About Bible Thianghlim | ©

BibleThianghlim – 1 JOHN

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 JOHN

12345

• A ngantu: John
• A siartu: Asia Minor ih zumtupawl
• Ngan kum: A.D. 80-95

Apostol John hi Jesu dungthluntu hleihnih lakih mi pakhat a si. Amah hi dungthluntupawl lakah nauhakbik le Khrih-ih duhdawt hleice mi a si men ding. Hmel danglamnak tlang le Gesmani Hmuan sungah John, James le Peter lawng Jesu thawn an rak um. Asinan Jesu thah a si laiah John lawng a tâng. Khrih in a thih zawng teah a nu kilkhawi dingin John a ap ta. John cakuat pakhatnak câng hmaisabik pali sungah John in Jesu Khrih thawn an naihawknak le bulpak in an pehtlaihawk thu a langter. Hi cakuat hi John in A.D. 80-95 hrawngah Asia Minor ih a um mi kawhhranpawl hnenah a ngan. John in Khrih thawn an pehtlaihawknak ruangih a aipuannak thu hi zumtupawl hlawm ve a duh.

Kum zabi pakhatnak cem lamah cun langhngan zetin kawhhran a ṭhangin a rak pitling zo. Tualsung kawhhran tampi dĭn a si zo ih, zumtupawl tla an pitling vivo. Cumi lakah tifel ṭul mi thubuai khal an rak tel. John cakuat pakhatnak rak dawngtu zumtupawl in thil ṭihnung pahnih an rak táwng. Cupawl cu zirhtu diklopawlih zirhnakpawl le theihnak an tlaksamnak hi a si. Zumtupawl hnenah an theih zo mi, asilole an theih ṭul mi theihnak dik cu khihhmuhin cuih thil ṭihnung pahnih cu a do. Hi cakuat hi zumtuih zumnak theifiangawter dingih a ngan mi a si (5:13).

John in rundamnak theihfĕngnak thusimnak ah thupi pali a hmang. Cupawl cu: «nan hnenah hih thilpawl hi kan ngan» ti mi thu in a thăwk. Thupipawl cu: pawlkawmnak (1:3-4), dingfelnak (2:1), zirhnak diklo (2:26) le zumnak (5:13) tla an si. Duhdawtnak ti mi khal hi cakuatih thupi pakhat a si ve.

John in a cakuat siartupawl hnenah kumkhaw nunnak an nei ti an theihfiang ding a duh (5:13). Thutak kan zum ih, tleu ah kan feh ih, pakhat le pakhat kan duhdawtawk tikah himi hi a langfiang. Zumnak dik in nundān dik a hring.

1

Nunnak Thu

1 A tir ihsin a rak um mi nunnak Thu cu nan hnenah kan phuang. Cumi cu hna ih kan rak theih mi, kan mit rori ih kan rak hmuh mi, kan zohhliah mi le kanmai kut rori ih kan rak tham zo mi a si. 2 Cuih nunnak cu phuanlăng a si ih kan rak hmu zo, cule cuih thu cu kan theihter a si. Pa hnenih a rak um mi le kan hnenih phuanlăng a si mi kumkhaw nunnak cu nan hnenah kan phuang a si. 3 Nannih khal in kanmah in pawlkawm theinak dingah, kan rak hmuh mi le hna ih kan rak theih mi cu nan hnenah kan thăn a si. Thungaiten kan pawlkawmawknak cu Pa le a Fapa Jesu Khrih thawn a si. 4 Cule nan aipuannak a famkim theinak dingah, cuih thilpawl cu nan hnenah kan ngan a si.

Tleu ih Feh

5 Fapa hnen ihsin hna ih kan rak theih mi thucah le nan hnenih kan thăn mi cu hihi a si: Pathian cu tleu a si ih, amah ah thim hrimhrim a um lo. 6 Thim ih feh thotho siin, amah thawn kan pawlkawmaw kan ti asile, thuphan kan per ih thutak kan nunpi lo. 7 Amah cu tleu ih a um vekin tleu ih kan feh asile, pakhat le pakhat kan pawlkawmaw ih, a Fapa, Jesu Khrih thisen in kan sual hmuahhmuah a khawlhfai a si.

