le pakhat a pehawter.

14 Anih in Biakbûk tlun khuh hrangah mehmul in puanzarpawl a tuah, puanzar hleikhat a tuah. 15 Puanzar pakhat ciar ih sau lam cu dawng 30 a si ih, puanzar pakhat ciar ih kauh lam cu dawng li a si, cule puanzar hleikhat pawl cu an canaw ṭheh. 16 Anih in puanzar panga cu a dangten peh khat ah, puanzar paruk khal a dangten peh khat ah a pehawter. 17 Cule a lengtabik puanzar peh khat ih tlâng parah hnă 50 le a peh hnihnak puanzar tlâng khalah hnă 50 a tuah. 18 Puanthlam cu a pehaw ih, pakhat a can theinak dingah anih in dar kilhnak 50 khal a tuah. 19 Cun buh sen mi tuucang phawpawl in puanthlam khuhnak le cumi tlunih ṭhakhas phaw khuhnak a tuah.

Biakbûk Phărphengpawl

20 Biakbûk hrangah akasia thing phartleppawl cu dĭng zetih dingin a tuah. 21 Phărtlep pakhat ciar ih sau lam cu dawng hra an si ih, phartlep pakhat ciar ih kauh lam cu dawng khat le a hrek an si. 22 Phărtlep pakhat ciar cu pakhat le pakhat an pehawknak dingah a ke pahnih a tuah. Cutivekcun Biakbûk hrangih phartlep hmuahhmuah hrangah a tuah. 23 Cule Biakbûk hrangah phartlep, thlang lam sir hrangah tlep 20 in a tuah. 24 Phărtlep 20 pawl hnuaiah ngun tawkhuar 40 a tuah, a ke pahnih hrangah phartlep pakhat ciar hnuaiah tawkhuar pahnih a um. 25 Cule Biakbûk khat lam sir, sak lam sir hrangah phartlep 20 le 26 ngun tawkhuar 40, phartlep pakhat ciar hnuaiah tawkhuar pahnih a tuah. 27 Biakbûk nitlaknak lam sir hrangah phartlep paruk a tuah. 28 Biakbûk dung lam kil pahnih hrang khalah phartlep pahnih a tuah. 29 Cule a taw ah an pehaw ih, a zimah khâng pakhat in a pehkhawmawter. Cutivekcun a kil pahnih pawl hrangah an pahnih in a tuah. 30 Cule phartlep pariat le an tawkhuarpawl, ngun tawkhuar hleiruk, phartlep pakhat ciar hnuaiah tawkhuar pahnih a tuah.

31 Cule akasia thing in phartlângpawl cu Biakbûk sir pakhat parih phartleppawl hrangah panga, 32 Biakbûk sir khat lam parih phartleppawl hrangah phartlâng panga le a hlatnak nitlaknak lam sir parih Biakbûk phartleppawl hrangah phartlâng panga a tuah. 33 Cule a laiih phartlâng cu phartleppawl laifangin khat lam zim ihsin khat lam zim tiang fehtlăngin a tuah. 34 Phărtleppawl cu sui a khût, phartlângpawl kaitu dingah sui khângpawl a tuah ih, phartlângpawl cu sui a khût.

Pindan Puanzar

35 Cule mepian, sendup le senlar le hmawih mi patzai fêmte in pindan puanzar pakhat a tuah; cumi cu thiam zetih ruahman mi cherub-pawl cuangin tuah a si. 36 Cumi hrangah akasia ṭhuam pali, cupawl cu sui khûtin, an sui kūaipawl a tuah. Cule an hrangah ngun tawkhuar pali a bur.

Luhnak Puanzar

37 Puanthlam luhnak hrangah puantahthiam ih tah mi mepian, sendup le senlar le hmawih mi patzai fêmte in puanzar pakhat, 38 cule an kūaipawl thawn a ṭhuam panga khal a tuah. Cule an lu zimpawl le an tlângkhanpawl cu sui a khût, asinan an tawkhuar panga pawl cu dar an si.

