About Bible Thianghlim | ©

BibleThianghlim – JOEL

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

JOEL

  • A ngantu: Pethuel fapa Joel
  • A siartu: Judah le Jerusalem
  • Ngan kum: B.C. Kum zabi 8 le 9 hrawng

Kharbawk ih siatsuahnak nasazet a ram pum ih an tuar hnuah, Judah ram ah Joel in thu a phuang. Hi cabu in a kum thu a tarlang lo nân, temple um laiih ngan a si ti a fiang. Curuangah hi cabu cu Jew-pawl sál an tān laiih ngan mi a si thei lo. Hi cabu san laiih Israel-ih ral tumbikpawl cu Edom-mipawl, Filisṭia-mipawl, Fonisia-mipawl le Izip-mipawl an si; Assiria-mipawl le Babilon-mipawl cu neta lamah Israel ral ah an rung cang. Hih cān ah hin, Grikmipawl khal theih an sinan, annih cu hmun hla zetih ram cak tiih ruah an si. Hih thupawl sirhsanin, Joel cu B.C kum zabi pakua in pariat karlakah thu a phuang tiah kan ti thei.

Mosi thukham an pahbăl ruangah Pathian in a mipawl hnenih a thlah mi kharbawk ih siatsuahnak thu relsalnak in Joel in a thăwk. Israel in Bawipa thawi an thukham an pahbăl asile, Dān Peksalnak 23:38-42 ah Pathian in hi harsatnak rori hi a tiamkam, cule Joel san ah cuih dāntatnak cu a thleng taktak. Himi «Bawipaih ni» ti hi a ra thleng ding mi Pathian in leilung tlun pumpi dān a tat ding ni Bawipaih ni ropi thuhla mipi hnenih ralrin a peknak a si. Asinan dāntatnak ti mi hi hi cabu-ih a tumbik mi cu a si lo. Judah a sirawk asile, khaih cān ah Pathian in mal a sawm ding ih, hmai lam hlapi khalah Pathian in mal a sawm ding (2:18-3:21). Mosi thukhamih Pathian in thu a tiamkam hai vekin (Dnp 30:1-10), Pathian-ih minungpawl cu thlawsuah an si ding ih, an ralpawl cu dāntat an si ding.

Khristianpawl cu kan sualnak le kan hlawhsămnakpawl ruangah kan tha a nau zet ṭheu. A cāncānah cun kan sualnak ruangah Pathian in kanmah in cohlang nawn lo vekih ruahnak kan nei. Kharbawk hremnak in Judah ram a siatsuah vekin, sual cun khawihsiat mi a nei, asinan kharbawkpawl ih an elral mi kumpawl rūlsal dingin Pathian in a tiamkam. Ziangtluk ropi ngaidamnak so a si!

Thuhlawm Ṭhen

  • I. Joel in kharbawk hmangih hremnak kha Pathian in a mipawl thuṭhennak vekih a thlah mi a si thu cipciar zetin a sim, cule sual sir dingin mipi a ko (1:1-2:17)
  • II. Mipi an sual an sir asile, Pathian in atu ah le hmai lam cān hlapi khalah malsawmnak a thlenter ding thu a phuang (2:18-3:21)