8 Sual kan nei lo kan ti asile, kanmah le kanmah kan bumaw ih kanmah ah thutak a um lo. 9 Kan sualpawl kan phuan asile, kan sualpawl in ngaidam ding le kan dingfellonak hmuahhmuah in khawlhfaisak dingah anih cu a rinumin a dik a si. 10 Sual kan tuah lo kan ti asile, Pathian cu thuphan perhmang ah kan tuah ih, a kamsuakthu cu kanmah ah a um lo.

2

Thu in Simsaktu Jesu Khrih

1 Ka fahniangletla, sual nan tuahlonak dingah hi thilpawl hi nan hnenah ka ngan a si. Mi pakhat khat in sual a tuah asile, Pa hnenih thuhla in simsaktu midingfel Jesu Khrih kan nei. 2 Cule anih cu kan sualpawl hrangih tlăwnlungawithawinak a si, cule kanmai sualpawl hrang lawngah si loin, leitlun mi hmuahhmuah hrang khalah a si.

3 A thupekpawl kan thlun asile, himi in amah Jesu Khrih kan thei ti kan thei. 4 «Amah cu ka thei zo,» a titu in a thupekpawl a thlun cuang lo asile, cu pa cu thuphan per a si ih, amah ah thutak a um lo. 5 Sikhalsehla zokhal Pathian kamsuakthu a thluntu cu amah ah Pathian duhdawtnak a famkim taktak a si. Hiti zawngin amah ah kan um ti kan thei. 6 Amah ah ka um a si a titu cun, Jesu-ih nundān vekin a nung tengteng ding a si.

Thupek Thar

7 U le nau tla, nan hnenah thupek thar ka ngan lo, a tir ihsi nan rak neih mi thupek hlun kha a si sawn. Cuih thupek hlun cu a tirte ihsin hna ih nan rak theih zo mi kamsuakthu kha a si. 8 Nan hnenah thupek thar ka ngansal. Cumi cu amah ah le nanmah ah a dik a si, ziangruangahtile thim cu a cemrál rero ih, tleu diktak cu a ra êng zo.

9 Tleu ah ka um a ti ih, a unaupa a huatu cu atu tiangin thim ah a um lai hrih a si. 10 A unaupa a duhdawtu cu tleu ah a um ih, amah ah tlûknak zianghman a um lo. 11 Asinan a unaupa a huatu cu thim ah a um ih thim ah a feh, thim in a mit a câwtter zo ruangah khuitawkah ka feh ti a thei lo.

12 Fahniangletla, amai hmin ruangah Pathian in nan sualpawl cu a lo ngaithiam zo.
Curuangah nan hnenah ca ka ngan a si.
13 Palenuh, a tir ihsin a um mi Pa cu nan rak theih zo ruangah, nan hnenah ca ka ngan a si.
Minopawl, misualrálpa nan rak neh zo ruangah nan hnenah ca ka ngan a si.
Fahniangletla, Pa nan rak theih zo ruangah nan hnenah ca ka ngan a si.
14 Palenuh, a tir ihsin a um mi Pa nan rak theih zo ruangah nan hnenah ca ka rak ngan a si.
Tlangvalpawl, nannih cu nan cak ih nanmah ah Pathian kamsuakthu a um ringring, cule misualrálpa nan rak neh zo ruangah nan hnenah ca ka ngan a si.

Leitlun Duhdaw Hlah Uh

15 Hi leilung siseh, leilung tlun thilpawl siseh, duhdawt hlah uh. Mi pakhat khat in leilung a duhdawt a si ahcun, amah ah paih duhdawtnak a um lo. 16 Ziangahtile hi leilung ih um mi thil hmuahhmuah: taksa câkhiarnak, mit câkhiarnak le hngalnak nun pawl hi Pa hnen ihta an si lo ih, leilung ihta an si sawn. 17 Cule hi leilung le a câkhiarnak cu a cemrál rero; asinan Pathian duhnak a tuahtu cu kumkhuain a hmun ringring ding.