Thukham Kuang

1 Bezalel in akasia thing in Kuang a tuah, cumiih sau lam cu dawng hnih le a hrek, a kauh lam dawng khat le a hrek, a san lam dawng khat le a hrek a si. 2 Cumiih sung lam le leng lam cu sui hlirhlăng a khût ih, a kimvel hmuahhmuah ah sui tlâng a tuah. 3 Cule cumiih a kil pali ih bŭn dingah sui khâng pali, khat lam sirah khâng hnih, a khat lam sirah khâng hnih tiin a bur. 4 Akasia thing in zawnfungpawl a tuah ih, cupawl cu sui a khût. 5 Cule Kuang zawn dingin Kuang sirpawlih khângpawl sungah zawnfungpawl a hrawlh. 6 Anih in sui hlirhlăng in Tlăwnlungawithawinak Hmun a tuah. A sau lam dawng hnih le a hrek a si ih, a kauh lam dawng khat le a hrek a si. 7 Ser mi sui in cherub pahnih a tuah, Tlăwnlungawithawinak Hmun zim pahnih ah cupawl cu sakhatin a tuah, 8 cherub pakhat cu hi lam zimah le a dang cherub pakhat cu khat lam zimah a tuah. ^aCherub-pawl cu Tlăwnlungawithawinak Hmun zim pahnih ah a tuah. 9 Cherub-pawl in tlunah an thla an pharh ih, an thla in Tlăwnlungawithawinak Hmun khuhin pakhat le pakhat hmai an hawihaw. Cherub-pawlih hmai cun Tlăwnlungawithawinak Hmun lam an hawih.

37:8^a Cherub-pawl: Vancungmi phun khat an si.

Sangserh Cabuai

10 Anih in akasia thing in Cabuai a tuah, a sau lam dawng hnih, a kauh lam dawng khat, a san lam dawng khat le a hrek a si. 11 Cule cumi cu sui hlirhlăng a khût ih, sui in a kimvelah a tlâng a tuah. 12 Zabăwk tia-in cumi hrangah a kimvel hmuahhmuah ah tlângkawm a tuah ih, a kimvel hmuahhmuah ih tlângkawm hrangah sui tlâng a tuah. 13 Cule cumi hrangah sui khâng pali a bur ih, a ke pali parih a um mi a kil pali parah khângpawl a bun. 14 Cabuai dĭn theitu zawnfungpawl kaitu ah khângpawl cun a tlângkawm an naih. 15 Cule Cabuai zawnnak dingah akasia thing zawnfungpawl a tuah ih, cupawl cu sui a khût hai. 16 Cabuai parih a um mi sui hlirhlăng bungruapawl a si mi: a khēngpawl, a haidaupawl, a khengkûmpawl le a burnak thâwlpawl tla a tuah.

Meitoṭhuam

17 Sui hlirhlăng in Meitoṭhuam khal a tuah. Meitoṭhuam cu a serin a ser. A kopi, a ṭêkpawl, a khengkûmpawl, a cângbolpawl le a pangparpawl cu sakhat an si. 18 Cule cumiih sirpawl ihsin ṭêk paruk a ra suak, cupawl tla cu: sir khat ih Meitoṭhuam ṭêk pathum, a dang sirih Meitoṭhuam ṭêk pathum tla an si. 19 A ṭêk pakhat parah ^aalmond par mûm vek khengkûm pathum cu cângbol pakhat le pangpar pakhat thawn an um. Cule a dang a ṭêk parah almond par mûm vek khēngkum pathum cu cângbol pakhat le pangpar pakhat thawn tuah a si. Cutin a ṭêk paruk pawl cu Meitoṭhuam ihsin an suak. 20 Meitoṭhuam par rori ah almond par mûm vek khengkûm pali cu pakhat cio in cângbol le pangpar ciar thawn an um. 21 Meitoṭhuam ihsin a ṭêk mi a ṭêk paruk pawl zulhin a pakhatnak a ṭêk pahnih hnuaiah cângbol pakhat, a pahnihnak a ṭêk pahnih hnuaiah cângbol pakhat, a pathumnak a ṭêk pahnih hnuaiah cângbol pakhat an um. 22 An cângbolpawl le an ṭêkpawl cu sakhat an si ih, a zate in sui hlirhlăng thawn sakhat ih ser an si. 23 Cule Bezalel in cumi hrangah meito pasarih cu a caicehpawl le a meiling suahdurpawl thawn sui hlirhlăng in a tuah. 24 Cumi cu a bungrua hmuahhmuah thawn sui hlirhlăng talent khat in a tuah.

37:19^a almond: Sem 30:37 simfiangnak zoh aw.