1

1 Pethuel fapa, Joel hnenih Jehovah kamsuakthu thleng:

Ram a Siat

2 Maw nannih upapawl, himi hi ngaithla uhla,
Nannih ram luahtupawl nan hna tŭn uh!
Nan san ah hivek a cang dah maw,
Asilole nan pupápawl san ah teh a rak um dah maw?
3 Hi thu hi nan falepawl sim uh,
Nan falepawl in an falepawl simsin hai seh,
Cule an falepawl in san dang mipawl simsin hai seh.
4 aMikeuhmang kharbawk ih a ei hlah mi cu, a bur a bur ih um kharbawk in an rak ei;
A bur a bur ih um kharbawk ih an ei hlah mi cu, băwkvâk kharbawk in an rak ei ih,
Băwkvâk kharbawk ih an ei hlah mi cu, khaukhuap in an rak ei.
5 Nannih zuripawl, ṭhang uhla, ṭap uh;
Cule nannih sabitzu intupawl, sabitzu thlum ruangah a râkin râk uh,
Ziangahtile nan kâ ihsin sabitzu cu lakhloh a si.
6 Ziangahtile a cak mi le mipum siar cawk lo miphun pakhat cu ka ram dokalhin a ra.
A ha cu kiosa ha vek an si ih,
Kiosa pinu ho a nei.
7 Anih cun ka sabit hmuan cu a siatter ih,
Ka theipi kung a siatsuah;
A hâwng a hâwk ih, kawlh ko a tuah, cule a hlăwnhlo;
A hngeṭêkpawl cu var ko a tuah.
8 A no laiih a pasal dingih ham mi a thih ruangih fala himte in buri khuhawih a râk vekin râk aw.
9 Jehovah inn ah Thlairawl Thilhlăn le Inding Thilhlăn run ken a si nawn lo;
Jehovah rawngbawltu puithiampawl an ṭap.
10 Lo a siat thluh,
Ram in a sûn;
Ziangahtile thlairawl a siat ih,
Sabitzu thar a kâng,
Hriak thar a cem.
11 Nannih lóthlopawl, nan ningzak uh,
Nannih sabit hmuankiltupawl râk rero uh,
Sangvut le barli sangvut ruangah.
Ziangruangahtile ló ih fâng ah ding a hlorál ṭheh.
12 Sabit hri a ro ih,
Theipi kung a car;
Talê kung,
Ṭhulhfau kung le epal kung khal.
Ló ih thingkung hmuahhmuah an car ṭheh;
Thungaiten, minung fapapawl hnen ihsin aipuannak a car a si.

1:4a mikeuhmang kharbawk…a bur a bur ih um kharbawk…băwkvâk kharbawk…khaukhuap: Hi kharbawk bangawk lozia hi theihfiang a har zet. An hmin kawhdān hin an sinak a langfiangter thei a bang.

Sual Sir dingih Kawhnak

13 Nannih puithiampawl buri-hnipuan hruh uhla ṭap uh;
Nannih biakṭheng hmaiih rawngbawltupawl râk rero uh;
Nannih ka Pathian rawngbawltupawl,
Ra uhla, zanvar buri-hnipuan hruhin um uh.
Ziangahtile nan Pathian inn ah Thlairawl Thilhlăn le Inding Thilhlăn run ken a si lo.
14 Rawlulhnak serhhran uh,
Tawnkhawmawknak hleice ko uh;
Jehovah nan Pathian inn ah
Upapawl le
Ram luahtu zaten khawm uh,
Cule Jehovah hnenah au uh.
15 Ai law, cuih ni ruangah!
Ziangahtile Jehovah ni cu a nâi thlang a si;
Cuih ni cu mi siatsuahtu vekin Ziangkimtithei hnenin a ra ding.
16 Kan mithmuhah rawl sahcat a si ih,
Aipuannak le lungawinak cu Pathian inn ah sahcat a si lo maw?
17 Leilung sungah thlaici an ro,
Rawl khawlnak inn an lawng;
Cuampawl tla an ṭet,
Ziangahtile thlairawl a car.
18 Ramsa an hrūmdān hi!
Piat ding tlimno um lo ruangah,
Ranpi rual an vâkvai;
Rante rual khal in an tuar.
19 Maw Jehovah, na hnenah ka ausuak a si;
Ziangahtile ramṭhing ih ran tlannak hmun meisa in a kangrál ih,
Hramlak thingkung hmuahhmuah meisa alh in a kāng ṭheh.
20 Ramsapawl khal in an lo ngai duahdo,
Ziangahtile tivatepawl ti an kâng ih,
Meisa in ramṭhing ih ran tlannak hmun a siatter ṭheh.