Khrih Dodaltuih Thlarau

18 Fahniangletla, atu hi cān netabik a si. Khrih dodaltu a ra ding tiin hna ih nan rak theih zo vekin atu hmanah Khrih dodaltu tampi an rak suak zo, cumi in atu hi cān netabik a si ti kan thei. 19 Annih cu kan hnen ihsin an fehsuak, asinan annih cu kanmai mi an si lo. Ziangah cutin ka ti tile, kanmai mi rak si hai sehla cu, kanmai hnenah an rak tāng ding. An rak fehsuak zo ruangah an zaten kanmai mi an si lo ti a fiang.

20 Asinan nannih cu Mi Thianghlim in hriak a lo thih zo ih, thil ziangkim nan thei. 21 Thutak nan theih lo ruangah si loin, thutak nan thei ih thutak sung ihsin thuphan a suah lo ruangah nan hnenah ca ka rak ngan a si sawn.

22 Thuphan pertu cu zo a si? Jesu cu Khrih a si ti hnáwngtu cu thuphan pertu a si. Pa le Fapa hnáwngtu cu Khrih dodaltu a si. 23 Zokhal Fapa hnáwngtu cun Pa a nei lo. Fapa a ṭantu cun Pa khal a nei a si.

24 Curuangah a tir ihsin hna ih nan rak theih zo mi kha nanmah ah um ringring seh. Nanmah ah a tir ihsin hna ih nan rak theih zo mi a um ringring asile, nannih cu Fapa ah le Pa ah nan um ringring ding. 25 Cule hihi Pathian in kan hnenih sankhuk nunnak in rak tiamkam mi thutiamkam cu a si.

26 Hih thil, nanmah a lo bumtupawlih thuhlapawl nan hnenah ka rak ngan a si. 27 Cule Pathian hnen ihsi nan dăwn mi hriak thihnak cu nanmah ah a um ringring ih, zohman ih zirh nan ṭul lo. Hriak a lo thih tikah, cuih hriak thihnak cun thil ziangkim a lo zirh a si. Cucu thudik a si, thuphan a si lo. Cumi hriak thihnak ih a lo zirhdān vekin amah ah nan um ringring ding.

Pathian Fāte

28 Fahniangletla, atu ah Fapa ah cun um ringring uh, amah a ra lăng tikah a hmaika-ih kan ral a ṭhatnak ding le kan ning a zahlonak dingah amah ah um ringring uh. 29 Anih cu midingfel a si ti nan theih asile, dingfelnak a tuahtu kip in Pathian-ih hrin an si ti nan thei.

3

1 Ngai hnik, Pa ih in rak pek mi hi ziangbangtuk duhdawtnak so a si, Pathian fāte tiih in kawh hi! Curuangah hi leitlun mipawl in in thei lo, ziangruangahtile amah an thei lo. 2 Ka duhdawt mitla, atu ah kannih cu Pathian fāte kan si ih, ziang vek kan si lai ding ti lăngter a si hrih lo, asinan Fapa a ra lăng tikah cun amah kan bang leh ding ti kan thei; ziangahtile amah cu a sinak vekin kan hmu leh ding. 3 Amah ah hi ruahsannak a neitu kip in Khrih a thian vekin amah le amah a thianfaiaw ṭheu.

4 Zokhal sual a tuahtu cun Pathian Dān khal a pahbăl a si, cule Pathian Dān pahbăl cu sual a si. 5 Cule kan sualpawl lahlo dingah, anih cu a lang zo ti nan thei, amah ah sual a um lo. 6 Zokhal Khrih ih a um ringring tu cun sual a tuah lo. Zokhal sual tuahpeh vivo tu cun Khrih cu a rak hmu dah lo ih, a theih khal a thei fawn lo.