Rimhmui Biakṭheng

25 Akasia thing in Rimhmui Biakṭheng a tuah. A sau lam cu dawng khat le a kauh lam khal dawng khat a si, cumi cu a sir li canaw mi a si ih, a san lam cu dawng hnih a si, a kipawl cu cumi thawn sakhat an si. 26 Cule cumi cu a zim, a sir kimvel hmuahhmuah le a kipawl cu sui hlirhlăng a khût. Cumi hrangah a kimvel hmuahhmuah sui tlâng a tuah. 27 Cumi zawnnak ding zawnfungpawl awktu dingah a sir pahnih ih a kil pahnih kiangah cumi hrangah a tlângkawm hnuaiah sui khâng pahnih a tuah. 28 Zawnfungpawl cu akasia thing in a tuah ih, cupawl cu sui a khût.

29 Hnih mi hriak thianghlim le rimhmui hlirhlăng a si mi rimthawpawl khal, rimhmui tuahtu ih kutsuak bangtukin a tuah.

Dar Biakṭheng

1 Anih in akasia thing in Meiur Thilhlănnak Biakṭheng a tuah, cumi cu a sau lam dawng nga, a kauh lam khal dawng nga, sir li canaw a si ih, a san lam dawng thum a si. 2 Cumiih a kil pali ah a kipawl a tuah, cuih kipawl cu cuih Meiur Thilhlănnak Biakṭheng thawn sakhat an si. Cule cumi cu dar a khût. 3 Biakṭheng hrangih bungrua hmuahhmuah a si mi: haidaupawl, suahdurpawl, cawhtawlhpawl, salaknak hmanruapawl le meiling suahdurpawl tla a tuah. A bungrua hmuahhmuah cu dar in a tuah. 4 Cule Biakṭheng hrangah a taw ihsin a laifang tiang, a biang hnuaiah, dar ih tuah mi hrîknak khohrîk a tuah. 5 Zawnfungpawl awktu dingah dar khohrîk kil pali pawl hrangah, khâng pali a bur. 6 Cule akasia thing zawnfungpawl a tuah ih, cupawl cu dar a khût. 7 Cun Biakṭheng sirpawlih khângpawl sungah a zawnnak dingah zawnfungpawl a thluah. Biakṭheng cu thingphengpawl thawn kawráwngin a tuah.

Maihum

8 Dar maihum le a dar tohkual cu Tawnawknak Puanthlam luhnak ih a pungkhawm mi rawngbawltu nunaupawlih dar thlalangpawl hmangin a tuah.

Tualrawn

9 Cun tualrawn a tuah ih, thlang lam sirah tualrawn puanzarpawl cu tah mi puan nem páte dawng 100 sau-in a tuah. 10 Cupawl hrangah ṭhuam 20 cu dar tawkhuar 20 thawn an um. Ṭhuampawlih kūaipawl le an tlângkhanpawl cu ngun a si. 11 Sak lam sirih puanzarpawl cu dawng 100 sau, a ṭhuam 20 le dar tawkhuar 20 pawl thawn an si. A ṭhuampawlih kūaipawl le tlângkhanpawl cu ngun a si. 12 Cule nitlaknak lam sirah dawng 50 puanzarpawl cu ṭhuam pahra le an tawkhuar pahra pawl thawn an um. A ṭhuampawlih kūaipawl le an tlângkhanpawl cu ngun a si. 13 Nisuahnak lam sir hrangih puanzarpawl cu dawng 50 a si. 14 Luhnak sir khat lamih puanzarpawl cu dawng hleinga a sau ih, an ṭhuam pathum pawl le an tawkhuar pathum pawl, 15 tualrawn luhnakih a khat lam sirah bangawin, hi lam sir le khat lam sirah dawng hleinga a si mi puanzarpawl khal, an ṭhuam pathum le an tawkhuar pathum thawn an um. 16 Tualrawn kimvel hmuahhmuah ih puanzar tinkim cu tah mi puan nem páte an si. 17 Ṭhuampawlih tawkhuarpawl cu dar a si, ṭhuampawlih kūaipawl le an tlângkhanpawl cu ngun a si ih, an lu zimpawl khal ngun khût a si, cule tualrawn ṭhuam hmuahhmuah in ngun tlângkhanpawl an nei.