2

Jehovah Ni

1 Zion ah tuupa ki phaw uhla,
Ka tlang thianghlim ah ralrinnak thawmvâng tuah uh!
Ram luahtupawl hmuahhmuah khūr hai seh;
Ziangahtile Jehovah ni a thleng cing ding,
Ziangahtile cuih ni cu a nâi tuk zo:
2 Thimnak ni le lungsiat ni,
Khawdur ni le thim sah zet ni a si,
Tlangpawl parih khawfingcat a darh bangin.
Mi tampi le micakpawl an ra,
Khuahlan lai ihsin cuvek mi an um dah kêl lo;
Anmah hnu khalah cuvek mi cu an um nawn lo ding,
San tampi tiang khalah.
3 Anmahpawl hmaiah meisa a kāng ih,
An dung lamah meialh hliau a kāng;
An hmaiah ram cu Eden hmuan vek a si ih,
An dung lam cu ramṭhing kawlh vek a si;
Cumi ihsin zianghman an luat hrimhrim lo ding.
4 aAn pianzia cu ráng pianzia vek a si;
Cule raldo ráng vekin an tlân.
5 Ránglêng awn bangin
Tlangzimpawl ah an khir zohzo,
Meisa hliau in cangpâwl a káng awn bangin an awn,
Micakpawl raldo dingih tlaraw bangin.
6 An hmaiah mipi an thin a phâng;
An hmel a râm thluh.
7 Micak bangin an tlân,
Ral do mi bangin phăr parah an lâwnso;
Anmai zawn cio ah an feh ih,
An zin an pialsan lo.
8 Pakhat le pakhat an nêkbuaiaw lo.
Anmai zin cio ah an feh vivo.
Hriamhreipawl karlakah pahtlăng khal hai sehla, khambĕt an si lo.
9 Khawpi sungah a suk a so ah an tlân,
Phăr parah an tlân;
Inn sungah an kai,
Fifir bangin tukvirhpawl in an lut.
10 An hmaiah leilung a hnîn,
Vanpawl khal an khūr;
Ni le thlapi an thim ih,
Arsipawlih tleunak khal a hlo.
11 Jehovah in a ralkap hmaiah a aw a suah,
Ziangahtile a ṭanhmun khuarnak cu a pipa lawlaw;
Ziangahtile a kamsuakthu tlamtlingtertu cu micak a si.
Ziangahtile Jehovah ni cu a ropi ih, tuksumza a si;
Zo so tuar thei ding?

2:4a An: Bung 1:4 ih kharbawkpawl relnak a si.

Sual Sir dingih Kawhnak

12 Curuangah atu ah Jehovah in,
«Nan thinlung zaten,
Rawlulhnak thawn, ṭahnak thawn le lungsiatnak thawn ka hnenah ra kir uh,» tiah a thăn.
13 Cun nan sinfenpawl si loin, nan thinlung thlek uh;
Jehovah nan Pathian hnenah kir uh,
Ziangahtile anih cu zangfahnak le lainatnak nei mi a si,
A thin a fûal ih, lainatduhdawtnak nasazet a nei;
Siatnak thlahsuak ding mi a lakirsal ṭheu.
14 Anih cun hawikir ih lamlêt in,
A dung lamah malsawmnak, Jehovah nan Pathian hrangih Thlairawl Thilhlăn le Inding Thilhlăn pawl tla a tân lo ding ti zo in thei?
15 Zion ah tuupa ki phaw uh,
Rawlulhnak serhhran uh,
Tawnkhawmawknak hleice ko uh;
16 Mipi kokhawm uh,
Mipi-umkhawm tithianghlim uh,
Upapawl pungkhawmter uh,
Nauhakpawl le nau hnawifawp laipawl fĭnkhawm uh;
Mo neitu cu a umnak pindan sung ihsin suak sehla,
Mo khal a ceiawknak pindan sung ihsin suak seh.
17 Jehovah rawngbawltu, puithiampawl cu,
Hulhliap le biakṭheng karlakah ṭap hai seh;
«Maw Jehovah, na minungpawl zuah aw,
Cule na ro cu miphunpawl lakah hnihsuahsainak le hmuhsuam men dingah pe hlah.
Ziangahso miphunpawl lakah,
‹An Pathian cu khuiah a um?› tiah an ti ding,» tiah ti hai seh.