7 Fahniangletla, zohman in lo bum hlah hai seh. Dingfelnak a tuahtu cu Khrih a dingfel vekin a dingfel ve a si. 8 Sual a tuahtu cu Diabol hnen ihsin a si, ziangahtile Diabol cun a tir ihsin sual a rak tuah. Pathian Fapa a rung lăngnak săn cu Diabol-ih hnaṭuan ṭhiatbăl dingah a si. 9 Zokhal Pathian hrin mi cun sual a tuah vivo lo, ziangahtile amah ah Pathian-ih ci a um. Pathian hrin a si ruangah sual a tuahpeh vivo thei lo.

10 Pathian fātepawl le Diabol fātepawl an lăngfiangnak cu himi ah hin a si: zokhal dingfelnak a tuah lo tu cu Pathian hnen ihta a si lo ih, a unaupa a duhdaw lo tu khal Pathian hnen ihta a si lo.

Pakhat le Pakhat Duhdawtawknak

11 Ziangahtile a tir ihsin nan rak theih mi thucah cu, pakhat le pakhat duhdawtaw ding kan si, ti hi a si. 12 Kain vek si ding kan si lo, anih cu misualrálpa hnen ihta a si ih, a naupa a that. Ziangahso a naupa a thah? Ziangruangahtile a thil tuah mipawl an ṭha lo ih, a naupa ih thil tuah mipawl cu an dingfel. 13 Ka u le ka nau tla, leilung mipawl in an lo huat tikah, nan mangbang hlah uh. 14 Kannih cu unaupawl kan duhdawt ruangah thihnak ihsin nunnak ah kan lan zo ti kan thei. A unaupa a duhdawt lo tu cu thihnak ah a tāng hrih lai tinak a si. 15 Zokhal a unaupa a huatu cu laithat a si, cule laithattu cun amah ah sankhuk nunnak a nei lo ti nan thei.

16 Jesu Khrih in kan hrangih a nunnak a pek ruangah duhdawtnak cu ziang a si ti kan thei. Kannih khal unaupawl hrangah kan nunnak pe ve ding kan si. 17 Asinan zokhal hi leitlun thil le ri neiin, a unaupa tlasamin a hmu ih, cu pa parah lainatnak a nei lo tu cu ziangtin so Pathian duhdawtnak cu amah ah a um ringring thei ding? 18 Ka fahniangletla, ṭawngkam lawngin le kâ lawngin duhdawaw loin, tuahnak in le thungaingaiin duhdawaw sawn uhsi. 19 Cule thutak ihta kan si ti kan thei ding ih, cumi in Pathian hmaika-ah kan thinlung ṭihphâng lo ten a umter ding. 20 Ziangahtile kan thinlung in thiamlo in coh asile, Pathian cu kan thinlung hnakin a tumsawn ih, thil ziangkim a thei.

21 Duhdawt mitla, kan thinlung in thiamlo in coh lo asile, Pathian hmaika-ah ralṭhatnak kan nei. 22 Cule kan dil mi pauhpauh a hnen ihsin kan ngah, ziangruangahtile a mithmuhah a thupekpawl kan thlun ih, a lunghmuitertu thilpawl kan tuah ringring. 23 Cule a thupek cu hihi a si: a Fapa Jesu Khrih hmin kan zum ding le kan hnenih thu in pek vekih pakhat le pakhat kan duhdawtawk ding hi a si. 24 Pathian-ih thupekpawl a thluntu cu Pathian ah a um ringring ih, Pathian khal amah ah a um ringring. Cule kan hnenih in rak pek mi Thlarau zarin anih cu kanmah ah a um ringring a si ti kan thei.

4

Thlaraupawl Zăwihliahnak

1 Duhdawt mitla, thlarau pauhpauh zum hlah uh, Pathian hnen ihta an si le si lo thei dingah thlaraupawl cu zăwihliah hmaisa ta sawn uh, ziangruangahtile profet deu tampi hi leitlun ah an ra suak zo. 2 Pathian Thlarau nan theih theidān cu hihi a si: Jesu Khrih cu milai taksa in a ra ti a phuangtu thlarau pauhpauh cu Pathian hnen ihta a si. 3 Cule Jesu Khrih cu milai taksa in a ra ti a phuang lo tu thlarau pauhpauh cu Pathian hnen ihta a si lo. Cucu Khrih dodaltuih thlarau a si. Cule hihi Khrih dodaltuih thlarau a ra ding tiih nan rak theih mi cu a si, atu ah cuih thlarau cu leitlun ah a rak um zo.