Tualrawn Luhnak

18 Tualrawn luhnak hrangih puanzar cu mepian, sendup le senlar le hmawih mi patzai fêmte thawi tah mi a si. A sau lam cu dawng 20 a si, cule a san lam cu dawng nga a si ih, cumi cu tualrawn puanzarpawl thawn zawnaw a si. 19 Cule ṭhuam pali cu an dar tawkhuar pali thawn an um, an kūaipawl cu ngun a si, cule an lu zimpawl le an tlângkhanpawl khûtnak cu ngun a si. 20 Biakbûk le a tualrawn kimvel zate hrenhngetnak hmuahhmuah cu dar an si.

21 Himi hi Mosi thupek bangtukih siarkhawm mi, Theihpinak Biakbûk, Biakbûk thilri zât cu a si. Ziangahtile cumi cu puithiam Aaron fapa Ithamar kaihhruainak hnuaiah, Levi-mipawlih rawngbawlnak a si.

22 Judah hnám, Hur fapa Uri, Uri fapa Bezalel cun Jehovah in Mosi thu a pek mi hmuahhmuah a tuah ṭheh. 23 Cule Bezalel thawn Dân hnám, Ahisamak fapa Aholiab cu thilkherthiam le ruangzĭngthiam, mepian, sendup le senlar ih cawih mi le puan nem páte tahthiam a si.

Biakbûk Thilpawl

24 Hmun thianghlim hnaṭuannak tinkim ih an hman mi sui hmuahhmuah cu sui thawhhlawm ihsin a si. Cumi cu hmun thianghlim shekel bangtukin talent 29 le shekel 730 a si. 25 Cule mipi-umkhawm lakih siar mipawl hnen ihsin ngun cu hmun thianghlim tahnak bangtukin talent 100 le shekel 1775 a si. 26 Mi pakhat cio in bekah khat, cucu hmun thianghlim shekel tahnak bangtukin shekel hrek a si ih, mipa kum 20 ihsin a tlun lam mi siartelhin, mipa ting ruk le thawngthum le zanga le sawmnga hrangah a si. 27 Cule ngun talent 100 cu hmun thianghlim tawkhuarpawl le puanzar tawzim hrennakpawl ah bur a si, tawkhuar 100 hrangah talent 100, tawkhuar pakhat ciar hrangah talent pakhat a si. 28 Cun shekel 1775 ihsin ṭhuam kūaipawl a tuah, an lu zimpawl khût an si ih, an hrangah tlângkhanpawl tuah a si.

29 Dar thawhhlawm cu talent 70 le shekel 2400 a si. 30 Cule cumi in Tawnawknak Puanthlam luhnak hrangih tawkhuarpawl, Dar Biakṭheng, cumi hrangih dar khohrîk, le Biakṭheng hrangih bungrua hmuahhmuah, 31 tualrawn kimvel hmuahhmuah hrangih tawkhuarpawl, tualrawn luhnak hrangih a tawzim hrenpawl, Biakbûk hrangih kilhnak hmuahhmuah le tualrawn kimvel hmuahhmuah hrangih a hrenhngetnak hmuahhmuah ah a tuah.

Puithiam Hnipuan

1 Mepian, sendup le senlar ih cawih mi hmun thianghlim ih rawngbawlnak hrangah, rawngbawlnak hnipuan an tuah. Jehovah in Mosi thu a rak pek vekin Aaron hrangah sinfen thianghlim an tuah.

2 Anih in sui, mepian, sendup le senlar le hmawih mi patzai fêmte in Puithiam Kâwrcung a tuah. 3 Cule sui cu a pheng páte ah an sŭt ih, sui cu a phangte te ah an phél, cumi cu thiam zetih ruahman mi vekih tuah mi mepian, sendup le senlar ih cawih mi le puan nem páte ih tah mi ih cawih dingah a si. 4 Pehaw dingin Puithiam Kâwrcung hrangah lianghri an tuah, cumi cu an zim pahnih ah an pehaw. 5 Cule thiam zetih tah mi Puithiam Kâwrcung parih Puithiam Kâwrcung taiṭēm cu themthiamnak bangrepin sui, mepian, sendup le senlar le hmawih mi patzai fêmte in, Jehovah in Mosi thu a rak pek vekih tah mi a si.

6 Cule oniks lungpawl an bŭn ih, sui kuarpawl ah an bun; cule cuih lungpawl cu Israel fapapawlih hmin cuangin, hminkhennakpawl kherdăn vekih kher an si. 7 Cupawl cu Puithiam Kâwrcung liang parah Israel fapapawl hrangih hngilhlonak lung ah, Jehovah in Mosi thu a rak pek vekin a bĕn hai.