Ram Ṭhattersal a Si

18 Cun Jehovah in a ram cu a thîk ding ih,
A mipawl a zangfah hai ding.
19 Cule Jehovah in a sâng ding ih, a mipawl hnenah,
«Ngai hnik uh, thlairawl le sabitzu thar le hriak thar ka lo kuat ding,
Cule cumi cun nan tlái ding.
Miphunpawl lakah hnihsuakza ah ka lo tuah dah nawn lo ding.
20 «Cuhnakin sak lam ralkap cu hlatpi ah ka lo ṭhawnsak ding ih,
Amah cu ram car le ram kawlh ah,
A hmai lamih umpawl cu anisuahnak lam tifinriat ah le,
A dung lamih umpawl cu bnitlaknak lam tifinriat ah a dawihlo ding;
Cuih rimsia cu a ra suak ding,
Cule a rim fihnungza cu a suak ding,
Ziangruangahtile anih in thil rapthlak a tuah a si.
21 «Maw ram, ṭih hlah;
Lungawi awla, lungawiaipuangin um aw,
Ziangahtile Jehovah in mangbangza thilpawl a tuah!
22 «Nannih ramsapawl tla, ṭih hlah uh;
Ziangahtile ramṭhing ih ran tlannak hmunpawl an cerhno a si,
Thingkung in rah an rah;
Theipi kung le sabit hri khal in an neihnunnak an pesuak.
23 «Nannih Zion falepawl lungawi uh,
Cule Jehovah nan Pathian ah lungawiaipuangin um uh;
Ziangahtile anih cun rinum zetin ruah hmaisa a lo pe ih,
Nan hrangah ruah a surter,
A hmaisa vekin ruah hmaisa le ruah neta khal.
24 «Hruih hmun cu thlairawl a khat ding ih,
Sabitzu khawlnakpawl cu sabitzu thar le hriak thar a luangliam ding.
25 A bur a bur ih um kharbawk,
Bâwkvak kharbawk,
Khaukhuap le
Mikeuhmang kharbawk pawl ih an rak ei mi kumpawl ka lo rūlsal ding.
Cupawl cu nan lakih ka thlah mi ka ralkap burpi an si.
26 «Ei ding tampi nan nei ding ih, nan khăwpkham ding,
Cule nan hrangih mangbangza thil a tuahtu,
Jehovah nan Pathian hmin nan thangṭhat ding;
Cule ka mipawl cu ningzahter an si dah lo ding.
27 Cun keimah cu Israel lakah ka um ti le
Keimah cu Jehovah nan Pathian ka si ih,
A dang Pathian a um lo ti nan thei ding.
Ka mipawl cu ningzahter an si dah lo ding.

2:20a Nisuahnak lam tifinriat: Tipi Thi a relnak a si.

2:20b nitlaknak lam tifinriat: Mediterenian Tipi a relnak si.

Pathian Thlarau Burh a Si

28 «Cule cuihhnu ah hitin a si ding,
Milai hmuahhmuah tlunah ka Thlarau ka burh ding;
Nan fapapawl le nan fanupawl in thu an phuang ding,
Nan putarpawl in mang an man ding,
Nan tlangvalpawl in larnakpawl an hmu ding.
29 Cule cuih ni ah siahhlawh mipapawl le siahhlawh nunaupawl par khalah
Ka Thlarau ka burh ding.
30 «Vanpawl ah le, leilung ah mangbangzapawl ka langter ding:
Thisen le meisa le meikhu ṭhuampawl ka langter ding.
31 Ropi le maksak Jehovah ni a thlen hlanah,
Ni a thim ding ih,
Thlapi thisen ah a cang ding.
32 Cule hitin a si ding, zokhal Jehovah hmin a ko tu cu rundam a si ding.
Ziangahtile Zion Tlang le Jerusalem ah,
Jehovah ih a kawh mi a tāngsŭn lakah
Jehovah ih a rak sim bangin, runsuahnak a um ding.