4 Fahniangletla, nannih cu Pathian hnen ihta nan si ih, nan sungih umtu cu leilung ih umtu hnakin a nasat sawn ruangah annihpawl cu nan rak neh zo. 5 Annih cu leilung ihta an si. Curuangah annih cun leilung thil thuhla an rel ih, leitlun mipawl in an thu an ngaithla. 6 Kannih cu Pathian hnen ihta kan si. Pathian a theitu cun in ngaithla ih, Pathian hnen ihta a si lo mi cun in ngaithla lo. Himi in thutak phuangtu thlarau le mibumtu thlarau cu kan thei thei.

Khrih vekih Duhdawt

7 Duhdawt mitla, duhdawtnak cu Pathian hnen ihta a si ruangah, pakhat le pakhat kan duhdawaw ding a si. Mi a duhdawtu pauhpauh cu Pathian hrin mi a si ih, Pathian a thei. 8 Mi a duhdaw lo tu cun Pathian a thei lo, ziangahtile Pathian cu duhdawtnak a si. 9 Pathian duhdawtnak cu kan hnenah hitin a lang, a Fapa zarih kan nun theinak dingah, Pathian in a Fapa neihsŭn hi leitlun ah a thlah. 10 Duhdawtnak cu hihi a si, Pathian kan rak duhdawt si loin, Pathian in in rak duhdaw ih, kan sualpawl hrangah tlăwnlungawithawinak dingah Pathian in a Fapa a thlah ti a si sawn. 11 Duhdawt mitla, cutivekin Pathian in in rak duhdawt a si ahcun, pakhat le pakhat duhdawaw ve ding kan si. 12 Zohman in ziang tik hmanah Pathian an hmu dah lo. Pakhat le pakhat kan duhdawtawk asile, Pathian cu kanmah ah a um ringring ih, a duhdawtnak cu kanmah ah famkimter a si.

13 Pathian in kan hnenah a Thlarau in rak pek zo ruangah, cumi in kannih cu Pathian ah kan um ti le kanmah ah Pathian a um ti kan thei. 14 Cule Pa in Fapa cu leitlun Rundamtu si dingah a thlah ti kan hmu ih, cumi cu kan theihter a si. 15 Zokhal Jesu cu Pathian Fapa a si ti a phuangtu cu amah ah Pathian a um ih, amah khal Pathian ah a um. 16 Cun Pathian in kan hrangih a neih mi duhdawtnak cu kan thei ih, cumi cu kan rak zum. Pathian cu duhdawtnak a si ih, cuih duhdawtnak ih a um ringring tu cu Pathian ah a um, cule Pathian khal amah ah a um.

17 Thuṭhen ni ih ralṭhatnak kan neihnak dingah, duhdawtnak cu hitin kanmah ah famkimter a rak si. Ziangruangahtile kannih cu amai nundān vekin hi leilung tlunah hin kan nung a si. 18 Duhdawtnak ah ṭihnak a um lo, duhdawtnak famkim cun ṭihnak a dawihlo sawn, ziangruangahtile ṭihnak ah hremnak a tel. Ṭihnak a neitu cu duhdawtnak ah famkimter a si hrih lo. 19 Amah in in rak duhdawt hmaisak ruangah amah cu kan duhdawt a si.

20 Mi pakhat in, «Pathian ka duhdawt,» ti siin a unaupa a huat asile, amah cu thuphan per a si. Ziangahtile a hmuh mi a unaupa hman a duhdawt lo asile, a hmuh dah lo mi Pathian cu ziangtin so a duhdawt thei ding? 21 Cule amai hnen ihsin kan neih mi thupek cu hihi a si: Pathian a duhdawttu cun a unaupa khal duhdawt seh.