8 Cule anih in themthiam zetih Puithiam Kâwrcung tuahdān vekin sui, mepian, sendup le senlar le hmawih mi patzai fêmte pawl in ṭāngbĕn a tuah. 9 Ṭāngbĕn cu a canaw mi sir li nei a thuahin an tuah. An thuah tikah a sau lam khâp khat, a kauh lam khâp khat a si. 10 Cule cumi sungah lung tlar li, a tlar khatnak tlar ah sardias pakhat, ṭopaz pakhat le emerald pakhat, 11 a tlar hnihnak ah turquoise pakhat, safaira pakhat le daimond pakhat, 12 a tlar thumnak ah jacinth pakhat, agate pakhat le amethist pakhat, 13 a tlar litnak ah birul pakhat, oniks pakhat le jasper pakhat tla an si. Cupawl cu sui kuarpawl sungih bŭn an si. 14 Israel fapapawlih hmin bangtukin lung hleihnih an um, cupawl cu an hmin vek cio in hnám hleihnih pawl zulhin anmai bul hmin, pakhat ciar cu hminkhennak kher mi vekih kher an si. 15 Cule sui hlirhlăng ih phiar mi hrihrual vekin a zimah ṭāngbĕn hrangah cikcin an tuah. 16 Sui kuar pahnih le sui khâng pahnih khal an tuah ih, cuih khâng pahnih cu ṭāngbĕn zim hnih ah an thlaih. 17 Cule phiar mi sui cikcin pahnih cu ṭāngbĕn zimpawlih a um mi khâng pahnih ah an sih. 18 Cule phiar mi cikcin pahnih ih a khat lam zim pahnih cu kuar pahnih ah an bunhnget ih, a hmai lamih Puithiam Kâwrcung lianghripawl ah an sih. 19 Cule sui khâng pahnih an tuah ih, Puithiam Kâwrcung lam hawihtu ṭāngbĕn sung lamih a um mi, ṭāngbĕn zim hnih ih zikah an thlaih. 20 Sui khâng dang pahnih an tuah ih, cupawl cu Puithiam Kâwrcung lianghri pahnih, a hmai lam hnuai, thiam zetih tah mi Puithiam Kâwrcung taiṭēm a ṭhitnak cekci ah an thlaih. 21 Cule Jehovah in Mosi thu a rak pek bangtukin annih in ṭāngbĕn cu cumi khângpawl hmangin Puithiam Kâwrcung khângpawl ah, hri mepian hmangin an sih, cutin cumi cu thiam zetih tah mi Puithiam Kâwrcung taiṭēm tlunah a um, cutin ṭāngbĕn cu Puithiam Kâwrcung ihsin a pelh lo.

22 Bezalel in mepian hlir ih tah mi Puithiam Kâwrcung kâwrfual a tuah. 23 Cule cuih kâwrfual laifangah a kâ a um, a tleklonak dingah a kâ kimvel hmuahhmuah cu kâwr hngawng an khūl vekin a tlâng khūl a si. 24 Annih in kâwrfual fêm ah mepian, sendup le senlar talê rahpawl le hmawih mi patzai fêmte an tuah. 25 Cule annih in sui hlirhlăng in sui khîngtepawl an tuah ih, sui khîngtepawl cu kâwrfual fêm kimvel hmuahhmuah ih talê rahpawl karlakah an ret. Sui khîngtepawl cu talê rahpawl karlakah, 26 Jehovah in Mosi thu a rak pek vekin sui khîngte pakhat le talê rah pakhat, sui khîngte pakhat le talê rah pakhat tiin rawngbawlnak hrangah kâwrfual fêm kimvel hmuahhmuah ah an ret.

27 Annih in Aaron le a fapapawl hrangah kâwrfualpipawl, themthiam zetih hmawih mi patzai fêmte, 28 puan nem páte puithiam lubik lupâwng pakhat, mawi zetih tah mi puan nem páte lukhumpawl, hmawih mi patzai ih tah mi bâwngbitepawl, 29 taikhap cu hmawih mi patzai fêmte, mepian, sendup le senlar pawl in Jehovah in Mosi thu a pek vekin thiamtahthiampawl in an tuah.

30 Cun sui hlirhlăng tlep lukhap thianghlim an tuah ih, cumi parah hminkhennak kher vekin: THIANGHLIMNAK CU JEHOVAH TA, ti mi catar pakhat an ngan. 31 Cule Jehovah in Mosi thu a rak pek vekin, cumi cu puithiam lubik lupâwng parah hnget dingin hri mepian in an ṭawn.