3

Pathian in Miphunpawl Dān a Tat

1 «Zoh hnik, cuih ni le cuih cān ah,
Judah-mipawl le Jerusalem-mipawlih vanneihnak ka tundinsal tikah,
2 Miphunpawl hmuahhmuah khal ka fĭnkhawm ding ih,
aJehoshafat Phaikuam ah ka hruai hai ding;
Cule cuih hmun ah anmah dāntat dingin ka ra ding.
Ro ih ka co mi Israel, ka mipawl ruangah cucu ka tuah ding.
Ziangruangahtile annih in ka mipawl cu miphunpawl lakah an ṭekdarhter;
Ka ram khal an ṭhen ṭheh.
3 Ka mipawl hrangah camcawhfung an zûk,
Hlawhhlâng hrangah mipa nauhak an pe ih,
An rît theinak dingah sabitzu hrangah nunau nauhak an zuar.
4 «A si, Maw nannih Ṭaiar le Sidon le Filistia rampawl hmuahhmuah,
Ka parah ziang tuah nan tum?
In lehrūlsal ding maw si?
In thungrulh asile,
Nanmai lu par lala ah zamrang zet le cak zetin ka lo thungrūlsal ve ding.
5 Ziangruangahtile ka ngun le ka sui nan rak lâk ih,
Ka thil ṭhapawl nan temple-pawl sungah nan thiar.
6 Cuihtlunah an ramri ihsin hlapi ih nan kuat theinak dingah,
Judah-mipawl le Jerusalem-mipawl cu bJavan-mipawl hnenah nan rak zuar.
7 Ngai hnik uh, nan zuarnak hmun ihta ka thoter hai ding ih,
Nan lehrulhnak cu nanmai lu parah ka kirter ding.
8 Nan fapapawl le nan fanupawl cu Judah-mipawl hnenah ka zuar ding ih,
Ram hlapi ih um Sabia-mipawl hnenah an zuarsin ding;
Ziangahtile Jehovah in a rak sim a si,» tiah a ti ding.
9 Miphunpawl lakah hihi phuang uh:
Ral do dingin timtuah uh!
Micakpawl ṭhangharh uh,
Ral do mi mipapawl hmuahhmuah in naih hai sehla,
Do hai seh.
10 Nan leilehnak hmanruapawl cu ralnâm ah ser uhla,
Nan thilsahnak namtáwngpawl cu feipi ah ser uh,
Micaklo khal in, «Ka cak a si,» tiah ti seh.
11 Nannih miphunpawl hmuahhmuah, khawmaw uhla ra uh,
Cule fĭnkhawm aw uh.
Maw Jehovah, na micakpawl hi tawkah rung sukter hai aw.
12 Miphunpawl ṭhangharh hai sehla, Jehoshafat Phaikuam ah feh hai seh;
Ziangahtile cu tawkah kiangkap miphunpawl hmuahhmuah thuṭhen dingin ka to ding.
13 Favah suah uh, ziangahtile fâng an thar zo.
Ra uhla, cīl uh;
Ziangahtile sabit sawrkhur a khat a si,
Sabitzu khawlnak khal a liam.
Ziangahtile an sualralzia a nasatuk.
14 Mipi tampi, mipi tampi cu thuṭhennak phaikuam ah an um!
Ziangahtile Jehovah ni cu thuṭhennak phaikuam a thleng zikte thlang a si.
15 Ni le thlapi an thim ding ih,
Arsipawl khal an êng nawn lo ding.
16 Jehovah khal Zion ihsin a hûk ding ih,
Jerusalem ihsin a aw a suah ding;
Vanpawl le lei an hnîn ding;
Asinan Jehovah cu a mipawl hrangah beunak a si ding ih,
Israel tefapawlih cahnak a si ding.
17 «Cule keimah cu ka tlang thianghlim Zion ih cêng Jehovah nan Pathian ka si ti nan thei ding.
Cun Jerusalem cu a thianghlim ding ih,
Khawtluang mipawl an sukso nawn lo ding.

3:2a Jehoshafat Phaikuam: Jehovah dāntatnak phaikuam tinak a si.

3:6b Javan-mipawl: Jafeth fapa Javan-ih cithlahpawl an si. Sem 10:2 zoh aw.

Pathian in a Mipawl a Thlawsuah

18 «Cule cuih ni ah hitin a si ding,
Tlangpawl ihsin sabitzu thlum a fawr ding,
Tlangmualpawl ihsin hnawi a luang ding,
Cule Judah ram ih tivate hmuahhmuah ti a luang ding;
Jehovah inn ihsin tihna a pût ding ih,
Shittim Phaikuam cu ti a pe ding.
19 «Izip cu hmun ṭhing ah a cang ding ih,
Edom cu ramṭhing lawnglak ah a cang ding,
Judah-mipawl parih an nun a rawn ruangah a si.
Anmai ram ah mithianghlimpawlih thisen an suah.
20 Asinan Judah cu luah a si kumkhua ding ih,
Jerusalem khal san hmuahhmuah ah.
21 Phuba ka lâk lo mi Israel thisen cu phuba ka la ding,
Ziangahtile Jehovah cu Zion ah a cêng a si,» tiin.