5

Leilung Nehnak

1 Zokhal Jesu cu Khrih a si ti a zumtu cu Pathian hrin mi a si ih, mi kip amah hringtupa a duhdawtu cun a hrin mi khal a duhdaw a si. 2 Pathian kan duhdawt ih a thupekpawl kan thlun tikah, himi in Pathian fātepawl kan duhdawt a si ti kan thei. 3 Ziangahtile Pathian kan duhdawtnak cu hihi a si, a thupekpawl kan thlun hi. Cule a thupekpawl cu phurrit an si lo. 4 Ziangahtile zokhal Pathian hrin mi cun leilung a neh. Leilung a nehtu kan nehnak cu kan zumnak hi a si. 5 Leilung nehtu cu zo a si, Jesu cu Pathian Fapa a si ti zumtu hi a si lo maw?

Pathian Fapa Theihpitu

6 Anih cu ti le thisen ihsi a ra mi Jesu Khrih a si. Anih cu ti ihsi lawngin a ra lo ih, ti le thisen ihsin a ra a si. Thlarau cu thutak a si ruangah, theihtertu cu Thlarau a si. 7 Ziangahtile van ah theihpitu pathum an um: Pa, Kamsuakthu le Thlarau Thianghlim an si. Cuih pathum cu pumkhat an si. 8 Cule leitlun ah theihpitu pathum an um: Thlarau, ti le thisen an si. Cuih pathum cu pakhat ah an lung a rual. 9 Milai theihternak hman kan cohlan a si ahcun, Pathian theihternak cu a ropisin a si. Ziangahtile Pathian-ih theihternak cu a Fapa thu a theihter mi hi a si. 10 Fapa a zumtu cun amah ah theihpitu a nei. A zum lo tu cun Pathian in a Fapa thuhla a rak theihter mi a zum lo ruangah, Pathian cu thuphan per ah a tuah. 11 Cule theihternak thu cu hihi a si: Pathian in kan hnenah sankhuk nunnak in rak pe zo ih, cuih nunnak cu a Fapa ah a um. 12 Fapa a neitu cun nunnak a nei; Pathian Fapa a nei lo tu cun nunnak a nei lo. 13 Sankhuk nunnak kan nei ti nan theihnak dingah le Pathian Fapa hmin nan zum theinak dingah, Pathian Fapa hmin a zumtu nan hnenah hi thilpawl hi ka ngan a si.

Thlacamnak Hnget

14 Amah ih kan neih mi ralṭhatnak cu hihi a si, amai duhnak thawn milawih ziangkhal kan dil asile anih in in ngai a si. 15 Cule a hnenih kan dil mi pauhpauh a ngai a si ti kan thei. Cumi kan theih asile, a hnenih kan dil mi cu kan ngah ding a si ti kan thei.

16 Mi pakhat khat in thihnak ih mi hruaitu si lo sual a unaupa in a tuah rero lai a hmuh asile, a hrangah thlacam seh. Cule Pathian in thihnak ih mi hruaitu sual a si lo mi a tuahtu hnenah cun nunnak a pe ding. Thihnak ih mi hruaitu sual a um. Cumi hrangah thlacam seh ka ti lo. 17 Dingfellonak hmuahhmuah hi sual a si, cule thihnak ih mi hruaitu si lo sual a um.

18 Pathian hrin mi zokhal in sual a tuahpeh vivo lo ti kan thei. Pathian hrin mi cun amah le amah a kilhimaw ih misualrálpa in amah cu a thâm thei lo. 19 Kannih cu Pathian hnen ihta kan si ti le leitlun pumpi hi misualrálpaih kut sungih um a si ti kan thei. 20 Pathian Fapa cu a ra ih a dik mi pa kan theih theinak dingah, anih in theihthiamnak in rak pe zo ti kan thei. Kannih cu a dik mi pa ah kan um, cu pa cu a Fapa Jesu Khrih a si. Amah cu Pathian dik le sankhuk nunnak a si.

21 Fahniangletla, milempawl ihsin kilhim aw uh. Amen.