Hna Ṭhehfel a Si

32 Cuticun Tawnkhawmawknak Puanthlam, Biakbûk hnaṭuan hmuahhmuah cu ṭheh a si. Cule Israel tefapawl in Jehovah in Mosi hnenih thu a rak pek bangtukin an tuah thluh, cutivek rori in an tuah. 33 Cule Biakbûk cu Mosi hnenah puanthlam le a bungrua hmuahhmuah, a kilhnakpawl, a phartleppawl, a phartlângpawl, a ṭhuampawl, a tawkhuarpawl, 34 buh sen mi tuucang phaw khuhnak, ṭhakhas phaw khuhnak le pindan puanzar, 35 Theihpinak Kuang le a zawnfungpawl, Tlăwnlungawithawinak Hmun, 36 Cabuai, a bungrua hmuahhmuah le Sangserh, 37 sui hlirhlăng ih tuah mi Meitoṭhuam le remteih ret mi meitopawl, a bungrua hmuahhmuah, meitleu hrang hriak, 38 Sui Biakṭheng, hnih mi hriak le rimhmui thaw, Puanthlam luhnak puanzar, 39 Dar Biakṭheng, a dar khohrîk, a zawnfungpawl le a bungruapawl hmuahhmuah, Maihum le a tohkual, 40 tualrawn puanzarpawl, a ṭhuampawl le an tawkhuarpawl, tualrawn luhnak puanzar, a hripawl le a hrenhngetnakpawl, Tawnawknak Puanthlam hrangih Biakbûk rawngbawlnak hrang bungrua hmuahhmuah, 41 Hmun Thianghlim sungih rawngbawl dingin rawngbawlnak sinfen, puithiam dinhmun ih rawngbawl dingah puithiam Aaron hrangih sinfen thianghlim le a fapapawlih sinfen khal an keng.

42 Cutin Jehovah in Mosi thu a rak pek mi hmuahhmuah bangtukin hna hmuahhmuah cu Israel tefapawl cun an tuah ṭheh. 43 Cun Mosi in hnaṭuan mi hmuahhmuah cu a zoh, cule ngai hnik, cumi cu an tuah ṭheh. Jehovah in thu a rak pek vekin, cutivekcun an rak tuah ṭheh. Cule Mosi in anmah cu mal a sawm hai.

Biakbûk Dĭn a Si

1 Jehovah in Mosi hnenah, 2 «Thla hmaisabik, a ni khatnak ah Tawnkhawmawknak Puanthlam, Biakbûk na dĭn pei. 3 Cumi sungah Theihpinak Kuang na ret pei ih, Kuang cu puanzar in na dáng pei. 4 Cabuai na lalut pei ih, cumi parah remteih ret ding mi thilpawl na remfel pei, cule Meitoṭhuam na kenglut pei ih, a meitopawl na vâng pei. 5 Theihpinak Kuang hmaiah rimhmui hrangih Sui Biakṭheng khal na ret pei ih, Biakbûk luhnak puanzar na zar pei. 6 Cun Tawnkhawmawknak Puanthlam, Biakbûk luhnak hmaiah Meiur Thilhlăn Biakṭheng na ret pei. 7 Cule Tawnawknak Puanthlam le Biakṭheng karlakah Maihum na ret pei ih, a sungah tidai na ret pei.

8 «A kimvel hmuahhmuah ah tualrawn na tuah pei ih, tualrawn luhnak ah puanzar na zar pei. 9 Cule hnih mi hriak na la pei ih, Biakbûk le a sung ihta hmuahhmuah na hnih pei; cule cumi le a sungih bungrua hmuahhmuah cu na tithianghlim pei ih, Biakbûk cu a thianghlim pei. 10 Meiur Thilhlăn Biakṭheng le a bungrua hmuahhmuah hriak na hnih pei ih, Biakṭheng cu na serhhran pei. Biakṭheng cu a thianghlim zet mi a si pei. 11 Cule Maihum le a tohkual cu hriak na hnih pei ih, na serhhran pei.

12 «Cun Aaron le a fapapawl cu Tawnawknak Puanthlam luhnak ah na hruai hai pei ih, tidai in anmah cu na khawlh pei. 13 Puithiam dinhmun ih keimah in rĕn theinak dingah, Aaron cu sinfen thianghlim na hrukter pei ih, amah cu hriak na hnih pei, cule na serhhran pei. 14 Cule a fapapawl na hruai pei ih, puithiam kâwrfualpi na hruhter hai pei. 15 Puithiam dinhmun in annih in keimah in rĕn theinak dingah an pa hriak na thih vekin, annih cu hriak na thih hai pei, ziangahtile an hriak thihnak cu an tesinfa san hmuahhmuah tiangin kumkhua puithiam sinak a si tengteng ding a si,» tiah a ti. 16 Cuvekcun Mosi cun a rak tuah, a hnenih Jehovah in thu a rak pek mi hmuahhmuah vekin, cutivekcun a rak tuah thluh.

17 Cule hitin a si, a kum hnihnak, a thla hmaisabik, cuih thla a ni khatnak ah Biakbûk cu dĭn a rak si. 18 Cun Mosi in Biakbûk cu a rak dĭn, a tawkhuarpawl a hngetter, a phartleppawl a tung, a phartlângpawl a khang ih, a ṭhuampawl a tung. 19 Cule Biakbûk tlun khuh a pharh ih, Jehovah in Mosi thu a rak pek vekin, cumiih zimah a dang puanthlam khuhnak in a khuh. 20 Anih in Theihpinak cu a la ih Kuang sungah a ret, zawnfungpawl cu Kuang khângpawl sungah a hrawlh, cule Kuang parah Tlăwnlungawithawinak Hmun a ret. 21 Cule Jehovah in Mosi thu a rak pek vekin, anih in Biakbûk sungah Kuang cu a kenglut, khuhnak puanzar a zar ih, Theihpinak Kuang cu a dángpit.

22 Cabuai cu Tawnawknak Puanthlam sungih Biakbûk sak lam sir, a puanzar lengah a ret. 23 Cule Jehovah in Mosi thu a rak pek vekin sang cu Jehovah hmaika-ah remten a ret. 24 Meitoṭhuam cu Tawnawknak Puanthlam sungah, Cabuai hmai zawnah, Biakbûk thlang lam sirah a ret. 25 Cule meitopawl cu Jehovah in Mosi thu a rak pek vekin Jehovah hmaika-ah a vâng. 26 Anih in puanzar hmaiih Tawnawknak Puanthlam sungah Sui Biakṭheng a ret. 27 Cule Jehovah in Mosi thu a rak pek vekin, cumi parah rimhmui thaw a ur. 28 Biakbûk luhnak ah puanzar a zâr. 29 Cule Tawnawknak Puanthlam ih Biakbûk luhnak hmaiah Meiur Thilhlăn Biakṭheng a ret ih, Jehovah in Mosi thu a rak pek vekin, Meiur Thilhlăn le Thlairawl Thilhlăn cu a parah a hlan. 30 Tawnawknak Puanthlam le Biakṭheng karlakah Maihum a ret ih, khawlhawknak hrangah cu tawkah tidai a ret. 31 Cule Mosi, Aaron le a fapapawl cun cutawk ih tidai in an kut le an ke an khawlh. 32 Tawnawknak Puanthlam an thlen tinten le Biakṭheng an naih tikah, Jehovah in Mosi thu a rak pek vekin an khawlh. 33 Cule Biakbûk le Biakṭheng kimvel hmuahhmuah ah tualrawn a tuah ih, tualrawn luhnak puanzar a zâr. Cutin Mosi cun hna cu a ṭheh thluh.

Mero le Ropitnak in Biakbûk a Luahkhat

34 Cun Tawnawknak Puanthlam cu mero in a khuh ih, Biakbûk cu Jehovah ropitnak in a khat. 35 Cule Mosi cu Tawnawknak Puanthlam sungah a lut thei lo, ziangruangahtile cumi tlunah mero a cawl ih, Biakbûk cu Jehovah ropitnak in a khat. 36 Biakbûk tlun ihsin mero lakso a si tinten Israel tefapawl cu an khualtlawn an peh ṭheu. 37 Asinan mero cu lâkso a si lo ahcun, cumi lâkso a si ni hlanlo khual an tlâwng lo. 38 Ziangahtile an khualtlawn sung hmuahhmuah Israel sungza hmuahhmuah ih mithmuhah sun ah Jehovah-ih mero cu Biakbûk tlunah a zām ih, cu tawkah zan ah mei a ra um ṭheu.